جيت اغسل ذنوبي بعزائك
تشملني يحسين بدعائك
تعدل مساري .. كربلائك
………………………...
ما طامع بجنة عدن .. لا طامع بجاه ومال
ماريد شي من دنيتي .. مقتنع انه بهالحال
ماريد سمعه ولا مدح .. لا عني مبدع ينگال
بس الاريده سيدي ..  منك قبول الاعمال

كل كلمه اقراها بمصابك
توگف عوض عني اعله بابك
صارت شعاري .. كربلائك
………………………...
من احضر انه بمجلسك .. اترك الدنيه بظهري
وعيوني اسخرها الك .. ودموعي لجلك تجري
لو ما يصير من اللطم .. احمر شسوّي بصدري
لو ما گظيته بالعزه .. ما يسوه اعيشن عمري

يالغالي تستاهل اخدمك
واشعاري كلها تبدي بسمك
ملهمتي ثاري .. كربلائك
………………………...
يا سيدِ وانه العبد .. يا ملك وانه الخادم
يا قائد بجيشك صرت .. جندي وابد ما نادم
يا ولي النعمه وما ردت .. كل اجر ردتك سالم
ما سلم من عندك اثر .. جيش اعله جسمك هاجم

يالداست الخيل اعله صدرك
سالت زكيه ادموم نحرك
روّت صحاري ..  كربلائك
………………………...
بذنوبي اصوبك جم سهم .. واحد بصدرك نازل
واحد يحز نحر الطفل .. واحد بعين الكافل
واحد اذا ما ناصرت .. كل حگ واعوف الباطل
واحد اذا اتبع شخص .. عالغلط شفته ايجامل

مذنب صدگ بس والله احبك
وانت الابو الما يقسي گلبك
وبروحي شاري  .. كربلائك
………………………...
اتمنه هسه بهالوضع .. وانه اعله خدّي مدمعي
انزل من المنبر ركض .. للباب اروح بلا وعي
والطم وادگ يم فاطمه .. وغيري اليجي يقره النعي
مو ضيف هيه ام العزه .. وام العزه ما تندعي

كعدتها بالباب ادري بيها
فوگ الضلع تلطم بديها
يلچمها طاري .. كربلائك
………………………….
#احمد #العكيلي

#ام البنين              #احمد #العكيلي

سافر الغالي وصحت بمْوادعه
الله يرحمني برحمته الواسعه
وين رايح گتله وين
يا حبيبي يا حسين
الله يرحمني برحمته الواسعه
………………………………
عيني من يوم المشه عافت نظرها
وروحي بس العبره مخنوكه بصدرها
ايعينها الله المثلي وايعظم اجرها
لو عمرها ايروح شيعوّض عمرها

حسين عمري وهو جاهي ومالي
ما اجامل من اگولن غالي
واغله من ذني الثنين
يا حبيبي يا حسين
الله يرحمني برحمته الواسعه
………………………………
انه خادمته وشرف كلمن يخدمه
وعلى اولادي بالمعزه جنت اقدمه
بالدرب انطر واشم اثار جدمه
أبني للرجعه امل وانوب اهدمه

الواقع يكلي يدوم افراگه
ما يردلي ولا بعد نتلاگه
لا يرد بس كونه زين
يا حبيبي يا حسين
الله يرحمني برحمته الواسعه
………………………………
هاي سبحة فاطمه تشهد عليه
ادعي تسهيل الامر لبن الزجيه
ياعلي ادركني اصيح بكل مسيه
رجّعت شمْس الله رجْع حسين اليه

ادري ما يرجع واظل متانيه
هو ابني وانه امه الثانيه
بذمْتي يبقه لأمه دين
يا حبيبي يا حسين
الله يرحمني برحمته الواسعه
………………………………
من رجع مرسال منه وجايب اخبار
بدمعة عيونه قريت بكربله شصار
حسين مذبوع وخيامه احترگت بنار
وفوگ صدره من الحوافر ظلت اثار

يگلي عباسج جفوفه امگطعه
كتله دون حسين اضحّي الاربعه
اركاب افديه مو ادين
يا حبيبي يا حسين
الله يرحمني برحمته الواسعه
………………………………
من شفت زينب اجت مو هيه جنها
شعر ابيض حمره عين ازرگ متنها
الشام والطف خذن اغله اثنين منها
كل حزن يعگوب يخجل من حزنها

وين ادير الوجه عن الغاليه
من تردلي بلا حبايب خاليه
انظرلها مالي عين
يا حبيبي يا حسين
الله يرحمني برحمته الواسعه
………………………………
لحظه لحظه انتظر ساعة وفاتي
بلا حسين شتسوه لو طالت حياتي
منين ماگلّبها تجرح ذكرياتي
ضاعت بطف كربله كل امنياتي

ادعي ربي هناك تغمض عيني
وبين عباسي اندفن وحسيني
كون بين الحرمين
يا حبيبي يا حسين
………………………………