قناة أنصار سيد الشهداء

كلمن ايگــول روافِـض مايِهِـمنه
خيمة حسين وابو فاضل تِـلمنه
_________________________

الله دايِـر فـــوگ طِينَــتـــنــه دمِــع
حته لجل حســــين أكـثـر ننـفــجِـع
ضُوَه اعيونه ايكفِّي ماحاجه الشمِع
النـار مو بِخـيـامه تســعـر ، بالضِـلع

لمّـن اتهِـيـج يِـهِـيج أكـثر عَزِمنه
خيمة حسـين وابو فاضل تِـلمنه
_________________________

اتهيج بينه الجمــره لو رَف العَـــلم
والحَـــراره البِينه من نـار الخِــــيَم
لَحَد هاي اللحظه يوجعـنه الســهم
مِن يهـل عاشـــــور ينـعـــاد الألــم

كل سهم بيك غُفه بصدرك سَهمنه
خيمة حسـين وابو فاضــل تِـلمنه
_________________________

جَمــــرة العــاشِــــــر أبـد ماتِنـطفي
وِالْيحــافِـظ عالحـراره إيظـل وَفِي
الْينتـمي لَحســــين أبـد مـو طائفي
اجروحنه ابطلعت القائِـم تنِـشــفي

عدنه مَوعـود يجي ايبـرِّد ألمـنه
خيمة حسين وابو فاضل تِـلمنه
_________________________

إِخـدِم اشما عـنـدك بروحــك وِفَـه
حسين يسـتاهل لَطُمنه البي شِـفَه
صُـورِته بنـص گلبي بس مـاشايِفَه
ويـن ما أُوگَـــــع أحِـس بمـــوقـفه

تبقه الِحمـول إذا مو هــوَّ يَـمنه
خيمة حسين وابو فاضـل تلمنه
_________________________

هل مجـالس تبقه خيمــه امـأمِّنَـه
بـبو فاضــل والحُســين امحَـصِّنَه
نِـبقه نحــييــها اعلـه مَـر الأزمِــنَه
حسين يتجـدد عَـزائـه ابكل سـنَه

والتَعَـب طاح نِصيح شما لُطَمنه
خيمة حسين وابو فاضـل تلمـنه
_________________________

حسين لازم كل سَنه انردلَه الجِزَه
حته وَســط اگبـورنه انقيم العَـزه
الزهــره لمّـن ترضـه أكـبــر جائـزه
بين اديها اتحـط عَمَـلـنه او تِفْرِزَه

فاطمه اتصيح إدخلوا ياخَدَمنه
خيمة حسين وابو فاضـل تلمنه
_________________________

الخـادم المُخـلـص يِـسخّـر طاقـته
لجـل محبـــوبه الحسـين وطاعِـته
اتعِز عليه كسرت اضلوعـه وغُربته
عطش گلبه وكَسِر ظهره او ذَبْحِته

ضِعنه وِحسين فِتح چفه ولِزمنه
خيمة حسين وابو فاضـل تلمــنه
_________________________

وحگ آخـر نظره بعـيـــــونك بُقَـت
عَلَـه اعيالك من شــفـتـها اتسـلـبَت
الگاع لوما چفـك ايكضــها انچفَـت
ولا تظل عِدنــه كرامـــــه ولا بَخَت

لولا عاشور يظـل طايح عَلَــمنه
خيمة حسين وابو فاضل تِـلمنه
________________________

خادم الزهراء ع
#مرتجى الحساني

45 views08:10