رسالة امير المؤمنين علي عليه السلام الى
الامام المهدي المنتظر عجل الله فرجه الشريف

غايب ما شفت مچتوفه اديه
لزمت سيفي يالمهدي الوصيه
حوّلته الك ثار الزچيه
.......

أنه الكرار راح اكتب رساله الك ياصاحب الثار
وبيّنلك جرم اهل الضلاله. يمهدي والجره وصار
وضم بسمار بابي للدِلاله كسر ضلع امّ لطهار
وضملك سيف يكفيك بقتاله. صحيبي واسمه فقّار

أنه المااخشه وكت الموت موتي
اشرحلك سبب صبري وسكوتي
اصبر الله وصّاني ونبيه
حوّلته الك ثار الزچيه
......

بعدما غاب طه تحت لتراب طغوا اهل السقيفه
علينه تآمروا يالمهدي لاصحاب رضو غيري خليفه
هجموا بالحطب والنار عالباب عله الزهره الشريفه
عصروا فاطمه والمحسن نصاب بالعصره العنيفه

لون ما ديني ما كسروا ضلعها
سحگته برجلي يالمهدي الدفعها
خنگته بأيدي راويته المنيه
حوّلته الك ثار الزچيه
......

تمنيت المنع مرفوع عني. الية الباري يسمح
قسم ما ينجه اي ملعون مني اسوي الدار مذبح
الوصية وديني هنّه الچتفنّي ابد ماعنهم اصفح
أنه الكرار والميدان فَنّي سكوتي وصبري يجرح

صبرت وبالگلب نيران ثاري
يمهدي وامّنو من ذوالفقاري
تمنيت الحرب مسموحه اليه
حوّلته الك ثار الزچيه
......

بعد ميتين عام واكثر تشوف رسالة فاطمه هاي
اذا تقراها صوره ابّالك اطّوف. الك تتوضّح هواي
تشوف امك يغايب تزحف زحوف. عليها جتمعو عداي
تصد ليّة بحبلهم آنه مچتوف وصريعه الزهره بگفاي

اكيد من البواچي تعمي عينك
دعيت الباري من تظهر يعينك
ترد ثار امك الماتت ضحيه
حوّلته الك ثار الزچيه
......

قصاص الظلموا الزهره الحزينه اريد بأيدك يكون
كتبت اسمائهم كلهم ضغينه. يبغضوني ويحقدون
ابد لا ترحم الزمره اللعينه تردهم من يموتون
تحاكمهم اريدك بالمدينه تخلّيهم يندمون

اخذ ثار الزچيه وحز رگبهم
عليهم اشعل النار بحطبهم
ذوله الأسّسوا للناصبيه
حوّلته الك ثار الزچيه
......

اخيراً اقره يوليدي العباره اذا ثارك اخذته
اكشف گبر امك للزياره. فقط تندلّه انته
ارفعه المرقد بقُبّة ومناره بعد لا يبقه سكته
تزور المرقد الشيعه الغياره يمهدي وهذا وكته

عوض عن المصايب والاذيه
نشوف بدولتك اعظم هويه
مرقد فاطمه بعلو الثريه
حوّلته الك ثار الزچيه

سيد زيد الفحام
_________________________

گدام المناره =من نقره الزياره
السلام على الحسين السلام على الحسين
&&&&&&
اعاين عالمناره وانـظـر اشـبـيهـه = مكتوبه الـزيـاره وآنـه أرويهـــه
مكتـوب السلام أعلـه السكن بيهه= على المنحرعلى الاجساد تبديهـه
وانشـوف العبـاره = من نقره الزياره
السلام على الحسين= السلام على الحسين

أقـراهـه الزيـاره وآنـي أگبالــه = سلام الله على الحسين وأعيــالــه
يهنيالـه اليـزوره والف هنيالــه = يزوره حسين ومن يموت يبراله
مـانبقـه حياره = من نقره الزياره
السلام على الحسين السلام على الحسين
&&&&&&
عيوني تشوفه بالنور مكتوبه =تنزل فيض چـن شـلال مصبوبه
تهيـم الـروح بيـه وحيـل مرغوبه= وافكـاري تِسّبح بيهه مرهـوبــــه
كـل احنه اساره = من نقره الزياره
السلام على الحسين= السلام على الحسين
&&&&&&
سـلام الله على أعتأبـك يبـو اليمه = جـدمي أتـروح تمشي يمـك أبهمه
فرح عندي وعبيـرك والله اشتمه = من شبـاچ گـبرك وانحني يـمـــــه
نظل يمه سهاره = من نقره الزياره
السلام على الحسين= السلام على الحسين
&&&&&&
گــــدام الـمنـاره وأنـظـر الـميـدان = چـن حسـين نـايـم وجـهه عالتـربان
دامي ومنحره مرفوع فوگ الزان = وأعـاين عالعليـل شلون ظل حيران
ويطول انتظاره = من نقره الزياره
السلام على الحسين =السلام على الحسين
&&&&&&&
من ازوره احساس عندي ماشفت مثله =يعصـرني الالم ويـاه الـف عــلـــه
يـاهـالناس حـب حسين ماشـخلــــــــــه =جـنن هالبشـرماتـنثـنـي وهــلــــــه
وحب آله الغياره = من نقره الزياره
السلام على الحسين= السلام على الحسين
&&&&&&
سالكم الدعاء
خادم الحسين ع
الحاج ابو إياد البيجاوي

ياأبا عبدالله…. ياأبا عبدالله

يــاسوالفنة وملحنة  وفطرتك  فطرة  اهلنة
والله يحسين بصراحة انتة تستاهل عشگنة
شما تعبنة شما بݘينة وياك مــا ظايع تعبنة

سودنتنة ابكد معزت امك ابگلبك
ڰالو  اتحبمن  واﮔلهم  اني احبك
انتة اول واحد اشعر راحة تعبك
انتة اول  وطن  والخدام شعبك

ياأبا عبدالله…. ياأبا عبدالله

السالفة  المابيهة  ذكرك  ياهو  يتصنت عليهة
غالية اجروحك واريد ابدمعة عيوني اشتريهة
ياملاذ الكلشي خايف والحمامة تحب حجيهة

ياحنين وبية حسرة ابكد محنتك
تسولف وياالله علينة ابنص غربتك
أشكر  •اللّـہ̣̥   لأن  رازقني  محبتك
م̷ـــِْن روازين الضوة انغازل نجمتك

ياأبا عبدالله…. ياأبا عبدالله
 
بالصحاري اتعزب افياي بقميصك وصلة وصلة
اتصدق  بخنصر  وخــاتم  والنحر  قربان  لله
تبجي عالسلب اهدومك شخص مثلك وين احصلة

انطيني حرگة واني هم انطيك خنصر
اعذرني اگلك وانتة طبعك دوم تعذر
لْـۆ  ألف  موتة  أموت  اوياك  اقصر
انتة خــيــر  وبــيك عدوانك تطشر

ياأبا عبدالله…. ياأبا عبدالله

النعمة ما تنداس لاكن صدرك انداس ابحوافر
الما يعرفك مــايثمنك  فرهدوك  ابيوم  عاشر
يا أمس واليوم احسة وقبل امس والكاك باجر

عالرماح ودربك امضويه ابشيبة
منذبح  وتسمي  زينب يالحبيبة
اگبالك وصاحو  عليهة ياغريبة
والتهظمك هاي هية اكبر مصيبة

ياأبا عبدالله…. ياأبا عبدالله

فوك سن الرمح راسة وعاليتامة امخلي عينة
بالسبي وماعاف اخيتة عفية روحة شكد حنينة
بالدرب  تحجي  ويراسة  تگلة  زينب  ماغفينة

واحنة  هسة  نزور  شباݘة ونگلة
الدنية  لوما  انتة  بيهة تصير ذلة
لآزٍم ٍ اليهواك  عن  كلشي  ايتخلة
كلهة ترخص وانتة شو يومية تغلة

عشگك اشما عتك يغلة ياحبيبي شلون نعمة
الناس رادت رحمة  •اللّـہ̣̥ ومايعرفون انتة رحمة
العشك غير حسين واحد مايحس بالعشك زحمة

ياأباعبدالله… ياأباعبدالله

تمت بنظرة مولاي الحسين ع
كلمات الخادم… حسين حمدان الدلفي

بـــيــــك من الحســـين هواية مــو جود
وبـــوجهك الـــشال الـــرايــــة والـجـــود
عاشـــــر من الاحــــزان
ودمــــك هــمة قـــربان
بـــيــــك من الحســـين هواية مــو جود

ــــــــــــــــــــــــــــــــــــــــــــــــــــــــ

قســه وياك بزمانك ياحسافـــه
لئـن بيك الحـسين هواي شافـه
وسر كل الخــلود البيـك عـافــه
وهــم للقائــم الـعــباس ضــافه

يلعشت العمر غالي اليشـــــبهك
ويشبه عـــمك الـعباس وجهــك
مخلوقين من طين
منة الصار الحسين

وبيكم خله الايمان
عاشــر من الاحـزان
بـــيــــك من الحســـين هواية مــو جود

ــــــــــــــــــــــــــــــــــــــــــــــــــــــــ

عاشر فلسفة انته من الاحــــباب
وسر ايت كهيعص لغز الاكتــــاب
لذالك هل عليك وشنو احـــــراب
رادو ماتضل من هاي الاسبـــــاب

الكتب نـهج البـلاغــة والجفر ذاك
من عــلمة وخياله شـــال ونــطاك

ولـورادو يفـسرون
حيدر بيك يلـگون

علم من ال عدنان
عاشـر من الاحزان
بـــيــــك من الحســـين هواية مــو جود

ــــــــــــــــــــــــــــــــــــــــــــــــــــــــ

حقدهم مبتدي بعهد السقيــفه
من طلحة وأمية وكل حليــفه
حقدو شي علي منصور سيفه
وكل هذا وبـــقة حيدر خليــفه

وحكم كل ال أمية وبني العباس
مايمحونكم كل ذولـة الــرجــاس

وتـبقــون الامامة
ومن الله الزعامة

وهم تبــقون قران
عاشـر من الاحزان
بـــيــــك من الحســـين هواية مــو جود

ــــــــــــــــــــــــــــــــــــــــــــــــــــــــ

عشت عمرك دليل اعله البراهين
ورسالة انكتبت بعباس وحسـين
زيــنب كاتـبتــهه بـدمـعة الـعـين
يبقون ال احـمد طـول الســـنين

جرح البـاب بــيك وكـل عـصرته
وجــف الـكافـل الـــي دلل  اخته

حــزن كـل ذيــج الايام
وصرخت خوف الايتام

ونت الفاگدة اخوان
عاشـــر من الاحـزان
بـــيــــك من الحســـين هواية مــو جود

ــــــــــــــــــــــــــــــــــــــــــــــــــــــــ

أمــــر مـــن الله بـلتعله المــناره
وروحك همة راداهـــه بجـــواره
يبن اعظم نبي وذيـج الصـــداره
ضريحك للوطن سادس حضاره

ســرآ مــــن راء خــــله بــــلادي
تفــسيره وجـودك علي الهــادي

ربــك هــوه راده
كعبة الكل عـباده
وتتمناه الـــوطان
عاشر من الاحزان
بـــيــــك من الحســـين هواية مــو جود

ــــــــــــــــــــــــــــــــــــــــــــــــــــــــ
اللهم صلي على محمد وال محمد

#كلمات ✍️خادم الحسين
(مـــحمـــد الـبــنداوي)

منك وإليك سيدي الامام الهادي

على وسادة منامي الوالدة ارسمها ....بدمـــع عيني اعاتبها واكلمها
..........
رسمت امي بدمع من عيني يتجاره... على وسادة همومي وروحي محتاره
صحت يحبيبه يمه وبالگلب ناره ... ياهو اخلاف عينج روحي يرحمها
...............
بتوالي الليل افز الفزت الامي. ... مثل مفطوم يصرخ والجفن دامي
انه المحتاجه ليها والگلب ضامي ... احس بيه حنين يريد الي يضمها
.............
احس محتاجه تشبكني وتكلمني ....ولو ليله تجيني بلهفه وتضمني
يمه تصيح روحي ودهري علمني... على ادموعي انام وعيني اسلهمها
............
على ادموعي انام واحجي وياها ... وعاتبها عتب والروح تنعاها
وحلفها بعذابي وحزني بجفاها .... تمرني اقسم عليها تشمني واشتمها
.............
يفز حزني ويصيح شما يفز يمه ... ودمع عيني يكمل بالحزن رسمه
احاجيها واگلها وروحي متالمه ... ييمه الروح بعدج عاشرت همها

.........

اكلها وعمري بعدج مانمت ليله .... اعد نجماته يمه وحالي اشگيله
بعد عينج غريبه بوحشتي ذليله .... تطش روحي بحزنها ومحد يلمها
 

عاشرني الهظم والهم يلازمني ..... يصــــابحني البجي  وآهي تنيمني

الصبر دايم يكعدني ويكومني ... الحزن اكلي وشرابي ونسمه الأشتمها

........

الحزن صار الهوى البريتي اشتمه .... وي جرت النفس يشهك يجرهمه

يمه تصيح روحي وهي متعلمه .... بحنانج تغفه يمه ودهري يتمها

.........

احاجيها بعذابي والكلب مدمي ......... ورسمت عيون تبجي جنها عين امي

ورسمت الها حظن من دمعتي وهمي.... واكلها البت حلاة امها التنيمها

-----------------------------------------------------------

ونسالكم الدعاء ام هدى الخزاعي

دار الزمن

مواساة. الزهراء ع. للخدام

دار الزمـن خـدام الاحـسين
هسّه آنه اساعدكم بالاونين
متعود اوليدي اعله زوار
چنتو بضريحه ليل ونهار
+++++++++++
الرابي اعله الدمع للضامي والامه
وحشه ابلا مجالس عايش ايامه
لحسين وغربته وجمرة اخيامه
عطشانه ونـين الـيوم خـدامـه

واعرف زيارة اغله محبوب
من البُعد ماتروي الاگلوب
الا بخـرز شـباچه تـندار
چنتوا بضريحه ليل ونهار
+++++++++++
عنـكـم بالـنيابـه ادموعي سچابـه
ضريح حسين اجيله واوگف ابابه
بدمع دعوه الفرج توگع عله اعتابه
يرب ادعي الضريحه ترجع احبابه

صوب الدرب تربي المنارات
مشتاكه من عدكم الصلاوات
اعرف ظرفكم عندي لخبار
چنتو ابضريحه ليل ونهار
+++++++++++
اعله باب القبله لدخل منه كل مره
چنت مـمليه منكـم انـظـر الحضره
اون وحسين ناده اعليه من گبره
اعله كيفچ ويه روحج يُمه يالزهره

عينچ جرحهه اتلچمه لدموع
واللطمه هاي اتأذي لضلوع
تگضي ويرد حسين ينزار
چنتوا بضريحه ليل ونهار
++++++++++++++
خطف نور الثريه ولونه صار اسمر
اتوچه اعله دمعي اصعد عالمنبر
مثلكم گمت اون بطوري يتفسر
ويـن اللـه وتـرد زوار ابـو الاكـبر

وينـه اليساعد امـه تقـرون
وانه اقره وين الله ويردون
يقرولي عن اخيامي والنار
چنتوا بضريحه ليل ونهار
++++++++++
عزاكم حيل مشـتاگـه البواچيه
تِلم منكم دموع اشتاگت ايديه
اگصدكم واون يم كل حسيـنيه
ابثواب الـما اجوها اعـگد الـنيه

اكتب عباره بدمعي عالباب
يهل المدامع واغله الاحباب
عني گطعتو شصار ماصار
اتطوف بضريحه ليل ونهار
+++++++++++
اللهي بجاه چف ضامي شمر مايه
بجاه الراح حيله ابطيحة الرايه
الفرج للمهدي صاحب أخر حچايه
محرم لا يجي وما عدهم قرايه

تصعب عليهم ذيج الايام
تحرگ گلبهم مثل الاخيام
مابيني بين الخادم اسرار
چنتو بضريحه ليل ونهار

ثائر الربيعي

بدمعة الروح وجمرة النوح
گلوب ناحت يا علي مصابك فِجعهه
عيون لجلك هلّت امن الدم دمعهه
بدمعة الروح وجمرة النوح
-----------------
يا علي گلوب اليتامه * ناحت بلوعة هضمهه
چانت ابجالك عزيزة * وحسّت الليله ابيتمهه
ما تريد بلحظه تنسه * مصابهه وشدّة ألمهه
تنساك يا حامي الحمه * وشلون تنسه الغانمه
فگدت ابفرگاك الحمه * اوعگب عينك زاد همهه
حسّت اليوم ابْلوعه وهموم
گلوبهه المتصدّعه مصابك صدعهه
عيون لجلك هلّت امن الدم دمعهه
بدمعة الروح وجمرة النوح
---------------
يا علي وكل الرعيّه * ايتام محتاجه لحنانك
چانت ابهيبة وجلاله * تستظلّ بعظم شانك
أمست الليلة حزينه * تنظر ابحسره المكانك
وتشوفه خالي وتنتحب * وحشاهه لجلك تلتهب
وشلون عنهه تنحجب * خايفه وفگدت أمانك
الخايفه شلون تفگد العون
وانت بالشدات يا حيدر درعهه
عيون لجلك هلّت امن الدم دمعهه
بدمعة الروح وجمرة النوح
----------------
اوكل محب عاشگ لشخصك * ما حمل حزنك وناره
شلون حال الچان يگضي * ابخدمتك ليله ونهاره
عيون الاصبغ بن نباته * اعليك مدمعهه تجاره
معذور يا رمز الوفه * صوّر وفاءه ابموقفه
بسيل الدموع المذرفه * شرح حالة إنهياره
اوداع ابو حسين ابدمعة العين
فجع كل الناس وتغيّر وضعهه
عيون لجلك هلّت امن الدم دمعهه
بدمعة الروح وجمرة النوح
-----------------
سيدي معذور الاصبغ * لو ثگل لجلك حنينه
يا علي والكون كلّه * حگ عليه تبچيك عينه
حيث كل الكائنات * الحيّة لمصابك حزينه
وهذا الأمر يا حيدره * صوت الإوَزّ ايفسّره
الشخصك يريد يأخّره * يدري وعدك گرب حينه
صاحن بصوت عرفن الموت
راد عايلة النبي ايفرّق جمعهه
عيون لجلك هلّت امن الدم دمعهه
بدمعة الروح وجمرة النوح
-----------------
يا علي وحتى الجماد * اعليك حنّ وهمل دمعه
يا علي وراد ايتكلّم * لچن تكليفه يمنعه
اتمسّك البسمار طارف * محزمك رايد يگطعه
ويأخّرك چان الگصد * خايف تروح وما ترد
عن الحياة وتبتعد * اويختلف هل كون وضعه
يا علي تروح وتترك جروح
يا علي وليك الحياة احنت ضلعهه
عيون لجلك هلّت امن الدم دمعهه
بدمعة الروح وجمرة النوح
-----------------
يا علي هاي الاصوات * الچان سلوتهه ابوجودك
رحت عنهه ويتّمتهه * وراح يا كرار جودك
رحت يا بالحسن ساجد * اتودّع الدنيا ابسجودك
تودّع يحيدر سجدتك
وتتخضّب ابدم هامتك
والجمرة تبقه ابشيعتك
وشلون تنسه امصيبتك
اوبچت هذا اليوم لجلك * يا علي حتى المنية
---------------
#عقيل_الكاظمي بغداد
من ديوان خواطر الأفكار ج/1 ص/ 41

صرخه مـن جرح الگلب يا عـلـي فـراگك صـعـب
صوّبَتنه مصيبتك يا حامي الجار
--------------
صرخه ودمع يا بالحسن * وجمرة هـضم تتوجّر
ارواح بعدك يا علي * لمصيبتك تتحسّر
بكل الگلوب المؤمنه * حبك سكن يا حيدر
وكـل گلب لمصابك يظل * ينزف دمه للمحشر
فگدت اوياك الـصـبر وراحـت احلام العمر
شوف لوعة عيلتك يا حامي الجار
----------- 1
وچـم عين يا حامي الحِمه * لجلك تِهِل دمعتهه
هل محنه مو بس عيلتك * متلوّعه بشدّتهه
كل الارامل يا علي * لفگدك تظل حسرتهه
وكل المـساكين اصبحت * متحيّره بلوعتهه
چنت للناس الامل وغيّبك سهم الأجل
وظل حلمهه بصورتك يا حامي الجار
------------ 2
وايتامك الچانت تحت * ظلّك يظل الرّحمه
الكل منهم اصبح يا علي * يرعاه نوحه وهمّه
ما چان بوجودك فرِد * منهم يحسّ بيتمه
لاچن بفگدك سيّدي * اتيتّمت كل الامّه
اوعُگب عينك الزمن ذبهه باحضان المِحن
وهذي حالة شيعتك يا حامي الجار
-------------- 3
بهل حاله ظلّت امتك * وحال الملايك أصعب
تواسي النبي أعلى مصيبتك * ولجلك يحيدر تنحب
ونيران سم چبد النبي * هل يوم گامت تلهب
وبسيف ابن مُلجم صُبَح * ضلع الوديعه امـصوّب
مصـابك بگلب الشرع جدّد مصاب الضلع
وظل يعيش بحسرتك يا حامي الجار
-------------- 4
أهل الأرض واهل السّمه * عاشوا بهاي اللوعه
وحتّى الطبيعه اتأثرت * بمصيبتك مصدوعه
حتى المطر حتى الهوه * لجلك يهل دموعه
وروح الحياة اتغيّرت * يا بالحسن مفجوعه
والليالي اتكدّرت والايّام اتحسّرت
من غِبِت عن دنيتك يا حامي الجار
-------------- 5
يا بالحسن هذا الجره * الكون انفجع لمصابك
ودين الله ناح لفرگتك * وظل ممتحن بغيابك
وظلّت صـلاتك حايره * تنتظرك ابمحرابك
ومشتاگ يلثَم جبهتك * يا بو تراب اترابك
يا علي وصاب الدهر سهم احزان وكِدَر
وظل ينوح لفرگتك يا حامي الجار
-------------- 6
عقيل الكاظمي / الشارقة

ياهوه ينطيني اجفوف
ومن عنده ينطيني اعيون
بس بيهن اوصل للشام
واحضر دفن اختي ام عون
امعطلتني اديه وعيني... وزينب تره اتانيني
اختي ام عون..... اختي ام عون
...............................................
اريد احضر دفن اختي التعشگ اسمي واحروفي
ما متعود اتأخر والمأخراتني اجفوفي

ياهو اليفزع ايحققلي الأحلام
اريد اعيون بس ما بيهن إسهام
واردهن والله بس ارجع أمن الشام

امقصر بحقها انه اهواي
وبس رايد اوصل ياناس
ما اروح لأم عون شلون
وبلأسم طلبت عباس
شلون اكسرلها الخاطر...... وما فاك دين العاشر
اختي ام عون........اختي ام عون
..............................................
هيج وكون عندي اجفوف وعالقبله اجبلها
الما رويتها بعاشور منيتي بأيدي اغسلها

وگلت احفر گبرها وصاح الاونين
يادفان هذا ابلايه جفين
وكتلني المستحه من اخت الحسين

ما ضل كتر ما مهضوم
من زينب شكد خجلان
لا اني جبلتها الماي
ولا اني صاير دفان
ماجيتها وعطشانه........ وكل مره ابجيها آنه
اختي ام عون.......... اختي ام عون
..............................................
منو المثلي ويحس بيه ومنو العايش
جرح حاير
ومنو الكله يريد يروح بس ما يكدر يسافر

منو الكلبه قوي بس ضعفه الافراك
منو بنص الحرب بس لأخته يشتاك
ومنو مثلي اعله شوف العين وانباگ

العايش مثل هالاحساس
يركضلي عين وجفين
سالفتي خافنها اتطول
والخبر يوصل لحسين
المكسور ضهره اعليه... مو مال أكله شبيه
اختي ام عون.......اختي ام عون
..............................................
أنه المو جدمه ما عانه الماعانني جفيني
أنه الضلت بنفسه ايصيح زينب يابعد عيني

گلبي اعليها من كل صوب محروگ
ولسه بروحي تاكل طبت السوگ
بنص شمات گالو وگفت النوگ

ما ماشيه اختي ابلياي
ومن دوني طبت للشام
بالشمس تمشي وبالضيم
البيدي نصبتلها اخيام
الحطتني بين اعيونها...... غيرو لون امتونها
اختي ام عون........ اختي ام عون
...............................................
آنه اول اخو يرتاح أمن اخته اتگله يوليدي
وأنه الرادتني ادفنها بس يا وادم شبيدي

الحرگ كلبي اديه وذني العيون
تعذرني ادري بس ما اروحن شلون
دنيا وآخره مطلوب لأم عون

البيه الحجي ما ينگال
وما ضامي هيج بعاشور
وادريها تعذرني ام عون
بس آنه أضل ما معذور
وابقى عبد عند اختي..... أم گلبي واحبيبتي
اختي ام عون....... اختي ام عون

#احمد ماجد الكلابي

صاح آذان الفجر ياشيعه
حان قرآن الصبر توديعه
هدّموا والله اركان الهده
00

إرتفع بالكوفه صوت آذان الجروح
ودّعوا فيّ اليتامه وحيّ عالنّوح
هالفجر بالسيف باء البسمله إيروح
بوحشته حته الورد هاليوم مذبوح

أسود العالم لبس لفراكه
بالصلاه طفوه شمس عشاكه
بالكلب عام الحزن هسه بده
هدموا والله اركان الهده
00

إبگلب مالوم گام اينادي جبريل
العروة الوثقه دمه من هامته إيسيل
فاتحه ليه العرش يقراهه ترتيل
والحياة إبغيبته الكل شيعته ليل

والملائك تبجي ليه إبعبره
وبالسواد إتوشحت بالطبره
إقترب ويه الزجيّه موعده
هدموا والله اركان الهده
00

مو فقط أحبابه حيدر بعده أيتام
يتّم المحرآب والقرآن والاسلام
وللحزن من سال دمه نشرت أعلام
والنوافل چن ثواكل كلهه اآلاآم


لجله تسبيحه إبدمع محرابه
والعرش ناصب عزه لمصابه
ياهضيمه راح ابو اْنفاس النده
هدموا والله اركان الهده
00

شعل بالسيف المرادي نار الاحزان
فاضن آياته ابطبرته الجّان قرشآن
والمرادي هدّمه عامود الاذآن
المن محّمد والزجيّه هيبته چان

صاحت الاكوان من اتهدّم
الف لعنه إعليك يابن ملجم
والف لعنه كلمن الحيدر عده
هدموا والله اركان الهده
00

طير الاذآن اوجناحه والله مكسور
لو أسم حيدر علي ماچان مذكور
تسجد إبابه ملائك من تجي إتزور
وإسمه تتوضه وتلفضه كوكب النور


الله يدري اْشكبره حيدر كلبه
النّدب فزت وربّ الكعبه
شيّعه جبريل هو اووسّده
هدموا والله اركان الهده
00

الدّعه بي موسه يهلك الله فرعون
و كل وكت بسمه اليسبح چان ذا النون
بالصبر كعبه او حنانه مالي هالكون
يل عله ارموشه علي أيتامه ينامون

المسح جبريل جنحه إبدمه
الهوه يتروّه من يشتمّه
موته صار ابيت الله ومولده
هدموا والله اركان الهده
#خادم الحسين سيد سجاد العميدي


2020/ 4 / 17

      شِلْـتي السِمه اعله امتونچ
      ودم تمـــطر ٱمن اعـيــونچ

محـتـاره اشــوفـچ منـچ اشـرايِح
يمـكـن گـمــــر من عـالـمـچ طايِح
-------------------------------------------------------------

زينب وٱعرفنـج جبــل     لا ينـحـــني ولا يهـــتـز
رغم المصيبه الصابتج     جرحج بصـبـره امطـرز
حزوا اشچم منحر إلچ     بـس ثورتــج ماتـنــحَّـز
بيچ الله أحيى كـــربله     والتل حَـدِر جدمچ فَـز

واتكـلَّـمْ اوصاح الـتّـل  مثل النهــر ما أنذل
بالطف خِسَر واترابي ظل رابح
يمكن گـمــــر من عالمـج طايح
_

انتي الأميره ابـعــفـتـچ    معصومه من شر كل شر
كل خطوه إلج رُفعت علم   وبصــفـها خَــظّر  منـبر
مايحـتويج الطف چذب     يحتاجلــج طــف أكــبر
بيچ النبي وبيچ الحـسن     وحســين وأمه وحيدر

عبـاس بـيـچ وزوده     سيفه او لواه وزنوده
يلسان أخوج ابو الحچي المالِح
يمكن كمـــــــر من عالمج طايح
____

المـــــوت مـايدناج أبـد     لو ما تـسـمـحيله انتي
والنـار تتحـــــــوّل بَـرِد     لو بالدُعَـا اتعــامـــلـتي
خافوا اجفـوفج تـنـرفع    من عدها وِتچـتــــفـتي
قادره اتخسفين الأرض    بس عـنــهـم اتـنـازلـتي

لو ما صمودچ بالطف     چا هسه كون الله إلـتف
بس الكريم ابعادته يسـامح
يمكن كـمر من عالمج طايح
_

شِفتج أسيرة وماشفت    صفـنت رعُب بحــلامج
والنار حســدت جَـنِّـتِچ    رادت تطـب بخـــيـامج
حرگوها فوگــچ مادروا    إلجـــنه تحـت أقـدامج
ألف وثلث ميــــة ســنه    بينـه تعــيــــــش آلامج

ارتاحي ياجـرح الطف    ابعون الله هَمْ گلبج خف
ظل ناظرج صوب النهر شابِح
يمكن كمــــر من عالمج طايح
_

قُـوَّة عـدوّچ بالعــــــدد     او گلـبج قَوي ابإيمــانه
درب الســبي منچ تعب     بس انتي مـاتـعـــبــانه
يـازينب انتـي أول نهـر     تروينه بس عطـشــانه
وبوكت ممنـوع الحچي    صــوتـچ فـتـح ديـوانه

وتـسـيـديتي اعليـهم      نســــــوان سويتـيـهم
يل حته صوتج بالسبي ايكافِح
يمكن كمــــــر من عالمج طايح
_

كل دمعه من عينج جرت    موكب مـواجع يحـدي
كل لچمــه بعـــزاز الگـلب    مَرْهَـمـها چف المـهـدي
كل صرخه فوگ التـل إلچ    من عـدها ثـائـر يبــدي
كل ضربة ثار اعله المـتن     ماعدنا غيمــه اتعــدّي

باجر الطف إيعـيده    والمهدي يحكم بيده
حگّج يرجعه بسيفه ابو صالح
يمكن كـمــــر من عالمج طايح
__________

بمناسبة اربعينية مولاتي زينب ع

خادم الزهراء ع
#مرتجى الحسَّاني

اريد أبچي بضريحك حتى ارتاح
اشحلاته الدمع يمك يجلي الهموم

خلص صبري واجيت اشكيلك الحال
مظلوم واجيت اشتكي المظلوم

من حرموني من صحنك يمولاي
چني من الهوه والماي محروم

يوم الما اشوفن حظرتك هاي
مصيبة بدهر كامل چنه مو يوم

من عفتك لحد ما ليك رديت
هذاك الوقت كله گلبي مهموم

من عفتك لحد ما ليك رديت
ولا متهنيه عيني بلذة النوم

طفل أخرس وضاع بوسط عميان
ياهو اليدري بي تايه ومهضوم

ما تعرف شكو بگلوبنا الناس
شكبرها حسرتي من حسين محروم

گلبنا يعتنا ليك ومن اجيناك
طير الموت فوگ ارواحنا يحوم

ما اصبر على فراگك يمولاي
خليني بضريحك مستقر دوم
.
.
.
#الشاعر_مصطفى_الشافعي

(( يا صاحب الزمان ))

قصيدة لطم للإمام المهدي المنتظر عج


يا عُدَّتي في كُرْبَتي
يا صاحِبِي في شِدَّتي

يا مهدي يا مهدي
__________
1

لو مات بعيوني النظر
والگلب ما ضل بي ضوه

أتعنه بس مو وحّدي
ويه ادموعي أجي لبابك سوه

لو ضاگ بالليل النفس
بس انتَ أشمنك هوه

مستقبلي بعين الأمل
بس انتَ بيه المحتوه

يا غايَتي في رَغْبَتي
يا صاحِبِي في شِدَّتي

يا مهدي يا مهدي
__________
2

شاهدتك بعين الگلب
يالغبت عن عين النظر

لو ما وجودك سيدي
ما تبقه دنيا ولا بشر

أيوب لو مره انسأل
چا جاوب بگد ما صُبر

وين اني صبري ينحسب
وين الإمام المنتظر

في الصبرِ أَنْتَ قدوتي
يا صاحِبِي في شِدَّتي

يا مهدي يا مهدي
__________
3

رغم الجروح وحسرتك
لكن إتنفِس حسرتي

بيك الاضداد إتجمعن
يا سبب نوحي وفرحتي

يَمرَوَع بهذا الزمن
لكن مُؤْمِنُ رَوْعَتي

يالتعثر بذكر السبي
أَنْتَ الْمُقيلُ عَثْرَتي

نيلُ رضاكَ غايتي
يا صاحِبِي في شِدَّتي

يا مهدي يا مهدي
__________
4

بين اهلي واصحابي نعم
لكني بالغربه عشت

بس انتَ بعيوني وطن
رد ليّه والله اتغربت

خايف هوايه سيدي
لو گبل ماشوفك متت

اظهر محلفك بالذي
ماتت بشهگه عله الطشت

يا مؤنسي في وحدتي
يا صاحِبِي في شِدَّتي

يا مهدي يا مهدي
__________
5

فراگك وعلمي بدمعتك
خلنّي أعيشن بالدمع

أدريك تبجي لفاطمه
وأدريك گلبك منفجع

ذكرك بكل لوعه اقترن
أنساك إذا أنسه الضلع

يمته الفرج يالمنتظر
وبنفس موكب نجتمع

أَنْتَ ولِيِّيُ نِعْمَتي
يا صاحِبِي في شِدَّتي

يا مهدي يا مهدي
__________
6

ما أعرف اخبارك انه
وشكثر عندي اسأله

يا سيدي بهذا الوكت
يمك أصحاب وعائله

بعدك بكل صبح ومسه
دمعك الدم تنزّله

جا يمته يحصله دوه
البجروحه شايل كربله

للحشرِ تبقى جمرتي
يا صاحِبِي في شِدَّتي

يا مهدي يا مهدي
__________


#الشاعر_مصطفى_الشافعي

السلام عليك يا ابا عبدالله الحسين مولاي


مشتاگه روحي تريد للغاضريه
اوصل وزور حسين هاي المسيه
.......

وين اليزور حسين عني بنيابه
يذكرني يمّه هناك دمعه عله بابه
طگ گلبي وشتاگيت اشتم ترابه
وياريحة الشباچ لسّه بأديه
.......

يالزاير اترجاك اذكرني يمّه
گلّه اليخدمك هاك ودالك اسمه
افرجها عنه يريد تجليله همه
من خادمك يحسين هاي الوصيه
.........

گله اليخدمك ذاب گلبه وتفطّر
قل صبره يامولاي ما يصبر اكثر
رايد يجيك يزور للجيه مضطر
مات بغيابك مات يبن الزچيه

#سيد زيد الفحام
______________

قصيدة لقضاء الحوائج وشفاء المرضى


سائل اجيتك يا حُـــسين العافية
خادم يدكَ بابك ابنيتة الصافية
يالتعرف ابنيتي حققلي امنيتي
__________________
يالعزيز اعله الله اسألك وانته باب الله الي
بجاهك العد الله اطلب وأسأل العالي العلي

تسمعني يا ابــــو اليمه ادري وجوابك رحمه
اسأل تشافي كل داي او كل مريض اتسلمه
يحسين اسألك وانته دمعة بعيني
مـــــن البلاء وكل مـــــرض تشفيـــني
احفظني لبيتي حققلي أُمنيتي
___________________
كل مـــرض يعحز العالم عـــــنه ويحير العقل
شوية من تربتك يشفه وبالعلاج اشكَد سهل

حتى العلكَ ماينقاس من حظرتك يشفي الناس
شده اعله ايدك وانخاه بصادق النيه وإحساس
يالتستجاب ابكَبتك كل دعوه
يا ابو الشهامه والكــرم ومــروه
اشمرله چفيتي حققلي أُمنيتي
______________
يوصل لاعلى المراتب الطب ويوكَف بعد
بس ابو السـجاد عنده مرتبه ما الهه حد

يدخل ضريحك معلول اعمى ولو انه مشلول
حتى الخبيث اتشافيه صحه وسلامات اينول
آيا حُســـــــــــين ابلهـــــــــفة لو كَلــــناها
ابحركَت كَلب من تطلع شمحلاها
سلملي عافيتي حققلي أُمنيتي
_____________________
يم ظريحك لمن اوصل بيه اشمن ريحتك
ايــــــبلل الشـــــباچ دمعي يا حُســين امروتك

الزم ابشباچك حيل ودموعي عالخد تسيل
اتوسلك يا مـــــــولاي عدك يبو اليمه دخيل
عبدك واجيتك وانته تدري ابحالي
رايـــــــــد طلــــبتي يا حبيـــــبي الغالي
بالشدة عوچيتي حققلي امنيتي
________________________
سر عجيب الي بحظرتك يختلف كلشي تحس
جــــنة الله ومـــــن تطــــبها بيها ترتاح النفـــــــــس

يمك رفعت ايدية واطلب بصافي النية
ابدي بسلامي وادريه ايرد السلام اعلية
مـــــن عـــــــندة ما اشـــــبع ولا املــــنه
امشي بطريقه وادري دربه الجنه
يال منه تربيتي حققلي امنيتي
______________________

أسالكم الدعاء رائد الاسدي

خويه وينك ، ، خويه وينك ، ،
- - خل اسولفلك بعد - -
________________________________
خل ترد عينـك حنينه وسالمـــــه
بالي يمــك مـــن امس ما نايمـــه
مو على الماي اعله طولك صايمه
امدوهنـه ويا گاعــده ويا گايمــه

-ورگبتك بيضه وتغير لونهــــه
- بالرمح يا وسفه ويخربونهـــه

-- ماكله ارسومه الشمس وجه الگمر
-- من الصبح لليل نايــم ع النهـــــر
خويه وينك ، ، خويه وينك ، ،
- - خل اسولفلك بعد - -
________________________________
واگفه بــصـف اليتامـــه الخايفــه
الـرمـح شابـگ راسـك وما عايفـه
بشيلتي امسح على زنودك نازفه
كلهه هينه وسـهـم عينــك سالفـه

- خدودك اشچم شامه چانت بيهه
- هسه دم وتـراب غطـه اعليهـــه

-- الشمر يركض شبخ جسمك من عبر
-- راح للخيمـه ، وجــرح فگــدك كــبر
خويه وينك ، ، خويه وينك ، ،
- - خل اسولفلك بعد - -
________________________________
خــل اسولــفــلك شصــاير بينــه
الگـاع تچوي وفرهــدت رجلينــه
چــفــك البـي مـحبسك چـا وينه
الچان يمسح فوگ راس سكينــه

- بنيتــك شــمـا تلـبد يلحگـونهــه
- تلتـفت چــي خايفــه يطگونهـه

-- فوگ صـدرك سيفه سولف بالنحــر
-- ومن گلب جسمك جرح صدرك كبر
خويه وينك ، ، خويه وينك ، ،
- - خل اسولفلك بعد - -
________________________________
الچانت تنام اعله صدرك دافيــه
خويه عگبـك ركضــوها وحافيه
والعبـــايـه ام الستـر ما طافـيـه
الضيم ماخذ چم گمر چم عافيه

- والعليل الحيله يم عوچيتــه
- فوگ متنه سياط مو خاچيته

-- منين ما مــال الرمح نركـض سوه
-- وشـيبـك المهيـوب يلعـب بالهــوه
خويه وينك ، ، خويه وينك ، ،
- - خل اسولفلك بعد - -
________________________________
تدوهنـت لـمن لـگيـت امتونــي
هدلت ، ولون العـبـايه بلــونــي
وفـوگ راسـك والرمـح طگوني
اصفن وبالسـوط ويندهـونــي

- شگد سوالف كون ما نحچيهـه
- راح اسولفهــه بدمع وابچيهــه

-- والمصايب ترســن عيـون السمــه
-- دوست ضلوع وحرگ خيمه ودمه
خويه وينك ، ، خويه وينك ، ،
- - خل اسولفلك بعد - -
________________________________

- علي مهدي المالكي

على نحرك سـلام
على روحك سلام
حسين يا حسين

،،،،،،،،،،،،،،،،

 

على الجبهه الشريفه الخضباهه الدم
سلام اعله العيون وگلب المثــــــــلم 
على الصدر الحنين الطــــاح واتهشم
تحت ذيچ الخيول وناس مــــــا ترحم

 

سلام من الاله لنحرك الدامي 
يجرح الانبياء ودمعة أيــامي

 

على الشيب الخضيب
على نحر الحبيــــــب
حسين يا حسين

 

،،،،،،،،،،،،،،،،،

 

 

 

 

على الطفله الاجت يم منـــحر الوالد 
على الركضت دمع بس ظلت تجاهد
سلامآ يا رقيه وعينچ تشـــــــــــاهد 
على نحر الحسين اتجرأ الحــــــــاقد

تحاچينه بوكت ما بيـــــــــــه ولا نسمه
بچيتي اعله الحسين الما حصل جسمه

ولا عين التشــــوف
عليه جيش السيوف
حسين يا حسين

،،،،،،،،،،،،،،،،،،

سلام اعله الكفيل المــــا قبل بالذل 
على المنه السيوف وجيشهم يجفل 
على الخله الحرب للگابــــله اتعلعل
تارس عين زينب عدهه يسوه الكل

 

سلام لدمع طفله تصيح عطشــانه
على الطفل الرضيع وشفه ذبلانه

على خيام الدمـــــوع
على جروح الشموع
حسين يا حسين

 

 

 

 

 

 

دموع من السمه الغسلت تراب الخد
على الظل بالشمس مخضوب وامدد 
على الام العظيمه وجرح ذاك الجـد 
على الدم اليفور ومـــــــــا قبل يبرد

 

تحية من الخلق والشكر لجروحـك
نعم مات الجسد بس الاصل روحك

 

تعيش بلا فناء
يمعنى لكربلاء
حسين يا حسين

،،،،،،،،،،،،،،،،،

 

 

 

 

 

 

 

 

يرد كل عام طفك بعده دمك حـــــــار 
الخيم ليهسه بيهن اثر حرگه ونـــــار
البراري ابكربله انترست دمع وزغار
وبعدهه لهسه زينب علنهر تنـــــدار

 

منتظره كل عام وتتاني الهيبــه
فارس وعدهه بماي گال يجييه

 

گمر دنيا الظـــلام
عليه مني السلام
حسين يا حسين

كلمات خادم الحسين
رعد الفريــــــــــجي

لاستشهاد امير المؤمنين علي عليه السلام

خلّصها حامي الجار بالحسره دنياه
من المهد للموت مانصفت وياه

******

علراح ادك من راح حامي الحميه
دار الوكت علدار صارت خليه
العاش بكدر دنياه بعد الزجيه
وزادت عليه الكوم بلوه على بلواه

*******

بسيف الغدر مطبور ياسيف الاسلام
وسفه لفاه الموت ماكمل اصيام
جارت عليه الناس والنوب الايام
وي الخلك محتار ياذنب سوّاه

*****

ياذنب المسويّه وي الخلك يوم
ثابت حقدهم ليش وي الوكت دوم
بياذنب حتى انكول يستاهل اللوم
جود وكرم علناس ماتمل يمناه

****

زينب جفاها النوم ماغمضت عين
وحشه وخليه الدار مابيها ابوحسين
جن تنظر المحراب ينشد علي وين
صعبه تصد للدار مابيها تلكاه

*******

مالت سبع ميلات ياوسفه دنياك
صار التريده عليك وتهمها بلواك
لمت سيوف البين وتحشم اعداك
يوم الرهنت الروح والكلب لله

****
هدموا ركن الدين يمهدم الاصنام
ليش الوكت وياك طبراته علهام
يمدلل المسكين ومشبع الايتام
ظالم غدر جازاك والفضل ينساه


الشاعر حسن لعيبي الحريشاوي

لاستشهاد أمير المؤمنين علي بن ابي طالب عليه السلام

ليش دنياه خانت وياه
واعلياً واعلياه
*********
هدّوا اركان الهدى ونور البدر
المذنب بياعذر باجر يعتذر
فجعوا افلاك السمه ابهذا الغدر
بياذنب هام الشريعه ينطبر
الجان بحماه غدر جازاه
واعلياً واعلياه

*********

اجت اقدار الزمن ليلة قدر
كلوب اهل البيت بيها تنكسر
ضربته علهام قران الفجر
ايساعد الله علمصيبه ام الخدر
بعد فركاه تصيح ويلاه
واعلياً واعلياه

*******

شوكت غدّار بضوه الحق يهتدي
العنده مبدء بالغدر مايبتدي
وصاحب الحق مايخون ويعتدي
هذا فعل الغادر وطبعه ردي
بسيف خلاه تنزف ادماه
واعلياً واعلياه

********

صوت للحق ياعلي ماينكتم
ومايهاب الموت لوكثرت زلم
لفوا اهل الغدر ماخذهم عزم
للهدايه اركان رادوا تنهدم
الجان يرعاه غدر مولاه
واعلياً واعلياه

**************

يلرفعت الدين ياحيدر طحت
منطبر بالسيف علراس انصبت
شلون حال ام الخدر لمن رحت
من بعد عينك اشظملها الوكت
شلون تنساه وتنسه طرواه
واعلياً واعلياه

************

وكفت الدنيا وجره راسك دمه
انته يارحمة الباري من السمه
وداع دنيا بيه ملكه فاطمه
وفزت يابوحسين باجمل خاتمه
رغم بلواه لله شكواه
واعلياً واعلياه


الشاعر حسن لعيبي الحريشاوي

مطمئن والله ضميري عالصّراط المستقيم
وإبختم حيدر أميري. أطب جنات النعيم

ماتمسني الحاطمه والولي حامي الحمه


الله مفتاح الجنان بأيده حاط
حيدر الاسمه إنزرع بين النياط
المايحبه والله مايعبر صراط
الاّ يدخل الجمل سمّ الخياط

الخلك كلهه عطاشه. يوم تبقه بلا مجير
مايحضره هناك حاشه. كلمن أيحبه الامير

مطمئن يوم الضمه. والولي حامي الحمه
00

أسم أمير المومنين الكلّه شوگ
الغير حيدر هالاسم لا مايلوگ
قاعده من الله هاذي اوحُبه طوگ
همزه أسمه وكلهه جوّه وهوّ فوگ

شنهو معناها عليِنِه من رفع أيده الرسول
المايريده مايريده. الباري والزهره البتول
روحي بسمه هايمه. الولي حامي الحمه
00

الولايه الله عرضلي وآنه روح
ياعلي لبيك صحت وآنه أروح
فدوه لمداسك يبلسم للجروح
ياعلي يل بسمك الجنّه تفوح

إبدماي حروفه تمشي. وبالقيامه ماكو خوف
العنده حيدر عنده كلشي. والله لسمه ماأعوف
أبحبه روحي سالمه الولي حامي الحمه
00


حيدر أبحصنه اليطب لا مايتيه
واليحبّه بكلبه ولسانه وجيه
يصبح ويدخل جنان الباري بيه
وحتّه جبريل العرش هم يندعيه


التّبوس آثار مشيه كل ملائكة السماء
مايضيع الي يحبّه. اي وحگ نور الكساء
هو باب المكرمه الولي حامي الحمه
00

ياعلي هل كلمه الترطب اللسان
واْحس روحي بياعلي تغرگ حنان
وينتعش بيهه الكلب أسمه ال أمان
واشهدُ أنّ علي ملح الاذآن

العاشت برمشه اليتامه بسمه ذكر الانبياء
هوّ عامود الامامه. اي وحگ رب السماء

بي أماني وفاطمه. والولي حامي الحمه

00

الماعليهم خوف لاهم يحزنون
الگعدوا أبخيمة علي وبي يندبون
والزجيّه عالارائك يحشرون
بماي كوثر والله باجر يرتوون

شماكثر بالدنيا نسكه. كل بشر باجر يحير
ماختم لو والله صكه. حيدر وماله مجير
بيده يوم الخاتمه الولي حامي الحمه
#خادم الحسين سيد سجاد العميدي
2020 /4/ 18