هي ها وصال يا وصال اصحي ما سامعة صوت منبهك دا بضرب
"بتهب من السرير"
__الليلة بخرجو قصي من المستشفى
سلمى : انتي نمتي بالخبر دا معاك ولا شنو اي حا تمشي هسي؟!
__اي حا اطلع طوالي عاوزة اصل قبل الدكتور يمر عليه
"مسافة بتتجهز وتلبس عبايتها وطرحتها وتطلع"
كان أمي صحت كلميها وانا بضرب ليها تاني اني حا امشي معاهم البيت تمام ضروري ، عارفة امي حا تنق وعمتو برضو كان عرفت بس بتفاهم معاهم بعد ارجع "
"ساعة زمن وكانت في "

#المستشفى

وصال : السلام عليكم ورحمة الله
__ وعليكم السلام ورحمة الله

"لقيت عمو محمد وخالتو فوزية وحنين والهادي "
مع دخلتي دكتور مؤمن جا خاشي وراي

"حصل هدوء غريب لانهم متوقعين يتكتب لي قصي خروج الليلة .
بس في نفس الوقت منتظرين تقرير الطبيب شنو عن حالتو"

__دكتور مؤمن
"بعدل نظارتو وبعاين لفايل قصي"
خلاص انت والله الليلة حا نكتب ليك خروج الف حمدالله على السلامة وتلحق ال15 رمضان الباقية مع ناس البيت "بعاين على جهتهم بإبتسامة" تقلية الوالدة والابري ولا شنو
فوزية : كفاه مستشفى بعد دا
"بضحك"
فااا واا يعني مع العلاجات بس انت لازم تواظب تاخدها وتستمر لينا في الفترة بتاعت العلاج الطبيعي لفترة ال هي ستة شهور وانت لازم تجي مقابلة انا بتكلم مع الممرضة بتاعتي تحدد ليك موعد كل تلاتة اسابيع عشان تجي تتابع معانا ونقدر نعمل Asses للحالة بتاعتك وانت لازم تتبع التعليمات النحن حا نكتبها ليك نحن ما عايزين نستعجل الحاجات فلازم تكون صبور شوية معانا لانو بتاخد زمن
وصال : اسمع اسمع كويس لانك عنيد
"قصي بعاين ليها بدون كلام"
دكتور مؤمن : ايوة فعشان كدا لازم تاخد العلاجات في مواعيدا وكمان الموضوع عاوز support مساعدة لازم تلتزم بالنصايح البنقولها ليك ما تتحرك حركة كتيرة يعني تتحرك في حدود.
ما ترفع حاجات تقيلة كويس "بعاين لي ناس البيت "
في حاجات كتيرة انت حا تحتاج ليها مساعدة لازم الفترة الاولى دي تستخدم حاجات مساعدة للحركة يا اما كرسي او العكازة ال بي تلاتة عصايات دي وبعدين مع ال progress حا نشيل الsupport دا شوية شوية لحدي ما نخليك تعمل support على عكازة واحدة او لغاية ما ترجع لحالتك الطبيعية بس لازم تصبر معانا لانو الموضوع حا ياخد زمن شوية وان شاءالله الامور طيبة انت كنت في حال وهسي حاليا يعني احسن كتير.
الهادي : ان شاءالله يادكتور
دكتور مؤمن :"بعاين لقصي" ايوة حاجة أخيرة لازم تجي كل اسبوع للممرضة بتاعتي تغير الغيار للجرح لانو لسه ما نشف كويس
مجرد نضافة وشاش وتمشي.
ولازم تواصل على العلاجات الحا نكتبها ليك بالاضافة للمتابعة عشان نشوف التحسن في حالتك ان شاءالله دا المهم.
انا بإختصار حاولت اقول ليكم الفكرة كلها حا يحصل شنو بالضبط.
والف حمدالله على السلامة مرة تانية
عن إذنكم
"شكرا يا دكتور الله يديك العافية ما قصرته"
بطلع
الهادي : انا حا اطلع اتم الاجراءات حقت المستشفى مسافة تكونو جهزتو
"ووصال بتطلع ورا الهادي براحة بتلحق الدكتور بتنادي عليه"
يا دكتور مؤمن
**وصال
__انا حابة اتشكرك على التسهيلات العملتها لي جد يعني اديتني فكرة ح تختصر وتسهل علي كتير"
**لا شكر على واجب يا ستي
"متقدمين لقدام وهي بتتكلم معاه"
#بعدها
وصال بتقول :
ساعتين وكنا في بيت ناس عمو محمد ودي كانت اول مرة ادخلو وانا براي كان جيتهم مرتين مرة مع امي وعمتو لما خالتو فوزية جات من العمرة والمرة التانية جيت معاهم لما خالتو فوزية برضو وقعت بسبب كراعها وسافرت مصر للعلاج وجات جينا نطمن عليها..
ما قعدت معاهم كتير رغم إصرارهم اني اقعد للإفطار بس إعتزرته بإننا اصلا جايينهم يوم تاني.
الى
#يوم_الكرامة
_25_رمضان
"عمو محمد عامل كرامة طلوع قصي من المستشفى بالسلامة وماشاءالله عازم اهلهم ومعارفهم ونحن أولهم
وما بين عمتو وامي الشغالات شكلة فيني من موقف المرة الفاتت ومشيتي معاهم للبيت ولعزومة الليلة ان كراعي دي ما بتترفع معاهم لناس قصي الا وانا عروس حتى اعتب عتبة بيتهم من تاني.
وفعلا عملو الفي راسهم وشكيت وبكيت بس فاتو خلوني مع رزان انا وهي في وش بعض حتى ابوي ما قدر يشفع لي معاهم
فرضيت ب #حكم_القوي

من يوم طلع قصي وانا يومي كنت متواصلة مع خالتو فوزية والهادي وحنين وما بين تجهيزاتي لحاجاتي وناس امي في الريحة والخبايز و عزومة الناس والاهل..
كنت يوم الجلسة بلبس عبايتي وبجري بلاقيهم في المستشفى وبعد ينتهي برجع تاني وببقى متواصلة بالتلفون كذا مرة اطمن من خالتي عليه..
حرفيا كانت اصعب اسبوعين باقيات من رمضان مرت علينا لا انا قادرة اخفف عنو بوجودي جمبو ولا قادرة اساعد خالتو وتعبها مع قصي الا بالدعوات والصبر .