#الحب_الحقيقي8 :
بقلم : تهاني محي الدين

يوسف : الوو نجمة 😍
نجمة : ازيك يا يوسف
يوسف بلهفة : وينك انتي من الصباح ، انا بتصل ما بتردي ، ان شاء الله انتي كويسه!
نجمة : ايوا كويسة الحمدلله بس عشان سفر و كدة و الجوطة مع الناس، ما قدرت ارد و اهو رجعت ليك بعد لقيت زمن
يوسف : الحمد لله انك بخيير لاني قلقت عليكي ☺ ، تاني اوعي تعملي كدة 😡

نجمة : حاااضر ☺ تسلم و فرحت من جواها انو يوسف قلق عليها
يوسف : وصلتو و لا لسه
نجمة : لا لسه
يوسف : مالك يا نجمة ، انا حاسي انك ما نجمة البعرفها !؟
نجمة : يعني انت بتعرفني 😁
يوسف: تقريبا 85 % من شخصيتك عرفتو و بقدر احس اذا كنتي متغيرة او لا
نجمة : ههههههه كويس ، لا مافي حاجة ، لكن انا عكسك ما عرفتك لانك غتيت هههههه
يوسف :: ايوا كدة اضحكي 😂 ، خلي الشمس تدخل والله يا نجمة انتي الوحيدة البتعامل معاها غير و باقي الناس بشوفوني جادي و بخافو مني

نجمة : ههههن انا كمان كنت بخاف منك
يوسف : و هسي 😁
نجمة : هسي بقى في ارتياح والله و بقيت اتعامل معاك بطبيعتي 🙈
يوسف : الحمدلله ☺☺ ، يلا خلي بالك من نفسك ، لحدي تصلي لانو جاء زبون

نجمة : طيب يلا سلام

يوسف اطمن على نجمة و حس بسلام جواهو لانو اطمن عليها ❤❤ و قدر يواصل شغلو بمزاج و كمان نجمة اتبسطت عشان اتكلمت مع يوسف و قالت حتواصل معاهو على امل انو يمكن يفاتحها في يوم لانو احساسها بقول ليها انو يوسف عندو ليها حاجة و قالت ما تتشاءم و تتفاءل خير 💖

نجمة وصلت البيت و رتبت هدومها و بقت متواصلة مع يوسف في الواتس طول اليوم و كل مرة الاتنين بتعلقو بي بعض اكتر و يوسف كل ما يلقى قروش بنزل طوب للبناء
و في يووم جاء اتصال لي نجمة من اماني بت خالتها

نجمة :: عروستنا الحلوة مشتاقين 😍
اماني ::بالاكتر والله
نجمة : جيتي البيت و لا لسه ، مش حتسكني هنا في الخرطوم
اماني : اي جيت و بكرة ان شاء الله حارحل بيتي و عايزاك تجيني هناك عشان كرامة البيت بكرة
نجمة : اكيييد حاجييك يا اماني ، انا عندي اعز منك منو عشان اجيهو ☺😍
اماني : طيب يا حب سلام
نجمة : سلام و سلمي على مصطفى راجلك
اماني : يصل و قفلت الخط

نجمة مشت كلمت امها و امها قالت ليها حنمشي سوا بكرة ان شاء الله

نجمة دردشت مع يوسف
نجمة : يوسف ماشة لي اماني بت خالتي بكرة لانو حتسكن هنا و عاملة كرامة للبيت
يوسف : دي العروس مش !؟
نجمة : ايوا
يوسف : كويس ، حاولي ترجعي بدري قبل المغرب ، ماشي معاك منو !؟
نجمة : اي ان شاء الله ، ماشين انا و امي
يوسف : تمام ، اتحصني كويس قبل تطلعي 💓
نجمة : ان شاء الله ، تصبح على خيير
يوسف : و انت من اهل الخير

تاني يوم الصباح نجمة و امها مشو لي اماني و شالو ليها طقم عشاء هدية، دخلو باركو ليها و نجمة اشتغلت بي كل همة في البيت و هناك جاء هشام صاحب مصطفى للكرامة و شاف نجمة و من اول نظرو وقع عليها عجبتو جدا و بقى بسرق النظرات ليها و هي ما حاسة بي حاجة و شغالة مع البنات و تضحك 😁😁

و قام نادى مصطفى

هشام : مصطفى يا درش
مصطفى : ايون يا ابو الشوش نورتنا والله
هشام : بي نورك يا اخوي
هشام : البنت ديك منو و أشر ليهو على نجمة
مصطفى : دي نجمة بت خالة اماني زوجتي
هشام : البنت دي مخطوبة !!
مصطفى : على حد علمي لا ما مخطوبة و بتسأل مالك يا لئيم ههههه ، هي عجبتك و لا شنو !!! لكن ما اظن لانو انت مافي واحدة بتلفت نظرك بسهولة 😁

هشام : عجبتني جدا و الله ، لاني اول مرة تلاقيني واحدة بالملامح البرئية دي و وشها بشوش و دا غير لبسها المحترم 😍

مصطفى : والله زين ما اخترت ،، بالجد هي ما فيها كلام و زولة ما شاء الله محبوبة و ممتازة بشهادة الجميييع

هشام : انا الزولة دي عايزها على سنة الله و رسوله و عايزك تكلم لي اماني تسالها و تشوف ردها

مصطفى : خييير تب و الف مبروووك مقدما لانو انت كمان ما فيك كلام 😍

هشام : تسلم يا غالي

مر اليوم بسرعة و الناس مشو و نجمة ودعت اماني و رجعت بيتهم و وعدتها انو تزورهم قريب ان شاء الله

و مصطفى بعد الناس مشو كلم اماني بكل الحاصل و اماني فرحت شديد لنجمة 😍😍 و قالت حتتصل ليها هسي توريها لانو ما قادرة تنتظر للصباح من شدة فرحتها بالموضوع ❤❤

و اتصلت على نجمة

و ترن ترن ترن 📞

يتبع