#خلقني_أسود
#The_End_One!

بقلم:Fulla_Ali
-٣٠-
يا عنصري ومغرور...كل البلد دارفور


#الشعب

**

#flash_back

قبل سبعة سنه..

صابرين !! في شنو لي بتبكي !
طارق !!

انطقي طارق مالو !!!

نجاة قالت لي انو طارق !!!

صبا بطلي ياخ !! طارق مالو اتكلمي !!

طارق فاق !!!
فاق يا صبا !!!

طلال رفع راسو وهي ما انتظرت مننا جواب وجرت جوه تكلم الباقين

خمسة دقايق كنا حضور في المستشفى..وأخيرا إنقشعت سحابة الحزن ..كلهم دخلو اطمنو عليهو وكان بجو متغيرين شديد...أنا ما قدرت ادخل حاسة كأنو مات وهم داسين علي...

بعد شوية جات نجاة قالت لي طارق عاوزك..

دخلت لقيتو ملتفت على الشباك..اتسندت على الكرسي الجمب السرير وقعدت وانا براقب صدرو لو بتنفس....قال لي قبل ما يلتفت..تتزوجيني؟؟؟

بعدها التفت علي وانا قفلت خشمي..شبهو إتغير شديد !! ياخ ده ماهو عديل !!
ابتسم نص ابتسامة وقال : اكيد ما حتقبلي بي واحد مشوه زي ما انا رفضت مهند زمان بسبب لونو صاح؟؟

قلت ليهو وانا لمن حبيتك ما حبيتك عشان لونك..حبيتك عشان روحك بالرغم من عنادها...حبيتك عشان رجولتك
حبيتك لأني بحبك..
لا لون..ولا شكل ولا مال ولا اي شي حيعارض رغبتي إلا إرادة ربنا

عاين لي وفي عيونو نظرة إعجاب شديدة..
بعد شوية جو مدخلين طلال الكان خجلان شديد وما قادر يرفع راسو حتى لانو حاسس بالذنب والحادث ما حصل إلا نتيجة هظارو
حاولت ألطف الجو و
قلت ليهو الله يجازيها مرتك دي أصلا ما بتعرف تقول ألاخبار السمحه..خلعتنا وجهجهتنا

طلال : الحمد لله القمت بالسلامه ..

طارق : الحمد لله على ما اراد الله

طلال : لو ما عوارتي...

طارق : اوعك تقول على إرادة ربنا عوارة " ربنا كاتب كده يا طلال !!

طلال دموعو جو نازلين وانا زاتي بكوني معاهم..

الناس لمن تسوق تعمل حسابها ..بالنسبة للأصحاب..كونكم تفحطو في الشارع سواء بي عربية او موتر صدقوني ماف زول حيتضرر غيركم وغير أسركم..صاح بتكونو كسبتو الهيبه والمنظرة قدام الناس لكن إحتمال كبييير تفقدو حيواتكم...فااشنو..الناس تعمل حسابها

طارق كمل شهر في المستشفى..عملو ليهو عملية تجميل و وشو شوية اتحسن لكن شبهو الزمان ماف..

اتخطبنا وهو في المستشفى...بعد اتحسن عملو عرس مهند و وجن ..اما نحن اتزوجنا بعد اتخرجت .

بعد سنة جبت فادية...
ملت علينا البيت فرح ..بالمختصر كده أسرة سعيده شديد

بعد فادية تمت سنة عملنا تخريج صابرين وبعدو اتزوجو هي وطلال

ألفت كتابي الأول خلقني أسود..عرضوهو في معرض الخرطوم الدولي ونلت بيهو جائزة نوبل

عملت مؤتمر صحفي وتكريم في الكلية ...الموؤتمر بحكي عن الكتاب ...والسيد طارق ما جا حضرو ..عشان كده مشى جاب بوكيه ورد وجا ركع لي هو وبتو

عليكم الله مش لي حق أزعل؟؟؟
عشان كده
قلت ليهو يلا أختاني ..وخليها الغبية الاسمها صابرين وراجلها بديهم حقهم هم زاتو

#back

العربيه أبت تتفتح قال لي تعالو اركبو بهناك...قلت ليهو وعربيتي أخليها هنا!!!

قال لي طلال بجي بجيبها..ورح انا سايقكم مشوار

طول الطريق كنا ساكتين بتي شالت تلفوني الكان بدون نمط وبقت تتبظ فيهو...طوالي اتذكرت حاجة فاتت علي..قلت ليهو دقيقه!! انت اليوم داك في شارع النيل ما قلت لي عرفت كلمة السر كيف؟؟
ابتسم وقال : حاجة انتي بتكرهيها شديد .كتبتها وصدفت انا زاتي لمن أستغربت..لكن المحيرني حاجه انتي بتكرهيها مفترض تحاولي تنسيها ما تتذكريها !!

قلت ليهو كلامك صاح..لكن انا ما كنت عاوزه انساها ..كنت خاتاها هدف لازم ادمرو ..عشان يتحقق هدفك لازم تتذكرو كل يوم...بالنسبة لي كنت بتذكرو في اليوم أكتر من مره

قال لي وشبه حققتي هدفك يا مرتي البطلة

اتذكرت طوالي صريت وشي
ضحك وقال : امك ربنا يرحمها لو كانت عايشة اكيد حتكون فخورة بيك ..

قلت ليهو ربنا يرحمها وبست راس بتي الكانت بتلعب بتلفوني سسسساي وما جايبه خبر للدنيا
..
طبعا آخر مره شفت حبوبتي يوم ولدت فادية ..
الحق انا اخترت لي بتي أسم فرح ..لأنو سلفا ابوي سمى فادية بعد حمودي

حبوبة بأعلى صوت قالت اي ..سميتيها فرح لانك فرحانه بموت امك!!
)حبوبة كنت خلت عادتها قلت سعادتها)

اليوم داك انا بكيت بكا في الدنيا دي !!!!
ياهو ماما أكرام ما عجبها الموقف وطوالي شاكلتها...قامت زعلت ومشت تاني ما جاتنا

لكن نحن طوالي بنزورها انا واخواني حتى طارق طوالي بمش معاي..وبالرغم من معالمتها القاسيه بس صلة الرحم لازمه..
خالو سعيد اتزوج وزوجتو قاعده معاها ..الله ستر البت بيضاء وإلا كان آمنت براها ..

اهلي اللفي الابيض من البداية ما كانو موافقين على زواجي خوفا من اني اواجه عنصرية..لكن أسرة زوجي أطيب أسرة على وجه البسيطة..
فقت من سرحاني بعد ما العربية وقفت..انتبهت اننا واقفين قدام رويال كير ..عاينت ليهو وقبل اتكلم قال عندي زميلي مرتو وضعت..نبارك ليهم ونمش البيت

شلنا علبة شوكلاته ودخلنا..

مجرد ما فتحنا الغرفه لقيت جنس عالم !!! و صابرين راقده بتعاين زي الشنو !!

قلت ليهم : في شنو !! مالكم !! .