الفنيدك 5

مجاهد يوسف

الفنيدك جاء البيت وشال نبلتو وقعد يربط فوقها بالسلوك امو عرفتو دايرها لحاج الزبير لانو من قام ما عندو شغلة بقبيض الطير وجاتها مرة الزبير بكت ليها لمن قالت بس في شان تمسك ولدها ما يازاهم
الفنيدك جاب ليهو علبة صلصة ختاها بعيد وقعد ينيش فيها ويلقم الحصحاصة في لسان النبلة ويمطها وحكمة الله نياش خلاس ولا بجلي
بس السمحة فوقو ما بكضب امو قالت ليهو من متين آ الفنيدك قاعد تقبض الطير ؟
_دي مي نبلة طير يمة
_نبلة شنو نان ؟
_دي بدور اقد بيها عين الزبير
_سجم أمك وسجم أمك آ المعيق اوعك تقول كدي
_ والله هو وشمعون اللتنين علا اقدد ليهم عيونن
_ابوك بكتلك وانا بكتلك اكان عملت كدي
_اكتلوني ساي وهو داقيني لشنو ؟
_دقاك بتين آ ولد
الفنيدك ملص العراقي وقال ليها عايني دا شنو
السوط ورم ضهرو والمحطة المحطها ليهو الزبير اكانت حقت زول مغبون منو ومكجنو
والصافية قعدت تولول وسمعها اب ضهير وجاها مارق جري مالك آ مرة في شنو !
قالت ليهو عاين لضهر الفنيدك الزبير دقاهو بالسوط
وابضهير لفح عكازو ومرق وحاج احمد اكان عارفو لو شاف ضهر الفنيدك ما بسكت عشان كدا جاء وراهو ومن شافو مارق بعكازو وقف ليهو في الدرب وقال ليهو اعقل آ بضهير وانعل ابليس ما توقد لك نار بعدين يغلبنا نطفيها
٠_انا داخل علي حلف وطلاق بالتلاتة البهبش ولدي علا اكسر ايدو وزح من دربي آ حاج احمد اخوي
_ماك عاديني اخوك
_حرم اخوي وفوق راسي
_اكان دا كلامك وبتعزني وعاديني اخوك وبتجبر بخاطري ارجع آ بضهير وانعل ابليس
_ انا برجع وهسع بس عشان خاطرك لكن تاني بجي مارق وإيد الزبير العر الليلة مكسورة مكسورة
_ الزبير شن سوى ؟
_امش شوف ضهر الجنى مورم كيفن
_انا الدقيتو ما الزبير
_ حرم ما انت وما بتقيل الزبير بكلامك دا
_البقيلو منك منو وشنو ؟
_علا الله يكتلني وللا يشلني ساكت حتين اخليهو
_ سمح اكسر إيدي دي انا في بكان إيدو وعز بيها حليفتك
_ إيدك انت ؟ حرم تنشل إيدي قبال تتمد عليك وانا الزبير ماني مخليهو وحرم اكان اتحامى فوق ديش كامل علا اصلو

ابضهير رجع اكراما لحاج احمد بس وحاج احمد بقى ملازمو ابى يفارقو كلو كلو ولمن شافو عكران تب وعضبان شديد جاب ليهو الابريق وقال ليهو حرم اكان تتوضأ هسي الوضو بطرد منك الشيطان والغضب

ابضهير اتوضا وهجس وراق علا قال لحاج احمد انا هين وغير أكسر ليهو إيدو ماني مسويلو تاني شي تاني لكن الكلام الفنيدك ولدي والجنى دا آ حاج أحمد حرم ما براهو وموش ولدي ؟ حرم مرات مرات انا بخاف منو وبضر الزبير بضرو والفي راسو بسويها وما بسمع ليهو كلام زول . غايتو الله يكضب الشينة بس
_الشينة كسرتك انت لي إيد الزبير واكان علي الفنيدك انا خابر الداير يعملو ووراني ليهو قبيل وخليهو علي تب ، بس انت ما تصل الزبير
_لا حرم ما بخليهو بيها دي لانو جاني هني ومعاهو كم نفر وحلفت ليهم البهبش ولدي بكسر ليهو إيدو لكن هو اتحداني وهبشو
_هو وينو الفنيدك هسي ؟
_قاعد في النيمة برة
ومرقوا وقدر ما ناغموا ليهو ما قال هوي
وريحتو مافي
الفنيدك اكان قاعد وخلى ابوهو وحاج احمد لمن دخلو ومرق عاني بيت شمعون
الدنيا نصت نهار والفجة حارة والناس متكاملة البيوت للمقيل
وشمعون عندو في حوشو نيمة كبيرة خلاس ومانعة وخضضضرة الخضرة البتنشاف سواد سواد ديك وضلها ينعس من شدة مو بارد وخاتين فوقو التيبار
وشمعون عندو عنيقريب هباب قصيروني حق قد جادعو تحت النيمة ويومي بقيل فيهو ومن فجتو ما قاعدين يزحوهو
الفنيدك جاء ولقاهو منبطح تب ويشيل ويتشهق داير ياخد ليهو نومة
تاوقلو بالحيطة ساي ما دخل وهو قصير وديلك حيطتن زاتها قصيرة وجدع ليهو حجر وقع جمب التيبار وشمعون قام من رقدتو وقعد يتلفت ويناهر يا ولد ما تجادع وألعبوا بعيد آ جنيات وما شاف الفنيدك قايلهم شفع بلعبوا برة
والفنيدك لقم نبلتو ومطاها ويعاين ليهو سمممممح ومع فكتو للحصحاصة شمعون دنقر وطق اداها ليهو في جبهتو والحصحاصة بس الرصاصة سرررر دمو دفق وقعد يبقبق وشمعون مسك في الضربة وقعد يهرج والفنيدك قايلها جاتو عينو طبق نبلتو وفات
الساعة ديك شمعون فكر ليهو وشافو وعرفو تب
والناس اتلموا فوق شمعون

الفنيدك لمن وصل البيت لقى ابوهو وحاج احمد يكوسوا ليهو وابوهو قال ليهو تعال هني مشيت وين آ ولد ؟
الفنيدك قال ليهو مشيت بيت ناس شمعون وقديت لشمعون عينو

حاج احمد واب ضهير اي واحد قعد يعاين في التاني ومرقوا من البيت جري فاتوا ناس شمعون
ولمن وصلوا لقوا شمعون دمو مالي جلابيتو ومرتو جابت ليهو الملح والرماد وشرطت ليها دلقان خاتيهو قدامو ولمن شافوا الضربة في جبهتو حمدوا الله الزحاها من العين
العين محروسة
ومافي زول عارف دا الفنيدك علا حاج احمد وابوهو واللتنين سكتوبا
وشمعون زاتو عارف علا اصلو ما قال دا الفنيدك
وقال ليهم ظنيتم ديل شفع اكانوا بنيشوا في الطير وكفروا ليهو وفاتوا منو
حاج احمد قال لابضهير جات سلامة والحمد لله الما قلعتلو عينو والخوف من الببقى علي الزبير
وفاتوا لل

فنيدك نضموا معاهو زييين واصلوا ابى يسمع كلامهم وكل مرة يقول ليهم عاينوا ضهري كيف عاينوا ضهري
وغلبهم تب البسووهو معاهو
حاجة اللقية حبوبة الفنيدك سمعت كلامهم كلو وقالت ليهم مالكم ومالو خلوهو اللخزق ليهم عويناتم
حاج احمد قال العين بالعين والسن بالسن والشعلة دي كدي بتجيبلها بوليس ومحاكم واكان خزق ليهم عيونن بالنبلة هيلتو دي بعدين القاضي بخزق ليهو عيونو اللتنين وبعيش لمن يموت اعمى

الفنيدك لمن سمع الكلام دا خاف واصلا ما كان عارفو زاتو
قام جدع النبلة فوق راس البيت
وحاجة اللقية زاتها خافت

حاج احمد داير يفوت اهلو ومع قومتو جاهم شمعون داخل وبراهو ما معاهو زول
وقال لابضهير زح مني ولدك دا انا عارفو هو الضربني وشفتو وبنبلة بس انا ما وريت بيهو زول وهسي بعد الناس ما فاتوا جيتكم وانا راجل كبير ما بقدر علي مضرة ولدك دا والبركة الما شال لي عيني
وقرب يبكى ليهم وخوف من الفنيدك قال ليهم وانا من يوم الليلة الزبير لاني معاهو ولا شتين بس امسكوا مني الفنيدك دا

اب ضهير غلبو البقولو والعجب حاج احمد وكلهم قعدوا يعاينوا في الفنيدك
والفنيدك قال ليهو قلت بعد ما اقد ليك عينك داير امش اجيب ليك عقرب كبيرة من الترب وادخلها ليك جوة المركوب عشان تقرصك لكن خلاس يا عمي
شمعون فرح وفات مبسوط المسكين
حاج احمد فات علي بيتو ومتمحن ومحتار في الفنيدك الخوف ليهو راجل كبير بشنبو دا وشبع ضحك كلما يتذكر كلام شمعون وخوفو من أذية الفنيدك يفقعها ضحكة

شمعون بعد فات بيتو دخل الاوضة وملص مركوبو ختاهو في رف الحمار التحت في فجة النعلات ودرع ليهو سفنجة بدلو

اب ضهير بعد جية شمعون دي وكلامو القالو دا نسى حليفتو في كسرة إيد الزبير كلو كلو وبقى مشدوه ومتمحن في ولدو دا وخوفة شمعون أثرت فوقو بالحيل

اصلا المضرة ما فوقها خير والاذية مي سمحة علا الفنيدك شافع ساكت وراسو ناشف وبتصرف علي غباهو وجهلو والجات في شمعون سلامة وانحلوا منها علا الكلام والخوف من الراتنو الفنيدك للزبير

الفنيدك قال بعد كدي باقي ليهو حاج الزبير بس وبنظمو

يتبع...

الفنيدك 6

مجاهد يوسف

فلقة شمعون الخلت دمو يبقبق الناس بهتوبا الشفع مع انو في النهارية الحارة ديك والشمش الحراقة حقت نصت نهار ما في شافع قاعد يتحاوم وكلهم يا بلعبوا تحت نيمة يا قاعدين جوة البيوت والبمرق يتحاوم كلو بلقى ليهو زول كبير بنهرو وبقول ليهو ما تتحاوم آ جنى في النهار الحار دا بطقك سحاوي
حاج الزبير لمن سمع بفلقة شمعون صاحبو جاهو في البيت يشوفو ويكفرلو ولقاهو الضربة فقدتو دم كتير وقربت تخزق ليهو عينو
وشمعون من شاف الزبير قعد يبلع في ريقو وما دار جيتو ليهو دي وقابلو ببرود وقرب يقبل منو كدي
_ سلامتك آ شمعون آ خوي
_ الله يسلمك آ الزبير تسلم
_ الشي شنو ؟
_ والله تقول شنو . قدر الله ساكت والجنوي بفلعوا في الطير فوق نيمتنا وانا راقد تحتها وجات فوقي منهم حتحاصة
_ كدي قبل جاي ، لا لا دي مقصودة عديل ومي هيلت جنيات بفلعولن فوق طير
_البقى بقى والبركة الما جات فوق العين
_ أنعلو دا المعولق الفنيدك ود ابضهير ؟
_قول بسم الله فنيدك شنو ؟
_ لا لا ياهو تب ومن ساعة المحطة والرصعة الرصعتها ليهو وحديرتو لينا عرفتو السايب ناوي يضرني ويضرك
_ الزبير انا الموضوع دا ما عندي بيهو شغلة ولاني معاك فوقو
_ اكان كدي ياهو تب وانا رصعتو قاصد بدورو يجي ويضرني عشان هو وابوهو أنجمن ليكم نجام القبورة
_ علي كيفك بس انا ما عندي شغلة تاني بيهم
_خوفك المعولق المجينين دا ؟ افو آ شمعون
_ وريتك كلامي وانت تاني علي كيفك معاهم
_سمح انت الليلة مالك دارع ليك سفنجة متل الحريم وينو مركوبك الجديد
_ كراعي دي فوقها عين سمكة لا اقول ليك حبن ولمن ألبس المركوب بتحرقني عشان كدي ملصتو ودرعت السفنجة وخفيفة ومريحاني
_ من متين ؟ ما حصل وريتني بعين سمكتك دي وكدي انشوفها
_لا لا خلها ما داير اوريها زول

شمعون ما عندو عين سمكة لكن خايف من الفنيدك يدخل ليهو عقرب في المركوب وملصو وقنع منو تب تب والزبير عارفو ما عندو شي في كراعو لكن صدقو وفات

الفنيدك العصر مرق وفات علي الخور الجمب المقابر كايس العقارب وشايل ليهو موية في باغة ومسلة طويلة حقت حبوبتو البتنجد بيها اللحفات وقدر ما يشوف ليهو جحير يزردو موية والعقارب تمرق وقعد قريب ساعة ما لقى عقربو الكايس ليها والبمرقن كلهن نويويريات وصغار ما اقتنع بيهن وهو عارف النويويرة قرصتها ما بتسوي شي ولمن الواطة مغربت هو يكوس في الجحار وكلو كلو ما لقى العقرب الدايرها وجاء راجع ساي
أب ضهير بعد المغرب مشى جاب حاج احمد وعتمان وعندو جار طيبان اسمو أمحد علي وشربوا معاهو شاي المغرب واتونسوا زييين في الآخر ناغم للصافية مرتو واكان موريها بحليفتو ولمن جات طلقها قدامهم وساقهم معاهو بيتو التاني وبرضو طلق مرتو ديك
واليوم داك قال بنوم في الديوان
وطلقن عشان حلف يكسر إيد حاج الزبير لكن لمن الزعل راح وجية شمعون ليهو في بيتو مفلوق من ولدو غير رايو ولعن ابليس وسمع كلام حاج احمد
والمشاكل ان في فاضية وللا في مليانة ما فيها خير والزول اكان زعل ما ينحمق ويصبر ولمن الزعلة تروح بتصرف صاح
حاج احمد مبسوط منو رغم انو ما كان دايرو يطلق لكن قال لخير والبركة ال ربنا عقلو وستر ولطف
ولو مشى لمن كسر إيد الزبير لا الزبير ولا اولادو بسكتو ولا عتمان اخوهو برضى وبتقع بيناتهم حرابة عديل وامكن تصل لعند السككن والطعين ويسيل فيها دم وقيلا تكبر وتجرهم لمن تطير فوقها رقاب
وكلو في شنو وعشان شنو والدنيا بطولها وعرضها مي مستاهلة
ومافي حاجة احلى واحسن من الصبر وطولة البال كلو كلو
اب ضهير بقى عاقل وحريمو باكر برجعن وربنا يعقل جناهو الفنيدك

الفنيدك ما عارف يضر حاج الزبير كيف . اكان للعقرب الداير يدخلها ليهو في مركوبو قدر ما كاس ما لقالو عقرب كبيرة ينشف بيها ريق الزبير
أكان للنبلة خاف من كلام حاج احمد لمن قال ليهو العين بالعين والقاضي بخزق ليك عينيك وبتعيش اعمى وقنعو منها وجدعها فوق راس البيت
وما باقي ليهو علا البقرة

بقرة حاج الزبير اشتراها من الزاكي سيد الجنينة وبقرة سمحة خلاس ومانعة ولمن تجي المغيرب من الخلاء بتجي محينة لبن لمن شطورها تالاتنها تلة واللتنين ينزن
والبن بتشتت منهن في الدرب مع مشيها والعجب لمن تجر بعمل ليهو درب عديل في قفاها وبقرة تعجب البشوفها ولمن يحلبوها بتملالا جردلين
حاجة اللقية عندها خوسة سنينة داساها في السحارة وملفلفاها بكم دلقان وما بتمرقها كلو كلو
خوسة تراثية قالت هيلت ابوها وكلو كلو ما بتخلي زول يهبشها وشدة مي سنينة وسمحة عاجبة ابضهير عجب شديد خلاس وحنس فوقها حاجة اللقية دي زمن عشان تديها ليهو واكان بالقروش قال رضيان وديك مابية تب تب لا تديها لا تبيعها وقالت ليهو علا بعد انا أموت لكن حية كدي ما بديها لزول
الفنيدك فتح السحارة وشال الخوسة وماشي يقطع بيها شطور بقرة الزبير وقال كتل ما بتنكتل ليهو ..

يتبع....

الفنيدك 7

مجاهد يوسف

ليالي الصيف في الحلال والارياف ما زي النهار ومرات مرات بتكون باردة وفوقها همبريب سمح خاصة لمن تكون الحلة حولينها زراعة ومرات مرات كتمة وباعوض وناموس تقول شرى . ينوني ويقرص للصباح
ابضهير الليلة نايم في الديوان هيلو وديوانو فد اوضة فاتحة علي القبلة فيها حويش صغير ما فوقو باب واليوم داك الجو اكان سمح وهو بعد ما طلق حريمو اللتنين برا بحليفتو في شان ما يكسر يد الزبير جاء الديوان ومرق ليهو عنقريبين واحد ليهو والتاني للفنيدك وبعد صلاة العشاء جاء من الجامع ومعاهو حاج احمد وامحدعلي جارو وديلك قالوا يوزروهو باقي اليوم دا ويتعشوا معاهو وقعدوا في الديوان يتونسوا . الصافية عاست ليهم رهيفة قمح وكبت فوقها اللبن وادتها الفنيدك جابها ليهم ضربوا فوقها تمام وأي زول فات علي بيتو
اب ضهير ناغم للفنيدك وقعد ينضم معاهو
_ عمك حاج الزبير دا آ ولدي ما تصلو ولا تازاهو الأذية ما سمحة والزول دا في الحساب انا وهو اولاد خالات صاح ما لزم لكن امو زي خالتي وواحد واكان دايرني احسبها ليك عشان تعرفها بحسبها ليك اولا في التبادي امو نفيسة بت جادين ونفيسة دي بتبقى لامي فاطنة بت خالتها واماتن بنات عم لزم يعني حبوبتي بت عم حبوبتو وقعت ليك ؟

الفنيدك متره ساي قال ليهو آي وقعت لي . لكن لا وقعت ليهو ولا حاجة وهو مجهز الخوسة ومستني ابوهو دا متين ينوم عشان يمرق علي بقرة الزبير وابوهو شبكو نضمي
قال ليهو حلتنا دي كلها أهل آ ولدي وشمعون الفلقتو قبيلك دا انت قايلو ما ببقى لي ؟ لا لا ببقى لي تب والله ولحم ودم وابوهو اكان صاحب ابوي وهو وياو ما بتفارقوا كلو كلو وهم زاتن اولاد اعم راسن عديل وجدو تال أمو ببقى لي جدي ابو أمي ود عمتو عديل عرفت كيف ؟
الفنيدك قعد يتململ ومرات يصنقع ومرات يتكشم وابوهو بقول ليهو في شنو هو ما عارف
وابضهير فتح
_ الزول آ ولدي احسن يبقى عاقل وفالح هسي انت الحلة دي كلها بقت مكجناك والناس كلهم ما بريدوك بفعايلك وعمايلك السويتها دي وشايفنك مضر ومعيق
_انا البدقني والله ما بخليهو
_ البدقك اكان صغير وقدرك شاكلو ودقو ساي ما تخليهو لكن ان زول كبير زي اعمامك ديل أكل دقتك ساكت وصم خشمك عليك لانو مافي زول كبير بدق ليهو شافع برا سبب . وانا والله زعلتني قبيلك دقت عمك الزبير ليك لاني حلفت ليهو وهو اتحداني ما سمع كلامي ولا قدر حليفتي . وكنت مارق اكسر ليهو يدو كششش علا البركة اللاقني حاج احمد ورجعني اكان كسرتها ليهو اكنتا بندم عليها لمن اموت والزبير اخوي ومافي زول بضر اخوهو والشيطان شاطر أكان لقى ليهو شرارة زعل وغضب بنفخ فوقها بأقوى ما عندو لمن تعلب وتبقى نار ليها لهب وتحرق اللخضر واليابس اكان ما اتلعن المنعول والزول حكم عقلو وطرد الزعل
والكلام دا كلو ما نفع فوق الفنيدك ورقد قال داير ينوم وفعلا نام ما صحى علا الصباح يوم أمس كلو يهمى ويتحاوم واكان يوم طويل خلاس

اب ضهير قام ومشى رجع مرتينو وفطر وفات علي طاحونتو
امحد علي جار ابضهير زي حاج احمد وواحد وزول طيبان خلاس وديمة باسم وبشوش وحالو مستور وميسور زيو وزي ناس الحلة حامد الله وشاكرو علي الفي والمافي وباقي داب حواشتو يزرع ويحصد وعندو كم غنماية مين كتار علا مكفياتنهم وبوسر العناقريب لناس الحلة بلاش ساكت ما بشيل من زول فيهن قروش وعندو ولد فالح ونجيجيض اسمو محمود اتعلم منو وسير العناقريب وفات اشتغلها في الخرطوم وشديد بلم القرش وحمار شغل لا بهجس ولا بقيل وديمة طابي حبالو وشايل قدومو ويتحاوم النجيض ونافع روحو ونافع ابوهو
محمود امحدعلي دا اليوم داك جاء الحلة وجاها زول عرس اكان ناضم في عرفة بت حاج أحمد وحاج احمد اداهو وهم غير جيران وبيوتن قراب بعض بتباقوا والسرارة بيناتم
وفي يومو دا مشوا سدوا المال وودوا الشنطة والشنطة اربعة اربعة ما ناقصة شي والحلة كلها تنضمبها وبخيتة فاتحاها في العنقريب للحريم يتفرجن ويباركن
الحلة لمن يكون فوقها عرس بتبقى سمحة خلاس والناس كلهم بفرحوا والبنوت دلوكتن ما بتقيف وغناهن الفي الفريق داك بسمعو ويومي يعلمن في العروس
والعريس فوقو الملايكة يتقدل زي الملك والكبير والصغير بحترمو وبريدو ومديهو مكانة ليها هيبة وأي زول داير رضاهو ويدعي ليهو بالسعادة
محمود من ما جاء ليوم الليلة تم اسبوع والعرس باقي ليهو اسبوع
الفنيدك طيلة الاسبوع ساكت وبعد كلام ابوهو ليهو داك ومع جوطة ناس العرس ولمة الناس في فريقهم ساب حاج الزبير ما مشى ضراهو ولا قرب من بيتو ولا اشتغل بالبقرة وابوهو انبسط واتكيف منو شديد لمن شافو ما عمل للزبير حاجة وقال لحاج احمد الفنيدك عقل تب وبقى يسمع الكلام
يوم العرس اكان يوم ما بتنسي في الحلة والجنوي قاموا فجر دقوا الصيوان للداعي وجابوا الكراسي والطرابيز رصوهن والطيب الجزار ضبح التور والحريم سون الفطور والغداء وناس الحلال الجمبهم كلهم جوهم للداعي وعربات تمش وعربات تجي والحمير والكوار ملن الحلة والكل مبسوط ومتكيف
العصر وبعد الواطة ما بردت السيرة مرقت وحاموا ولفوا

الحلة چت حتين فاتوا بيت ناس العروس
وقعدوا معاهم لمن اتعشوا وبقوا ناس حفلة
والحفلة بدت
الفنيدك في الجوطة والكبسيبة ديك والناس يعرضوا ويغنوا والبنوت يرقصن مافي زول جايب ليهو خبر انزغم براحة وشال ليهو جاز في علبة ومشى دخل مخزن حاج الزبير الفوقو العيش والقمح واتناول ليهو كليقة قصب دخلها معاهو وكبا فوقها الجاز وشخت الكبريتة حرق المخزن وقام جاري وجاء اتدسا في نص الشفع الفي الحفلة

يتبع....

الفنيدك 8

مجاهد يوسف

كليقة القصب الدخلها الفنيدك المخزن وملاها جاز اكانت ناشفة ومع شختتو للكبريتة النار انطلقت زي البرق فوقها وفوق شوالات الخيش ليها لهب واللهب يشطشط وليهو لسنات والناس كلهم سابوا الحفلة وجروا عليها
الحلة فةقها فد سهريج وبشتغل ببابور جاز ماسكو رحمة الله ود الكامل بشغل البابور مرة واحدة في اليوم ومرات مرات كل يومين والناس بتملا الازيار وعندو جركن وللا برميل بملاهو والمواسير ديمة تشخر وطريقة موية يطفوبا النار القوية دي تب مافي علا يقعوا بالفي الازيار وأي زول اتناول ليهو جردل ووقعوا اللزيار كردوهن كرد ما سون حاجة وفي ناس قعدوا يكتحوا في النار بالتراب والنار ماشة زايدة وما في زول بقدر يقرب منها . لل التراب طفاها ولا موية اللزيار سوت شي في اللاخر وبعد كملت مروتهم ومويتهم حرسوها وقعدوا يعاينوا فوقها ساي
المخزن هيل طين وفوقو فد شباك وشبيبيك صغير زاتو ما تامي شباك . والنار وصلت السقف وشبطت فوقو تب والمخيزن قصيروني ما عالي ومعروش بحطب ونال وقنا والمرق ما المرق داك العليهو الرك والنار اكلتو أكل والناس تسمع طق انكسر وانقسم نصين والسقف كلو وقع والمخزن تقول الكمينة بس الكويسة كان براهو ما متلصقة عليهو اوضة ونجض نجاض والجواهو كلو راح واتفحم والناس حارسنو ويعاينوا لمن الشمش طلعت حتين النار شوية شوية ماشة تخمد لكن قمحتو كلو لا خلت عيشة لا قمحة
المتهم الاول في نظر الناس الفنيدك لكن بعد حرقتو للمخزن دي منو البقدر يجيب اسمو والفنيدك الناس لمن جروا علي النار هو فات ينوم المغيب زي الما عمل حاجة .
ابوهو شافو وصحى بيهو لمن جاء والصحاهو كوراك الناس . وكل زول كورك بطول حسو النار النار عوووك النار آ ناس
وجرى معاهم ولمن لقاها في بيت ومخزن الزبير الفيهو كملت تب لأنو ما حصلت قبال كدي ومافي مخزن بنحرق براهو علا بفعل فاعل ومافي زول بعملها غير ولدو الفنيدك واتبورك في فجتو ديك برة في الشارع وخاتي يديهو فوق راسو لا قادر يمشي مع الناس علي النار ولا قدر يرجع جوة بيتو
حاج احمد برضو لمن صحى بالنار ومشى وشافها قال قطع شك دا الفنيدك
حاج الزبير والمعاهو لمن النار غلبتهم ومافي حل غير يعاينوا فوقها ساي ، اتمحن وقعد يعاين وخشمو ما فتحو لا قال لا قال والناس كلهم يعاينوا ليهو ومستنين منو ردة قعل وهو من قعدتو ما قام وبقى يعاين زيو زي الناس
والناس كيمان كيمان وكلهم يتهامسوا الفنيدك الفنيدك بس ما فوقن زول قادر يفتح خشمو ويقول دا الفنيدك وما خوفن من الظن والبهيتة لانهم متأكدين انو دا هو دا هو العملها لكن خوفن منو هو زاتو
والبقول الزبير زاتو متلقي حجج وحقار مالو ومال الفنيدك وكل عارفو مضر ما كان وما كان وما كان .. اها اللجغم
والبقول الفنيدك غلطان وستين غلطان
والبقول والبقول والبقول
حاج احمد قبال الشمش تطلع فات بيت ابضهير ولقاهو في تبروكتو وتفرجختو ديك ما قام ولا قادر يقوم ومحتار في البعملو لا مشى كدا ولا مشى كدا وحاج احمد جاهو وقومو ودخل معاهو البيت
الفنيدك ما نام لكن عامل فيها نايم وحاج احمد ناغم ليهو وقال ليهو عارفك صاحي تعال وتترب قام جاهو وريحتو جاز جاز قال ليهو انت العملت كدي ؟
الفنيدك قال ليهو آي
حاج احمد قال لا حول ولا قوة الا بالله وما نضم. معاهو تاني
ابضهير ساكت ساي ويتصرف كيف ما عارف وولدو لا بنفع معاهو دق ولا بنفع معاهو كلام علا يكتلو ساي ويريح الناس منو ومن شرو
وهو ولدو الوحيد الما عندو غيرو ومسك في لا حول ولا قوة الا بالله العظيم بس قعد يردد فوقها ساي اصلو ما سكت منها وبقى مستني جية الزبير ليهو
النار انطفت براها وما خلت في المخزن علا الحيط وخلتو أسسسسسود
الناس فوقهم المشوا فطروا مع العريس وفوقهم الغلبو النوم مشى بيتهم نام سهرة الحفلة حارة والاحر منها الصنقيرة والتعب السببو النار

ابضهير انتظر حاج الزبير للضهرية ويشيل ويعاين ويمرق ويدخل زي سيد الرايحة والزبير كلو كلو ما جاهو ولا هو فات كفر ليهو وداك الحلة كلها جاتو في البيت علا ابضهير وفكر ليهو وعارفو وعدم جيتو ليهو دي هي الخلتو يعرف انو الفنيدك الحرق مخزنو وعشان كدا ابى يفوت ليهو
عتمان اخوهو زاتو كان متأكد انو دا الفنيدك وقال ليهو قوم آ الزبير اخوي وورح لابضهير في بيتو
الزبير قال ليهو نسوي ليهو شنو ؟
_ ما عارف لكن ما نسكت كدا علي الحريقة دي ساي
_البقت بقت
_ يعني نسكت ساي ؟
_ هو مالو ما جاء ؟
_يجي كيف ويقول شنو ؟
_ونحن نمش نضاربو وللا نمش المركز نشتكيهو وللا نسوي ليهو شنو آ عتمان أخوي ؟
_ العيش والقمح الانحرقن ديل ساهلات ؟ السنة كلها تحرت ونتيرب ونزرع ومساهرين فوق الموية بالليالي في الخلاء ولمن نحصد تعبنا دا كلو يروح ساي
_ يا نمشي نكاتلو يا نمشي نشتكيهو وبعدين ولدو الغلطان ما هو وانا والله مافي شيتن مخليني اسكت علا طليقو لمرتينو لمن حلف يكسر يدي والكلام القالو لحاج احمد قبال يطلق . لمن قال الزبير اخوي وود عمي وماني مكاتلو في شان حليفة وكلام جهل وزعل ووقع الطلاق

عليهو . انا من اليوم داك احترمت ابضهير وخليت ولدو
_اها ولدو نخليهو ساي ؟
_يوم اجتمعنا داك وقلت ليكم نفس كلامك دا انت وحاج احمد قبال تمرقوا مننا قلتو شنو ؟
_قلنا شافع وجاهل وبكرة ببكبر
_خلاس
_ خلاس شنو آ الزبير ياخ ؟ انا ماش ليهو
_ حرم تمش ليهو تاني لا بيني لا بينك وانا زي ماهو طلق مرتو عشان حليفتو انا برضو طلقت المرة ورجعتها وانت الكلام دا ماك عارفو ولا في زول عارفو غير شمعون وحاج احمد وامحدعلي وديلك ما نضموا بيهو وصمت لي تلاتة يوم كمان وبرضو ما وريت بيهن زول

عتمان اقتنع بكلام الزبير اخوهو وسكت وهدا لكن البهدي ابضهير شنو ؟
ابضهير مشى لحاج احمد وقال ليهو الناس ديل ما جوني ولا انا مشيت عليهم .حاج احمد عرف من عتمان كلام الزبير اخوهو كلو وعجبو بس ما ورى بيهو ابضهير وقال ليهو ولا بجوك واصلا هم ما متهمين ولدك ولافي زول فيهم جاب سيرة ولدك
_اها انا اعمل شنو ؟
_ما تعمل اي شي
_لا حرم بعمل وانا بمشي ليهو
_تمش تقول ليهو ولدي الحرق مخزنك
_آي بقول ليهو كدي والببقى كلو حبابو ان دارو العوض بعوضهم وان دارو شيتن تاني احسن اعرف لكن اقنب ساكت ساي كدي ما بقنب
وانا سايق ولدي وماشي للزبير ان ماشي معاي ورح وان بقيت ماك داير تمش علي كيفك ماني جابرك
_بمش معاك تب

ابضهير وحاج احمد بعد صلاة المغرب فاتوا للزبير في بيتو وساقوا معاهم الفنيدك ..

يدبع ياخ ...

الفنيدك 9

مجاهد يوسف

في البلد الطلق نسماها هبهب ملايات الفريق بالحن
محل ما تروح تلاقي الريد
وناس تضحك تمرق السن

وللفنيدك بقية ..

ديل ماشين في الدرب علي بيت حاج الزبير يلاقيهم امحدعلي ابو العريس ولايم ابضهير علي عدم جيتو للفطور وهو ما قاعد يقول ليهو ابضهير وديمة بناديهو باسمو وناغم ليهو هوي آ خليل الليلة خبارك ما جيت فطرت معانا .
_ها امحدعلي اخوي يعني ماك خابر ؟
_خابر شنو ؟
_الفنيدك ولدي ما حرق مخزن الزبير
_حرقوا الفنيدك ؟ لا لا قول كلام غير دا
_ هو الحرقو والله وهدا قدامك اسعلو

امحدعلي قال للفنيدك بصح حرقنو انت آ جنى ؟
الفنيدك قال ليهو آي حرقتو انا
وامحدعلي تاح اداهو كف
_ات آ جنى مطرطش وللا ماك نصيح وللا عشان الناس سكتولك وقالوا شافع ؟
ابضهير قال ليهو الجنى دا ما براهو آ خوي وخليهو اصلا لا بنفع فوقو دق ولا نضمي واكان قبل عليك بيازاك
_ يازاني شنو ؟ ولدك دا سكاتنا عليهو هو البقاهو كدا لكن انا بقرعو ليك تب . وهسي انتو ماشين للزبير وللا شنو ؟
_آي ماشين عليهو وفي اللول نعتذرلو وعيشو وقمحو في رقبتي دي ومخزنو زاتو ببنيهو ليهو
_وخاف برضى ؟
_ اكان رضى وللا ما رضى انا العلي الحق وهو الليهو الحق والبقولو والبدورو كلو بسويهو ليهو ولا بتحاجج معاهو
_ حرم عداك العيب وورحكم انا زاتي ماش معاكم . بس دقيقة قبال نتحرك من هني انا عندي كلام
_كلامك خلو لبعدين هسي ورح نخلص من الموضوع دا ونجي
_لا حرم اكان تسمعوهو في اللول وكلامي في شان الموضوع دا زاتو
_سمح قول كلامك
_بعد نصل هناك ونقنب معاهو ان بقى فيها عوض حرم علي النص
_ها زول ها كدي اقيف ..
_ لا حرم ولا كلمة . البتغرمو كلو النص بالنص انا وياك
حاج احمد قال لامحد علي النص بالنص كيفن آ حاج ؟ وانا ؟
امحدعلي ضحك وقال ليهو انت بطريقتك مع خليل لكن حرم انا علي النص
_خلاس قول التلت
_لا حرم النص ومرقت بحليفتها وحرم ما بترجع
خليل ابضهير قال ليهو انا قبالك حلفت وطلقتهن مرتين وانت فد مرة طلقها ساي ومرجوعة في مسماها
_لا حرم ما بطلقها وابقى زيك انت والزبير
_الزبير مالو كمان النعلو طلق مرتو ؟
_طلقها يمين وانا وحاج احمد دا وشمعون اكنا شاهدين وما كان دايرنا نوريك وطلقها احترامن ليك عشان سمع بيك رجعت من كسرة إيدو . ما شايفو تاني ما نضم في ولدك ؟
_بلا عليهو سكت وانا اقول السكتو شنو . والله ماني عارفو طلق واريتني اكان ما عرفتا ولا انت زاتك وريتني انو طلق احترامن لي

اب ضهير بكى مسااافة وملص مركوبو وخلاهو في فجتو وقال يمين اكان اصلو حفيان
_يا زول ألبس مركوبك
_ماني لابسو وانا حلفت يمين

ومشوا ووصلوا لعند بيت الزبير واكان معاهو عتمان اخوهو واولادو وكم واحد من الفريق وشمعون زاتو معاهم والزبير من شاف خليل ابضهير حفيان ومزرزر ومحنبك قلدو وقعدوا اللتنين يبكوا
الناس ديل اهل وبترايدو شديد ومن قاموا ما حصل اختلفولن في شي ولا حصلت بيناتهم مشكلة
اخدوا ليهم مسافة بكوا فوقها زين وأي واحد اكان سعلتو ما بعرف يشرح ليك البكاهو شنو
مشاعر وفاضت وريدة وحكمت
الناس سكتوا تم والزمن داك المغرب أذن وكلهم فاتوا الجامع صلوا وجوا راجعين
ابضهير بعد ما قعدوا جرا عليهو الفنيدك وقفو قدامو وسلا سكينو من ضراعو وقال ليهو شوف آ الزبير أخوي دا ولدي ال الله قسموا لي من تربية ما قصرت فوقو تب ويدي دي فترت من دقو والجنى دا مضر ومعيق وهو الحرق المخزن هيلك وحرم لو قلت لي اتكيهو واضبحو هسع تيا دي اتكيهو واضبحو شخخخ قدامكم وان درت تضبحو براك ولدك وانا البتكيهو ليك وهاك السكين واكان علي العيش والقمح حرم بكرة في بيتك ومخزنك براي بلخ طينو وبضرب طوبو وبراي ببنيهو
حاج الزبير سكت مسافة وقال ليهو ماني راضي
_اها البرضيك شنو حرم البتقولو كلو اسويهو ؟
_ البرضيني سكينك السليتها دي حرم ما بترجعها فاضية واكان تضبح لينا بيها هسي خروف من غنمي نتعشى فوقو وحرم بعد العشاء ترجعوا بدربكم لا داير منك عوض ولا داير منك شي والفنيدك ما ولدك براك وانا برضو ولدي وباكر بكبر وبعقل وبنفعك وبنفعني
اب ضهير داير ينضم لكن الزبير قال ليهو حرم ما تعقب بعد كلامي دا وقال لولدو اجر آ جنى جيب لعمك خروف من الزريبة
حاج احمد قال ليهو سمح ما يغرم العيش والقمح كلو ونجيب ليك كم شوال
الزبير قال ليهو عتمان مخزنو ملان نحمد الله وعيشي اكان ربنا قاسمو لينا ما كان حرق وراح الشر والبركة البقت فوق العيش
الجنى جاب الخروف وابضير ضبحو والجنوي سلخوهو وقعدوا يتونسوا ويضحكوا لمن العشاء جهز واتعشوا في امان الله واتفارقوا قلوبهم صافية ومنشرحة
الفنيدك امعس في الشية لمن قال بس وحاج احمد مسكو بجمبة وقال ليهو اتعلم من ابواتك ديل وشوفهم بترايدو كيفن
الفنيدك يشيل ويحدر لحاج امحدعلي اظنو الكف حرقو وداير يازاهو
نشوف

ويدبع ..

الفنيدك 10

مجاهد يوسف

بعد العشاء والونسة الحلوة والجو الملان سماحة واخوة ومحنة وريدة الناس اتفرقوا واتفرتقوا وأي زول مشى علي بيتو واول ما ابضهير وصل البيت قعد الفنيدك في واطاة الله قال ليو شوف آ ولدي وبدورك المرة تفتح لي عينك قدر الريال وتسمع كلامي الداير اقولو ليك دا كويس وتنتبه ليهو وتعملبو
اول حاجة هدا انت براك مشيت معاي وشفت الحصل كلو بعينك مافي داعي تاني اقولو ليك وقبل كدا قعدتك ووريتك انو نحن كلنا أهل والحلة دي ما فوقها زول غريب من التاني وكلنا بنترايد وحبايب من قمنا وبيناتنا اللخوة والكلمة الطيبة والسمحة والكلام دا الاتربينا عليهو وشفناهو عند ابواتنا الواحد منهم اكان لو جارو ميرود ساي نوم ما بنوم وليوم الليلة نحن كدا وانا الزبير دا اخوي شديييد وبراك شفت البيناتنا وانا يمين الليلة من شفتو ساي البكاء شرطني برا سبب والعجب هو والبيني وبينو أكبر من اي مشاكل وما انا وهو برانا لا لا الحلة دي كلها كدي ما في زول برضى فوق التاني ولا في زول بشيل من زول ولا في زول بكاتل زول
دحين آ ولدي أعقل وسيب المضرة والأذية البتسو فوقها دي
الفنيدك قال ليهو انا ما قاعد اسعل لي زول لكن البهبشني ما بخليهو والله
_ لا لا تخليهو تب
_هسي قبيلك امحدعلي ابصلعة دا كفتني لشنو ؟
_امحدعلي عمك ويكفتك علي كيفو وبعدينك انت غلطان كيفن ما دايرو يكفتك
_ والله ما اخليهو
_والله تخليهو غصبا عنك يا كلب والله تلحق لمن تضرو علا اضبحك بسكيني دي شخخخخ ودفن ما ادفنك واكان اجرك زي الفطيسة واجدعك للكلاب
الصافية سامعة كلامن كلو وقالت للفنيدك اوووعك واقدر قرب منو وللا ضرو وما بضبحك ابوك انا دي البضبحك
الفنيدك طنطن وفات منهم مشى قعد جمب حبوبتو وهي سمعت الكلام كلو وقالت ليهم والله واحد فيكم يهبشو مافي دا ولدي انا وباكر انا ماشة لحلة اب عجاجة قضاي الحاجة يلحقنا ويفزعنا يا يابا وبسوق معاي ولدي دا
واستعدلت وكوعت وقعدت توصف وهي نضامة وسجاعة ولا بتكوس للكلام وقالت

باكر بنزورو
شيخي البدورو
يملانا بنورو
ونكرف بخورو
وناكل مهيوبتو
وبنخاف هبوبتو
ونقعد حداهو
ننضم معاهو
نتغطى بي رايتو
ونشرب محايتو
وعييييك ابت تسكت تاني كلو كلو لمن ابضهير قال ليها اي عليك النبي آ خالتي سوقيهو معاك اكان يطير ليهو جنو دا

امحدعلي عندو زريبة في بيتو جمب ديوان ابضهير بينها وبين الديوان حيطة ومي حيطة طويلة وعندهم اربعة غنمايات وتقرتين وكم بهم ، وبعد العرس بيتو اتملا خرفان جابوهن ليهو الناس واجبوهو بيهن في العرس وضبح منهن ايام العرس لمن فتر ولسة فوقن باقي ما كملن
الخوسة حقت حاجة اللقية الداساها في السحارة الفنيدك مشى جابها وختاها جمبو تحت لحافو وبعد الناس ما ناموا قام نص الليل وتلب بالحيطة في الزريبة واكان داير يطعن بيها الغنم لكن لمن وصلن خاف الغنم يكوركن والناس يصحوا والفجة كانت صانة وضلمممة والقمرة مافي وهو زي الشيطان لا بخاف من دبيب ولا بهمو شي ولا عندو حبيب
ومسك ليهو واحدة من التقرات ودرع فوقها الحبل في رقبتها واتكوم فوقها وهو لتيد وقصيروني ومبغبغ خانق التقرة وسادي ليها خشمها المضر والتقرة رافست ورافست وفرفرت لمن عدمها النفس وكتلها ومشى علي التانيات والغنم قعدت تتجارى منو وحاج امحدعلي صحى بيهن وعندو بطارية ولعها فوقن ومن عنقريبو ما قام والفنيدك انبطح ورقد جمب التقرة الميتة والغنم هجست وداك لمن شاف ما جمبهن زول طفى بطاريتو ورقد نام
بعد مسافة الفنيدك قام من رقدتو وملان بعر اتنفض وقعد يحبى لمن قبض ليهو عنز وبنفس الحبل خنقها وعمل فوقها العملو في التقرة وما فكاها علا بعد اخدت فرفيرتها وماتت وتلب بالحيطة وفات نام

ابضهير جاء من صلاة الصبح وشال راديهو داك وانبطح يفتش في الاخبار
الصافية قامت دغش ومشت علي الغنيمات حلبتن للشاي وجات تصحي الفنيدك لقتو ريحتو عتود عتود وعنقريبو وعراقيهو ملانات بعر وما صحتو ومشت كلمت ابوهو قالت ليهو تعال شوف جناك
والفنيدك نايم وابوهو لمن جاء وشاف البعر قصا دربو لمن وصل الحيطة البينو وبين زريبة امحدعلي وتاوق لقى الغنم بي صمتن علا في تقرة وغنماية راقدات اتناول ليهو حجر ضرب بيهو التقرة ومن فجتها ما زحت عرفها ميتة واكيد كتلها الفنيدك
رجع واستغفر واتشهد ومشى للصافية قال ليها الخازوق السايب المسجم المضر كتل لامحدعلي غنمايتين والصافية قعدت تولول وكرعلي والليلة كر علي وسجم خشمك وسجم امك والترابة في خشمك يا الصافية يا الولدتي ليك شيطان
ابضهير قال ليها دا كلو ما بحل
الليلة انا يا كتلت الولد دا يا طشيت من الحلة دي وتاني ما جيتها راجع صاد لكن وشي دا ما بقدر اقابل بيهو لا امحدعلي ولا غيرو تب تب
الصافية قالت ليهو اكتلو ساي لكن من الحلة دي ما بتمرق
_امس القريبة دي حارق للزبير مخزنو وصالحتو وجيت نضمت معاهو لمن خشمي وجعني والليلة كتل غنم امحدعلي وباكر ما معروف يسوي شنو ويكتل منو وانا كتل والله كضاب لو قلت ليك بقدر اكتلو عشان كدي ياني الطاشي من الحلة ومخليها ليهو وقع

اد تاني ماني قاعد فوقها . اقعد كل مرة بسببو اتعذر للناس ؟
_ انا دي البكتلو بس انت ما بتفوت
_ها مرة تكتلي شنو ؟ في مرة بتكتل جناها ؟ والله انا لو داير اكتلو بصح بصح انتي ما بتخليني
_ والله ما بخليك ولا بقدر اكتلو ودا جناي وعشاي وحشاي وحبيب قساي
_ الترابة فوق خشمي وخشمك اكان عندنا ولد . وانا فايت يا مرة لملمي لي هدومي انمرق قبال الشمش تطلع وناس الحلة يشوفوني
_فايت وين ؟
_ارض الله واسعة آ مرة وانتي الطاحونة دي بتعيشكم تب وشمعون عندو ولد نجيض شغليهو فوقها خليهو يمسكها ليك والحواشة قاعدة وكلمي امحدعلي وللا حاج احمد اللشوفو ليهم زول يزرعها شراكة بينكم وبينو وانا تاني ماني معود صاد
_ ما تفوت وخلينا نودي الفنيدك دا للشيخ في ابعجاجة ونقعدو معاهو هناك يقرا في الخلوة امكن يحفظ ليهو قرآن ينفعو ويعقل
_انا ما في الولد . انا في وشي دا اقابل بيهو الناس كيف . اصلو ما في حل غير افوت وامكن بعد كم سنة كدا اكان بقيت حي وشديد اجيكم راجع لكن هسي الفوتة لا بد منها وانا مارق اودع مرتي ديك واكلمها وانتي وهي ان درتن الطلاق بطلقكن وبفوت وان ما دايراتنو علي كيفكن لكن انا ماني راجع بي قرب

والصافية قعدت تبكي

نشوف ان شاء الله وان بقينا شداد

ويدبع...

📖 اذا انتهيت من القراءه اضغط علي #لايك 👇 واذا حصلنا علي #100# لايك سوف نقوم بتنزيل #بقيه حلقات ا الروايه

الفنيدك 11

مجاهد يوسف

لمن تدور تنوي وتفارق ريحة الطين في بلدنا
تبقى إيه في الدنيا راجي وماشي وين فايت المحنة
ما الزمن غلبنا يااااما والاغتراب بالشوق كتلنا
وبقينا نقراو في حروفنا وبالحروف نقالد أهلنا

وللفنيدك بقية...

بكاء الصافية ما رجع ابضهير من كلامو وهو زاتو الفوتة باقية ليهو حارة ولا هو عارف داير يقبل وين بس شايف القعدة أحر منها مافي ولدو صغير لا بنطرد ليهو ويتبرا منو ولا بقدر يشوف عمايلو البسوي فوقها دي ويسكت علا اكان يكتلو ساي ودي ولا بقدر عليها وقبل كدي بقى بسوقو معاهو وين ما يمشي لكن ما بقدر يصاقرو ويباريهو اليوم كلو ويحميهو من اللعب ويحميهو من الناس ومباراتو ليهو ديك زاتها ما نفعت وبرضو غفلو وزاغ لمضرتو
الحل الوحيد وخجلا من الناس يفوت هو ويطش من الحلة العمرو كلو عداهو فوقها
مرق من الصافية وفات بيتو التاني لمرتو طيبة بت عمو العك ووراها الكلام كلو والناوي عليهو وخيرها زي الصافية قال ليها ان درتي الطلاق بطلقك وان ماكي دايراهو علي كيفك علا انا ما معروف البحصل علي شنو لكن لو ربنا كتب لينا في الدنيا دي ملاقة بنتلاقى
قالت ليهو ما في شيتن بخليك تسيب اهلك وعملك وتطش واكان علي امحدعلي ياهو اخوك لا بزعل منك ولا بعاتبك والداير تسويهو دا البزعلو والبزعل الحلة كلها . الفنيدك جاهل وعلي غباهو ما بغلبك تعقلو لكن الفوتة اصلو ما صاح
بهناك الصافية مشت ناس بخيتة وورت حاج احمد وجات لامحدعلي ورتو والاتنين مشولو ولقوهو في بيت طيبة ولملم الجللب هيلاتو فوق شنيطة وباقي مارق ووقفولو قدامو
امحدعلي قال ليهو دا كلام شنو السمعناهو دا آ خليل أخوي بتدور تطش من الحلة بعد كبرك دا وتهمل اهلك وحلتك وناسك عشان غنمايتين ،الغنمايتين بمرقنك وهن هيلات منو ؟
_ ما مارقاتني الغنمايتين آ امحدعلي
_ نان المارقك شنو نان
_فترتا ساااي حرم من ولدي دا ومن عمايلو
_ ولدك جاهل
_ جاهل لمتين ؟ لمن يكتل ليهو زول ؟
_ انا ما قلت ليك خليهو لي وبقرعو ليك
_ ما بنقرع ليك وعلا تكتلو ساي لكن الجنى دا شر وما براهو وما في شيتن كدي نفعك فوقو وانا ما خليت شي ونضمت معاهو مية مرة ودقيتو لمن يدي ديل ماتن ووجعني من دقو وهو بس الحمار الدق بكاء ما ببكيهو
_ ما عندك بيهو شغلة انا بعرف اقرعو كيفن وانت حرم وطلاق تلاتة ما بتمرق من الحلة دي
_ الحلة دي تلني ما عندي فيها قعاد ادوني خاطركم بس وان بقينا حيين بنتلاقى
حاج احمد قال ليهو سمح لو خليناك خاتر وين ؟
_ ارض الله واسعة وبني آدم ما بتحير فوقها والله كريم
_ دا كلو عارفنو وبندور نعرف انت من هني دي مقبل وين ؟
_ بمرق في الخرتوم ؟
_ شن بتخرطم فوقها وبتشتغل شنو وبتقنب وين ؟
_ بلقى لي شغل والله ما شقالو حنك وضيعو
_ ارجع من الفي راسك دا وامش علي طاحونتك واكان للغنم ماتن موت الله وبنجرهن برا الحلة ووشك عزيز ومكرم وراسك ان شاء الله مدى الحياة ما تندقرو من زول والفنيدك دواهو عندي تب .
دا كلام امحدعلي
وحاج احمد قال ليهو انا من يوم عرست بخيتة آ بضهير حصلت سمعتني حلفت حرام
_ ما حصل سمعتك والله وقايلك بتخاف منها
وابضهير وامحدعلي قعدوا يضحكوا وحاج احمد زاتو ضحك وقال ليهو البركة الشفنا ضحكتك دي ومالك داير تحرمنا منها وحرم الليلة اكان احلف عليك حرام
تاني خليل ضحك وقال ليهو حرم تحلف حرام ؟ خلاس حلفت خلاس حلفت
_ انا حالف اكان احلف عليك . وحرم وطلاق تلاتة آ بضهير تمرق من الحلة دي اكان ازعل منك
وكلهم فقعوها ضحكة
وخليل قال ليهم هسي انتو الوراكم منو ؟
_البركة في الصافية مرتك الجات ورتنا ولحقناك
_ غايتو الحريم ديل الزول ما يقول ليهن حاجة طوالي يجرن يورن بيها
واها الليلة ادبن ليها اسبوع كامل ما اعتب بيتي داك
امحدعلي قال ليهو قول خايف من ولدك الفنيدك
_ عليك الله آ امحدعلي ياخ ما تذكرني ليهو والجنى دا انا كجنتو
_ مافي زول بكجن اولادو وزي ما قلت ليك خليهو علي بقرعو ليكم
_ بتدور تقرعو كيفن وبتسوي ليهو شنو ؟
_ انت مالك ومالو وما عندك شغلة بي . ما زي ولدي
_ ولدك تب لكن انا خايفك تطش انت من الحلة دي والجنى دا سجمان وشيطان يا راكبو شيطان لكن فعايلو دي ما في زول بسويها وحالتو دي صغير اكان كبر بعمل شنو ؟
_ انا ما بطش لكن بطير ليك جنو وبتشوف براك
ابضهير رجع من كلامو وقعد واتفقوا قصة الغنمايتين دي ما تمرق منهم وناس الحلة ما يعرفوها . وقعدوا لمن فطروا وطيبة سوت ليهم لقمة بملاح روب
الحلة صغيرة وبيوتها قراب بعض ومافي شي فوقها بندس وديل لمن فطروا ومرقوا لقوا الحلة كلها عرفت والفنيدك زي اللبانة في الخشوم والمرقة حقت ابضهير سمعوا بيها وجوهو الزبير وعتمان اخوهو وشمعون . وشمعون الفلقة حقت الفنيدك برت وراحت علا وسمتو في جبهتو قدر ما يعاين ليهو في مراية بهبشها وبضحك والبضحكو شنو انا زاتي ما عارف
ناس الزبير لاموهو ونضموا معاهو زييين في كلام فوتو من الحلة وشربوا الجبنة معاهو وفاتوا

مشكلة الغنم انتهت وهي اصلا امحدعلي ما عداها اصلا مشكلة والغنم بتعوضن
باق

ي مشكلة الفنيدك واصلو مافي زول سعلو ولا نضم ما نضموهو معاهو وامحد علي داير يقرعو كيف اصلو ما كلم زول

نشوف ان بقينا شداد ان شاء الله

ويدبع ياخ ...