#حلم_الخداع
بقلم نسمة صلاح
-٤١-
وبعدين اذا انت خايف علينا كدا م تخلي التلفون جنبك لمن تجي تنوم ولا السنيوره تبعك م بترضى وانا عملتا العلي اتصلتا ليك وم رديت اها اجيك في بيتك عشان اوريك دا بدل تقول لي تعبتي والله والله يخليك ليهم وكان المفروض اكون معاك وتعتزر تجي تنفش ريشك فيني
مهيد : دا كلو من قلقي عليكم بس
نسمه :انا دايره عربيه جيب لي واحده عشان م اتلتل اذا حصلت حاجه زي دي تاني
مهيد : جيبيها امشي استحمي وارقدي انا بشيلها وطلبت اكل جاهز
نسمه :تمام
بعد اكلت اخدتا لي نومه وصحيت لقيت مهيد بعمل ليها في مكمدات
نسمه :محمومه شديد
مهيد :لا نزلت ،اخدت كم حقنه
نسمه:واحده والتانيه بعدين
مهيد :تمام
بليل انا راقده وحالتي تحنن نومتا بسوم وخليت ديل لابوهم شويه كدا وجاني مهيد ومسح لي رجولي بزيت
نسمه :دا زيت شنو
مهيد :زيتون بريحك شويه
نسمه :اها
مهيد :نسوم حقك علي قبيل انفعلتا فيك من خوفي عليكم بس
نسمه :م مشكله
مهيد : حاشوف ليك طريقة عربيه قريب
نسمه :شكرا
مهيد :يلا نومي
عدا علي اسبوع م مشيت الشغل عشان بسمه بعدها نزلتها الحضانه ونزلت شغلي طبعا خصموا مني قروش الاسبوع بس اصلا م شغاله عشان القروش حتي قروش السوبر ماركت بمشي احاسب بلقى مهيد حاسبهم ،بعد اسبوعين مهيد جا صحاني
مهيد :نسمه قومي تعالي شوفي الحاجه دي
نسمه :خليني يااخ 😴😴
مهيد :في مفاجأه حلوووه تحت حتفوتك
نسمه :اه قمتا
مهيد :هاك البسي توبك
نسمه :مالك مستعجل كدا
مهيد :بطلي نقه وارح
بعد نزلنا تحت كان في عربيه حلوووه شديد لونها ازرق بقيت بعاين لمهيد وبعاين للعربيه
مهيد :يا ستي فعلا دي عربتك
نسمه :م تهظر معاي
مهيد :انا جادي والله
نسمه :مهييد واااي م قادره اصدق (ضميتو)
مهيد :مبرررووك عليك تتهني بيها ❤😍
نسمه : بالجد شكرا ليك ياااخ


#حلم_الخداع
بقلم نسمةصلاح
-٤٢-
مهيد:ها عجبتك
نسمه : اي شديد شديد ،م عارفه اجازيك كيف عمرك م قصرتا مني (دا كلو وانا في حضنو طبعا)
مهيد:انت بس خليك مبسوطه كدا
نسمه :تسلم يلا نطلع مشوار
مهيد :يلا
نسمه :خلاص نزل الاولاد عشان نغير
مهيد :لا خلينا نمشي كدا
نسمه:يا مجنون
مهيد :م حننزل يلا
نسمه :طيب
طبعا بقينا حايمين في الشوارع ونصرخ ساي يااخ كانت سهره مجنونه بشكل رجعتني لنفسي قبل 6سنه
بلسان مهيد
لمن نزلت وشافت العربيه كانت مصدومه لانو العربيه دي كانت منزله صورتها في تلفونها فانا عرفتها عاجباها عشان كدا جبت زيها بالنسبه لي شوفتها وهي مبسوطه بتعادل الدنيا وم فيها في يوم داك من شدة انبساطتها رجعت لي نسمه القبل 6سنه نسمه المجنونه مع اني متاكد تماما انها لمن قالت لي عاوزه عربيه كانت لحظة انفعال منها بس انا حبيت احقق ليها كلامها دا وربنا يقدرني احقق ليها كل البتتمناهو ❤
نرجع لنسمه
عدا شهر بقي تعاملنا انا مهيد عادي م ف مشاكل اي واحد فينا كان بحاول يحافظ علي العلاقه عشان م تنهار في يوم مهيد جا البيت الساعه 2ص دخل وانا كنت نايمه جاتني صحيه طلعتا اشرب لقيتو راقد في الكنبه
نسمه :مهييد مالك والجابك بليل دا شنو الحاصل عليك شنو ولي راقد في الكنبه
مهيد :متضايق شويه انتي الصحاك شنو
نسمه :صحيت اشرب مويه (مشيت قعدتا جنبو) المضايقك شنو (طوالي رقد في رجولي وهو ساكت) بقيت بمشي يدي علي شعرو وساكته في العاده مهيد كدا لمن يكون متضايق م بحب يتكلم عشان كدا خليتو علي راحتو شويه كدا ونام بقيت قاعده بعاين فيهو لمن غفيت تاني م صحينا الا والاولاد قدامنا
بسام:لي نايمين هنا
باسم :بابا عيان
نسمه :لا لا تعبان بس
مهيد :مشتاقيين يا حلوين
بقي يشاغل فيهم ساي شويه كدا
نسمه :قوم اخد ليك حمام وصلي وانا حاعمل ليك نسكافيه
مهيد :طيب

#حلم_الخداع
بقلم نسمة صلاح
-٤٣-
بعدها عملت ليهو النسكافيه وجا شربو دخلت حممت ديل وغيرت ليهم وسرحت لبسمه وقمتا جهزتا الفطور بعد فطرنا الاولاد بقو يلعبوا مع بعض ومهيد دخل رقد في الغرفه بقيت بين بين امشي أسألو الحاصل شنو ولا اخلي لمن يحكي لي براهو بعدها عملتا فيها ماشه استحمى لمن دخلتا لقيتو راقد علي ظهرو وبعاين للسقق شلتا لي ملابس ودخلت استحميت مع لخمتي نسيت اني من جا امس م لبستا توب طلعتا من الحمام وجيت قعدتا في التسريحه سرحتا شعري واتكحلتا واتمسحتا وهو بعاين لي ساي قمتا مشيت قعد جنبو
نسمه :ما عاوز تحكي لي
مهيد : ايمان 💔
نسمه :مالها
مهيد :عندها كانسر 💔
نسمه :لا حوله ولا قوة الا بالله ربنا يشفيها ومتين عرفت لانو قبل اسبوع كنت بتكلم معاها م قالت لي
مهيد :قبل يومين كدا
نسمه :اها وكانسر وين
مهيد :في الثدي
نسمه :ان شاء الله بتتعالج ادعي ليها بس
مهيد :ان شاء الله عاوز اجيبها تتعالج هنا
نسمه :طبعا العلاج هنا افضل بكتير
مهيد :بس البهتم بيها منو وانت شغاله وروعه م بعتمد عليها ابدا اذا هي
نسمه : اذا هي شنو
مهيد :ولا شي
نسمه :حاخد اجازه عشانها لو اطلب الموضوع بخلي الشغل عشانها ايمان دي زي نزهه بالضبط
مهيد :ربنا يخليك ودا عشمي فيك
نسمه :طيب اتصل لي ليها
مهيد :هاك اتصلي ليها حاخد لي نومه
نسمه :طيب
طلعتا اتصلتا ليها وكفرتا ليها واسيتها شويه بعد قفلتا لاحظت لي لخلفية التلفون لقيتو خاتي صورتي دخلت جهات الاتصال لسه مسجلني بغاليتي ❤
حرفيا كدا في الفتره الفاتت دي غضبي اتجاه مهيد كلو راح يمكن عشان تعاملو معاي وعدم تقصيرو اتجاهي يمكن عدم لبسي للتوب دا رد فعل للتغير الجواي بقيت بفكر وبقول انو الفات راح وانتهى وانو نفتح صفحه جديده ومره اقول ولي اتنازل ليهو كبريائي كان موقفني بس لمتين ؟
عدا علينا اسبوعين


#حلم_الخداع
بقلم نسمة صلاح
-٤٤-
والليله جايه ايمان واثناء م بخت في الاكل
مهيد :حامشي اجيب ايمان من المطار
نسمه :طيب حاكون ظبطتا ليكم العشا
بسام :بابا سوقني معاك
باسم :وانا ماشي
مهيد :طيب لبسيهم
نسمه :تمام
لبستهم بعد طلعوا نومتا بسمه وسخنت الاكل ولبست لي فستان وقعدت بعد ساعه كدا جو سلمت علي ايمان م شاء الله كانت طبيعيه جدا وم خايفه من حاجه وافكارها ايجابيه الحمدلله قعدنا اتعشينا بعدها مهيد ناداني
مهيد : نسمه الغرفه القعد فيها حادخل فيها لايمان شنطها تقعد هناك وانتي وبسمه نوموا هنا وبسام وباسم في غرفتهم وانا بنوم في الصاله تمام
نسمه :م ف مشكله بس في الصاله دي شينه حتحسس ايمان بي انها ضايقتنا نوم معانا هنا
مهيد : تمام يلا
بعدها دخلنا ليها شنطها ورينها غرفتها وبعداك مشيت لقيت ديل ناموا في الصاله شلت باسم دخلتو وغطيتو ومهيد جاب لي بسام وغطاهو ومشينا غرفتنا صلحت بسمه ودخلت غيرت الفستان وجيت لقيت مهيد حاضن بتو ونايم رقدتا بالاتجاه التاني
في اليوم التاني مهيد مشى مع ايمان وعملو الفحوصات وحدود ليهم جلسات الكيماوي وبعد جو
نسمه :اها الدكاتره قالوا شنو
ايمان :قالوا في بدايتو يادوب بالكيماوي بتعالج
نسمه:وجلسات الكيماوي بتبدا متين
مهيد:من بكره
نسمه :كويس ربنا يشفيك ،مشيت قدمتا استقالتي وجيت
ايمان :م كان في داعي انا بهتم بنفسي براي
نسمه :معقوله بس وبعدين الشغل بتعوض
ايمان :معليش ياخ تقلتا عليكم
مهيد :دا بيتك برضو
نسمه :حرفيا ،واها الاولاد مع سلمي ولا شنو
ايمان :والله سلمي بتتوحم وحمها كعب لكن نسيبتي بتريدهم شديد وم بتقصر فيهم
نسمه :ايوا كويس
إيمان :عقبالك
نسمه :........(م عرفتا ارد ليها)
مهيد : هي اصلا حامل 😇
ايمان:جد مبروك
نسمه :تسلمي

#حلم_الخداع
بقلم نسمة صلاح
-٤٥-
اليوم التاني مشيت مع ايمان ومهيد وحضرتا الجلسه تعبت شديد في الجلسه لكن بعد خلصو ليها ارتاحت شويه ومشينا البيت بليل وانا نايمه مهيد كان طلع فكرتو مشى بيتو بس فجأه حسيت بزول ضماني من ريحتو عرفتو فتحت عيوني وبقيت اعاين ليها
نسمه :مهيد انت
مهيد:هسس
نسمه :......
مهيد :خلينا كدا بس ليله واحده
نسمه :مهييييد
مهيد :عيون مهييد ،حرفيا كدا انحنا كملنا الحيل والقدره الفينا كلها بعد دا❤خلينا ننسى الفات كلو ونبدا من جديد بس نرجع نسمه ومهيد الزمان خلي الكبريأء الزايد دا شويه عشانك وعشاني وعشانا وعشان اولادنا وعشان البينا ❤عشان الزمن السمح ❤عشان ال 6سنه وعشان العشم ❤
نسمه........
مهيد :(جراني عليهو ورقدني في حضنو) م ضروري تقولي حاجه بس دايراك تعرفي انو مهييد لسه واقف في نفس المكان ومستنيك ترجعي ❤
في الصباح
مهيد :قومي يا كسلانه
نسمه :خليني يااخ
مهيد :حبيبي قومي والا (باسني في خدي)
نسمه:ها قمتا
مهيد:عليك الله خليك 😂😂💔
نسمه:امشي يا قليل ادب وين الاولاد
مهيد :بسام مشى الروضه وخلاص بسمه وباسم لغيت ليهم التسجيل بما انك قاعده
نسمه :طيب تمام
بعد عملتا روتيني اليومي وقعدتا مع ايمان بتونس ساي ومهيد مشى الشغل وبعد بسام جا اخدنا نومتنا صحينا عملتا اكلي وقعدتا اقري في بسام واراجع معاهو لحدي المغرب كدا
ايمان :مهيد م اتصل ليك
نسمه :لا والله عاوزاهو في حاجه
ايمان :لا بس اتاخر الليله
نسمه :لا بمشي بيتو التاني الليله
ايمان :بيتو التاني ؟؟
نسمه :مالك
ايمان :قصدك لروعه؟
نسمه :اخوك عرس تاني ولا شنو
ايمان :يا بت مهيد دا مطلق روعه ليهو شهر وزياده وروعه زاتها نزلت السودان
نسمه :شششششنو ،انتي جاده
ايمان :هو م وراك
نسمه :م جاب لي سيره والله
ايمان :يا ربي بمشي وين
نسمه : يمكن عرس تالت 🌚


#حلم_الخداع
بقلم نسمةصلاح
-٤٦-
ايمان:هو التاني عرس بالغصب خلي يعرس بعد اتحلى منها كانت مصيبه وحلت عليهو وقلبت ليهو حياتو والله وشفتي امي الدايراها دي ندمت انها عرستها ليو تخيلي ادت امي كف
نسمه : الحمدلله ع كل شي ارح نطلع نتعشا برا
ايمان:فعلا محتاجه اغير جو يلا
لبستا وانا همي كلو مهيد طول الشهر دا بمشي وين اذا هو طلق روعه وطيب لي م وراني شي بس ربنا يكضب الشينه 💔بعدها طلعنا مشينا مطعم حاولتا بقدر الامكان م اظهر توتري قدام ايمان بس م قدرتا
ايمان : م تخافي مهيد اخوي وانا عارفاهو يستحيل يعمل حاجه تضرك ابدا ،تصدقي وتأمني بالله مهيد هو العرس بس هو الاتعذب اكتر منك 💔مهييد بحبك يا نسمه عليك الله اتمسكي بيهو هو من غيرك بضيع 💔
نسمه :ان شاء الله ادعي لينا بس
بعدها رجعنا البيت طوالي اتصل ليهو
مهيد :نسمه انتو كويسين ايمان مالا
نسمه :م عندنا حاجه وايمان كويسه الحمدلله
مهيد :الحمدلله
نسمه :انت وين
مهيد :كيف يعني
نسمه :عديل انت وين، المهم انا مستنياك تعال سرعه يلا مع السلامه
قفلتا الخط قبل م يرد بقيت قاعده مستنياهو مشيت لقيت ايمان مهبطه عملت ليها عصير وعندها سخونه دخلتها استحمت واديتها الدواء حتي قدرت تنوم شويه كدا ومهيد جا
مهيد : نسمه خير
نسمه :كنت وين
مهيد:في بيتي
نسمه:ياتو بيت
مهيد:في شنو
نسمه :لي م وريتني انك طلقتا روعه وكمان قبل شهر وزياده طيب انت قاعد وين وبتمشي وين في الشهر عرستا تالت يا مهيد بس شفتا طلقني انا خلاص دا حدي فاهم وانا م قاعده ليك تاني ولا ثانيه (طوالي باسني)
مهيد :اهدي تمام م ف حاجه من الفي بالك والله بس انا بقيت شغال دوامين عشان كدا
نسمه :ولي تشتغل دوامين ،ولي م توريني
مهيد :عشان بدفع في قروش القسط حق العربيه وكمان كان عندي بيت تاني لازم م اقصر فيهو

#حلم_الخداع
بقلم نسمة صلاح
-٤٧-
نسمه :البيت التاني خلص والعربيه انا م دايراها زاتي بعيها يا مهيد ولو ع موضوع علاج ايمان بيع الدهب اصلا م قاعده البسو
مهيد :م تشيلي هم يا زوله انا بدبرها وبعدين ورديتين م كعبات
نسمه :شوف نفسك في المرايه واتكلم خلاص طيب نبيع العربيه لعلاج إيمان وتشتغل ورديه واحده بس
مهيد : ربنا يخليك لي ❤أوعدك في اول فرصه حاشتري ليك واحده ثانيه
نسمه :انا م دايره اي شي غيرك بس خليك جنبنا
مهيد :قصدك جنبك 🌚❤
نسمه :مهيد يااخ
مهيد :روحو لمهيد ❤تعالي نرقد انا هلكان
نسمه :تعال ارقد حاجيب ليك بيتزا
مهيد : طيب
مشيت سخنتها وخلطة ليهو عصير وانا مبسوطه بالجد منو وفخوره اكتر انو عندي راجل زيو ❤فعلا ابوي صدق في كلامو مهيد راجل م اضيعوا من يدي ❤
مرا شهر ونحنا مع ايمان عدت فتره وتعبت لكن قاومت والحمدلله بعد شهر اتماثلت للشفاء الحمدلله ❤بعدها نزلنا معاها السودان وكرمنا ليها وطبعا ام مهيد في الكرامه جات علي ومهيد قاعد وأخواني واخواتي واخواتو وعماتو
ام مهيد :نسمه يا بتي اعفي والله الشيطان لعب براسي ومع انك يوم م سمعتيني حاجه كعبه وشلتيني في عيونك لكن انا جازيتك بخراب بيتك سامحيني عليك الله انتي بقيتي احسن لي من بت اختي حقك علي يا بتي ❤
نسمه :م تقولي كدا يا عمتي في النهايه انتي ام مهييد وانا م شايله عليك ابدا وبعدين في زول بشيل ع ام راجلو وحبوبة اولادو ❤
ام مهيد :الله يخليك يا بتي انت تتعلي م تتدني
عدا اليوم وكنت مبسوطه شديد
بعد يومين يومين مهيد رجع دبي وانا قعدتا للولاده
بعد شهرين جبتا احلي بلسم 💜
بعد تميت الاربعين رجعتا دبي ❤بس م نسمه المشت زمان رجعتا نسمه زوجة مهيد ومجيهه ❤
مهيد :والله اشتقنا نشوفك مجيهه كدا ❤
نسمه:😂💔دا المطلوب
مهيد:ربنا يخليك لي يا غاليتي ❤تعالي ياااخ
نسمه :❤🙈


#حلم_الخداع
بقلم نسمةصلاح
-٤٨-
عدت علينا الايام ونحنا احلي م يكون مهيد م بقصر مني وانا م بقصر فيهو ابدا ❤ومهيد ارتقى في شغلو ورجع جاب لي العربيه ❤😍
نسمه :بسام م تتجارو كدا بتقعوا ،يا بت بسمه انا شايله اختك م بجيك تعالي هنا ،باسم روق ساي،،الاولاد ديل بجننوني ياااخ ، مهيد م شايفهم انت
مهيد : خلي الاولاد يلعبوا ع راحتهم يااخ وخليك انتي مع بلسوم دي ❤
وحياتنا استمرت كدا ومهيد كان خير راجل بالنسبه وغلطتا كتير لمن سميتو حلم الخداع والخداع بجي من ناس كتار منهم خالي الكنت بحبو الطلع اكبر حلم خداع 💔
ملحوظه
بالنسبه للحصل لنسمه وهي صغيره يا جماعه حاصل والكلام دا كتير بس مشكلتنا بنتستر علي البحصل تحت مسمى انك تستر بتك بس انحنا كدا بستر الغلط وبنستر الفاعل وكلو برجع لسبب واحد وهو بعدنا عن الدين بالجد الناس بقت بعيد شديد من ربنا وعشان كدا انتشرت الفواحش ويا ريت الناس تحاول تكون قريبه من ربنا،لن يغير الله في قوما حتي يغيرو م في أنفسهم

النهايه

📖 اذا انتهيت من قراءه الروايه اضغط علي #لايك 👇 واذا حصلنا علي #مائه لايك سوف نقوم بتنزيل روايه #جديده

السلام عليكم،،،،،،،،،، متابعة طيبة💜

الفنيدك 1

مجاهد يوسف

في حلة كدي علي الضهاري في ولد من ساعتو الصغير مطرطش وراس هوس وهاباش وقاباض يحرق الروح وطاقوهو جنس مضرة لا انحكت لا اتقالت . الجنى بعيو ولتيد بقولولو الفنيديك عشان قصيروني زي الفندك ومنجض الحلة وموريها النجوم عز الضهر
امو الصافية بت عبد القادر أكان ماخدها عبد الجليل الفنجري ود اعمها لزم وما انقسم ليها منو جنى وما قنب معاها كتير فد حول ما زادو ود الفنجري قرصو دابي جمب الكتر العلي جنينة الزاكي قالوا عفصو وكراعو اتورمت في حزتها ومات في يومو داك تاني جاها خليل اب ضهير سيد الطاحونة وخليل ما ببقى ليها علا السرارة بيناتم ،
اب ضهير اكان معرس طيبة بت عمو العك وقنب معاها للحول السادس ربنا ما قسم ليهو منها جنى ، واكان كايس الجنى قام جاء عرس الصافية دي فوق طيبة وقنب معاها تلاتة سنة وبرضو زي طيبة وواحد القسمة ما أدتن
الصافية عندها أمها اللقية مرة شديدة خلاس ونضامها وبتريد الشيوخ . عندهم في حلة جمبهم الشيخ حمد ود أب عجاجة فاتحتو هاك بي هاك وهي ما بتفارقو شبر اكان طعنتها شوكة ساكت بتجر ليهو
وهو خطري وتحلف بي الله المعبود بخراتو قالت بتتور الميرود وبترجع المفقود
ود اب عجاجة دا سموهو كدي عشان قالوا اكان عندو جدو شيخا واصل وصعب والزمن داك ناس حلتو عملولن شكلة مع حلة تانية مي بعيدة منهم والشكلة فوق بقرة واتشاكلوا واتكاتلوا فوقها بالعككز والسككن لمن دمهم سال ومات فيهم واحد وهو قدر ما حجزهم ومنعهم ما سمعوا كلامو فزعل وقال ليهم قلتو كدا ؟ الليلة بنجمكم وقالوا دخل الخلوة قنب فوقها يوم كامل ما مرق منها نهائي وجاتهم عجاجة كعبة خلاس ما خلت ليها راكوبة في الحلة علا وشلعتها الشوك الزاربنو الزرايب كلو طار وبقرهم وغنمهم قعد في السهلة ساكت والهبوب حممممرة والعجاجة حصحاصها يرصع رصع والهددم هيلات العوين وشولاتن في السماء والجللب في قفاهن بيوت الطيب والجالوص والحيط الما شادات حيلن كلهن رقدن واطة وبقوا في الشي البحلهم من حقاصة والعجاجة دي شنو ما عارفين ويشيلوا ويدعوا في الله يلطف عليهم ويوم كامل ما فيهم زول مرق
اها الناس قالوا دا زعل الشيخ ومن اليوم داك سموهو اب عجاجة ومر يا زمن وعدي اب عجاجة مات وخلف ولدو ولدو خلف ولدو وولدو خلف ولدو لمن وصلت المشيخة لحمد الهسي دا .
حاجة اللقية ريادة الشيوخ ساقت بتها الصافية وودتها لعند شيخ حمد وفتح ليها الكتاب وقال ليها علي الله وشال الفاتحة واداها بخرة
عدت سنتين ما في شي لمن حاجة اللقية مشت لشيخ حمد زعلانة وقالت ليهو وقالت ليهو ومن الضمن قالت ان بتي ما حملت ما بجيك شيخ حمد ضحك وقال ليها انا بيدي شنو ؟ كل البقدر عليهو اسأل ليك الله والاجابة من عندو هو . والجنى دا روح وبني آدم وكضاب اكان في شيخ قال ليك بديك جنى
مرقت منو ما مقتنعة وبطنها طامة
ربك رب الخير بعد كم شهر كدا الصافية حبلت . بالفنيدك والفنيدك دا جنى ستة شهور مرق سريع سريع وتحلف الداية الولدت الصافية الفنيديك ما بكى لمن قالت اظنو اطرش وبس صرخ ليهو صريخة صغيرونية وهو زاتو اكان صغير بس الكديس
اها الفنيديك لمن كبر بقى للحلة خازوق ومضر
يوم كدا ماشي علي طاحونة ابوهو لقى ليهو ولدين واللتنين اكبر منو لما فيهم دقاهم وشال منهم قريشاتهم مشى اشترابن تمر من دكان النفيع
قومي يا بخيتة أم الولدين تعالي امسكي الفنيديك ودقيهو قدام الناس واصلو لا جرى منها ولا دقها ليهو بكاهو سردبلها ساكت لمن فشت غبينتا واخدت حق وليداتا وفاتت وقال ليها انعدلي يابخيتة وارجي الجاييك
بخيتة عندها غنمايتن كدي بعامية سميحة بتريدها ريدة شديدة والعنز لبانة وبتلد جوز جوز وكلو كلو ما بترضى فوقها . الفنيديك جاء خنقها ليها بالحبل فد خنقة لمن كطع نفسها وكتلها وفات علي المقابر شايل ليهو موية والمقابر جمبها خور ملان رملة وقعد كل ما يشوف ليهو جحر يملاهو موية والعقارب تجيهو مارقة الصغيرات بكتلن وكاس وكاس لمن لقى ليهو عقرب صففففرة وماكنة قدر الضربة وضهرها اسسسسسود فوقو شعر تقول بس لقيمية محرقة ودخلها في علبة وجاء بيها البيت
بخيتة الوكت داك في التكل تعوس وعندها هدم معلقاهو فوق راس التكل وبتعوس بشوالها ساي ومرقتها من التكل بتلفحو
انت يا الفنيديك دخل ليها العقرب في التوب وفوت . وعشان هي تمرق للتوب وتلبسو شال ليهو طوبة وعندها حليلة في المشلعيب فوقها روب بعد ما شرب نصو واتقب منو تب يعاين للحلة سمممح ويفك فيها الطوبة ويقوم جاري
بخيتة سمعت الصوت وجات مارقة من التكل جري ولفحت توبها ومشت تشوف في شنو لقت الروب مكشح ومشت بهناك علي الضروة لقت غنمايتها ميتة ولبست توبها وقعدت تكورك وتسكلب علي العنز والناس اتلموا والعقرب في نص توبها وتسمع طق قرصتها في كتفها لمن بخيتة غيبت

يدبع ياخ

الفنيدك 2

مجاهد يوسف

العقرب القرصت بخيتة عقرب ماكنة خلاس وملانة سم وقرصتها حارة بس الكويس الناس اكانوا جمبها وشالوها جروا بيها جري حلة اب عجاجة ولمن وصلوا بيها لشيخ حمد وصلوهو وبخيتة تزبد
شيح حمد حواها ليها وقال ليهم اسقوها كتبات ووكلوها قمح والعقرب دي عقرب ترب وقرصتها بتودر وبتودي الترب علا ربنا لطف وما بتجيها عوجة ان شاء الله والناس بهناك لقوا العقرب وكتلوها لكن منو اليوم داك الما نضم بيها البقول اكبر من اليد والبقول من الله ما خلقو ما شاف متلها والبقول اكبر من القعونجة والبقول والله ليها شعر اسسسود
بخيتة المسكينة شافت الموت عديل وتعبت تعب شديد واهلها وقعوها لقيمات وكتبات وتشيل وتجغم وتشيل وتقرش في الليمون لمن تمتن يومين حتين قدرت تخت كراعها في الواطة وبقت مسيكينة حالتها تحنن
الفنديك المعيق مرقتها من العقرب تب ما عجبتو وقال ما بخليها وزول عرفو دا هو مافي
بعد كم يوم جاء تاني وحرق ليها الراكوبة وجاها نصت نهار وكت القايلة والبيت اكان فاضي قرد ما فيهو وبخيتة اليوم داك في بيت اختها عندهم سماية مشت تتغدا معاها هي ووليداتها
والمضر عرف البيت فاضي وجاء حرق ليها الراكوبة وما شاقو علا الرضي التمتام وشافو لمن جاب الكبريتة وحرقبها الراكوبة والفنيدك شاف التمتام وعارفو شايفو علا ما اشتغل بيهو لمن سوى سواتو ومشالو وقال ليهو لو قنعان من روحك وري زول
وفات منو
التمتام مشى طوالي في حزتو كلم بخيتة وديك جات لقت الراكوبة عدمانة القصبة والقناية وحتى الشعب بقن هبود
طوالي مشت لاب ضهير وسايقة معاها التمتام طاباهو من يدو وجابتو شاهد وحكت وشكت وبكت
واب ضهير قال ليها سمح بنجمو ليك الليلة
راجل بخيتة حاج علي اكان في الحواشات ولمن جاء وسمع وشاف قال الحمد لله والبقت بقت واب ضهير جاهو داير يغرم الراكوبة بس حاج علي حلف وقال ليهو حرم ترجع بدربك وولدك ولدي وجاهل وشافع ساي وبكرة بكبر وبعقل والراكوبة شن الراكوبة البتدور تغرمها لي دي ؟ مي حطب وقش وقنايات بتدورني اشيل فوقن منك عوض ؟
اب ضهير رجع البيت مسك الفنيدك جلدو جلدة حارة خلاس والفنيدك بس الحمار الدبزاوي مسردبلو ساكت لا صرخ لا عيط ولا ديميعاتو جرن لمن ابوهو دا يدو فترت وماتت من الدق وفكاهو والفنيدك قال ليهو انا الختيت ليها العقرب في التوب وانا الكتلت الغنماية ابوهو وامو اللتنين نططوا عيونن وصموا ليهو خشمو قالوا ليهو الكلام دا اوعى تقولو لزول ومن خشمك دا ما يمرق
الصافية مشت كلمت امها اللقية وديك ما بترضى في الفنيدك شي قالت ليها اريتو اكان العقرب كتلتها وقالت مكجناها من ايام بكاء اختها دار السلام وقالت قبال أختها تتم الاربعين بخيتة اتحننت وما حدت معاها ولا استنت لمن اختها تربعن

اب ضهير اكان بقت علي حرقة الراكوبة نقول جاهل ساي والراكوبة هينة لكن تصل اجيبلو عقرب من الترب ويكتل الغنماية معناتها الجنى دا مو براهو وتب ما نصيح واحتار في البسويهو فوقو ما عارف . ودا ياهو ولدو الوحيد الما عندو غيرو والجاء بعد تعب وسنين . وبقى يسوقو معاهو الطاحونة يومي خايفو يسيلو جريمة وللا مصيبة
والفنيديك ساب بخيتة وراتنها للتمتام رتنة كعبة خلاس وحالف عليهو تب ما بخليهو
وقدر ما فكر في شي يضرو ما لقى
الرضي ود قمر طيبة امو مرة حنينة خلاس وبتريد الفنيدك وزي حبوبتو بتريد الشيوخ والبخرات وكل ما تلاقي الفنيدك بتقلدو قوووي وبتقول ليهو المبروك وتحل طرف توبها البتلقاهو فيهو كلو بتديهو ليهو اكان ريال واكان طرادة اكان شلن وما هو براهو اغلب الشفع بتعمل معاهم كدا وبتقسم ليهم التمر واكان مشت زارت ليها شيخ بتجيب معاها المهيوبة كتيرة وبتلم الجنوي عليها وكل واحد تديهو حتة . مرة شدة مي طيبة وحنينة كراعها كلو كلو ما قطعتها من بيت والحلة كلها بتريدها وبتحترمها والكبار قبال الصغار وطيبة وقمر طيبة زي اسمها

والفنيدك ما بحترملو زول في الحلة دي كلها علا قمر طيبة ام الرضي التمتام دا وهو محروق منو في قوالتو . قام مشى علي بيتهم يضرهم لاقتو قمر طيبة وناغمتلو هووووي آ المبروك المبروك تعال آ عشاي ألكع ألكع وصوتها زاتو حنين
الفنيدك جاها وقلدتو قوي وساقتو جوة البيت فتحت السحارة وملت ليهو عبو تمر ودنقرت اتناولت مفحضتها وفتحتها ادتو طرادة وقالت ليهو بدور منك الفاتحة آ المبرك وهو يعاين ليها متلش ومتره لا عارف فاتحة ولا عارف قافلة ولا عارفها قاصدة شنو
ولمن شافتو مبلم ومتلش ومستغرب قالت ليهو ارفع يدينك ديل كدي لا فوق وادعي لي الله قول يارب أمي قمر طيبة دي تديها العافية وتحفظ ليها ولدها الرضي . وهو المعولق ما جاء علا عشان يضر الرضي ويازاهو واحترامن ليها قال القالتو كلو ومرق فات
مع مرقتو لاقاهو الرضي في الدرب واكان مشوش منو والفنيدك فات فوقو ساي ما اشتغل بيهو ولا هددو ولا قال ليهو اصبر لي
الله مرقو منو بأمو الطيبة دي

ناس الحلة عرفو سواة الفنيدك في بخيتة وقصة العقرب وكتلتو للغنماية وبقوا كلهم ينضموا بيها وبيهو والصافية واب ضهير بقوا بدنقروا م

ن الناس وكلام الناس فوقن وفوق ولدن المضر المعيق فايت اضنينهم لي غادك
بخيتة عندها اخت اللكان عندها السماية يوم حرق الفنيدك الراكوبة اختها اسمها بتول وعندها ولد شعيت خلاس ومبغبغ ولمن سمع بقصة العقرب والفنيدك اللكان داير يكتل خالتو قال والله ما يخليهو بيها وقال الكلام دا لروحو ساي ما نضم بيهو قدام زول وهو بريد خالتو بخيتة
الجنى ود بتول بقولولو سليمان وعاجباهو روحو وجاء للفنيدك وساقو كدي علي الحدبة الوراء الحلة قريب كتر جنينة الزاكي ودقاهو دقة حارة خلاس وسليمان مبغبغ وقوي وشعيت والفنيدك لتيد علا ما بضارب والدق ما بسوي ليهو شي بس يسردب لمن البدق فوقو يدو تموت من الدق ويخليهو براهو وسردب لسليمان وداك ما فضل شي الخنقة والبنية والشلوت اب دلدوم لمن قال بس ولمن فتر تب وشاف الفنيدك زي التيوة والحبة ما جاتو وقع فوقو تعضعض وفات وخلاهو جمب الكتر
الفنيدك رقد في الحدبة ديك لمن الشمش غابت والدنيا بقت مغارب وقعد يكابس جمب الكتر ويكوس ويفتش لمن لقى ليهو دابي طويل
وشال ليهو عصاية عفص بيها الدابي وقعد يلاوي فوقو لمن مسك راسو وشالو وفات علي البيوت والدابي اتطوطو ليهو فوق يديهو علا الفنيدك لازم راسو تب لمن وصل البيت . حبوبتو اللقية عندها غنماية عجيزة وشطورها طوال لمن بجرن في الواطة واللقية عاملة ليها ليهن خرتاية ورابطاها للغنماية فوق ضهرها ، الفنيدك مشى علي الغنم وحلا الخرتاية شالها وحشر فيها الدبيب وربطها وعلقها فوق النيمة هيلتن ودخل البيت
الحلة بيوتها قريبات بعض وشوارعها زقاقات ساي وكلها بيوت طين وجالوص والبيوت قصار وشبابيكن تحت والحيشان صغار ما فوقن بيبان وكلهن فاتحات في بعض والحيطان زاتن قصار والبرة بشوف الجوة والجوة بشوف البرة وملانة شجر نيم اخضر وكبااار وكل بيت فوقو نيمة وراكوبة ووراء الحلة مع كتر جنينة الزاكي في شجر بان طواااال والجاي الحلة من بعيد بشوفو
والحلة ما فوقها كهرباء علا اب ضهير عامل ليهو بابور جاز مشغل بيها الطاحونة والطاحونة صغيرة مي كبيرة مرات تدقق دراشة ومرات تحرن ما تدقق ومرات مرات تشتغل زي العجب
ناس الحلة كلهم طيبين وطايابين وبترايدو واكعب زول في الحلة ومضر وغتيت ياهو الفنيدك دا

الصافية اليوم داك عاملة ليها فطيرة بلبن دخل الفنيدك امعس فيها لمن قعد يترع ويتدشى وشربلو موية من التيبار ورقد للنوم وبعد الناس ما ناموا شال خرتايتو الفيها دابيهو وفات ناس بتول ودخل يتدبى براحة براحة زي الحرامي لمن وصل لعند عنقريب سليمان وبشويش بشويش فتح الخرتاية ومسك راس الدابي ودلدلو في سليمان وداك غرقان تب في النوم والدابي اتطوطو تب في سليمان وسليمان قعد يتقلب والفنيدك ساب الدابي وفكاهو فوق سليمان ومرق فات
سليمان انقلب وصحى وحسا بشي تقيل جمبو والدابي اتكوم وهو زاتو مخلوع ولبد ودا قعد يهبش الشي املااااس وبتحرك والدنيا كبس وضلام والدابي قعد يتحاوم وسليمان شعرة جلدو كلها كلبت ووقفت مسامير وعرف من هبيشو ليهو انو دا دابي وما دابي نصاح وبقى في البتحلو ووقف تج خاف يتحرك اي حركة الدبيب يقرصو وقعد يناغم لامو وابوهو ويبكي وصوتو زاتو من الخوف رايح بعد مسافة امو بتول صحت بيهو وجاتو جارية يا ولد مالك قال ليها الدابي الدابي راقد معاي في العنقريب وامو نفضت الملاية والدابي فررررر جرى ولا عارف يجر وين واتلهم الحيط وكاس وكاس لمن دخل ليهم جوة البيت
وبتول تصرخ وسليمان ولدها يصرخ وابوهم جاهم جاري وجيرانهم كلهم صحوا بيهم وجوهم جاريين وجابوا البططر اي زول شايل بطارية وعكاز ودخلو وراء الدابي وكاسوا البيت جت ما لقوهو
حاج علي راجل بخيتة قال جيبوا لي مبخر وجميرات وشطة وهببك وولعك ولعوا النار وجابوا الجمرات والشطة وشال المبخر دخلو جوة اللوضة وكتح الشطة في الجمر ومرق وقفل الباب ما تموا خمسة دقايق الدابي جاهم نابل وكردوهو لمن كتلوهو دابي كبير خلاس واتاريهو لمن دخلوا كاسولو اكان راقد فوق المرق ما شافوهو علا الشطة مرقتو وكتلوهو وارتاحوا منو
لكن جاء من وين واكان وين ما في زول عارف
والدخلت في سليمان من الخوفة والخلعة السواها ليهو الدابي ابت تمرق منو كلو كلو وللصباح ما نام وصاحي يتخازز برا سبب ومطير عويناتو ويتراجف مرة يبكي ومرة يسكت ومرة يتنهف
الصباح وبعد الشمش طلعت لقوا الخرتاية والفنيدك نساها وما شالها معاهو ومن وسخها ساي وريحتها الغنماية غنماية عرفوها دي خرتاية غنماية اللقية وقصوا الدرب عرفوهو درب الفنيدك
ومافي زول جاب الدابي غير الفنيدك ومشوا علي اهلو ...

يدبع ياخ...

الفنيدك 3

مجاهد يوسف

الصباح بدري قبال الشمش تطلع الصافية قامت شالت الحلة ومشت علي الغنيمات تحلبن . استغربت لمن لقت خرتاية غنماية امها ما مربوطة فوقها وشطيراتها متدلدلات فوق البعر ، قالت بسم الله دي خرتايتها فاتت وين الليلة ؟ ولقت درب ولدها الفنيدك حدا العنز . قالت بكون فكاها هو لكن فكاها خبارو وشن سوابا. ومطت خشمها ورفعت اكاتفيها وقالت بري ودنقرت تحلب
الفنيدك غرقان في النوم ويشخر ساي واب ضهير ابوهو بعد ما جاء من الجامع منبطح فوق عنقريبو في نص الحوش وعندو رويدي سميح يفتش فوقو للاخبار
الصافية جات من الغنم وعلبت النار فوق الكانون وفاتت تصحي الفنيدك وعينها لبتول ومعاها راجلها عتمان وسليمان ولدها ماشين عليهم خلت الفنيدك ومشت علي راجلها قالت ليهو الفنيدك سوالو مصيبة
_مصيبة شنو يا مرة اصبحنا بي الله ورسول الله
_ بري لكن بتول وولدا وراجلها جايين علينا وشايلين خرتاية غنماية أمي في يدهم
_ شنو ؟
وقبال ما تكمل الصافية نضميها جاهم صوت عتمان راجل بتول يا ابضهير ناس البيت عوووك سلام
اب ضهير تترب طفر من عنقريبو ولبس مركوبو ومرق عليهم
_ اتفضل اتفضل حبابك آ عتمان أخوي ابقى لا جوة
عتمان وقف قبلو في خشم الباب وناول اب ضهير الخرتاية وقال ليهو بتعرف دي ؟
اب ضهير من شافها ساكت ومن وسخها وريحة الغنماية الطاقة منها عرفها دي خرتاية غنماية اللقية التب ما بتغباهو ومتذكر كلام الصافية مرتو وداير يعمل رايح قال ليهو
_دي شني دي ؟ دحين دي مي خرتاية ؟
_خرتاية نان شنو ؟
_اها مالها ؟ وفي شنو ؟
_ ما سمعت بالجوطة الفي بيتي امس ؟
_سمعتبا تب وصحيت بيها ومرقت عليكم لكن قبال اصلكم لاقاني عديلك حاج احمد قال لي دابي وكتلناهو والناس كلهم اتفرقوا قمت رجعت وقلت بجيكم الليلة
_الدابي ما دابي نصاح وما جانا براهو وجابو لينا ولدك الفنيدك وجاء شايلو في الخرتاية دي بدور يكتل ولدي دا
_الفنيدك ولدي ؟
_ نان في غيرو وناغملو اللجي خلينا نعرف سببو شنو مع ولدي دا
اب ضهير مشى تور الفنيدك وجراهو جر وجابو وقال ليهو بصح آ جنى وديت للناس ديل دابي ؟
الفنيدك ولا كضب ويصرر في عويناتو ويترمش وقال ليهو آي وديت ليهم دابي
واب ضهير تاح كفتو وقال ليهو مجنون اتا وللا نصيح آ جنى وسببك شنو معاهم
الفنيدك حدر لسليمان وداك لسع مخلوع ويتحازز والدخلها فوقو الدابي ما مرقت منو ولا اظن تمرق بي قرب
والفنيدك قال ليهم جبتو للمعولق دا عشان ام بارح دقاني في الحدبة الجمب الكتر وحلفت ما اخليهو بيها
_تقوم آ السايب تجيب ليهم دابي ؟
_والله لو لقيت لي تمساح اجيبو ليهو
_ بتدور تكتلو ؟
الفنيدك طنطن وفات وقال ليهم هو البدا الختا
عتمان حمر في ولدو وقال ليهو بصح دقيتو وسليمان قعد يبكي وقال ليهو آي عشان كتل غنماية خالتي بخيتة وحرق الراكوبة
عتمان استغفر وساق ولدو وفات واب ضهير والصافية قعدوا متمحنين في ولدم المضر دا يسووا معاهو شنو
اب ضهير قال ليها والله الجنى دا ما براهو والدابي دا قبضو كيف
الصافية قالت انا من لقيت دربو حدا الغنم وخرتاية غنماية أمي مافيشة عرفتو عمل ليهو مصيبة
_اصلو ما في زول سبقو علي دي
دابي عديل آ المسجم ؟ يمين انا لي هسع ما قادر اصدق
_ قول البركة الما قرص الولد
_والله البركة الما قرصو لكن الجنى دا انا علا امرق بيهو من الحلة دي قبال ما يكتل لينا زول . ويومداك اكان ما الله ستر اكان كتل بخيتة بالعقرب
_تمرق بيهو نمش وين ؟
_ما عارف لكن اكان قعدنا بكتل ليهو زول

الواطة صبحت والنهار دخل الحلة كلها تنضم بالفنيدك المضر المعيق وفي ناس بقوا يخافوا منو عديل وكتار القالوا الله يكفينا شرو واب ضهير فات علي طاحونتو ويفكر ساي في الفنيدك وغالبو البعملو مع انو في نفس الوكت متكيف منو عشان مافي زول بقدر تاني يسعلو وللا يحقربو
سليمان ودوهو لشيخ حمد في حلة اب عجاجة عشان يعزم ليهو اكان الخلعة والخوفة منو تمرق
والفنيدك بقى يتضرع ساي في الحلة والناس الكبار شوشوا منو وزول بقدر يفتح خشمو معاهو مافي
حاج الزبير اخو عتمان راجل بتول الكبير جيبة الفنيدك للدابي في بيت اخوهو تب ما رضاها والوجعتو اكتر سكتة عتمان اخوهو عليها والفنيدك دقة ما اندقاها فوقها . قام جمع الناس الكبار كلهم ما عدا اب ضهير وقال ليهم بندور نتشاور في وليد اب ضهير المضر دا ونترايا فوقو والجنى دا قبال كدي فات الترب جاب ليهو عقرب ختاها في توب بخيتة والله ساي مرقها من الموت وحرق ليهم الراكوبة وكتل العنز هيلتن . ومشى تاني جاب ليهو دابي كلكم شفتوهو وعارفنو وما مغروف تاني بعمل شنو وبجيب شنو دحين شوفوا شوركم فوقو والجنى دا اكان خليناهو كدي ساي الحلة دي بنجضها نجاض
الجماعة كلهم قعدوا يورجغوا وفيهم القال جاهل وبكبر بعقل وفيهم القال لازم يتأدب ويندق في نص الحلة لمن ياكل يديهو ويعرف الله حق عشان تاني ما يضر ليهو زول وفيهم السكت ساي وخاف اكان قال يتأدب الجنى المعيق دا يازاهو ويضرو في اولادو وبيتو وغنمو
وفي راي تالت ودا الدايرو حاج الزبير انو اب ضه

ير يا يمرق بجناهو المعيق دا من الحلة يا يمرق ولدو منها ويشوف ليهو حلة بعيد بعيد وكتار الما وافقوا علي الراي دا ومن الضمن حاج احمد وهو اكتر زول اتضرر منو بالراكوبة والغنماية والعقرب القرصت مرتو. وحاج احمد قال ليهم الجنى دا بكبر وبعقل ما تشتغلوا ليكم بجاهل ومرق فات خلاهم
عتمان ابو سليمان مع راي حاج احمد ومخالف اخوهو حاج الزبير وقال ليهم الفنيدك مضر لكن علي جهلو وغباهو ساي وانا ولدي اكان ما دقاهو ما كان جاب لينا الدابي وقال ليهم خلوهو خلوهو بكرة بكبر وبعقل وحتو مرق فات منهم
حاج الزبير حلف وقال ليهم يا انطرد اب ضهير وولدو من الحلة وللا ولدو دا جبناهو واخد ليهو دقة حارة في نص الحلة قدام الناس انا داخل علي حلف وواقع علي احورب الحلة دي چتك عليها وفاتحة ما ارفعها فوقها ولا سني دي بتضوق ليها زاد زول في الحلة دي لامن اموت
اسهل حل للمشكلة دي وعشان يعزو حليفة حاج الزبير قال يندقا وينجلد بس
وفاتوا كلموا اب ضهير واب ضهير قال حرم لا يمرق ولا الفنيدك ولدو ينجلد والراجل اللهبش الفنيدك وقال ليهم يمين البهبش الفنيدك ولدي دا علا يشوف اب ضهير العمرو ما سمع بيهو ولا شافو وقال ليهم الفنيدك دا ولدي وانا الجبدتو وانا اكعب مني مافي تب وولدي اكان ما سعلتوهو ما سعل ليهو فيكم زول
والناس انقسموا نصين فوقهم المع اب ضهير وقال كلامو صاح وفيهم الداير يعز حليفة جاج الزبير
واب ضهير لمن عرف بحليفة الزبير قال حاج الزبير فررررررر هو وحليفتو
دا كلو كوم والفنيدك كوم براهو
من عرف الكلام دا وشاف زعل ابوهو قعد يتصنت ساكت ساي لمن عرف الكلام دا كلو وراهو حاج الزبير وهو المقوم الناس عليهو وعلي ابوهو . حدر لحاج الزبير قوي ونوى عليهو

يتبع...

الفنيدك 4

مجاهد يوسف

حاج الزبير راسو وألف سيف علا الفنيدك ينجلد ويندقا لمن يقول الروب وفي نص الحلة والناس كلها تشهد دقتو وجمب الطاحونة حقت ابوهو عشان تبقى ليو بتوبة
وهو الفنيدك الدق ولا بسوي ليو شي ومعروف حمار جلد وابوهو عارفو كويس بس جلدة زي دي ما رضاها ليهو
واكان أي زول من ناس الحلة الكبار مسكو ودقاهو . عادي عند اب ضهير ما بزعل منو واكان داك سعلو وقبال يبرر ليهو ويوريهو دقاو لشنو بقول ليهو ما ولدك آ زول دقو ساي
لكن في دي حرقتو حليفة الزبير الداير يسويلو محاكمة وكلام جديد في الحلة ما بقى قبال كدي كلو كلو ولا في زول سمع بيهو
حاج احمد راجل بخيتة القرصتها العقرب زول حكيم خلاس وبالو واسع وممهول والشينة ما بدورها والكلام اللعوج ما بعرفو تب ، وصبور وطيب
جاء اليوم داك لاب ضهير وداك بحترمو بالحيل وعارفو تب وبقدرو
اها جاء قال ليهو طول بالك آب ضهير اخوي وما تزعل وتتحلف ساكت الزعل ما سمح . انت الزبير ماك عارفو ؟
_عليك النبي آ حاج احمد كلامو دا دحين ما اعوج ؟
_ اعوج والزول دا لمانا كلنا في ديوانو وقال لينا كلامو دا كلو وانا وعتمان اخوهو اللتنين ما رضيناهو ومرقنا منهم وقلنالم الجنى جاهل ساي وما عجبتنا تب حليفتو
_ والله كتر خيركم وانا خابرك تب وعتمان زاتو خابرووقبيلك اكان معاي وانتهينا من الموضوع دا وانت من يوم حرقة الراكوبة لمن جيتك ليها داك حرم كلمتك لي ديك لمن قلت لي الفنيدك زي ولدي وواحد حرم لمن اموت اتذكرها ليك واعتز بيك نعم اللخو
_نحن اغراب آ بضهير اخوي ؟
_ حرم أهل مانا اغراب بس الزبير ما ليو حق
_كدي هسع ورحكاكا معاي علي الزبير في بيتو
_ لا لا دي اعفيني منها والله والزبير انا بيتو تاني ماني داخلو تب لافي فرح ولا في كره ان ما جاني واعتذر لي في كلامو دا وانا حرم المزعلني اكتر شي انو قال داير يطردني من الحلة دي
_شن نفرو آ زول ؟
_ما بعرفو لكن دا القالو
_ ما في كلام زي دا ولا الحلة دي هيلتو ولا هو شيخها
_اها حرم لا ولدي بنجلد ولا في زول بقدر يصلو وانشوفو بطردني من الحلة دي كيفن

حاج احمد اكان داير يسوقو للزبير عشان ينهي الموضوع دا كلو وما تبقى بيناتم حاجة لكن بعد كلام اب ضهير ليهو دا وحرامو الحلفو سكت وفات علي بيتو
بعد وصل البيت وبخيتة مرتو سوتلو الجبنة كورك لولدو قال ليهو امش آ ولد نادي لي الفنيدك قول ليهو عمك احمد دايرك وقال ليك تعال
بخيتة نادت ولدها واحمتو يمش وهي مكجنة الفنيدك من اليوم داك وبقت بتخاف منو عديل قالت ليهو شن بتدوربو العولاق دا جايبو لينا في بطن البيت المضر الكليب بعد كتل عنزي قرب يلحقني ليها
قال ليها دايرو خليهو اللناديهو لي .
والجنى فات وهي قعدت تتصرصر وتبسبس وقالت ليهو
_ بتدور بيهو شنو هسي عليك الله الخليقة مناديهو لينا هني ؟
_قلت ليك دايرو
_الله يكتلو وريحنا منو المضر المعيق ود الحرام
_ استغفري الله ما تقولي ود حرام والجنى دا قبيل انا شفتو صاري وشو للزبير ومحدر فيهو بعين حارة وخايفو علي حسب جهلو يازاهو زي ازيتو ليك
_ بيازاهو المضر اب عقارب واب دوابي دا . وتكتل ابوي عقربو الكانت بتدور تودرني من اليوم داك وليوم الليلة تنتح وفجت قرصتها موجعاني غايتو اكان كدي اوب عليك آ الزبير

الجنى جاء للفنيدك وهو خايف منو ولقى الفنيدك اكان طالع فوق النيمة كسر ليهو منها فرع وبربحو وطلع منو عود نبلة غليد وجاب ليهو خنزيرة وسلوك وربط نبلتو تب ويشيل ويمط فيها
قال ليهو ابوي دايرك قال ليك تعال الفنيدك صر ليهو وقال ليهو أببو اللشرطك ودخل النبلة في اللوضة وفات معاهو وكل شوية يلكد فيهو لمن وصلوا
حاج احمد قال ليهو تعال قنب حداي آ ولدي داير اقول ليك كلام
الفنيدك قنب حداهو وحاج احمد قعد ينضم معاهو

حاج الزبير بهناك لقى الحليفة حارة وما بقدر يحورب الناس وندم علي حليفتو قال حوريب الناس صعب ما في زول بقدر عليهو لكن الاصعب انو اكان ما جلد الفنيدك تاني ما بتبقى عندو كلمة في الحلة دي وشاف روحو انو ببقى زول طرورة ساكت قام فات جاب ليهو سوط عنج سمح وجديد وجاب الناس الدايرين دقة الفنيدك وديل واقفين معاهو في شان حليفتو ما تقع وما دايرنو يحورب الناس وفاتوا معاهو تاني لاب ضهير والمرة دي جوهو في البيت
ابضهير من شافن ساي زعل والزبير قال ليهو قوم امرق لينا ولدك المعولق دا اندقوا قدام الناس
وداك ولا قاولهم وخشمو ما فتحو معاهم بكلمة ودخل اللوضة قعد جواها مساااافة وجاهم مارق بعكازو ومتحزم ومتلزم تب وسكينو في ضراعو وجاهم زول مكاتلة وجاهز وقال ليهم حرم واسمعو الحليفة دي المي متل حليفة الزبير العر دا واسمعوها كويس حررررم وطلاق تلاتة من حريمي اللتنين البمد فيكم يدو علي ولدي ان ما كسرتها ليهو كش الله ينعلني
حاج الزبير زعل وقال ليهو قلت كدي ؟ وانا عر ؟ سمح آ ب ضهير بتشوف وبنظمك
قال ليهو عر وكلب كمان وسوي الدايرو والراجل فيكم والقلبو محدسو اللهبش ولدي

حاج الزبير ساق جماعتو وفات زعلان تب ومحنبك يكوس للفنيدك

حاج احمد بعد قعد الفنيدك جمبو

قعد يحكي ليهو قال ليهو اولا في التبادي انوريك اب ضهير واللقب دا جابو ابوك من وين
الفنيدك قاعد ومستغرب وساكت ساي وخاتي ليهو بالو تب ويتكشم وينشاف زول زول
وحاج احمد قال لبخيتة قومي جيبي ليهو موية ليمون وديك قالت بسسس ومرقت فاتت ولا اشتغلت بيهو
حاج احمد قال ليهو اللقب دا ما حق ابوك لكن الناس بقولوهو ليهو ساي وزمان جدك الله يرحمو ويرحم جميع امواتنا اكان راجل مك وضكران وحلتنا دي اكان فيها فرد دكان وكنيتين صغير وما تامي زاتو دكان وهيل حاج العوض جد الزاكي سيد الجنينة الهسع دا واكان زول صعب خلاس وكعب وناشف وبريد القروش وبعرف يلمهن ولو في زول مات قدامو ما بديهو حاجة بالفكك والحلة دي اكانوا ناسها كلهم مساكين وعدمانين الملينة الحمراء وعايشين علي زراعتن وبهايمن ومافي زول جاري ليهو وراء قرش ولا في زول هاماتنو القروش والناس عايشين
ويوم كدي جات مرة عجوز الدكان واكانت دايرة ليها غرض وما عندها قروش وكلمت حاج العوض وقعد ينهر فوقها وابى يديها ليهو وقدر ما حنستو ابى وطردها ومشت منو بديمعاتنا وشافها جدك ابضهير وعرف الحاصل وشاكل فوقها العوض شكلة كبيرة وشال منو الغرض واداهو ليها وفات جاب ليهو كراس وقال للعوض دا كراس جرورة وأي زول في الحلة دي ما عندو قروش جاك لحاجة اوعك ترجعو بلاها واديهو غرضو الدايرو كلو واكتبو علي فوق ضهري دا وانا بسدد ليك وبقى شايل ناس الحلة دي جت وكلهم بشيلو فوق ضهرو ومن الزمن داك سموهو اب ضهير وجبد ابوك دا وحتو مو ساهل وهسع الحلة دي كلها العندو والماعندو بدقق ليهو والماك خابرو عندو شوالين في الطاحونة امش شوفهن ملانات دقيق وديل للناس الماعندهم عيش وكلهم عارفين والطاحونة بابها دا ما حصل قفلو بطبلة والداير دقيق وما عندو كلو بفتحها وبشيل من الشوالين وياكل برا قروش . اها ديل جدك وابوك واللتنين كريمين ومغرقين الناس بالجمايل وانا كلامي ليك دا عشان دايرك تبقى زيهم وما تضر ليك زول آ ولدي
الفنيدك لسه قاعد يتكشم وقال ليهو سمح
حاج احمد تاني قال ليهو اسمع يا ولدي وانا ناديتك الليلة عشان عمك الزبير ما دايرك تسعلو ولا تازاهو وعشان خاطري انا اكان بتسمع كلامي وعاديني زي ابوك
الفنيدك سكت مسافة وصنقع ودنقر وقال ليهو خلاس خليتو
_ اها اكنتا داير تسوي ليهو شنو ؟ انا عارفك ما قاعد تكضب وريني الكنت دار تعملو ليهو كلو
_ عملت لي نبلة عشان اقد ليهو عينو بيها وداير اكتل ليهو البقرة حقتو اللشتراها من الزاكي وتاني داير ادخل لي عقرب كبيرة جوة المركوب هيلو وبس

حاج احمد قعد يستغفر ويتعوذ لكن الضحك شارطو من كلمة وبس دي وما قدر يمسك الضحكة وفقعها وضحك لمن دمع وقال ليهو وبس ؟ والفنيدك زاتو قعد يضحك معاهو وما خلاهو علا لمن حلف ليهو انو خلاهو ما بضرو

بخيتة بعد مرقت فاتت ناس بتول اختها ولقت معاها السرة الراجلها الزبير وورتها انو الفنيدك حدر لي راجلها وداير يازاهو وديك مسكتها ام هله هله وقعدت تبكي وتولول وقالت دايرة تمش للصافية تكلمها اكان تمسك منهم جناها المعيق دا قبال ما يازاهم

حاج الزبير فتش وكاس للفنيدك عشان يدقو عشان ويعز حليفتو وكلو كلو ما لقاهو ،ما خلى ليهو محل والجنى دا وين غاتس هو ما عارف وقعد يرسل في الجنوي لمن لقاهو في بيت حاج احمد وجمع الناس جمب الطاحونة في نص الحلة وجاء بيت حاج احمد يسوق الفنيدك للدق واكان معاهو شمعون جارو وصاحبو ودخلوا اللتنين سوا وحاج الزبير مسك الفنيدك من يدو وجراهو لكن حاج احمد فكاهو منو وقال ليهم الكلام دا اعوج والجنى دا ما بتسوقو كدي وما بندق
وجاطوا ونضموا زين لمن صوتهم بقى عالي والناس اتلموا فوقن وفي الآخر الزبير فكاهو وخلاهو لكن قال والله ما بسيبو ومحط الفنيدك بالسوط محطة حارة وواحدة بس حقت زعل والمحطة دي زعلت حاج احمد زعل شديد قام طرد الزبير وشمعون وقال ليهم امرقوا برة من بيتي
وديل مرقوا وفاتوا زعلانين منو في طردتو ليهم دي

سوط العنج حار والمحطة حارة وحرقت وزعلت حاج احمد أكتر من الفنيدك والفنيدك اكلها ساي ولا حرقتو لكن غيرت كلامو
والخوف يسمعبها اب ضهير قام دا مسك الفنيدك ابى يخليهو يفوت عشان ابوهو ما يعرف ، لكن اكانوا في ناس كتار وحاضرنها وبوصلوها تب لابضهير

حاج الزبير فات بيتو ولقى مرتو خايفة وتبكي والقعدة غالباها ومنططة عيونها زي الجاياها مصيبة واصلا جاياها مصيبة

الفنيدك بعد قال ما بضر الزبير جاء الزبير براهو وطبزها وفات زعلان ودرب السوط في ضهرو وما بعرف يكضب قال لحاج احمد والله هو وشمعون اللتنين ما بخليهم
وحاج احمد سكت ساي وهااامي وعارف الجنى دا مضر
والفنيدك كوم وابوهو اب ضهير كوم براهو

يدبع ياخ ...