يمة يمة..



**سوي ليها حاجة دافية وجيبي ليها موية اول..

مخلينها بره براها مالا ..

كان تعبانة يا خالتي هسي قومي ارح معانا الخرطوم

"عاينت لبتها"

جهزيها..



خالتي عاينت لي وجرتني من يدي:

—سلوان انا كويسة يابتي مافيني الا العافية الحمدلله



"عاينت ليها"

* لا ما كويسة دا كلام شنو انتي ما قادرة تسندي روحك اول مرة اشوفك كدا ..



—كويسة انا قلت ليك ..



رقدت عليها تاني

*الله يقويك يا خالتي قومي لينا بالسلامة نحن محتاجين ليك

"وسوست ليها في اضانها بكلام"

مسكتني وضمتني قووووي وضحكت بفرحة ريحت قلبي ..



قمت منها قلت ليها'

*انا راجعة الخرطوم وبجيك تاني امي ماشة معاي يا خالتي وقتها القاك بي عافيتك..



—ان شاءالله يا سلوي ان شاءالله



*معاكم سلامة

"طلعت منهم وانا قلبي مرتاح حبة"



#الخرطوم

#شارع_ال60



بعد مشوار مرهق وتعب نهاية يوم وصلنا اخيرا البيت فتحت الباب بالمفتاح الفكيتو قبل اطلع من مفتاح عربية مدثر ودخلنا..



*مدثر مدثر

"ولعت لمبات البيت الكان مضلم وصاني "

ختيت البت في السرير



فتحت باب الاوضة وولعت اللمبة

كان راقد ولسه زي ما خليتو ماسك قميص مروة

قربت عليه هزيتو وامي جات وراي نادتو



—مدثر



"قام مهجوم من محلو وعاين قصادنا لما لمح امي بقي زي الشافع الصغير قام وجا جاري وقع تحت رجولها"

-يمة يمة يمممة انتي جيتي "بقي يبكي وامي تبكي وانا ابكي "

نزلت معاه في الارض وبكينا كفايتنا

لما رفعتهم الاتنين في السرير



"ماسك فيها وببوس في راسا ويديها"



- اديني رضاك يا امي اديني رضاك اعفي مني يا يمة اعفي لي



—في ام بتغضب علي جناها يا ولدي عافية ليك لله ورسوله عافية ليك ورضياااانة عنك ..



" قشيت دموعي طلعته بره وجيت شايلة بتو قربتها منو وبعاين ليه وبعاين ليها"



*شوفي بابا بابا وينو



"حسيتو لسه ما داير يعاين ليها"



عاينت لي امي



*يمة انا بدخل بيها جوه واقوم اسوي حاجة ناكلا مدثر دا زي ما مشيت زي ما جيت ..



"رقد في رجول امي ومسكها من توبها غطا بيه وشو".



"طلعت منهم من سكات وانا بدعي"

*ربنا يقويك يا اخوي..



#بعد_اسبوع



من الاحداث المرت تقيلة علينا لسه مدثر ما شدا حيلو..ولسه مروة ريحتا وضلها في البيت ...

غلطتي وقتها خميت البت وجريت بيها طوالي

ظهر ليها صفار في عيونا وجسمها

ولازم تتخت في الحضانة ..



#الصباح



*يمة انا طالعة خلاص لبستها ورضعتها



—أكان طلعتيها في الشمس دي ساي انا شايفة اخير من مشية المستشفي دي زمان لا ودينا ولا شي شمس الصباح دي بس..



*يمة انا عارفة بس لازم امش انا البت دي يومتا بالخلعة خميتا وجريت في فحص وفي تطعيم..



—كدي طيب اقيفي هسي البنية دي نويتي تسميها منو؟!!



"طق طق صوت الباب بدق"

"ختيت البت في محلها"



*دا منو الجايينا من الصباح..

"كررب فتحت لقيت عربية واقفة نزل لي منها راجل"

-السلام عليكم

*وعليكم السلام

-مدثر موجود؟!!

*ايوة انت منو؟!

-زميلو في الشغل جيت اوصل ليه الاخطار دا " مدا لي ظرف مقفول"

*"عاينت ليه كدا" دا ظرف شنو؟

-انزار بالفصل مدثر ليه اسبوع ما جا ولا كتب طلب اجازة ولا شي .. ف شلت الظرف وجيت اشوفو مالو وتلفونو مقفول ما بخش..

-"بحنقة كدا" الدوام لله زوجتو اتوفت!!

*لا حول ولا قوة الا بالله احسن الله عزاءكم هو هسي موجود؟!!

-موجود بس رافض يقابل اي زول

*طيب لازم تبلغيه ضروري بالموضوع دا ولا حا يتعرض للفصل نهائي.وربنا يقويه يارب بلغيه تعازي ..

-اقول ليه منو؟!!

*صابر

"دور عربيتو ومشي جيت داخلة وشايلة الظرف في يدي بقلب فيه"



—"امي بتتكلم معاي" دا منو الجا؟!



*دا زميل مدثر في الشغل كتر خيرو برضو لما شاف مدثر غايب جا يسأل منو وجاب اخطار شغل ..



—اجي حق شنو؟!!



*فصل من الشغل يعني يا امي ما شايفة مدثر لا بطلع لا بدخل ليه اسبوع ما مشي الشغل ولا اخد اجازة ولا كلم زول ودي منظمة ...

كدي يمة قومي اتفاهمي معاه انا تعبته وبقنع فيه ما بسمع كلامي وشكلو ما ناوي يرجع الشغل ..

هسي عشان ما اتاخر بمشي اول وبجي نرتب موضوع العزاء اهم شي..



ما تنسي ادي الظرف دا لمدثر معاك



"شلت البت غتغتها كويس وطلعته مستعجلة اقرب امجاد وركبت فيها "



ساعة زمن وصلت وكنت منتظرة

جات دكتورة كدا ظريفونة عاينتها وشافتها وفحصتها كويس وحكيت ليها انها عندها غازات وبترضع صناعي وكدا..



كتبت لي فيتامين دال ليها وستة ساعات تتخته في الجهاز للصفار..



" جيت بيها شالتا مني الممرضة"



- وحلاتنا وحلاتنا وحلاتي ياناس ماشاءالله اسمها منو؟!!



*"ابتسمت ليها ورديت"

الاسم منزل وان شاءالله يتسمي وتشيلو بس لسه م سميناها..



اخدت وادت معاي في الكلام ولما عرفتني قارية تمريض جابت لي سيرة الخدمة اللي اصلاً ناسياها ، المهم في النهايه ما قصرت معاي ساعدتني في الاجراءات ..



#جانب_امي



*مدثر ياولدي قوم العن الشيطان وهاك سلوان قالت دا اخطار جابو ليك من الشغل هاك شوفو