شنو❤وبعدين هل هم صح لمجرد انهم قالو انا كدة؟هم عارفين انو م عندهم شي يعايروني بيه ف بقو يعايروني بإني مجنون وسبحان الله من جهلهم شايفين الجنون حاجه بعايرو بيها رغم انو مرض زيو زي اي مرض،الناس دي فوق م انهم قتله وكمان جهله ي شهد علشان كدة لا مؤاخذين م تركزي معاهم واكرميني بي إنك تتجاوزيهم اتفقنا حبيبي؟

سكتت وانا دموعي لسه جاريه
ضماني عليه وقال لي انا عايز شهد الوقفت اليوم قدام القاضي لأول مرة ونفت حاجه اتقالت عني هي م رضتها،انتي الوتد بتاعي ي شهد م تتهزي عشان م اقع ،لو في حاجه بتقدري تقدميها لي أكرميني بثباتك ،محتاج عنادك اكتر من كل الأوقات اتفقنا حبيبي؟

حضنتو وختيت راسي في صدرو ولفيت يدي حوليهو زي وبقيت ببكي بحرقه زي الطفله بعد مسافه قلته ليهو ماهر انا بحبك شديد م بحب زول يغلط عليك او يقول في حقك شي م صح او م حلو م بحب😭😭💔

رفع لي راسي ومسح لي دموعي وقال لي م تركزي واتجاوزي عشاني ممكن؟باسني في راسي وفي خدودي ال2 وقال لي ممكن؟
قلته ليه حاضر طيب😔💔
بعدها ضحك وقال لي مرتي الرداحه ام لسان اسي لو خليتك ليها كنتي عملتي فيها شنو بلسانك دة😂😂😂😂💔
ضحكته ضحكه خفيفه وقلته ليه غياظ دة😂😒رجع باسني🙈 وقال لي طيب انا حأطلع على مهند
قلته ليه هي انت نسيت مهند مع سمر في المكتبه
قال لي اخخخخ نسيت طيب انا طالع على طه تمام؟
قلته ليه في شنوو تاني ؟
قال لي شويه حجات كدة بس م بتأخر قلته ليه تمام خلي بالك نفسك طيب حبيبي❤
قال لي حاضر وانتي كمان❤🌻

عدت الأيام واتوالت الجلسات ،_ وبإعتبار انها جريمة قتل مطوله اكيد حتاخد زمن ويمكن طويل كمان💔
ماهر باع عربيتو واستثمر قروشها وأجر واحد من الدكاكين التحت العمارة مباشرة وفتحو محل اسبيرات،علشان كنا محتاجين نوكل محامي وطبعاً المحامي بيطلب شي وشويات نحن م قدرها💔
دة غير انو وضعنا شويه بقى صعب ،وماهر الشغل م مشى معاه عديل يوم في ويوم ماف حالو حال الزول الفتح.جديد ي دوب ماف زول بركز معاه شديد💔
وانا كنت بحاول على قدر م اقدر اني اساعده،كنت بشتغل شغلي البجيني في اللابتوب حقي وبشتغل شغلو البجيهو في لابتوبو،وبقيت اسوق للمزرعه على قدر م اقدر علشان تتأجر وبخلي زياد ومنذر يمشو يعملو لي فيها جلسات تصوير حتى لجين م قصرت بس طبعاً معروف شغل المزارع دة بكون بالمواسم اغلب الاحيان فعلشان كدة إيجاراتها م كانت على قدر كدة،وماهر احياناً هو بجي بساهر وبشيل الليل في اللابتوب وبشتغل شغل إضافي على قدر م يقدر ،الشغل في البدايه من شدة م كان كعب معاه لدرجه انو مرة شال حق إيجار شهرين للمحل من شغل اللابتوب رغم انو كان دافع مقدم ،وباع تلفونو وكذب علي قال لي اتسرق رغم اني عارفه انو بكذب بس مشيتو علشان لو ناقشتو حيتحسس وانا م عايزة كدة،م عايزة اشوفو مكسور حتى قدامي ابداً💔

انا زعلانه فعلاً بس زعلانه عليه ومن المعاناة البعانيها والحمول الشايلها على ضهرو والهموم الما بتخلص ورغم كل دة متماسك وبقاوم،يعني انا قدرته اقيف مع حسام في اسوأ الظروف واتحمله رغم السؤ الكان عليهو هو وم كنت بحبو بس كنت سانداه،طيب ليه حاسه اني م قدمته شي لي ماهر وحاسه بنفسي مربطه وم قادرة اقدم ليهو شي ابداً رغم اجتهادي في اني اثبت العكس💔وسبحان الله م وقف المصروف من اخوانو ابداً بس عملنا ميزانيه جديدة وقللنا القروش البنوزعها عليهم لأنو الوضع اختلف،ماهر كان حتى خالد برسل ليهو مصروفو في حسابو وم موقفو منو ابداً،_مرة قلته ليه بنرفزة وزعل انت بتصرف عليه ليه؟مش عامل نفسو راجل؟خليه يصرف على نفسو ويشتغل م تبقى عليه رجاله خشم ساي الخايب ود امو دة كمان 💔

عاين لي بضيق وهو ساكت م رد علي ابداً

م حسيت بنفسي وانا بقول ليه في الكلام دة والله وهو كان تلقائي في لحظه ضيق بس،م مفروض اتدخل في حاجه زي دي ابداً لأنو دي حاجه خاصه بينو وبين اخوه ،بعد فترة اعتذرته ليه عن الحركه دي😔💔✅

مهند بقى في تحسن ملحوظ ومعظم وقتو بقى ينزل يقعد مع ماهر تحت وبمسك بيه زمن وبقى يطلع يقعد براه احياناً واحياناً بطلع مع سمر واحياناً بمشي البقاله الجمبنا براه يجيب لنفسو رصيد او كذا وشويه شويه بقى يقعد معانا لما نجي نشرب نشرب شاي لبن لأنو هو بحبو ،واهو الزمن عدة،والمحكمه والجلسات كانت لسه شغاله ومافيها شي ببشر بالخير وطبعاً المتهمين كانو عاملين ليهم 4 محامين كل تركيزهم كان على انهم يثبتو انو ماهر مُدعي مريض وماف صحه لي كلامو البقول فيهو دة وكل الحجات دي عارة عن هلاويس م واقعيه ،الناس ديل م خلو شي م عملوه حتى جابو شهود شهدو زور عن انو ام إيليڤ كانت موجودة في بورتسودان الفترة الحصلت فيها الجريمة والفترة دي كلها م طلعت من بورتسودان الا بعد م سمعت بالحصل لراجلها،م خلو ورق م زوروهو حتى عثمان حاولو يرشوهو علشان يغير اقوالو ومشو لي عمو الحاج بتاع العقار عشان يساوموه طردهم من البيت واتصل على ماهر برجف وحكى ليهو،

كنت في كل جلسه بعاين ليهم بقرف وكسرة نفس وهم بلهثو وبجيبو اوراق على اساس انها

ادله ،كنت بعاين ليهم وانا بقول في نفسي حتى لو ماهر ما اخد حق ابوهو في الدنيا دي حياخدو في الأخرة مضاعف منكم لأنكم اتسببتو في انو هو م ياخدو في الدينا،معقوله في ناس كدة؟ممكن تترافع عن ظالم وهي عارفاه ظالم ؟هم بخافو ربهم وعذابو؟والله مهما اتكلمنا عن صعوبه المهن الحملها تقيل م حيكون في اصعب من مهنة القاضي والمُحاماة،الناس دي بتتنافق والحاجه دي عقابها عظيم 💔
اخر جلسه لينا في المحكمه اللي هي كانت قبل الاخيرة القاضي قال"عليه قررت المحكمه تحديد جلسه النطق بالحكم النهائي بتاريخ ال30/12..

في اللحظه دي اخت عمة ماهر وقفت وزغردت في نص القاعه ومشت قالت لي اختها مبروك عليك البراءة ي اختي من اسي ،وقالت لواحد من المحامين بصوت عالي جهز لينا اوراق رد الشرف من اسي على طول ي مولانا...

كلنا كنا خايفين ومتوترين علشان موقفنا م بالقوة الحتخلي القاضي يحكم لصالحنا رغم وجود الشهود والأدله بس م كانت كافيه برضو خصوصاً انو هم م اعترفو،كان في نوع من الإحباط كدة مُخيم علينا وماف زول بقدر يظهرو للتاني كأننا بنتنافق مع بعض انا وماهر💔

حتى المحامي بتاعنا م كان بقول لينا كلام بطمن كل كلامو كان بصيغه"نتمنى ذلك"الجمله المحبطه وم بتبشر بالخير وبتخليك مجهجه وبين نارين💔

بتزكر ماهر وهو بحاول يقويني او يقوي نفسو قال لي"مش نحن على حق؟ووصلناها القانون عشان ناخد حقنا بالقانون بس خلاص معناها ماف شي يخوف وماف شي يخلينا نتنافق او نغش او نجيب شهود مزيفين ونشيل ذنبهم ي شهد زي م هم بعملو ،نحن على حق وطالما نحن كدة مفروض م نعمل الا البيرضي ربنا لأنو نحن بنعمل القال عليهو ربنا ، انتي عارفه انا بشفق عليهم والله وانا بشوفهم بعملو كل البعملو فيهو دة،نتوكل على ربنا ونحتسب منو الخير واذا م اخدناه هنا اكيد حناخدو عند ربنا صح!؟وبعدين رسولنا الكريم قال شنو؟
قلته ليه شنوو؟
قال لي رسولنا الكريم قال" ﻟﻮ ﺍﺟﺘﻤﻌﺖ ﺍﻟﺴﻤﺎﻭﺍﺕ ﻭﻣﻦ ﻓﻴﻬﺎ ، ﻭﺍﻷﺭﺽ ﻭﻣﻦ ﻋﻠﻴﻬﺎ ﻋﻠﻰ ﺃﻥ ﻳﻀﺮﻭﻙ ﺑﺸﻲﺀ ، ﻟﻦ ﻳﻀﺮﻭﻙ ﺇﻻ ﺑﺸﻲﺀ ﻗﺪ ﻛﺘﺒﻪ ﺍﻟﻠﻪ ﻟﻚ ، ﻭﻟﻮ ﺍﺟﺘﻤﻌﺖ ﻋﻠﻰ ﺃﻥ ﻳﻨﻔﻌﻮﻙ ﺑﺸﻲﺀ ، ﻟﻢ ﻳﻨﻔﻌﻮﻙ ﺇﻻ ﺑﺸﻲﺀ ﻗﺪ ﻛﺘﺒﻪ ﺍﻟﻠﻪ ﻟﻚ .عشان كدة مهما عملو وعملو في الأخير نحن م بنعمل الا الصح وامرنا بين يدين ربنا سبحانه وتعالى صح؟
بقيت اعاين ليه وهزيت ليه راسي بمعنى ايوة

انا م لاقاني زول بيقين ماهر وصمودو،بيحصل فيه ما يحصل في الحياة دي ورغم المعاناة والانكسارات والخزلان هو م ببين ليك الا برودو ووقفتو بصمود ،بني ادم راكز بشكل م طبيعي حتى شعره م ببين ليك انها مهزوزة فيه انا بخاف عليه بخاف عليه شديد من التماسك دة خايفه نتيجتو تكون لحظه انهيار م يقدر يطلع منو💔

يوم بعد يوم ويوم النطق بالحكم بقى يقرب والخوف والتوتر بزيد والواحد بكون قاعد على اعصابو وبفكر وسرحان كل الوقت انا كل تخيلاتي كانت حولين ردة فعل ماهر وموقفو اذا القاضي م حكم لصالحو💔 والفترة دي ماهر بقى مشغول شديد،مشغول ودايماً وم بفتح المحل بس بطلع مشاوير وبتأخر كل الوقت ولما اسألو بقول لي مشغول ،مشغول ،مشغول...

لغايه م جا يوم المحاكمه،،رغم اني كنت محبطه ويائسه وشايفه انو نسبه طلوعنا من المحكمه كسبانين 1℅لأنو رغم الشهود والأدله حاسه موقفنا ضعيف شديد بس م بينته لي ماهر الحاجه دي بالعكس ونحن طالعين كنت بصلح ليه في ملابسو وبرتب فيهو قلته ليه اكيد ربنا حينصف الحق❤🌻قال لي نتمنى ذلك
قلته ليه حتى انت بقيت تتكلم زي المحامي الثغيل دة😆😂💔😔

قال لي اي" نتمنى" م لينا غير نقول نتمنى ربنا ينصف الحق هههههه❤🌻

في المحكمه..

كنت واقف في المحكمة وعيوني بتقع على كل الحوالي،
شهد،إيليڤ،خالد،ازاد ،راكان،امي،عمي الزيني،المحامين،زياد،منذر،لجين،هيلين
كنت واقف وبعاين ليهم وانا بقرا تعابير وشوشهم واحد ورا التاني وبالتدرج ،م عارف كنت بفتش في شنو بس كنت بحاول اخمن الحكم حيكون شنو من خلال تعابيرهم
لغايه م لحظه وعيت على صوت
محكمه
اتلفته ودخلته القاعه
القاضي قبل م يدأ يتلي حيثيات القضيه بقى يطلب من المحامين يقدمو اخر مرافعاتهم عن القضيه،قامو كل المحامين ال3 واترافعو واحد ورا التاني،
لما جا دور محامينا قال:
لدي بعض الأوراق التي قد تغير مجرى القضيه سيدي القاضي!!
القاضي قال ليهو اتفضل
المحامي اتجه على اتجاه قفص المتهمين وقال :
أميمة،حسب اقوالك واقوال الشهود ذكرتي انك م كنتي في الخرطوم لحظه وقوع الحادثه،وحتى قبل وقوعها بفترة م جيتي الخرطوم ابداً والجيه الوحيدة ليك في الفترة ديك كانت بعد سماعك بالحصل لي زوجك صح ؟
قالت ليهو نعم
قال ليها متأكدة من الكلام دة ي اميمة؟كدة راجعي نفسك وارجعي بذاكرتك يمكن هي مضللاك والكبر دخل💔
المحامي بتاعها قال اعترض سيدي القاضي

القاضي قال ليهو إعتراض مرفوض✅💔
المحامي رجع قال ليها اميمة أُكرر السؤال هل انتِ متأكدة؟
قالت ليهو ايوة متأكدة
رجع مكانو وشال ظرف ورجع على اتجاه القاضي وقال ليها انتي بتقولي كدة لكن كشوفات مطار بورتسودان بتقول عكس ذلك،
الحقيقه ي اميمة انتي كنتي في الخ

رطوم بالطائرة ......... يوم ...... اقلعت الساعه ....... ونزلت بمطار الخرطوم الدولي الساعه........ وكنتي برفقه اخويك المتهمين عزالدين ونور الدين....وذلك كان قبل وقوع الحادثه بكم يوم فقط

ودي ورقه بختم المطار المحكمه بتقدر ترجع لكشوفات المطار بالاسامي الثلاث والتاريخ وتستفسر وتتأكد من الكلام دة اتفضل ي سيادة القاضي..

القاضي شال الورقه وبقى يعاين فيها،
بعد مسافه بقى يتناقش مع الجمبو،
رجع قال
عزالدين ..
عزالدين قال ليهو بخلعه نعم
قال ليهو كنت على متن الطائرة القادمه من بورتسودان المتجه نحو مطار الخرطوم بتاريخ ام لا ....؟
عزالدين سكت
المحامي بتاعو قال ليهو سيدي
القاضي اشر ليهو بي يدو نظام يسكت
على طول سكت وقعد
القاضي قال ليهو عزالدين منتظرين اجابتك نحن حصل ولا لأ؟
عزالدين قال ليهو ايوة حصل ي مولانا
وهنا كانت الصدمه بالنسبه ليهم كلهم
القاضي قال ليهو يعني انت بتعترف إنك كنت على متن الطائرة؟وكنت في الخرطوم لحظه حدوث الجريمة؟
عز الدين قال ليهو بصوت متردد أيوة بعترف،
القاضي قال ليهو برفقه من كنت؟؟
سكت مسافه وقال ليهو مع اختي اميمة واخوي نور الدين
القاضي قال ليهو يعني انت بتقر وبتؤكد على تواجدكم انتو الاخوة الثلاثه بولايه الخرطوم في تلك الفترة؟
قال ليهو ايوة
القاضي سكت ،
المحامي حقنا قام قال ليهو إذاٌ انت بتعترف بأرتكابكم للجريمة انت وأخوانك صحيح؟؟

واحد من المحامين قام قال بإنفعال اعترض سيادة القاضي الزميل يحاول استغلال الموقف وتضليل موكلي..

المحامي حقنا قال ليهو بصوت حاد وانفعال لا بل انتم من تحاولون تضليل القانون،اتهمتهم ابن المجني عليه بالجنون ف أتت اوراق لتثبت انه ليس بكذلك،فعلتم ما فعلتم لإثبات عكس ماهو صحيح في هذه القضيه ولكن ليس الان ،ليس في هذه اللحظه إطلاقاٌ، هذه لحظه صفاء،المتهم يريد ان ينجو بنفسه من حبل المشنقه بإعترافه ولكن انتم تحاولون تضليله✅
سيدي القاضي اسمح ببعض الوقت لطرح بعض الاسئله للمتهم
القاضي قال ليهو اتفضل..
المحامي مشى على المتهم ووقف قدامو،
قال ليهو أكرر انت بتعترف بإرتكابكم للجريمة وقتل المجني عليه محمد.....الزيني في ليله ... أم لا؟؟

هل بتعترف بتخطيطكم للجريمة وسرقه ما بالمنزل ام لا؟
أُكرر ؟!
فجاة عزالدين قال ليهو بنبرة خوف ايوة بعترف ...
هنا عم الصمت والجو اتكهرب كلو والناس بقت تتلفت واخت اميمة صرخت وبقت تقول ليهو عزالدين انت بتقول في شنو؟عزالدين؟لا ي عزو لا بقت تقول كدة بطريقه هستيريه
المحامي قال ليهو بتعترف بشنووو؟؟
عزالدين سكت
المحامي قال ليهو أُكرر السؤال بتعترف بشنوووو؟؟
عزالدين قال ليهو بإنو نحن قتلنا الزول دة وسرقنا قروشو

المحامي اتلفت على القاضي و قال ليهو سيدي القاضي لك التعليق✅

القاضي قال للعسكري طلعو جيبو المنصه هنا،
طلعوه من القفص جابوه،القاضي قال ليهو انت اعترفته بالجريمة امام الجميع بمحض إرادتك وبدون اي ضغط او كُره صح؟

عزالدين كان واقف وبرجف قال ليهو نعم سعادتك

....
عزالدين بدأ يتكلم وقال"اختي تمت اتفاقها مع اخو راجلها معتصم
القاضي قال ليهو معتصم دة اللي هو المتهم الرابع صح؟
قال ليهو ايوة،
القاضي قال ليهو كمل
كمل كلامو ب"وبعدين جات واتكلمت معي وقدرت تقنعني وتغريني وحسب كلامها انو نحن حنسرق بس م كان في نيتنا غير سرقه القروش المعاه،وبالفعل جينا الخرطوم في المواعيد المحددة،ومشينا البيت في اليوم المخططين فيهو للسرقه كنا مأجرين شقه بإسم الزول دة وأشر على عثمان،كمل كلامو ب
"كنا مراغبنو وإتناوبنا على مراغبتو لغايه م طلع يصلي الصبح في المسجد بعداك دخلنا الشقه وبدينا نسرق في القروش،القروش كانت كتيرة شديد وم كان معانا الشي البنشيلو فيها كلها حتى ف اتجبرنا ننقلها بيدينا وكان منتظرنا تحت معتصم بعربيتو ،نقل القروش هو الأخرنا وصعب علينا المهمة شديد وانا كلمتهم قلته ليهم العربيه اتملت كفايه خلونا نمشي اختي طمعت قالت لا الا نسرقها كُلها وبسبب الحاجه دي الزول دة جا راجع من الصلاة و قبضنا في بيتو بنسرق،قبضنا كُلنا نحن ال3مع بعض والمشكله معتصم دة شافو داخل وم حاول ينبهنا وهو لما شافنا عرفنا شكلاً،انا ضربتو مرة واحدة بس عشان هو اتصارع معانا اختي اميمة ونور الدين هم الضربوه ،ونورالدين كان شايل معاه ساطور طلعو وضربو بيهو،انا كلمتهم قلته ليهم ارح ننزل نخلي الراجل لو فيهو باقي روح بعيش م سمعو كلامي وانا نزلته خليتهم بضربو فيهو،حتى فيما بعد عرفنا انو مات وعرفته انهم قتلوه بالطريقه الكعبه دي م كنت عارف انهم عملو فيه كدة وقتلوه بالطريقه دي،نحن دة م كان قصدنا ولا كان اتفاقنا مع اختي انا ايدتها في موضوع السرقه بس لكن القتل دة انا م قتلته معاهم انا خليتو عايش ونزلته خليتهم،انا اتكلمته معاهم وهم م سمعو كلامي عشان كدة نزلته خليتهم ي مولانا انا م قتلته معاهم اقسم بالله م قتلتو معاهم....💔

في الحظه دي الحزن والدموع غرقو قاعه المحكمه،في منهم الببكي على الموجودين خلف الزنازين ومنهم الببكو

على الجريمة البشه الإرتكبت،ووسط دة كلو انا قاعد مصدوم وانا بسمع البتقال بس م مستوعب ابداً،حتى لما بديت استوعب كنت بتخيل الشريط دة وشكل ابوي وهو مصدوم في مرتو وبصارع عشان يقاومهم
............
القاضي أجل المحاكمه بعد ساعه،
الساعه دي انا م عرفته عدت كيف ولا حصل فيها شنو ولا اتقال لي شنو من الحوالي كل البعرفو انها عدت والمحاكمه رجعت ،
القاضي بدأ يتلي حيثيات القضيه من أولها لغايه م وصل أخرها بعدها قال محكمة
الناس وقفت على حيلها
القاضي قال:
إستناداً على المادة 130من قانون القتل العمد مع سبق الإصرار والترصد ومحاوله تضليل القانون والتستر حكمت المحكمه حضورياً على المتهمين
اميمة...
نورالدين...
معتصم....
بالإعدام شنقاً حتى الموت
هنا جات صرخه من اتجاه الزنزانه الفيها اميمة وعم ماهر دة في نفس اللحظه وبنفس الصدى بس هو صوتو على اضخم وبقى يتحسبن ويقول انا م قتلته انا قتلته بيدي ي ناس انا م قتلته
دخل في حاله هايبر أكتيڤ كدة وهو بصرخ زي الطفل منظرو وهو في الحاله ديك يخليك تستعيذ من الشيطان الف مرة وتقول حسبي الله من الظُلم ،حسبي الله

القاضي كمل كلامو ب وعلى المتهم عزالدين... بالسجن المؤبد مدى الحياة.
...........

لغايه اللحظه م قادرة انسى صعوبه تفاصيل اليوم دة،م قادرة اتجاوزو،اللحظه القاضي أصدر فيها الحكم القاعه كانت عبارة عن اصوات صريخ م بتعرف تحدد دة صوت منو من الناس الجمبك،والله كان يوم تاريخي شديد لأنو الاتحكم عليهم ديل كانو بصرخو زي الأطفال في القف الهم موجودين فيه💔
بعدها القاضي لسه كان عندو باقي كلام ف بقى يضرب بالمطرقه بتاعتو ويقول هدوء او اطلعو كلكم بره وخلوني مع اهل المجني عليه فقط
حصلت لحظه صمت الناس كلها بقت تعاين للقاضي

القاضي قال ماهر الزيني إبن المجني عليه
ماهر وقف وقال ليهو نعم
القاضي قال ليهو حأسألك سؤال صعب انا واثق إنك ولد بار وبشهامتك دي م حتغلبك الإجابه بس قبل م اسألك عايز اعترف ليك إعتراف صغير،انا من لحظه م وقفته قدامي في اول جلسه محكمة عرفته إنك على حق عشان من كترة مزاولتنا للمهنه وش الزول العلى حق دة بقى م بيخفى علينا على عكس اللابسين أقنعه، نحن م بندرس قانون بس بندرس معاه علم نفس كل حركه بتحصل منك نحن بندرسها تماماً وبنفهم من خلالها انت شنو عشان كدة رغم عدم وجود الأدله الكافيه اتحفظته عليهم ال4 وكنت واثق إننا حنصل للنهايه دي رغم طول المدة وكنت حازعل جداً لو وصلنا لنتيجه غير كدة ،انا مبسوط جداً انو حتى التأثر بالمحقق كونان وأفلام الإنيمي م كان على فراغ طالما بطلع لينا جيل بيكتشفو لينا عُقد قضايا زي دي وبكتشفو لينا النقاط السوداء ومخفيه ولا شنو ي سعادة المحامي ؟؟وعاين للمحامي القال على ناس ماهر انهم متأثرين بالمحقق كونان ومستنتجين ليس الا💔

المهم ي إبني نرجع للنقطه المهمة والأهم في كل القضايا

ماهر قال ليهو إتفضل

القاضي سكت مسافه وهو بعاين ليهو وماسك القلم بعدها قال ليهو القصاص أم العفووو؟

زياد هنا قال القصاص ي زول طبعاً،منذر قال القصاص،كل الكانو بإتجاهنا كانو بقولو القصاص ،القصاص،

القاضي ضرب المطرقه وقال ليهم هدوء هدوء هدوء...
ماهر كان واقف وساكت..
القاضي قال ليهو الخيارين في يدك وعندك الحق في اي واحد فيهم اخد راحتك نحن منتظرين إجابتك
......................
كل الناس الحوالي كانت بتهمس القصاص القصاص القصاص،صداها بقى يتردد في مسمعي وبقيت حاسي بنفسي كأني في قاع مظلم وحوالي اصوات كتيرة م قادر اركز م قادر اقول شي فجأة بقيت اتخيل صورة ابوي،،ملامحو،صوتو،ضحكو وتعاملو مع الناس،وبشاشتو بقيت متخيلو كأنو حقيقه قدامي وفجأة سمعته القاضي بقول ي إبني،ي إبني..؟!
قلته ليهو نعم
قال لي القصاص أم العفو؟
غمضته عيوني وفتحتها وضغطته على يدي واحكمته قبضتها وقلته ليه بنبرة مبحوحه وحادة
العفوو...✅💔

#إقتباسهه

*الحب هو ذلك الاتزان..💭*
*العداله الالهيه التي الغت* *الفروقات التي خلقتها الحياة*
*هو الذي كسر وتعدى كل العادات والتقاليد، الحب آتى ليكمل* *انصافنا❤ ليكسر حواجزنا، هو السلام الذي يهدى ضجيج دواخلنا*💜🎶

#شيراز_عثمان

#ذات_عناق43

العفوووو..

............
طبعاً في اللحظه دي من الدهشه ماف شي بقى مسموع في القاعه حتى انفاس الناس تقريباً وقفت،
انا تقريباً شبه اتشليت وانا بعاين لي ماهر،منذر وزياد وكلنا على نفس الشاكله ونحن بنعاين ليه💔✅

العفووو؟
القاضي زاتو من الدهشه نزل نظارتو وبقى ماسكها مع القلم في يد واحدة وهو بعاين لي ماهر،
وتاني رجع كرر ليهو السؤال
القصاص ام العفوو؟
ماهر قال ليهو بنبرة حادة العفووو،
في اللحظه دي حتى كلنا استوعبنا وزياد قال ليهو بصوت عالي انت مجنون؟عفو شنو البتعفيهو عنهم ي ماهر عقلك دة وين؟
القاضي قال هدوء
انا لسه بعاين ليه طبعاً وشايفه ماهر قدر شنو حابس انفاسه وعروق جسمو كلها بقت ظاهرة والحاجه دي م بتحصل ليه الا لما يتعصب ويزعل شديد💔✅

القاضي قال ليهو متأكد العفو ي إبني؟
ماهر قال ليهو ايوة
قال ليهو طيب إتفضل اقعد
ماهر قعد بعدها القاضي قال اخ القتيل،
عمو الزيني وقف ،
قال ليهو سمعنا رد ود اخوك على السؤال انت كمان حنسألك نفس السؤال العفو ام القصاص؟
عمو الزيني سكت وبقى يعاين بإتجاه القفص الفيه اخوه ويعاين لي ماهر
القاضي قال ليه العفو أم القصاص؟
عمو الزيني قال ليه بعد السنين دي كُلها ماهر هو الحرك القضيه وتعب لغايه م وصلنا النقطه دي عشان كدة القرار قرارو هو وانا معاه اياً كان سواء قصاص ام عفو.عمو الزيني كان بتكلم ودموعو جاريه💔

القاضي قال ليه إتفضل اقعد

زوجات المقتول
وقفت هيلين وأم ماهر
هيلين عاينت لي ماهر وقالت للقاضي "هو اتحمل مسؤليه القضيه دي مسؤليه تامة رغم اننا اتخازلنا فيها وم اديناها حقها من الاهتمام ف اكيد الراي الأول والأخير رأيو هو ونحن معاه فيه هو م بخطي خطوة غلط ابداً✅🌻
أم ماهر دي وقفت تبكي بس م ردت اي رد غير انها كانت بتبكي وبكت معاها قاعه المحكمه كلها،القاضي قال ليها اتفضلي اقعدي💔✅

القاضي قال هل للمقتول ابناء اخرين؟
فجأة سمعنا صوت قال بصوت عالي اي نحن انا ومعي اخواني تلاته 2 صغار وواحدة كبيرة وأشر على إيليڤ وكمل كلامو ب"وبنعفي زي م اخونا الكبير عفى"

القاضي قال ليهو انتو ابناء المتهمة؟
خالد سكتت مسافه وبلع ريقو وقال ليهو ايوة
قال ليهو اقعد طيب

القاضي سكت مساافه وهو بعاين للورق القدامو وبتناقش مع الجمبو بعدها رجع لي ماهر قال ليهو ي إبني
ماهر وقف و قال ليهو نعم،

القاضي قال ليهو ليييه العفو؟
نحن بس مستغربين انو زول فتح القضيه دي بعد السنين دي كلها واجتهد وكشف الغموض دة كلو وفي الأخير يجي يعفي...

ماهر سكتت مسافه حتى قال ليهو "العفو عشان اليوم انا واقف هنا وشايفهم قُتله ابوي"
لو طلعته من هنا انا كمان في ناس بكرة حتشوفني قاتل اهلهم حتى لو بالحق وقصاص انا م عايز اكون زيهم ابداً ولا حتى عايز اتخلق بأخلاقهم بكفيني جداً انو هم إتعرفو وانو انا وصلته لي هنا انا حأطلع من هنا وحأعيش بصورة طبيعيه جداً وانا راضي عن نفسي على عكسهم هم تماماً،هم اليوم قُتله ومرمين في نظر القانون،وقتله ومجرمين في نظر الحواليهم وتحديداً اولادهم واظن دة عقاب كافي في الدنيا اما في الأخرة "وعند الله تجتمع الخصوم"...❤🌻✅

هنا القاضي كسر القلم وبكى ،ايوة بكى والله بكى عديل وعاين بإتجاه القفص الفيه المتهمين وقال ليهم لو مستوعبين كلامو البقول فيهو دة حتفضلو الإعدام والله💔✅

القاعه رجعت اتملت صراخ وكواريك ما بين الفرح والزعل والصدمه من موقف ماهر
ماهر طلع من القاعه على طول،م استنيت زول طلعته وراه وبقيت بفتش فيه م لقيت ليه اثر وحتى عربيه زياد السايقها هو مافي،بقيت اتصل عليه م برد ،
زياد جا طالع لقاني واقفه قلته ليه ماهر طلع وم برد وبقيت ببكي،
قال لي مشى وين؟
قلته ليه م عارفه بس م برد ما برد خايفه تحصل ليه حاجه😭💔

قال لي روقي م بحصل ليه شي💔
منذر ولجين ومعاهم امي جو طالعين طبعاً وشوشهم كانت م بتتفسر كلهم،
لما شافوني ببكي لجين قالت لي في شنو؟
م رديت وانا بتصل على ماهر وبتلفت
ماما قالت لي خير؟
قلته ليها ماهر م برد ي ماما طلع م عارفه مشى وين وما برد😭💔
منذر قال لي روقي اكيد م حتلقيه حايم هنا بعد العملو دة،راجلك دة وديني مجنون
ماما قالت ليه بصوت حاد مُنذر
قال ليها ي امي..
ماما حمرت لييييه..
عمو الزيني جا طالع مع خالتو مشتهى وعمتو عبير،عمتو عبير قالت لي بتيي وعلى طول حضنتني وبقت تبكي،
كنت متضايقه للدرجه الما كنت قادر اواسيها ولا بأي حركه حتى انا دموعي جاريه بشكل تلقائي وم قادرة اخد نفس حتى💔✅بعد مسااافه فكتني واتحركت على طول ..

.................
دقيقة لو سمحتو بس دقيقة عليك الله عايزة اقول ليها كلمتين
في شنو ي خاله؟
بس عايزة اقول ليها كلمتين وبعدين سوقوها..

اميمة عرفتيني؟؟اي ياها انا زاتي مرت الزيني العملتي كل شي عشان تضريني وتجنيني وتعيشيني في جحيم،اي انا الخربتي لي حياتي وحياة اولادي بالسحر والفقرة وجهجهتيني وم خليتيني اعيش بصورة طبيعيه زي الناس ومرضتيني،انا الولدي عفى عنك وطلعك من حبل المشنقه المفروض يكون حاجه بسيطه بالنسبه ليك،عايزة اقول

ليك حسبي الله ونعم الوكيل فيك ليوم الدين وانتي انسانه مريضه،حتى كلمه مريضه بسيطه بالنسبه ليك ومكانك ابداً م السجن انتي مكانك مصح عقلي عشان تتعالجي من المرض الفيك دة واريتو كان مرضك كان عشان شي نافع مرضانه عشان راجل ،ضريتيني انا الما عندي ذنب لا من بعيد ولا من قريب وخربتي علي حياتي عشان راجل ودة كلو من الحقد وعقدة النقص الفيك ،وعلى فكرة شيخ ....الفي ...... بسلم عليك،والسحر العملتي لي وختيتيهو في المقابر والتاني العملتي لي وختيتيهو في خشم التمساح والتالت الرابطاهو لي في جناح طيرة كلو طلعو لي في الأخير هو شيخ ومع البدفع اكتر،كان بإمكاني ابقى زيك وادفع ليه عشان يعمل فيك العملتي فيني مضاعف لكن انا م زيك انا انسانه بعرف انو في رب اسمو رب العالمين ولو رفعته يدي ليه بنصرني لكن انا حتى لما رفعته يدي ليه دعيت ليك ربنا يشفيك عشان الإنسان المريض م بدعو ليه غير بالشفاء وحسبي الله ونعم الوكيل فيك ربنا هو الحياخد لي حقي وحق اولادي وعذابي في الدنيا منك احلف ليك حتشوفي في نفسك وانا م بعايرك بلفظ ي مريضه زي م انتي عايرتي اولادي بيهو لكن انصحك تلحقي نفسك وتشوفي ليها علاج.✅🌻

.................
رجعنا البيت وانا كانت حالتي حاله،كانو معي كلهم حتى عمو الزيني وماما وعمتو مشتهى ،كانت في حاله من الحزن كدة مخيمة علينا،وكلنا قاعدين وساكتين وبنعاين لبعض والببكي ببكى وانا كُل همي ماهر،عدت ساعات وساعات م جا وهم كلهم مشو خلو معي لجين بس،مهند كان برة مع سمر طول اليوم ،هو عارف انو قضيه ابوه شغاله بس ماهر م مديه اي تفاصيل كتيرة عنها علشان حالتو م تتراجع ويدخل في حاله اكتئاب وتأثر عليه بشكل سلبي علشان كدة ماهر كان مُفضل انو يخليه بعيد كل البعد عن الحاجه دي💔 حتى لجين لما جات الساعه 77 مشت خلتني وانا ماسكه التلفون وبتصل وماهر م برد وخلاص اعصابي باظت،
اتصلته على زياد وقلته ليه ماهر م منو خبر ي زياد شوفو وين ياخي 😭💔
قال لي م تبكي طيب اسي نحن بنفتش عليه ان شاءالله حيكون بخير هو لما يكون متضايق اصلاً بختفي كدة
قلته ليه منذر معاك؟
قال لي اي 💔
قلته ليه طيب،
جرس الباب ضرب قلته هو جريت فتحتو لقيتو مهند،حاولته اتصرف قدامو بشكل طبيعي سلمته عليه ،
ماهر وين؟
قلته ليه بصوت مبحوح مافي
قال لي مش اليوم في جلسه محكمة؟الحصل شنووو؟؛
قلته ليه اتفضل ادخل اجهز ليك غداء؟
قال لي لأ متغدي
دخل غرفتو وانا دخلته غرفتي وفضلته منتظرة لغايه م الساعه12 مساء جات وانا قاعدة في كنبه الهول ،جاتني غفوة وانا ماسكه التلفون وبتخلع كل شويه افتح وارحع اغمض ،نزلته انتظرتو تحت في الشارع اكتر من ساعه م جا ومنذر وزيا م منهم خبر ،وانا في الكنبه ما بين صاحيه ونايمة فجأة حسيت بحركه فتحته عيوني لقيتو ماهر داخل،طبعاً بين دة واقع او خيال فتحته عيوني وانا بعاين ليه مسافه حتى استوعبته انو خيال قمته على طول وقلته ليه بصوت عالي"ماهر؟؟؟
جريت من مكاني واترميت في حضنو وبقيت ببكي وبقول ليه مشيت وين ؟م بترد علي؟انت ليييه بتتصرف كدة؟انا قلقته عليك ،قلقته عليك شديد والله قربته اجن من كتر التفكير،

كان حيلو مهدود لدرجه انو م قادر يضمني عليه،
قلته ليه انت كويس؟
قال لي بصوت خافض ومبحوح انا تمام ،
قلته ليه لا م تمام ،م تمام ابداً ماهر انت عايز تجنني؟لو عايز تجنني قول😭💔ليه بتعمل كدة بس فهمني؟ سكت م رد علي واتفك مني دخل غرفتنا،لحقتو لقيتو دخل الحمام استحم وجا طالع قلته ليه بصوت خافض ماهر،
قربته عليه وقلته ليه حبيبي❤
قال لي شهد انا تمام بس عايز ارتاح شويه بس شويه راحه ممكن؟
قلته ليه حترتاح كيف بعد العملتو اليوم؟بعد التعب التعبتو دة كلو بكل بساطه الدنيا جيت عفيت عنهم وكأنو هم م عملو شي وجاي تقول لي عايز ارتاح،م حترتاح ابداً ي ماهر بكرة حيطلعو وم حتقدر تتصالح مع الواقع دة ابداً مهما حاولت💔

قال لي بكل برود وصوت مبحوح بقولو العفو عند المقدرة وانا م قادر اسامحهم ايوة،م قادر اسامحهم ابداً بس شايف انو حتى حبل المشنقه دة بسيط عليهم،القرار كان في يدي ايوة وكنت بقدر اخد قرار غير العفو بس زي م قلته في قاعه المحكمه انا م زيهم م عايز اكون في نظر اخواني واولاد عمي قاتل اهلهم،شهد العاش الحاجه م حيحس بيها الا العاشها زيو بقولو الجمرة بتحرق الواطيها ،انا جربته احساس فقد الأم والابو الإتنين في الحياة دي وعارف المعاناة الممكن يعانوها الما عندهم ذنب ديل ،انا عشت يتيم مرتين ف م عايزهم يعيشو الانا عشتو، الحياة دي ي شهد صعبه،صعبه شديد من غير اهل ،اصعب ما تكون،

ماهر دمعتو جات جاريه وهو بتكلم والله على قدر م كنت موجوعه من قرارو على قدر م كلامو وجعني وحسيت في كلامو قدر شنو هو موجوع من الواقع العاشو هو وقدر شنو هو عاش وجعه فقد💔

قلته ليه بصوت مبحوح ودموعي جاريه حبيبي❤
قال لي على العموم انا بالنسبه لي الحصل في المحكمه دة عقاب كافي وشافي ليهم عارفه ليه ي شهد؟عشان في ناس بدل م نحن نعاقبهم بالقانون نوصلهم القانون ولغايه م نصل للنقطه الوصلته ليها ا

نا دي وبعدين نعفي عنهم م عشان هم بستحقو لأ ابداً لكن عشان نفسياً انا اكون مرتاح وضميري م مأنبني ابداً لاني قدرته اجيب حقي القال عليهو ربنا والقرار بقى في يدي بس انا شايف بعد القانون الحياة هي اكبر درس وعقاب لأي زول ظلم وجار على زول،اذا في سبب يخلينا نسامح فهو عشان نقلل زيارة لأطباء النفس عارفه ليه؟لأنو دايماً الانسان الجواه تراكمات ،العاش ماسي وقلبو حار بسبب الصعوبات الواجهتو وما بسامح دايما ببقى ضحيه لمشاكل نفسية و عصبية و اكتئاب"وانا مثال حي على الكلام دة"الحوالينا هم سبب مشاكلنا وتراكماتنا النفسيه وهم نفسهم البعايرونا بيها وبقولو علينا مجانين بس كل م عودنا نفسنا اننا نتجاوز ونسامح وناخلص من كل الحجات السيئه عشان صحتنا حنلقى انو حياتنا نضيفه حتى ربنا سبحانه وتعالى لما قال"والكاظمين الغيظ والعافين عن الناس"م قالها من فراغ ي شهد💔✅

حضنتو وبقيت ابكي قلته ليه بحبك ي زيني ،بحبك شديد انا وي بختي بيك ،م عايزة شي من الدنيا بعد كدة خلاص انت كفايتي ❤🌻

نحن اصعب الفترات الممكن تكون عدت علينا هي الفترة الاتفتحت فيها قضيه مقتل ابو ماهر دي،جد كانت مرهقه شديد ومتعبه لينا كلنا بدون استثناء،كنت خايفه ،خايفه شديد على ماهر من انو ينهار حتى بعد الحكم النهائي كنت متوترة شديد من تأثير قرارو دة على صحتو بس فاجأني بطريقه تفكيرو وحسابو للأمور....

.........
قبل المحكمه بكم يوم اجتهدنا شديد ونحن بنحاول نعرف اي حاجه عن القضيه ،اي ثغرة نمسك بيها على الناس الناس دي حاجه،وبعد اجتهادات تركيزنا وقع بس على الشهود الجابوهم المحامين وشهدو على انو أميمة مرت ابوي واخوانها كانو متواجدين في بورتسودان في فترة حصول الجريمة،م كان علينا الا إننا نصل ليهم،وبسبب الحاجه دي زياد ومنذر والمحامي سافرو لي بورتسودان عشان يقدرو يصلوهم لأنو واحدة منهم كانت جارة مرت ابوي على طول وصحبتها ،وبعد معاناة منهم وتحانيس وضغوطات وتهديد وتخويف اعترفت بي انهم كذبو عشان طلبو منهم كدة واكيد م ساي اخدو مقابل بس م اعترفت بحكايه المقابل دي،وبحكم انو المحامي عندو معارفو في مطار بورتسودان الحاجه دي سهلت علينا شديد واتوسط ليهم ،ايام وايام وهم بفتشو على اسماءهم وبعد يأس لمن جو راجعين الخرطوم هنا حتى رسلو للمحامي بالفاكس وادوهو خبر بالحاصل💔✅

قبل يوم المحكمه مشيت لي عزو في السجن،بحكم انو ما بس زول اخو مرت ابوي وشريك في الجريمة لا بحكم انو زول اشتغل معي وطلعته ونزلته معاه،قعدته قدامو وش لوش وقلته ليه"انا م جاي اقول ليك اعترف عشان القانون ياخد مجراه لأنو في الحالتين القانون حياخد مجراه،انا جاي اقول ليك اعترف عشان تخفف على نفسك ي عزو،انتي عارف انو انا م حصل عاملتك ك اخو مرت ابوي في الشركه ابداً وحتى ناس الشركه لغايه اللحظه م عرفو الحاجه دي،واسي انا جايك ك ماهر الزمان داك عشان انصحك إعترافك حيخلي الحكم يكون في صالحك انت لأنو حالياً كل الأدله البتثبت انكم انتو الإرتكبتو الجريمة دي اتوفرت💔✅

بتزكر نبرة الخوف القال لي بيها"ادله شنو؟انت مجنون في راسك دة نحن م ارتكبنا اي جريمة ولا في ضدنا اي ادله"
قلته ليه في كشوفات مطار بورتسودان العليها اسمك واسم نورالدين واختك اميمة ،
بلع ريقو وقلع عيونو وقال لي كشوفات شنوو ي زول؟
قلته ليه انت عارف وانا عارف ي صحبي م تتغابى عشان كدة قلته ليك اكسب الحكم لصالحك بإعترافك وانت ادرى بمصلحتك طبعاً✅

اخترنا عزو لأنو على حسب كلامه طه انو نفسياً هو خايف ومتضطرب شديد ومهزوز ومتوتر ودي نقطه نحن بنقدر نستغلها بحكم انو زول جبان ،بس ابداً م اتوقعت انو يعترف اعتراف كامل في المحكمة كانت مجرد توقعات ليس إلا💔✅

..............
خلوني ارجع بيكم شويه لي ورا واحكي ليكم عن الحصل معي....

في يوم من الأيام مشتهى فاجأتني بي إنها مسافرة لي شيخ سمعت بيهو وقالو ليها شاطر في مواضيع الرقيه الشرعيه والعلاج،وأصرت علي في موضوع السفر دة بحجه انو الزيني راجلها م حيخليها تسافر براها ...

.....
تعبته شديد عشان اقدر اقنع الزيني بالحاصل دة وأصريت واتعاندته معاه قلته ليه بسافر بس وبسوقها معي واليحصل يحصل،حلف علي طلاق وقال لي دة كلام فارغ وانتي مجنونه و...الخ قلته ليهو بس اي انا مجنونه لكن جني دة م بموت بيه بسوقها بوديها وبعالجها عشان المرة دي كفايه عليها العذاب العاشتو هي واولادها وبقولو 2لو قالو ليك راسك دة ماف اهبشو نحن قبل كدة في شيخ رقيه قال لينا الحاصل معاها دي م عين ابداً،،المهم اصلاً ماف راجل بصدق كلام زي دة ولا بخش ليه في عقلو لكن اصلي م ركزته في ؤفضو للموضوع ختيتو امام الامر الواقع وقلته ليه انا بسوقها وبمشي على اساس اني انا العيانه وبعد اجي راجعه اعمل العايزو عشان المرة دي كان ماتت بالعذاب دة انا م اموت بعذاب الضمير ساي بعدين وفعلاً اقنعتها وطلبنا ترحال عشان نسافر بيه ،
"مشتهى"
......
وصلنا البلد الماشنها دي المغرب ونحن متحركين 6صباحاً من شدة م بعيدة ،وانا اشيل وانق ليها واقول ليها الشيوخ دي

ل كان بعالجو كان عالجوني انا لكن كدة نشوفك دايرة تصلي لشنووو،
"عبير"
.........
م كنت عارفه غير لقب الشيخ واسم منطقتو الهو فيها ،اها بقينا لافين ونسأل والناس تعاين لينا زي الحاجه الكعبه عارفننا غرباء،لغايه م وصلنا،
يعني البشوف الخرابه الهو ساكن فيها والقرف م بقول دة زول ممكن يخرب حياة ناس،حتى بيتو يحسسك بالرجفه والخوف الراجل نفسو ساكن طرف البحر وجمبو مقابر،غرب منو بحر،وشرق منو مقابر ،ساكن في اسوأ مكان واغرب مكان في المنطقه سبحان الله حسب افعالو الشينه البعملها شي طبيعي يسكن في مكان زي دة والله نحن داخلين ليه وقلوبنا في يدينا ،واستغفر الله العظيم كنت متخيله انو نمشي نلقى المكان فاضي لكن لقينا معاه ناس،يعني سبحان الله م عارفه هل ديل ناس مأزين منو ولا جايه جايه تأزي بس كل العملتو اني اتحسبنته،قعدنا انتظرنا لغايه م جا دورنا دخلنا عليه،اعوذ بالله من الشكل والعفن الهو فيهو ياخي ريحه المكان الهو فيهو براها تجيب الرايح دة غير ريحه الصنان والصناح الطالعه من شعرو المربيهو،
عبير قالت لي بي رجفه هي دة شنو ي مشتهى الجبتينا ليهو دة؟دة مستحيل يكون بعالج بي رقيه شرعيه ارح نطلع،ارح ي مشتهى انا طالعه عايزة تطلع مسكتها ،
سمع كلامها قال لي كان دايرة تطلع فكيها خليها تفوت،
قلته ليهو لأ ،
اشر لينا وقال لينا اقعدو طيب
قعدنا ،
سكتت مسافه وهو مغمض عيونو وماسك سبحه وفجأة قال مالك؟
قلته ليهو انا؟والله ي..
قاطعني وقال لي لا م انتي دي واشر على عبير،
قالت ليهو بي رجفه انا؟
قال ليها اي انتي
قالت ليهو م م م عندي شي م فيني شي،
قال ليها عندك المدفون في المقابر وعندك المربوط في طيرة وعندك المرمي في بطن تمساح

بقت تعاين لي وتعاين ليهو بخلعه وهي مقلعه عيونها

قلته ليهو عرفته كيف ي شيخ انت عملتو؟
قال لي انتو جايني عشان انا عملتو وم بفكو غيري،من جات داخله علي عرفتها ماف شيخ بمر عليهو زول هو عمل ليهو سحر وم بعرفو✅

هنا انا عرفته انو الحاجه دي ليها علاقه بالجن،والمشكله انو واضح

بديت احكي ليهو وطبعاً عبير قاعدة متصمغه وبتعاين لي بي خلعه وذهول غريب وكل البتقول كان"انتي بتقولي في شنو ي مشتهى؟دة شنو البتقولي فيهو دة؟؟ودموعها جاريه وانا مواصله وبحكي حتى في الأخير قلته ليهو المرة العملت كدة دي اسمها أُميمة واسي نحن جاينك عشان بس تطلع السحر دة وتفكو عشان والله المرة دي تعبت في.حياتها دي عمرها دة كلو ضاع في العذاب والجهجه هي وعيالها بسبب السحر الانت عملتو دة وهي م عندها ذنب ،اسمع ي شيخ انا عارفه انو انت اندفع ليك شي وشويات عشان تعمل السحر دة اها انا جايه وبديك الدايرو بس انت فكو
عبير كانت بتقول انا ؟انا معمول فيني كدة؟ليييه؟وعشان شنو؟وبقت تبكي وتتحسبن
الشيخ بعد مسافه قال لينا اطلعو برة،
هنا انا بقيت اعاين ليه قالها بنبرة كأنو طاردنا
بعدها قال لينا بنادي عليكم لما اجهز✅

طلعنا وعبير دي تبكي وتقول لي عرفتي الكلام دة متين؟وليه م كلمتيني؟لييييه ي مشتهى ؟انا عملته شنو في دنيتي دي عشان يخربو حياتي ويعملو فيني كدة؟بقت تبكي وتتحسبن والناس الحوالينا كلهم بعاينو لينا،قعدنا ساعات ورا بعض ونحن منتظرين والراجل دة الساعات دي كلها م دخل زول ولا طلع من مكانو نهائي،
في مرة كانت جمبنا قالت لينا مالكم؟
قلته ليها سحر،
قالت لي كُر علي ي يمة لمنو فيكن؟
قلته ليها زوجه حماي
قالت لي امسكو في حسبي الله ونعم الوكيل دي بس والله كلنا سحر وجاين كايسين درب العلاج،شوفي بتي دي عروس والله م تمت 3شهور اها من شهر العسل رجعت بحالتها دي بس تصرخ وتجري واسي بقت تقلع ملابسها وتجري في السهله سااااي م خلينا دكتور نفسي م مشيناه م خلينا رقيه م عملناها والحال في حالو ،شوفي جسمها دي كلها جروح جرحها ليها شيخ الرقيه في رجولها ويديها ،اخر ما في الاخر قالو لينا احتمال معمول ليها عمل ووصفو
لينا الزول دة والله جينا وكلنا امل مع راجلها احتمال تتعافى💔✅كانت بتتكلم وبتبكي على بتها بي حرقه وبتها حالتها تبكي الكافر وهي حلاة الدنيا عليها صغيرة مربطنها من يديها ورجليها ،انا زاتي دمعتي جات جاريه معاها وهي بتبكي💔

اثناء م هي بتحكي فجأة جات واحدة نادت علينا انا وعبير قالت لينا الشيخ بناديكم ،قمنا مشينا دخلنا ليه،على طول قال ليها انتي اقعدي وانتي اطلعي برة،
قلته ليه انا؟
قال لي اي اطلعي برة،
عبير بقت تعاين لي بي خوفه،
قلته ليه طيب،..
.......
قلته ليه بي رجفه خليها معي،
قال لي انتي دايرة يطلعو ليك الفيك ولا دايراها تقعد معاك؟
سكتت وانا قلبي عايز يطير من محلو

قال لي قومي شيلي الكورة دي،أشر لي على كورة ألمونيوم كدة قال لي شيليها،
شلتها قال لي اطلعي برة اي برميل مويه اغرفي منو مويه وجيبيها،
قلته ليه اي برميل؟
قال لي اي
شلتها وطلعته مشيت شلته مويه من اقرب برميل لاقيتو وجيت راجعه والناس بتعاين لي،
قال لي ختيها،
ختيتها قال لي اطلعي الحوش جيبي تراب من الأرض وتعالي راجعه،
قلته ليه تراب؟
قال لي اي خمي تراب من الأرض،
اترددته بس سمعته ك

لامو مشيت خميت تراب من نص الحوش والناس كلها تتفرج علي مشتهى وجيت راجعه،
قال لي كبي التراب دة في المويه حقت الكورة،
قلته ليه طيب كبيتو،
قال لي دخلي يدك في الكورة وابدي حركي،
دخلته يدي وبديت احرك،قال لي المويه فيها شنو؟
قلته ليه ولا شي،
قال لي دخلي يدك تاني وحركي،
دخلته يدي وبديت احرك قال لي فيها شنو؟
قلته ليه ولا شي ،قال لي لونها شنو؟
قلته ليهو اغبش من التراب،
قال لي هاك دي شيلي جزء من المويه دي كبيها هنا،مد لي كرستاله صغير فاضيه،شلتها وكبيت منها لغايه م اتملت قال لي كفى اقفليها وختيها قدامك،
قفلتها وختيتها قدامي،قال لي تاني دخلي يدك وحركي يدك في الحله،دخلتها وحركتها قال لي فاضيه ولا لأ؟قلته ليه فاضيه اداني غطايه الحله قال لي غطيها،
غطيتها،
قال لي شيلي دي ولفيها بي طرف توبك م تخلي فيها فرقه،واشر لي على الباقه،شلتها ولفيتها بي طرف توبي،قال لي افتحي الحله ودخلي يدك فيها تاني وحركي،بعد م عملته كدة قال لي اقفليها وختي يدك بفوق ليها واضغطيها شديد بي يدك،ضغطها،قال لي خليك ماسكه الباقه الملفوفه بي توب في يدك التانيه وبرضو م تفكيها ابداً ،
وبعدها غطاني بي ملايه وكدة
في اللحظه دي انا حسيت نفسي عايزة اقوم اجري عديل من الخوف💔
بدأ يتكلم ويقول لي قولي وراي،
الكلام الكان بقولو فيهو الله والرسول واستعاذة من الشيطان ومن السحر وكلام كتييير يعني عبارة عن دعاء بس م عارفه م كنت قادرة استوعبو ،خلاني ارددو 99مرة ،كل م يقولو 33مرة بقيف وبرجع يرددو ،قسم الحاجه دي على 3 مرات،حتى تاني بدا يدعي بسرعه وبقيت شامه ريحه بخوف ودخان وهو بتكلم ،بديت اكح وهو بتكلم بعدها قال كلام اخير في شكل دعاء خلاني ارددو اها دة غريب شديد وفيهو اسماء غريبه اظنها اسماء جنون ولا شواطين م عارفه بس تقريباً دي كانت اسماء جنون ،اسماء حتى نطقها صعب،
بعدها خلاني استعيذ بالله واستغفر وقال لي ارفعي راسك،رفعتو وانا دموعي جاريه عشرة عشرة من الدخان الكاتم المحل،بعد م اخدته نفسي مسافه قال لي الفي يدك دي قصدو الباقه،قال لي امسحي بيها جسمك كلو وم تفكي غطايه الحله،
قلته ليهو كيف؟
قال لي زي م سمعتي م تفتحيها خليها ملفوفه في توبك كدة وامسحي بيها جسمك كلو من راسك لغايه رجولك م تخلي مكان ويدك التانيه خليها ضاغطه على الحله،
قال الكلام دة واتلفت على ضهرو وقال لي بعد تخلصي قولي لي خلصته،
عملته القالو مسحته جسمي كلو بالباقه الملفوفه بالتوب ويدي التانيه ضاغطه على الحله ،لغايه م خلصته قلته ليهو انا خلصته،
اتلفت علي وقال لي ختيها قدامك،ختيتها،قال لي م ترفعي يدك من الغطى ارفعي الغطى زاتو،
رفعته الغطى وكانت المفاجأة انو الحله م فاضيه،الحله م فاضيه كانت جواها حجات زي م بقول ليكم كدة 💔😯
بقيت اعاين للحله بي خلعه
قال لي مش دي الحله الدخلتي يدك فيها وحركتيها وكانت فاضيه؟
هزيت ليه راسي
قال لي مش كانت نقفوله بي يدك؟
هزيت ليه راسي وانا مقلعه عيوني
قال لي دة سحرك المعمول ليك،
دخل يدو وطلعهم تلاته،واحد كتله كبيرة ملفوف بي قطع كتيرة وأسلاك نحاسيه وحجات كدة غريبه ،قال لي دة عملناهو بي قطع ملتبسك شايفه الخيوط دي جايه من ملابسك وبقى يقلب فيهو وكمل ب"دة كان مرمي في بطن تمساح،في واحد مربع ملان طين قال لي دة كان في المقابر،وفي واحد صغير كدة ملفوف بشكل طولي وفيهو خيط صغير قال لي دة كان مربوط في جناح طيرة،
رجعهم المويه وقال لي ديل الحجات الأنا عملتهم بإسمك ياهم قدامك كان في شي تاني والله الا كا اتعمل ليك عند زول تاني تمشي تكوسي دربو،
سكتت مسافه وقال لي وين الباقه؟
قلته ليه ياها وشلتها من قدامي،
قال لي قبيل كان لونها شنو؟
قلته ليه اغبش زي لون التراب الكبيناهو فيها،قال لي سمح افتحيها،
فتحتها وهنا كانت الصدمه،مويه الباقه كان لونها اسووود زي لون الفحم واحد ،فحم زي م بقول ليكم ويمكن اغمق،
بقيت اعاين ليها بي خلعه،
قال لي السواد الانتي شايفاه دة اي سحر تاني غير السفلي اتعمل ليك واي عين وقعت فيك ياها في الباقه دي ✅💔
لساني بقى تقيل م قادر يتحرك لي ساكن لو كان اتحكى لي عنو م كنت حأصدق لكن انا شايفه الكلام دة شوف عين عديل💔

قال لي المرة دي منو؟
قلته ليه منو؟
قال لي اميمة،بتبقى ليك؟
قلته ليه لأ مرت راجلي بس كانت
هززز راسو وهو ساكت مساااافه،
بعدين قال لي شوفتي البحر الجمب البيت دة؟
قلته ليه اي
قال لي الحجات دي تقومي تشيليها وتطلعي من هنا وانتي ساكته ما تتكلمي مع اي زول ولا تردي على زول اتكلم معاك نهائي،تمشي ترميها في البحر والباقه دي تفتحيها وتكبي مويتها وتجي
سكتت مسافه ،
قال لي الشمس لسه م طلعت الواطه صباح الناس امشي ،
م كنت عارفه انو صباح اليوم التاني جا طبعاً،
شلتهم وطلعته لقيت مشتهى في وشي قاعدة وممدة رجولها في الفرشه وقاعدة،قالت لي عبير،الحصل شنو ومالك اتأخرتي كدة،ماشه وين ودة شنو الشايلاه دة؟؟
......
ههههههههه كنت بتكلم معاها وهي كانها روبوت متحرك ولا حتى حرف م نطقتو وطلعت وانا وراها وانادي عبير عبير وهي شايله ليها حله

مغطيه وماشه،طلعنا من بيت الراجل وهي ماشه،وصلنا البحر وانا اكورك واقول الليله ووووووب خلاص المرة فوتت وهي م بترد علي،
وصلت البحر دخلته وراها لقينا بتاعين الحمير والكوارو بشيلو في المويه،هي دخلت طوالي كشحت الشايلاهو ده في المويه وجات طالعه وهي ساكته والناس تتفرج علينا وبرضو م ردت علي لغايه م دخلت بيت الشيخ دخلته وراها وبقيت واقفه مذهوله💔
الشيخ قال ليها كشحتيها؟
قالت ليهو اي
قال ليها بعد كدة انا العملتو طلعتو ليك قدامك شوفتي بعينك ولا لأ؟
قالت ليهو شوفتو
قال ليها الله يسهل عليك
قلته ليهو خلاص؟
قال لينا اي خلاص
قلته ليهو طيب قروش كم ي شيخ؟
سكتت
قلته ليهو اها كم ي شيخ؟
قال لي لي ......
فتحته شنطتي وحسبتها ليه واديتها ليه
عبير قالت ليهو ي شيخ مدامك م بتطلع الا شي عملتو بتعمل للناس البتأذي دي ليه؟عليك الله ي ابوي م شوفته حالتي الجيتك بيها دي؟انا عندي سنين بالحاله دي واي زول انت عملته ليهو حاجه زي دي بإسمو حالتو زي حالتي دي ويمكن اكعب بقت تتكلم معاه ودموعها جاريه،
الشيخ بقى يقول لي "سوقو واطلع"
جريتها وطلعنا،

ومن لحظه م طلعنا من البيت دة عبير ساكته لغايه م ركبنا العربيه واتحركنا ووصلنا البيت العبير ساكته ودمعتها جاريه وتهز في راسها لغايهه م وصلنا البيت، بقت ترجع شي اسود مخلوط بي دم،3يوم هي راقدة،حمة على صداع على غيرو ،انا خفت شديد من حالتها دي قلته ليها نمشي الدكتور ي زوله احسن ليك،كانت بترفض،وانا بصر، قالت لي الشيخ قال لي بتحصل ليك حجات زي دي م وقتي كدة لكن فيما بعد ،الزيني لما شاف حالتها شاكل وعمل موال وصل بيهو حد انو يقول لي امشي بيت اهلك م داير اشوف وشك في البيت دة ،قلته ليهو لو م شفتها بقت كويسه م بمشي بخليها،الحمدلله بعد ال3يوم دي اتحسنت،وحكت لي وليهو الحصل بالتفاصيل انا مش اقتنعت ومشيت معاها م كنت قادرة اصدق ابداً خليكم من الزيني...💔✅

.................
كنت مصدومه من فعل ماهر في المحكمه،كنت متوقعه إننا حنخلص اخيراً وربنا حياخد لي حقي من خالي بشكل غير مباشر،كنت راميه كل امالي في القضيه دي بس ماهر صدمني،في بت بتتمنى حبل المشنقه يتلف حوالين رقبه امها وخوالها؟انا اتمنيت كدة ي جماعه وزعلته شديد لما ماهر قال العفو،الحصل كان عكس توقعاتي،
م عارفه بعد الحصل دة انا حأعمل شنو،م بقدر اتكلم واحكي الحصل معي دة لزول،رغم اني عارفه انو المنجد الوحيد بالنسبه لي هو ماهر بس في حاجات الواحد م ينفع تطلع منو ولا ينفع تتحكي علشان الواقع بيتطلب منو كدة💔بس هل الواقع دة انا مفروض اتعايش معاه واتعامل معاه بشكل طبيعي؟يعني اتعامل مع خالي نور الدين عادي؟عادي؟ومع امي بعد العملتو فينا كمان عادي؟في بني ادم يقدر يعمل كدة؟؟؟💔

.......
عدة شهر من المحكمه وكان اسوأ شهر على مر الشهور العدت علينا،ماهر م كان تمام ابداً وانا م قادرة اعمل ليه شي،متأثر شديد بالموضوع لدرجه انو م بحب يتكلم عنو او تتجاب سيرتو حتى💔في يوم بالليل فجأة جرس الباب دق ،صحينا مخلوعين،ماهر طلع وانا وراهو فتح الباب واتفاجأنا بي إيليڤ في وشنا ،كانت بتبكي
ماهر قال ليها إيليڤ؟
إترمت في حضنو وبقت تبكي،
قفل الباب قال ليها بي لهفه في شنو مالك ؟
كانت بتبكي بي حركه،ماهر دخلها وبقى يسال فيها،جبته ليها مويه شربت وسبحان الله ماهر من حنيتو هي قاعدة في الكرسي وهو قاعد على رجلو في الأرض حتى بشربها مويه،قالت ليهو دايرة اقعد.معاك ممكن ي ماهر؟،م عايزة اقعد مع امي واهلها م بقدر اعيش مع الناس ديلك انا 😭💔 ،كانت بتتكلم وبتتنهد،
ماهر قال ليها تمام طيب بطلي بكى جايه من وين انتي اسي نص الليل دة؟
سكتت،
قال لي شهد واشر لي على الغرفه،
مشيت جهزتها وجيت قلته ليها تعالي،دخلناها الغرفه،
بعدها خليتهم وجهزته ليها عشاء وعصير وخليت معاها ماهر ❤

كنت مستاء شديد من وضع إيليڤ الكانت عليه،قلته ليها طيب ليه م جيتي من بدري ليه قعدتي دة كلو هناك طالما م قادرة تعيشي معاهم؟
قالت لي وهي بتبكي م كنت قادرة اخلي ازاد وراكان ي ماهر،هم لسه صغار واهل امي ديل كعبين انت م بتعرفهم والله زي م خالد باظ بسببهم خايفه ازاد وراكان يطلعو كدة،امي ضميرها ميت م عندها شغله بالبنعملو وانا زاتي م بقدر اعيش معاها والله العيشه معاها اهون منها الموت بس اخواني لسه صغار وانا م عايزاهم يتربو في نصهم وم قادرة اسوقهم لو سوقتهم امشي بيهم وين م عندنا زول نح...

قاطعتها وقلته ليها كيف م عندكم زول ؟انا هنا بعمل في شنووو؟انا م اخوك ولا مهند م اخوك؟
فكرك م حنقدر نخلي بالنا منكم ونعيشكم في احسن حال؟
سكتت وبقت تبكي
قلته ليه كدة اسي ارتاحي وروقي نتفاهم الصباح تمام؟
.........
جا راجع الغرفه رقد جمبي واخدني في حضنو وقال لي"شايفه ي شهد شايفه عقاب ربنا في الدنيا بجي كيف زي م قلته ليك؟

بعد يومين من الكلام دة...

ماهر انت مش عفيت؟المرة دي ممكن تتبلى فيك وتفتح فيك بلاغ تعدي اقعد ساي الله يهديك ،
زياد برجع ليك بعدين يلا سلام.

بعد 5 دقايق..
السلام عليكم ازاد وراكان جاهزين؟

خالد الفتح لي الباب قال لي ماشي بيهم وين؟
قلته ليه كيف ماشي بيهم وين؟مش اتصلته عليك وقلته ليك جهزهم لي جاي اسوقهم بيت ابوهم؟
قال لي اي بيت ابو ؟
قلته ليه بكل برود ناديهم بسرعه عشان انا مربوط بزمن
خالد فضل واقف
قلته ليه بنبرة حادة خالد؟؟!
قال لي هم قالو م ماشسن معاك
قلته ليه ناديهم
قال لي قلته ليك قالو م ماشين معاك ي زول انت م بتفهم؟
قلته ليه انا لو دخلته البيت دة البحصل م طيب وانت عارف كدة تفادياً للما طيب الحيحصل نادي لي عليهم احسن ي خالد
خالد قال لي م تهدد ي زول
قلته ليه بنفاذ صبر خالد وانا بعاين ليه!!
دخل وقعد مسافه وجا طالع معاه ازاد وراكان،قال لي اسمعهم بي اضانك

قلته ليهم ازاد راكان كيفكم؟
راكان على طول اتعلق في رقبتي،
قلته ليه مشينا؟
عاين لي خالد
قلته لي ازاد امشي العربيه لاحقك،بقى واقف وبعاين لي خالد بعد مسافه قال لي نحن م ماشين،
قلته ليه ازاد امشي العربيه اسمع الكلام انا لاحقك،
ازاد مشى قلته لي راكان يلا اللحقو انت كمان ،عاينو لي خالد مساااافه حتى نزلو،
قلته لي خالد قول لي امك وخالتك لو عندهم حق ياخدوهم بالقانون من بيت ابوهم الحيعيشو فيهو لانو قانونياً ماف زول بمنعوه من العيشه في بيت ابوه ماف قانون بمنع الحاجه دي عشان كدة اسي انا جاي سايقهم من قدام بابكم كدة ،وانت زاتك لو لقيت نفسك م مرتاح تعال بيت ابوك واسع حداد ومداد بشيلك وبخليك تشد حيلك وتسترجل شويه كدة اتفقنا؟؟؟ضربتو في كتفو وخليتو واقف نزلته✅💔
.........

ماهر جد مجنون،فجاة اتصل على خالد وقال ليهو جهز لي راكان وازاد انا جاي اشيلهم بكرة،واتصل على راكان وقال ليهو بكرة جهزو نفسكم انا جاي اسوقكم ،قدر م اتكلمته معاه وحنسته علشان دة تصرف متهور منو وممكن يدخلو في حته ضيقه م سمع لي اتضطريت اتصل على زياد واحكي ليه علشان يتكلم معاه💔
..............
اخدتهم ومشيت بيهم بيتي م نزلتهم من العربيه خليتهم قاعدين طلعته لقيت شهد وإيليڤ منتظرني ومتخوفين وملهوفين،
قلته ليها شهد اجهزي وادي معاك إيليڤ دي حاجه تلبسها عشان طالعين،
قالت لي وين؟
قلته ليها مشوار اجهزو وانزلو منتظركم تحت❤نزلته تحت اول م وصلته البوابه ازاد وراكان بقو يصرخو لي بصوت عالي ،راكان قال لي ازاد شغل العربيه تعال شوفو،مشيت ركبته معاهم وبقيت اتونس معاهم لغايه م شهد وإيليڤ نزلو فجاة ازاد قال ليها لووووفاااااا😍
قالت ليهو بي صرخه ازاااد راكااان؟
شهد وقفت وبقت تعاين لي،
إيليڤ قالت لي وااااي ماهر م بصدق جبتهم كيف ومتين؟وليه م كلمتني؟
نزلته فتحته ليهم الابواب ركبو ،إيليڤ قالت ليهم مشتاقين وربي ومسكت راكان وباستو
ازاد قال ليها م بالأكتر😑
قالت ليهو م مشتاق لي ي كلب؟
قال ليها لا انا زول كبير م بشتاق لي زول
ضحكت قالت ليهو انا اصلاً م مشتاقه ليك على فكرة انا مشتاقه لي ازاد بس😒
بقى يغيظ فيها بكلامو...

وصلته بيتنا الكبيرة نزلته ،إيليڤ قالت لي انت جايبنا وين؟
قلته ليها مش قولته ليك حتعيشي في بيت ابوك وماف زول حيقدر يسألك؟
بقت تعاين لي
قلته ليها تعالي ،
كنت سلفاً منبه عميالزيني اني حأجيب اخواني البيت عشان ينبه امي،
لما وصلنا البيت لقيناهم منتظرننا واستقبلونا امي وعمي الزيني ومرتو ،
م كان عندي اي احساس بي اني عايز اتعامل معاهم او ادخل البيت دة بس وضع اخواني وإيليڤ تحديداً اجبرني على كدة واثق انو قعدتها معي ممكن تخلي اهل امها يحاولو يعملو مشاكل على عكس قعدتها في البيت الكبير،

اخدته عمي الزيني على جنب وقلته لسه"ماف مكان حيكون مناسب ليهم احسن من هنا وهنا ماف زول بقدر يسالهم حتى بالقانون ،إيليڤ شبه واصله العمر القانوني يعني حتى لو دخلو المحكمه وخيروها حتختار القعدة هنا..
قال لي اصلاً البيت فاضي ونحن وعمتك على رجعه وامك براها يقعدو طوالي البيت بيتهم ودي اصح خطوة انا زاتي كنت حاعملها لو انت م عملتها وانت زاتك ومهند لو..

قاطعتو وقلته ليه انا م عندي رجعه هنا ،ومهند لو عايز يرجع الخيار في يدو اكيد

قال لي ي ولدي امك م تخلوها براها مهما حصل الله بسألكم منها

قلته ليهو ااابشر حق الله دة بنعملو ✅
رجعنا قعدنا وبقينا ناخد وندي في الكلام،بعدها امي قالت :والله جيتكم دي مكسب بالنسبه لي في البيت الكبير دة،بكرة الزيني يسوق مرتو ويخليني براي مع بتي الشغالهةفي البيت الكبير دة
عمتي مشتهي قالت ليها والله صحي بملو ليك البيت الكبير دة💔

كنت بعاين لي امي ومستغرب في تفاعلها وتقبلها لجيتهم بي بشاشه ومبسوطه كدة،احساس انو دي م امي الكنت متوقع اشوف منها عكس كدة
............
ونحن طالعين ماهر اخد إيليڤ على جنب وبقى يتكلم معاها قال ليها"دة بيت ابوك يعني بيتكم،م تخافي ماف شي بجيك هنا وماف زول حيقدر يعمل ليك شي،لو احتجتي لي اي شي اتصلي علي ولو حصل ليك اي شي برضو اتصلي تمام؟
هزت ليهو راسها بمعنى سمح
قال ليها خلي بالك من نفسك ومن ازاد وراكان تمام؟
قالت ليهو طيب
طلع ظرف من جيبو اداها ليهو قال ليها هاك دة خليهو معاك واذا نقص ليك شي اتصلي او رسلي لي رساله ❤

قالت ليهو حاضر🌻❤
قال ليها بتصل عليك بعدين يلا خلي بالك زي م قلته ليك❤🌻

سمعته الكلام دة وانا واقفه بعاين ليه انا فعلياً مبسوطه اني مرت ماهر او انا مبسوطه لاني اتزوجته الراجل دة انا فخورة بيه شديد واشد من شديد حتى يعني تخيلي تكوني متزوجه راجل كل مرة ببهرك بي حكمتو ورجولتو ،راجل هيبه،مسؤل،عاقل وواعي لكل خطوة بعملها ما عندو شي بخاف منو يعني راجل بمثل المعنى الحرفي والفعلي للكلمة دي بحق وحقيقة انا بقيت متنحه وبعاين فيه بس🙈❤بعد م رجعنا البيت اول حاجه عملتها اول م وصلنا إني حضنتو بكل قوتي وانا ساكته،
ضحك قال لي روقي روقي في شنووو؟
قلته ليه كدة بس من غير مناسبه حاسه نفسي عايزة احضنك وخلاص🙈❤
ضحك وقال لي بس كدة؟تمام حقك ي ستي واهو حضناك ي ستي وحاوطني بيديه❤
قلته ليييه امممم ماهر
قال لي ايوة❤
قلته ليه لاحظته لي عمتو انبسطت كيف لما جبته ليها إيليڤ وازاد وراكان؟
سكتت
قلته ليه سبحان الله كأنها ردت فيها الروح ❤
فضل ساكت
قلته ليه بتتصل على مهند دايماً وبتاخد وبتتدي معاه في الكلام اطول فترة ممكنه بتقول قاعدة تتصل عليك م قاعد ترد💔

قال لي بكون مشغول بس عشان كدة💔
قلته ليهو طيب ارجع ليها حتى لو مشغول💔

اختصرني وقال لي طيب حاضر❤🌻
.........

سألته عمي الزيني عن العمارة الاتقتل فيهاةابوي اذا اتباعت او لا،واكتشفت انو معتصم كان عايز يبيعها وم لقى اوراقها لأنو امي م ادتها ليهو✅هنا دي حاجه كويسه شديد بالنسبه على طول اتصلته على عمي الحاج بتاع العقار وقلته ليه..
لازم اشوفك ضروري ي عمي✅

وانا في عز انشغالي جاتني مكالمة من زياد قال لي فيها...
ي ماهر ياخي صدقني القضيه دي حنكسبها حنكسبها وحنرجع الشركه انت بس اتعاون معانا لغايه م نظبط الناس دي،

زياد للمرة المليون الشركه دي انا غسلته ورفعته يدي منها م عايز ادخل في جرجرتها مرة تانيه انت ليه م عايز تفهمني؟ياخ افهم الشركه دي يشهدالله لو بقت قبله انا م راجع ليها تاني ودة اخر كلام عندي .
ياخي دي شركتك دايرين نرجعها ليك مخليها لمنو؟
م شركتي كانت شركتي ونصيبي الفيها بعتو وم عايز ارجع ليها تاني منتهي ي زياد الله يرضى عليك م تضغط علي ولو عايز تتصل علي بخصوص الموضوع دة تاني م تتصل

زياد ومنذر رفعو قضيه في عمي معتصم وعزو،طلبو مني اتدخل بس رفضت لأني سلفاً مقرر اني م اتدخل في شي بخص الشركه دي
...................
في يوم وانا في بيتنا مع امي ،حننتني وقعدت تسر لي في شعري فجاة جاتني مكالمة ،قلته ليها اكيد دة ماهر عايز يقول لي اجهزي جاي عليك دقيقة ي ماما علشان عارفاه م م بصبر،مشيت شلته التلفون كان رغم غريب فتحته الخط سمعته صوت بقول لي"شهد،اللحقي ماهر ي شهد واااااي قتلو ي شهد قتلو،
بقيت برجف وانا بقول في شنو ؟ماهر؟الووو؟
ماما بقت تقول لي مالك؟
بقيت متجمدة مكاني وسامعه صوت صريخ وجوطه وناس بتقول امسك لا ،امسكو م تخليه حيطعنو،حيطعنو وصوت الصريخ
في اللحظه انا هبطته بقيت اقول بي خلعه"الووووو؟
الوووووووو؟في شنو؟منو معي؟؟منو معي؟
بقيت اصرخ
ماما قالت لي في شنو؟
قلته ليها ماهر ي ماما ماهر
قالت لي مالو ماهر؟
بقيت برجف كلي على بعضي والخط قفل،
بقيت اتصل على ماهر م برد،رجعته في الرقم م برد الا بعد 10 دقايق،
قلته الوو؟منو معي؟
قالت لي معاك فاطمة ي شهد
قلته ليها فاطمة؟
قالت لي وااااي ي شهد من الحصل الليله
قلته ليها بحيل مهدود في شنووو؟
قالت لي ماهر جا هنا ووقع في حسام ضرب وحلف إلا يقتلو
قلته ليها شنوووو؟كيف يعني؟
ماهر وين اسي؟
قالت لي ماهر في القسم اجري تعالي
قلته ليها بي صرخه في القسم؟قتلو؟
قالت لي لالا لكن اجري تعالي،
قلته ليها اي قسم؟
قالت لي قسم ال...
جريت لبسته توبي وماما بتنادي علي وبتقول لي في شنو؟في شنو ي بت؟
قلته ليها وانا في الباب ماهر قال مشى ضرب حسام واسي في القسم،قالت لي وووووووووبعلي الوداه ليه شنو؟

وصلته القسم وانا رجولي م شايلاني،اول م دخلته لقيت فاطمة في وشي قلته ليها فاطمة في شنو؟ ماهر وينو وعمل شنو وحصل شنو اساساً؟؟
قالت لي م عارفه م فاهمة شي اساساً بس ماهر فجاة جا ووقع فيهو ضرب اظن وحسام شال ليه السكين ،
قلته ليها ماهر وين؟
قالت لي هنا واشرت لي على باب كدة ،مشيت بسرعه لقيت الباب فاتح وماهر كان بقول"ي سعادتك الزول دة ليه فترة برسل لي رسايل م تمام واتجاوز كل حدود الوقاحه دة فاقد تربوي انا ربيتو وجبتو معي هنا عشان يتربى بالقانون
الضابط قال ليهو يعني انت ضاربو الضرب دة وم مخلي فيه حته سليمه وجاي بعد دة كلو تشتكي عليهو؟

ماهر كان غضبان شديد قال ليهو هو كان صح كان جا براهو اشتكى لكن طالما هو غلط الضرب دة بسيط عليهو وأحمدو الله انو انتو لقيتو حي اساساً

الضابط قال ليهو طيب الزول دة وضعو صعب واسي بنزف كلو يعني انت المتعدي كدة قول لي وفهمني الزول دة عمل ليك شنو؟

ماهر سكتت وم رد،
دقيت الباب ودخلته على طول قلته ماهر؟؟في شنوووو؟؟
قال لي بنبرة حادة شهد؟الجابك شننو هنا؟

ماهر طلعني برة ،انا بعاين لي شكلو وم قادرة

اتكلم لأني مهبطه وحيلي م شايلني،
قلته ليه مالك ي ماهر؟مالك مع حسام؟
قال لي خليك هنا لمن اجي

دخل للضابط وقعد معاه ربع ساعه حتى جا طالع قال لي تعالي،ساقني وركبني العربيه واتحرك،
قلته ليه ماهر في شنووو؟بتكلم معاك انا رد مالك مع حسام"قلتها ليه بصرخه وهو ساكت"
قلته ليه م تجنني رد
م كان بتكلم ساكت و سايق بكل عصبيه وعروق جسمو دي كلها ناطه لمن برجف،وصلنا البيت قلته ليه حتقول لي في شنو ولا يفتح الله؟
م رد شلته التلفون من يدو وفتحته النمط ،فتحته الرسايل الSms لقيت رسايل من رغم كلها نبذ وإساءة وكلام فارغ اخر رساله منو لقيتو كاتب ليه فيها"انت كان راجل ارفع حظر الواتساب عشان اسجل ليك كلامي دة تسمعو عديل، ،ماهر عايز يشيل التلفون زحيت منو قلته ليه دقيقه،فتحته الواتساب وبقيت افتش لقيت نفس الرقم بتاع رسايل ال Sms مرسل هنا وم مسجل فتحته الشات وبقيت بقرا في الرسايل،كانت كل الرسايل تاريخها قديم وقديم شديد ،بديت اقرا في الكلام، كان كلو كلام عني انا،حسام كان ببرسل لي ماهر وبحكي ليهو عني وعن علاقتو بي زمان قبل العرس وعن اي تفصيله كبيرة وصغيرة حصلت بيناتنا بكل وقاحه وحتى عن علاقتنا نحن لما كنا متزوجين بدون مبالغه حتى تفاصيل البحصل بينا اللي هي علاقتنا الزوجيه في السرير كان كان كاتبها ليه وتفاصيل جسمي بالنقطه والشوله وكلامو كلو كعب ومقرف يعني م كلام زول طبيعي ابداً وكمان برسل ليه معاها إيموشنات ضحك ،عاينته لتاريخ الرسايل دي واتزكرته الفترة دي ،فترة الرسايل دي مالوفه عندي وم غريبه ،م غريبه ابداً،بعد حاله ذهول لحظيه رميت التلفون من يدي وانا بعاين في الأرض وبعاين لي ماهر وهو واقف ومن الغضب برجف،سكتت مسافه وقلته ليه معناها لما كنت متغير مني قبل فترة وم بتتكلم معي ولا حتى بتقبل تقرب مني ولا بتطيق تشوف خلقتي م كان عشان القضيه حقت ابوك وضغوطاتها ولا عشان انت متضايق من القضيه عشان حسام صح؟صح ي ماهر؟
انت اتغيرته مني قريب الشهرين وم كنت بتتكلم معي الا ترد لي سؤال بطرف لسانك وم بشوفك الا في اليوم مرة وكنت بتتنرفز فيني وانا كنت ممشياك وفاكرة انك مضغوط علشان القضيه ومستحملاك رغم السؤ الكنت بتعاملني بيه وانت كنت بتعمل كدة بسبب الكلام الفي التلفون دة صح ي ماهر؟
دموعي جات جاريه قلته ليه:
جاوبني انا بتكلم معاك
فضل ساكت
قلته ليه ماهر انا بتكلم معاك م تسكت انا م بسألك عشان تسكت
قال لي تعالي قدامي يلا ،فضلته واقفه وساكته بعاين ليه مسكني من يدي وقال لي انا بتكلم معاك،مشيت قدامو فتح الباب نزلنا لاقينا مهند في باب العمارة،قال لينا وين وين؟؟ماهر م رد عليه وانا اصلاً م كنت قادرة اتكلم فتح لي الباب ركبته وهو ركب،اتحرك بالعربيه ،
قلته ليه ماهر
قال لي م عايز اسمع ولا كلمة ي شهد في اللحظه دي ممكن!؟وضرب الدركسون بي يدة بكل غضب ،
سكتت وانا دموعي جاريه وبعاي?

.....

قال لي م عايز اسمع ولا كلمة ي شهد في اللحظه دي ممكن!؟وضرب الدركسون بي يدة بكل غضب ،
سكتت وانا دموعي جاريه وبعاين للحاله الهو فيها لفيت وشي منو وبقيت اعاين بالشباك وبقيت ببكي وسرحانه
فجأة وقف العربيه و قال لي انزلي!!!
ركزته انتباهي لقيتو موصلني بيتنا ،
بقيت اعاين ليه
قال لي انزلي ،
قلته ليه ماهر انت جايبني بيتنا؟
قال لي انزلي ي شهد، انزلي امشي بيت اهلك ،
بقيت اعاين ليه وانا ساكته ومصدومه جد
قال لي بي غضب قلته ليك انزلي امشي بيت اهلك ي شهد م بتفهمي انتي...💔✅

.......

#إقتباسهه

عليك الانعزال والانطواء والبكاء وممارسة كل طقوس الحزن لأجل مايؤلم روحك؛ تأكد ان كل مايؤلمك وصل الي قلبك فلا تعتني بكل شخص يستهين بحزنك او يشعرك بأنه لا يستحق..🔕احزن بكل طاقتك حتى اذا خرجت منه لا تلتفت وراك ابدااا🌸💕

#ذات_عناق
#الجزء_التاني
#حلقه_44
قال لي بي غضب قلته ليك أنزلي امشي بيت اهلك ي شهد م بتفهمي انتي؟؟
مسحته دموعي وقلته ليه طيب تمام ي ماهر بس خليك على علم انا لو نزلته من العربيه دي ومشيت بيت اهلي م تفكر تجي تسوقني منهم تاني ،
فضلته قاعدة وانا منتظرة منو اي ردة فعل بس حتى م فكر يعاين لي بالعكس سكت وهو ماسك الدركسون،
الجواب كان واضح نزلته من العربيه وقفلته الباب بكل قوتي واتحرك قبل م ينتظرني ادخل حتى على عكس عادتو،
طلعته وانا م شايفه قدامي وببكي حتى السلالم دي م عارفه روحي طلعتها كيف ، ماما اول م فتحت لي الباب قالت لي مشيتو وين انتو؟والحصل شنووو؟منذر دة لحقكم الحصل شنو راجلك مالو مع الولد؟
كانت بتتكبم بي خلعه وانا دموعي في عيني
مسكتني قالت لي ي بت بتكلم معاك في شنو؟؟؟
قلته ليها ماف شي
قالت لي كيف يعني ماف شي؟ماهر مالو مع حسام والحصل شنو وانتي مالك بتبكي اتكلمي ي بت؟؟
قلته ليها ماما انا م قادرة اتكلم عليك الله خليني بس اللحظه
دي
قالت لي لا م بخليك الا تفهميني ماهر وين؟
إتفكيت منها ودخلته غرفتي ورقدته في السرير وبقيت ابكي،وهي تشيل وتتكلم معي في النهايه قالت لي انا بتصل على ماهر دقيقة طلعت من الغرفه...
..................
ي ولدنا الزول دة زي م نحن شايفين هو المتضرر منك م انت ..
ي سعادتك الزول دة انا متضرر منو عندي كم شهر تمام
طيب ليه م جيت فتحته فيه بلاغ طالما متضرر منو؟
م كنت لامي فيهو،م كان قاعد في بيتهم ،انا عندي كم شهر بمشي بيتهم دة اكتر من ميه مرة بس هو م راجل عشان يقعد زي الرجال ويعمل الكان بعمل فيهو دة ✅
طيب يعني اسي م عايز تسحب البلاغ دة نهائي؟
لكن الزول دة راسو كلو مربط شاش لو..
قاطعتو وقلته ليه ي سعادتك الزول دة لو طلع من هنا م حيسلم مني برة ✅
م كنت شايف قدامي ،ولا حاسي بنفسي واعي للأنا بعملو والممكن اعملو ومتأكد تماماً إنو الزول دة لو طلعوه من القسم م حيسلم مني ابداً واهلو م حيقدرو يتخذو ضدي اي اجراءات لأنهم عارفين ولدهم غلطان ✅
طلعته من القسم وطلعته تلفوني لقيت كميه من المكالمات من طه ومنذر وزياد
رجعته لي زياد م رد بعدها رجعته لي منذر ورد وقال ..
ي ماهر
اي ي منذر..
،في شنو ي زول وانت وين ومالك م بترد على مكالماتنا؟
انا ماشي على البيت
جاي علينا يعني؟
لا ماشي على البيت بجي عليكم بكرة الزمن إتأخر
قال لي انت متأكد إنك كويس ي زول؟
قلته ليه لالا انا تمام ي منذر والله.
قال لي جاي عليك،
م كنت في وضع يخليني اتكلم مع اي زول ولا اتفاهم معاه سواء كان من قريب او بعيد لما عرفته منذر جاي علي م رجعته البيت وقفلته تلفوني.
عديت يومين وانا قافل تلفوني وم طايق زول وحتى مهند في البيت م كنت متجاوب معاه،سألني مالك مع شهد؟لما م رديت عليه طلع..
جا زياد البيت وحاول يتكلم معي ويفهم مني الحاصل قلته ليه بي عصبيه ونفاذ صبر زياد م تفتح الموضوع انا لو شايف انو ممكن يتحكي كنت حكيت ليك من غير م تسأل، زول غلط علي وانا شوفته شغلي معاه بس ✅✅قال لي طيب شهد وين؟
بعد سؤالو لي عن شهد حتى راجعته نفسي بخصوصها في اللحظه ودة كان اليوم التالت من المشكله، بتفكيري في شهد وأخر كلامها القالتو لي لقيت نفسي بديت اطلع من الحاله الأنا فيها شويه شويه،بس هل انا ندمان لأني عملته كدة؟
لأ ابداً..
اخدته بعضي وعلى طول مشيت على بيتهم الساعه كانت 44عصر "الجمعه" ،لما وصلته البيت إستقبلني منذر واول حاجه قالها لي لما شافني ماااااهر؟؟ مالك ي زول في شنووو وانت وييين؟وتلفونك دة جادعو وين؟لا بترد ولا بترجع ولا بتتلقي في البيت
قلته ليه انا تمام!!!
قال لي تمام شنو ي زول م تمام ولا اي شي والله حيرتنا كدة ادخل نتفاهم،
دخلته لاقتني عمتي من المدخل مااااهر ي ولدي،مالك في شنو؟والحاصل شنووو؟والله قطعته قلوبنا انت كويس ان شاءالله؟
قلته ليها ماف شي ي عمتي انا تمام الحمدلله 🌻
قالت لي كيف يعني ماف شي؟مالك مع حسام اللماك معاهو شنو ؟
قلته ليها عمتي روقي ماف شي ،مشكله بسيطه وإتحلت
قالت لي مشكله شنو ي ولدي؟اللماك شنو مع العواليق الفقر دة ؟ومنذر دة مشى ليكم في البيت اكتر من مرة ،اكتر من مرة وقال ماف زول بفتح الباب ،كتر خير مهند الطمنا عليك لو م كدة والله كان راسنا شطب
سكتت
منذر قال ليها امي خلاص عليك الله م تكتري اسئله بعدين بعدين كدة خلينا نقعد اول ..
قالت ليهو كدة اجيب ليهو مويه واجهز ليهو غداء
قلته ليها لا ي خالتي والله م عايز على مشيه،
شهد موجودة صح؟
قالت لي اي قاعدة في غرفتها لكن كدة اتغدأ اول اسي نحن اتغدينا قدامك
قلته ليها ي عمتي انا متغدي والله م عايز شي الله يديك العافيه❤🌻بس كلمي شهد خليها تجهز عشان نمشي،
قالت لي ي ولدي كيفن الكلام دة؟سمح اشرب حاجه طيب حتى بعدين امشو..
.ٌ...........
ماما جاتني في الغرفه فجأة،قالت لي شهد ي بت قومي راجلك جا برة ،اطلعي سلمي عليهو ،وبعدين اجهزي عشان تمشي معاهو ❤
قلته ليها انا م بطلع اسلم عليهو ولا زفت وم ماشه معاهو✅
قالت لي اجي ي بت في شنو كدة ق

ولي بسم الله مالك كمان؟جاوبيني عندي كم يوم بسألك السؤال دة وانتي سااااكته اوووعى يكوني حسام كان برسل ليك عشان كدة ماهر ضربو؟
قلته ليها بنبرة حادة امي انتي بتفكري فيني كدة؟
قالت لي اها مالك مع راجلك ي بتي؟وهو مشى ضرب الولد لشنو لا انتي دايرة تقولي لا هو داير يحكي ي بتي م تدسي مني شي عشان كان في شي نحلو ونعرف نتصرف
قلته ليها ماف شي دي مشكله بيني وبينو وماف زول يتدخل فيها انتهينا✅
قالت لي سمح طالما دة قولك ودة اسلوبك تقومي تمشي تحليها معاهوفي بيتكم اسي
سكتت
جابت لي التوب والشنطه قالت لي قومي يلا امشي مع راجلك واتفاهمو براحه لو حصل بينكم شي اقعدو حلوهو بالهداوة
قعدته في نص السرير وشلته التوب والشنطه رميتهم في السرير التاني وقلته ليها م ماشه يعني م ماشه كلامي واضح ✅✅
قالت لي بنبرة حادة والله امشي اكلم منذر يجي يشوف شغلو معاك لأنو دي قلة ادب فارغه منك بس م اكتر الدلع البتسوي فيهو دة كان زمان اسي انتي بت متزوجه تصرفات الشفع دي م بتنفع حكمي عقلك دة وختي الرحمن في قلبك وخليك مسؤله وبطلي البتسوي فيهو دة ،كان اي واحدة بتختلف مع راجلها بتسوي جنس عمايلك دي وبتقول م راجعه معاه كان الدنيا خربت ،قالت كلامها دة وطلعت خلتني ✅💔
امي م بتفهمني وم حتقدر تفهمني ابداٌ،انا موجوعه شديد من تصرف ماهر معي،والواجعني اكتر اني هنت عليهو ،حتى م فكر يراجع نفسو ويرجع يتكلم معي ولا حتى فكر يرفع سماعه التلفون ويتكلم معي ويعرف حالي كيف وهو عارف الحاجه دي ممكن تأثر علي قدر شنو،وعارف إنو انا م حتغمض لي عين بسببو وفعلاً دة الحصل بس هو انانيتو طاغيه طاغيه شديد وم بفكر غير في نفسو😭😭💔كنت بفكر بيني وبين نفسي وببكي
بعد 5دقايق وانا قاعدة في نص السرير ومغطيه وشي بي يدي وببكي من كلام حسيت بالباب فتح،
اتوقعته اسمع صوت منذر زي م قالت امي انها حتكلمو بس العكس،
سمعت صوت ماهر وهو بقول لي بصوت خافض شههد❤فضلته ساكته لغايه م حسيت يدو في كتفي اتنفضته منو ورفعته راسي وقلته ليه م تهبشني،اوعى تهبشني ،
بقى يعاين لي مسااااقه بعدها قال لي انتي كويسه؟؟
لما م رديت عليه قال لي قومي خلينا نمشي البيت!!
كنت مقررة اسكت ون اتكلم معاه بس كلامو هنا استفزاني
قلته ليه بيت؟؟؟
اي بيت الانت جاي تسوقني ليه بعد 33يوم دة ؟انت الجابك هنا شنو اساساً؟
مد يدو وقال لي شهد..
نزلته من السرير وانا دموعي ماليه عيوني قلته ليه ماااا شهد،مااا شهد ي ماهر وم تمد يدك دي و..
قبل م اتم كلامي مسكني حضني وقال لي لزيتو وقلته ليه قلته ليك م تمد يدك دي وتقربها مني م تقرب مني إياك انت فاكر نفسك براك بتعرف تقرف؟اسي انا قرفانه منك ومن خلقتك دي وم طايقاك ابداً ي ماهر
قال لي طيب نمشي البيت نتفاهم وقولي العايزة تقوليه هناك
قلته ليه عاين انا م كيفك ولا مزاجك وقت م عايز تجيبني ترميني في بيت اهلي ووقت م عايز تجي تسوقني،قبل يومين لما كنت بسأل فيك وبقول ليك ي ماهر ما تسكت و جاوبني مش اخترته تسكت؟مش قلته ليك لو نزلته من العربيه دي م تجي راجع تسوقني وبرضو اصريت على موقفك؟
عايز شنو انت اسي؟عايز تتفاهم معي بعد م طرته ارضيت حماقتك؟يلا انا بعد كدة م عايزة معاك اي تفاهم امشي كمل الكنت بتعمل فيهو وخليهو ينفعك
ضغط عيونو بأصابعو وقال لي بحيل مهدود انتي م عارفه شي تمام انا...
قاطعتو وقلته ليه لا عارفه،مش القرف البرسلو ليك حسام دة ولا غيرو؟طيب جاوبني انا ذنبي شنو في قرفو وبطالتو؟ليييه تتعامل معي كاني عملته معاه شي بالحرام وكأنك م كنت عارف شي؟ ،قبل م تتزوجني مش كنت عارف إنو انا كنت متزوجاه ولا لأ؟كنت عارف ولا لأ سألتك انا رد؟الكلام الكاتبو ليك دة مش ياهو البحصل بين اي اتنين متزوجين؟الزول دة انا عندي منو قسيمه ن كنت عايشه ولافه معاه ساي علشان تقرفني بسببو،وبعدين تعال هنا وانت احتفظته بكلامو دة كلو ليه؟م حذفتو ليه؟كنت بتقراه علشان تزيد حماقتك و تقرف مني انا صح؟صح ي ماهر؟
قرب مني تاني عايز يضمني لزيتو وقلته ليه م تقرب مني قلته ليك واطلع برة بيتنا ي ماهر ،
رجع كم خطوة ورا و
طلع مشى..
بعدها قدر م امي ومنذر حاولو يتكلمو معي علشان يفهمو مالنا والحاصل بينا شنو ابيت اتكلم المشكله كانت م بتتحكي اقول ليهم شنو يعني؟الكلام الكاتبو حسام لماهر؟كدة ي دوب ولعته المشكله زيادة ومنذر وانا بعرفو حيكبر الموضوع اكتر من ماهر وممكن يحصل اكبرمن كدة،وصلته الحد في النقاش مع منذر لدرجه إني في الاخير قلته ليه دي مشكله بيني وبينو انت م تدخل وكان عايز يضربني بس امي دخلت في النص،وحكت لبقيه اخواني حسام ومؤيد ومجتبى وعملو لي موالات مكالمات واسئله وتحقيقات
.......................
شهد ردة فعلها على قدر م إنها كانت طبيعيه على قدر م إنها صعبت علي الموضوع شديد،انا لما اخترت اوديها بيت اهلها لأني م كنت في وضع يخليني اقدر اتعامل معاها في اللحظه ديك ، انا واحد من اللي لما يغضبو م بشوفو قدامهم وفي لحظه ممكن يخربو اي شي عشان كدة على الأقل محتاج مساحه عشان اقدر احكم عقلي وتصرفات

ي واقدر اضبط نفسي واهدأ ودة م معناها إنو هي غلط وانا بعاقبها لأ ابداً بس انا خفت عليها مني ف فكرة إنها تكون في بيت اهلها كانت بالنسبه لي اضمن من إنو تكون قدامي في البيت والحاجه دي كانت في صالحنا نحن ال2 هي محتاجه تهدأ وانا كمان ودي خطوة بالنسبه لي كانت إنها بتخفف علينا نحن الإتنين ،اخر مرة مشيت بيتهم منذر كان عايز يغصبها على الجيه معي بس انا رفضته قلته ليه خليها طالما هي م عايزة تجي برضاها خليها تاخد راحتها ووقتها ❤💔
..........
إتصلت علي مناسك واظن ماما حكت ليها انو انا عندي مشكله مع ماهر وم عايزة ارجع البيت وطلبت منها تتكلم معي،
م كنت عايزة احكي ليها بس هي ضغطت علي علشان تفهم المشكله ف بديت احكي ليها وابكي،
قالت لي وااااااي لكن م قادرة اصدق إلهي تتحرق بجاز وسخ ي حسام الكلب ،وااااااي فظيع دة مريض مستحيل يكون طبيعي في راجل بعمل كدة؟
فضلته ساكته وانا ببكي
قالت لي بسس
على فكرة ي شهد تصرف ماهر رجولي شديد وسليم ولو م كان عمل كدة حرفياً كان بنطبق عليه لفظ الباطل البنقولو دايماً دة،شهد انتي مرتو يعني عرضو وماف راجل بستحمل اياً كان وإن كان طليقك حتى يعاين ليك بطرف عينو ساي لضفر من ضفورك خلي من انو يرسل ليهو حجات زي دي عنك ،احمدي ربك انو م انتحر بيهو ،دة تصرف طبيعي منو واياً كان العملو بسبب الحاجه دة انا شخصياً شايفاه م مفروض يتلام عليه انتي متخيله معي ختي نفسك مكانو مرتك يجي واحد زي حسام يكتب ليك عنها كلام زي دة وحجات مقززة زي دي،انا اتخيلته نفسي مكانو ساي يشهد الله عايزة اركب طيارة وامشي انتحر بحسام،دي حاجه بتهز الما بتهز وم ليها علاقه بالثقه او الحب او غيرو دي حاجه بتمس رجوله الراجل ي شهد اسي جربي اتصلي على حسام احكي ليهو الكلام دة بالتفصيل صدقيني صباح يوم بكرة حتلقيه عندك، ولا اقول ليك خليك من حسام كدة اطلعي قولي الكلام دة لي منذر صدقيني نهايه اليوم منذر حيكون في القسم ومتهم بجريمة قتل،الحاجه دي حارة شديد لأي راجل قلبو حار✅💔
بقيت ساكته ودموعي جاريه..
قالت لي شهههد افففففف اسمعيها مني الموضوع على قدر م إنو بزعل بس انا لو مكانك بنبسط لأنو عندي راجل قلبو حار علي كدة ودة من حبو الشديد ليك ي شهد افهمي ،عارفه غيرتو دي ممكن توصلو مراحل ابعد من كدة ،وحسام دة اصلاً هو باطل وانتي عارفه كدة من مواقفو الزباله معاك،تتزكري ي شهد لما كنتِ حامل وضربك وخلاك مرميه في مكانك الا فاطمه اتصلت على ماهر جا ساقك وداك المستشفى،
تتخيلي ي شهد لو دة ماهر كان حيخليك بالحاله ديك؟حيسكت على تعامل امو الرف معاك؟
لأ ي شهد،خليك عاقله وواعيه وافهمي انتي عندك راجل رجولتو بتسد عين الشمس ودة عوض ربنا بعد م ابتلاك بي واحد الله جابو في الدنيا دي بس بي إسم ذكر ساي✅✅💔
قفلته منها وقلبي واجعني اكتر وزدته في البكى
انا عارفه إنو موقف ماهر يمكن صح بس برضو م قادرة اتجاوز حته انو انا هنت عليه،هنت عليه الايام دي كلها ، كان موقفي ممكن يتغير لو جا راجع نهايه اليوم واتفاهم معي،كان ممكن يتغير لو حتى رفع سماعه التلفون وغض نظر عن الحاصل بينا وحاول يتطمن علي بس هو لا عدة الكم يوم ديل عادي عادي شديد ف معناها زي م هنت مره حأهون الف مرة جايه اكيد😭💔
وانا نايمه صحيت بصوت ماما بتصحي فيني وبتقول لي شهد،ي بت شهد ،فتحته عيني مخلوعه قلته ليها في شنو؟
قالت لي هاك ختت لي التلفون،قلته ليها منووو؟ طلعت وهي ساكته
شلته التلفون م عاينته للرقم ختيتو في اضاني وقلته الوو؟
سمعت صوت بقول لي "حبيبي "سكتت وانا قلبي عايز يطير من الكلمة دي
قال لي شهد،صوتو كان مبحوح،قال لي اتوقعته اي شي بس م اتوقعته ابداً تعدي علينا ايام نصل للمرحله دي ،يعني كانت ممكن تهون لو كنا على نفس الموقف دة في بيت واحد،م طايقاني م حأخليك تشوفيني،وم حتسمعي صوتي بس المهم تكوني موجودة في البيت ،شهد انتي عارفه وجودك بفرق فرق السماء عن الأرض في حياتي صح؟طيب ممكن تبطلي عناد وركوب راس بعد كدة وتخليني اجي اسوقك؟انا كل يوم بقعد احسب الساعات عشان الأيام دي تعدي وم حاسي بي إنها ماشه ابداً،
فضلته ساكته وانا بسمع في كلامو وببكي بس م محسساهو إني ببكي💔
قال لي فهمنا انك زعلانه وم طايقه وشي ولا حتى سماع صوتي بس من حقي اتطمن عليك ممكن تفتحي تلفونك؟ممكن لما اتصل تفتحي الخط حتى لو م حتتكلمي انا عايز اتطمن وفتحه الخط دي حتطمني ممكن ي شهد تعملي الحاجه دي لغايه م حالنا يتعدل ونرجع؟❤💔
قفلته الخط واتفقعته بكى ،انا مشتاقه ليه مشتاقه ليه شديد بس برضو م قادرة اتجاوز العملو ابداً😭❤💔
،الصباح وانا شغاله بنضف وبمسح في البيت فجأة جرس الباب ضرب وعلشان انا م لابسه دخلته غرفتي اشيل توب جيت لقيت ماما بتقول:
اهلاً وسهلاً اتفضلي،اتفضلي ي بتي كيفك ان شاءالله طيبه واتفاجاته بي فاطمة في وشي،هي زاتها اتفاجأت لما شافتني في وشها قالت لي بي دهششه شهههد؟انتي هنا؟وجات سلمت علي بي حرارة وحضنتني وماما من وراها مُكشرة وشها وبتعمل لي حركات،
فاطمة قالت لي كيفك وكيف ا