سب بتاتی ہیں ان کہی ، آنکھیں
دل کی کرتی ہیں مخبری، آنکھیں

جھانک لیتی ہیں دل کے اندر تک
جب بھی ملتی ہیں باہمی آنکھیں

اک غزل آج اُن پہ کہہ ڈالوں
کہہ رہی ہیں وہ جھیل سی آنکھیں

ہے خبر، لوٹنا نہیں اُس کو
پھر بھی ہیں راہ دیکھتی، آنکھیں

جاگ جا اب تو چھوڑ دے غفلت
کھول اپنی تُو آدمی ، آنکھیں

در حقیقت ہمارے اندر کی
بس دکھاتی ہیں روشنی آنکھیں

رب کی قدرت کے نقش دیکھیں ہم
اس کے کارن ہیں یہ بنی آنکھیں

اُن میں کچھ بات ہے الگ یوسف
ورنہ دنیا میں اور بھی آنکھیں
#Poetry
@HamariUrduPiyariUrdu