#ከጥበብ በላይ !!

(ሚካኤል አስጨናቂ)

።።።።።።።።።።።።።።።

አጃኢብ ያረቢ!

አጃኢብ ያ ጎፍታ !

መገን ያንቺ ውበት

መገን ያንቺ ዝና...

የገላሽ ፍምነት ፥ የቁንጅናሽ ፋና

ደግሞ ተለኮሰ!

ጠዳል ብርሀንሽ ፥ ባገር ተዳረሰ።

ይኸው መጣን ደግሞ!

ጠበብት ተሰብስበን 

ብዕር ተሸክመን...

ቀለማት በጥብጠን..

አንደኛው ሊፅፍሽ

ሌላኛው ሊስልሽ

ውበት ቃኙ ብለን ፥ ልናውጅ ለ'ዓለሙ

ነጋሪት ልንጎስም ፥ ስላንቺ ላልሰሙ።

እንችል ይመስል.. .

በብራና ጥራዝ ፥ በቅርፆች ማህደር

ስላንቺ መናገር!

እንችል ይመስል.. .

በሸራ ላይ ስዕል ፥ በሙዚቃ ቃና

መንገር ያንቺን ዝና!

እንዲያው ለሙከራ

እንዲያው ስለደንቡ

እንያዝ ብለን ወጉን

የገጣሚ ልኩን...

ስንኝ ልንቋጥር ፥ ሆሄ ልናስመታ

እንገልፅሽ ይመስል ፥ በቃላት ጋጋታ

እንዲያው ለሙከራ

እንይ ብለን ወጉን

የአዝማሪ ልኩን...

ቀይ የወደደና ፥ እባብ የነደፈው

እያልን በዜማ ፥ ውበትሽን ልንገልፀው

እንዲያው ለሙከራ

እንዲያው ስለደንቡ

እንያዝ ብለን ወጉን 

የሰዓሊ ልኩን...

በውድር ሸራ ላይ ፥ ስለናታል ልንል

ገፅታሽ በቀለም ፥ ይገለፅ ይመስል

ይኸው መጣን ጠበብት!

ይኸው መጣን ሊቃን !

ሞልቶልን ባንገልፅሽ...

ሞከሩ ለመባል ፥ የፈጠረሽ ያብቃን ።

አሜን 🙏

@getem
@getem
@getem