#አዲስ_ቀን_ይመጣል
እስከዚያው ግን ፈ ገ ግ.....
.
.
.
ሰሞኑን ሰሞኑን፤
ሳቅሽ ግራ ገባኝ፤
ኩርፊያሽ ግራ ገባኝ፤
እንደ ህፃል ልጅ አመል ይገለባበጣል፣
እንባሽን አይቼ፤
ላባብልሽ ስቀርብ ያ ሳቅሽ ይመጣል።

ሰሞኑን ሰሞኑን፤
ያ ገራገር አይንሽ፤
እልፍኝ ቤቴ ልብሽ፤
ልጅ ነፍሴን የገራ በፍቅር የጠመደ፣
በሂያጅ እግር ሊዳኝ፤
መንገድ ላይ ተገኘ ሌላ እንደወደደ፣
.............................ሌላ እንደለመደ።

እኔ እንደሁ እኔ ነኝ፤
በድርድር ጥርሶችሽ በሳቅ ለዛሽ በኩል፣
በአይን አከዳደንሽ በአፍንጫሽ ትክክል፣
በከንፈርሽ ጣዕም ነፍሴን የምፈልግ፣
ቅፅበት ስትስቂ ሶስት ቀን የምፈግግ።
ሚስኪንሽ ነኝ ባዶ ምርኮ ለአይንሽ ቀለም፣
በሳቅ ተጀምራ፤
በማኩረፍ የምታልፍ አንቺን ናት የኔ አለም።

እንጂማ፤
እንጂማ፤
ፀሃይ ሳቅሽ ገርበብ፣
ሙቅ ፈገግታሽ ለዘብ።
አይንሽ እርግብ እርግብ ሸሸት ሸሸት ካለ፣
ከእንባዬ መሃል፤
ለአይን የከበደ ጠብደል እንባ አለ።
ጠብደል ህመም አለ።
በመኖር የታሸ፤
ከህማም የሸሸ መዳን የሚመስል፣
ከቁስሌም ማዶ፤
አድሮ የሚደማ አለ ሌላ ቁስል።

እኔ እንደሁ እኔ ነኝ፤
አንቺን ከለመደው፤
ከገላዬ በላይ፤
መዓዛሽ ካወደው፤
ከግምጃዬ በላይ።
በላብ የነተበ ሌላ ያደፈ ግምጃ፣
ጥርስሽ ፊት ከነሳኝ፤
መሰንበትስ ወዴት መክረሜንም እንጃ።

ከኖረበት ጎሬ፤
መቼስ ቀን ካመጣው የእትብቴን እጣ፣
አምላክ ካበደረሽ፤
ነፍስ የሚያርገበግብ እንዲህ ያለን ቁጣ።
እንቢ አይባል ነገር፤
አርምሞ እያበዛሁ እኖራለሁ ግዴን፣
"አዲስ ቀን ይመጣል፤"
"ያልፋል" እለዋለሁ ሆድ የባሰው ሆዴን።
.
.
"አዎ ይህም ያልፋል ይመጣል አዲስ ቀን፣
እስከዚያው ድረስ ግን......
ሞት ያከለን ህመም እናልፋለን ስቀን።"
".............እስቲ ትንሽ ፈገግ...........😊"

✍ ዓቢይ ( @abiye12 )


@getem
@getem
@getem