ልብ አልባው ገጣሚ
#አልደክምም~ስላንቺ
፡
የፊደላት ጥምረት
ቃላት እያነፀ ሀረግ አሰባጥሮ
ከልቤ ድርሳን ላይ
በምናብ ቀለማት ስንኞችን ፈጥሮ
ከነጩ ብራና
በሾተላይ ብዕር እንድፅፍሽ ሲያዘኝ
ለምን እንደው እንጃ
አንዳች ነገር አለ እጄን የሚይዘኝ፡፡
፡
ግን እታገላለሁ
ከሰማይ ማማ ስር ሰንደቅሽን አይቼ
ከፍታሽን ሳስብ
ብርታት እያገኘሁ ለዛሉ ክንዶቼ፡፡
፡
ያኔ ለመሻቴ
ሀሳብ እያማጥኩኝ ነፍሴ ብትገረጣም
እጄ ቢታሰርም
አንቺን ምፅፍበት ብልሀት አላጣም፡፡
፡
ስለዚህ ልፃፍሽ
እያነሱ መብለጥ ባንቺ ቢገለጥም
የካዱሽ ይካዱ
የ'ጆቼ መታሰር ከክብርሽ አይበልጥም፡፡
፡
እመኚኝ እምዬ
ከፍታሽ ክብሬ ነው አልቀርም ወድቄ
ሰላምሽ ይመለስ
ሁሌም በሰማይ ላይ ከፍ ይበል ሰንደቄ
እኔም እፅፋለሁ
መቼም ሳይታክተኝ ስንኞች አርቅቄ፡፡

@getem
@getem
@gebriel_19