(አሌክስ አብርሃም)
#ለምን_ታምሪኛለሽ ?

ትላንተና ሌሊት ስትናፍቂኝ አደርኩ …..ሳስብሽ አነጋሁ
ሸለብ ሲያደርገኝ በቅዠቴ መሃል ስምሽን አነሳሁ
‹‹ነግቶ ልርሳት›› እያልኩ ነግቶ ራሴን እረሳሁ !!
ኧረ በጌታ እናት በመብርሃን እርጅኝ
በተከበርኩበት አገር አታዋርጅኝ !
‹‹ይሄ አስመሳይ ፍጥረት ‹ስለሴት ዘፈኑ ›
ስለሴት አወሩ ብሎ የዘለፈ
ይሄው በማለዳው ስላንዲት ሴት ዳሌ መዝገብ ሙሉ ፃፈ››
ብለው የሚወቅሱኝ የሰሉ አሽሟጣጮች ሲዞሩኝ እያየሽ
እንቅልፌን እስክጥል ብእር እስካነሳ ለምን ታምሪኛለሽ ?
ይሄው ትላንትና ‹‹ያየ አመነዘረ ›› ብየ ሰብኪያለሁ
ዛሬ በተራየ እንኳን ፊቴ ቁመሽ በሌሊት ምናቤ
ከጥፍር እስከ ፀጉርሽ ሳይሽ አነጋለሁ…
ሸለብ ሲያደርገኝ በቅዠቴ መሃል ስምሽን አነሳሁ
በመኪኖቹ ጭስ በቆሻሻው ሽታ
በሽቶው ጥረና ባ,የሩ ሁካታ
ነፍስያየ መርጦ አንችን ማነፍነፉ
ላ,በቦች መአዛ ለቡናው ላይ እጣን አፍንጫ መስነፉ
እኮ ለምንድነው አፍጫየ መርጦ አንችን ያሸተተው
የአገሬ ነፋስ በአየር ጡቶቹ ጠረንሽን ያጋተው?
ኧረ ምን መዓት ነው?
ሳላይ ከመኖሬ ከ,ለት ምናኒየ ልታቆራርጭኝ
በአምሮት መንጠቆ ከጥሞና ባህር ጠልፈሽ ልታስወጭኝ
የሲኦሉን እሳት ….የእግዜሩን ቁጣ
የበደሉን ምላሽ ….የእምነቱን ጣጣ
ከየደብሩ ስብከት ከየመፅሃፉ ትዛዙን እያወቅሽ
ለምን ታምሪኛለሽ……
ኧረ በጌታ እናት በመብርሃን እርጅኝ
በተከበርኩበት አገር አታዋርጅኝ !
ኧረ በፈጠረሽ ወይ ነብሴን ተረጃት
ከመኮፈሻዋ በሃቂቃ ፍቅር ጎትተሸ አውርጃት !!

@getem
@getem