«منه چیچک گتیرین ،
دونیانین بوتون چیچک‌لرینی بورایا گتیرین»
(کندلی‌لر معلمی #شفیق_سینیغ‌ین سون سؤزلری)

#شعر: جیحون آتوف قانسو ( 1978 – 1919 )

اویغونلاشدیردی: همت شهبازی

دونیانین بوتون چیچک‌لرینی دئییرم
بوتون چیچک‌لری گتیرین بورایا
اؤیرنجی‌لریمی گتیرین، گتیرین بورایا
قایا دیبلرینده آچمیش چیغ‌لارا(1) بنزه‌ییر
بوتون کند اوشاقلارینی گتیرین بورایا
سون بیر درس وئره‌جه‌یم اونلارا
سون شرقیمی سؤیله‌یه‌جه‌یم
گتیرین، گتیرین... و سونرا اؤله‌جه‌یم

دونیانین بوتون چیچک‌لرینی دئییرم
دوز و داغ چیچک‌لرینی ایسته‌ییرم
کدرلری منه بنزه‌ین
یالنیزلیقدا آچارلار، کیمسه تانیماز اونلاری
گئنیش اووالاردا ایتیر قوخولاری
یوردومون سئوگیلی و آدسیز چیچک‌لری
هامینیزی، هامینیزی ایسته‌ییرم، گلین گؤرون منی

دونیانین بوتون چیچک‌لرینی دئییرم
افیون اوواسیندا آچان خاشخاش چیچک‌لرینی
باجیمین سولادیغی رئیحانلاری
کند چیچک‌لری‌نین هامیسینی، هامیسینی
حیط‌لرین چهرایی اوزون ختمی گولونو
چوبان یاسدغینی‌، پیغمبر چیچه‌یینی ده ( 2) اونوتمایین
آمان ایسپارتا گوللرینی ده اونوتمایین
هامیسینی، هامیسینی بیر آندا قوخلاماق ایسته‌ییرم
گتیرین، دونیانین بوتون چیچک‌لرینی ایسته‌ییرم

دونیانین بوتون چیچک‌لرینی دئییرم
من کند معلمی‌یم، بیر باغبانام
من بیر باغچا سولاییردیم، کؤنلومدن
کیمسه بیلمز ، کیمسه آنلاماز دیلیمدن
نه گوللر فیشقیریر چیینیمدن
قان‌دیر، حیات‌دیر، امک‌دیر منیم گوللریم
قورخمادیم، قورخماییرام اؤلومدن
سیز چیچک گتیرین یالنیز، چیچک گتیرین...
...

کند اوکول‌لاریندا(3) آچان، گیزلی و سس‌سیز
او باخیمسیز، آما قوخوسو میثیل‌سیز چیچک
کیمسه تانیمایاجاق، سنی منی کیمسه تانیمایاجاق
سنی منی یالنیزلیق باسدیراجاق، یالنیزلیق باسدیراجاق

دونیانین بوتون چیچک‌لرینی دئییرم
من قبیرسیز یاشاماغی دیله‌ییرم
اؤلمه‌مک ایسته‌ییرم، یاشاماق ایسته‌ییرم
یئتیشدیردییم باغچا یاریدا قالماسین
داغیلماسین، پریشان اولماسین
منی تانیسا، تانیسا چیچک‌لر تانییار، دوستلاریم
نئچون یاشادیغیمی من اونلارا سؤیله‌دیم
چیچک‌لرده آچار منیم گیزلی آرزولاریم

دونیانین بوتون چیچک‌لرینی دئییرم
اوکولون دوواری چؤکدو آلتیندا قالدیم
آما من دونیا اوستونده‌یم، تورپاق اوزرینده
درد چکدیم، یالنیز قالدیم، آما یاشادیم
بیلیر بونو باغچالار، قایالار، کندلر بیلیر
ایندی سوسدوم، اؤرتون منی، یاتیرین بورایا
دونیانین بوتون چیچک‌لرینی گتیرین بورایا


1) بهمن ، اوچقون قار توپلومو
2) بیر نوع چیچک آدی دیر : بوغدایی چیچک ، قنطریون
3 ) مکتب ، مدرسه

https://telegram.me/dusharge