#አትተይኝ

እንደ ደራሽ ውሃ በፍጥነት ይሄዳል
እንዳለፈ ክረምት አይቆይም ይረሳል
ወቅት ሁሉ ይነጉዳል ሁሉም ነገር ያልፋል
በጠብ ያኳረፉን ደቂቃዎች ሁሉ
“እንዴት ለምን ?” በሚል የጥያቄ በትር
ደስተኛ ልቦች መትተው የሚገድሉ
ጊዚያቶችን እረሺ ውስጥሽ አይሣሉ
ሁሉንም ተያቸው እኛን አይወክሉ
በመጡበት መንገድ ዞረው ይሄዳሉ

እኔን ግን አትተይኝ...
ዝናብ ከሌለበት ከዛ ከሩቅ ሀገር
እኔ ላንች ፍቅር
ካለሽበት ድረስ ዝናብ እጠራለሁ
በዝናቡ ፈንታም
ስጦታ እንዲሆንሽ እንቁ አስዘንባለሁ
የእንቁው ጠብታ
ወርቃማ ብርሃን እንዲሆን አውቃለሁ
አትተይኝ አትተይኝ
እስከለተ ሞቴ
መሬቱን ቆፍሬ ጥልቁ መሃል ድረስ
አንችን ለመሸፈን ፍቅራችን ለማንገሥ
ሕጉ ንጹህ ፍቅር
ንጉሡ ውብ ፍቅር
አንቺ ደሞ ንግሥት የምትሆኝበት
አንጽልሻለሁ አዲስ ቤተ መንግሥት
ስሚኝ ብቻ ፍቅሬ
ማንም የማይገባው ልሳንን ፈጥሬ
በአዲስ መወድስ በአዲስ ዝማሬ
ሁሉን እነግራለሁ
ከሁለት ግዜ በላይ ስለተሳሳሙ
የሁለት ፍቅረኛሞች
ሁለት ንጹህ ልቦች
መሳጭ ውብ ታሪኮች
አወራልሻለሁ...
አንቺን ብሎ ወጥቶ
በዛው እንደቀረ ፍቅር ሳይሰምርለት
ነፍስ ይማር እያልኩኝ የንጉሡን ሕይወት
አወራልሻለሁ በቀን ሆነ በሌት
አትተይኝ አትተይኝ
እንዲህ ያለ ነገር መቸ ታይቶ ያውቃል ?
እሳተ ገሞራው ሲባል ጥንት አርጅቷል
ስላንቺ ከሆነ
እንደ አዲስ ተወልዶ እሳቱን ይተፋል
የመከነው መሬት የኖረው ሲቃጠል
ስላንቺ ከሆነ
ከመኸር የበዛ ውብ ስንዴ ያፈራል
ያመሻሽ ጨለማ የጀንበሯ ቅላት
የሰማይ ወጋገን የደመናው ጥለት
ስላንቺ ከሆነ
ይጋቡ የለም ወይ በመጥለቅያው ሰዓት
አትተይኝ
ተሸሽጌ ተደብቄ ከዚች ዓለም
ስትደንሺ አይሻለሁ አላለቅስም
በፈገግታሽ እስቃለሁ አላለቅስም
ስትዘፍኝም እሰማለሁ
ፈቀጅልኝ
ያንቺን ፍቃድ እሽዋለሁ
አትተይኝ አትተይኝ
እየተከተልኩሽ
ያጃቢሽን ጥላ የጥጃሽን ጥላ
የእጆችሽን ጥላ
የጥላሽን ጥላ
ያን ሁሉ ለመሆን
እየተከተልኩሽ እየተከተልኩኝ
አትተይኝ አትተይኝ

🔘ሰለሞን ሳህለ🔘