#አልሄድሽም_ሄደሻል

መስኮት መጋረጃ የተከፈተ በር
የውሃ ብርጭቆ መሬት ላይ ሲሰበር
ባለ መቶ ብር ካርድ ሳይፋቅ የነበር
በሳንቲም ተፍቆ ስልኬ ሆድ ሲቀበር
ለማን ልደውል ነው? አንቺ እንደሁ ሄደሻል
ኦናዉ ቤታችንም ናፍቆት ሞልቶልሻል

አንቺ የለሽምና

ሂደቴ ተዛባ ሥርዓት ገደፈ
የእራታችን ሰዓት ሳላውቀው አለፈ
ቁርሳችን ቁር ሆነ ምሳም ተጣደፈ

አንቺ የለሽምና

ከሸሚዜ በፊት ጃኬቴን ለበስኩት
ሙዚቃውን ትቼ ዜናውን ዘፈንኩት
የእንዴት ነህ ?” ሰላምታ
የጦርነት አዋጅ መስሎ አስደነገጠኝ
ሳይቀድሙኝ ለመቅደም
ካ'ብሮ አደጎቼ ጋር መጣላት አማረኝ

መሄድሽን ማወቄ ግራ እንዲህ ካጋባኝ
ማወቅ አልፈልግም ዕውቀት ምን ሊረባኝ?

የለም የለም የለም አልሄድሽም ሄደሻል
በሻማሽ ብርሃን ቤትሽን አድምቀሻል
መሳብያው ውስጥ ሽቶሽ ደረቴ ላይ ሽታሽ
መኖሩን እያውኩ መኖሩን እያወቅሽ
አልሄድሽም ሄደሻል ግን ቶሎ ተመለሽ

🔘ሰለሞን ሳህለ🔘