አትሮኖስ

ከአየር ቦምብ ዱብዳ ለመዳን ሲባል መብራት እንዳይበራ በመከልከሉ
የባቡሩ አምፑሎች ተነቅለዋል፡ በመሆኑም አንዳንድ ጊዜ የጥበቃ አባሉ
ህዝብ በተቀመጠበትና በተጋደመበት ወለል ላይ ሲያልፍና ሲያገድም
ባትሪውን ከሚያበራው በስተቀር ምሽቱን በፍፁም ጭለማ ነበር የሚጓዙት፡፡
ማርጋሬት ይሄ ምንም አይደለም› በማለት ራሷን አሳመነች፡ ቀሚሷ
በመረጋገጡና ወለሉ ላይ በመቀመጧ ቢቆሽሽም ነገ ወታደራዊ ዩኒፎርም
ትለብሳለች፡፡ አገሪቱ ጦርነት ላይ ነች፡፡

ማርጋሬት አባቷ መጥፋቷን አውቀው ባቡር ተሳፍራ ይሆናል ብለው
በመገመት ከለንደን በከፍተኛ ፍጥነት በመብረር ፓዲንግተን ጣቢያ ላይ
ያቆሙኝ ይሆን? ብላ ገመተች፡፡ የመሆን ዕድሉ ጠባብ ቢሆንም ባቡሩ
ጣቢያው ላይ ሲደርስ ልቧ በሀይል ደለቀ፡፡
ከባቡሩ ስትወርድ አባቷ አሁንም በጣቢያው አይታዩም ሌላ ድል ተሰማት፡ እሳቸው ሁሉን ማድረግ የሚችሉ አምላክ አይደሉም::

ድንግዝግዝ ባለው ጣቢያ ታክሲ አገኘች፡፡ ታክሲው የጎን መብራቱ ብቻ አብርቶ ወደ ባይስ ዎተር ወሰዳት፡፡ ታክሲ ነጂው ካትሪን የምትኖርበት ህንፃ ጋር ሲደርስ ባትሪውን አብርቶ
ወደ ህንፃው መራት።

የህንፃው መስኮቶች በሙሉ መብራት አይታይባቸውም፡፡ ኮሪደሩ ውስጥ ንግንባር መብራት በርቷል፡፡ ጥበቃው ስራውን ጨርሶ ወደ ቤቱ ሄዷል፡ እኩለ ለሊት ሊሆን
ምንም አልቀረው ማርጋሬት
የካትሪን አፓርታማ
የሚገኝበትን ታውቃለች፡ ደውሉን ተጫነች፡፡

ምንም መልስ የለም፡፡

ልቧ ስንጥቅ አለ፡፡

እንደገና ደውሉን ተጫነች ሆኖም ዋጋ እንደሌለው ተረዳች የአፓርታማው የደወል ድምፅ ጆሮ ይሰነጥቃል፡፡ ስለዚህ ካትሪን የለችም

ካትሪን የምትኖረው ኬንት ውስጥ ከወላጆቿ ጋር ነው: ይህ አፓርታማ የምትጠቀመው አንዳንዴ መዝናናት ሲያምራት ለማረፊያነ ነው:: የለንደን ማህበራዊ ህይወት ቆሟል እየላላ በመምጣቱ ካትሪን እዚ የምትቆይበት ምንም ምክንያት አልታይሽ ብሏት ይሆናል፡ ማርጋሬት
አስቀድማ ይህን አላሰበችበትም ነበር፡፡
ሀዘን ተሰማት፣ ከካትሪን ጋር ቁጭ ብላ ኮኮዋ እየጠጡ የሰራችውን ጅብድ ልታካፍላት ጓጉታ ነበር፡
ቀጥሎ የምታደርገውን አሰበች፡፡ ለንደን ውስጥ ብዙ ዘመዶች አሏት።
ነገር ግን እነሱ ጋር ብትሄድ አባቷ ጋ ስልክ ከመደወል ወደኋላ አይሉም
ካትሪን ግን የእሷ አጋር ትሆን ነበር፡፡ ሌሎቹን ዘመዶቿን አታምናቸውም:
ሌላም ነገር አስታወሰች፡ አክስቷ ማርታ፡ ወዲያው ስልክ እንደሌላቸው
ትዝ አላት አክስቷ በትንሹ በትልቁ የሚቆጡ የሰባ አመት ቆሞ ቀር ባልቴት ናቸው፡ የሚኖሩት ማርጋሬት አሁን ካለችበት አንድ ኪሎ ሜትር ያህል ርቀው ነው፡፡ ይኼኔ ጭልጥ ያለ እንቅልፍ ላይ ይሆናሉ፡፡ እናም
ቢቀሰቀሱ ይናደዳሉ፡፡

ማርጋሬት ተመልሳ ደረጃውን ወርዳ መንገድ ላይ ስትወጣ ድቅድቅ ያለ
ጨለማ ገጠማት፡፡

ጨለማው ያስፈራል፡፡ ዓይኗን በልጥጣ ዙሪያውን ተመለከተች ነገር
ግን ዓይን ቢወጉ አይታይም፡ ሆዷ ታወከ፤ የመደንዘዝ ስሜትም ተሰማት፡፡

አሁንም አይኗን ገለጠች ነገር ግን ምንም አይታያትም፡፡
ጨለማው አንጎል ያደርጋል፡ ራሷን አረጋጋችና ወደ አክስቷ ቤት የሚወስደውን መንገድ በዓይነ ህሊናዋ ቃኘች፡
የምስራቅን አቅጣጫ ይዤ እሄድና በሁለተኛው መጠምዘዣ መንገድ
ላይ በግራ በኩል እሄዳለሁ የአክስቴ ቤት እመጨረሻው ህንፃ ላይ ነው በጨለማም ቢሆን ቀላል ነው አለች በሆዷ

አንዳች ከዚህ ማጥ የሚያወጣ ነገር ተመኘች መብራት የሚያበራ
ታክሲ፣ሙሉ ጨረቃ ወይም ፖሊስ፡፡ ከጥቂት ደቂቃ በኋላ ፀሎቷ ተሰማላት፡፡
አንዲት በጥቅጥቅ
መኪና ጭለማ ውስጥ አይኗን እንደምታቁለጨልጭ ድመት የጎን መብራቷን ጭልጭል እያደረገች በዝግታ መጣች፣ በዚህ ጊዜ እስከ መንገዱ መጠምዘዣ ድረስ የመንገዱን ጠርዝ
ማየት ቻለች።

መራመድ ጀመረች፡፡

መኪናዋ ቀይ መብራቷን በርቀት እያብለጨለጨች ከአይን ተሰወረች፡፡
ማርጋሬት መጠምዘዣው ጋር ለመድረስ ሶስት ወይም አራት እርምጃ
እንደቀራት የመንገዱ ጠርዝ አደናቀፋት፡፡ መንገዱን አቋረጠችና እግረኛ
መንገዱ ላይ ያለምንም ችግር ወጣች፡፡ ይህም ድፍረቷን ጨመረላትና
ያለስጋት መራመድ ቀጠለች፡፡

ድንገት ፊቷን የገጫት ነገር ከፍተኛ ህመም ለቀቀባት፡፡

በስቃይና በፍርሃት አንዴ ጩኸቷን አስነካችው፡፡ በመሸበሯ ሩጭ ሩጭ
አላት፡፡

እራሷን እንደምንም አረጋጋችና ህመሙ የሚሰማትን ጉንጯን መዳበስ ጀመረች፡፡

‹መንገዱ መሐል የሰው ቁመት ያለው ምን ነገር ነው ፊቷን የመታት?› በሁለቱም እጆቿ የመታትን ነገር ደባበሰች፡፡ አንድ ነገር በእጆቿ ነካችና በድንጋጤ እጇን ሰበሰበች፡፡ ጥርሷ በፍርሃት እየተንቀጫቀጨ እንደገና እጇን ሰደደች፡ አንድ የሚቀዘቅዝ፣ ጠንካራና ክብ የሆነ ነገር ነካች፡ እጇን በደንብ ዘርግታ ደባበሰች ፊቷ ላይ ህመም ቢሰማትም ምን እንደሆነ
ስታውቅ ከት ብላ ሳቀች፡፡ ፊቷን የገጫት የመንገድ ዳር ፖስታ መክተቻ
ሳጥን ነው፡፡

ዙሪያውን ዞረችና እጆቿን ዘርግታ ርምጃዋን ቀጠለች፡፡
ከጥቂት ጊዜ በኋላ እንደገና ሌላ የመንገድ ጠርዝ አደናቀፋት፡፡ ሚዛኗን
እንደምንም መጠበቅ ስትችል ልቧ ምልስ አለ፡፡ የአክስቷ ቤት ያለበት
መንገድ ላይ ደረሰችና ወደ ግራ ታጠፈች::

አክስቷ የበሩን የደወል ድምፅ ይሰሙ ይሆናል ብላ ገምታለች፡፡ብቻቸውን ስለሚኖሩ ካለሳቸው በር የሚከፍት የለም፡፡ ካልሰሙ ግን ወደ ካትሪን ቤት ተመልሳ ትሄድና ኮሪደሩ ውስጥ ትተኛለች፡፡ መቼም ወለሉ ላይ መተኛቱን ትችለዋለች፡፡ ነገር ግን እንደገና ጨለማ ውስጥ መግባት ፈራች፡፡

ምናልባትም አክስቷ በር ላይ ጥቅልል ብላ ተኝታ እስኪነጋ መጠበቁ ሳይሻል
አይቀርም፡ የአክስቷ ቤት በህንፃው ዳር ነው የሚገኘው፡ ማርጋሬት ቀስ
እያለች ተራመደች።

መንገዱ ፀጥ ያለ ቢሆንም በአካባቢው ከየቦታው የሚያፈተልክ ድምፅ
ይሰማል፡ ከርቀት የመኪና ድምፅ አልፎ አልፎ
ይሰማል። ውሾች በበራቸው ስታልፍ ይጮሃሉ፤ ድመቶችም ስትቀርባቸው እንዲሁ፡ የጭፈራ ቤት ሙዚቃና የሰዎች ጭቅጭቅ ከሩቅ ይሰማታል፡ መብራት፣ ለብርዱ የምድጃ እሳት፣ ለቆፈኑ ደግሞ የጀበና ሻይ ፈለገች፡፡

ህንፃው ካሰበችው በላይ ወደ ጎን ረዘመባት፡፡ መንገድ የሳተች አልመሰላትም፡ በሁለተኛው ማቋረጫ ወደ ግራ ታጥፋለች፡ ሰዓቱ ስንት
እንደሆነ አታውቅም፡
በአካባቢው ቤቶች ይኑሩ አይኑሩ እርግጠኛ
አልሆነችም: ምናልባትም መናፈሻ ውስጥ ገብታ እየተደናበረች ይሆናል፡

ማሰብ ጀመረች፡ የት ጋ ነው የተሳሳተችው? በአሁኑ ጊዜ ተሳስታ ከአንድ ኪ.ሜ በላይ ሳትሄድ አትቀርም::

ባቡሩ ላይ የተሰማትን የድል አድራጊነት የደስታ ስሜት ለማስታወስ ሞከረች: አሁን ግን ያ ሁሉ የለም፡ አሁን ብቸኝነትና ፍርሃት ነግሶባታል። ጉዞዋን አቁማ መገተር አለብኝ ብላ ወሰነች፡ በዚህ አይነት ምንም ጉዳት አይደርስባትም
እንደቆመች ረጅም ጊዜ ቆየች፡ አሁንም ቢሆን መንቀሳቀሱን ፈራች:
ፍርሃት ጠፍንጓታል፡ እስከምትወድቅ ወይም እስከሚነጋ ድረስ እቆማለሁ
ስትል አሰበች፡

ከዚያም መኪና መጣ፡፡

የመኪናዋ የጎን መብራቶች ትንሽ ብርሃን ሲፈነጥቁ ቀድሞ ከነበረው ድቅድቅ ጨለማ ጋር ሲነጻጸር ጸሃይ የወጣ ያህል መሰለ፡፡ የመኪና መብራቱ መንገዱ መሐል መሆኗን ስላሳወቃት ሮጣ መንገዱ ዳር ወጣች፡ አንድ የምታውቀው አደባባይ ታያት፡

መኪናው አለፋትና በኩርባው ሲጠመዘዝ የሆነ የሚታወቅ ነገር አገኛለሁ ብላ መኪናውን ተከትላ ሮጠች፡፡ እንዳሰበችው የምታውቀው ቦታ
አየችና በደስታ አነባች

👍18

7.88K viewsአትሮኖስ, 17:33