لاجىء لغيري ولاكي راحته..
بس مدام هيج احذفه من حياتي وابدي من جديد..
بيومها المغرب متحضرين نريد نطلع..
واجو بيت خالة ام حيدر..
كل مرة ينطونه خبر..بس هالمرة مفاجئة..
شافونا مبدلين وعلى وجه طلعة..كالو بعد
احسن..
امشو نروح لمتنزه الخورة..
صدك تجمعنا وطلعنا سيارتين..
امي ومرت عمي وحنين وهند وانا ومحمد..
وخالة ام حيدر ورهام وحيدر صعدت وياهم هند
بالسيارة..
انا جنت بحال مايسر ابد..
حتى لبس حنين طلعتلي ولبست ..
و
لا اختاريت
لا اهتميت بكشختي..
رغم الملابس جانن حلوات ..بس مو تنسيقي..
جينز ابيض وترانشوز رصاصي وبدي
رياضي رصاصي وبالصدر
منقوش بلك على شكل بزونة ..
وياهن شال مشجر ..
حيدر يسترق النظرات من حوا لجوا..
بس عبالك ماموجود..
نظرات ماما الي مليانة شك..بس مانطيتها
مجال تسال..
وصلنا وفرشو فراش ع الارض وكعدنا..
حيدر كدامي مباشرة..
طكيتلي صفنة اتهرب منه..
المشكلة اسمه يذكرني ب..بقاتلي..
كال محمد شنو تردون عشا احيبلكم..
كل واحد طلب شي..
سالني كتله فلافل..بقو يضحكون..
اكو واحد يطلع يطلب فلافل..
مايدرون بيه حبيتها ليش..
راحو هو وحيدر يجيبون اكل واحنا بقينا
نسولف..
شاورتني حنين..فكي شوية ترى امج كلساع
تسالني شبيج..
عوفيني عفية كلش واصلة وياي..
لعد ابقي سليمة..هو يطلع ويتونس وانت
مثل وحدة ميتلها عزيز..
وهي تحجي كرصتها بطرف اظافري..
اجت الجلده بيدي..
كمزت وبقت تحك بيدها..وهم يضحكون علينا..
يكلولها هي اذا واحد اذاها تكرص
ليش تاذيها..
شوي انكسر حاجز الصمت عندي وتفاعلت..
لحد مااجو الولد..جايبين اكل وجايبن
وياهم طوبة ..
محمد كال..جبت الطوبة لخاطرج..
لان احنا متعودين بالسفرات ناخذ طوبة
ونلعب..
ماكسرت بخاطره كتله ورا العشا نكوم نلعب..
اكلنا بس قليل اكلت كوة تحملت الاكل
نار صار بمعدتي..
عفت اللفة ماكملتها..
لورا العشا كامو هند ومحمد وحيدر ورهام..
وحنين كامت وجرتني وياها..كومي
نلعب كومي..
كتلهم معدتي ماكدر اركض..وكفت ولازمة
بطني..همزين اجتلي حجة حتى مالعب..
بقو يلعبون شوية وحنين تلعب بعبايتها
محمد يكلها باتمان يلعب ويانا ..
هسه يصوروج ويكولون شاهد باتمان يلعب كرة..
عاد هي رجعت وكفت يمي..
يبوو لا يصوروني صدك..بهادر يدفني...
وكفت يمي ودغتني من خصري..
اضحك للحياة تضحكلك ..
ضحك بلا سبب من قلة الادب..حجيت باستهزاء..
ههه اصلا جاي اشوف قلة ادب بنظرات
حيدر..
شلون؟
ولج فصلج تفصيل ..مساع يحاجي امه..
يكلها باعي البنطرون الابيض غير يكتل عليها..
هذا شبي بعد هذا..خل يذبله حجاية الا انظف
بي الخورة..
هههه اعصابج خيةاعصابج..
دمشي نكعد بهاي المرجوحة..
جانت مرجوحة قريبة ع كعدتنا..هو المكان
الي كاعدين بي..حديقة واسعة وارضها
ثيل..بيها قليل مساطب..وثلث مرجوحات كبار..
كعدنا انا وحنين ونباوعلهم..وهي تسولف
وياي بس ابد مو وياها بالي..
شوية واحو يمنا حيدر وهند يرد يكعدون ويانا..
محمد راح تمشى بعيد ورهام ويا..الاحظها
هواي تتوددله..
وكفنا مرجوحتنا وصعدو..من صعدو ..حنين
كالت لهند تعاي بصفي..وهي صارت بالطرف..
انا ثالثتهن ..حيدر كعد بصفي ..
جمدت من حركته..ماتوقعت من يشوف مكان قليل
بقى يصعد..
بس صعد بقى يهز المرجوحة حيل..يثبت
رجله بالارض ويدفعها..
حجه بصوت ناصي..رايدج بموضع..
حجيت ويا من ورا خشمي..شنوو؟
اعصابج يمعودة لا تكتليني ههه..
حنين كالت وكفها اريد انزل..
وكفها ونزلت حنين ..هند هم نزلت..
اجيت اكوم كال لحظة شاها..
بقيت كاعدة..تفضل ..
شاها سالتج عنج بالكلية..وسمعت عندج
علاقة بحمى حنين ؟؟
عفوا؟؟يعني شنو سالت عني؟وبصفتك منو..
حجيت بعصبية..لان جنت بيومها مصدومة
ومقهورة وكل الاحاسيس التعبانة عندي..
سالت لان رحت اسويلج مفاجئة واشوفج..
سالت ولد وعن قسمكم ومرحلتكم وين الكاها..
كال رايد منو؟؟كتله شاها وحيد..
جاوبني وبثقة..يابة ترى محجوزة لابن
شيخ رسن ومكبلين من يمتى..
قبل لا يكمل الولد عفته ومشيت..
ماصدكت من سمعت..
اولا مامكبلين..وثانياً اخو رجل اختي..يعني
لو مشى وياي عادي..مو شرط عندي
شي وياه..
هسه انا هم كاعدة وياك ..
عدنا شي؟؟بينا شي؟؟
من ناحيتي طبعا اكو..
شاها احبج وخطبتج هواي..مالج
حجة بعد دراسة وخلصتي..
حيدر الف مرة اكلك..احسبك اخوي مو اكثر..
يعني مالي اي مشاعر تجاهك..
رجاءا لا تتامل بشي..
ولو بعد عشر سنوات مااوافق عليك..
هه بس توافقين على العربي ابو دشداشة..
ماوافقت ع احد..
والدشداشة مو عار واحد يلبسها...
شاها ترى ماتتناسبون..
انت ليش مصر؟كتلك ماعندي شي وي الولد
انا ماريد زواج اصلا..
كتلك دراستي اريد اكملها..
احجي هندي احجي روسي..بيا لغة
تفهم..
افهم بلغة الاحترام..صايرة بلا اسلوب..
مااسمحلك..حجيتها وكمت ..حيدر شوفلك
مرة نفس مستواك..
وعفته ومشيت كعدت يمهم..هو بقى كاعد بالمرحوحة..
سالتني خالة ام حيدر..
حاجاج حيدر يوم؟؟
اي خالة ..حجيت وباوعت لماما...
ماريد اتزوج اريد اكمل..
ماما كالت تكملين عنده مو صعبة..
وخالة كالت تردين ياخذج تكملين برا يجرالج..
ماما حاجته

ا..خليها من ارجع احاجيها..
سكتت وهم غيرو الموضوع..
حنين ابد ماحجت..
شوية وكالو خل نرجع..
كمنا وجمعنا اغراضنا..ومشو كدامنا..
انا وحنين اخر شي نمشي..
هي الحديقة يصير كدامها
كراج..
بطلعتنا منها..شفت حيادر بالكراج..واكف
يم سيارته..
رجفة مشت بجسمي كله وانا اشوفه..
نظراته جانت ماتتفسر..
دموعي نزلت وماكدرت تقاوم..هي لحظات الشفته
بيها وعبرت..
بس نظراته بقت براسي..وياها نزلت دموعي..
وماتقبل توكف..
وحنين تهدي بيه وتكلي سكتي لا يشوفوج..
مسحت عيوني وبلعت الغصة ورجعنا..
هم راحو لبيتهم كبل واحنا رجعنا لبيتنا..
اول مادخلنا..رحت للمغسلة..نفسي تلعب
وممغوصة..
غسلت وجهي وذبيت حجابي..
ماما وراي..ها بعدج تعبانة؟؟
شوية..خليني انام احسن كلش دايخة..
روحي ارتاحي..
رحت لغرفتي دخلت وقفلت الباب..
وهاي اول مرة من ورا سالفة الحرامي
اقفل الباب..
لان جنت اخاف اقفله..
ذبيت نفسي بفراشي..خليت المخدة فوك
راسي وبقيت ابجي وخانكة روحي..
بجيت لحد مااحس عيوني نشفت..
وعلى دوختي غفيت..
كل شوية افز وانام..نومتي متقطعة..
يوم ثاني كعدت بتسعة..اباوع بالمرايا وجهي
مال وحدة عدها عزا..
بس طلعت وشافتني ماما انصدمت..
وجهها بهت وسالتني..شكد باجية
البارحة؟؟وليش قافلة الباب..
مشيت للحمام بدون حجي..
غسلت وطلعت..جانت واكفة بالممر تنتظرني..
ليش البجي؟؟بسبب حيدر؟؟
اي ابجي لان راح تجبريني بي...لان
راح تكليل اخذي ماتلكين احسن منه..
حجيتها وبجيت..
استغفرالله..من شوكت اجبرج بشي ماتريدي..
كافي امشي تريكي امشي..اخذتني للمطبخ
وسوتلي ريوك..وهي تحجي..
ماما الولد كامل من كلشي والكمال لله..
وامه اختي واعز..ونعرفهم..نريدلج الزين احنا..
مابي شي ينرفض..
احسه حسن وكاعد يمي..شلون اكدر اغير
هالشعور؟؟
حطت الماعون كدامي  وكعدت..
حاولي شتخسرين؟
حاول ماما..ماحسيته غير اخ..اصلا ماريد
رجال بحياتي..ماريد ارتباط بعد وكت..
هي استغربت من حجايتي..جانت عبالها
ارفض بسبب حيادر..
بس من كتلها ماريد ارتباط..سكتت وهدأت..
يعني هذا اخر قرار الج.!؟؟
اي ماما اذا تهمج سعادتي..انطو حيدر قراري
وكلوله لا تفكر بيها بعد..
يصير خير هذا هو..اهم شي مصلحتج و
انت مدم مامقتنعة..ماتكدرين ترتاحين
حتى وهو زين..
بعدين اخابرهم واكلهم..
هنا احس جبل جان ع ظهري وانزاح..
استعاديت توازني..
ارتاحيت ..
قررت من هاليوم ابدي صفحة جديدة..
وبالفعل بديت..
ورا مااستلمت النتيجة وتقديراتي كلها
عالية..
قدمت ع ماستر..
واخذت المادة حتى ادري للتنافسي..شغلت
نفسي كلش..
بالاحرى شغلت نفسي جسدياً..
بس روحيا لا كلشي ينبض ..يطالب
بحيادر..
بس امنع نفسي عنه..
انقبلت بالدراسات وبلشت اداوم..مالي
علاقة باحد ابد..
والاستاذة كلهم ساعدوني ..لان جنت طالبة
شاطرة وعاقلة..
لهذا من كملت كلش شجعوني..
بالبداية ماشية الامور ع خير..
وضعي مستقر ..بيت دراسة وبين روتين
البيت..
حيدر من ردينه قرار الرفض لليوم مارايحين
الهم..ولا هم جايين النا...
خالتي مثل الي زعلت بس مو بصورة
مباشرة..
ورا فترة مرت..جنت توني راجعة من المكتبة
جايبة مصادر..
صعدت للقسم..اريد اروح لغرفة طلاب الماستر..
شفت بهادر اجه تجاهي..بس عيونه براسه
ومعصب كلش..
هو من داومت لليوم..يشوفني يسوي
نفسه مايعرفني..
وحنين تكول ماعاجبته فكرة انت تكملين..
كتله يطبه طوب وزعلت..
من شفته جاي تجاهي سويت نفسي مامهتمة..
اسو هذا زمخ بصوت شبه عالي..
هيي اوكفي اوكفي..
وكفت وباوعتله باستغراب..عليه؟؟
اي عليج سنو ماعندج احد يردج؟؟؟
للحكاية بقية

#الشيهانة
#الجزء الخامس عشر
نطيت عيوني باستغراب..عفوا؟؟
مسح وجهه وحجه بفضاضة..ترى فشلتيني
وكسرتي وجهي..ذاك اخوي ادري
بي اغم..
احترم نفسك ترى لهسه محترمتك انا...
غصبا عليج تحترمين..لو اعلمج الاحترام..
علم نفسك بالاول..حجيتها واريد امشي...
اوكفييي..نتر حيل..
بيا وجه تمشين بالكلية؟؟وحدة غيرج هسه
غاسلين عارها..
رفعت صبعي وحجيت بتهديد،..بهااادر
لهنا وكافي..شكوووو شنو الصار؟؟؟
هو طلع من راسه دخان من تصرفي..حجه
بعصبية..
دروحي شوفي سمعتج..كل ثنين بحجاية
عليج..
وليش؟؟؟حجيت بخوف..
لان دايحة ويا حيادر وماضل واحد ما
شافكم..قصص وروايات
عراقية كرار صلاح
والاساتذة كلو وجهي..يابه هذا اخوك
وهاي عرضك ..حاجيهم انصحهم..
انا وحيادر لاكعدنا سوا ولا مشينا!!حجيت بعصبية..
لا تبررين..هذا مو حجيي..
الكلية كلها تحجي وتحجي وتحجي وانا ساكت..
صارلهم دهر..بس اليوم من يجي رئيس
القسم يعاتبني..
يابة حاجي كرايب مرتك..ترى هواي
يحجون عليها..
وسمعت الطلاب يكولون تلتقي باخوك
بغرفتك!!
من حجه هيج احس شي براسي طك..
خليت ايدي ع عيوني..وبقيت اجر نفس..
طلب منك حيادر هيج؟؟
ها ..لا ماطلب لان يدري بيه ارده واطيح
حظه..
احس نفسي انهاريت..موضوعي وي حيادر
كلشي ضده..
مااكدر ابين اي رد فعل،.
دنكت راسي..حجيت بصوت ناصي..
هذا هو ..اعتبر هذا اخر يوم اداوم..
مشيت وانا عقلي مايريد يفكر..
لان اذا فكر راح ينشل..
ماكو تبرير لحجي بهادر ،.
شنو الي خله الطلاب يحجون بسمعتي؟
رغم ماماشية وي حيادر..
وجبتها من اول مرحلة محافظة ع سمعتي..
هسه صدكت حجي حيدر..
من جاي سائل وكايليله تقريبا نفس الحجي..
اتخيل بس..واحد من اخواني لو بابا يجي
صدفة..
اذا سمع هيج يحجون عني شنو ردت فعله!
لا احسن قرار اترك الكلية..
لكيت نفسي نازلة من القسم ومامنتبهة..
كعدت يم القسم..خابرت السايق وكتله استعجل..
لبست النظارة..يمكن اريد اضم دموعي..
او مالي عين اواجه الناس..
معقولة الجاي يصير!
هو مبهم وغريب لو انا ثولة..
ليش طلع عليه هيجي حجي ليش!
ماكو دخان بلا نار..ولو بس واحد حاجي
ميخالف..
مو حيدر وبهادر نفس الحجي..
خابرني السايق وكمت تمشيت..اجر
بخطواتي جر..
صعدت حتى نسيت اسلم..هم جان
مشغل اغنية محمد بوية محمد..
ابتسمت ونزلت دموعي..عليها شوية..
علاها ويريد يحرك..واشوف حيادر واكف كلش
يم باب السيارة..يريد يعبر بس وكف لحد ماعبرنا..
نفس المرة الفاتت ..نفس الاغنية مشغليها
وشفته بيها بس جان بسيارته..
مالحكت اباوعله..ماشفت عيونه جان لابس
نظارة..
هذا جان حجي قلبي واحساسي..يحجيها
بهمس حتى لا يسمع عقلي..
عقلي جان ساكت..مايريد يحجي شي
لان بداخله قابل...قصص وروايات
عراقية كرار صلاح
رفعت ايدي مسحت عيوني من جوا النظارة..
وبقيت اصارع احساسي...
لحد ماوصلنا..كتله انتظر شوية هسه اجي..
نزلت بسرعة..دخلت امي بالمطبخ..
استغربت جيتي ووضعي..ها اسم الله شبيج!
مابيه شي ..اريد فلوس الكروة للسايق بالباب..
يلا هسه اجيبلج..حجت وراحت مستغربة..
شوية واجت..انطتني الفلوس وطلعت بسرعة..
انطيتها للسايق وكتله بعد مااداوم وشكرته ..
رجعت دخلت وهي لكيتها يم الباب تنتظرني..
بس سديت الباب حجت وهي تذب شالها ع كتفها..
شبيج ماما؟
نزعت النظارة وجريت نفس..
اروح ارتاح وبعدين اسولفلج عادي؟
حجيت بحيرة..روحي ماما..
دخلت للغرفة بدلت وتمددت..
ضاك نفسي ومادري شتصرف..اذا احجي
لحنين تصير ضدي وهي منا قافلة شوية..
هذا الشي ماكدر اكتمه اكثر..كلش انهضمت..
حاولت انام ..بس عبث..
اجت براسي فكرة..كمت للكنتور ادور رسالة
حيادر..
دورت عليها لكيتها..
من لزمتها جسمي قشعر..
تذكرت يوم انطانياها ولمسة ايده..
شميتها اريد اتنفس..احس روحي مختنكة..
فتحتها واتأمل الحجي..اخذي الحجي
من امينة..ليش كال هيج؟لان يعرف امينه
تضم سوالفه وما تحجي؟
يمكن اكون ظالمته!ماعرف شحجي..
سجلت رقمه بالفون لان حنين ماسحته..
تالي تذكرت انا اصلا منطيته
بلوك..
رحت للقائمة وشلت عنه البلوك..
لازم اخابره مو مال مراسلة...
كمت قفلت الباب وعليت السبلت..حتى من اتغطى
مااحتر.
تغطيت بلحاف وبطانيه..
وكعدت بزواية الغرفة..
هذا كله حتى لا تسمعني امي اخابر..
دكيت عليه دك..بس احس دكات كلبي تضاعفت..
فتح خط..سكوت..انا هم سكتت ..
بقى يغني..يمحمد بوووية محمد...ويلحن..
بكل حرف طلع من شفته احس اذني تنتعش
وجسمي ترجعله الروح...
شوية وتحمحم..ياهو يتعمد بچتل الثاني شيهانة؟؟
كتمت عبرتي وحجيت..
انت اصلا قتلتني وشلت ذنبي..
ها ..يصير خير وبعد؟
سكتت وانا اجمع بالكلام..
حيادر..
شيهانة!!
ليش تكلي شيهانة؟
لانج قوية مثلها ..صعبة مثلها..حجاها وجر حسرة ...
اكيد تعرفيهن معناها ؟
اي دورت بالكوكل وعرفت..
ايي وذكية هم..
بس مو قوية..لو قوية جان واجهت مشاكلي..
انت القوي واقوى مني..ولو مو وكت عتب
او غيره..لان احتريت من البطانية..
جر نفس وتحسر..لا متوهمة مو البطانية
السبب..المشاعر السبب..
ماعندي مشاعر..ا..اريد احاجيك بموضوع..
كولي اسمع ؟
تركت الماس

تر..
ها زين!شعجب خاف كرايبج ماقبل؟
محد اله حجاية عليه..
تعرف شنو السبب؟
لا،،
السبب سمعتي صارت بكل لسان..!
جاوب بصيحة .شنووو!
اختنكت بعبرتي بس قويت نفسي..
بهادر ماحاجاك بشي؟
لا ..عوفج منه واحجي عدل وفهميني..
اليوم بهادر اجه تعارك وياي..لان متحمل
الحجي بسببي..
الكل بالكلية يحجي عليه ويكول عندي علاقة
بيك ونطلع سوا..
يا ناقص عرض هذا احط رجلي بحلكه واشكه..
شلج بهالحجي هذا ياهو كال هيج فهميني كلشي..
مو اكلك بهادر الي كلي..
اي وانا اسالج منو الكال احنا نتواعد؟
حسب حجيه الطلاب..وحتى رئيس القسم سامع
ومحاجيه..
استغفرالله استغفرالله..حجاها بعصبية..
انا مساع يم الدكتور تدرين؟؟تدرين هالحجي
كله جذب وتلفيق من اخوي ال...
لو اكو شي جان لمحلي وهو علاقتي بي قوية..
مو تلفيق..ابن خالتي قبل فترة نفس الحجي كاله..
شكال ؟قصص وروايات عراقية كرار صلاح
سأل عني بالكلية ونفس الحجي كلوله!
يعني يجيج للكلية؟؟؟؟
لا لا بس قبل لا ارفضه من حاجاني..
كال اجيت للكلية اشوفج..وكلولي محجوزة
لابن شيخ رسن..
هيج كال صدك؟
اي اي هو كال هيجي..بيوم الخطبني بس
رفضته..
جا يمتى رفضتي انت؟
هو بنفس اليوم الخطبني بي..اخر يوم
الامتحانات..
يوم الجنت مراقبني بي انت مدري صدفة ..
بيوم روحة الخورة!!!؟
اي هو اليوم الاسود ..حجيتها وبجيت..
ليش اسود اوكفي..تمسحين دموعج لا اطلع
احط ببت عمج شاجور كامل..
عزاا شعليها..؟
تالي تعرفين شعليها بس صبري..
بس كليلي هذا ال..
وين بيتهم؟
ليش!
تكولين لو اخابر ابوج اسأله؟
صخام حيادر عفية شبيك..
بيه كلشي لا تكليلي شبيك..نار وشابة بيه..
لازم هسه اروح كولي وين بيتهم..؟
وصفتله منطقتهم وبيتهم..بس مادري
بروحي شلون حجيت وشسويت..
وشلون هيج اتصرف..
صبري وياي ابقي ع الخط..
ايي..بقيت انتظره ورفعت الغطى تنفست..
شوية وحجه..
بعدج هنا؟
اي موجودة..
شوفي انا هسه راح احجي..بس اريد ذيج
شاها الگوية الشرسة..ماريد ام دموع
الينوكل حكها وتنغدر وماتدري..سمعتي؟
احجي حيادر فدوة..شنو صار..
اووف..مشتاك لهالحجايات..
جر نفس وحجى عدل..احجيلي اخر يوم الامتحان
من وصلناكم ..شنو صار بهاليوم..
ااه يأذيني هاليوم..
كافي يرحم امج حاجيني عدل وكملي..
اوكي..ذاك اليوم الي رجعنا بي لببت عمي
انا وحنين..
عرفت علاقتي بيك..بس جانت عبالها علاقة
تواصل..
كتلها مانتواصل ومانتخابر بالليل..ماصدكتني..
كالت انا اسمعج بالليل تخابري ويتغزل بيج..حجيتها واختنكت..
قوي نفسج وكملي شيهانة..
كتلها مايخابرني بالليل ماجاي اكذب عليج..
كالت لعد ويامن يخلص الليل سوالف وغزل..
زين ..بعد؟
اي كالت حجي مو حلو تحجي بالمكالمات..
تهون ..تهون..وانت شسويتي؟؟
انهاريت بوقتها..نصحتني انساك وانطيك
بلوك ..
انا ماكدرت انطيتها الفون كتلها انت انطي..
والظاهر انت ارتاحيت للبلوك حتى مااجه
ببالك تراسلني من غير رقم لو تسال سبب تركي الك..
هه..انطيتي جهازج بوكتها الها؟؟
اي ..
باعي شاها..بت عمج دزتلي هاي الرسالة من رقمج
بوكتها..اقريها وحاجيني..
مني من فوني!
اي اقري دزيتها..
اجاني سكرين من عنده..قريت الرسالة
طويلة..
بدايتها..هلاو حيادر..اعرف خلصنا وقت سوا
وانا تونست وياك..بس انا افكر بعقلي واطيع
اهلي..خطبني ابن خالتي واهلي كلش عاجبهم..
بصراحة من حاجوني بي اقتنعت..اشوفه انسب الي منك..
يعني تبقى ابن ريف وانا بت مدينة..
وجنت مستحية اكلك وشلون افاتحك.
بس هسه بعد صار وقتها..وابن خالتي مقتنعة بي
يكدر يعيشني ومايقيد لبسي..
سامحني ولا تضوج اعتبرها تجربة..
ها صدك..اليوم نطلع للخورة
نتونس وراها نروح نشتري الحلقات من الجزائر..
طبعا اقرا وانا كلساع ارمش حتى اتاكد من
روحي بواقع لو بحلم!!!
حنين هجي تكتب عجيب!ليش يعين ليشء..
وياي شيهانة تسمعين؟؟
اي.....
لزمي اعصابج وفهميني شكول..
بت عمج واخوي مايردونا نتزوج..اخوي يكرهني
كره الحية وبت عمج تكرهج..
مستخسيييييل..
لاواقع..بت عمج جذبت عليج وانت صدكتيها..
وشكيتي بيه وضحيتي بسهولة..
تدرين بيوم الاجت منكم..اجاني اخوي شكال؟؟
كال حنين مقهورة عليك تكول شاها باعته..
وهي دومها تحجي عليه بس هو مجلب بيها..
وبذاني سمعت بصمتج..شنو هذا الشكوكي
وافكر بي بعد!!
صوتي!!حجيت وكوة احر النفس..
اي صوتج وسمعته بذاني..بس رغم هذا
كلت خليها تروح بسبيلها..طلعت نزوة عدها
ويجي يوم وتدمر حياتها النزوة..
حيادر..عقلي رافض يصدك حنين بايعتني وليش؟؟؟
اخذي نفس وارتاحي..راجعي تصرفاتها وتعرفين..
ادري ثكيل عليج هالشي..بس انت صلبة وتتحملين..
هسه انا رايح بامان الله..وتوصلج
الاخبار الزينة..
ا..باي..
وداعة الله..
سديت الخط منه..وذبيت البطانيات عني ونمت
ع الارضية..
حرارة الدنيا كلها صارت براسي..
حنين اختي العشت وياها عمر!جنت اتقاسم وياها
حتى الفراش ..تسوية بيه هيجي!!
مانزلت دموعي بعد..ماريدها تنزل..
من اليوم شاها الطيبة تموت..
تنولد بدلها..شيهانة...
وفعلا مااستحق حيادر...لان بعته بتهمة
بدون دليل..
وهو رغم الدليل بقى محافظ ع البينا..
بس للاسف

خسرته ومااستحقه..
للعصر بقيت بالغرفة ماطلعت..
امي راسلتني كتلها تركيني اهدأ لا تضغطين عليه..
سكتت ماحجت..
لحد الليل..ساعة بالعشرة..
طلعت من غرفتي..
البيت هدوء..الكل بغرفته لان بابا ينام من وكت..
الولد دوامات وتعبانين..
رحت للمطبخ ومالي شهية كلش بس معدتي
وجعتني..
اخذت كعك وصبيتلي حليب وكعدت..
سمعت صوت خطوات..رفعت عيني ماما دخلت..
اجت جرت الكرسي وكعدت..
شنو الصاير شاها حركتي اعصابي؟
ماما انا ماريد اكمل بعد..
ليش؟؟؟
لان مو كدها وماكدر..تعبت اعصابي من كلشي
يتعلق بذيج الجهة..
يجيج يشوفج؟؟ضوجج بشي؟
ابدا ولا اشوفه بس خلاص ماريد..اسفة ماما خيبت
املج..
هاي رغبتج هم مو بس رغبتنا..ومدام
ماترديها يعني ماكو فايدة حتى لو كملتي..لان راح
تكملين مرغمة..
كومي نامي ارتاحي وجهج تعبان..
كمنا سوا..هي راحت لغرفتها وانا لغرفتي..
اعرف كلتمي ماقنعها ابداً..
بس حست بيه عندي مشكلة..
ومارادت تطول بموضوع حيادر..
تمددت بفراشي وكل الافكار تتلاطم براسي..
استسلمت الها ومن بعدها استلمني النوم..
يوم ثاني كعدت الصبح..لكيت حنين مراسلتني..
ماجاوبتها ..لان ماعرف شنو لازم اتصرف..
حصن مراسلني هواي ومخابرني البارحة..
يريد نفتح موضوع هاجر..
جان ينتظر سنة خالو تفوت ويرجع يحاجي
امي..قصص وروايات عراقية كرار صلاح
كتبتله اليوم من ترحع من الشغل نحجي..
شجعت نفسي بكم كلمة..لازم اتقوى لازم
مانكسر..
انا وعدت نفسي اكون اقوى من اي شي...
صدك احس طاقة ايجابيه مشت بشراييني..
طلعت برا لكيت ماما تنظف..
صبحت عليها وبينتلها انا زينة..
ارتاحت من شافتني طبيعية..
ومر اليوم وحنين راسلتني مرتين او ثلاثة
بس ماجاوبتها..
ورا المغرب حسن توة جاي من الشغل..
راسلني وكال تعالو نجتمع حتى نفتح موضوعي وي هاجر ..
كتبتله احنا موجودين بس جيب محمد ونزلو..
شوية واجو هو ومحمد..بابا وماما وانكاعدين بالصالة..
اجو كعدو يمنا ..بس واحد يباوع بوجه الثاني..
واحد يشجع الثاني بنظراته..
بهاللحطات اندك الباب..
طفر  حسن للباب وهو يدردم..
شوية واجه مد راسه من الباب حجه وراح..
بابا هذا حيادرابن  الشيخ ..
كام ابوي بسرعة ..عدل تشيرته مال التراك..
واح لحيادر للاستقبال..
بس انا متعجبة شيريد
للحكاية بقية

الشيهانة
الجزء السادس عشر
راح حسن ووراه بابا..بس انا احس حالي
تخربط..
افكر بحيادر وسبب جيته..
ماما جانت تباوع بالفون ..رفعت نظرها الي
بنظرات بيها شك..
حمي الجاي وصبي استكانين ..تحجي وتباوعلي
تريد تشوف ردة فعلي ادري بجيته
لو لا..
هزيت راسي وكمت..
حميت الجاي وطلعت الاستكاين جاي
احضرها..
اجاني حسن..ها خلصي الجاي..
اي بس شوية يحمى..
يلا بيضي وجهنا وي عمام المرة ههه...
انشالله هه ضحكت وانا بداخلي ميتة خوف..
كملت الجاي واخذ الصينية وراح..
وانا رجعت للهول..
شوية واجه حسن يمنا..سالته ماما باستغراب..
راح الخطار؟
لا بعدهم ..بس بابا كال عدنا حجي خاص شوية..
هااا..خير انشالله..
حسن باوع لمحمد وباوعلي..
حجت ماما..من كعدتو مساع وانتو واحد
يصفن بوجه الثاني..شبيكم؟؟؟
انا بقيت ابلع ريك...
محمد كعد عدل وحجه وي ماما..
امي احنا كلنا بعد ما مرت سنوية المرحوم
الله يرحمه..
وشوية نفسيتج تغيرت ورضيتي بقضاء الله..
شتكولين لو نشوف موضوع حسن خطية..
هو رايد البنية ويخاف تروح من ايده..
واكيد تهمج راحته وسعادته مو صح؟
تنهدت وباوعتلي..انا درت عيني ع حسن
شارك حلكه ومبتسم..
حجت ماما بهدوء..ماما انتو اولادي وكلكم
نفس المعزة..
وتهمني مصلحتكم حتى ع حساب نفسي..
بس انت حسن مقتنع؟؟
تشوف البنية تناسبك؟انت مكمل دراستك وخريج
ومن المدينة..وهي مامكملة ومن الريف..
فرق العمر بينكم هم..هذا كله فكرت بي؟
اكيد فكرت بكل هالشي ..مو مهم اذا مكملة
او لا..
والريف هسه اختلف اختلف عن قبل..
يعني صارت حياتهم مثلنا ..الا بعض
العادات بقت..
ومادام راح اجيبها هنا..بمرور الوقت تتعود
ع بيئتها الجديدة وتتأقلم..
مدام انت مقتنع بكل شي ..بعد هذا هو..
انا العليه اوجهك وانصحك..بس انت جبير
وتعرف قرارك الصح من الغلط..
يعني هذا هو انت راضية؟؟
ان شاء الله ماما..الله يهنيك..
هو كام يمها وباسها براسها..
وهي تكله الله يسهل وتكون كد قرارك..
انا عيوني لمحمد..مبتسم وساكت..
الله يساعده هسه حسيت بوجعه..
كام وكال انا رايح للغرفة اذا احتاجيتوني راسلوني..
وبقى حسن يم ماما ..شوكت تروحين
وشنو راح تسوين..
وهي تضحك عليه وتكله معليك ..خليها
يمي والتريده يصير..
وبقو يسولفون..انا ماكدر اكوم..انتظر
بابا طول يم حيادر وعقلي كلساع مسويله
فكرة..
اخر شي اجه بابا..بس وجهه مايتفسر..
اخذ الفون مالته ونظارته وحجه..فيحاء
تعاي شوية..
وراح لغرفته ..احنا بقينا صافنين..
كامت ماما ورا..
انا سالت حسن بخوف..شنوو صاير حسن عفية..
مادري حالي حالج..
روحي نامي لا تفكرين يجوز شي مايخصنا..
اي هو هيج..
راح هو صعد وانا بقيت الوب..شسوي
هسه احتاريت..
اروح اتصنت؟لا عزا تخبلت شبيه..
بس شلون خاف حيادر حاجي شي عن سمعتي..
صخام:.
اروح اتصنت واذا شي يضرني ..اخذ
ملابسي واشرد..
لو انتحر؟
لا لا البد بالغرفة الفوك لحد مااموت ومايدرون
بيه..
كمت اريد اوصل يم غرفة ماما وانفتح الباب..
صار بابا بوجهي..وماما وراه..
ها همزين لكيتج ..تعاي كعدي بابا نريدج
بموضوع..
انا رجليه بادت ورجفت..حلكي نشف
ووجهي انخطف لونه..
كوة شالتني رجليه وصلت للقنفة..
شبيج اصفريتي بابا شاها..ماما كامت يمي..
شبيج ليش ترجفين..
حجيت وشفتي تركف..ششبيكم..شنو صار
انا زينة زينة..
استغفر الله..ارتاحي بابا ولا تخافين..انت طول
عمرج هيج..اذا كنالج نريدج بموضوع
تغيب روحج..
لا بعد كبرت انا مااخاف..
اي عفية هيج اريدها بتي..ولو زعلان
منج لان عفتي دراستج لسبب تافه..
ها ؟
اي بابا تافه..انت ترببتنا واحنا نعرف شنو
مربين..
بس للاسف ماعرفنا ناسنا صح..ويكولون
الناس معادن وتبين من تنصقل..
شوفي بابا..اليوم حيادر اجاني هو وابن عمه
الضابط..
ليش..ها يعني ..
اي اجو وجايبين اخبار..ضغطي صعد
من سمعتها..
ششنو؟
شوية وحيد ع كيفك وي روحك..كلشي
ينحل..
شينحل واحنا مدخلين لبيتنا حرامي..
تعرفين الحرامي طلع منوو؟؟
انا جابو سيرة الحرامي وعيوني زغللت..
منوووو..
حيدر ابن خالتج..
عزاااا..
نصبو عزاه الساقط المنحط..
الضابط متابع الموضوع ماعايفه..
وخلا جمع الادلة لاكفي ..ومعتقلي
اليوم..
بس شلوون بابا يعني ليش ..حجيتها وتذكرت
حجاية حيادر..الحرامي كان قاصدج انت..
وفعلا طلع قاصدني انا!!!
بعد نفسه ضعيفة للاسف..وهو الي مطلع حجاية
عليج بالكلية..
هنا نزلت دموعي..واستحيت من بابا كلش..
ماتمنيت هيجي يصير بيه
ويحجون بسمعة بته..
لا تبجين دموعج تغسله وتجفنه..انا اله
بس خل ياكل نصيبه من الحكومة
وانا اعرف شسوي بي..
ززين بابا منو كال هو طلع الحجاية عليه..
حيادر حجالي..كال اليوم اجاني ولد اعرفه
يداوم بقسمكم..
كال يابه ترى واحد ذاب عليك حجاية..ويكول
عندك علاقة ببت عم جنتكم..
هو من سامع هيج نعم الله عليه ماخذته
الغيرة..
سائل عن السالفة ومنو مطلع الحجاية..
الى
ان عارف حيدر مطلعها عليج ..
من جان يجي لكليتج بحجة هو طالب بغير كلية..
ومسويله جماعة هناك وهو مطلع الحجاية..
انا من سمعت هيج زاد قهري..
واكثر قهري ع ابوي..بقيت مدنكة ودموعي تصب..
ماما خلت ايدها

ع ايدي..كافي بجي..حمدي
ربج انكشف النا..وطلع ع حقيقته ماتورطتي
بي..
بابا كال روحي لغرفتج ارتاحي..حقج اخذه منه..
بس لا تحجون شي كدام الولد..
ذول شباب ودمهم حار..لا يسوون
شي ويخربون الاول والتالي..
كامت ماما وكومتني وياها..روحي ارتاحي
بغرفتج ماما..
هزيت راسي وانا مدنكة..
رحت للغرفة وسديت الباب...
كعدت بالكاع وبقيت ابجي..ابجي من كلشي..
واولها حيادر شلون يجي يحجي لاهلي
عن الحجاية الطالعة عليه..
احس بخجل وماريد احط وجهي بوجههم
بعد..
ليش ماكلي بيناتنا..ليش معقولة عاقبني
ع تركي اله..
والعجيب حيدر ودوسته لبيتنا..بكل صلافة
يجي ويكعد ويسولف..
وباول مرة اكون وحدي واهلي بشدة..يجي
يدوس بيتنا ويرعبني ويرعبهم..
شكد ناقص وعديم غيرة..ماتوقعته لهالدرجة
خنزير..
لزمت الفون..وانا مترددة..احاجي حيادر
وافهم منه الصار!
لو شنو اسوي ماادري..
بس ماريد احاجي اريده هو يحاجيني..
اجت ببالي فكرة..اخلي صورتي الشخصية..
واشوف اذا مهتملي..يباوع لرقمي
كلساع..
لا مو بباله ماينتبه..
عندي صورة بلبنان جاي اركض والموج مالت
الماي وراي..
لابسه بنطرون ورافعته للسيقان وقميص ملفوف من الصدر
ومشدود من جوا..
وقبعة ونظارة شمسية..
ثبتتها وبقيت فاتحة واتساب..حذفت المسجات
المااريدها ..والصور..
عندي كروب صارلي شهر ماحاجيه بي..
دخلت توني مسلمة..
واجاني اتصال منه..
بقت ايدي ترجف..كمت قفلت الباب
وانا اباوع محتارة ارد لو لا..
انكطع الخط وخابت امالي..
رجع دك مرة ثانية..
جريت نفس وعدلت صوتي..فتحت خط..
اجاني صوته ويمه هدوووء تام..
شكد جهات اتصالج؟؟
حجيت باستغراب..
ها!
وعلّاه..جاوبي..
مادري بس اهلي واقاربي وصديقاتي..
جيد..يعني الليلة اليهمها امرج..
كلها تسهر عليج ..
ها..
تسوي السالفة وتكول ها..ولج صورتج
تغيريها لا اليوم اطلع
ضيم گلبي كله بيج..
اي هسه اغيرها..
غيريها واحجي بعدالة ترى موش روح
يوسف عدي..
عزا ..ماقصدي بس بالكنتور انا واحجي
اخاف ماما تسمع..
ها خير انشالله..
اي مارايده منك شي العفو..بس ردت اعرف
شلون عرفتو الحرامي وشلون يعني
الحجاية منه طلعت؟
ماحاجة تعرفين شلون..المهم حگج ينوخذ..
ومرة الثانية تفتحين عيونج عدل..
على كل الحواليج..
اممم ..براحتك واسفة ازعجتك..هاي
اخر مرة نحجي بعد..
اي احسن هذا افضل تصرف..
انا هم رجال وراي سفر وطلعة مافارغ..
دربالج ع روحج وذكرينا بطيب..
وين ..ا اي اي براحتك ..
شي يخصني..واكيد اهم شي راحتي..
اوكي باي..حجيتها وطاحت دموعي..
بامان الله..قبل لا يكملها قفلت الفون كبل..
عفته بصفي بالكنتور..وبقيت كاعدة ع نفس
وضعي..
دموعي تصب واحس خسرته كلش..
والسبب حنين..الي لهسه ماكدر اجاوبها..
لان گلبي يوجعني مجرد اشوف اسمها..
ماتوقعت لحظة هي تضرني..
بقيت ع كعدتي مكرفصة روحي وحاطة
راسي ع ركباتي..
ال ان غفيت ع هالوضع..
فزيت نص الليل..بس مكسرة تكسير من كعدتي..
طلعت جريت نفسي للفراش كوة..
غطيت راسي ورجعت نمت..لان بس اتنشط تروح
نومتي...
****************
كاعدة بعيادة الدكتورة..واباوع للمراجعات
اغلبهن حوامل..وكم وحدة لا..
تلمست بطني وانا خايفة..خايفة لا افقده
هالمرة وتصير المرة الرابعة..
صاحو بأسمي..كمت ع كيف وانا لازمة
ظهري..
راد يجي وياي كتله ماحاجة..انا اروح..
قافلة عليه كلش..واحس هذا الطفل اخر امل..
دخلت لغرفة الدكتورة..سلمت عليها وهي
كامت طلعت من ورا المكتب..
وانا كعدت ع الكرسي..هي حضرت السونار وتسولف..
انشالله وضعج احسن شاها؟
غير عن كل مرة دكتورة..
انشالله نكول خير..
صعدي خل نشوف..
صعدت وساعدتني بالصعدة..رفعت الفستان
وطلعت بطني..
صبتلي الجل وتقلصت..
ضحكت وعيونها تتجول ع الجهاز..
بتج جاي تكمز ببطنج..
ياي بنووتة..
اي ماشاء الله..
بنوته دنفوشة امبينة ..
صدك ..
اي حجمها كلش تمام..بس يمكن جان
فستانج حاصرها..
اشو هسه كامت تلعب..
ههه تدلل بعد مالبسه..
اي خطية لا تحصريها امبينة وكيحة مثل
اهلها..
ههه ..يعني وضعها كله زين..
حجت وهي تمسح بطني بالكلينكس..
انشالله زين..
المهم دربالج ع نفسج..ووضعج يبقى
نفسه..
لا حركة لا تعب..فيتامينات كلها بوقتها ..
ونكول خير..
هسه انت بداية الخامس..
وهذا الوقت الي نخاف منه بالاطفال
السابقين..
المفروض نشدد حرص هالايام كلش..
انشالله اكيد..اتبع كل التعلميات وماتعب ابد..
عفية عليج..ولا تنسين الكلور ابدا لا تقربيله..
اي اي تاركته صارلي هواي معتمدة ع الديتول..
اي عفية..
ماتحتاجين دوا بس الفيتامين والمثبت اخذي
نفسه..
اوكي شكراً..
طلعت وانا لازمة صورة السونار بيدي..
وقلبي يرجف..اريد هالمرة تتم ع خير..
ثلث مرات اطلع بهالفرحة ويموت ببطني..
ماتحمل بعد ..
لكيته واكف ينتظرني..
انطيته الصورة مالت السونار..باوعها وابتسم..
شنو الوضع طمنيني..
تكول كلشي تمام..بس هالايام الي ينخاف منها..
لازم احرص كلش..
لحد ماتتعدى مرحلة الخطر..
لا تشيلين هم..بس نامي ولا تفكرين بشي..
انا اجيبلج ام خالد تساعدج ..
لا عليمن هو البيت مايتعب والطبخ وانا كاعدة..
الطبخ ماتدني

له..
لا تشلعين كلبي..خليها تعدي ويانا ع خير..
الله كريم..
يلا نزعي خل اجيبلج ملابس..
اي خليهم هنا وانا البس..
باوعلي بطرف عينه..فتح الكنتور انطاني
ثوب قصير ..
هج هذا اريحلج واسع..
اي خلي..
اساعدج؟
لا اكدر عادي..
زين..رايح انا اتوضى ..
راح للحمام دخل..كمت انا ولازمة بطني ع كيف..
بدلت ملابسي..
علكتها وكعدت انتظره..
طلع من الحمام ..دك الفون مالته..انطيته
اله ودخلت..
توضيت وطلعت..سمعته يحاجي امه..
جانت تتطمن وتسال..لان تدري رحنا للدكتور..
شوية وسدة وكال يسلمون..
كتله الله يسلمك..
وكف صلى ..وصليت وراه..بس ع كيفي
كلش..
شوية شوية اكوم..نفسيتي تعبانة وخوفي
ينعاد الصار..
كملت صلاة وهو كعد يقرا..
تمددت بالفراش..
هو خلص وكام..
جوعانة اجيبلج العشا؟
لا بعد شوية ..اريد اخابر ماما..
اخذي راحتج..ع ماتخلصين..اروح
احميلج التشريب..
اوكي..
طلع من الغرفة..وانا كمت اشوف
الفون مدري وين خليته..
جاي ادور ع الميز ماكو..
اريد ارجع وانطبكت الزولية جواي..
عثرت وطحت ع ظهري ..بس هي طيحة
وهي صرخة..
صرخة مو من وجع..
لا صرخة فقدت بيها الامل..
حسيت انا مامقسوملي طفل..
لان كل مرة بلا طيحة وبلا اي تعب..يموت
بهذا الشهر..
هالمرة طحت يعني يأست..
دخل يركض ومرعوب..شنووو صار..
شكووومج..
دموعي تصب واهز براسي..ماريدها
تمووت..
استغفرالله استغفرالله كولي يارب..
سندني وجابني للجرباية..
تمددت ورفعلي رجليه ع المخدات..
اخذ الفون وخابر الدكتورة..
كلها عثرت وطاحت..سالته اكو نزف شي..
كلها ماكو..
كالت اذا لا الم ولا نزف يعني ماكو ضرر بس
هدو روحكم ولا تفاولون..
بقى مكابلني وساكت..
وانا ابجي بسكتة..
شوية وكام جاب صينية العشا..
ماقبلت اكل..
اخذتلي لكمة وحدة وعفته..
هو هم مااكل بس يباوعلي بغيظ ومتعصب..
اخر شي عاط..
ويمتى تاكلين خاتون هااا؟
ماريد..
لا تردين وغصبا عليج ..ولو اخاف ع الطفلة
الا اكسرج تكسر لان كلش
مهملة..
للحكاية بقية

الشيهانة
الجزء السابع عشر
نفسي مسدودة ونعسانة..خليني انام احسن..
لا مانعسانة بس تعاندين..هيج تضرين نفسج
ترى..
ونفسيتج هي الي تأثر ع الطفل وتأذي..
يعني انا السبب؟؟
انت جاي تكول انت تكتلين الطفل انت تموتي!!
استغفرالله..جم مرة اكلج اذا عاش الطفل
واذا مات..قدر ربج هذا..
والكاتبة يصير..والمهم انت عندي كلش كافي..
بس انا اريده..هذا اخر امل الي..
اذا صار ببتي شي ماابقى وياك..
هه ههه ههههه ..اي هيج كولي من الاول..
هذا التريدينه..
اي اعرف اعرف..تزوجتيني غصب
عنج..
ووي كل طفل يموت تكرهيني اكثر..
تحمليني الذنب انا..
لا مو ذنبك..حجيتها بتعب وانا يائسة..
وحقك تضوج..
بس انا تعبت..شفت اشكال والوان الضيم..
وعشت عمري كله محرومة من اخت ..
حتى الاعتبرتها اختي لدغتني واقصى
اشكال الاذية اذتني..
ردت طفل يكون قريب مني..اعيش
ويا طفولتي ويعيش وياي شبابه ..
وانت هم حقك تصير اب وتفتخر باطفالك..
الكل تزوج وخلف وانت ماعندك..
اخوانك واخواتك واقاربك ..تحز بنفسك
بس تسكت حتى لا تجرحني..
هذا الشي يعذبني اكثر..
وانت مامجبور عليه بعد..اذا عاشت بتي
نبقى سوا..
اذا مثل اخوانها البقية..نص الخامس وتموت ..
كلمن يروح بسبيله..
وثنينا نرتاح ..لا انت مجبور تتحملني ولا انا
الاكدر انطيك مبتغاك..
ماباوع بوجهي ابد..اخذ باكيت الجكاير
والجداحة وطلع..
وانا بقيت بفراشي ابجي بصمت ...
استرجع ايام قبل ..ايام الي كلشي بيها
صار ضدي..
من غدر حنين لطعن حيدر بشرفي ل....
فراقي وي..حيادر...
******هنا خاف تدوخون..راح نرجع لاخر شي وكفنا بي من جانت تخابر حيادر بالكنتور وطلعت نامت بفراشها********
طلعت من الكنتور ونمت بفراشي بسرعة..لان
اخاف تطير نومتي..
طولت يوم ثاني للساعة ١١ ونص يلا كعدت..
مالي خلك اكوم واحس ثقل الدنيا
كله ع ظهري..
بقيت بالفراش متعاجزة اكوم..
اخر شي صار وقت اذان..
كمت اخذتلي ملابس ورحت للحمام..
سبحت وطلعت..امي كاعدة بالصالة تصلي..
من شافتني طلعت عينها عليه..
ابتسمتلها ومشيت للغرفة..ماريدها
تضوج لان هواي متعبتها انا..
مشطت وصليت وطلعت يمها..
لكيتها بالمطبخ جاي تطبخ التمن..
صباح الخير ..
هلا ماما صح النوم..شلونج؟؟
لا احسن الحمدلله..لا يضل بالج..
شمسوية غدا؟
مركة سمج ابوج مشتهي وسويت..بس انت
طلعتلج روبيان..
اي فديتج ..
فدوة لعمرج بنيتي..صيري شجاعة وانسي
كلشي..
والصار حسبي دروس..الحياة بلا دروس
مانكدر ننجح بيها..
والدرس اليوجعنا ينطينا نتيجة تسوى..
غرغرت عيوني وانا اتذكر حجي حيادر
البارحة..
بس قويت نفسي..وكلت لازم اتحمل..كلشي
من ايدي..
وهو فعلا وفى ووكف وتحمل..
بس انا مهزوزة دائماً..
لازم ادفع هذا الثمن..
ماما مشتهية كيكة علميني اسوي..
اي ياريت..حضري المواد حتى اعلمج..
وبعد الطبخ كل يوم كعدي
يمي شوية..
لازم تتعلمين ماما افيدلج..
اي هو انا اريد اتعلم..
حضرتلها مواد الكيكة والماعرفه ذكرتني
بي وطلعته..
بقت تخلط وتعلمني..جان فونها يمها..
اخذته وكتلها خل اصورج حتى احفظ الخطوات..
لان فوني بقى بالغرفة..
كملت وحطتها بالقالب..كملت التصوير ودزيته
لفوني...
اخذت الطاسة
مالت الخلط اكل الباقي منها..
من جنا صغار نتعارك ع اليبقى بالطاسة
وناكل بي..
بعدها رجعت للغرفة اريد اخذ الفون..
مالكيته..
دورت الغرفة كلها..
فراشي نفضته ماكو..
طلعت سالت ماما..استغربت وبقت
تدور وياي..
بقت تدك عليه مغلق..!
بقينا محتارين..
وحدة تسأل الثانية وين اختفى..
غرفتي كلها دورتها والبيت كذلك ..
ماكو ماله اي اثر..
بقيت صافنة وين راح وانا البارحة خاب..
يااا بقى بالكنتور!!وانا اصلا غلقته
البارحة..
تسحبت من يم ماما..خاف تشوفني..
دخلت للغرفة بسرعة وفتحت الكنتور الباب السلايد..
لكيته بالارضية همزين..
جريته بسرعة وطلعت..
شافتني ماما ..هاااا لكيتي اي الحمدلله..
اي تذكرت..جنت اسمع اغاني وارتب بالجرار
مالت الجنط..
ومخليته هناك ..
اي زين المهم لكيتي..
خل اجيب الشاحنة لان مخلص شحن..
رحت جبت شاحنتي وكعدت يمها نباوع مسلسل..
اول مافتحت الفون..اجوني هواي مسجات..
ومن ضمنها..
سديتي الخط بوجهي!!يصير خير وجناحج اكصكصه
بيدي ..يشيهانة..
قريت وبلعت ريك..رجفة مشت بيه..
حذفت المسج بسرعة..
ومسجات حنين الي كلش جانت هواي
امس..
اليوم ولا مسج!!
ليش !يمكن زعلت لان ماجاوبتها..
اوك خليها اشوفها وين توصل وياها..
للساعة ثلاثة اجه بابا ومحمد..تغدينا
وكعدو يشربون جاي..
محمد صعد وانا بقيت يمهم..
باوعلي وباوع لماما..شلونكم؟؟
زينين...
خابروج بعد!سأل ماما..
لا ماخابرت ..حجتها بقهر..
استغربت منو خابر ماخابر..
منو ماما شنو!؟
خابرتني خالتج..تكول حيدر محجوز ومايعرفون
ليش..
شلون مياعرفون!
اي ماما لان بعدهم بس واصللهم خبر..
ماراحو وشافو البلوة الاجتلهم من وراه..
خطية الله يساعدهم..ولو اتوقع مايخابرون
بعد ..يعني بيا عين..
لا ماما الضنى عزيز ..والاهل يذلون
نفسهم لخاطره..
ماعرف بعد..انتو اعرف..
حجه بابا..لا تخلين ببالج..ابن اخو الشيخ
كال راح نأدبه تأديبة

تسوى..
وانا مستحي من حيادر كلش..وكفته وكفة
ماتتجازى..
انا من حجه هيج راحت عيني لماما..
وهي تباوعلي صفح..
كمت بسرعة ورحت لغرفتي..
دخلت سديت الباب بسرعة..
تالي تذكرت شبيه غبية!مو بابا حان يحجي
وبسيرة حيادر..وانا كمت..
بس خفت من ماما انا..
يلا احسن..ماتذبلها عليه حجاية..
مر اليوم..ويوم ثاني..اجو بيت خالة ام حيدر
لبيتنا..
واعتذرو ورادو بس يروح بابا يسقط
الدعوة..
بس ابد ماقبل..
انا مطلعت ماما كلت الهم ببيت عمها راحت..
وشكد حاولو وع كولة ماما..الاهل يذلون
نفسهم لخاطر اولادهم...
بس بابا قافل كلش..والا شوية يطردهم..
بنفس اليوم بالليل ..حسن لح ع ماما
وكلها روحي باجر خطبيلي..
هي كلتله تدلل ميخالف..
بس لازم ننطيهم خبر قبل لا نجي..
كلتلي جيبي رقم امها من حنين..كتلها راسلتها
وماجاوبت..
يو ثاني مقررين يروحون العصر..
بس ماحصلو رقم..
لان ماما كل ماتسالني..اكلها حنين ماتجاوب
دومها مشغولة..
وحسن يلح كلساع وخابر وهو بالشغل..
ويلح روحي وروحي..
اخر شي ماما كالت نروح..بس تاخذ وياها
مرت عمو..
من بدلو ويريد يطلعون..حاجتني ع جهة
لوحدنا..
لا تضوجين لان مااخذتج..بس اخاف اخذج
ويحرجونا ويسووها كصة بكصة..
اي اعرف ماما لا يضل بالج..روحو خطية
حسن ..
بعد عمري الحنينة..باستني وطلعت..
بقيت بالبيت بس انا وبابا..بقينا كاعدين
نباوع اخبار..
وشوية نسولف..
الى ان..اجت ماما من بيت اهل حيادر..
دخلو هي ومحمد بس وجوههم ضاحكة..
جايبين وياهم بقلاوة ..حطها محمد ع الطبلة
وكعد..
بابا سالهم بضحكة..
مدام جايبين بقلاوة معناها الاخبار تبشر
بخير..
ضحكت ماما..الحمدلله..جنت خايفة كلش..
بس البنية مو مثل الشفتهن ماينبلعن..
فقيرة وهادئة ورزنة..
يا الله ..شتكولين يرتاح وياها ..انت نظرتج ماتخيب..سألها بابا..
انشالله يرتاح..
لان امها طيبة..من عرس حنين عرفتها حبابة و
صاحبة ملكى واحترام..
ومدام امها زينة ماتتعبنا انشالله..
بيها الخير يوم لمحمد انشالله ..
محمد ابتسم وكام..من رخصتكم اروح اصلي..
جرت ماما حسرة واستغفرت..
وانا صافنة ع ماما..جنها كلش راضية
ع هاجر..
رغم جانت مترددة ومتخوفة..
بس يمكن ماتريد يصير بحسن مثل محمد
ويبقى بحسرة اليحبها..صح ماكو شبه
بس مارادته ينحرم من رغبته...
من اجه وعرف كلش فرح وكعد يكول
لماما شنو حجو وشنو طلبو..
بس كالت بعدهم يشاورون اهلها وينطونا جواب..
بس هو مستعجل ..هيج اسوي حفلة
وهيج مكان وبقى يخطط لحد ماكله بابا..
ماتحجيلنا شسوي بالعرس فد مرة!!
كوم يلا كوووم...
خطية كام وهو يدردم..
ورا يومين ردو خبر..ابوها وعمامها قابلين..
ويمتى ما تردون تعالو..
قررت ماما تروح الجمعة بعد يومين..
وكالت امشي ويانا بعد مدام اخذنا موافقة منهم
مانخاف من شي..
انا متخوفة..بين اروح وبين ماروح ..منا
اشوف حنين وشلون اتحمل الزم نفسي..
ومنا..اخاف من شوفة حيادر..
بالاخير استسلمت..وقررت اروح واواجه
كافي اتهرب..
تحضرنا الجمعة وكملنا غدانا من وكت..
ورا الغدا ماما خابرت امها..
مرتين ماجاوبت...
اخر شي جاوبت..بس ماما مافهمت منها
شي لان تمشي وتحجي ..
ورا ماسدته كعدت ..
ها شنو ماما شصاير!
مانكدر نروح ماما..البنية خالتها بالانعاش
وامها خطية رايحة للمستشفى..
عزا خطية شبيها..
تكول والدة وصاير عدها نزيف وماجاي
يوكف..
اوي خطية الله يشافيها..
الله يشافيها ويسهل ..
وانلغت الروحة وخطية حسن ضل يلوب..
بس طمنته كتله مدام انطوك حجاية وموافقين
بعد لا تخاف..
ماجنت ادري بخبث حنين وبهادر وحقدهم..
ورا خمسة ايام خالة هاجر توفت..
عافت وراها خمس اطفال والسادس الي
توه صار..
راحت ماما وي مرت عمو للفاتحة..خطية
اجت تسولف عنهم تكول كلش منهارين..
وحسن كاعد ومقهور..وكل شوية يسأل زين
هاجر خو ماتبجي خو ما تعبانة..
بس ماما تكول هم تعبانة وبس تشتغل وكلهم مقهورين..
سألني اذا اكدر ادبرله رقمها..كتله حنين
ماتقبل وماكدر اطلب هالشي..
وهي البنية من عائلة محافظة واكيد ماتريد تسببلها
مشكلة..
بس طلب اتواصل وياها انا واطمنه عليها..
وافقت بس جنت محتارة منين اجيب
رقمها..
واذا عدها فون اصلا ..
طبعا حنين لهسة ماراسلتني لو حجت
او سألت ابد..
كلت الظاهر جانت تنتظر هالشي ..
اووو..ممكن حيادر كلها!!يعني ممكن كلها
انا عرفت كلشي..
احتمال..كلشي اتوقع ..والاعرفه حيادر مايخلي
موضوع متعطل..
يدخل مباشرة بدون اي انعطافات..
اخذت رقم ام هاجر من فون ماما..خابرتها
وعزيتها..
وطلبت احاجي هاجر..
من حاجتني جان صوتها تعبان حيل..
سلمت عليها وسالتها عن احوالها وهالامور..
بس هي تحجي كوة..
توقعت تعبانة من العزاء ومقهورة ع خالتها..
سالتها اذا عدها فون..بس طلع ماعدها
وحسب قولها..احنا البنية لحد مانخطب رجلها
اذا قبل تخلي فون يجييبلها وي تجهيزاتها
واذا ماقبل..تبقى بلا فون :.
كتلها اتواصل وياج ع رقم امج..
وراسليني شوكت ماتريدين..وحسن
يسلم عليج هواي وباله يمج..
بس هي اختنك صوتها..وكالت مع السلامة..
من كلت لحسن تخبل بالزايد..
وعفية شوفيها شبيها ..
ورجعي خابري..
كوة قنعته

ماكدر كلساع..
وبقى ع هالحال كل يوم كال خابري وارفض..
عيب من امها لان صح هي تعرفني من عرس
حنين ..بس مو لدرجة ابقى اخابر
يومية..
حيدر انرفعت قضيته وتحاكم ..صدر حكم
سجن خمس سنوات..
بس اهله انجنو واجو توسلو وبالاخير تعاركو..
بس ماقبل بابا يتدخل بشي..
بس ماما انقهرت على خالة..وكالت حقها
حتى لو ابنها سيء بس هي امه..
وشكد حاجت بابا يتدخل بس ماقبل..
كلها جنت ناوي اكعده عشاير واذله..
ماريد البنية ينحجي بيها بديوان..
وع كولة حيادر ابن الشيخ..خلي القانون
ياخذ حقكم منه..
بتهمة سرقة البيت والفلوس..
ولا تصير عشاير ويسوو دايس
بيتكم وجاي على بتكم..
ساعتها مو حلوة بحقها تنحجي بهالحجاية وهي
بت بيت مستورة...
وفعلا بابا سد الموضوع وخصوصا كدام
اخواني ماانفتح مطلقاً..
وحتى كدامي بقو مايحجون بي
لو يذكرو..
لان صدك ذيك الايام تعبت نفسيتي وهالموضوع
يضوج..
مر شهر تقريبا..
وبيوم بارد يكص العظم..
جنت نايمة بالمنامة مالتي..ساعة ١١ بالليل..
دفيانة وجاي اقرا قصة
بالفيس..
دك الفون مالتي..ام هاجر تخابر..
جاوبتها ..اجاني صوت ناصي ويرجف..
صوت هاجر وهي تتنفس حيل..
الو عفية شاها..
هلو هاجر شبيج؟؟سلامات..
اريدج تساعديني..
اي كولي تدللي!!؟
باعي عفية..راح احجي بسرعة اخاف احد
يجي..
اي اسمع احجي..
شوفي عمامي يريد يزوجوني لرجل خالتي..
هو يصير ابن عمهم ..وكلهم اريدها تربي
جهال خالتها..
وهم قابلين..الله يخليج ساعدوني..
انا..انا اريده حسن...حجت وبجت..
عزا صدك يحجون!!
زين عمامج كلهم قابلين؟؟؟
لا عمي حيادر مايدري ..بس عمي بهادر وعمي جابر..
هو من ماتت رادني..بس انتظر تفوت اربعينها
ويجي لاهلي..
واليوم اجه وعمامي كلوله تامر امر..
استغفرالله..عمامج شكد ظالمين..
باعي انت روحي لا احد يسمعج..
وانا اشوف شنسوي..بس اهم شي رفضي..
لو يشبعوج كتل لا تقبلين اوك؟؟
اي اي مدام حسن رايدني ارفض..
سديته منها وانا محتارة..شسوي هسه!
اذا اكول لحسن يجوز يكابلني ويضل يلطم..
هسه يكول شكد انتظرت وتالي نطوها ..
واخاف يسوي مشكلة..
بقيت افكر واجيب فكرة ع فكرة..
هي كالت حيادر مايدري!!يعني هم ماكايليله
لو صدفة ماجان موجود!
حتى اشوف اذا ماحاجين كدامه معناها ضد فكرتهم..
لا زم اتأكد بالاول..
دزيت رسالة لامها..ع الواتساب..
مرحبا ..اكدر احاجي هاجر شوية..
هلا بيج حبوبة..كليلي عادي شتردين منها..
انا وياها مصيبتنا وحدة..
وانا شجعتها تحاجيج تشوفيلها حل..
يعني شنو؟
يعني ماريد بنيتي تنظلم وي رجال بكد ابوها
وعده ست جهال..
صح جهال اختي وعزاز عندي..
بس رجلها ظالم واخس من اخواني وحمويني...
الله يساعدكم...اكلج هي كالت حيادر مايدري صح؟
يا بعد عيني ابو علي مايدري..وحذرو علينا
مانحجي شي كدامه..
كالو نكسر ظهرها التحجي..
منو علي!!حجيت برجفة..هو عمها حيادر احنا
نسمي ابو علي..
هااا..
زين ابوها قابل؟
ابوها يكول عمامها يعرفون مصلحتها..
وهو ابن عمنا شكو بيها..
لعد اذا هيجي مقتنعين وحاسبين الموضوع عادي..
ليش ضامي عن حيادر!قصدي عمها حيادر..
مو ضمو..بس عمها بهادر كال..لا تحجون كدام
حيادر لان يكره كريم رجل اختي..وخاف مايقبل
ننطيها اله..
وهي مطلكة ..وانتو حجيتو بيها وبعد ماجيتو ..
منو يريدها..!
اوف هم بهادر ..
يا خية هو ومرته ساگينه المر ومرمرونه..
استغفرالله..انت ليش ماكتيلهم ع اتفاق ماما..
مو خابرتج وكالت بس تطلع الاربعين تنقري
فاتحتهم ونعقدلهم؟وانتو ناطين كلمة يعني..
خية حجيت وكلت..
بس بت عمج الله يسلمها..
حشت راس رجلها وتخبل علينا..ورجلي
فقير ماعنده كهن بهادر وجابر..
اذا هيج يصير خير..لا يبقى بالج..
وكلشي لا تحجون..
انا راح اتصرف..
يابعد عمري ينطيج العافية ويدفع عنج شر بني ادم..
تسلمين مشكورة ..
خلصت مراسلة وياها..وانا اغلي اكثر..
ومقهورة اكثر..
حنين هاي لو بدلوها!
وليش هيج تسوي..هسه انا تاذيني عادي..
بس اخوي هم!!
بسيطة هي امبينة مالها غير حيادر يحلها..
باوعت الساعة ١٢..بس لازم اخابره..
حتى لو عيب ووقت متأخر..حتى لو فكر
بيه غير تفكير وهو طردني..
بس لخاطر حسن وهاجر خطية..
دكيت عليه وقلبي يدك حيييل...
انكطع الخط وماجاوب..
يأست وتوقعت مايريد يجاوب لان هو كلي
بعد البينا انتهى..
بس شوية ودك..
لزمت الفون واتنفس سريع..
هدأت نفسي وفتحت خط..
اسمع صوت اغاني عالية..شوية وصار هدوء..
الو؟؟!
حجيت بصوت ناصي ..الو..
تنهد وحجه..عاش من سمع هالانفاس..لا ..عساه
مات ..كلمن سمعها غيري..
حيادر..حجيت همس..
اخ يابة ..غردي بعد غردي..
للحكاية بقية

الشيهانة
الجزء الثامن عشر
اي غردي بعد غردي..
شلونك...
لوني مساع مخطوف..هسه لوني ردلي..
مرتاح؟
لا متعذب..صوتج هسه يحفر براسي
ويوسوس الي..
اممم..تدري نسيت ليش خابرتك!
تعاي بحضني..
ابقي يمي
...ابقي يمي
لركصلج ركص منهوب
اخليها الغجر تحتار عني تكول متعافي
وادبجلج دبج معدان اوصل الطين لجتافي
يلكصيتي شعرج ليش شعرج ليل
وين انروح صار الليل مو كافي...
اخ بوية مشتاگ لشعرج ...وصوت انفاسج
حارشني وانا رجال ماسكت ع الحرشة..
هو يحجي وانا فصلت عن الكون كله..
تركيزي ويا ..وي كل كلمة يحجيها ..قلبي
يزيد نبض ..جسمي يزيد دفو رغم الجو
يكص..
ها جنها سكنت انفاسج..شني خلصت المعركة
وخذيتي استراحة مقاتل؟
شنو يعني..لا انتظرك تحجي..حجيت بهدوء..
بس انت المخابرتني مو انا!غير انت تحجين..
لو دوخج حجي الليل..هو الحجي بتوالي الليل يحلى..
مايهمج شسمعتي..عذريني اشتاگيت
و وزني الشيطان..
لازم ماحجي شي يمج..باعتبارج غريبة..
اممم اوكي ..صح غريبة..بس اريد احاجيك
بموضوع..واعتقد انت تفزع للغريبة صح؟
له له ..طلع لسانج يشيهانة..كولي وانتخي..
يعني..هو الموضوع يخص اخوي وهاجر بنت
اخوك..
اي خيرهم ؟
انتو مو انطيتو كلمة ووافقتو على حسن؟
طبعا..وبعدها حجايتنا ..ليش؟
اليوم خابرت امها كالت ..زوج خالتها التوفت..
خاطبها وابوها وعمامها قابلين..
هاي يمته جاي هذا الاغم..مو حجه بالسالفة
وكتله افگس عينك اذا حطيتها عليها..
ماعرف بس هي كالت قابلين..وخطية
يعني بعدها شابة ليش تتحطم..
واخوي اذا سمع ..انتو ناطي كلمة ورجعتو
بيها..
ها حدج حدج..اليرجع بحجايته هذا
لا زلمة ولا ينعد ع الزلم..
هسه نايمين ماكدر اسويلي هوسة..
باجر ورا الظهر..خلي اهلج يجون ويتفقون
ع الباقي..
وانا موجود واريد ابن ابوه يحجي..
ها يعني اكول لماما تجي باجر؟
اي كليلها ..وكل مافضت بسرعة احسن..
مو حلو التجرجر ..واحنا اهل ومابينا كلفة..
اوكي الصبح اكلها..و...
اسفة ازعجتك..
هه ههه..روحي احسنلج..لا اعمرلي راس
نرگيلة ثاني ..وهالمرة ادخل بخطيتي وخطيتج
سوا..
ها..لا رايحة رايحة باي..
هههه مع السلامة..ضحك بأنزعاج..
وانا سديت الخط وطلعت من المنامة اهفي..
احس احتريت ودخت ومدري شبيه..
استرجع كلامه وي روحي..عزا اليوم مو
راحة كلش..
معقولة!!لا لا انا صاير تفكيري وسخ..
بس اهم شي تطمنت ع حسن وهاجر..
زين شكول لامي!
اكلها امها خابرتني وكالت تكدرون تجون..
باعتبارها تستحي تخابر امي..
اي هذا احسن حل..
راسلت حسن وكتله باجر نروح لبيت
هاجر..
وبقى يوصي ويسولف خطية فرحان حيل..
يوم ثاني كلت لامي..وكالت اي احسن
حتى لو بس عقد..لان هم ماعدهم بنية
ينحجي بيها وتطول ..
وهم حجت وي بابا واتفقو ع المراسيم التجي
كلها..
العصر من رادت تروح..اجتلي للغرفة
عبالها مبدلة ..
شافتني كاعدة محتارة وصافنة..
ها شو بعدج؟؟
ماروح ماما..
لا مايصير..انت اخته وعيب تعتبر..هم ناس
يدورون عادات واصول..
هسه يكولون اخته ماجاية..
كومي استعجلي يلا حتى نلحك نروح ونرجع
من وكت..
كمت غسلت ورتبت وجهي..
وكفت بالكنتور محتارة..
تالي اخذت فستان اسود كيبور..ووياه
شال احمر وبالطرف زخرفة قليلة..
خلصت وباوعت لنفسي بالمراية..
تالي صفنت ع الشال..لا عيب اروح
باحمر وهي خالتها ميتة..
بدلته لبست بيجي ..وكملت اخذت جنطتي
وطلعت..
لكيت ماما وبابا بالصالة ينتظرون..
اجيت امشي..ماما باوعت مبتسمة..
الله يحرسج..خل احطلج ملح شوية بجنطتج..
ياا لا ماما عفية بس افتحها يطشر..
هههه ارش عليج شوية..
لا فدوة لا..حجيتها وانا امشي سريع..
رحت صعدت بالسيارة واجت لحكتني وطشت
عليه شوية ملح..
وطول الطريق وهي عينها عليه..
احسها خايفة من روحتي الهم..عبالك راح
تخليني هناك وتجي..
انا منا متوترة وافكر ..حيادر مالي تفكيري..
حنين الي ماعرف شسوي من اشوفها..
موضوعها ذابح قلبي..
صعب من حاسبتهااخت ..وبيوم وليلة اعرف
هي تكيدلي..
وبلا سبب!!
وصلنا لبيتهم..نزلنا بالباب..جان محد يم البيت..
بس باب الديون الخارجي مفتوح..
دكينا الباب ..ورا شوية ..فتحه اخو هاجر...
عرفته العريس نفسه لان شفته بالصور..
دنك بس شافنا ومشى كدامنا..
حياكم الله اهلا وسهلا ..تفضلو..
مشينا وراه ودخلنا لنفس الاستقبال الجبير
الكعدنا بي..المرة الفاتت..
بسرعة دخلت النا ام حيادر..وسلمت ومرحبت
وبدت تسولف..
اجت ام هاجر..بس خطية شكلها تعبان تقهر كلش..
رغم هذا وجهها بشوش اريحية..
بدو يحجون بالمهر والتجهيز وهالامور..
بس كالت ابوها ماقبل لا هوسة ولا شي..
مجرد سيد يجي ويعقدون..يكون
العقد بيناتهم..
ماما ماعترضت بشي ابد..شنو يردون تكلهم
اي..
بعد مااتفقنا ع كلشي وقريب نريد نطلع..
اجت هاجر وي مرت عمها ..سلمت وكعدت..
ماما حجت وياها وكالت شنو تطلبين
وشنو يعجبج..
بس هي كلشي عدها بكيفكم..
والاحظ ماما حابتها من خلال حجيهم
سوا..
لان ماما الشخص اذا مارتاحت اله..تحاجي
معلك لحد ماهو يطفش لوحده..
قريب المغرب كلش..خابرنا بابا وترخصنا
منهم..
كمنا نريد نروح..
هذا كله وحنين ابد ماوصلت ولا اجت..
طلعنا من

الاستقبال ومشينا بحديقتهم كلش واسعة..
وهم يسولفون ويانا..
نريد نطلع وانفتح الباب..
دخل حيادر بس مدنك..لابس دشداشة وجفية
لافها ع راسه..
عيوني بقت تنط شوية اله شوية لامي..الس خزرتني..
هو مشى وسلم بس داير وجهه..يعني يحجي
ويانا ويباوع بغير جهة..
ضلو حجية تعشو طلعتكم بيها عيبة النا..
لا ماما مشكور ابو محمد اجه بالباب..
لا صدك ..حجاها ورجع طلع..
احنا هم سلمنا وطلعنا..
بابا نزل من السيارة سلم عليه وحجه
وياه..
ومايقبل نروح الا نتعشى..
بس بابا كله يحتاجون روحه للسوك ..
وانا مواعدهم ماكدر بعد..
واعتذر منه وكله غير مرة نبقى وهذا
بيتنا ومن هالحجي..
انا كعدت بالسيارة بس اخاف ادير
عيني تجاهه..
امي اذا لكفتني تكتلني كدامه..وتروح هيبتي...
بليل كلش قبل لا انام..خابرتني هاجر وامها
شكرو مني..
سالتهم شنو صار اليوم قبل لا نجي..
سولفت امها..حيادر كايل الهم خابروني
الجماعة ويريد يجون يعقدون..
وبهادر كايله ابن عمنا اولى بيها من الغريب..
بس هو مجاوبه..انت متعود تكسر حجي وتجفص..
بس احنا زلم دواوين..
والمرة انطيناها لرجال..اذا تراجعنا كل هيبة
مالنا بعد..
واصلا كريم شنو وانطي مرة؟؟انا حذرته مرة
بس هالمرة لو اجه او حجه..
الا اسكنه الفتحة الرابعة...
عرفت من كلامها حيادر صوته مسموع
وحجايته مهمة..
ويمكن بهادر يضوج لان هو اكبر منه وهيج يحبو...
لان بهادر لا خلقة ولا اخلاص لا شخصية...
مرت كم يوم احنا جهزنا بيها لهاجر..
لان كالت انتو اشترولي الذهب وغيره..
هم عدهم عادات ..اهل العريس يجيبون بالخطوبة
جنطة..بيها عباية وشحاطة وهالاشياء المهمة
وبس قطعة وحدة..
احنا هم ماما اشترتلها عباية حلوة بناتية
ام الردان تصير ..
مو مثل العادية..
وعطورات وشحاطة وحذاء ومكياج وكوستم
مرتب..
حضرناها حتى ناخذها ويانا بيوم العقد..
بيوم العقد تحضرنا بس بيت عمي وعمتي
وعائلتها..
يعني بينا خمس نسوان تقريبا..
بس الزلم لا هواي..باعتبارها رح تصير
كعدة وعد ناس شيوخ..
لازم واحد يبيض وجه..
انا اخذت فستان كصة الحورية وردي خفيف
وشال وميكب توب..
وماما ه لبست قفطان وردي..
وهي طويلة وجسمها مرتب يلوكلها كلش..
اول ما وصلنا والشارع مليان رياجيل..
نزلونا بالكراج ماقبلو ننزل برا..
نزلنا انا وياها وانا جريت الجنطة..اجت ركضت
عليه بنية اخذتها مني..
ويهلون بينا وامبين عليهم فرحانين حيل..
جانت هي ملبسيها مثل الفستان ابيض وبي
شغل ذهبي..
بس باين شكله قديم او احس شايفته!
معقولة مالت حنين!!
تقربت يمها وهي كاعدة جانت بالصالة الثانية
يمها قليل بنات..
على ماتعقد يلا تطلع..
ولو اصلا الحضور كلش قليل من ناحيتنا..
بس هم اهلهم هواي..
سلمت عليها وحضنتني فرحانة..
وركزت بلبسها..هذا متأكدة مالت حنين!
بس ليش مامشتريلها جديد يعني وهو
حالتهم فوق المرتاحة..
ماعرف ليش كمت الوب..احس
حنين متقصدة خلتها تلبسه هذا..
همست باذنهاع كيف..
منو اختارلج اللبس هاجر؟؟
حجت وهي عيونها تتجول بحيرة..
عمة حنين كالت اخذي لبسي فال
حلو..
بالعكس انا سامعة فال مو حلووو..
وليش ماشتريتي ؟مو ماما انطتج وكالت
اشتري رغم لحيتي هي تشتريلج؟؟
خية خليها سكتة خليها..حجت بلهجة يأس..
كومي وياي شوية..وين غرفتج وديني الها..
ها ابدل؟
انا عدي جديدات بس مالبست..
كومي شوية وياي كومي..
كامت وياي وانا سالت البنات..عن الجنطة
الي جبناها..
كالو موجودة هناك بالديوانية الجبيرة..
دزينا عليها وجابوها النا..
اخذتني لغرفة صغيرة..دخلتني كالت
غرفتي انا واختي..
عدها اخت صغيرة يمكن سادس ابتدائي
هيج شي..
وعدها اخت رضيعة..
انا خليتها تسولف وطلعت الها الكوستم..
كتلها كومي بدلي هذا..
شافته هي صفنت..تالي كالت راح اصير
مثلكم هه..
ابتسمتلها وحجيت..انت اصلا مثلنا شنو الفرق..
ويلا تعاي شوفي هذا اختاريته الج
لان عجبني حيل..
يا خية بالعرضة..
الف عافية ملبوس الهنا..يلا لبسي بسرعة..
درت وجهي عنها وهي اخذته لبيت وكملت..
طلع عليها فت..
لان جسمها رفيع وطويلة..
وهو تنورة بينصل اوف وايت وقماشها يرسم
الجسم..
والسترة نازلة شوية للورك ومخصرة..
والتونرالجوا اوف وايت هم ..بس السترة بالجيوب
والصدر بيها نقش ازرق..
شكله كلش مرتب عليها..
من لبسته حسيتها انبهرت..وتباوع لنفسها بالمراية..
شعرها جاي اعدله الها..
واندك الباب..
دخلت بنية صغيرة..يلا يلا هجورة راح
يجي السيد عجلي..
هي وجهها بهت وخافت..انا كلت للبنية روحي
احنا جايين بسرعة..
وبقيت اضحك وياها اكلها شبيج عبالك
رح يعدموج..
بس تكول خايفة من كلشي..هذا الي تحجي
وتبينه افعالها..خايفة من كلشي..
طلعنا وامها وماما اخذوها وحضروها
وكعدت لحد
ماعقدو..
وانا اباوع بالوجوه والناس هم تباوعلي..
مستغربة منهم مدري هم مستغربين مني..
وبين هالوجوه ابد مالمحت حنين لحد هسه!!
بس خلصو العقد وبدت الهلاهل..
وبدا التوزيع..
احنا بقينا ع جهة..
شفت حنين اجت ..لابسة فستان احمر ..ردان
كاملة..
ومليان خرز من تمشي يطلع صوت..
وطويل كلش يمشي وراها..
جانت شايلة سلة كوس المهر وتوزع..
بس ماكدرت اب

اوع لوجهها..احسها
غير شخص..
احسها جانت لابسة قناع ونزعته..
تقربت يمي توزع..
من وصلت يمي..باوعتلي من راسي لحد رجليه..
بنظرات تحمل هواي تفكير..
انطتني علبة وهي تضحك..اخذي
اخذي بلكت تعرسين..
وعبرتني..خلتني صافنة..يمي بنية
كاعدة بعمري شكلها..جانت حامل
بطنها كلش جبيرة..
سالتني..انت من اهل العريس مو..
ايي..
ها يعني تعرفينها هاي..زين ما كصيتها
يمج ههه..
لا ماعرفها كلش..شبيها ليش؟
عوذة شبيها بعد..سايكة ع الجبير والزغير..
حتى الحب الجبتو والجياسة ومالات المهر..
وكفت بالمطبخ وكالت انا اوزعهن..
دربالجن وحدة توزع وتفشلنه..
ههه اي خل توزع ع اساس فد شي جيير يعني؟
لا حبوبة ..بس حتى تصير هي ام البيت ..
انا استأذنت وكمت من يمها ..لان الجاي
اسمعه شي مايشبه شي..
لعد وين تحكمهم بيها..وين كرابهم الها عجيب!
رحت كعدت ورا الناس..
ماكعدت يم اقاربنا ..اريد انقرد شوية اركز..
هي عبالك تنتظر هالشي..بش شافتني
اجت..
شايلة فستانها بيدها وشعرها اصفر طوخ..
مكياجها صارخ..ولا ذيج حنين..
عبرت النسوان ووكفت يمي...
شلونج بذات ..نكارة مليح..
شنو؟حاجيتها باستغراب حتى مافهمت حجيها..
اي دومج ماتفهمين..ليش ولج هيج ليش..
خليتي الواذل تشمت ..
وكفت وحاجيتها وانا متصعنة الهدوء..
شنو قصدج..
قصدي واضح..كلج حيادر بالرسالة..
وكلج اريد اضرج مو..
ها تعترفين!!
اي لان ردت مصلحتج..
مصلحتي اعرفها ومحد يعرفها بكدي..
مصلحتي تكليله راح انخطب لحيدر!
تكليله تعال شوفني بالخورة؟؟
شنو مصلحتي؟؟تأذين اخوي وتشحنين
برجلج حتى يزوج بنت اخو؟
ليش طلعتي هيجي حقودة وممثلة ها!!
لان انت غيية..تشوفيني حقودة..
كل الاريده مصلحتج..
حيادر لو بعد مية سنة ماياخدج..
باعي تشوفين ذيج ام الاحمر..السمينة التخبل..
هي بت خالته..وكاتل نفسه كتل ..لحد البارحة
راد يمشي عليها..
عرفي قيمتج ولا تحطين املج بحيادر..
هذا ابن شيوخ ماياخذ وحدة امس ضمت
كذلتها..هااا لمصلحتج احجي..
عافتني وراحت وانا مصدومة..هي
شبعتني رزالة تكول مصلحتي..
لا وبعد تكلي بت خالته..وهي بت خالته جنها
هيا الشعيبي..
اصلا نكتة هاي صدك..
بقيت بمكاني ماكمت..لحد ماخلص وردنا نطلع..
ماما كالت عاشت ايدج من غيرتي لبستها..
نسوانهم كلش عجبهن..
وبقن متعجبات بي وبذهبها..
صدك ماشفتج كعدتي وي حنين ابد؟بعدكم
متعاركات ؟
لا بس يعني شوية..وهي ملتهية توزع بعد
مافارغة..
سكتت وهي تعرف بيه اجذب..
رجعنا للبيت والاقارب كلها راحت لبيوتها..
حسن شلعناه كوة وجبناه..
كلتله ماما لا تخزينا مايقبلون اصلا تطول يمها..
وهو يكلها حتى شوفة شرعية ماشفت خلوني
اشبع..
واخذ فونه وصعد كال اروح اخابر احسن..
هو اشترالها فون وشريحة وانطاه الها اليوم..
محد راد يتعشى لان جنا شبعانين كيك وحلويات..
كال بابا اريد جاي ..
انا معفية منه..كامت ماما تسوي..
بقيت كاعدة يمه..بس نظراته غير عن كل مرة..
صفن شوية وسألني..
بابا شنو رايج بحيادر!؟
ها؟حجيتها وانا لوني اصفر..
يعني كشخص وشخصية شتشوفي؟
ها ما ما مامنتبهة..
تنهد وحجه..هو كلش خوش انسان..وماعايزه
شي..
تعرفين..اليوم بديوانهم طلبج مني..
للحكاية بقية

الشيهانة
الجزء التاسع عشر
دنكت وبقيت االعب بطرف تشيرتي..ماعرف
اجمع الحجي واجاوب بابا..
فاجئني حيادر كلش..
جنت متوقعته بعد مايريدني..او بالاحرى
يمنع نفسه مني..
بقى بابا يحجي..بابا انت كبرتي وكملتي دراسة..
والحمدلله عاقلة وتعرفين تتصرفين..
تشوفي مناسب الج؟انا اكون مؤيد الج..
تشوفي مايناسبج ..انت حرة باختيارج..
جاي يحجي واجت ماما..انا مدنكة بس اباوع
لرجليها من اجت كعدت..
واستمر بابا يحجي..
بابا الانسان مو دائما يحكم صح..وانا حكمت
بالبداية وقدمت البيئة وهالامور..
بس هسه كلش مقتنع..اذا اخذتي رجال
نظير الج..مايهمج بقية الظروف ابد..
فيحاء شتكولين؟؟
رأيي نفسه..
شاها انطينا رأيج شنو هو؟
بابا عادي افكر؟حجيتها وانا مدنكة..
رفعي راسج واحجي بابا..
رفعت راسي ع كيف..استحي اواجههم..
صارت عيني ع ماما..قافلة ووجهها مايتفسر..
احجي بابا الراي الاول والاخير الج..
انطيني وقت افكر..عن اذنكم..حجيتها وكمت..
رحت للغرفة وقفلت الباب..
شغلت التدفئة واحس بيه رجفة..
رجفة تفكير مدري برد..بس احس نفسي
مامتوازنة..
ومستغربة ليش حيادر سواها فجأة..حتى
مانطاني خبر..
يعني يريد يجبرني!ولو اهلي مستحيل يقبلون..
اذا قبل بابا ماما الي ترفض..
حاولت اصفي بالي..غمضت..
دك الفون ..فزيت وجريته ..حنين !
ترددت اجاوب وخفت خاف صاير شي..
فتحت خط..الو؟
هلو شاها ..
اهلا!
اكلج صدك خطبج حيادر اليوم؟
مادري ليش !
يعني ماحاجاج عمو..
لا اصلا انا وحيادر منتهين ليش يخطبني بعد..
شلون شلون منتهين يعني!
يعني انت نهيتي كلشي بينا ..اخذتي دوري..
اووووو هو صوجي خايفة عليج..
لا صوج قلبي الغبي الي يحن عليج..
والي من دكيتي هسه خفت عبالي بيج شي..
روحي حنين روحي..حتى عتاب ماعاتبتج
وتهربت من هالشي..لان صعب عليه
لان حسبتج اختي..ولان لهسه شي بيه رافض
يصدك..يلا باي..
سديت الفون قبل لا تحجي شي..
كل مااكول الكالها عذر تزيد خبث وحقد
اعوذ بالله..
ومخابره تريد تخرب الخطبة من هسه..حتى
قبل لا تصير..
يوم ثاني كعدت ب١٢ ..
بابا موجود عنده عطلة..شفته بالصالة يصلي..
طلعت غسلت وتوضيت ورجعت
صليت..
محتارة شلون اكعد يمهم..والخوف من امي
اذا فتحت الموضوع..
خلصت وطلعت..رحت للمطبخ ..
ماما تسوي زلاطة وبابا يسولف وياها..
صباح الخير..
صباح الخير ..زين كعدتي حتى نتغدا
اليوم متريكين من وكت..
ها شنو الغدا..
دجاج محشي..
اممم..
كمت حضرت وياها وصبينا..محمد
معزوم وي جماعته وحسن بالشغل..
تغدينا وسط هدوء تام..ونظرات ماما الي
محتارة وكلساع توحي بشي..
بس خلصنا وراح بابا جوا..
انا جاي البس الجفوف حتى الم المواعين..
شاها شنو تعليقج ع كلام ابوج؟
دنكت انظف الماعون من الاكل ووجهي
ضل ينطي الوان..
مادري ماما..
تدرين ابوج حاس بيج تريدي؟؟
شنوو..
اي لان فاضحة نفسج..
بقيت ساكتة ماحجيت..اخذت المواعين
للسنك..
سكوتج يدل انت تدرين بنفسج غلطانة..
شوفي ماما..انت وحيدتي وعكازتي
لو طحت..
وماريد اعرضلج والعرضة مو زينة..
عرضت لحسن وجنت مارايده ياخذ
منهم..
جم مرة توصل للحلك وتروح واكثر
من مرة رادت تخرب..
كلت بعد التوبة وحرام عليه اتشائهم
ومدامها قسمته الله يجمعه بيها..
انت رايدته ومتخيلة راح يعيشج بجنة..
انا ادري بي كاتل نفسه عليج ويريدج..
بس الادري بي اكثر ..راح تشوفين عدهم
الويل..
وراح تندمين تالي..وماعندج اي سبيل
للهروب..لان هم عدهم مبدأ مانطلع
من بيت الاب..تضلين مكابلة الياذيج
وساكتة..
خلي كل هالامور ببالج..حسبيها صح..
اذا تشوفين نفسج مستعدة لهالشي..وانت
قابلة بالراح تواجهي..
قرارج الج وانت حرة..
ابوج قابل ومقتنع..وينتظر ردج..
وانا ماراح اعرضلج بس مو معناها انا
مقتنعة..
كلامها كلش خوفني..ونفس الوقت صدمني..
يعني افهم منها ماعدها اعتراض
يعني اذا وافقت انا يوافقون!!!
بس شلون اوافق انا!احسه حطني كدام الامر
الواقع..
معقولة يعاقبني ويريد يكسر خشمي
لان تركته..
بس لا حيادر مو هيج لا..
ورا يومين صاحني بابا وحاجاني..وبعد
مقدمات ونصائح هواي..
قنعني وتشجعت..
انطيت بابا الموافقة بس بداخلي خايفة..
وبقيت افكر شلون اوافق هيج بسرعة..
زين هو حتى ماكلف نفسه واتصل!انا ليش
هيجي وافقت بسرعة..
لو رافضته مو احسن!
بس خاف ارفضه ويروح من ايدي..
تفكيري مشوش ومعقد وماعرف شسوي..
وماعندي شخص يساعدني وينصحني..
اشو حنين وراحت ..
وماما مظاهر الحزن واضحة بوجهها..
بس ماتكدر تحجي شي..اعرفها واعرف
طبعها..
وخصوصا من سمعت وافقت زادت
كآبتها وحزنها..
احسها ضابطة نفسها كوة..
ورا يوم من موافقتي..الصبح من كعدت..
ماما كالت اليوم يجون اهل حيادر..
بس هنا احس رجليه كوة شايلتني..بدت
كل جسمي باد..
ورحت للكنتور ادور شنو البس واباوع
لوجهي بالمرايا كلساع..
معقولة انا فرحانة هلكد!بس ليش
هو حتى ماخابر!
اوي بيه عقدة صايرة هو الرجال من قبل
مايخابر هواي..
للعصر وانا بغرفتي افتر وماكعدت ابد
ماكدر..
اجت ماما دكت الباب ودخلت..
يلا تعاي اجو صارلهم هواي..تحجي ومترددة..
واناسمعت الجرس وادري بس اخاف اطلع..
لبست فستا

ن قطني ازرق طوله لنهاية الساق..
وضيق يصير ع الجسم كلش..
شعري شسورته وسويت ضفيرة راخية
صفح..
طلعت وانا اريد رجايه يشيلوني اوصل
لاستقبال ماكو..
وصلت يم الباب وغمضت ودعيت..
دخلت هي كدامي..سلمت عليهم وحدة
وحدة..
امه وامينة ومرة تصير عمته وخالته ..
كعدت بصف ماما بس الرجفة كوة مسيطرة
عليها من الخجل والخوف..
بقو يسولفون عن امينة..هي سمعت بيها
مريضة..
بس خطية كلش شكلها ذبلان ..جاي يصير
عدها نزيف باستمرار ..وتراجع وماكو فايدة..
وحجيهم نصه اجهله لان اشياء حمل وولادة
وغيرها..
شوية ترخصت وكمت..
انا منا عركانة من الخوف والدنيا تموت برد
مدري ارجف مدري شبيه..
وكملوها يحجون بالولادة ..دخلت للغرفة اخذتلي
جاكيت لفيت نفسي..
فتحت الفون لكيت رسالة من حيادر..
دربالج ماتوافقين ها ..رديتله ..
واذا ماوافقت شنو تكدر تسوي اصلا!
لا بعد مااكدر اسوي شي..لان حجيت بيج مرتين
ورفضتي..
وراها ماخطبج لان تصير عيب بحقي..بس
اكعدج طول العمر يم الماما..
هه!شنو تهديد هذا..
لا تنبيه وتذكير..حتى لا تضيعين عشگنا
بطيش وشكوك..
بس انت تركتني..وليش ماكتلي من خطبت
ليش خليتني كدام الامر الواقع واسمعها
من بابا..
لان اعرفج ام دميعة بسرعة يبين عليج..
وامج كاعدتلنا جنها المخابرات الروسية..
عزا لا تحجي عليها..
بالعكس جاي امدحها..مرة مايطير عليها
الطير..ربتلي درة تلالي من الشرف ..
وهم ربتلي علة..
ضحكني وحتى ماعرفت شنو اجاوبه..
صفنت شوية..دز مسج..
شيهانة عود ودي الاخبار
بيد امينة..
اووك..
ورا ماراحو اجتلي ماما للغرفة..
فتحت الباب ووكفت..
باوعتلي شوية..تنهدت وحجت..مقتنعة؟
دنكت وماحجيت..
الله كريم..طلعت وسدت الباب..
بوقت العشا كاعدين..بابا سال ماما..
شحجيتو اليوم شنو اتفقتو..
بعد كالو شنو طلباتكم وشتردون..
باعتبار احنا اهل واصلا انت ناطيهم موافقة..
انا رفعت راسي لماما..استغربت
من كالت ناطيهم الموافقة..
يعني جيتهم هيجي مجرد رسميات..
محمد كلها شكد طلبتو ؟
جاوبته بثقة..عشرين بعشرين..
هواي ماما..بابا عقد حاجبه..صدك؟
اي وهم كالو كلشي مجاب..شتردون حاضرين..
حسيت بابا ضاج:.وهي اصلا ضايجة..
شالت ايدها من الاكل..وبابا هم ..بقو
كاعدين شوية وكام بابا..
وانا اتلفت بينهم..محمد كال ضايجة عليج
حقها..
تفكر شلون تبقى وحدها وانت وحيدتها ..
دمعت عيوني وانقهرت..صح هي تفكر بفراقي
بس احسها ماقابلة..
لا شلون ماقابلة اصلا فرحانة بيج..
اعرف بمحمد يحجي هيج حتى يخفف عني..
بس الكل يدري بيها مارايدته الي...
ورا كم يوم راسلتني امينة ..ها حبيبة
يكول حيادر نجيبلج الفلوس تاخذيلج ذهب
لو نروح وياج..
يعني انتو تجون ونروح سوا؟
اي انا وامه نجي وتطلعين ويانا انت وامج..
اي هيج عادي..بس انطو لماما خبر..
اي صار..
اجتني ماما ورا الغدا..خابرو اهله..
يكولون نجي نشتري الذهب..
تحضري فد شوية ويجون..
اي هسه..
يلا اروح اتجهز..طبعا تحجي برسمية
واسلوب مالت واحد مصبر نفسه كوة..
كمت انت لبست تنورة سودا وسترة
بيج ..
والشال بيجي طوخ .. رتبت وجهي وميك اب
خفيف..
وكعدت انتظر بالغرفة ماطلعت..بس
مثل الخبلة كل شوية ابتسم..
لهسه مامستوعبة صدك خطبني
وصدك صارت وبسهولة!!!
اندك الجرس ..طفرت بسرعة للمراية..
عدلت نفسي ووكفت ورا الباب..
بس دكته ماما فتحته..
ها يلا اجو بالباب..حجتها ومشت كدامي..
اخذت حذائي بيدي وطلعت..
كعدت البس وهي واكفة بالباب..
خلصت وطلعنا سوا..وهي بس تباوع ماحجت شي..
شفت حيادر كاعد ويمه امه..وامينة ورا..
نزلت عيوني بسرعة وعضيت شفتي..
ماعبالي هو يجيبهم ولا فكرت ..
صعدت وسلمت..ردو السلام وهو نظراته
تشخصت عليه..
بس ماكدرت اباوع لان ماما بصفي..وانا صايرك طرف اقل
تصرف تنتبهلي..
حجه هو وي ماما..ام محمد وين تريدون
نروح..
للعشار احسن..لان صايغنا هناك..
انشالله..
انا ساكتة وبدو يسولفون بينهم وماما وياهم..
وكل ماريد شوية ارفع عيني اله..
مامازتعدل كعدتها..بمعنى كعدي راحة
ترى بالي وياج..وابقى دايرة وجهي
ع الجامة وساكتة..
وصلنا وهو نزل ويانا..سالته امه..ها جاي
تيي ويانه..
اي احسن..سكت هي ومشينا لحد ماوصلنا
للصايغ..
دخلنا هم كعدو ..بس هو وكف وكال تعاي
اختاري..
وكفت يمه وانا ريكي نشف ومتوترة..
احس عطشت ..
ابد مارفعت عيني بعينه ولا درت عليه..
بس ااشر وهو يكلي احجي رفعي صوتج..
اختاريت طقم مرتب وثكيل..هو جان اختيارنا
سوا ..
لان ذوقه حيل حلو وعجبني اختياره..
اخذنا حلقات مرسوم بيها زخرفة
ع شكل نبض ..
جانت كلش هسه
جاي موديلها بالسوك..
وشنو نختار ناخذ رايهم ..يكولون اي حلو
وخوش اختيار..بس امه حسيتها ضايجة
او يمكن رادت هي تختار..
لان حسب حجي حنين وهم بعرسها..
جانت الام بكلشي تقرر وتختار..
كملنا الذهب وطلعنا..هو سالني..تحتاجين
شي بعد..
هزيت راسي ..لا شكراً..
امه كالت..ليش خو يعد شوفيلج بدلة فد نوب..
ماما كالت..لا غير وقت نجي..حيادر كال
اي احسن غير مرة..ومشى كدامنا..
ماما اعرفها متريد امه تتدخل باختيار البدلة..
وهو حس بهالشي لهذا خصم الكلام ومشى
قبل لا ي

صير اي نقاش..
اخذلنا عصير سفري..ورجعنا للسيارة..
كعدنا وجاي نشرب..هو مااحرك السيارة
لان جاي يشرب..
باوعت شوية عليه..المراية
مخليها بجهتي كلش..
يشرب ورافع حاجبه بابتسامة..
وانا مخليه القصبة بحلكي ومبتسمة..
داست ماما ع رجلي بحذاءها مردتها..
شهكت وغصيت بالعصير..
بقيت اكح وعيوني تدمع..عساني
لا باوعت طلعتها من خشمي..
انطاني بطل ماما من يمه وشربت ..وانا
احس بلعومي يبس..وعيوني
تصب عبالك مكتولة..
لحد ماهدأت شوية..وهم يكولون ياستار
شبيج اسم الله..
ورا مارتاحيت شوية ومشت السيارة..
دنكت جوا الكشن مسحت دموعي وعدلت
وجهي.همزين ماتخربط وجهي لان كحلتي
ماتسيح..
وصلنا للبيت وي الاذان..نزلنا وهم راحو..
اول مادخلنا ماما اخذت ملح من المطبخ
وتحسب وتدوره فوك راسي..
وبابا ع صوت الباب اجه..
استغرب من من وضعنا..
ها سلامات شنو صار..حجه وهو يبتسم..
شركت زين ما ماتت اعوذ بالله من العين..
لا صدك شلون..
جاي تشرب عصير وشركت بي..
يلا ولت ولت ..الحمدلله..
لا ادري بيهم عينهم حارة استغفر الله..
كافي فيحاء مايصير..
سكتت هي ودخلت..وانا دخلت لغرفتي
ابدل ..مدري اضحك مدري
اضوج..
ويقت الشحطة ببلعومي لحد الليل..
ساعة عشرة ونص اجيت للفراش..
فتحت واتساب شوية ..دزلي مسج..
مساج الله بالخير..
مساء الخير..هلااو..
شلونه بلعومج خو ما طبك؟
يعني خفيف بقت شحطة..
اي الحجية حرمتنا الله يخليها..
عود توني صافن وخربت عليه الصفنة واهلها..
ههه انا هم شوية لكيت فرصة اباوعلك وطلعتها
من عيوني ههه..
ها طلعتي هم تصفنين بيه..!
لعد بس انت تصفن احنا هم نصفن..
ها وشنو تسوين بصفنتج بلة..
غير اصفن بيك وعليك..
بس؟
اي هيج شي..
عبالي تصفنين مثلي خرشتيني هههههه..
للحكاية بقية

الشيهانة
الجزء العشرون
ههه يعني شنو خرشتيني..
يعني خوفتيني يمدللة كلبي..
اممم تخاف من صفنتي..
لا مااخاف..بس اريد الصفنة تصير صدك
حتى لا تضل بنفسج..
روحي هسه شيهانة..بعدنا ماعاقدين ماريد
اخرب عهدي..
ها اوك ..باي..
اكثر من مرة هيج يكول ..واحسه مايريد
يشيل ذنب وياي..
وهذا الشي كلش يريحني ويخليني اتطمن
ناحيته..
حتى نظراته الي مااحسها حيوانية ..من قبل
ورغم لبسي بس ماحسسني مثل نظرات
حيدر ..جان يباوع بشراهة ومقزز..
تم الاتفاق ع الخطوبة بالبيت..رغم ماما
كالت لبابا نسويلها بقاعة ..بس
بابا كلها مانريد قاعة وتصير جرجرة وتعتبر
حفلتين ..لان مرة بالعقد ومرة بالحفلة..
كلش رفض الفكرة..وانا اعرف
هو رفض لان هم مايفضلون القاعة ابد..
ولان حيادر بالذات ضد هالموضوع..
بعد كم يوم مرت..اجه حيادر ورا المغرب
لبيتنا..
كعد وي بابا بالصالة وحدهم..بس شوية
وطلع ماطول..
انا يم ماما بالمطبخ تسوي العشا..
واكفة اباوع..
بس كامت متقبل اتعلم..تكلي غير وكت..
وانا ادري بيها..
متريدني اتعلم حتى لا اطبخلهم من اتزوج..
اجه يمنا بابا..كال حيادر جاب فلوس
الصالون والبدلة..
كال مريت بشغل وكلت اجيبهن بطريقي..
ماما ماقبلت وكلتله ليش اخذتهن
احنا نشتريلها..
بس بابا جاوبها..الرجال خطوبته وفرحان
بيها..يريد يصرف من تعبه..
ويستثقل اي شي من اهل البنية..
سكتت هي ماجاوبت شي..
الحلو بيها تحترم بابا كلش..حتى لو
يغلط بحقها كدامنا تسكت..كمت انتبه لتصرفاتهم
هي وبابا..
حتى اكتسب خبرة واعرف اتعامل وي حيادر...
بالليل راسلني وكال اختاري اليعجبج وروحي
وي اهلج
انا ماخليت اهلي يتدخلون باختيارج وحتى
تاخذين راحتج...
شكرته وارتاحيت همزين ماجت امه ..لان ذوقي
مزعج ماقبل بسرعة الا افتر كم مرة..
واخاف امه تشوفني هيجي تنجلط..
بيوم الخطوبة صادف جمعة بنص شهر
كانون الثاني..
لبست فستان ضيق وطويل حيل ..
بلون ذهبي وردان
كاملة..
والصدر حفرته سبعة عميقة..
ماما مالاحظت الفتحة الا من لبسته..
وبقت تلوب واحنا يم الصالون..
هذا بالبيت مو هيج مكشوف ..هذا ليش
هيج..
وانا بس ساكتة وماحجي ..منا افكر وكاتلني
التوتر ..
ومنا استحي هيجي كدام حيادر..
كملنا واجه حصن اخذنا..وطول الطريق
معلي الاغاني ويركص وياها..
فرحان لان اليوم يشوف هاجر..
بعد ماخلو يشوفها بس من عقدو محكمة وابوها
راح وياهم..
ومايقبلون يروحلهم ماعدهم هيج شي..
خطية اليوم فرحان اكثر مني بشوفتها..
ماما جانت يمه كاعدة بالكدام..
رفع ايدها ويركصها..ركصي فيحاء
طالعة حنج العيد ركصي..
جرت ايدها ورزلته..تأدب عاد هو انتو
خليتو بفيحاء شي بعد..
عفا عليج بعدج عروس ..وين اكو ام
ولدها بطولها وهيج صاكة..
اندارلي وحجة..
شايفتلج هيج ام طالعة اكشخ منج..
انا اضحك عليه واخاف من ماما خاف
هم ترزلني ويا..
بس هي صدك حلوة طالعة..
لبست كوستم كامل سترة طويلة
وبنطرون بلون سمائي فاتح..
ورتبت وجهها ام الصالون طلعت كلش
مرتبة وكشخة..
وصلنا وجانو اهلنا موجودين..مرت عمي
وهند هن بقن ببيتنا وتكفلو بكلشي..
والكل بسؤال واحد..شلون حنين تعوفج
بهيج يوم..
واتحجج بزوجها ماقبل تجي..ولان اهل
العريس هم عدهم شغل ويحتاجوها..
بس ماما حاسة بيناتنا شي..
وكل مرة تسألني..انا كتلها قبل فترة تعاركنا
وماخليت سبب واضح لصتها عليها..
ماردتها تعرف بأي شكل شنو الصار
بينا..
اذا عرفت راح تمنعني من حيادر من صدك..
هم راح تشك بي وماترتاح ..وهم راح تكلي
بت عمج وعاشرتج عمر وهيج طلعت تكرهج..
مستحيل تقبل تخليني وياها واصير مرت حماها..
وصلو اهل حيادر ..والعدد كلش هواي جان..
رغم احنا بيتنا واسع واستقبالنا جبير
بس نص الشباب كعدو بالحديقة حطولهم
كراسي..
دخلو بهلال وهوسات..واباوع بنصهم حنين..
لابسة بدلة سودة كلها لمع..
وشعرها اصفر كاصته لحد اذنها ..
اجت يمي وانا كاعدة..شبكتني حيل
كسرتني ..
وتهلهل وتصفك..
اجت امينة كعدت يمي..سوولها البنات
مجال..لان جانت تعبانة وتمشي ع كيف..
حنين فرت روحها وراحت..
وامينة خلت ايدها ورا ظهري وبوستني..
عين الحارة الحمزة يطفيها..حگة لو تسودن
بيج حيادر..على كولة جنج شذرة..
حبيبتي تسلمين شلون صرتي..
بنعمة ربج الحمدلله..الله لا يضرج انشالله..
بس انقهرت ع هاجر ماجاية لان امها
حامل ومسقطة طفلها..
وهي باقية يمها هي واخواتها هم مااجو..
يا ويل حالك حسن اذا سمع ينتحر..
اجت ماما يمي..يلا ماما راح نعقدلج
سمي بالرحمٰن وكومي..
كمت وامينة كامت وياي..تقرا ايات يمي
وتدعي..
دخلت للغرفة ..ماما منعت اي احد يدخل ويانا..
رادت حنين تدخل..بس ماما كالت
لازم وحدها احسن..
بس امينة قبلت تدخل ويانا..ووكفت ع جهتي
اليمين تقرا سورة الفتح..
وامي خلت رجليه بالطشت ..بس مجموعة
خضارات من العطار جابتهم
ووياهم ورد..
والسيد يردد الكلام وهي تباوعلي بعيون
مدمعة..
لحد ماكملنا العقد..تنفست بارتياح..
احس شعور غير ..احس نفسي صرت
لحيادر..لرجال يخاف ربه قبل لا يخاف
من العيب..
ختمت امينة السورة ..وهلهلت بصوت
عالي ثلث مرات..
ماما وهي واكفة ..جرتني لصدرها

وبقت تبجي بهدوء..وتباركلي..
كتمت عبرتها وهي مبتسمة..وامينة
تكلها لا تهمين بيها وحك داحي الباب
ترى حيادر حگاني ويحبها..
ومايخليها تنضام..
وشبكت ماما وباركتلها..
طلعولي رجليه من الماي وماخلتني
انشف الا هي نشفتهن..
لبست حذائي وكمت..وهي مخلية
ايدها ورا ظهري وشابكتني..فتحت امينة الباب ..
وطلعت كدامنا تهلهل وتصلي على محمد وال محمد..
ماما تمشي وهي شابكتني والبنات
يهلهلون ويغنون..
لحد ماكعدت..وبدو يوزعون..بس جان
كلشي يختلف عن خطوبة
حنين..
احس حيادر مخلي باله وي اصغر التفاصيل..
حتى ماما ماصارتلها فرصة تعيب..
شوية وكالو راح يدخل ..هنا تخربط وضعي
وبقيت ابلع ريك كوة..
كعدت وانا مدنكة..بصفي امينة واكفة..
وحنين اجت وكفت بسرعة..دخل
هو وامه تهوسله وتلوح بعبايتها..
وخواتها يطشن جكليت..
كعد يمي وانا عيوني ذبلت..بكل تفصيلة
بي..
دشداشته تجنن عليه وجسمه مرتبها اكثر
الغترة شلون مرتبة وي العكال..
اللحية الخفيفة اي تدوووخ..
جانت عيونه تباوعلي بحب..وابتسامته
واضحة بشفافه وعيونه..
باوعلي وهو يتقرب من اذني ويحجي..
بالخير يمدللة كلبي..
عساج مرتي دنيا واخرة..
امين ..حجيتها همس..
وامه جابت الذهب لبسني..
وحنين فوكنا ما وخرت..
هو بس لبسني الذهب كام..
بس طلع حنين كالت ياا غير تكصون
الكيكة..
صيحوله شبي شرد..
بقيت فاتحة حلكي عليها..شنو هالاسلوب..
جاوبتها انا..بعدين يرجع شعدنا مستعجلين..
ها يرجع!!
جاوبتها امينة..اي يرجع حتى يكصون
صور ويركصون..
جا شني عبالج طكه وطير..
اي زين عبالي..حجتها وراحت دخلت
بنص النسوان تركص..
وانا افكر صدك طلع قبل لا نكص الكيكة..
بس امينة شاورتني..هسه اشوفه واجيج..
راحت طلعت وشوية ورجعت..
يلا بنات تسترن ..اجه العريس ..ماما
باوعت صفح..واجت وكفت..
مو توة دخل ؟
ها مادري مو الكيكة..
اهممم..
بقت واكفة لحد مادخل وكصيناها سوا
اكلنا وصورنا ..
هي المصورة تسويهن فوتو الخلفيات..
بس هو ماكدر يجر نفس من ماما واكفة
بنصنا..
بس عيونه كلساع تبوكلها نظرة..ومايكدر
يستحي منها خاف تلكفه..
بس خلصنا طلع..وهم تحضرو يريد
يروحون..
دزلي مسج ..راح ابقى ترى..
دزيتله ياريت بسرعة سديت الفون..اخاف
تلكفني ماما..
شوية واهله سلمو عليه وراحو
واقاربنا هم طلعو..بقت بس مرت عمي وهند
وحنين..
جاي يلمون الهوسة...ودخل بابا..
بس شفته ابتسمت..
اجاني ميتسم وفتح ايديه..يا بعد عمر
ابوج وعافيته..
مبارك عليج وعساج ماشفتي بس الراحة..
بوسني وباس راسي..زوجج يريد يشوفج..
روحي يمه بالاستقبال..
ماما سمعت واجت تركض..شنوو وين..
شبيج فيحاء الولد موجود بالاستقبال..
واخوتها يمه شجاج..
اي ميخالف هسه انا هم اروح وياها..
روح انت انا اجيبها واجي..
راح بابا وهي جابت البرنص حطته
ع ظهري وشدته من كدام..
تغطى كلشي بس شعري بقى طالع..
واخذتني ورحنا..
دخلت قبلي وسلمت..وانا وراها امشي ع كيف..
كعدت وكعدتني يمها..
هو عيونها نظراتها ماتتفسر..احسه يكول صدك عود!!
محمد وحسن باركولي وبوسوني..
وطلعو..
بابا من دخلنا جان واكف اصلا..
الاحظه يباوعلها وهي ولا يمها..
كاعدة تسولف..وانا صايرة بصفحتها
كلشي ماامبين مني..
هو بسرعة ترخص وكام..يلا انا اترخص..
والاحد نبدي بالفحوصات ع مود العقد حجي..
اي ابني بعد كيفك هي صارت مرتك..
لا من بعد كولك انت خيمتها..
يلا رخصوني اودعناكم..
كام طلع وبابا وراه..وماما تباوعلي
صفح..من هسه ترى جية هنا ماكو
وطلعة سوا مااكو..
تتزوجون وتشبعون كعدات..
والاحد اروح وياكم انا..
هزيت راسي بلا مااحجي شي..
دخلت جوا والبنات بعدهم يشتغلون
انا اخذتلي ملابس ودخلت
سبحت وطلعت..
لكيتهم متجمعين بالصالة وصابين
العشا ينتظرون..
اول مادخلت يمهم الولد يرحبون بيه
هلا بالعروس وهند ومرت عمي هم..
ماما ساكتة وصافنة وحنين لازمة بطنها مدري
شبيها..
كعدت تعشيت وسولفت شوية وكمت..لان دايخة
كلش وتعبانة..
بيت عمي راحو لبيتهم واهلي هم كلمن
لغرفته..
بعد ماداخو من حسن والعزا النصبه..
بقى يسب بروحه وبحظه..
اخر شي كال شلون اروح اربط امها حتى لا
تخلف مو كافي مرت ابنج حامل..
هي صدك مرت ابنها حامل وهي هم حامل
زحمة..
رحت لفراشي دايخة..لزمت الفون وانا اشوف
الرسايل والمكالمات كومة من حيادر..
دكيت عليه..ثواني وفتح خط..
ايييييه هلا..هلا بشيهانتي ..
حجيت بهدوء وخجل..هلو بيك ..
اكلج امج شني سالفتها وياي
طالبتني ثار
كاتل واحد من اهلها..كاطع ليلة عرسها..
ههه لا بس هي خطية تخاف علي..
اي قابل راح اكلج ..بس راح امزمز هسه
الاكل بعدين..
يا لا شنو هالحجي..ههه..
خليني عاد اطلع شوكي وبراكيني..ولج
صاير جمر وحكج..
حتى انا محترة ههه..
اويلي عليج ..شعليني وصيري بريئة..
عزاا موو قصديي..
حجه همس..لا اريده يصير قصدج..
لان مشتاكلج ولاعب الشوك براسي..
وشلون ليلة ابليس متربع بعقلي..
قبل لا يكمل اباوع ماما تخابر..
ا..حيادر ماما جاي تخابرني..
استغفرالله..حتى بخيالي طبت ماما..
باعي قبل لا تردينها..دزيلي صورة
الج هسه..
ماكدر يعني ظلمة..
شغلي فلاش وانت نايمة هسه طكي

لي
اريد..
اوك..
رفعت الفون واخذت صورة لوجهي
ودزيتها..
ورجعت ماما تدك..
شاها الج كلج كلج بسرعة لخاطر الملائكة
ترى طكت روحي..
اي ليش تصيح شبيك..
لان تعبان واريد بس انفرد بيج وطلعتلي
امج خلتج ترجفين..
لحظة..
رفعت الكاميرا واخذت صورة الي كلي
ودزيتها..
جنت لابسة ثوب للركبة ومن فوك ربع ردن ابيض
منقط باحمر..
دزيتله الصورة وكتله رح اجاوب امي..
فصلته منه وجاوبتها..
ها ماما خو مابيج شي؟
لا بس شعدج كاعدة نامي ارتاحي اليوم تعبتي..
اي شوية وانام ..
اي نامي..ودربالج تفتحين كاميرا لو شي..
لا تخلين بالي يمج..
لا ماما..
يلا روحي ..
اوكي..
سديته منها وانا متضايقة..
هسه هم هي قافلة وهم حيادر مدري شبي..
شلون اوفق بينهم مادري..
تاليتي اهج منهم ثنينهم..
رجعت خابرته..ماجاوب..توقعت زعل..
كلت خلي براحته ..مدام ماغلطانة بشي
ماالح وياه..
دقايق ورجع اتصل..
الو..
ها شيهانتي عتقتنا امج..
اي خطية رادت تطمن عليه..
يعني هي يومية تتطمن هيج وقت؟
ههه لا حديثاً..
ماشي ...مدام طمنتيها وبابج مقفول مو؟
اي..
كومي فتحي كاميرا..
للحكاية بقية