#قصائد_استشهاد_الامام_الكاظم_ع


#مـۄسسـﮫ_مــﻥــبـريۄن_للالـﺢــان

الناشر.احمد.الـــزوار


ــــــــــــــــــــــــــــــــــــــــــــــــــــــــ

#گعديه_لقاضي_الحوائج_موسى_بن_جعفر_ع
#الشاعر_الميرزا_محمد_الساعدي




ياموسى ابن جعفر صيح وياي ليث الكاظميه
طالب حاجتي وهالجيت عناي وبهاي المسيه
جيتك عالوعد جيت والگبرك تعنيت
ليث الكاظميه
==========≈========================
يابوطلبه الناس حارت بين أرهاب ومنايه
تاهت الحسبه عليهه من كثر هول الرزايه
گبل بالتفجير هسه بمرض كورونه النهايه

كل ليله يطلعلي بخبر
ويقتّل بحچيه الأُسر
سدوا المراقد لن خطر
حجته اليوم الوقايه

لو صابك مرض گلي المن اتروح فهمني القضيه
موش اتگول عندي اهناك ابو حسين هالتحفه السنيه
ليك المشتكه ليك طبنه انريده بيديك
ليث الكاظميه
==========≈========================
عذرنه يابو الرضا اعذرنه هواي اذاكم حچينه
بين حانه ومانه صرنه والزمن جاير علينه
ماعرفنه الباگ منهو ولا عرفنه الصان دينه

للحضره وادم گصدتك
اتشرفت كلهه بخدمتك
عون الهه والله رادتك
منّ الاهوال المشينه

واليگصدلك ابطلبه يبو الجود تنحل لو رزيه
صفي النيه ومشي الشأنه محمود يم سيد البريه
هاذي بيعتي هاي منكم طالب الراي
ليث الكاظميه
==========≈=======================
بسجن هارون التعذب كون هسه ويانه حاظر
يشوف هذا الي جره النه وهم علينه ايكون ناظر
انعادت القصه الأليمه وچنهه صارت يوم عاشر

بالأمس لا خل بس فَزع
برماح وسيوف وجزع
والحين مرينه بوجع
أمر من گطع المناحر

چانت واضحه الجابتله للدين خيل الأعوجيه
هسه ماعرفناهم يبوحسين أشباه آل اميه
انحلفك بالذي اينام فوگه اتحوم ظلام
ليث الكاظميه
==========≈========================
رجع حكم ألا رشيد ورجعت اذناب السقيفه
يبن جعفر أحضر انّه اوجوههم غبره ومخيفه
ناس ماعدهم كرامه والوطن واضح نزيفه

وينك يحاضرهه الشدد
أحضرنه يالكاظم مدد
ملينه مانگدر بعد
قله بس ظلت نظيفه

انخبطت ماعرفنه اشصار ماصار بس شفنه المنيه
تترجاك كلهه ازغار وكبار هاي الجعفريه
جارت بيهه ظلام أدعي وصفي الاسلام
ليث الكاظميه
==========≈========================
سيدي ابزنزانه سجنك والسجن واضحه ارسومه
بان سجانك خبيث وبالفسق شاهر اعلومه
احنه سجنتنه الذنوب وحكمت النفس اللئومه

ألتجأت الوادم ألك
والعافك امبين هلك
خسران هذا اليخذلك
أمسه وي سفياني گومه

اليترك هالمشي ماناصر حسين وتعوفه الزچيه
واليبچي ويهل دمعاتهه العين تحفظه الزينبيه
بالك تترك حسين وتشمع بالايدين
ليث الكاظميه
==========≈========================
16/3/2020 الأثنين
#الشاعر_الميرزا_محمد_الساعدي




🌼مؤسسة منبريون للالحان رقم 1
@ahmed_alziwar1

🌼مؤسسة منبريون لنشر القصائد 2
@ahmed_alziwar2

🌼مؤسسة منبريون للمقامات3
@ahmed_alziwar3

🌼مؤسسة منبريون للنعي4
@ahmed_alziwar5

(كروب مؤسسة منبريون)


#ملاحظه ممنوع ادز الحانك للاخوات على الخاص اي لحن عدك تنشره بهذا الكروب 👇👇👇👇👇

2.كروب 2 خاص بنشر وتلحين القصائد
https://tttttt.me/joinchat/Dw92DkJZ4tvb4YIzJWBWrg

#قصائد_الاربعينية_١٤٤٥_هـ

#مـۄسسـﮫ_مــﻥــبـريۄن_للالـﺢــان

الناشر.احمد.الـــزوار.cc



  .      🏴اربعين  احزاني  _ فاكده  خواني      😭
*
ــــــــــــــــــــــــــــــــــــــــــــــــــــــــ
#قصيدة #گعديه .#اخلاقيه..#حسينيه
على طريقة
(مفروض عالناس حبك ياعلي)
.
.
أتعلم أخلاق ... ثورة كربله
وأخذ الدروس من الميامين .
.ياخادم حسين
.

مره دولاب النوايب
                   تشعر بحظنه يظمك
اخو عندك للمصايب
                   ينولد متجيبه أمك
يحطك بروحه وضميره
                حاير وكل همه همّك
.
چن عطش بيك ارتوه
بظلمتك يصبح ضوه
يستلذ شم الهوه ..  ابريّته لمن يشمك
.
عالدنيا ربحان .. من تلگه الأخو
واجملها تحضى بصاحب الدين ..
.ياخادم حسين
.
.
.
أشكر الباري بسجودك
                    لو لگيت اللي يريدك
صاحبك ذاك اللي تشعر
                   ينبض بأسمه وريدك
هواي فكر يلي رايد
             لأي سبب تخسر عضيدك
.
من بعد أي مشكله
اصفن وعاين إله
لحظه بيها اتخايله
لمّن أيموت اعله أيدك
.
العمر فلسين ... مايسوه بعد
لو بي فگدت الصاحب الزين ...
.ياخادم حسين
.
.
.
بالغضب حبل الموده
                   بالك ابسرعه تگطعه
واليگصّدك بعتذاره
                   منكسر لا. لا. ترجعه
التعيش بريته شهگه
            تحچي گبلّ اللسانه دمعه
.
من يگول أنت جراحي
لا تگله اسود صباحي
قبله رد ابن الرياحي
ينصر حسين ويتبعه
.
بس حرك اشفاه ... يتلمس عذر
ابن الزچيه حطه بالعين ....
ياخادم حسين
.
.
.
گلبك الطيب احفظه
                      وبالتكبر لا تنحره
يعلى شانك بالتواضع
               والخطى بحقك اعذره
تأمل وانظر إمامك
              ارتقى حتى اويه مُهره
.
من گله دلالي انفطر
ادري العطش يكسر ظهر
آنه ما ضوگ النهر.
والعذب عينك تنظره
.
من ترتوي احشاك ... آنه ارتوي
اتعلم وأخذ البراهين ..
..ياخادم حسين
.
.
.
لو چنت مخطئ تعذر
                     وبالخطيئه لا تكابر
الجرحته اطلب سماحه
                 محتمل متشوفه باچر
ظهرك يظل محني لجله
                 لو سكن ارض المگابر
.
بقوس الوتر اذبح سهم
استعجل واعلن ندم
مد چفك وداوي الألم
فعلك اتخلده المنابر

الصاحب الزين... هو اليعتذر
موش اليعيش وعنده وجهين...
.ياخادم حسين
.
.
آنه كل  فاگد أگله
                شما كثر نوحه وأنينه
بالمجالس خله يهدي
                   الهم العبره الحزينه
الغايب الزهره تسجله
                حاظر بدمعه الحنينه
.
يهديله عبره من الهظم
يتقاسم وياه اللطم
الطبره وي كسر العظم..
شما حظر مجلس حسينه
.
مذبوح الانفاس ... نعرف مايرد
لكن تسجله ويه المعزين ...
.ياخادم حسين
.
.
حسن الموالي الفاطمي
.
.

.


▪️مؤسسة منبريون للالحان رقم 1
@ahmed_alziwar1
▪️مؤسسة منبريون لنشر القصائد 2
@ahmed_alziwar2
▪️مؤسسة منبريون للمقامات3
@ahmed_alziwar3
▪️مؤسسة منبريون للنعي4
@ahmed_alziwar55

كروب تلبية الطلبات
https://tttttt.me/+EYMpn6BKE-IxYmZi