#من_ديوان_سيدات_العفاف_ج١
قصيدة للزهراء(كون الچ حضره)
❥━──➸➽❥❂❥━──➸➽❥❂
كون الچ حضره ونجي مشايه
نسوي يم الحسن ليچ قرايه
كون الچ حضره وصحن ... وشيعتچ تگعد تون
نسوي يم الحسن ليچ قرايه
❥━──➸➽❥❂❥━──➸➽❥❂
كون الچ شباچ يالزهرة وضريح
نگعد بنصه يمولاتي ونصيح
آه واويلاه يا أم الذبيح
كون وي طيحتچ كل احنه نطيح
آه من كسر الضلع ... منه كل شيعي انفجع
نگصدچ بنت النبي عنايه
كون الچ حضره ونجي مشايه
❥━──➸➽❥❂❥━──➸➽❥❂
كل رواية تمر نظل نبچي بحزن
وبضريح حسين كل مره نون
بس نريد نشوف صحن ام الحسن
وندري بالفردوس الچ مبني صحن
وبيه تصيح ام البنين ... نور عيني يا حسين
وزينب وياها تجي نعايه
كون الچ حضره ونجي مشايه
❥━──➸➽❥❂❥━──➸➽❥❂
كل موالي يصيح آيا فاطمة
شيعيتچ يم الحسن متألمة
مخفي گبرچ من عيون الظالمة
وانتي بت خير الرسل يا عالمة
يمته يا مهدي العصر ... بيدك تشيد الگبر
وترفع اعله الگبه انته الرايه
كون الچ حضره ونجي مشايه
❥━──➸➽❥❂❥━──➸➽❥❂
عجل دخيلك آيا مهدي العصر
شيعتك والله لظهورك تنتظر
بيدك تدلينه انته اعله الگبر
گلب كل شيعي احر من الجمر
انتي للشيعه أمان ... فاطمة ام الحنان
يلتجي ليچ اليحير برايه
كون الچ حضره ونجي مشايه
❥━──➸➽❥❂❥━──➸➽❥❂
زيارتچ يا ريت مثل الأربعين
نرفع الرايات ونعلي الونين
ونتجه ليچ بگلب كله حنين
شما نون اعليچ احنه مقصرين
يالبتول اناشدچ ... وبالدموع انعاهدچ
خدمتچ هي الأمل والغايه
كون الچ حضره ونجي مشايه
❥━──➸➽❥❂❥━──➸➽❥❂
*بقلم✍🏻خادمة اهل البيت ع*
*الشاعرة العلوية مريم النور نسألكم الدعاء الفاتحه الى روح اختي ولأمواتكم:*

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

#من_ديوان_سيداتُ_العفاف_ج١
قصيدة لأم البنين(شريكة زينب)
❥━──➸➽❥❂❥━──➸➽❥❂
يا شريكة زينب بهمهه وحزنهه
ماكو بالدنيه مره تضحي بأبنهه
وين اكو مثلچ مره ... انتِ حره وطاهره
❥━──➸➽❥❂❥━──➸➽❥❂
يا شريكة زينب الحرة بالمصاب
اثنينچن بالطف تره ضيعتن احباب
جرعاچن هالزمان آهات الغياب
والگلب من البواچي والحزن ذاب
بگيتي وحدچ حايره ... انتِ حره وطاهره
ماكو بالدنيه مره تضحي بأبنهه
❥━──➸➽❥❂❥━──➸➽❥❂
انتِ ضحيتي اربعه فدوة للحسين
وگلتي بس كونه يرد سالم يالحنين
بس الف يا حيف حزوله الوريدين
وعمرچ اگظيتيه بس لاجله تنوحين
ودمعچ اعله الخد جره ... انتِ حره وطاهره
ماكو بالدنيه مره تضحي بأبنهه
❥━──➸➽❥❂❥━──➸➽❥❂
وين اكو مثلچ مره بالدنيه كلها
جوهرة انخلقت بعد ما صح مثلها
يحچي التاريخ عنها وعن اهلها
فراك ابو السجاد يا هالناس سلها
وبقت بعده مناطره ... انتِ حره وطاهره
ماكو بالدنيه مره تضحي بأبنهه
❥━──➸➽❥❂❥━──➸➽❥❂
اولاد عندچ أربعه وضيحتي بيهم
گلتي اريد الباري يرضالي عليهم
بس يولدچ فاطمة بروحي اشتريهم
اليوم اريدن لو يجوني لو اجيهم
بعاد ناموا بالثره  ... انتِ حره وطاهره
ماكو بالدنيه مره تضحي بأبنهه
❥━──➸➽❥❂❥━──➸➽❥❂
ناموا بطف كربله وخلوني وحدي
بوكت موتي بس اون دمعي اعله خدي
لا وليد ولا بنيه البقت عندي
ياهو اليشيعه النعشي وبيه يحدي
ونار گلبي مسعره ... انتِ حره وطاهره
ماكو بالدنيه مره تضحي بأبنهه
❥━──➸➽❥❂❥━──➸➽❥❂
*بقلم✍🏻خادمة اهل البيت ع*
*الشاعرة العلوية مريم النور نسألكم الدعاء الفاتحه الى روح اختي ولأمواتكم:*


https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

#من_ديوان_سيداتُ_العفاف_ج١
قصيدة للسيدة زينب(من تدفن الحزنانه)

بهيده يا علي السجاد
من تدفن الحزنانه
❥━──➸➽❥❂❥━──➸➽❥❂
بهيده من توسدهه
وتحط باللحد خدهه
غير الحزن ما عدهه
گضت والعين ذبلانه
❥━──➸➽❥❂❥━──➸➽❥❂
اعله اهلهه تسيل دمعتهه
وما بطلت ونتهه
احا يا مصيبتهه
من دنياها تعبانه
❥━──➸➽❥❂❥━──➸➽❥❂
هدهه افراك اهاليهه
بقت كل حيل ما بيهه
لاخوها الدمعه تجريهه
الكفلها غفه بميدانه
❥━──➸➽❥❂❥━──➸➽❥❂
بيوم الگطعوا الچفين
وحزو يا وريد حسين
گلبها منفطر نصين
لحد الموت لهفانه
❥━──➸➽❥❂❥━──➸➽❥❂
تريد اخوانها يحضرون
نادت جعفر ويا عون
وعباس الي يسوه كون
الكفلها اگطعو ذرعانه
❥━──➸➽❥❂❥━──➸➽❥❂
گضتهه والله موتتهم
اوكت الموت رادتهم
بعالي الصوت صاحتهم
روحي بقت حيرانه
❥━──➸➽❥❂❥━──➸➽❥❂
*بقلم ✍🏻خادمة اهل البيت ع*
*الشاعرة العلوية مريم النور نسألكم الدعاء الفاتحه الى روح اختي ولأمواتكم:🍃*

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك