قصيدة *[ #علي_وينه ]*
في إستشهاد السيِّدة #أم_البنين عليها السلام ، 1441 هـ
___________

المستهل /

وين ابو الحسن .. يحضر الچفن
قلبي والإيدين .. عَتبه ينشِدن
علي وينه ، علي وينه ، وين ابو الحسن


1 /

بفراشي وحيده دايره العين
مره ايساري انظر مره ليمين
لا يمي اعتنوا وِلدي ولا احسين
الغربه استوحدتني ابصُحبة البين

انظرني احلفك بالزچيه
هاذ اول طلب لي هالمسيه
عِشره اوياك ياحامي الحميه
مشتاقه إلك ارأف عليه

چم سنه المِشت .. حِنتك افقدت
وآنه بالهجر .. روحي انسلت
إلي انظر ، إلي انظر ، كل هلي جِفن


2 /

يا انفاس ريتي يا انيسي
يابسمه اعلى شِفتي يا جليسي
يالمحرابك ايصيحك حبيسي
جا وقت إلـ اقلَّك عن حسيسي

يوم إلـ اخذِتك مني طبرتك
ماصحت ابجوارك ابداري صحتك
اعلى احسين اُو حسن خفت اُويا بنتك
واقلهم -امكابِره- بتعود صحتك

عني من رحت .. البسمه ماضقت
داري موحشه .. بيها مانمت
رحل عني ، رحل عني ، اُو نايم ابـ عدن


3 /

ابشرك ياعلي صار إلي ردته
اُو حيل ارتحت انا نذري صدِقته
ابني عالشريعه ابلا يمنته
رفع راسي ابفضِخ راسه اُو فِعلته

عن زينب ابنيتك لما رِجعت:
يمه احسين اركانه تِهدمت
طيحة بوالفضل لحسين وِجعت
ظهره اُو ظهري نفس الساع كِسرت

وفه بوالفضل .. قولًا اُو فِعل
وِلده واخوته .. دزها بالمهِل
فِدا لحسين ، فِدا لحسين ، دمهم الجرن


4 /

غصة قلبي لوحيده اهيّه چانت
ابعيني شفت زينب عني راحت
للشامات اقصوها اُو ماتت
بديار التِعذبت بيها عانت

شمل بيتك علي اتفرّق اُو ضاع
كلهم عذبتهم هذي الاوضاع
راحوا واتركوني وحدي ارتاع
كلما بابي ايهزه الهوا ابساع

حسره بالأمر .. منهو انتظر!
قلبي يرتجيك .. ياعلي تُمر
منو غيرك ، منو غيرك ، قلبي تجبرن


5 /

آنه أم البنين يا نور عيني
ما استاهل ابموتي تجيني؟
تعال امسح على راسي وجبيني
اُو خذني اوياك ملّيته ونيني

قعدتكم سوى اشتاقيت إليها
انته والحسن اُو لولاد كلها
وهناك الزچيّه انظرنها
واخيرًا تلتقي وي خادمتها

ألتقي البتول .. مُهجة الرسول
اكتفي النظر .. والحزن يزول
علي خذني ، علي خذني ، خذني للوطن .

___________

بِـ قلم /خادمة وليِّ النعمة ( قصائد وليِّ النعمة )

الناشر عباس التميمي
https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك👆👆

كروب قصائد والحان منبريه اشترك 👇👇
https://tttttt.me/joinchat/AAAAAD7f0FNmkN2JjlNIBw

للتواصل مع الناشر 👈 @Abas747