قصيده خفيفه للاكبر "ع"((الليله ليله))

الليله ليله بالخيم نصبت لبنها الفاتحه
ـــــــــــــــــــــــــــــــــــــــــــــــــ
الليله ليله بالخيم مهظومه
تلطم لبنها علوجه مالومه
من يمه رجعت موسليمه هدومه

مطحون بالخيل الولد مادرت بيه الصالحه
الليله ليله بالخيم نصبت لبنها الفاتحه
ـــــــــــــــــــــــــــــــــــــــــــــــــ
جابو لمه وصاحت الحزنانه
يمه علي شو ضحكتك ذبلانه
اكعد وروي امك العطشانه

افتح عيونك يلولد مو حلوه ليك النايحه
الليله ليله بالخيم نصبت لبنها الفاتحه
ـــــــــــــــــــــــــــــــــــــــــــــــــ
اسم الله عليك من الكبر يوليدي
بالترب تالي تندفن ياعيدي
ظليت محتاره واصفج بيدي

تفارگني فجئه مو جنت يمي البارحه
الليله ليله بالخيم نصبت لبنها
ـــــــــــــــــــــــــــــــــــــــــــــــــ
كتلك اموت وفرگتك تأذيني
فدوه لعيونك يلولد حاجيني
كالولي عافج كلت متخليني

ترضه تخلي الجابتك بس للطم والصايحه
الليله ليله بالخيم نصبت لبنها الفاتحه
ـــــــــــــــــــــــــــــــــــــــــــــــــ
الليله لطمك يالحنين براضه
وروحي حزينه لفگدك ومغتاضه
كل الهواشم ليك اجو بعراضه

سو عراضه براية العباس ذيج الطايحه
الليله ليله بالخيم نصبت لبنها الفاتحه


الشاعره رسل الإبراهيمي

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

لطميه لعلي الأكبر عليه السلام( ما يرد أوليدي )


ما يرد أوليدي ... راح من بين أيدي
هوه كل أسنيني ... فرگته تعميني
راح من بين أيدي
❥━──➸➽❥💔❥━──➸➽❥💔
ما يرد أو ما أشوفه الچان دومه أگبالي
نومته أعلى الگاع مني اليوم شلت حالي
لو نهدته أيگوم اليه هالولد حسبالي
وسفه شال أشلون عني وعاف گلبي خالي
يابسات أرياگه ... كسر ضهري أفراگه
راح من بين أيدي
❥━──➸➽❥💔❥━──➸➽❥💔
يابسات أرياگه أشوفه والدمه أعلى أعيونه
عالتراب أبني أو حبيبي منه ذابل لونه
بعد ماشوفن ضحكته بعمري شلي أبدونه
بعز شبابه ورايح أبني ما يرد مضنونه
علي كل دنيايه ... بي جروح أهوايه
راح من بين أيدي
❥━──➸➽❥💔❥━──➸➽❥💔
كل ملامح وجهه صارت من دماه مخضوبه
عافني الربيته بيدي وأبرباه متعوبه
راحتي من عگب عينه صبحت مسلوبه
هامته الكسّرت گلبي من شفت مضروبه
حيل ما بيه بعد ... آه يفراگ الولد
راح من بين أيدي
❥━──➸➽❥💔❥━──➸➽❥💔
موش وأقع گولو فدوه هاي المصيبه حلم
أبد ما تنجرع والله حيلي منعدهه أنهدم
صدگ يعني أخلاف أبني راح أعيشن بالألم
صحت صوت الله وأكبر شنو ذنبه أو ما سلم
عذبتني نومته ... والسهام الصابته
راح من بين أيدي
❥━──➸➽❥💔❥━──➸➽❥💔

*لخادمة الأمام الحسين 《ع》*
*الشاعرة ✍ نشوان الكناني*
*غير مبرء الذمة كل من يتلاعب بلقصيدة*

الثلاثاء / ٢٧ من شهر ذي الحجة
الموافق / ٢٠٢٥/٦/٢٤

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

قصيدة لعبد الله الرضيع ع {جيت اناغيك}

جيت اناغيك ييمه جيت اناغيك
گـــــوم الوليك ييمه گوم الوليك

شلك بنوم الكبر ** بيه ماضل كل صبر

جيت اناغيك ييمه جيت اناغيك
❥❥❥❥ـــــــــــــ❁❁ـــــــــــــ❥❥❥
جيت اناغيك ييمه واحجي وياك
وداعة اطلوگ الطلگته ايأذي فركاك
روحي حنت يالوليد لذاك ملكاك
من ترفرف ليه وتعلي نغاياك

گوم يابعد العمر ** بيه ماضل كل صبر

جيت اناغيك ييمه جيت اناغيك
❥❥❥❥ـــــــــــــ❁❁ـــــــــــــ❥❥❥
بعد مابيه احتمل خلصان صبري
يمه بس عوف الكبر وانطيك عمري
ابدال كبرك كون بس حفرولي كبري
وكون مو نحرك گطيع اتمنه نحري

دمعي بخدودي حفر ** بيه ماضل كل صبر

جيت اناغيك ييمه جيت اناغيك
❥❥❥❥ـــــــــــــ❁❁ـــــــــــــ❥❥❥
دمعي بخدودي حفر يالنايم ابطين
اشلون عايفني انسبي يوليدي بعدين
من بعد ذبحك ييمه ذبح الحسين
حيلي خلص والفراگ ايريد حيلين

الصوبك گلبه حجر ** بيه ماضل كل صبر

جيت اناغيك ييمه جيت اناغيك
❥❥❥❥ـــــــــــــ❁❁ـــــــــــــ❥❥❥
الصوبك گلبه حجر يالولد يبني
يبچي ضل من الفراگ اعليك حضني
اجفاك ماتدري شكثر يبني هظمني
ونشدني اعليك بز عيني ولچمني

راح اموت من القهر ** بيه ماضل كل صبر

جيت اناغيك ييمه جيت اناغيك
❥❥❥❥ـــــــــــــ❁❁ـــــــــــــ❥❥❥
راح اموت من القهر واجفاك والنوح
گلبي بفراكك ييمه ابسهم مذبوح
بعد شيطيب بدونك ذيچ الجروح
نايم بكبرك وحملي يمه مطروح

يالدمع بالخد حفر ** بيه ماضل كل صبر

جيت اناغيك ييمه جيت اناغيك
❥❥❥❥ـــــــــــــ❁❁ـــــــــــــ❥❥❥
#للشاعرة غدير الحساني
كتاب موعد المآتم ج3

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

ليلة الوداع
ليلة عاشوراء
………….
زينب الليله حايره
النا ر ابكلبها امسعره
الله من بلواها
تنشر على ولياها
…….
هليله زينب بالحزن. تتوادع اويه اخوتها
دمعتها  اعليهم تصب متعاليه
حسرتها
اتكلهم يخوتي اوعزوتي روحي اشكبر لوعتها
ما اخفي اعليكم ابد باجر اظن كسرتها
من يوم ماتت فاطمه
روحي عليها امألمه
والروح انتو ادواها
تنشرعلى ولياها
……
شلي بحياتي يخوتي وانتو سبب فرحتها
تنكبني  بيكم دنيتي
ويلاه  من نكبتها
انتو العمد وانتو السند زينب تحاجي اخوتها
الراس  بيكم  مرتفع  وانتو سبب رِفعتها
ابشر تكله يالولي
خويه وحك حيدر علي
الحرم انه ارعاها
تنشر على ولياها
……
الليله ليله. مظلمه مابيها ابد لمحة ضوه
اتحاجي اخوها اتخاطبه مخنوكه ما بيها هوه
اوياكم يخويه استود موتتنه كل احنه سوه
شلي بعدكم بالعمر ياتاج عزنه الي هوه
كربله بيها التضحية
نبراس للحق باقيه
كربله احييناها
تنشر اعله  ولياها
…..
كالتله خويه انضل حرم وايتام  تالي  اونسوان
جسام والاكبر علي اوكل  الصحب والرضعان
واعله الشريعه كافلي تنگطع منه الذرعان
شنهو يخويه التكليف من نِضل بين العدوان
گدها انتي يا لبوة علي
سجادي تحمينه الي
وتحمين سنة طه
تنشر على ولياها
…..
كالتله ابعيني يخي انه اكمل الثوره
واني ابين الي جره والسوته هل زمره
رادو  دفن سنة النبي اويمحون دينه اوذكره
وايزيد انه خاطبت يبن  الطليق اوكفره
ابشر ابنار الحاطمه
وآنه اللي أمي فاطمة
رب العلا علاها
تنشر على ولياها
……

انتو الشمس   وانتو الكمر وانتو سما دنياتي
اسمي ارتبط ويه اخوتي واتخلدت وگفاتي
ٱبمجلس ابن ازياد الرِجس
ضلت ترن جلماتي
آني العقيلة الطاهرة وياويلك ٱمن الآتي
انتو عصابة ظالمه
اوجدنه بنته فاطمه
يرضه الله لرضاها
اتنشر على ولياها
……
شالت الرايه بت علي اوكفلت اعيال اخوتها
كل المآسي الي جرت بت فاطمه حملتها
ٱبليله العاشر  من مشت كصدت لعد كافلها
كالتله اختك يابطل انته سبب عزتها
خوّتك خويه اوسام الي
عباس ابن حيدر علي
ابخوّتك انه  اتباها
اتنشر على ولياها
…
الحاجة ام احسان الخاقاني
4محرم الحرام 1447هـ

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

نعي لعبدلله الرضيع (ع)

اووووف يمه الولد يمه


عبدالله يمه ليش غافي
يوليدي من النوم كافي
نورك عليه اليوم طافي
ـــــــ
نورك طفه ومغمض العين
محزوز يايمه الوريدين
وگلبي عليك انجسم نصين

ـــــــــــــ
ابجي ييمه وفاجده الراي
درن يعبد لله ثـداياي
يالمنذبح ماضايگ الماي
ـــــــ
عبدالله يمه ماي العيون
عليك الگلب يالولد محزون
حرموني منك لمايرحمون
ـــــ
حرموني من وليدي اليوم
وبنبله ويلي صابته الگوم
ضلن ييمه بـــس الهدوم
ـــــــ
بس الهدوم ومهد خالي
اگعد ييمه وشوف حالي
بعدك صفت ضلمه الليالي
ــــــــــــــــ
تــــمت بعون الله تعالى
بقــــ✍🏻لم خـادمة السيده رقيه عليها السلام
*الشـــاعره سهام علــــــي المـــالكــي*
لاأجيز حذف الأسم
نسالكم الدعاء بتعجيل الفرج لصاحب الزمان ((عج ))

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

فزاعيه لعبد الله الرضيع (ع)

مذبوح الطفل هاليوم
وامه تنوح حزنانه

ـــــــــــــــــــــــــــــــ
أمـه تنوح وتنادي
يمه اعليك شسادي
يبني ومهجت افادي

لفگدك عيني عميانه
ــــــــــــــــــــــــــــــ
عميانه عليك العين
گلبي منجسم نصين
وفاجعني ييمه البين

روحي يبني خلصانه
ـــــــــــــــــــــــــــــــــــ
روحي يبني مهدومه
الفگدك بقت مالومـه
جرحي ينزف ادمومه

وليلي كــله سهرانـه
ــــــــــــــــــــــــــــــــ

سهرانه وون لـيلي
يومك ذوب ادليلي
بعدك منهدم حيلي

انوح وحيل تعبانه
ــــــــــــــــــــــــــــــــ
تعبانه واريد اربــاي
انوح اعليك يارجواي
گوم اگعد يلب حشاي

عليك الروح لهفانه
ــــــــــــــــــــــــــــــ
لهفانه وصيح بصوت
وگلبي يالولد مفتوت
اونن ونتي بسكوت

اويومك يــــمه اذانه
ــــــــــــــــــــــــــــــــــــــ
تــــمت بعون الله تعالى
بقــــ✍🏻لم خـادمة السيده رقيه عليها السلام
*الشـــاعره سهام علــــــي المـــالكــي*
لاأجيز حذف الأسم
نسالكم الدعاء بتعجيل الفرج لصاحب الزمان ((عج ))

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

ليلة العاشر والوداع
*نزلة

بس هالليله بس هالليله
عباسچ يحرس هالعيله


يا زينب و اشلونه گلبچ
و الدنيا دارت عالحربچ
زادت أحزانچ وي كربچ
و المحنه اچبيره و اثجيله


باچر اتفگدينه الكافل
و اتشوفينه ورده ذابل
والدم من اجروحه سايل
گلبي بعده يفگد حيله


ودعي عباسچ يا زينب
ساعات الفرگه تتقرب
و اعدائه ابموته ترغب
كلمن ايضربه يا ويله


قبلي اچفوفه يا محزونه
باچر من عدها ايحرمونه
و اتشوفي ابعينه ايصوبونه
والطاغي راسه ايشيله


بس هالليله وجهه ايلالي
باچـر يتخـــضب اگبالي
عالشاطي ايطيــح الغالي
و انتِ مضروبه اتروحيله
=
📝 #الشاعرة_الملاية_زينب_المؤيد #ديوان_خزائن_الولاء_في_مدح_خيرة_الأولياء 3 أجزاء

تمت بحمد الله تعالى
*ونسألكم الدعاء لتعجيل الظهور*

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

فزاعيه للرضيع ع


(من گبل لتدفنونه)


خلو بكاروكه الولد
من گبل لتدفنونه




خلو بكاروكه يون
ازغير وجفاه شر الدفن
تارسني بفراگه حزن

خلهم هله يودعونه




خل يظل يمي للصبح
بلجن اشدله الجرح
ما انطي راسه للرمح
ولا ارضه انه يشيلونه




ماشاف كلشي بدنيته
فرفح بحضن امّيمته
والسهم نام برگبته

ومغورگات عيونه



فطموه بدماه الكفر
ما شاف بعده من العمر
وجهه مثل هلة بدر

بالگبر لتضمونه



ليش الزغيّر عالترب
غافي وگطره ما شرب
يا حيف من ماي العذب

اوليدي اتحرمونه
خلو ابكاروكه الولد
من گبل لتدفنونه

ــــــــــــــــــــــــــــــــــــــــــ


الشاعره رسل الإبراهيمي
نورس الحلفي
ورضاب الاسدي

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

فزاعيه لرضيع ع

حتى الطفل يحسين
كطعو منحره
...........

مابيها رحمه الكوم
دراو عله المظلوم
ماصار مثل اليوم
يوم السده عالحسين ماصار وجره
..........
ذبح الرضيع شلون
سالت عيون الكون
أملاك العرش يبجون
اليوم الغريب عليه ناره موجره
..........
صاح العرش ويلاه
سهم الغدر صاباه
جف السبط شالاه
فرفرت بيد حسين روحه الطاهره
..........
وين العليه اينوح
وايصيح يامذبوح
كلب السبط مجروح
رد للخيم ويصيح روحي محيره
.........
زينب يخويه اتعاي
طفو ضوه عيناي
ماشرب ابني الماي
طلعت تدك عالراس بت خير الوره

✍أم زينب كربلاء غير مبري الذمه من ياخذ الكلام وينسبه له او يحذف الاسم من كتاب   المآسي الفاطميه الجزء الخامس والعشرين

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

لطميه تقره بعدة اطوار للرضيع (ع)( يادم الطفل)

يادم الطفـل ماطـاح عالگــاع
من جف والده وانرفع ابساع
ــــــــــــــــــــــــــــــــــــ
ذبحوه الطفل ودمومه تجره
ما نـــزلت ابـد عالگاع قـطره
ايعين الله ابوه اشلون صبره
ولفگد الرضيع انحنت لضلاع
ــــــــــــــــــــــــــــــــــــ
على فگد الطفل الابو حزنان
صابوه بسهم ومات عطشان
ضلمه اصبحت اعليه الاكوان
للمفطوم هــذا الگلب مـــرتاع
ــــــــــــــــــــــــــــــــــــ
عبد الله بنبـل وسهام مفطوم
صابوه بحقد ياوسفه هالگـوم
گلب أمه حزين وينزف ادموم
هل ضاگت عليها كـل الوساع
ــــــــــــــــــــــــــــــــــــ
مصايب ضيگـن بيـها الوسيعه
يايوم الطفـل أعظـم فـجـيعه
مــن دم منحره هدومه نجيعه
منه أيست وكـــل الامل ضاع
ــــــــــــــــــــــــــــــــــــ
ضاع الامل منه وحارت الروح
وبين احضانها عبدالله مذبوح
تگله اگـعد ييمه فــدوه لتروح
يـهـد اجـبـال ايا يـــوم الوداع
ــــــــــــــــــــــــــــــــــــ
تــــمت بعون الله تعالى
بقــــ✍🏻لم خـادمة السيده رقيه عليها السلام
*الشـــاعره سهام علــــــي المـــالكــي*
لاأجيز حذف الأسم
نسالكم الدعاء بتعجيل الفرج لصاحب الزمان ((عج ))

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

*(( لطميه فزاعيه للرضيع عليه السلام ))*


يذباح الطفل ماعندك مروه
ليش بياذنب من دمه يتروه
🏴🖤🏴

صغيرون الولد وشعندك وياه
ليش شطالبه وتخضب دماه
عندك عيد وتگلهم ذبحناه
هاي الدنيه ساعه وابد ماتسوه
🏴🖤🏴

عندك عيد ومگيف ذبحته
ومهجة فاطمه سالت دمعته
والمحشر حسابه ماحسبته
غير النار باجر كلشي ماتحوه
🏴🖤🏴

باجر ماتفر وحسابك يطول
مرفوض العذر هيهات مقبول
لحيدر والزجيه شنهو تكول
خليت الرضيع بنبله يتلوه
🏴🖤🏴

بنبله گطعت منه الوريدين
خليته يلوج بحضن الحسين
ميته گلوبكم گوم الملاعين
حاجيني الطفل يلضالم شسوه
🏴🖤🏴

شمسوي عبد بدم فطمتوه
وشربة ماي ماترضون تنطوه
ولك ياحرمله شنهو العملتوه
تگطع رگبته عبدالله الحلوه
🏴🖤🏴

گبال حسين تگطع رگبته شلون
ماعندك رحم ضالم يملعون
باجر بلحشر جاوين ترحون
للباري الزجيه تقدم الشكوه
🏴🖤🏴

*(( كلمات الشاعره ام عون الحلاويه ))*


اطلب منكم تندعولي ان الزهراء تقبل خدمتي

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

لطميه للوداع


لو صار العصر يحسين
كلي.وين منوانه

〰️〰️〰️〰️
باجر تنسبي العيله
ويطيح الكلب حيله
زينب عدكم دخيله
       كلبي فكد عنوانه
〰️〰️〰️〰️〰️
باجر تحترك الخيام
وتموت بجمع الازلم
تكضي بلجمع الاسلام
دهري وين ودانه
〰️〰️〰️〰️
  اشوفنكم وذر يحنان
    تكلف نومه الخوان
لكلبي مايضل عوان
حيدر ليش ماجانه
〰️〰️〰️〰️〰️
رقيه تنسبي  يحسين
  من هسه عمت هل عين
ماندل طريقي وين
   نوجه العتب  يحمانه
〰️〰️〰️〰️〰️
صعبه باجر الشده
شلون العايل نرده
وحنه اخوان ماعدنه
خويه استمع شكوانه
〰️〰️〰️〰️
  تسابك علينه الخيل
يطيح الكلب وي الحيل
  كلنه نخاف من الليل
   الليل بضلمه غطانه
〰️〰️〰️〰️
جراحات الطف الجزء السابع
✍🏻 بقلمي الفقير
خادمه البتول المله ولشاعره ام نادين المحمداويه ملكه الحسجه الجنوبيه

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

لطمية لعبد الله الرضيع عليه السلام (( خلوني اشمنه ))


خلوني اشمنه     وخلوني اناغيله
مذبوح عبد الله     والسهم هد حيله


عطشان عبد الله     والعطش فت گلبه
ماي النهر يجري     ومحد رضه يشربه
للگبر ماوديه     والمگبره اتخربه
ليش النذل ذبحاه     چا بيمن يطلبه
مايبرد اصوابه     وينزف شسويله


مايبرد اصوابه     ولاتبرد اجروحه
وبحضن ابوه حسين     مات وگضت روحه
حار السهم چا ليش     بالمنحر يلوحه
ماغمضت عيني     وللمهد مشبوحه
چان المهد متروس     ضل فارغ الليله


چان المهد متروس     بالطفل ورسومه
كلساع اشيل اغطاه     وامگابله اهدومه
جابه الغريب حسين     تتناگط ادمومه
اشلون اصيح يبات     مدفون بالحومه
عن الشمس باچر     ياهو اليفييله


ياهو اليفييله     والشمس حراگه
ومعلگمه ارياگي     ومعلگمه ارياگه
الطفل راد الماي     والماي ماضاگه
تسعر بدلالي     ياجمرة افراگه
مرعوبه اون ضليت      مااسكت ابچيله


مرعوبه اون ضليت     شنهو اليسكتني
راح السهر وارباي     راح الولد مني
لابالمهد نايم     لانايم بحضني
حال الغريب حسين     لوعات چملني
ودع عزيزاته     اودع مداليله



✍شاعرة اهل البيت
الملة ام هجران العمارچيه
غير مبري الذمه من يحذف اسم الشاعرة او ينسب الرثاء لشخص اخر

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

قصيدة الليلة الوداع
وزن الموشح كامل
✏️🥺

حان يم الخدر هالليله الـــــوداع

باجر مطاعين حلوين الطــــــباع

*~❁ـــــــــــــــ⇣ ৡـــــــــــــــ❁ ~*

الوداع الليله ودموعج تســـــــيل

توادعي يم عون لايخلص اللـــيل

يختي زينب يبقى وياج العلـــيل

وباجر اتشوفين عالغبره السباع

*~❁ـــــــــــــــ⇣ ৡـــــــــــــــ❁ ~*

باجر اتشوفين خــويه النايبات

وبلا خيم اعيالي يازينب تبــات

وتبقين محتاره يخـويه بالبـنات

تكثر اعليج يبت عــودي الاوجاع

*~❁ـــــــــــــــ⇣ ৡـــــــــــــــ❁ ~*

يزود خويه اعليج الهم والمصاب

اخلافي اتشوفين اهموم وعذاب

اتنام اطفالي يخويه اعله التراب

والحرم اتصير من بعدي ضياع

*~❁ـــــــــــــــ⇣ ৡـــــــــــــــ❁ ~*

الحـــرم اتضيع بأرض الطـــفوف

بعد ابو فاضل المگطوع الچفوف

من العده لوعــــات اطفالي تشـوف

الگلب مـــن الهظم خويه مرتاع
*~❁ـــــــــــــــ⇣ ৡـــــــــــــــ❁ ~*

ايروعون أطفالي باجر والخدور

وسفه والعدوان عالخــــدر تـدور

وكلهه نومه اعله الترب تبقه البدور

وبأخوج احسين تتهشم اضلاع

*~❁ـــــــــــــــ⇣ ৡـــــــــــــــ❁ ~*
*تــــمت بقــــ✍️لم خادمات أهل البيت عليهم السلام*

*الشاعره مـــريــــ✍️ــــــم الحجيمي*
*الشاعره ســـــهـــ✍️ــــــام المالكي*

لا أجيز حذف أسماء الشاعرات
نسالكم الدعاء لتعجيل الفرج لصاحب الزمان(( عج ))

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

لطميه مربعه لسيده زينب ع في وداع اخوانها ليله العاشر من محرم الحرام على طور الجنوبي
==================
اليله وداع يازينب بلخيام
باجر عشريعه الكافل ينام
احا احا احا احا احا
مصوبينه راسه بعامود
===
شدي احزامج وكومي المصاب
ودعي حسين يازينب والحباب
عكب عينه رغد بلعيش ماطاب
تشوفينه باجر على الغبره
هوسه ورباط
ووداع حسين الهد حيلي
===
كون اليل بوداعه تكضينه
شتسوين اخيج لوغفت عينه
تونين وحزن دمعج تهلينه
نار فراكهم صعدت على الهام
هوسه ورباط
والهم لحسين اتكولينه
===
اليله خيامكم تزهي ب الاخوان
باجر حايرات بين عدوان
لوطاح الحمل والدهر خوان
يزينب والهضم والضيم جدام
هوسه ورباط
وابن امج هاري تشوفينه
===
اجاها حسين ويكلها ويوصيها
عيالي بركبتج زينب اخليها
تحاجي حسين والدمعات تجريها
تنحب زينب وتلطم على الهام
هوسه ورباط
يبن امي اخلافك ذلينه
===
تعناهه الكفيل وصاح يازينب
جفوف وعين لجلج ترسن الملعب
اشلون على النهر كافلها لوغرب
الضيم اخلاف اهلها محزم احزام
هوسه ورباط
تنعى بهيده من ضيم الطف
===
خلص ليل الوادع وزينب تحوم
من خيمه لخيمه تكع وتكوم
تصيح احا يبن يمضلوم
تعنت يم اخيها محمله الألم
مخليني عدمن يحسين
هوسه ورباط
وحسين على اخته تهل عينه
===
تمت بحمد الله تعالى بقلمي شاعره وخادمه اهل البيت عليهم السلام ملا زينب الطويرجاوي ٥ ٧ ٢٥ ٠ ٢

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

هوسات جنوبية للأمام الحسين ( ع)

✦❥※❥※✿✿※❥※❥※✿✿※❥※❥✦

ملعون الشمر صاعده على صدره
وبسيفه النذل گاعده يحز نحره
وين الطاهره لحسين ختنظره
ظامي وينذبح ما ضايگ الگطره

( دين النبي جده ..... لا تهدونه  )

وآميه اعليمن ما تشربونه
دين النبي جده
يا ذنب الجنه وهيچ تجازونه
دين النبي جده
راسه عالرمح عالي تعلگونه
دين النبي جده
وينظر عيلته وتتدامع عيونه
دين النبي جده
يشاهدهه غريبه اخته المحزونه
دين النبي جده

( حيرانه..... زينب من بعدك )

✦❥※❥※✿✿※❥※❥※✿✿※❥※❥✦

حيرهه الدهر وجروحه هوايه
واجت المصرعك يالاخو عنايه
ومن ظيم اللفاهه ليك شچايه
طحت اهنه واخوك اعلى المسنايه

( لو مشوا ضعنهه ..... من يباريهه)

لا وليانه عدهه وتنغر اعليهه
لو مشوا ضعنهه 
بس عدوانكم تفتر حواليهه
لو مشوا ضعنهه
وچلمات الشماته حيل تاذيهه
لو مشوا ضعنهه
يسألوهه عليك اتشمتوا بيهه
لو مشوا ضعنهه 
بت ليث الحرايب وين اهاليهه
لو مشوا ضعنهه

( المهيوبه  .....  شافت لوعات )

✦❥※❥※✿✿※❥※❥※✿✿※❥※❥✦

هوايه لوعات احملت زينب تره
ولاشدهن يوم عاشر ما جره
شاهدت خوت عمرهه اعلى الثره
بلايه روس وبس جثث متوذره

( ياحسين ابن امي  .....  عاين الحالي )

وارخصت الولد تدري الولد غالي
ياحسين ابن امي
مالي عين اشوفك عاري اگبالي
يا حسين ابن امي
وجروحك ينزفن دمه يالوالي
ياحسين ابن امي
يا ونك صدع ياخويه دلالي
ياحسين ابن امي
كون اوياك صار الشمر چتالي
ياحسين ابن امي

( اتخلوني ..... بين الشمات )

✦❥※❥※✿✿※❥※❥※✿✿※❥※❥✦

تمت والحمدلله ✍ خادمة أم أبيها الشاعرة أم علي الحلفي (من ديوان مصارع الكرام الجزء الأول) لا أجيز شرعاً حذف الأسم اوتغير الكلمات

                       نسألكم الدعاء

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

فزاعيه حول يوم العاشر



موش الاوليه. ام عون تعبانه

من طاح الولي. وفزعو الصيوانه



اختكم كاضيه وكل حيل مابيهه
وكتلها افراكم كلش يهاليهه
موش الاوليه النوح كاضيهه
ومضيعه الولي والروح خلصانه


تعبانه يخويه ويومكم هدني
وعميه اخلافكم كلش خوال ابني
ادور مالكيت الجابني يردني
لو نايم اريده يكوم ويانه

ويانه يكوم وياخذ حموله
تعبانه عله اخوها الزين كلوله
وعتاب وحجي من عدهه ودوله
كضت عمة وليده وحيل نحلانه


مابيهه وعليكم ماگضه ونهه
وموش اختك هذيج النوح كاتلهه
شالت كل اهلها وغربت منهه
وبعد هيهات يرجع ذاك ملكانه



خلص حيلها وتكول مهظومه
ومن فكد الولي ظليت مالومه
مريضه اخلافهم واحتار بل گومه
وماظل حيل عدي وروحي حزنانه



لخادمة الزهراء. العلويه ام جعفر
غير مبري الذمه من يحذف الاسم وياخذ الكلام وينسبه له من ديوان طف الزهراء الجزء الثلاثون

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

١٤٤٧ - للرضيع

((رضيعچ انذبح والمن تلولين))


رباب ابنچ گضى بالنبله هالحين
((رضيعچ انذبح والمن تلولين))

ورجع مكسور وابيا حاله لحسين
((رضيعچ انذبح والمن تلولين))

تلگي اوليدچ ابحسره والاونين
((رضيعچ انذبح والمن تلولين))

رگبته امصوّبه وما يفتح العين
((رضيعچ انذبح والمن تلولين))

وإذا تبچين ابچي من تنوحين
((رضيعچ انذبح والمن تلولين))

بعد ميطيب جرحه ولا تدورين
((رضيعچ انذبح والمن تلولين))

ترى الي ايموت ميرد تالي تدرين
((رضيعچ انذبح والمن تلولين))

وإذا صرتي أسيره امقيده تمشين
((رضيعچ انذبح والمن تلولين))

ترى راسه على رمحه تشوفين
((رضيعچ انذبح والمن تلولين))

گضى عبد الله وابدلاله جرحين
((رضيعچ انذبح والمن تلولين))

على احسين وعليچ اجروحه باقين
((رضيعچ انذبح والمن تلولين))

📝 #الشاعرة_الملاية_زينب_المؤيد
📚 #إصدارات_المؤلفة_٨٩_كتابا

تمت بحمد الله تعالى
*ونسألكم الدعاء لتعجيل الظهور*

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك