የኢትዮጵያ አማኑኤል ብርሃንና ህይወት ቤ/ክ ከተለያዩ አጥቢያዎች ለተወጣጡ አገልጋዮች ስልጠና ሰጠች።

ከተመሰረተች 26 ዓመታትን ያስቆጠረችው ቤተክርስቲያንኗ ባለፉት 10 ቀናትም በአራቱ ቀጠናዎቿ ማለትም በዶኒ ፣በአለምጤና ፣ በአርቤጎና እና በሻሸመኔ ቀጠና ዙሪያ ላሉ የአጥቢያ አገልጋዮች ስልጠናውን ስትሰጥ ቆይታለች።

በአሁኑ ሰዓትም የኢትዮጵያ አማኑኤል ብርሃንና ህይወት ቤ/ክ በአራቱም አቅጣጫ ሰባት ቀጠናዎችና 48 አጥቢያዎች እንዳሉዋት ተገልጿል።

በስልጠናው ማጠቃለያ ላይም ሐምሌ 25 እና 26 በሻሸመኔ አጥቢያ የወንጌል ስርጭት ጊዜ የተደረገ ሲሆን በተናጠል በተደረገ የወንጌል ስርጭትም 408 ሰዎች ወንጌልን የሰሙ ሲሆን ከነዚህም መካከል 12ቱ ጌታን ሲቀበሉ 14ቱ ደግሞ በንሰሀ መመለሳቸው ተነግሯል።

ከዚሁ ጋር ተያይዞም በጀማ ስብከት 2500 የሚጠጉ የከተማው ነዋሪዎች ወንጌልን ሲሰሙ 17 አዳዲስ ሰዎች ደግሞ የውሀ ጥምቀት መውሰዳቸውንም ከቤተክርስቲያኗ የደረሰን መረጃ ያሳያል ።

መረጃውን ከማህበራዊ ትስስር አገኘነው

ለኢቫንጀሊካል ቲቪ ፡ ቤተልሔም ደረጄ

እግዚአብሔር ጣልቃ እንዲገባ እንጸልይ" ዶ/ር ብርሃኑ ታምሬ ከደቡብ አፍሪካ ።

የደቡብ አፍሪካ የወንጌል አማኞች አብያተክርስቲያናት ካውንስል አስቸኳይ የጾም እና ጸሎት ጥሪ አቅርቧል።

የወንጌል አብሳሪዎች አለም አቀፍ ቤተክርስቲያን በጁሃንስበርግ መሪ እና የካውንስሉ ሰብሳቢ የሆኑት ዶ/ር ብርሃኑ ታምሬ እንደገለጹት በደቡብ አፍሪካ የሚገኙ ኢትዮጵያውያን እና ኤርትራውያን ስደተኞች በተለያዩ ቡድኖች ችግር እየደረሰባቸው እንደሆነ ገልጸው ነገሮች እንዲስተካከሉ እግዚአብሔር ጣልቃ እንዲገባ እንጸልይ ብለዋል።

ዶ/ር ብርሃኑ በመልዕክታቸው በአሁኑ ሰዓት ዱዱላ የተባለ ቡድን ስደተኞችን የማይገቡ ዶክመንቶችን በመጠየቅ እያሰቸገረ መሆኑን ጠቅሰው በተለይም እዛው የተወለዱ እና ያደጉ ልጆች ሲማሩም ይሁን ትምህርት ተምረውም ከጨረሱ በኋላ ስራ ለማግኘት በመቸገር ከፍተኛ ስንለቦናዊ ጫና እያደረባቸው መሆኑንም ጠቅሰዋል።

እግዚአብሔርን አምነን ፊታችንን ወደ እርሱ በማድረግ ያለውን ችግር በእርሱ ፊት እንቅረብ በማለት በፈረንጆቹ ኦገስት 5-7 / 2025 ወይም ከሐምሌ 29 እስከ ነሐሴ 01/2017 ዓ.ም ድረስ በጾም እና ጸሎት ወደ እግዚአብሔር ጸሎት እንዲቀርብ ጥሪ አቅርበዋል።

ለኢቫንጀሊካል ቲቪ ፡ ቤተልሔም ደረጄ

በቬንዝዌላ በተከሰተው ከፍተኛ የሆነ የኢኮኖሚ ውድቀት እና ሰብዓዊ ቀውስ መሃል የወንጌል አማኞች አብያተ ክርስቲያናት ከፍተኛ የሆነ እገዛ እያደረጉ እንደሆነ ተነገረ።

ቪንዝዌላ በኢኮኖሚ ውድቀት እና በሰብዓዊ ቀውስ እየተናጠች ባለችበት በዚህ ጊዜ የወንጌል አማኝ አብያተ ክርስቲያናት መሪዎች ከተቸገሩ ወገኖቻቸው ጎን እንደቆሙ እየተነገረላቸው ይገኛል። የመንግስት ተቋማት ሀገሪቱ እያለፈችበት ላለው የዋጋ ግሽበት መፍትሔ ለመስጠት ባልቻሉበት በዚህ ጊዜ መጋቢዎች ከመስበክ ባለፈ ሀገራቸውን ለመደገፍ በብዙ መስኮች እላይ ታች እያሉ ይገኛሉ።

መጋቢዎች ለችግር ለተጋለጡ ሰዎች ምግብ ከማቅረብ ባለፈ የማማከር እና ተስፋ የመስጠት ስራቸውን በመቀጠል ላይ ናቸው። ብዙ ቤተ ክርስቲያኖች በአሁኑ ሰዓት እንደ እርዳታ ማዕከሎች እያገለግሉም ይገኛሉ።

የተሰጡ አቅርቦቶችን ማከፋፈል እና የእርዳታ ህብረቶችን ማጠናከር ደግሞ ዋነኛ ስራቸው ነው። ምንም እንኳን ያለው አቅርቦት በሕዝቡ ዘንድ ካለው ፍላጎት አንጻር ጥቂት ቢሆንም ወደ ቤተ ክርስቲያን የሚያመሩ ሰዎች ቁጥር እያሻቀበ ነው። ይህም የሆነው ወደ ቤተ ክርስቲያን የሚመጣ ማንም ሰው የጽናት እና በእግዚአብሔር አቅርቦት ላይ የመደገፍን ተስፋ ስለሚካፈል ነው ሲል ኤፒ ኒውስ አስነብቧል።

ይህም ክስተት ወንጌል አማኞች በርህራሄ እና በእውነት መስራታቸው ሀገር በከፍተኛ ደረጃ በምጥ ውስጥ በምታልፍበት ጊዜ ለብዙዎች መጽናት እና መጽናናት ምክንያት እንደሆነ ብዙዎች ይስማማሉ።

መረጃውን ከኤፒ ኒውስ አገኘነው።

ለኢቫንጀሊካል ቲቪ ፡ አማኑኤል ዴቢሶ

የቢሾፍቱ ከተማ ወንጌላውያን አብያተ ክርስቲያናት ሕብረት አስቸኳይ የእርዳታ ጥሪ አቀረበ።

ከሰሞኑ በቢሾፍቱ ከተማ ከፍተኛ ንፋስ ቀላቅሎ በጣለዉ ዝናብ በተለያዩ የከተማዋ ስፍራዎች ቤት ውስጥ ጎርፍ በመግባት የንብረቶች መበላሽት እና ጉዳት መድረሱ ይታወሳል።

ሁኔታውን አስመልክቶ የቢሾፍቱ ከተማ ወንጌላውያን አብያተ ክርስቲያናት ሕብረት አስቸኳይ የእርዳታ ጥሪ አቅርቧል።

ጥሪዉን ያቀረቡት የሕብረቱ ዋና ሰብሳቢ መጋቢ ብሩክ ከበደ “በከተማዋ በጣለው ንፈስ እና በረዶ የቀላቀለ ዝናብ በርካታ የከተማው ነዋሪዎች ላይ እና በህብረታችን በታቀፋ አጥቢያ ቤተክርስቲያናት ላይ በደረሰው የንብረት ውድመት የተሰማኝን ጥልቅ ሃዘን እገልፃለሁ።” ብለዋል።

መጋቢ ብሩክ አክለዉ ቅዱሳን የወንድምና የእህቶችን መኖርያ ቤቶች እንዲሁም የአጥቢያ ቤተክርስቲያናትን መሰብሰቢያ አዳራሾች መልሶ ለመስራት በሚደረገው ጥረት የበኩላቸውን ሁሉ በማድረግ በዚህ አስቸጋሪ ሁኔታ እርስ በእርስ በመተጋገዝ አብረን እንቁም የሚል ጥሪ አቅርበዋል።

ለኢቫንጀሊካል ቲቪ ፡ ቤተልሔም ደረጄ