በቬንዙዌላ የሚገኙ ወንጌል አማኞች ለኢየሱስ እራመዳለሁ በሚል ርዕስ በአውራ ጎዳናዎች ላይ መታየታቸው ተገለጸ።

በቬንዙዌላ ወንጌል አማኞች የተዘጋጀው ሰልፍ በሀገሪቱ ፕሬዚደንታዊ አዋጅ አማካኝነት ብሔራዊ ለኢየሱስ የመራመድ ቀን ላይ ነበር የተካሄደው። ከ23ቱም የሀገሪቱ ግዛቶች አማኞች ወደ ሀገሪቱ ዋና ከተማ በማቅናት ሰልፉን ያደረጉ ሲሆን መሪ ቃላቸውም ‘ኢየሱስ ይህች ሀገር ያንተ ናት።”የሚል ነበር። ሰልፍ የወጡት ክርስቲያኖችም ሰንደቆችን እና ባንዲራዎችን ይዘው የምስጋና መዝሙር ሲዘምሩ ተስተውለዋል።

በካርካስ ሁለት ዋና ሰልፎች በሊበርታዶር ጎዳና በአንድ ላይ በመገናኘት በጋራ የአምልኮ እና የጸሎት ፕሮግራም ተካሂዷል። ተመሳሳይ የሆኑ ፕሮግራሞችም በተለያዩ ከተማዎች እና የገጠር መንደሮች ውስጥ ተካሂደዋል።

መርሃግብሩ በብዙዎች ዘንድ ደስታን የፈጠረ ሲሆን መንፈሳዊ አንድነትን ለማምጣት ለተሰራው ስራ ቤተ ክርስቲያናት፣ ሚኒስትሪዎች እና በጎ ፈቃደኞች ከፍተኛ የሆነ ርብርብ አድርገዋል።

በቪንዝዌላ የወንጌል አማኞች ካውንስል መሪ የሆኑት መጋቢ ጆሴ ፒኔሮ ሰልፉ የተካሄደበት አላማ ኢየሱስን ማዕከል ያደረገ እንደሆነ የተናገሩ ሲሆን ምንም አይነት የፖለቲካ አቋም እንደሌለበት አበክረው ተናግረዋል።

“ይህንን እያደረግነው ያለው ለአንዱ ለኢየሱስ ነው።” በማለትም ፕሮግራሙ መንፈሳዊ አላማ እና አካታች ተፈጥሮ ወንጌልን ብቻ ያማከለ እንደሆነ ተናግረዋል።

የሀገሪቱ ፕሬዚደንት የተሰራውን ስራ ያደነቁ ሲሆን ይሄም የአንድነት እና የእምነት መገለጫ እንደሆነ ገልጸዋል። ፕሬዚደንቱ ለተደረገው ሰልፍ ትብብር ያደረጉት ፖለቲካዊ ጥቅማቸውን በማሰብ ነው በማለት የሚተቹ ቢሆንም የሰልፉ ተሳታፊዎች ሰልፉ የትልቅ ተሀድሶ እና መነቃቃት ምክንያት እንደሆነላቸው ገልጸዋል።

መረጃውን ከክርስቲያን ዴይሊ ኢንተርናሽናል አገኘነው።

ለኢቫንጀሊካል ቲቪ ፡ አማኑኤል ዴቢሶ