.

عؤمروم اؤتدو، گنجلیک گئتدی الیمدن،
بیلمه دیم نئچه دی یاشی ایتیردیم .
دونیانین وئردیگی کئفی _ لذذتی _
ازل دن من اولدوم ناشی ایتیردیم.

یوللار یورغونویام ایندی نه قو'ووم
اوولاغا چاتمامیش اوزاشدی او'ووم
سارالدی یارپاغیم، دوشدو قیرو'ووم
کامالی ایتیردیم _ هوشو ایتیردیم.

ائله کؤورلمیشم ، بسدی هیم منه
بو چاغیمدا آرخا دورار کیم منه ؟!
بیر اوزوک وئرمیشدی طالعیم منه
سالدیم اوزویومدن قاشی ایتیردیم.

آشریم آشدیم، دره کئچدیم، داغ گزدیم
گاه یاخین دولاندیم ، گاه اوزاق گزدیم
دوشدوم بو چؤللره یاپالاق گزدیم
الیمده کی طرلان قوشو ایتیردیم.

منی نه قورخودار هده یئرینده
داغا دایانمیشام ده ده یئرینده
بیر زامان وئردیییم وعده یئرینده_
اوسته أیلشدیییم داشی ایتیردیم.

"بهمن" کرم اولوب ، یاری اصلیدی
بیزی اینجیدن ده اصلی _نسلی دی
بیلمیرم دونیانین هانسی فصلیدی
باهاری ایتیردیم_ قیشی ایتیردیم.

#بهمن_وطن_اوغلو


💫🍥🎁 @ZElKH 🎁🍥💫

.

مین ایل عؤمروم اولسا جاوان یاشارام،
عشقی بیر گؤزلین قویماز قوجالام.
چوخدا ووصالینا حسرت قالمیشام
هئچ اونون اؤزوده قویماز قوجالام.

ساخلار سؤيله دیییم سؤزو قلبینده
یانار محببتین کؤزو قلبینده
گزدیرر عشقیمی اؤزو قلبینده
سیرریمی ائللره یایماز قوجالام.

"بهمنم" بو یولدا هله وارام من
اونسوز دا دونیادا اوجالمارام من
اونون عشقی ایله قوجالمارام من
بلکه حسرتین دن بیراز قوجالام.

#بهمن_وطن_اوغلو


💫🍥🎁 @ZElKH 🎁🍥💫

.

ننم مهصتینین اؤپدوم الیندن ،
سئوینج دن گؤزلریم دولدو گنجه ده.
نورانی _ پیرانی نیظامی بابام _
قوللارین بوینوما سالدی گنجه ده .

یولا سالدی عصیرلری _ ایللری
اود یوردومون ، اود اورک لی ائللری
دیله گلدی تئللی سازین تئللری
کرم ، بیر کرمی چالدی گنجه ده .

اودور گؤیچک لرین گؤیچه یی قارداش
مین ایللیک بیر گولون لچه یی قارداش
ائله آچدی شعیرین چیچه یی قارداش
نه سارالدی نه ده سولدو گنجه ده .

قوی قاییدیم او داغلارا قاداسی
یادا دوشدو دلی داغین لالاسی
دئمه یین کی کلبجرلی بالاسی_
بیر اؤتری قوناق اولدو گنجه ده .

ایتمز مقددس دوز _ مقددس چؤرک
حسرته _ هیجرانا تاب ائتمز اورک
شیرین خیال آلدی بیر گؤزل ملک
آیریلدی "بهمن" دن قالدی گنجه ده.

#بهمن_وطن_اوغلو


💫🍥🎁 @ZElKH 🎁🍥💫

.

گؤزومدن یاش آخیر اوزومه دن_دن،
آمان آی آیریلیق اولمایایدین سن.
بیر اؤلوم یاخشیدیر سئویلمه مک دن
طالع سیز جاوانا یازیغیم گلیر .

ایگید أر آدلانار غیرت اولاندا
اوزده حیا اولار عیصمت اولاندا
دیل بیلمز نادانا قیسمت اولاندا _
اهلی حال جانانا یازیغیم گلیر.

بیر آن چاتیلمازمی قاشی اووچونون
آخمازمی گؤزوندن یاشی اووچونون
دَیَنده گول له سی ناشی اووچونون_
یارالی جئیرانا یازیغیم گلیر .

دؤورون گردیشینه اویا بیلمه ییب
قلبیندن غوباری یویا بیلمه ییب
عشقینی کیمسه یه دئیه بیلمه ییب_
گیزلیجه یانانا یازیغیم گلیر .

ظالیم زامان کیمی ائتدی بختییار
اورک لرده ، کدر ، حسرت، انتظار
آمان آلله داغلار بویدا دردی وار _
"بهمن" تک اوزانا یازیغیم گلیر .

#بهمن_وطن_اوغلو

💫🍥🎁 @ZElKH 🎁🍥💫

.

بیر ائلین _ ماحالین مرد اوغول لاری،
قولا چئوریلن دن دهشت اولورموش!
عالیمین، معللیمین گئیدییی لیباس _
چولا چئوریلن ده دهشت اولورموش!

غفیل اوجالاندا عوریان گئده لر
آغریلماز اوره یه وورور زده لر
آیه _ گونه نه وار، یالان وعده لر _
ایله چئوریلن ده دهشت اولورموش!

ائلین قلبینده دیر اونلارین یئری
دانیشان دیلی دیر ، چونکو هر بیری
خالقین ضیالی سی_خالقین شاعیری
لالا چئوریلن ده دهشت اولورموش !

آ "بهمن"ائله مه بئله صؤحبتی
یازماقلا قورتارماز بو موصیبتی
اینسانین، اینسانا اولان حؤرمتی_
پولا چئوریلن ده دهشت اولورموش !

#بهمن_وطن_اوغلو


💫🍥🎁 @ZElKH 🎁🍥💫

.

"علی قوربان اوفون مکتوبو👈بهمن وطن اوغلونا

بهمن! نییه گلمیر سسین_سوراغین؟!
نییه دیللنمیرسن ، هانیسان آیه ؟!
قلبیمه ملحم دیر هر بیر واراغین _
کؤنلومون سولطانی_خانی سان آیه !

اوره یه اود سالان غملی قوشمانین،
کؤرپه کیرپیکلری نم لی قوشمانین،
توتارلی میصرانین، چم لی قوشمانین،
قلبی سن، روحوسان، جانی سان آیه!

سنده دیر معدنی اصل تمکینین
وفانین، اولفتین،غضبین_کینین،
قوربان اوره یییدی آیریم شعرینین_
سنده کی، داماردا قانیسان آیه !

مؤحنت اوز وئریبدی "علی" یه یامان،
ائله هجوم چکیر، وئرمه ییر آمان ،
باری هئچ اولماسا گوج گلن زامان ،
تپینیب کناردان یانیسان آیه !

#علی_قوربان_اوف

بهمن وطن اوغلونون جاوابی 👈علی قوربان اوف_آ

باهار مکتوبونو آلدیم آی علی ،
شعرینی موکافات سانیرام آیه !
سن دئیه ن گؤزللیک منده نه گزیر؟!
قورویوب یئریمده دونورام آیه !

ائله بیل صحرادا داش_قاش گزیرسن
یوخسول بیر بازاردا قوماش گزیرسن
بیلدیم کؤورلنده سیرداش گزیرسن _
نورلو باخیشیندان قانیرام آیه !

من کیمم،نه چی یم، بیلسن دوزونو،
ایتیرمیشم عدالتین ایزینی
دویدوقجا دونیانین آستار_اوزونو
دئدیییم حاق سؤزو دانیرام آیه !

آختار وارلیغیمی سؤزومده منیم
عؤمور بیر یوخودور گؤزومده منیم
وفا اولماسادا اؤزومده منیم _
وفالی دوستلاری آنیرام آیه !

هئچ لیک دن وارلیغا دؤنوبدو بهمن
سمادان_تورپاغا إئنیبدی بهمن
اینانما دئسه لر: سؤنوبدو بهمن
ابدی مشعلم ، یانیرام آیه !

#بهمن_وطن_اوغلو


💫🍥🎁 @ZElKH 🎁🍥💫

.

چوخ گئده لر دیش قیجاییب اوستومه،
آنلاماییب دئییلم کی، چاغا من .
حاقسیز هئچ کیمسه یه توخونمامیشام_
آرخایین اول، ییخیلمارام قاغا من .

بخته ورم دوست اینانسا سؤزومه
دونیا واری پوچ گؤرونور گؤزومه
اؤز ائویمده شور بس ائیلر اؤزومه
اؤزگه ائوده گؤز تیکمیرم یاغا من.

من "بهمنم" گوناهیم دا وار منیم،
مجنون میثال بیر آهیم دا وار منیم
اومودومدا _ پناهیم دا وار منیم
سؤیکنمیشم بیر موقددس داغا من.

#بهمن_وطن_اوغلو


💫🍥🎁 @ZElKH 🎁🍥💫

.

"آی حسرتی ووصالیندان شیرینیم"

جومله سی زر ، کلمه سی لعل ، سؤزو دورر
بویو بسته ، جمالی آی ، ساچی گور
اؤزو ملک، سئوگیسی پاک ، عشقی نور_
محببتی دریالاردان درینیم _
آی حسرتی وصالیندان شیرینیم...

سن اولماسان یازیلمازدی بو سؤزلر،
سن اولماسان یوزولمازدی بو سؤزلر
سن اولماسان آلیشمازدی بو گؤزلر
بو گؤزلرین آلووونا بورونوم _
آی حسرتی ووصالیندان شیرینیم...

آلسین منی درین_درین خیال لار
مئه اسدیرسین سرین_سرین خیال لار
لای_لا دئسین شیرین_شیرین خیال لار
فیکره گئدیم؛ نه دانیشیم ، نه دینیم_
آی حسرتی ووصالیندان شیرینیم...

نظر_دیققت یئتیرسن ده یوز منه ،
دوغرو قیمت وئرمه میسن دوز منه
سن دئییردین: محببتی بوز منه
داغی_داشی یاندیریرمی گؤر اونوم؟_
آی حسرتی ووصالیندان شیرینیم...

تانریم اؤزو بیله_بیله أله سین
بو ایسته یی گوله_گوله إئله سین
بیر آمین دئه ، آلله ائله، ائله سین،
چیرکین اولسام ، سنه گؤزل گؤرونوم_
آی حسرتی ووصالیندان شیرینیم...

داردا اولسام، داردا سنسن یاشادان
هاردا اولسام، اوردا سنسن یاشادان
گؤیده آلله ، یئرده سنسن یاشادان
یالان دئسم دیزین_دیزین سورونوم_
آی حسرتی ووصالیندان شیرینیم...

#بهمن_وطن_اوغلو


💫🍥🎁 @ZElKH 🎁🍥💫

.

یاخشی ، یامان نه گئدیرسه ،
گولوم ! عؤموردن گئدیر !
هر دقیقه م _ هر ساعاتیم _
ایلیم ، عؤموردن گئدیر !

آیلار زاماندان سوزولور ،
ایل لر دال با دال دوزولور
گؤز گؤره تیجه اوزولور
الیم عؤموردن گئدیر !

آهیم_اونوم سنله کئچسین،
توی _دویونوم سنله کئچسین،
بیرجه گونوم سنله کئچسین
بیلیم عؤموردن گئدیر !

ایش لر انگل ، آ "بهمن" گل ،
آخیر_ازل ، حیات بیر لعل ،
ظالیم عجل وئرمیر مجال ،
اؤلوم عؤموردن گئدیر...!!!

#بهمن_وطن_اوغلو


💫🍥🎁 @ZElKH 🎁🍥💫

.

بیر سحر یوخولو دوردو یئریندن،
گئییندی پالتاری ، چکمه نی، گئتدی!
بیلمه دیم مرامی_مقصدی ندیر _
وئردی بو دونیایا بئه منی گئتدی !

قارشیلاشدیق، احوالیمی سورمادی،
ظالیم منی بو سفر ده یورمادی ،
یولداشلیغی آخیراجان وارمادی _
قویدو بو یول لاردا تک منی گئتدی!

وفانی ، ایلقاری ایزله دی "بهمن"
چوخ یئرده دردینی گیزله دی بهمن ،
دایاندی عؤمرونو گؤزله دی بهمن _
عؤمور گؤزله مه دی بهمنی ، گئتدی...!!!

#بهمن_وطن_اوغلو


💫🍥🎁 @ZElKH 🎁🍥💫

.

قاچقینلیق اینسانا شرف_شان دئییل،
آه_ناله چکمک له، وطن قاییتماز !
آغلاماق کیشی یه یاراشان دئییل،
گؤز یاشی تؤکمک له، وطن قاییتماز!

سن میصری قیلینجی اؤپه سن گرک،
دوشمنین هینینه تپه سن گرک
جسارت توخومو سپه سن گرک
قورخاقلیق أکمک له ، وطن قاییتماز!

حاققی _حاقدان گرک اوماسان اوغول!
یاغینین یولونو یوماسان اوغول !
جومسان قیرغی کیمی جوماسان اوغول!
قاز تکی سکمک له ، وطن قاییتماز !

آلدانما یاغینین یالان سؤزونه ،
شیمشک اول باشینا _ اوخ اول گؤزونه،
داغین بو اوزوندن _ او بیر اوزونه _
دوشمنه سؤيمک له ، وطن قاییتماز !

هویدو دلی لریم ! پناه آلله ها ،
آرخالان غئیرته _ ساریل سیلاحا
یالوارماق_یاپیشماق بس ائیلر داها ،
دیز اوسته چؤکمک له ، وطن قاییتماز !

او ائللر اؤز ائلیم_اوبامدی دئییب،
او یئرلر یوردومدور_یووامدی دئییب،
کور اوغلو دوغماجا بابام دی دئییب،
اؤزونو اؤیمک له ، وطن قاییتماز !

اؤزونده کور اوغلو هونری اولسا ،
سؤزونده کور اوغلو کسری اولسا ،
دیزینده کور اوغلو ته په ری اولسا،
امین اول کی سن ، قاییدار "وطن"
قاییدار "وطن" قاییدار "وطن"

#بهمن_وطن_اوغلو

💫🍥🎁 @ZElKH 🎁🍥💫

.

مقددس یارانیب یارانمیشین دان ،
نه بؤهتاندی دونیا ، نه شر دی دونیا.
نعمتی شیریندی ، اؤزو گؤزل دی _
ابدی بیر مولکی_بشردی دونیا .

ایستر أللی یاشا _ ایستر یوز أللی ،
قوینوندا یاشاماق بیزه تسللی ،
نه ایلکی بللی دیر _ نه سونو بللی
هئی اوخو ، توکنمز اثردی دونیا .

سؤکولدو سارایلار ، داغیلدی داملار ،
آ "بهمن" ایشلری کورلادی خام لار
اولماسا اوستونده یاخشی آداملار _
آلله هین گؤزوندن دوشردی دونیا !

#بهمن_وطن_اوغلو


💫🍥🎁 @ZElKH 🎁🍥💫

.

ظاهیرده اوزومه دوست دئیه_دئیه،
یاغی دوشمن سالدی منی نه قالا !
دردیمی گؤیلره بلند ائیله دیم _
بئله یوکسک نه برج اولار نه قالا !

بو وطن دیر، تورپاغیندان ائل أمن،
من ائلینم ، قوربان اولوم ائله من ،
اؤز_اؤزومه اود توتدوم کی ائله من _
اوجاغیما نه کؤسؤو قوی، نه قالا !

"بهمن"! دردی اوره یین دن آت آیه !
کدرینی ایله قویما ، آت آیا ،
فرسیز اؤولاد گؤز داغیدار آتایا _
شعورسوزدان نه قالیبدی _ نه قالا؟!...

#بهمن_وطن_اوغلو

💫🍥🎁 @ZElKH 🎁🍥💫

.

دئمیرم حیات دا ائله یاشاییم،
عومروم باشدان_باشا کئف داماغ اولا!
دئییرم حیات دا داش دا داشییام_
تکی بو دونیادا جانیم ساغ اولا .

چاغلار گوزل اولا بو چاغلار کیمی،
طبعیم ده قاینایا بولاقلار کیمی،
دایانیب دوورمده بو داغلار کیمی،
دوستلار اطرافیمدا چاغباچاغ اولا.

من ده گول بیتیرم گول لر ایچینده،
بو سوسن لر، بو سونبول لر ایچینده،
بزه یه گوزومو ائللر ایچینده _
اوولادلار گوزومه چیلچیراغ اولا .

"بهمنم" عومرومو بزه یه ایل لر،
گله بیر_بیریندن گوزل فصیل لر ،
همدمیم بو وطن، اوره ییم ائل لر_
قنشریم آل گونش، آرخام داغ اولا.

#بهمن_وطن_اوغلو


💫🍥🎁 @ZElKH 🎁🍥💫

.

گنجلیگیمین اوینار _ گولر چاغلاری،
قالماز ایمان_دین ، یادیما دوشنده !
خوش آرزویا، خوش ووصالا یئتدیگیم،
او گونشلی گون یادیما دوشنده !

اونوتمارام او ایلقاری_او آندی؛
ایندی باخما زامان باشقا زاماندی
ساری بولاق خیالیمدا دولاندی
چنلی یورد دا، چن یادیما دوشنده!

سئل لر_سولار بهمن کیمی چاغلاماز
سندن غیری کس یارامی باغلاماز
دئییرلر کی: کیشی اولان آغلاماز _
من آغلادیم سن یادیما دوشنده !
من آغلادیم سن یادیما دوشنده...!

#بهمن_وطن_اوغلو

💫🍥🎁 @ZElKH 🎁🍥💫

.

اَریییر جَسَدیم هیجری جانانه،
آلیشان شمع لرین آ یاغی منم !
اوندان گوُزل یوخدو منیم گوُزومده ،
اونون گوُزلرینده، آ یاغی منم !

یالواردیم سینه‌می یار نئچه دفعه،
عشقیم داشقین چای‌دیر، یار نئچه دفعه،
قالخیب‌دیر باشیما یار نئچه دفعه _
آیریمین یوسماسی ، آیاغی منم !

یوز چاغیرسام سونا جئیران، بالا یار ،
باخماز منه او باشیما بلا یار ،
دئیه‌لر کی بهمن دوُنوب بالا یار _
یئنه گومان ائیلر آ یاغی منم !

#بهمن_وطن_اوغلو


💫🍥🎁 @ZElKH 🎁🍥💫

.

چوخدان عاشیقی‌یم دئییم دوزونو،
خالی دوشه‌مه‌لی یایلاقلارین من،
گوُرن گوُرَرَم‌می بیرده اوزونو _
او قوربان اولدوغوم یایلاقلارین من !

چیچک_چیک‌دیرمی جننت گوشه‌لر؟!
یاشیل دون گئییب‌می داغلار _ مئشه‌لر؟!
گوُره‌سن بیلیرمی تر بنوُوشه‌لر _
یورغون یولچوسویام اوزاقلارین من !

گوُز یاشی توُکمورم، سئوینمه‌سین غم ،
بیراز هیجران منی سارسیدیر بو دم
چون کی حسرتی‌نی یامان چکیرم
گوُزون‌دن ایچدیگیم بولاقلارین من !

اوز توتوب قوینوندا عاقیل بیر کسه
وئرمه‌دی آنالیق بورجومو دئسه
حاققی وار بهمن‌دن گیلئی ائیله‌سه _
وفاسیز اوغلویام او داغلارین من!


#بهمن_وطن_اوغلو


💫🍥🎁 @ZElKH 🎁🍥💫

.

عاریف‌لر _ عالیم‌لر مات قالدی گئتدی،
ایشی معممالی سیردی دونیانین!
یاشاتماز هئچ کسی اوُز یاشی قده‌ر _
کیشی کیمی سوُزو بیردی دونیانین!

اولسا بو دونیادا هارا ، یاخشیدی
دَیمه‌سین کوُکسونه یارا یاخشیدی
دئمه بورا پیسدی ، اورا یاخشیدی _
هر قاریش تورپاغی پیردی دونیانین!


قودرت‌دن هوپوبدو سیر زرره‌سینه،
مین یول قوربان اولوم بیر زرره‌سینه،
قیمت قویماق اولماز هر زرره‌سینه_
عادی داشلاری دا دورردی دونیانین!

آ " بهمن" حیاتین بیل قیمتینی،
دوست ائیله اوُزونه مردی _ متینی،
بیر دفعه گلیب‌سن، گوُر لذذتینی_
سنه‌می قالیب‌دی دردی دونیانین؟!

#بهمن_وطن_اوغلو



💫🍥🎁 @ZElKH 🎁🍥💫

.

.

حسرتیمین قاطار_قاطار کاروانی باشلاندی‌می؟!
اوره‌ییم یامان دوُیونور، یوخسا تلاش‌دان‌دیمی؟!
اوزاق ایل‌لر یاخین گلمز، هارایلاسان یوز دفعه _
خاطیره‌لر اونودولور ، یادداشدان، هوشداندیمی؟!

داها عوُمور داغلاریما ، یاواش_یاواش چن دوشور،
لاله_نرگیز اوزاقلاشیر ، بنوُوشه‌لر گئن دوشور ،
زامان منی تئز قوجالدیر ، ساچلاریما دَن دوشور،
بیلمیرم غم‌دن_قَهَردَن، یوخسا کی یاشدان‌دیمی؟!

بیر سونانین حسرتین‌دن، دردیم درده جالاندی،
کوُنلوم ائوی، شَهَرلَردن، داها بئتر تالاندی ،
"وطن‌اوغلو" آتش‌لره قالام_قالام قالاندی ،
ظالیم قیزی دوُنوب باخمیر ، اوره‌یی داشدان‌دیمی؟!

#بهمن_وطن_اوغلو




💫🍥🎁 @ZElKH 🎁🍥💫

.

حسرت قالدیم الیم چاتمیر الینه،
سُراغینا قوربان اولوم داغلارین!
چینقیلینا ، قایاسینا ، داشینا _
تورپاغینا قوربان اولوم داغلارین!

گوُرن بیرده قاییدارمی او چاغلار؟!
چشمه اوسته چاتیلارمی اوجاق‌لار؟!
گوُروشنده من سوسارام، او چاغلار _
بولاغینا قوربان اولوم داغلارین!

قوُوصی_قوضئح کمر اولوب بئلینه،
اینجی دوزوب چیچه‌یینه_گولونه،
لئیسان یاغیب، سیغال چکیب تئلینه _
داراغینا قوربان اولوم داغلارین!

لعل سوُیله‌دیم قایاسینا ، داشینا،
بولاق دئدیم گوُزلرینین یاشینا،
اگر الیم یئتیشمه‌سه باشینا _
آیاغینا قوربان اولوم داغلارین!


#بهمن_وطن_اوغلو


💫🍥🎁 @ZElKH 🎁🍥💫