YeneTube

በታጣቂዎች ታግተው የነበሩት የሰዴን ሶዶ የወረዳ አመራር ተገድለው መገኘታቸው ተገለጸ!

በኦሮሚያ ክልል፣ ደቡብ ምዕራብ ሸዋ ዞን፤ የሰዴን ሶዶ ወረዳ አስተዳዳሪ ከቤታቸው ታፍነው ከተወሰዱ ከኹለት ቀን በኃላ ተገድለው መገኘታቸው ተገለጸ።የሰዴን ሶዶ ወረዳ አስተዳዳሪ ቅዳሜ ዕለት ከመኖሪያ ቤታቸው ታፍነው ከተሰወዱ በኋላ ማክሰኞ ተገድለው መገኘታቸውን የደቡብ ምዕራብ ሸዋ ዞን የመንግስት ኮሙዩኒኬሽን ጉዳዮች ጽህፈት ቤት ኃላፊ ሃይሉ አብዶ ለቢቢሲ አፋን ኦሮሞ ተናግረዋል።

ኃላፊው፤ "በቀለ ቃቻ በአዳማ ከተማ ስብሰባ ላይ ነበሩ። ባለፈው ቅዳሜ ወደ ቤተሰብ ተመለሱ፤ በዕለቱ ከምሽቱ ሦስት ሰዓት ላይ ከቤታቸው ባልታወቁ ሃይሎች ታፍነው ተወስደዋል፡፡" ሲሉ ተናግረዋል።ቅዳሜ ምሽት ከመኖሪያ ቤታቸው ታፍነው የተወሰዱት የወረዳው አስተዳዳሪ ላለፉት ኹለት ቀናት የት እንዳሉ ሳይታወቅ ቆይቶ ባለፈው ማክሰኞ ከቀኑ 8 ሰዓት ላይ ተገድለው ተገኝተዋል ሲሉም ገልጸዋል።

የአስተዳዳሪው አስክሬን በቶሌ ወረዳ፣ ኢሉ ወረዳ እና በበቾ ወረዳ መካከል በጸጥታ ኃይሎች አሰሳ መገኘቱም ተመላክቷል።በቀለ፤ የወረዳው አስተዳዳሪ በመሆን ለኹለት ዓመታት ማገልገላቸው፤ ከዚያ በፊት በትውልድ አካባቢያቸው በዳዎ ወረዳ የብልጽግና ፓርቲ ጽህፈት ቤት ኃላፊ በመሆን ማገልገላቸውን ኃይሉ ገልጸዋል።

ኃይሉ፤ ለግድያው ተጠያቂው በክልሉ ውስጥ የሚንቀሳቀሰው መንግሥት "ኦነግ - ሸኔ" የሚለው የኦሮሞ ነፃነት ሰራዊት ሃይል መሆኑን ጠቅሰዋል።"አዎ፣ እንደ ሕዝብ ጥቆማ እንደዛ የሚባል ነገር አለ። በተግባር ከወረዳችን ከተለያዩ ቦታዎች ሰዎች እየታገቱ ነው። የሚያግተው ይኸው አካል ነው። አንዳንድ ጠቆማዎችም አሉ፣ ታግተው የተለቀቁ ሰዎችም አሉ፡፡" ሲሉም ተናግረዋል።

መንግሥት 'ኦነግ ሸኔ' የሚለው የኦሮሞ ነፃነት ሰራዊት ስለ ውንጀላው እስካሁን የሰጠው አስተያየት የለም።በመንግሥት ባለስልጣናት እና በተለያዩ የማህበረሰብ ክፍሎች ላይ የሚፈጸሙ ግድያዎችን በተመለከት ግን ታጣቂ ቡድኑ ከዚህ ቀደም በተደጋጋሚ ሲያስተባብል ነበር።

የሰዴን ሶዶ ወረዳ አስተዳዳሪ ቅዳሜ ዕለት ከቤታቸው ከታገቱ ከአንድ ቀን በኋላ ታጣቂዎቹ በቀለ ቃቻ እንዲለቀቁ “10 ሚሊየን ብር” መጠየቃቸውን ቢቢሲ አፋን ኦሮሞ ለጉዳዩ ቅርብ ከሆኑ ሰዎች መስማቱን ገልጿል።የወረዳው የኮሙዩኒኬሽን ኃላፊ፤ “ጉዳዩ ተጨማሪ ምርመራ የሚጠይቅ ቢሆንም ታጣቂዎቹ ለተወሰኑ ሰዎች በወረዳው አስተዳዳሪ ስልክ ደውለው እስከ 10 ሚሊዮን ብር መጠየቃቸውን መረጃዎች ጠቁመዋል፡፡” ሲሉ ተናግረዋል።

ታጣቂዎቹ ለወረዳው አስተዳዳሪ ቀደም ብለው የሰጡት ማስጠንቀቂያ / ዛቻ አለ? ወይንም በግላቸው ደውለውላቸው የጠየቁት ገንዘብ አለ? ተብለው የተጠየቁት ኃይሉ፤ የአስተዳዳሪው ስልክ በታጣቂዎቹ እጅ ስለገባ ይሄን ለማወቅ አስቸጋሪ መሆኑን ተናግረዋል። "ዛቻ ወይም ማስጠቀቂያ እየተነዛበት እንደሆነ ሪፖርት ቀርቦ የሚያውቅ አይመስለኝም፡፡ " ሲሉም አክለዋል።

ታጣቂዎቹ የወረዳውን አስተዳዳሪ ከእገታ ለማስለቀቅ የጠየቁት ገንዘብ ተሰጥቷቸው እንደሆነ ግልፅ የሆነ ነገር ባይኖርም የተገደሉት "የጠየቁት ገንዘብ ስላልተሰጠ" ነው የሚል ግምት መኖሩንም ተመላክቷል።ኃይሉ ግን "ከዚህ ጋር ምንም ግንኙነት የለውም ነገር ግን በቀጣይ ምርመራ ይታወቃል፡፡" ሲሉ ተናግረዋል።

በኹለት ቀናት ውስጥ የጸጥታ ሃይሎች አስተዳደሪውን ለማስለቀቅ ከፍተኛ ጥረት ማድረጋቸው ተገልጿል።የተገደሉት አስተዳዳሪ ከ30ዎቹ - 40ዎቹ ዕድሜ ውስጥ የሚገኙ ሲሆን ባለትዳር እና የልጆች አባት ነበሩ።

የወረዳው ኮሚኒኬሽን ፅህፈት ቤት ኃላፊው ኃይሉ፤ “የኦሮሞ ነፃነት ሰራዊት ነን የሚሉ የታጠቁ ሃይሎች (መንግሥት ኦነግ - ሸኔ የሚላቸው) በደቡብ ምዕራብ ሸዋ ወረዳ ውስጥ ግለሰቦችን እያገቱ ብዙ ገንዘብ እየጠየቁ በማሰቃየትና በመግደል ላይ ናቸው፡፡” ሲሉ ተናግረዋል።"ፖለቲካ የማያውቁ እና ማንም ነገር ውስጥ የማይገቡ ገበሬዎችን በየቀኑ እያፈኑ፤ ከፍተኛ መጠን ያለው ገንዘብ እየተጠየቀ ነው።" ያሉት አቶ ኃይሉ፤ " ገንዘብ የሌለው ግለሰብ ኹለት መቶ ሺሕ ፣ ሦስት መቶ ሺሕ፣ አምስት መቶ ሺሕ ብር ዘመዶቹ እየሰበሰቡ መስጠት የተለመደ ሆኗል፡፡" ሲሉ ገልጸዋል።

በተጨማሪም ፤ ልጆቻቸውን የማገትና በአሰቃቂ ሁኔታ የመግደል ሁኔታ መጨመሩንም አስረድተዋል።የደቡብ ምዕራብ ሸዋ ዞን የመንግስት ኮሙዩኒኬሽን ጉዳዮች ጽህፈት ቤት ኃላፊ ኃይሉ አብዶ፤ "መፍትሄው እርስ በእርስ ከመገዳደል ፤ አንድ ቋንቋ እየተናገርን ከመጨራረስ ይልቅ በውይይት መፍታት ነው፡፡" ሲሉም ተናግረዋል።

በኦሮሚያ ክልል ደቡብ ምዕራብ ሸዋ ውስጥ ኹለት ሳምንት ባለሞላ ጊዜ ውስጥ የወረዳ አስተዳዳሪ ሲገደል ይህ ለኹለተኛ ጊዜ ሺኆን፤ ሰኔ 1 ቀን በምዕራብ ሸዋ ዞን የአዳ ባርጋ ወረዳ ምክትል አስተዳዳሪ አብዲሳ ቀነኒ በበካቴ ከተማ በመኖሪያ ቤታቸው አቅራቢያ በታጣቂዎች ተገድለዋል።በተያዘው ዓመት በመጋቢት ወር ላይ የነቀምት ከተማ ብልጽግና ፓርቲ ሃላፊ ደሳለኝ በኮንጃ ማንነታቸው ባልታወቀ ታጣቂዎች መገደላቸውም ይታወሳል፡፡

[BBC/Addis Maleda]
@YeneTube @FikerAssefa

13.9K views13:56