" ከ52 ሽህ በላይ ህዝብ ለውሃ ጥም ተጋልጧል፣ በዙሪያዋ የሚገኙ እንስሳቶች የሚጠጡት ውሃ አጥተዋል " - የፍላቂት ገረገራ ከተማ

በሰሜን ወሎ ዞን ፍላቂት ገረገራ ከተማ እና በዙሪያዋ የሚኖሩ ከ52 ሺህ በላይ ህዝቦች እና እንስሳቶች በውሃ ጥም ለከፋ ችግር መጋለጣቸውን የከተማዋ ከንቲባ ጽህፈት ቤት  ለቲክቫህ ኢትዮጵያ ገልጿል።

የፍላቂት ገረገራ ከተማ አስተዳደር ከንቲባ ጽህፈት ቤት ሀላፊ አቶ አንደበት ተስፋዬ እመ ምዑዝ የውሃ ፕሮጀክት በብልሽት ምክንያት ከ5 ዓመት በላይ ሲሰጥ የነበረውን የንጹህ መጠጥ ውሃ አገልግሎት በመቋረጡ የከተማዋ ህዝብ በውሃ ችግር ላይ እንደሚገኝ ተናግረዋል።

ከንቲባው በዝርዝር ምን አሉ ?

" ንጹህ መጠጥ ውሀ ለከተማዋ ከ9 ኪ.ሜ በላይ ተጉዞ ነው አገልግሎት ይሰጥ የነበረው፣ አሁን ግን ፕሮጀክቱ የፓምፕ እና የመሥመር ችግር ገጥሞት ከተቋረጠ 20 ቀን ሆኖታል።

ፕሮጀክቱን የገነባው አውስኮር ነው፣ ግንባታው ሳይጠናቀቅ የሰሜኑ ጦርነት ተካሄደ፣ ከዛም በኋላ ሙሉ ጥገና ሳይደረግለት በመቅረቱ ችግሮቹ ሲደራረቡበት ጉድጓዱ በርሃ ላይ ያለ በመሆኑ ፓምፑ ችግር ገጥሞታል።

የከተማው ህዝብ ርቀት ቦታ በመጓዝ የጉድጓድ ውሃ እንዲጠቀም ተገዷል፣ በከተማው ውስጥ በግል፣በመንግስትና በረጂ ድርጅቶች የሚገነቡ ፕሮጀክቶች ግንባታቸው ለጊዜው ተቋርጧል።

በንግድ ዘርፍ የተሰማሩ አገልግሎት ሰጪ ድርጅቶች ሆቴሎች፣ሬስቱራንትና ግሮሰሪ ቤቶች እና  ሻይ ቤቶች  የተሟላ አገልግሎት ለመስጠት ተቸግረዋል።

የክልሉ ውሃ ቢሮ መጥቶ ችግሩን አይቶ ጥናት አካሂዶ ከሄደ በኋላ በጉድጓዱ አካባቢ ሌላ የውሃ ጉድጓድ ስላለ ከእሱ ጋር ማገናኘት እና አዲስ ፓምፕ መቀየር የሚያስችል ሁለት ጊዜያዊ መፍትሄዎችን በማስቀመጥ ችግሩን ለመቅረፍ እየተረባረብን ነው።

ከዚህ በፊት አገልግሎት የምንሰጥበት የእመምዑዝ ፕሮጀክት በየወሩ ከ300 ሺህ እስከ 400 ሺህ ብር ለኤሌክትሪክ አገልግሎት እንከፍላለን፣ ለዚህ ደግሞ ማህበረሰቡ የሚከፍለው ብር አይበቃም፣ ይህም ሌላ ችግር ነው። " ብለዋል።

ቲክቫህ ኢትዮጵያ ያነጋገራቸው የፍላቂት ገረገራ ከተማ ነዋሪዎች የንፁህ መጠጥ ውሃ አገልግሎቱ ከተቋረጠ ከአንድ ወር በላይ እንደሆነው በከተማዋ ብቻ ሳይሆን በዙሪያዋ ባሉ የገጠር ቀበሌዎችም እንደተቋረጠ ገልጸዋል።

አሁን ላይ በአስከፊ ችግር ላይ እንደሚገኙ ተናግተዋል።

የከተማዋ ከንቲባ አቶ አንደበት ተስፋዬ ከተማዋ በርሃማ በመሆኗ የንፁህ መጠጥ ውሃ አቅርቦት ችግር ከባድ ነው ያሉ ሲሆን ለችግሩ ዘላቂ የሆነ መፍትሄ ለማምጣት ከክልሉ ውሃ ቢሮ እና ድርጅቶች ጋር በመነጋገር እየተሰሩ መሆናቸውን አመላክተዋል።

ቲክቫህ ኢትዮጵያ
#TikvahEthiopia

@tikvahethiopia

" ህክምናውን ለማግኘት በተስፋ ሲጠባበቁ ለነበሩ 88 ህፃናት ህክምና መስጠት ተችሏል " - የኢትዮጲያ የልብ ሕሙማን ሕጻናት መርጃ

የኢትዮጲያ የልብ ሕሙማን ሕጻናት መርጃ ለቲክቫህ ኢትዮጵያ በላከው መግለጫ በ6 ቀናት ለ88 የልብ ሕሙማን ሕፃናት የልብ ሕክምና መስጠቱን ገልጿል።

ከኪንግ ሰልማንሁማኒተሪያን ኤይድ ኤንድ ሪሊፍሴንተር ( KSrelief) በተሰጠው በዚህ የህክምና ተልዕኮ ከማዕከሉ የመጡ 30 የህክምና ባለሙያዎች ከማዕከሉ ባለሙያዎች ተሳትፈዋል።

የህክምና ቡድኑ ከማዕከሉ ባለሞያዎቾ ጋር በመተባበር ፦

- ለ24 ህፃናት የልብ ቀዶ ህክምና፤

- ለ64 ህፃናት ደግሞ በደም ስር በኩል የሚሰጥ የልብ ህክምና ወይም (cathertarazation) ህክምና መስጠት ችሏል።

በዚህም፥ በአስቸጋሪ ሁኔታ ለነበሩ እና ህክምናውን ለማግኘት በተስፋ ሲጠባበቁ የነበሩ አጠቃላይ 88 ህፃናት ህክምና ማግኘት ችለዋል።

ሳልማን ሁማኒተሪያን ኤይድ ኤንድ ሪሊፍ ሴንተር የህክምና ቡድን የፈፀመው የህክምና አገልግሎት በብር ሲተመን ከ39 አስከ 51 ሚልየን የሚገመት እንደሆነ የኢትዮጲያ የልብ ሕሙማን ሕጻናት መርጃ ለቲክቫህ ኢትዮጵያ በላከው መግለጫ ጠቅሷል።

ተቋሙ ከሳኡዲ አረቢያድረስ በመምጣት ላበረከተው ትልቅ ኣስተዋፅኦም ምስጋና ያቀረበ ሲሆን አጋርነታቸውን በማስቀጠል በልብ ሕመም ከሚሰቃዩ ሕፃናት ጎን እንዲቆሙ ጥሪ አቅርቧል።

ቲክቫህ ኢትዮጵያ
አዲስ አበባ
#TikvahEthiopia

@tikvahethiopia