Mimi alkhteeb 🍁:
بنات دا قروب عايزن نتعلم الانجليزي من البدايه😻والعندا خبره برضو تدخل تفيدنا
https://tttttt.me/joinchat/F1J99EE0WITqZ3VTdYw4kQ

اللبيب‏
صراحة مدعومة
الحلقة 10
بقلم طارق اللبيب
لمياء دي واحدة من التومات .. اخوات الباقر .. والحاصل في حياتها شنو .. الله اعلم .. بس الرسايل الاتلقت في تلفون ياسر .. كانت فظيعة ..
اهاااالمن اخوها نوى يكلم ابوها .. كمال لحقو في نهاية الشارع ...
قال ليهو يا الباقر دقيقة .. انا عايو اقول ليك كلام.. واجعلني من الناصحين.. ماتكلم ابوك بالموضوع ده .. لانو ابوك راجل كبير .. والزول الكبير معرض لاي جلطة.. سكتة غيرو .. انت كلم والولدة وريها الرسايل ..
وشيل التلفون من البت.. وامنعها استخدام التلفون .. واتكلم معاها .. وريها الغلط من الصح .. وريها التصرفات دي ما من مصلحتها .. والبت اهم حاجة ليها سمعتها .. لو البت فقدت سمعتها.. تاني مابتنفع بي قرش.. الراجل ما مشكلة في مجتمعنا .. لكن البت وضعها حساس ياخينا .. فهمت كلامي؟ .. يعني انت في الاول اتكلم معاها بس.. وراقبها تاني .. اتفقنا ياحبيب ؟
مشى كمال لي بيت اهلو.. وح نرجع ليهو ..
تعالو بي هنا نشوف .. هنادي .. لغاية الان طبعا قريب اربعة ايام والخبر منتشر بالحلة .. وماوصل هنادي .. ولا حتى اختها هدى الفي المدرسة .. مافي زول جاب ليها خبر .. وشروق نهائي ماجابت سيرة الكلام لي هنادي.. قالو (الكلام يصل الريف لامن يجي عند سيدو يقيف) .. يعني صاحب الشان آخر من يعلم .. شروق يوم جات لهنادي من الصباح .. واتونسن مع بعض .. قالت ليها اها يا هنادي.. الباقر مارد ليك خبر؟ قالت ليها ابدا والله ..
ماشاء الله خلاص الود لاقى حبو الاول.. ياشروق .. تاني انا يعمل بي شنو؟ ان شاء الله ربنا يسعده .. بس والله جهجهني معاهو ههه وتضحك ..
شروق عاينت ليها كدا وعيونا اتملن .. وخنقتها العبرة .. بالله شوف.. هم بقولو فيها شنو؟
وهي بتدعي ليهم بالسعادة .. ياخليلا ماجايبه خبر ..
قالت لها يا هنادي .. والله ربنا ح يعوضك احسن منه ..
هسي عليك الله القوام العندك ده ..والعيون دي.. عند منو في الحلة دي ؟ بس الباقر زي وهمي وماعندو حظ .. يلا في ستين ..
قالت ليها يا شروق انتي قايلة الامور دي مطلوقة ساي.. دي حاجات مقسمة من فوق ..
المهم في الموضوع انو شروق ماكلمت هنادي بالكلام الأتقال فيها..
وكانت متمنية انو هنادي الكلام ده مايصلا ..
اما الحاصل مع اسامة حمد وكمال اولاد الخالات .. طبعا اسامة شال تلفون ياسر .. والرسايل فيهو .. وياسر مشى مغبون .. وخايف تمام؟
كمال قال لي اسامة.. اسامة انت راجل عندك اعراض ياخي .. وعندك بنات ماتقرا الرسايل الفي التلفون ده كلها .. بس خلاص بعد قريت رسايل البت دي مافي داعي لكشف الباقي ..
نحن مادام عرفنا انو هنادي بريئة وبرئنا ساحتها.. مافي داعي لباقي الرسايل عليك الله ماتفتحها ..
ولو سمحتا عشان خاطري .. امسح الرسايل دي كلها .. مامعروف التلفون ده تاني يقع في يد منو.. امسحها ..
ورجع التلفون لي سيده .. واستر خلق الله .. ماعشان البت ولاعشان الباقر .. بس عشان عمك حاج عمر الراجل الضو
سيد القبيلة .. انا ماعايز مكانتو تهتز .
اسامة قال ليهو ابشر ياكيمو .. والله كلامك مابنزاد .. هاك امسح الرسايل.. ورجل للولد الخايب ده تلفونو .. بس ماتكلم الباقر .. تقول ليهو مسحناها ..
خليهو يكون خايف كدا عشان ينجبر يبرء البت .. هسي البيت هناك بكون فاير فوارة ..
كيمو شال التلفون .. وعمل مسح لجميع الرسايل حقة ليمياء .. على غيرا
ورجع التلفون لي ياسر .. وقال ليهو .. ابعد من بنات الناس ..
اها يازول الباقر مشى البيت .. خايف من الفضيحة الفي الموبايل .. وخجلان من اصحابه وعضبان وحاقد على احته الكسرت عينو وسودت وشو ..
لمن وصل مالقى التومات طلعن .. طوالي قعد مع امو.. وقال ليها .. انتي يا امي كيف بتمشي تقولي لي العازة انو الباقر خلى هنادي عشان سمعتها؟
انا ماعندي اثبات على الكلام ده.. في النهاية اكاذيب بتاعات اولاد ..
بعدين هي الخلتني انتي ناسية؟
المهم يا امي العازة مشت نشرت كلامك .. وملت البلد بالكلام الفاضي .. وقالت الكلام قالتو لي بت السيد .. ولدها الباقرقال ليها كيت كيت عن هنادي ..
.. وهسي الناس بتكلمو في بت الناس .. والكلام ده لو وصل لي ادريس النجار .. انتي عارفاهو زول احمق .. والله ممكن يغدر بي ويكتلني ..
الليلة كرعلي .. اول كلمة قالتها ..
المراة دي خافت خوف شديد خلاص.. وقالت ليهو العازة الله يلعنها .. انا والله وماكنت قايلاها بتشيل الكلام وتمشي تقولو ..
قال ليها انتي براك عارفاها.. وعارفة لسانها .. قالت ليهو اصبر يا الباقر .. انت ماتشيل هم.. انا بتصرف بي سرعة .. بكرة انا بمشي القهوة عند ناس السرة والبقولو بعرفو براي ..
قال ليها يا امي في موضوع تاني وصعب شديد .. وحارقني شديد .. احتمال ارتكب فيهو جريمة ..
بتك ليميا ماتمام ياحجة .. نحن بنفتش في رسايل الاولاد لقينا بتك مراسلة ياسر مصطفى .. ومرسلة ليهو كلام كلو تفاهو وقلة ادب ..
امو قالت ليهو كذاب .. انا بتي مستحيل تكون كدا .. قال ليها جدا بس خليها التجي .. وانا بشيل منها التلفون وا

وريك الكلام ..
وقعد حارسها .. لمن جات قال ليها ليمياء تعالي هنا.. وانتي يا امي تعالي احضري ..
اسمعي يا حقيرة ويا منحظة .. ده كلام شنو المرسلاهو لي ياسرده ..قالت ليهو ياسر منو؟ قال ليها انتي عارفة ياسر منو.. ماتعملي فيها هبلة عشان ما اضربك بالكرسي ده اجيب اجلك ..
البت قعدت تتنايص وعملت فيها ضحية اتهام ..قالت لامها اسمعي يا امي دي اتهام خطير وانا ما بسكت . امه قالت ليهو
أهدا يا الباقر ووريها بي رواقة ..
قال ليها انتي يا زفته .. مرسلة لي ياسر مصطفى كلام كلو غراميات وتفاهة .. وانا قريتو بي نفسي .. قالت ليهو منو ؟ انا ؟ انت شفت رقمي ده عندو ؟ جاب رقمي من وين؟ وارسل ليهو على ياتو اساس؟ ..
قال ليها جيبي التلفون ده هسي سريع .. قالت ليهو امسك التلفون
لكن والله ماتطلع لي منو الرسايل .. انا الا اوصل الكلام ده لابوي ..
شال منها التلفون.. وقدر مافتش في الرسايل.. بس مالقى اي حاجة .. كلها رسايل بينها وبين البنات ومافيها اي شي ..
قال ليها بتكوني مسحتيها.. يعني صعب المسح؟؟ .. لكن انتي ما منتبهة.. انو الرسايل بتكون في تلفون ياسر قاعدة.. وانا بجيبها وبجي بدمرك..
وهسي تلفونك ده تاني مابتشوفيهو بي عينيك ..
البت قدام امها .. ابت كلو كلو تعترف بالكلام .. ونكرتو حطب .. لمن الباقر مشى بي غادي .. لحقتو قالت ليهو اسمع يا باقر .. انا والله غلطانة.. انت اخوي اضربني اكتلني اضبحني.. بس ابوي مايعرف .. وانا بوعدك والله تاني تلفون في يدي مابشيلو .. بس امشي امسح الرسايل من تلفون ياسر.. مايعمل لي فضيحة عليك الله ياباقر ..
عاين ليها كدا باحتقار .. قال ليها كمان عندك لسان بتقولي لي كدا؟؟ والله بنات اخر زمن ..
قالت ليهو ماتعاين لي كدا ياخوي .. نحن في الهواء سوا..
انا عارفة رمز تلفونك.. وقارية كل الرسايل القاعد ترسلا لي البنات .. التفاهه البتقولا ليهن .. لكن مافي واحدة ماعرفت ليك الاهنادي.. عفيت منها ..قاعدة تديك في اخلاقك ههه
الباقر شال شبشبو.. وعايز يضربه قامت جارية ..
ووقفت ليهو جنب الباب قالت ليهو .. اصلو كدا النظام .. الولد البتكلم مع البنات .. الاولاد بتكلمو مع اخواتو ..
قال ليها اقسم بالله اانا ماح اخليك ماتضحكي لي .. انا ح اكلم ابوي .. حا اجيب الرسايل من ياسر.. وح افضحك لي حسين .. انتي عارفة حسين ممكن يعمل ليك شنو؟ ..
قالت ليهو والله انا بكلم ابوي بكل العافاهو عنك .. الود الاهبل خاف صدق؟
قال ليها اسمعي ياغبيطة .. بشرط واحد بس .. ممكن اسكت ..
قالت ليهو قول اخدمك بعيوني يافردة .. قول شرطك وانا بنفذه ..
قال ليها طبعا انتي عارفة القصة الحاصلة بيني وبين هنادي؟
قالت ليهو عارفاها بالتفاصيل .. لغاية يوم الرفض .. ولم سمعت البنات قالن عن هنادي شنو وشنو.. قلت ليهن والله هنادي اشرف واحدة فيكن .. بعرفها انابس.. مافي زول بعرفها غيري ..
وانت لمن بتمنع لينة اختي .. ما تلاقي هنادي.. انا كنت بضحك جواي .. لانو لينة مسكينة وماعارفة امورك ..
ليميا بتتكلم مع الباقر بكل وقاحة .. لانها ماسكة عليهو زلات مع البنات وقارية فايلو ..
لمن يكون ولي الامر لاعب بعروض الاخرين .. لن يستطيع حماية عرضه فاعتبرو يا اولى الابصار ..
اها ااا قال ليها يا ليمياء .. طبعا انا غلطت.. ورسلت لي هنادي رسالة عشان انهي العلاقة.. لاني بصراحة كنت شاكي فيها.. وهي فعلا بريئة .. والسبب كله الناس الكذابين امثال ياسر غيرو ..
الناس الهمهم يتكلمو في العروض .. وماعارفين الاضرار الممكن تنتج بسبب اكاذيبهم ..
فشنو .. هسي انا ندمت شديد .. عايزك لو بتقدري ترجعي لي المياه الى مجاريها .. وتمشي لي هنادي .. وتوريها حجم الندامة والاسى الانا حاسيهو ..
وقولي ليها انا مستعد اجيك.. وابوس الواطة تحت اقدامك .. قولي ليها قال ليك.. والله ماعندي زولة غيرك .. بس دي حركة عبيطة مني ساي ..
قالت ليهو يا الباقر اخوي .. انت مابتعرفني.. انا ممكن اقلب الخير شر والشر خير .. انت قايلني زي لينة المسكينة.. اصبر بس انا بخليها تضرب ليك براها .. بكرة بمشي ليها ..
تاني يوم اللهو يوم الاربعا .. ام الحسين بت السيد والدة الباقر مشت القهوة عند ناس السرة ..وليميا مشت لي ناس هنادي ..
وتعال شوف الحصل ^_^
الى اللقاء ..

طارق اللبيب‏
صراحة مدعومة
الحلقة 11
بقلم طارق اللبيب
ام الحسين بت السيد والدة الباقر .. مشت بعد الفطور طوالي لي ناس ناس السرة ..والنسوان هناك ما شاء الله كمية لا يستهان بها .. والقهوة مدورة . والبخور ده مايديك الدرب .. وام الحسين سلمت علىهم وقعدت .. وعيونها تفتش لي منو؟ للعازة .. وتنضم براها ..وينا العازة؟ القوالة الصواطة ام خشما" خفيف.. بس الليلة النلم فيها .. والله الليلة ادخلها في خرم ابرة ..
ووووب .. شافتها طوالي .. قالت ليها تعالي يا العازة.. ياختي الحي بلاقي .. والمغتا على الله مكشوف .. انتي متين انا قلت ليك ولدي الباقر خلا هنادي بت منى عشان سمعتها؟؟
مالا يا يمة هنادي بت منى؟ اريتا بت السرور .. العديلة الطيبة العاقلة .. المحتشمة.. مالا يا يمة هنادي؟ حايمة بالنوادي .. ولا شافوها في شارع الوادي ؟؟ مالا يايمة هنادي بت منى .. اريتا بت الهنا .. (طبعا بتتكلم بصوت عااالي وتسمع في النسوان) ..
هنادي كان فيها كلمة نحن كنا خطبناها لي ولدنا؟ اسمعن يا نسوان .. وحات الله الخلقني .. نحن هنادي ماعندنا فيها كلمة .. وهنادي هي الرفضت ولدي .. قالت ماعندها نية عرس .. عشان ابوها ايدو احدة .. وهي باقية ليهو ولد وبت ..
هسي كان فيكن واحد تقدر تقنع هنادي تأخد الباقر .. نحن قبلانين ..
والله سمعتها زي الدهب.. لكن ناس العازة .. الحمد لله ماعندهم شغلة غير الكضب في الناس ..
العازة قالت ليها عاد يا ام الحسين .. قبلك وحدك وبراك .. يعني انا الكلام جايباهو من وين؟
قالت ليها قبلك انتي.. البتألفي الكلام.. وتجي تقولي قالت لي فلانة .. عليكن الله يانسوان حصل يوم سمعتني جبت قول في زول؟
عليكن الله كان سألوكن .. القوالة انا ولا السارة بتقولن شنو؟
واحدة قاعدة هناك .. قالت ليها والله الموت حار يا ام الحسين نحن ماسعنا ليك قوايل .. لكن العازة النصيحة لي الله ..حياتها كلها قوايل وهجايم في الناس .. الحريم الباقيات قالن صدقت والله .. ام الحسين مافيها كلام ...
شادية خالة شروق .. طبعا حاضرة وانبسطت بسط شديد .. قالت ليها يعني يا بنات امي .. هنادي طلعت بريئة ومهجومة .. سبحان الله .. اتاريك ياشروق بت اختي.. مابتتكلمي من فراغ ..
الحمد لله ظهر الحق .. انا كان دقيت لي شروق وجات هسي عرفت الكلام ده ..والله يا العارة الا تمعطك ..
لكن مافي داعي مادام الناس عرفت كضبك وافتراك .. والعازة تحلف وتتقطع .. والله الكلام قالته لي ام الحسين.. ماقطعتو من راسي .. وام الحسين تقول ليها اسكتي يادجالة ..راسك بالسيف .. كمان تكضبي فوقي قدامي .. وطبعا الناس كلهم صدقو ام الحسين لانو العازة معرفة بتاعة لخبطة ..
كل وكالات الانباء واجهزة الأعلام المعتمدة اخدت خبر طازة هههه
اما ليميا وصلت ناس هنادي.. في نفس المواعيد الكانت امها مولعاها بي جاي .. لقت ادريس قاعد برة في المعرض .. خالف كراعو بقرا ليهو في جريدة .. سلمت عليهو كيفك ياعمو .. ياعمو هنادي موجودة؟ .. نزل نظاراتو وقال ليها عليكم السلام .. انتي بت حاج عمر موش كدا؟ قالت ليهو ايوا ياعمو انا ليمياء .
قال ليها اتفضلي هنادي جوة .. الليلة امها مصدعة شوية.. بتعمل لينا في الأكل .. قالت ليهو يعني الليلة مانجارة .. ضحك قال ليها لالا الليلة الموظف ماخد اجازة بدون مرتب ..
دخلت البت.. وعمك ادريس مستغرب في البت دي.. الجابها شنو؟ اصلا ماقاعدة تجي .. بتجي تومتها التانية .. لونها فاتح اكتر منها شوية .. ليمياء قمحية .. ولينة بيضاء .. وما بتشابهو شديد كدا زي كل التوائم .. لكن يعني بتعرفو اخوات ..
المهم دخلت وسلمت على منى .. منى رابطة راسها وراقده في الاوضة .. وهنادي في المطبخ بتعمل في الفطور يادوب لابوها ..
سلمت عليها وقعدتها في البرندة ..قالت ليها لحظات بس افطر ابوي واجيك ..
قعدتها في البرندة .. ودخلت المطبخ شالت التلفون ضربت لشروق .. قالت ليها انتي وين براااحة كدا.. بالوسوسة عشان ديك ماتسمع .. قالت ليها انا في البيت ..مالك يابت بتوسوسي كدا ؟
قالت ليها تعالي سريع .. ليميا بت عمر جاتنا ماعارفاها مالا؟ تعالي انا محتاجة ليك ضروري ..
شروق قالت ليها جاياك هسي.. ماتتصرفي اي تصرف قبل ما اجيك .. قالت ليها حاضر راجياك .. تعالي سريع .. وهنادي حاسة انو ليمياء جاية تتكلم معاها في موضوع الباقر ..
المهم هنادي عملت الفطور لابوها وختت ليهو الموية وقالت ليهو افطر انا بفطر مع الضيفة دي ؟ قال ليها دي مالا ان شاء الله خير .. قالت ليهو لسة يا ابوي ماعارفة لكن بوريك بالتفاصيل .. اكل انت بالهنا ..
غسلت ليهو يدو وخلتو يفطر ومشت بيغادي ..عملت فطور وقالت لي
ليمياء تعالي جوة.. اخدي لي لقمة معانا .. قالت ليها انا فطرت والله يا هنادي .. اكلو راجياك ان شاء الله بالهنا ..
هنادي مشت ختت فطور لامها.. وقالت ليها انا بحشى لي عيشة وبطلع ليها .. منى قالت ليها دي عندها شنو؟ .. ماقاعدة تجينا اصلا.. قالت ليها شكلها جايبها الشديد القوي ..
المهم شالت العيشة ومعاها كباية عصير.. وطلعت

لي ليمياء .. كباية العصير ختتها ليها قدامها .. قالت ليها مادام ابيتي الفطور اشربي البارد ..
وقعدت هنادي تاكل وتعاين لي ليمياء دايراها تنطق تقول ..
ليميا شربت العصير جيييييت .. وختت الكباية.. ومسحت خشمها وقالت ليها .. الموضوع يا هنادي .. طبعا انا متابعة الحاصل بينك وبين الباقر .. بالمناسبة يا هنادي الباقر ده نحن ماعارفنو مالو بتصرف كدا ..تصرفات غريبة في الايام دي ..
متردد وافكاره مشتتة .. امي قالت بكون مضروب عين .. لكن انا قلت ليها ده كلو بي سبب حب هنادي .. الباقر بحبك شديد ياهنادي .. وماقاعد نوم الليل من يوم اتفارقتو ..
هنادي قالت ليها لالا ياختي ..انتي مافاهمة الباقر عنده زولة رجعت ليهو ..انتي ماعندك خبر .. قالت ليها زولة شنو؟
والله هو براهو قال لي ماعندي اي زول غير هنادي .. وماعارف كتبت ليها قلت ليها كدا ليه ونهيت العلاقة؟ .. ماعندو ياهنادي صدقيني.. انا بعرف الباقر وبقرا رسايلو ..
حتى الرسالة القاليك فيها الكلام ده انا قريتها.. ورسايلك انتي .. تلاتة رسايل بس ..واحدة اهلين الباقر كيفك .. وواحدة مساء الخير.. والاخيرة صباح الخير .. تاني مارسلتي ليهو .. صح ولا انا غلطانة ..
هنادي قالت ليها صح والله ياهو .. لكن الحاصل شنو؟ مالو الباقر قال ماعايزني؟ انا مالي غلطت فيهو في شنو؟
قالت ليها ماغلطتي.. وهو عارف كدا.. بس عمل حركة عبيطة .. وشكلو كان بهظر معاك.. وعايز يشوف ردة فعلك ..وتاني خحل ماقدر يرجع ليك ..بس انتو استعجلتو .. ومشيتو كلمتو ابوي ..
هنادي دي من الكلام ده اتأثرت.. تأثير شديد خلاص .. وقالت ليها يعني الباقر لغاية هسي باقي علي؟؟؟
قالت ليها ايو نعم ..والله باقي عليك لو مامصدقاني انا هسي بخليهو يضرب ليك.. ويعتذر منك بي نفسو ..
قالت ليها انا ماقادرة اصدق .. وهنادي فعلا فرحت شديد .. وبقت تفكر تكلم امها وابوها كيف؟ ..
قامت قالت لي ليمياء يازولة اضربي ليهو .. خليني اسمع الكلام ده منو واي شي بتصلح .. مافي مشكلة انا قلبي بسامح ..
في اللحظة شروق جات .. سلمت .. وقعدت . هنادي قالت ليها يا ليمياء شروق دي زي اختي بت امي .. اتكلمي قدامها عادي ..عارفة عني اي حاجة ..
لمياء قالت ليها المهم ياهنادي.. هسي الباقر منتظر منك الرد ..
طبعا شروق طيرت عيونها .. قالت ليها الباقر منو ا ليمياء؟ .. قالت ليها الباقر اخوي ..
قالت ليها رد في شنو يعني ؟ قالت ليها طبعا حصلت بينهم سوء تفاهم ..هو وهنادي ..وهسي هو رسلني ليها بعتذر ..
شروق قالت ليها ..يفتح الله يختي .. تاني هنادي مستحيل ترجع للباقر .. هنادي قالت ليها في شنو ياشوشو؟؟
شروق قالت ليها اسكتي ياهنادي.. خليني اتكلم معاها..لوو سمحتي ..
وقبلت علي ليمياء .. قالت ليها .. انتي الباقر مارسلك .. عارفة ليه؟
لانو الباقر قال لامه .. خليت هنادي عشان سمعتها ماكويسة .. وامك كلمت العازة .. والعازة قالت الكلام للنسوان في القهوة والخبر ملا الحله .. مادام هنادي سمعتها ماكويسة .. انتو عايزين بيها شنو؟
طبعا هنادي هنا طيرت عيونا .. وحيلها مات.. وبقت تتمتم في الكلام .. وفي حاجة خنقتها في حلقها ..
اول مرة تسمع كلام زي ده في حياتها ..
قال ليها يا شروووووق .. ده كلام شنو البتقولي فيهو ده ..؟؟
قالت ليها دي الحقيقة ياهنادي .. ولو ما مصدقاني اسألي شادية خالتي وسمية فاروق زوجة اسامة .. وكل النسوان حاضرات الكلام .. انا ياهنادي ما ممكن اتبلى على انسان .. لكن هم عايزين يوسخو سمعتك .. وانا مستحيل اخليك ترجعي للناس ديل ..
هنادي قالت ليها انتي ياشروق بتثبتي على كلامك ده ؟ قالت ليها ايوة بثبت.. ومستعدة اصل بيهو القانون .. وعندي شهود ..
بس هنادي انفصمت في ليمياء ..
قالت ليها اسمعي .. اطلعي . اطلعي .. اطلعي من بيتنا ده.. قبل ما اجيب الكبريتة واحرقك .. وقولي للباقر انتظرني .. والله الليلة
الا تشوفو ليكم بلد ترحلو ليهو ..
ليميا قامت خايفة ..ومطيرة عيونها من الهيجة الهاجتها هنادي ..
وطلعت من البيت.. وجمب الباب اتلففت وقالت لي شروق منك لله ياشروق يامفتنة ..
قالت ليها اطلعي يلا امشي.. يا ناس يا ما بتخافو الله .. والليلة ارجو الجاييكم ..
هنادي قالت لي شروق انتي الكلام ده جبتيهو من وين؟ .. قالت ليها والله ياهنادي انا ماكنت عايزة اكلمك.. خايفة عليك من الزعل .. لكن مادام تاني جوك .. انا لازم اتدخل .. سمعتو يوم القهوة الفاتت عند ناس السرة .. هنادي رمت دموع حارة خلاص.. وقالت ليها حرام عليك ياشروووق .. الناس يتكلمو فيني وانتي ماتقولي لي ..
مشت طوالي نادت ابوها .. وعيونا حمر وتبكي بكى مر ..
عمك انزعج شديد لمن شاف هنادي تبكي كدا .. قال ليها امك مالا.؟قالت ليهو امي كويسة ..تعال شوف الناس قالو فيني شنو يا ابوي .. تعال شوف بتك البتفتخر بيها.. بقولو عنها شنو؟

دِيَ حُقًتْ بّكِرَُه انَ شِاءالُلُُه

#تذكير..📌
من سنن يوم #الجمعة
①الغسل
② الطيب
③ السواك
④ لبس الجميل
⑤قراءة سورة الكهف
⑥التبكير لصلاة الجمعة
⑦الإكثار من الدعاء
⑧الإكثار من الصلاة على النبي ﷺ

#مفيد_للقصص
🥀🥀🥀🥀🥀🥀🥀🥀🥀🥀🥀🥀

اللبيب‏
صراحة مدعومة
الحلقة 12
بقلم طارق اللبيب
ادريس ارتبك واتفاجأ واتخلع وجا خلا المعرض فاتح .. لابس ليهو شبشب كل مرة يتملص منو ويلبسو راجع .و في النهاية جا شايل فردة وفردة لابسها .. من اللخمة .. جاي ماشي على البرنده .. وشروق قاعدة وليمياء طلعت ..
قال لي هنادي .. كدي اهدي ياهنادي شوية .. وفهميني بي رواقة الحاصل شنو؟
قالت ليهو موش انا قريت لك الرسالة بتاعة الباقر.. انو هو قال عندو واحدة رجعت ليهو عشان كدا خلاني .. اتخيل مشى قال لامو انا خليتها لانها ماكويسة .. دي انا يا ابوي .. سبحان الله .. انا ماح اخليهم ..
قال ليها كدي دقيقة .. قال كدا لمنو ؟
قالت ليهو اسمع من شروق ..
شروق قالت ليهو والله ياعمو الكلام ده منتشر في الحلة ليهو تلاتة اربعة يوم .. وانا لو ما جات ليميا ماكنت عايزة اقولو .. انا شاديه ضربت لي ونادتني عند ناس السرة وحصل حصل ..
قال ليها يعني الكلام طالع من ام الحسين كلمها ولدها؟ ..
طيب ما مشكلة .. من حقو يخلي البت المانافعة..
بس عرف كيف انو بتي انا ماكويسة ؟
قالت ليهو والله ماعارفة ياعم ادريس .. بس الكلام ده انا واجعني
قال ليها وهسي الحصل شنو يعني؟ وليميا مشت مالا؟ ..
حكو ليهو انها جات ترجع المياه الى مجاريها ..
قال ليهم طيب كيف هنادي ترجع ليهو وهي زي مابقول كدا؟ الكلام ده فيهو ان
واحسن يا هنادي مانقوم بالحماقة ساي وبعدين نندم ..
وبعدين ياهنادي الزول لمن يزعل مابتصرف صاح .. انتي خليك هادية .. وخليني افكر برواقة في الموضوع .. بعدين نشوف ح نعمل شنو؟ بس انا عايز اسألك سؤال .. انتي موش واثقة في نفسك انتي شنو؟
قالت ليهو واثقة يابوي ..
قال ليها وانا واثق منك .. وامك واثقة منك.. واي زول بعرفك عارف ان انتي شنو؟ مالك ومال كلام الناس ؟ من تابع الناس مات هما يابتي ..
وهو لو راجل وعنده كلام اليقولو قدامك .. ماينشي يقولو للحريم ..
نحن الشمشرة بتاعة الحريم دي . ما بنقوم فيها .. ولا بشتغل بيها .. يخسي على الراجل البشيل القوالة مع الحريم ..
بس انا عايز اسألك سؤال .. ليميا الجات دي ذنبها شنو تطرديها ؟؟
انتي غلطانة في الموضوع ده .. دي ماقالت كلام ولانقلت كلام .. دي زولة جاتك محضر خير..
المفروض تتكلمي معاها براحة وبي منطق.. وتقولي لي ليها انا رافضة الموضوع ..
قالت ليهو صاح يا ابوي ..لكن انا زعلانة والله قلبي مولع نار .. قال ليها والله يابتي التهمة حارة .. لكن الزول المفروض يتريث وقت الزعل.. شفتي الغضب بعمي الزول كيف؟
وادريس عاين لي شروق لقاها مستغربة في البرود بتاعو ..
قال ليها انتي ياشروق مستغربة اني بارد كدا ..
والكلام ما أثر فيني ليه ؟ لاني واثق من بتي .. وعارف انو ربنا ح ينتقم من الناس البتكلمو فيها بالباطل ..
قالت ليهو والله صدقت ياعم ادريس.. ان شاء الله ربنا يدينا صبرك واخلاقك دي ..
ادريس قعد.. وقال استغفر الله العظيم من كل ذنب عظيم .. انتي عارفة ياهنادي .. البلد دي بقت عايشة على الاشاعات والكلام في اعراض الخلق.. نسأل الله السلامة .. وانتي طبعا متعلمة وعارفة انو امنا عائشة .. طلعو فيها اشاعة بالافك زي ما قالو عنك ..
انتي قولي الحمد لله.. انو ربنا ختاني في مكان عائشة .. ما ختاني في مكان ابن سلول ..
والله انتي ماعارفة الانتقام الرباني الممكن يحل بالناس ديل شنو..
ان الذين جاءوا بالافك عصبة منكم لاتحسبوه شرا لكم بل هو خير لكم .. والله يا هنادي لي خير ليك .. وانا ده كلام متأكد منه ..
الاشاعة ياهنادي بألفها الحاقد .. وبنقلها الخسيس .. وبصدقها الأحمق ..
وقعد يحكي ليهم في قصص وحكايات.. بتاعات اشاعات طلعت في ناس .. وشنو الحصل للناس العملو الاشاعات .. والعواقب الوخيمة ..
في اللحظة دي شادية خالة شروق اتصلت.. علي شروق في تلفونها .. قالت ليها انتي وين ياشروق ؟
قالت ليها انا مع ناس هنادي في البيت .. قالت ليها ماشفتي الليلة الحصل في القعدة عند ناس السرة؟
قالت ليها اها تاني في شنو؟ قالت ليها جات ام الحسين وحصل حصل .. والله العازة وام الحسين قربن يتماعطن .. والعازة طلعت كضابة .. ام الحسين ماقالت ليها اي كلام .. العازة الفت الكلام من راسها .. قالت ليها ده كلام شنو يا شادية ؟؟
قالت ليها والله زي ما اقول ليك .. العازة هجمت فوق ام الحسين الكلام بالكضب ..
شروق قالت ليها انتي هسي في بيتك؟ تعالي لينا عند ناس هنادي .. نحن راجنك .. عشان يسمعو الكلام ده من خشمك ..
طبعا هنادي وابوها قاعدين يسمعوا في الكلام.. بس عرفو انو الكلام بخص هنادي ..
هنادي قالت ليها في شنو يا شروق .. تاني قالو شنو الناس ديل؟ .. قالت ليها اصبري شادية جايانا .. قالت الكلام طلع كضب .. وام الحسين والباقر ماقالو الكلام ده .. قالت ليه معقول؟؟
يعني هسي انا هايجه في الفاضي ؟ كرعلي يا شروق طردت ليمياء بلاسبب ..
ابوها عاين ليها كدا .. وقال ليها شوفتي يا هنادي؟ .. انا هسي لو قمت بالزعل ..ومشيت للناس ديل في بيتهم .. ومسحت بيهم الارض .. كنت ندمت صح؟
بس الحمد لله

انا ما الراجل البقوم في قوايل النسوان ..
ناهد قالت ليهو انت الزيك منو يا صباح الخير ..
طبعا الجوطة دي كلها ومنى ام هنادي راقدة جوة مصدعة وتعبانة .وماسامعة اي حاجة .. ومامعروف لو سمعت الممكن يحصل شنو .
لكن رحمة بي هنادي .. ولانه ربنا واقف معاها .. امها لغاية الان ماعندها اي خبر ..
لحظة قبل ما تجي شادية .. نشوف ليمياء .. طبعا وصلت هناك البيت وماشايفة قدامها كويس .. لقت الباقر نايم في الصالون.. ابت تصحيهو ..
طبعا مالقت امها .. لسع ماجات من ناس السرة .. انتظرتها لمن جات .. وحكت ليها الحصل .. امها قالت ليها .. مخير الله الباقر والله وقع في مشكلة .. ربنا يجيب العواقب سليمة .. يعني يادوب عرفو القوالة هم؟ ..
قالت ليها ايوة من شروق . وطوالي طردوني قالت ليها . بركة الطردوك .. اول انتي ماشة ليهم ليه؟ الباقر براهو مابشوف في الشارع ..
قالت ليها يا امي والله انا الناس ديل مابحبهم ولابحب امشي ليهم . بس الباقر ضغطني .. هو شال تلفوني وابا يديني ليهو .. قال لي الا تمشي ليهم حتن اديك تلفونك .. قالت ليها امشي قولي ليهو امي قالت ليك جيب التلفون ..
اها لمن مشت بي غادي للباقر لقتو صحى . وماسك تلفونها يقلب فيهو .. قالت ليهو والله حصل حصل حصل ..
الباقر قال ليها اصلك انتي نحس.. واي حتة يرسلوك ليها .. مابتجيبي خبر خير .. قالت ليهو طيب اديني تلفوني ..
قال ليها ابيت ..
بس البت هاجت فيهو.. وقعدت تكورك عشان امها تسمعها .. قام عليها داير يضربها قامت جارية .. وفي جريتها ديك صادفها اخوها حسين الكبير .. جاي يادوب داخل .. قال ليها في شنو يا ليميا .. قالت ليهو الباقر شال تلفوني وابا يديني ليهو ..
حسين جاهو .. قال ليهو اديها تلفونها يا الباقر .. قال ليهو لالا مابديهو ليها لمن تعرف انت شلتو منها ليه؟
تعال اقعد اولا حصل حصل حصل .. ولقيناها مرسلة رسايل كيت كيت .. قال ليهو انت يا الباقر قريت الرسايل بي نفسك؟
قال ليهو نعم قريتها والله .. وكمال برضو قراها .. كلها لمن يلاقيك أساله .
حسين قال ليهو .. دي تصرفات اختك ..وانت قاعد زي الخايب ؟؟ توف عليك وعلي وشك ..
بس يازول حسين عيونو انقلبن حمر .. وبقى يرجف .. وقام علي حيلو مشى لي ليمياء بي غادي. لقاها قاعد جنب امها ..خايفة دايرة تموت من الخوف .. لانها بتخاف من حسين شديد .. ومابتخاف من الباقر..
حسين قال ليها قومي تعالي .. قالت ليهو انا مالي؟ والله الباقر كذاب .. قال ليها بقول ليك قومي تعالي ..
ساقها وداها بي غادي .. قال ليها اقعدي هنا ..
وضرب تلفون لي كمال ..
قال ليهو يا كمال انا بسألك سؤال واحد بس جاوبني عليهو ..
هل انت قريت رسايل من ليميا اختي .. في تلفون ياسر مصطفى؟
ولا الباقر ده كذاب ؟ كمال قال ليهو صح .. الباقر ماكذاب ..
بس حسين قفل التلفون من كمال.. ومسك البت من شعرها وضرب بيها الحيطة .. ضربة شديدة .. البت من الحيطة جات واقعة ضربت في كراع السرير .. ووقعت في الارض مغمى عليها ..
امها جات جارية وابوها جا جاري.. ويرشو فيها بالموية والدم مارق من خشمها ونخريها .. ربك يستر ..
الى اللقاء ..

اللبيب‏
صراحة مدعومة
الحلقة 13
بقلم طارق اللبيب .
ليميا واقعة في الارض ونازفة دم .. ابوها والباقر رفعوها فوق السرير ..وحسين خلاها وطلع ..لينه جات خاشة لقت اختها في الحالة دي فكتها صرخة .. زي صفارة الحكم بتاعة ضربة الجزاء .. الحلة كلها سمعت الصرخة .. خصوصا ناس عمر بيتهم عالي فوق تلة.. يعني الصوت بكون وصل ناس هنادي ..
يازول لمن صرخت كدا ابوها قمز عليها عايز يكفتها فوق خشمها ده .. ليميا لمن ختوها فوق السرير فتحت .. ومسكت راسها متالمة ..
لينه قالت لامها مالا ليميا يا امي؟ قالت ليها ضربها حسين ؟ قالت ليها في شنو؟
قالت ليها عليك الله يالينة امشي من قدامي النشوف اختك .. ودخلت الام شايلة ليها بشكير وموية. عشان تغسل ليها الدم .. ليميا ماسكة راسها وتبكي قالت ليهو يا ابوي .. راسي ح يتفجر..
قال ليها اهدي اهدي يا ليميا .عشان لو راسك ماخف نمشي المستوصف .. امها قالت ليهو لازم نعمل ليها صورة. الحصل شنو ما معروف .. قال ليها اصبري يا ام الحسين ..
غسلو ليها وشها وخشمها الاتورم .. وشفتها العليا من فوق اتجرحت بضغطة الاسنان .. وماقادرة تتكلم .. جابو الموية الباردة وبعملو ليها في مكمدات ..
وكل شوية هي ماشة احسن .. ماشاء الله البت روحها روح كلب .. غايتو الضربة الضربها ليها الزول اب رقبة ده .. انا قلت ماتقوم منها تاني لكن الحمد لله .. بس المشكلة وين؟ .. نسوان الحلة انكسرن في البيت لانهن سمعن الصرخة ..واول مايلاقن جنب الباب لاقن البت الاسمها لينة ..
واحدة من الحريم قالت ليها مالكن يا لينة؟ الحاصل شنو نحن قلنا في زول ضربتو كهربا ولا بيت وقع ..
قالت ليها دي اختي ليمياء ضربها حسين ..
لكن النسوان لمن دخلن جوة يشوفن البت ..سألن امها قالت ليهم وقعت من السرير .. الحريم كل واحدة بقت تعاين للتانية ..
والكلام اختلف ..البت بره قالت ضربها حسين.. والام قالت وقعت من السرير يصدقوا منو يابنات امي؟ .. ده كلام فوق عيون النسوان من غير صوت ..
المهم قالن كفارة ان شاء الله حسنة واجر.. والله اتخلعنا لكن الحمد لله .. ترا البت ماعندها عوجة.. ضربة بسيطة والورم ده هسي بنفش ..
الحريم ديل زي اربعة لمن هن مارقات في نسوان لاقنهن في الشارع
قالن ليهن ديل مالن يانسوان ؟؟
واحة قالت لهن ..دي واحدة في التومات اخوها ضربها لكن ناكرنو .. تكون مسوية شنو؟ الله اعلم ..
وديل دخلن وديل مرقن .. والمراسلين الاخباريين اشتغلو وبالتلفونات ..
قالو ليميا بت عمر اخوها حسين ضربها لامن غمرت .. وكلها نص ساعة .. والخبر انتشر في الحلة كانتشار النار في الهشيم ..
بعد البت ارتاحت شوية .. عمك عمر ضرب لحسين ناداهو .. قال ليهو.. انت ياحسين البت دي ضربتها في شنو؟
حكى ليهو الكلام .. قال ليهو تركب هسي تمشي تفتش ياسر ده من تحت الارض.. وتشوف الكلام ده صح ولا كضب ..
قال ليهو يا ابوي الزول ده انا لو لاقيتو.. بخفس بيهو الواطه..
قال ليهو امال داير تعاين ليهو زي الباقر الني ؟ لازم تطيرو تاني لو لاقاها في الشارع مايرفع عينو عليها ..
وانا ليميا قادر اتصرف معاها .. الكلام ده كلو كان في عصر يوم الاربعا .
والحصل شنو تاني مع الناس ديل الله اعلم..
اما هنادي بعد ما عرفت الكلام من شادية وشروق . اتأكدت انو
الباقر وامو بريئين من الكلام ..تاني ما اشتغلت بالموضوع ..
اهااا ياجماعة ..تاني يوم الصباح من الكلام ده ..
شادية سمعت بانو ليميا اخوها ضربها.. وهسي راقدة في البيت .. بس لسع ماعرفت اخوها ضربها في شنو؟ وقالو الكلام داسنو .. وامها اي زول يجي بتقول ليهو وقعت براها ..
قامت شادية خالة هنادي ساقت معاها سمية .. سمية زوجة اسامة متذكرنها طبعا".. ساقتها وماشات يكفرن لي ام الحسين لبنتها ..
في الشارع بتونسن .. الكلام ده صباح الخميس ..
قالت ليها شفتي ياسمية سبحان الله .. العازة الكضابة تألف في الناس وتكضب ..
قالت ليها هوي ها .. انتي مافاهمة اي حاجة ..
امبارح بالليل .. اسامة قال لي هنادي طلعت بريئة .. ونحن مشينا اتأكدنا من كدا .. معاي اكمال والباقر ..
قلت ليهو برئتوها كيف .. قال لي فتشنا تلفون ياسر مصطفى .. لانو الباقر كان مصر قال البت عندها علاقة مع ياسر .. لقينا مافي رسايل ولاشي .. حتى الولد قال انا مابعرف لهنادي اي شي كعب .. والباقر لمن شاف تلفون ياسر واتاكد منه .. حتى قلبو اطمأن .. ده كلام راجلي من خشمو لاضاني ..
يعني ياشادية فعلا الباقر كان شاكي في هنادي ..
وكلم اصحابو كمال واسامة .. الكلام ياشادية العازة ماجايباهو من راسها .بس المراة نكرت سااااكت .. غايتو الناس ديل اعوذ بالله ..
شادية بعد ما ماشة وقفت .. وقبلت على سمية قالت ليها انتي متأكدة من الكلام ده؟ قالت ليها والله متأكدة تأكيد شديد ..
شادية خالة شروق .. راسها جاط وماعرفت تقول حاجة .. بس قالت ليها .. ترا الباقر وامو ربنا انتقم منهم في بتهم.. اليخمو ويصرو الحلة كلها شايلاهم في خشومها .. قالت ليها فغلا والله عشان اتهمو بت الناس المسكينة بلا سبب ..
شادية

حكت لي سمية .. كل الحصل في بيت ناس هنادي .. وطردت البت .. وكلام شروق .. وكلام ادريس .. كلووو..
وقالت ليها طبعا ياسمية .لسه هنادي قايله الباقر وامه ابرياء .. لكن الخبر ح يصلا بس النجي راجعة هههههه ..
غايتو جنس حالة !!!
بعد رجعن من ناس ام الحسين .. سمية لمتين تصل لي راجلا اسامة وتحكي ليهو تفاصيل الاخبار .. اليومين دي اسامة في اجازة وهي لاقية فرصتها ..
جاتو قالت ليهو حصل حصل حصل .. بالتفصيل الممل ..
بس رد عليها بكلمة واحدة قال ليها ..سبحان الله شوف الثقة دي بالله ..
قالت ليهو ثقة شنو؟
قال ليها الراجل الفاهم ..لمن يكون واثق في بتو .. وعارف عزو كلام الناس مابهزو .. ناس هنادي ديل .. ناس ملايكة ..ما المفروض يسكنو في الحلة دي .. دي حلة ملعونة ..
قالت ليهو اووووب علي انا من هنادي الملايكة ..لفيت البلد كلها عشان تطلعها براءة .. وهسي تشكر فيها ؟؟ انت ياراجل مشكلتك شنو؟ ماتراعي لي شعوري انا زوجتك ..
قال ليها عليك الله ياسمية .. انا جيعان لمن راسي ده موجعني قومي سوي لي فطور.. بعد كملتي حوامتك ولقيط الاخبار ..
بعد سوت ليهو الفطور قعد يفطر قريب الساعة 12 معاهو ولده الصغير جاي من المدرسة .. بس جات قعدت وهو يفطر ويهظر مع الولد .. قالت ليهو يا اسامة .. والله انا ماحارقني شمار قدر شمار ميادة بت العازة .. والله الا امشي اسأل منها شروق ..
اسامة قال ليها اسمعي .. شيلي الاكل ده من قدامي.. انا خليتو الفطور .. قالت ليهو انا آسفة .. عليك الله تكمل اكلك .. والله تاني خشمي مابفتحو ..
قال ليها معليش بطني طمت من الاكل.. ولبس نعلاته وطلع ..
قالت ليهو ماشي وين؟ .. قال ليها ماشي ناس خالتي .. في حاجه؟
قالت ليهو ايوااا ماشي لي كمال .. عشان تمشو بثبتو براءة ميادة ؟..
الزول عاين ليها كدا ..وقرب يبكي من المغسة والاحباط ..
طلع طوالي .. مشى لاقى كمال وقعدو يتونسو .. قال ليهو والله المراة دي احمتني الفطور .. ياخي بس شغالة نقة وشمارات .. ما مخلية زول في حاله .. قال ليهو اها تاني في شنو؟
قال ليهو والله ياكمال انا مامالي راسي غير هنادي وابوها .. اتخيل لمن سمعو انو الباقر وامو متكلمين في سمعة البت.. ردة فعلهم كانت شنو؟
قال ليهو اها شنو؟ قال ليهو سكتو .. ولا اي شي .. ولا مشو سألو ولاعملو مشكلة ولا يحزنون ..
كمال قال ليهو يا اسامة اقول ليك كلام ؟؟ انا والله ماكان عندي رغبة في زواج .. لكن والله هسي جاتني رغبة شديدة اتزوج هنادي دي..
زالله اليومين دي بس .. معشعة هنادي في خيالي .. ما قادر اصرفها من جواي كلو كلو ..
والله دي مراة سترة يا اسامة .. ما دام الله صرف منها الباقر ده ..حقو اقوم اتحرك .. انت رايك شنو بقبلو بي الناس ديل ؟
اسامة قال ليهو . قال ليهو طيب انت راجي شنو .. راجي المولد؟ كيف مايقبلو بيك مالك؟
بس انت هنادي علاقتك معاها كيف ؟ قال ليهو والله بس سلام ومرحب كيفك هنادي.؟.. مرحب كمال .. وبيني وبينها كل الاحترام والتقدير..
لكن طبعا زي ماعارف .. احتمال عشان مشكلة ابوي .. مايقبلو بي .. عارفين مشكلة ابوهو شنو؟
الى اللقاء ..

‏
صراحة مدعومة
الحلقة 14
بقلم طارق اللبيب .
قبل 17 سنة تقريبا .. كان الفاضل قمبور .. والد كمال كان سواق سايق دفار بتاع شحن ..
الفاضل قال انو ..يوم بالليل لاقي ليهو بت في مقتبل العمر ماشة بالليل في حتة مقطوعة والشوارع فاضية .. وقف العربية وسألها .. انتي منو قالت ليهو مريم . قال ليها جاية من وين قالت ليهو جاية من الجنة .. وماشة وين قالت ليهو ماشة جهنم .. عرف انو البت دي مخها ماتمام قال ليها اركبي ..
ركبت مشى بيها على اقرب مركز شرطة .. وبقى يتكلم معاها .. قلتي لي اسمك منو .. قالت ليهو نفيسة .. قال ليها قبل شوية موش قلتي مريم؟ مالك غيرتي اسمك سريع كدا؟ ..
طيب هسي اقول ليك مريم ولا نفيسة؟ . قالت ليهو لالا .. انا اسمي ماكدا .. بس ما متذكراهو كويس .. بجيني وبروح ..
اهلك وين؟؟ .. ماعرفت اهلها .. ابوك؟ . اي عنوان ليكم؟؟ برضو ماعرفت ..
المهم وصلا للشرطة .. وسلمهم ليها ووطلب منهم يكتب اقرار .. وكدا .. وعنوانو وبياناتو .. قالو ليهو يازول مامشكلة.. نحن بنلقى اهلها ..انت بس امشي خلاص ..
اها يازول الزول ده .. حسى بالعساكر نظرتهم للبت ما طبيعية .. البت ماواعيه .. ودايرين يخارجوهو بس .. البت سمحة ونضيفة اصلو مابتقول عيانه .. وهم تلاتة شباب .. وشكلهم كدا معلمين في الصياعة .. قالو ليهو خلاص انت امشي.. سلمتنا البت وهي في يد امينة .
مشى دور العربية وطلع.. ما مشى كيلو .. قلبه اكلو شديد .. وقال انا الا ارجع اشوف الحاصل علي البت دي.. مابفوتها مع الناس ديل شكلهم ذئاب بشرية ..
لمن جا راجع لقى البت مافي .. وفي اتنين بس من العساكر ..التالت فيهم مافيش ..
مشى طوالي يفتش للبت جوه المركز .. والعسكريين ديل بكوركو فيهو يازول ثابت ماشي وين؟
اصلو ابا يسمع كلامهم .. سمع حركة في مكتب لزا الباب.. لقى العسكري بتصرف تصرفات ما كويسه مع البت ..والبت بتدفر فيهو كدا ومتضايفة وبتبكي .. بس مالحق يأذيها يعني ..
اها يازول الفاضل مسك البت .. وجراها من يدها ..وقال ليها يلا انا بسوقك معاي البيت ..
المكان ده هنا ما امان .. العسكري اتهاوش معاهو .. وداير يكفتو ..بس الفاضل شال الكرسي بتاع الحديد .. وطقه بيهو العسكري .. ضربة واحدة .. اصابه في مقتل .. العسكري وقع ميت مباشرة .. في اقل من عشرة ثوان ..
العسكريين البرة .. لمن جو عشان يحلو المشكلة.. لقو زميلهم ميت .. ماعارف الاخرهم بره شنو؟؟
الفاضل سلم ليهم نفسو .. طوااالي
دي الاقوال الحكاها الفاضل للمتحري ..
لكن اقوال العسكريين الاتنين مختلفة تماما ..
قالو نحن قبضنا الزول ده مع البت دي .. في دفارو .. وجيناهو هنا .. بي دفارو.. ولمن بنحقق معاهو قعد يقل في ادبو .. وعمل مقاومة .. وضرب المرحوم بالكرسي ..
اها القاضي لمن سأل البت.. البت قالت نفس اقوال الفاضل.. لكن القاضي رفض يعتمد كلامها.. لانها غير مكلفة واقوالها كانت متضاربة .. بس كانت بتتكلم بي غضب عن العسكري .. واهلها مصدقين الفاضل .. لدرجة انهم شكروهو لي حفظ عرض بنتهم .. لكن القانون عنده عنده فهم اخر ..
المهم في النهاية الفاضل حكمو عليهو بالاعدام.. بتهمة القتل العمد
المادة 130 . واتنفذ فيهو الحكم ..
بس المشكلة في سمعتو .. في ناس مصدقين كلامو واقوالو .. وفي ناس صدقو كلام العساكر لانهم اتنين .. وفي النهاية الله اعلم بالحقيقة ..
سمعنا قالو الفال ده اخر كلام قالو للناس .. قال انا مادام حفظت شرف البت المسكينة.. كونه يحكمو علي بالاعدام .. ده شرف لي .. وبعتبرها شهادة في سبيل الله ..
وعلي الطلاق لو العسكري ده تاني قام.. ومد يدو على البت .. انا تاني اقتله ..
قصة الفاضل قصة طويلة ومعقدة .. محتاجة لرواية كاملة بس انا اختصرتها هنا للاشارة ..
المرحوم الفاضل عنده ولد وبت .. الولد ياهو كمال ده.. ابوهو لمن مات خلاهو شافع .. والبت اصغر منه .. رباهم عمهم الكبير ..وكان بصرف عليهم لمن شالو حيلهم ..
البت هسي متزوجة ماشاء الله وعندها طفل .. وكمال شغال مقاول بنيان .. .. في امان الله ووضعه مابطال .. ساكن في بيت ابوهو حدادي مدادي مع امه ..
اها يازول هسي كمال متحسس من الموضوع ده .. وكل مايمشي مجلس بحس بالكلام في عيون .. ماعارف يا اما حقيقة الناس لسه متهمين المرحوم .. ولا نفسيات من كمال بس ..
على كل حال.. في المجتمعات الزي دي ..قتل النفس ده بعتبروهو لعنة .. يعني لو ابوك كاتل روح .. مافي زول بزوجك باخوي واخوك .. حاجة كدا متأصلة فيهم ..
بغض النظر عن القتل ده كان بحق.. ولابغير حق ..
.اسامة قال ليهو ياكمال .انت بس قول باسم الله واتقدم .. قال ليهو اتقدم كيف قبل ما اعرف راي البت؟؟ احتمال ماعايزاني ..
اسامة قال ليهو طيب تمام .. انا بكلم ليك قناة الجزيرة بتاعتي.. تمشي تحكي ليها وتشوف ردة فعلها رايك شنو؟
قال ليهو انت قاصد منو سمية ؟ والله يكون تمام .. على الاقل نعرف رد البت..
بعدين تواجهنا مشكلة ابوها .. والناس البتخاسسو ويقولو عايز يعرس بتو لزول ابوهو كاتل روح ..
قال ليهو بس كدي اصبر.. يعني انت

عواقب طيبة ..
الى اللقاء ..

ح تقعد كدا لمتين.. خليهم يقولو ياخ .. الزمن ده هم غير القوايل عندهم شنو؟ ..
اسامة مشى البيت .. طوالي سمية جاتو.. قالت ليهو والله انا اسفة يا اسامة.. انا ماعارفة قدر ما اقول اصبر على خشمي ده .. بغلبني .. لكن تاني بس خشمي وعندي ..
قال ليها ما مشكلة .. بس هسي انا دايرك في خدمة .. قالت ليهو قول
عيوني ليك .. حكي ليها رغبة كمال.. وقال ليها امشي لي هنادي واتشمشمي منها من بعيد لبعيد ..
شوفي رايها في كمال شنو؟ لو لقيتيها مرتاحة للفكرة .. طوالي أساليها .. وقولي ليها رسلني ليك عديل .
قالت ليهو ماتشيل هم .. انا عندي افكار تقنع الجان ذاتو.. طوالي قامت لبست توبها واتبلمت ومرقت .. الكلام ده يوم الخميس العصرية ..
شوف بالله الاحداث دي متسارعة كيف ..
مشت لي ناس هنادي.. لقت هنادي معاها ابوها قاعدين في الضل.. ابوها قاعد فوق سرير.. وهي قاعدة في الارض بتضفر ليهو في رجليهو ..
سلمت.. ودخلت جوة.. لقت منى رابطة راسها .. قالت ليها هي كفارة ياست البنات . الحاصل عليك شنو؟
طبعا انتي لابتجي القهوة ولازولة قعدات.. متفلهمة وماقاعدة في الواطة عشان كدا مابنفقدك ..
والمشاكل الحاصلة كلها ماعندك فيها دور ..
قالت ليها مشاكل شنو يا سمية؟ ياكافي البلا .. انا اصلا خرافاتكن
وقوالاتكن دي بتجيب لي النفسيات.. عشان كدا مابحب القعاد معاكم ..
بس سمية بدت تحكي لي منى ..بالتفاصل . والمشاهد ..
ومنى طبعا اول مرة تسمع بالكلام ده .. لانو هنادي ماحكت لامها اي شي .. عارفين ليه .. منى زولة صعبة وحمقاء .. وممكن تولع الحلة دي في لحظة ..
حكت ليها بالتفصيل الممل ..الخبر الانتشر في هنادي و حكاية المشكلة بتاعة العازة وام الحسين في نكران الكلام .. وقصة التلفونات.. ورسايل ليمياء .. ماااخلت ليها شي لي ورا ..
قالت ليها ده كلو اتقال في بتي وانا ماعارفة .. والصداع زاد عليها
وقعدت تبكي .. وكوركت لي هنادي .. هنادي حست انو سمية ح تكون حكت لامها القوايل دي .. قالت لابوها ابوي قوم تعال.. امي دي كوركتها دي ما طبيعية ..
طبعا سمية لمن شافت انزعاج منى ..ندمت ندامة شديدة انها حكت الكلام .. لانها كدا بتكون بوظت الموضوع الجاية من اجله ..
جات هنادي وابوها داخيلن على منى .. منى قالت ليها ياهنادي ده كلام شنو البتقول فيهو سمية ده؟ صحي انتي الباقر وامو قايلين فوقك كلام وانتي ما قلتي لي؟
قالت ليها لالا يا امي .. ده كلام فارع ساي مألفاهو العازة .. وام الحسين وقفتها في حدها ..
سمية هنا اتلفتت على هنادي .. قالت ليها ياحليلك يا النايمة على حيلك .. امشي أسالي اسامة راجلي ولاكمال .. قولي ليهو الباقر ماكان بفتش في تلفونات الاولاد .. عشان يلقى رسايلك فيها .. لانو سامع عنك كلام ماكويس .. وفي فتاشتو لقى رسايل الاولاد مع اختو ..
واخوها الكبير ضربها كان داير يكتلها .. انتي وين يا المسكينة ؟
العازة مصلحتها شنو تكضب فيك؟ .. دي المراة المطموسة دي عايزة تبرر لي ولدها خلاك ليه ..
طبعا ادريس يسمع في الكلام .. وبس شغال حسبي الله وونعم الوكيل..
يا منى انتي اول من تقومي من عياك ده بالسلامة . انا ح اسوقكم من الحلة دي.. ونرحل نشوف لينا بلد .. تاني هنا ماعندنا قعدة ..
سمية قالت ليهو هي يا الحاج قول بسم الله .. كلام الناس قاعد في اي محل .. الناس ياها الناس ..
هنادي قالت لابوها كلام صح يا ابوي.. طوالي ترحلنا من هنا .. ان شاء الله نمشي نأجر ..
منى قالت ليهو انا ما بتحرك من هنا .. الا أوصل الكلام ده لي حدو ..
والله كان ام الحسين كان العازة .. انا لازم اعرف الكلام ده جاي من وين .. اما مسخرة وقلة ادب بتاعة حريم ..
منو هي البتشبه هنادي بتي؟؟ قولي ليهن والله والله .. هنادي بتي مافيكن مراة بتلدها .. هنادي المن الله خلقها.. ماحابت ليها سيرة زول لابسمح ولابي كعب .. هنادي انا ممكن اختها وسط عشرة رجال.. وامشي وانا مطمنة عليها .. لانها ارجل من الرجال . فاهمة ولا ازيدك في الكلام ..
سمية قالت ليها انحن كلنا عارفين هنادي .. والحلة كلها عارفاها .. ديل ناس حاقدين ساي ..مافي داعي تقومي في الكلام ده يامنى وتندميني على جيتي ليكم ..
منى عاينت لي راجلها كدا وقالت ليهو قلت شنو؟ نرحـــل ؟ نرحل وين؟
عشان يقولو الكلام حرقهم .. وبقى ماعندهم وش يقعدو في الحلة؟
والله من هنا مابنمشي .. يرحلو هم.. وبرحلهم ليك انا.. اصبر لي النقوم على حيلي .. نسوان ماعندهن شغلة غير النسنة والقوالة ..
كمان هسي جابت ليها رجال .. رجال يفتشو في التلفونات عشان يشوفي رسايل بتي مع الاولاد سبحان الله..
هنادي قالت ليها رجال شنو يا امي ..؟ قالت ليها ماياهدي سمية قالت قدامك .. الباقر وكمال واسامة راجلها .. بفتشو في التلفونات عشان يشوفو رسايلك مع الاولاد؟
ديل رجال ديل عليك الله؟
سمية قالت ليها انا راجلي مافيهو كلمة .. وعمل كدا عشان يبرء ليك بتك.. وفي النهاية طلعت بريئة ..
غايتو سمية بوظت الدنيا وقعدت .. بي سبب لسانها الخفيف وقوايلا الباقية ليها مرضة .. ربنا يجيب ال