ﺗﻌﺮﻑ ﻏﻨﺎﻭﻱ ﺍﻟﺨﺴﺘﻜﺔ؟ ..ﻟﻤﻦ ﺑﺘﺸﺮﺏ ﻣﻦ ﺳﺒﻴﻞ ﺍﻟﺪﻧﻴﺎ ﻛﺎﻥ ﺣﻠﻘﻚ ﻧِﺸِﻒ .. ﻣﺎﺗﻜﺘﺮﺙ ﻟﻠﻤﻮﻳﺔ ﻛﺎﻥ ﺳﺎﻟﺖ ﻣﻦ ﺍﻟﻘﺪﺓ ﺍﻟﺘﻲ ﻓﻲ ﺃﺳﻔﻞ ﺍﻟﺤﺎﺟﺎﺕ ﺷﺪﻳﺪ .. ﻟﻮ ﺑﻠّﺘﻚ ،، ﻗُﺸّﺎ ﻑ ﺣﻨﺎﻧﻚ ﻭﺃﻣﺸﻲ ﺳﺎﻱ .. ﺍﻟﺒﻨﻄﻠﻮﻥ ﺑﻨﺸﻒ ﺳﺮﻳﻊ .. ﻭﺍﻟﺒﻘﻌﺔ ﻓﻲ ﻧُﺺ ﺍﻟﻘﻤﻴﺺ ﺑﺘﺰﻳﻨﻮ ..ﻭﺍﻟﺠﺰﻣﺔ ﺍﺻﻼً ﻟﻠﻤﺸﻲ .. ﻧﻀﻴﻔﺔ ﺍﻭ ﻭﺳﺨﺎﻧﺔ ﻣﺎﻓﺮﻗﺖ ﻛﺘﻴﺮ .. ﻭﻟﻮ ﺣﺎﻭﻟﻮ ﺍﻟﻨﺎﺱ ﻳﻨﻀﻤﻮ .. ﺃﻣﻠﺺ ﻫﺪﻭﻣﻚ ﻭﺇﻧﺒﺴﻂ .. ﻭﺍﻟﻜﻮﺯ ﺇﺫﺍ ﻗﺮﺭ ﻏَﻄَﺲ .. ﺃﻭﻋﻚ ﺗﻤﺪ ﺇﻳﺪﻙ ﻋﺸﺎﻥ ﻣﺎﺗﻤﺮﻗﻮ .. ﺡ ﺗﺒﺸﺘﻦ ﺍﻟﻤﻮﻳﺔ ﺍﻟﺘﻲ ﻣﺎﺻﺪّﻗﺖ ﺭﺍﻗﺖ ﻭﻓﺘّﺶ ﻟﻠﺒﺪﻳﻞ .. ﻛﺒﺎﻳﺔ ﻓﻨﺠﺎﻥ ﻣﺎﻣُﻬﻢ .. ﺇﻻ ﺍﻟﻌﻄﺶ ﻣﺎﺗﺠﺮﺑﻮ .. ﺃﻭ ﺟَﺮّﺑﻮ ﺇﻥ ﻛُﻨﺖَ ﺑﺘﺤﺐ ﺍﻟﺸﻘﻰ .. ﺃﻭ ﺟُﺮﺑﻮ ﺍﻟﻄﻴﻦ ﺍﻟﻤﺤﺎﻭﻃﻚ ﻓﻲ ﺍﻟﻄﺮﻳﻖ ﺧﻤﺴﻴﻦ ﻋﺪﻳﻞ .. ﺇﻥ ﺍﻟﺠﻤﺎﻝ ﺯﻱ ﺃﻱ ﺣﺎﺟﺔ ﺑﺘﺘﺄﻛﻞ .. ﺍﻟﻨﺎﺱ ﺑِﻀﻮﻗﻮ ﻭﺑِﺤﻜﻤﻮ .. ﻟﻮ ﺍﻟﺒﻴﺎﺽ ﻛﺎﻥ ﺯﻱ ﺟﺪﺍﺩﺓ ﻣُﺤﻤﺮﺓ .. ﻳﺒﻘﻰ ﺍﻟﺴﻤﺎﺭ ﺯﻱ ﺷﻴﺔ ﺣﺎﺭﺓ ﻋﻠﻲ ﺍﻟﺠﻤُﺮ .. ﺍﻟﻄﻮﻝ ﺇﺫﺍ ﻛﺎﻥ ﺯﻱ ﺷﻤﺎﺭ ﺃﻭ ﻛﺴﺒﺮﺓ .. ﻳﺒﻘﻮ ﺍﻟﻘُﺼﺎﺭ ﺍﻟﺸﻄﺔ ﺑﺎﻟﺪﻛﻮﺓ ﺍﻟﺘﻲ ﻣﺎﺑﺘﻨﻬﺒﺶ .. ﻃﻮﻝ ﺍﻟﺸَﻌﺮ ﻟﻮ ﻛﺎﻥ ﻣﺨﻠﻞ ﺍﻭ ﻣِﻠِﺢ .. ﻗﺼﺮﻭ ﺑﻴﻜﻮﻥ ﺑﺲ ﺳﻠﻄﺔ ﺑﺲ .. ﻣﻦ ﻣﺎﺳﺒﻖ ﻗﺪ ﻳﺘﻀﺢ .. ﺍﻟﺪﻧﻴﺎ ﻣﻨﻴﻮ ﻛﺒﻴﺮ ﺷﺪﻳﺪ .. ﻓﻴﻬﻮ ﺍﻟﺠﻤﺎﻝ ﻣﺮﺻﻮﺹ ﻭﻗﺎﻋﺪ ﺟﻤﺐ ﺑﻌﺾ .. ﻭﻛﻞ ﺍﻟﺤﻨﻚ ﻣﺎﻓﻲ ﺍﻟﺒﻘﻮﻟﻮ ﺍﻟﻨﺎﺱ ﻋﻠﻴﻚ .. ﺇﻥ ﺍﻟﺤﻨﻚ ﻓﻲ ﻛﻴﻒ ﺑﺘﻄﺒﺦ ﺃﻛﻠﺘﻚ؟ ..ﻭﺩﺭﺱ ﺍﻟﻄﺒﺎﺧﺔ ﺭﻗﻢ ﺻﻔﺮ .. ﺇﻧﻚ ﺗﺜﻖ ﻓﻲ ﻛﻮﻧﻚ ﺇﻧﺖ ﺧﻄﻴﺮ ﺷﺪﻳﺪ .. ﻣﺜﻼً ﺳﻤﺎﺣﺘﻚ ﻣﺎﻓﻲ ﺯﻳﻬﺎ ﻓﻲ ﺍﻟﻌﺼﻮﺭ ﺍﻟﻬﺴﻲ ﺩﻱ .. ﺇﻧﻚ ﺗﺜﻖ ﺇﻧﻚ ﺇﺫﺍ ﺷﺎﻓﻚ ﺑﺸﺮ .. ﺡ ﺗﺠﻬﺠﻬﻮ ﺡ ﺗﺠﻬﺠﻬﻮ .. ﺇﻧﻚ ﺇﺫﺍ ﺍﻟﻨﺎﺱ ﻗﺎﻟﻮ ﻟﻴﻚ ﻣﺎﻓﻴﻚ ﻃﻌﻢ .. ﺡ ﺗﻌﺬﺭﻫﻢ ﺩﺍ ﻷﻧﻮ ﻣﺎﻋﺮﻓﻮ ﺍﻟﻔﻬﻢ .. ﺇﻧﻚ ﺗﺜﻖ ﻓﻲ ﺃﻱ ﺣﺎﺟﺔ ﺑﺘﻌﻤﻠﻬﺎ .. ﺗﻠﺒﺲ ﻛﻤﺎ ﺑﻘﺮﺭ ﻣﺰﺍﺟﻚ ﻛﻴﻒ ﺗﻜﻮﻥ .. ﻭ ﺗﻜﻮﻥ ﻋﻴﻮﻧﻚ ﻫﻲ ﺍﻟﺤﻜﻢ .. ﻭﺡ ﺗﺸﻴﻠﻮ ﻛﺎﺱ ﺩﻭﺭﻱ ﺍﻟﺴﻌﺎﺩﺓ ﺍﻟﻌﺎﻟﻤﻲ .. ﺗﻨﻀﻢ ﻛﻤﺎ ﻟﻮ ﻛﺎﻥ ﻟﺴﺎﻧﻚ ﻧﺺ ﻣﺘﺮ .. ﻟﻮ ﻗﻠﺖ ﺻﺎﺡ ﻗﺪ ﻛﺎﻥ ﺑﻬﺎ .. ﻟﻮ ﻏﻠّﻄﻮﻙ ﺷِﻦ ﻋﺮﻓﻬﻢ .. ﻫﺬﻱ ﺍﻟﺤﻴﺎﺓ ﻣﺎﺑﺘﺤﺘﻤﻞ ﺇﻧﻚ ﺗﻘﺎﺿﻲ ﻋﺰﻳﺰ ﻋﻠﻴﻚ .. ﻓﺄﺣﻜﻢ ﺭﻭﻳﺤﺘﻚ ﺇﻻ ﺑﺲ ﻣﺎﺗﺤﺎﻛﻤﻬﺎ .. ﻭﻣﻤﻜﻦ ﺇﺫﺍ ﺣﺎﻛﻤﺘﻬﺎ .. ﺗﺒﻠّﻮ ﺍﻟﻘﺮﺍﺭ ﻓﻲ ﻣﻮﻳﺔ ﺣﺎﺭﺓ ﻭﺗﺸﺮﺑﻮ .. ﺃﻭ ﺗﻜﺸﺤﻮ ﻫﺬﺍ ﺍﻟﻨﺪﻡ .. ﺇﻥﺍﻟﻨﺪﻡ ﻣﻌﻨﺎﻭ ﻧﺪﻡ .. ﺇﻥ ﺍﻟﻨﺪﻡ ﻟﻮ ﻛﺎﻥ ﺃﻛﻞ ..ﺯﻱ ﻛﻮﻡ ﻗﻄﻦ ﻣﺎﻓﻴﻬﻮ ﻓﺎﻳﺪﺓ ﻭﻻﻃﻌﻢ .. ﺟﻠﻴﻬﻮ ﻳﺎﺥ .. ﺍﻟﻨﻮﻡ ﺟﻤﻴﻞ ﻟﻮ ﻛﺎﻥ ﺟﻤﻴﻞ .. ﻓﺄﻓﻀﻞ ﺇﺫﺍ ﻣﻤﻜﻦ ﺗﻤﻄّﻖ ﺷﺨﺮﺗﻮ .. ﺣﺘﻰ ﺍﻟﺴﻬﺮ ﺯﻱ ﻭﻧﺴﺔ ﺟﻮﺓ ﺍﻟﺮﻭﺡ ﻣﻊ ﺍﻟﺰﻭﻝ ﺍﻟﺴﻤﺢ .. ﺳﺎﻫﺮ ﺇﺫﺍ ﺍﻟﺼﺤﻴﺎﻥ ﺳﻤﺢ .. ﻭﺃﺿﺤﻚ ﻋﻠﻲ ﺍﻟﺤﺎﺻﻞﺷﺪﻳﺪ .. ﺃﺑﻜﻲ ﺇﺫﺍ ﺍﻟﺒﻜﺎ ﺑﺒﺴﻄﻚ .. ﺇﻥ ﺍﻟﻤﻬﻢ ﺃﻥ ﺗﻨﺒﺴﻂ .. ﺣﺘﻰ ﺗﻜﻮﻥ ﺍﻷﻛﻠﺔ ﺫﺍﺗﻬﺎ ﻣﺴﺒﻜﺔ .. ﻭﺣﺘﻰ ﺃﺟﺎﻭﺏ ﻟﻠﺴﺆﺍﻝ .. ﻓﻬﺬﻱ ﻏﻨﺎﻭﻱ ﺍﻟﺨﺴﺘﻜﺔ ..

#نظام_الدين

أصليه كيف الزولة دي ..!!

ما بتلقى ليها ولا محل .. لو قلت داير تعربا ..
او تقرأ في البينكم وصف .. لامن تقرر تكتبا ..
بي سواتا بتألف كتاب .. صفحاتو ما أظن تحسبا..
بتحير القاموس عديل .. وكل القواعد تقلبا ..

أصليه كيف الزولة دي ..!!

لو كفكفت قميص الخوة ليك .. بتدق معاك طوب التعب ..
وتشيل كواريكا وتجيك .. في ملاطم الزمن الصعب ..
وتجر خيوتا عليك وفا .. بكرات صدق ما خيوت عصب ..
من غير رسومات خرطتك .. تبني التدورو زي العجب ..

أصليه كيف الزوله دي ..!!

تمسك مكان أجمل حبيبة .. إذا حبيبتك فاتتك ..
وتسد محل أجدع فرد .. لو يوم ظروفك خانتك ..
ما بتسألك خبرك شنو .. وتدق طناش من قصتك ..
من غير تفكر في الكلام .. تلقاها جاتك حتتك ..

أصليه كيف الزوله دي ..!!

دغريه واضحه بدون رتوش .. ضكرانه.. ما بتعرف تدوش ..
يا فرده.. أوضاعك تمام ؟.. انا شكلي محتاج لي قروش ..
تضحك تقوليك يا فقر .. فلستا بي ..
وتدخلك في الشنطه توووش ..

أصليه كيف الزوله دي ..!!

تحكيلا عن وجع السباق .. لامن تضايقك صهوتك ..
عن كونو كيف الدنيا كيف .. قلبت نخاسه وباعتك ..
عن حالك الدور نزيف .. وقدر بلادك جرحتك ..
عن الخريف الما بقيف .. وعن اللواري الخلتك ..

أصلي كيف الزوله دي ..!!

لو إشتهينا ملاح سمح .. بتسوقنا بيتهم وحلتا ..
بنلاقي في بيتهم هناك .. أما ..وابوها.. وعمتا ..

ولامن تكون زولة عرس .. نحنا البنحرس حنتا ..
نحنا النشيل فوقنا العريس .. ونحنا البنكتم حفلتا ..

أصلية كيف الزولة دي ..!!

..
الجميل ..
#نظام_الدين
..
...