شوفو التناقضات الفي العلاقات
- البت عايزه عريس بصلي الصلوات ال 5 في المسجد وعلي خلق
وهي بتحب واحد معشمها بالزواج وهو بتكلم معاها 24 ساعه في اليوم من غير مايقوم يصلي 👉 تناقض
-الولد عايز حبيبتو تقطعها مع كل الاولاد حتي اولاد اهلها بس هو مابقدر يقطعها مع زميلاتو وصاحباتو من الجامعه والفيس 👉 تناقض
-البت ماعايزه عرس اقل من عرس صاحبتها الكلف 800 الف (مليون بالقديم) بس هي بتحب واحد مرتبو 800 ج يعني محتاج يلم مرتب 800 شهر من غير ماياكل ولايشرب يعني تقريبا 66 سنه من غير اكل ولاشراب 👉 تناقض
-الولد يحب ويتكسر في بت دفعتو في الجامعه ونفس عمرو تقريبا وبعد 4 سنه هي تحس نفسها بايره وكايسه عريس وهو بفتش لي محل يقضي فيهو الخدمه الوطنيه وما لاقي 👉 تناقض
-البت تعمل علاقه بطاله مع ولد قبل الزواج وتقول الخائن ماعرسني ، والغريبه البنات يتعاطفوا معاها
ده اسمو زنا والاتنين مفروض يتجلدوا 100 جلده بغض النظر هو حلف ليك انو حيعرسك ولا عمل شنو
وربنا قال "والزانية والزاني.... ) يعني ماقدم البت عبث لانو الموافقه عليها هي وجايز الاغراء منها كمان وفي السرقه قال"(السارق والسارقه) لانو كسب العيش علي الرجل
-البت عارفه الخلوه بالرجل حرام بس عايزه تقعد معاهو في العربيه باليل ولا في بيت فاضي ولا حته ميته عشان يحلو مشاكلهم 👉 تناقض
-الولد يعمل السبعه وزمتها ومايخلي دابه في الارض الا ويقل ادبو معاها بس لمن يتزوج عايز مرا بطهارة مريم
لا يا اخوي طيب البنات الانتا خربتهم ديل يمشو للناس المحترمين لا يا حلو انتا حيجوك بنات خربهم غيرك إلا تتوب والله اعلم
-المتزوجه عايزه تعمل علاقه وتحب كمان من ورا زوجها بدعوي انو زوجها ما رومانسي وماشغال بيها لا كمان بتحب وبتغير
الحياة مامشت مع زوجك اتطلقي اخير كلام الناس من غضب ربنا ومن الرجم
#عارفين
عمرنا ما حنكون في علاقات سليمه ومعافاة لو ما حلينا التناقضات دي 👆👆
#نفس_الدواء_بس_شركه_تانية

(هوهوا ) وحلات الزول في الطول والعلا

غايتو بس نقول الحمد لله ...في ناس كده قاعدين معانا ساااكت بي ( اجسادم ) ذي مابقولو ...!!! ( وروحم ) دي لافه ليها في حتات تانيه ...!!! ذي ( أميره ) بت حلتنا دي ..
غايتو البت دي فاكاها في روحا فكا....!! الجماعه سامنها أميره ( فلقصه) ....!! ماقاريه ليك اي زول هنا ...!!! قالت اولاد الحله مبشتنين ....!! 😳 ...!! دي اخرتا يا اميرة ....!! نحنا مبشتنين ..!!!عامله قدومك الزِّي ( السمبريه ) ده .....!!
اها ( أميرة ) دي عندها مشكله كبيره ...!! لافه ليك في الانترنت ده من بلد لي بلد ....!!! تحضر في الأفلام ....!!! وتتابع في النجوم ....لما صدقت انها واحده منهم ...!!! وشختت لينا ...!! فنانا المفضل ( تامر حسني ) ...لما يغني وتقول كده تغرود ليك العيون ...!! تحلف تقول بغني ليها ...!! قالت اكلتا المفضله مكرونة بالباشميل والله انا متاكد هي ذاتا ماعارفا ( الباشميل ) ده صلصه ولا دبابه ...!! سعيده جدا وتفتخر انو هي اصلا ماشغاله بالناس ..!! وماعندها شي لي زول في الحله دي ...!! ( اللهم انعم واكرم ..) ...ياها دي أميرة ...!!!

اها اليوم داك جايه المغربيه كده ماشه ليك علي بيتم تتقدل ....!!! شايلين الشنطه ....!! ورافعين النضاره دي في في نص الراس ..!! ( المعني الشمس غابت ولا مجال للنضاره الشمسية...!!! لكن كنتا لابساها قبيل ) ...!! قلنا تمام ...!! والسماعات مقزوزه في الاضنين...!! (تامر بكون عامل عمايل ) وقااادله ...!!! تتهوزز ....!!!

اها الوقت داك ( كلب ) ناس حاج التوم ده راقد كده جنب الحيطه ....والظاهر مامتغدي ..!! وزهجاااان ..!!! ممدد ليك رجلينو القداميات ديل في مويه كده ...وتاكل فيهم راسو ....!!! ( يكون حران ود الكلب ) ...!!! مشغل ليك ليك عين واااحده وطافي التانيه ..!!! ويكشف في الناس الماشا دي ...!! القرفه ظاااهره ...!! ولا داسيها ...!!! ياربي الكلاب دي بتكون عرفت كيلو اللحمه ده وصل تسعين ....!!! غايتو الشايفو انا ( الكلب ) ده ذي العارف كده ....!! ( دي قرفة لحمه) ...!!! يمعط في النجيله ...!! ( أوعي يكون بقي نباتي بس ) ...!!! المهم يازول (الكلب ) ده في زهجتو دي .....!!! الكونتيسة أميرة جات مارا بي جنبو ....!!! اها مع الحاله الهو فيها دي ..اظنو ذي حبا يعمل ليهو حركه كده..!! و جو ...!!! بس اداها ليك ( هوهيوه ) صغيره كده ...!!!النوع العادي داك حتي ولا قام من رقدتو دي ...!!! يعني المعني نحنا هنا..!!! والحله محروسه ..!!! وحركات الكلاب دي..!!

المهم (أميرة )مع السماعات الدارعاها دي ومندمجة مع ( تامر ) ...!!! مااشتغلت بيهو الشغلا ....!!! الظاهر ( الكلب ) ده ذي اتحسس شويه كده ..!!! كييف البت دي تحقر بيهو وما تعبرو ...!! وقال كده قام عليها ...!!! اول حاجه جا جاري عليها براااحه ..!!! الجكه الخفيفه بتاعة لاعبين الكوره ديك لما يسخنو ..!! ومدلدل اضنينو ...!!! اها اول ماقرب منها ...!! شافتو اتخلعت ..!!! وقولة ...!!! ( هوهوهوهو ) (المره دي قويه شويه ) ...!!! والله ياخوانا السماعة في جها ...!! والموبايل ده طار فوووق ....!!! ( غايتو تامر بكون مات ) ...!! والنضاره دي اصلا ما اتعرفت وين ...!! والشنطة دي اتفتحت واتجدعت هناااك ...!!! والحاجات اتدفقت لما الواطا ذاتا اتمكيجت..!! وأميره دي جرت ليها ذي مترين كده واتسمرت ماقادره تجر رجل ...!!! بس نسمع ليك ....وااااااي ..!! الحقوني ..!! جر جر جر ...(الجيم المره دي دلجه بس ..! زمان كانت معطشه ) ..!!

والله ياخوانا نحن متكلين قدام الدكان جينا جارين ذي (المطافي ) ردعنا ليك ( الكلب ) الحيوان ده ...!!! وقومناها من الواطا تتنفض ...!!! والدموع دي ماليا الوش ....!!! والفستان مليان تراب ...!!! ونلقط في الحاجات ...!! ونفتش في النضاره ...!!! حادث بس ...!! المهم لملمت حاجاتا ووصلناها لحدي خشم الباب قالت لينا شكرًا... شكرًا ...ترجف من الخوف ...!!! ودخلت ...!!!
اها يا ( فلقصه ) عشان تعرفي بس الدنيا دي مادوامه...!!! والناس بالناس ..!!! هسه لو ما ( المبشتنين ) ديل الليله الكلب ده ماكان خلاك ( سجوك ) ...!!! غايتوالليله ( الكلب ) ده اصلو ما احترمك ....!!! مع انو ( كلب ) ناس حاج التوم مشهود ليهو في الحلة دي بالأدب والنزاهه...!!! حدو ( الهوهوا ) دي ..!! مرات كتيره بنجي نص الليل مارين بي جنبو طوالي بكبها لينا ...!!! والله لمن بنبشر فيهو ....!! و عمرو ماسكا زول ...!! ولا غلط علي زول ...!!
يكون حسا بيك يا ( فلقوص ) ..!!؟؟؟ كدي استغفري ...!!!

عزيزي المستهلك:

عندما تشتري موبايل صيني مقلد ب 500 جنيه بيعدي معاك بالكتير سنة وتنتهي صلاحيته، لأنو مصمم علي إنو ما يعيش كتير عشان تشتري تاني وتالت وبنفس السعر، وقيس علي كدا كل الواردات الصينية من أدوات كهربائية وإلكترونية وملابس واكسسوارات وأدوات تجميل ولعب أطفال وغيرها ..
في الصين ممكن يصنعو بضاعة صينية جيدة جدا وغالية وممكن برضو يصنعو بضاعة رديئة جدا ورخيصة وممكن يقلدو أي منتج إبتداء من سجاير برنجي محلية الصنع، وليس إنتهاء بموبايل نوكيا من إنتاج شركة (أو كينج).. وكل دا لأنو في فوضي صناعية عارمة في الصين ومنظمة التجارة ما قادرة تضبط معظم المنتجات المقلدة ولا قادرة تفرض عقوبات علي المصنعين..
الحل الاستخدمتو معظم الدول هو حظر المنتجات المقلدة والرديئة وضبط الواردات الصينية بمنظومة مواصفات ومقاييس صارمة ودا لإجبار الموردين عشان يختاروا توريد البضاعة الجيدة حتي وإن كانت غالية..
في بلدنا السوق غرقان في البضايع الصينية المقلدة والناس بتشتري والموردين مستمرين في طلب الأردأ والأرخص ودا لسببين، الأول لأن ثقافة المواطن الإستهلاكية متدنية جدا وما عندو وعي بالخيارات المطروحة وأضرارها الإقتصادية وتأثيرها علي دخلو، والسبب التاني لأن الدولة والموردين جاهلين بكيفية تقدير حاجات السوق ولأن الموردين بيسعوا للربح السريع بإشباع حاجة المستهلك بدون النظر للأضرار المترتبة علي الموضوع دا..
دي الأضرار الإقتصادية لكن الأضرار الصحية أسوأ من كدا بكتير، فالمنتجات الصينية رخيصة لأنها رديئة وسبب رداءتها هو لأنها مصنوعة من مخلفات مواد ضارة بالبيئة وتشكل خطرا علي صحة الإنسان، فالاكسسوارات والهواتف وحتي الملابس مصنوعة من مواد عالية الخطورة وقد حذرت منها منظمة الصحة العالمية بإعتبار أن بعضها يشكل مصدرا أساسيا للسرطان والحساسيات الجلدية..
*لا تشتري هاتفا صينيا مقلدا وإن كان رخيصا..
*لا تستعملي مكياجا صينيا أو تلبسي اكسسوارات صينية..
* كونوا آمنين.. لا تخاطروا بصحتكم..
* حافظوا علي أموالكم .. لا تهدروها في ما يضركم ..

تجمع طلاب الجامعات السودانية انضم الي طلاب جامعتك

الي اين انت ذاهب يا سودان ؟؟؟؟؟
جاءت تحمل طفلا رضيعا الي دار الاطفال لاحظوا علي يديها اثار الحناء والزينه السودانيه وضعت الطفل علي السرير وطلعت مسكوها جنب الباب تعالي هنا انت ماشه وين ؟ قالت ليهم جبت ليكم الطفل قالوا ده ولد منو ؟ ردت ولدي ابوه طردني من الشقه ومافي مكان اضع فيه ولدي اتخلعوا من كلامها وقالوا تمشي المحكمه طوالي تطالبي بي النفقه والسكن انهارت وقالت ليهم انا تزوجت عرفي كتبنا ورقه وهسه شرطها ورماها لي فى وشي وقال هو عايز يعيش مع واحده ما تلد منه انا اصلا طالبه جامعيه يوم اسود لما عرفتوا قال لي بصرف عليك لغايه ما تخلصي الجامعه لكن نتزوج عرفي وتزوجنا وانجبت الولد ده ومن المستشفي خلاني لما رجعت الشقه لقيتها مقفوله وقفل كل الارقام حقته جيتكم هنا طوالي ما عندي حته امشي ما بقدر امشي اهلي صعبين ممكن يقتلوني قالوا ليها كدي هسه رضعي ولدك لغايه ما نعمل ليك الاجراءات لازم تتعمل اولا لازم المحكمه تحكم عليك بي اربعين جلدة المحكمه فى نفس الدار اتجلدت الاربعين جلده وكملوا باقي الاجراءات وقعدت معاهم وبعد شهرين قالت ماشه اهلها سافرت لاهلها بعد كم يوم اتصلوا عليها ان ابنها مات اكيد الاهمال وعدم الغذاء سبب فى الموت الاطفال
لاحظوا يا بنات الخسران الوحيد فى القصه دي البنت فقدت شرفها وكرامتها وقاموا عليها حد الزنا لان الزواج العرفي زنا مافيه شهود ولا ولي والراجل العمل فيها كده هرب منها وخلاها براها تواجه المصير وهو ما اقاموا عليه حد الزنا يمشي تاني يغش ضحية جديدة يدمرها ويحطمها لكن يمشي من ربنا وين يمهل ولا يهمل وكما تدين تدان والديان لا ينام
في نوع جديد من الفسوق والفجور بيمارسوه بعض من الرجال فاقدين الوازع الديني وعدم الخوف من الله يعني القوادين يجيبوا بنات ويغروهم بالقروش الكثيره ويمشوا مزرعة فيها رجال عجائز وظيفه البنات رفع معنويات العجائز ديل مقابل مبالغ ماليه ضخمه ويطمئنها بأنه لا حتفقدي شرفك ولا حتحملي سفاحا حكوا عن المزرعه دي قالوا كانك فى بلاد الخارج من جمال المزرعة لكن الموجودين فيها فاسقين
فى بعض من الرجال ما عندهم وازع ديني ولا غيره علي العرض والشرف عندهم بس المصلحة يعني جبت ليك شغل دايره شنو تاني مش اديتك ملاين من الجنيهات
حسبي الله ونعم الوكيل فيهم
انا مابلوم النوع ده من الرجال براهم برضو البنات غلطانات ما مفروض يمشوا مع النوعيه دي من الرجال
في بنات كتار شغالات وبيقران فى الجامعه بشتغل شغل حلال ما بيجرن للحرام مثلا الطالبه الجامعية البتشتغل فى البيوت كتيرات بشتغلن فى البيوت وبتطلع مصاريفها كامله ما بتبيع شرفها وفى كمان الطالبة الجامعيه تقوم الفجر تعمل اللقيمات وتبيعيها فى داخليه البنات برضو بطلع مصاريفها من بيع اللقيمات الشغل الشريف موجود لكن بعض البنات الله يهديهن بيمشن للشغل السريع الجاهز
والمشكله والكارثه الكبيرة صديقات السوء خربن حياة بنات كتار تقول ليها تعالي اشتغلي معاي يوم واحد تدق ليك غويشه دهب
توخن الحذر وابعدن من صديقات السوء
الله يهديهم ويصلح حالهن
مستاءه شديد من البسمعه
الله المستعان
حنان النقر

انا ماعندي اي مشكله مع البنات والله
بس شايف انو الزواج الزمن ده
فاشل!!!!!! للاسباب دي 👇👇
قول_ليكم
اول حاجه معظم الشباب المتزوجين الانا بعرفهم
اتزوجوا بس عشان نقة الناس
ومعظم البنات المتزوجات الانا بعرفهم اتزوجوا عشان
عايزين يعملوا ذي ماصاحباتهم عملوا او عشان كلام الناس برضو

عن نفسي
مستحيل الم لي ناس ساعتين في صاله
عشان النسوان يملوا كروشهم ويختو يدينهم فيها ويقعدوا يقطعوا فيني انا ومرتي
مستحيل اخلي اهل مرتي يرسلوا لي "فطور عريس" في ايام بيتنا غير الاكل مافيهو اي شي
مستحيل وتاني مستحيل مرتي تقول عايزه ترقص عريانه قدام النسوان وانا اكون قاعد وبنات اهلها "غير محارم بالنسبه لي" برضو لابسين شاذ للتأكيد تاني مستحيل
عايزه ترقص بجيب ليها بدلة رقيص وتوريني شطارتها في بيتنا

مستحيل دشليون مره ايام شهر العسل مرتي تكون لابسه خفيف وشفاف وقصير والحاجات دي ونحنا في الشارع لانو بت الحلال دي انا عايز استرها ما اعرضها 👌

الزواج
مؤسسه وحفظ للنفس وتوجيه للشهوات بشكل يرضي ربنا
واتمام للدين 👌 وتحقيق غاية التكاثر لامة النبي محمد صلى الله عليه وسلم
ما "ربه ونطيط ورقيص وكشيف اعراض وكشيف حال"

الليله جاني صاحبي عريس ما تم شهر وعايز يخون مرتو وداير اطلقه

وده 👆 بسبب انو هو ماعارف اتزوج لي شنو ولا عارف عقوبتو شنو بعد الزواج "الرجم"

بدل الناس تعديها الاتفاق علي صاله وعلي شيله من دبي وعلي شهر عسل في الطاش الطاش اتخيل لي احسن لو اتفاهمو علي المفاهيم دي ☝
90% من الناس العرسوا ماعارفين انو ليلة الدخله مفروض يصلوا ركعتين قبل اي شي وماعارفين بدعوا فيها وبقولوا شنو
معظم الرجال ماعارفين قبل الجماع مفروض يقول شنو عشان الشيطان مايشاركو
معظم النساء ماعارفات انو مفروض قبل ماتنوم تقول لي زوجها "ا لك حاجه؟؟"
بقينا مجتمع لت وعجن ومظاهر وتقليد اعمي وماعارفين نحنا بنعمل في شنو الا من رحم الله "ربنا يجعلنا منهم 👐"
وعليك دينك مهما تبقي وهميه ماتسمي نفسك "بايره"
وعليك دينك مهما تبقي وهمي ماتعشم بت باسم الزواج
ولا ابقي راجل قدروا ولا خلي القادر يتمو
💔

#استان

ﻛﺎﻥ ﺑﺮﻳﺪﻧﻲ " ﻓﺠﺄﻩ " ﺳﺎﺑﻨﻲ " ﻭﺣﺐ ﻏﻴﺮﻱ "
ﻗﻠﺘﺎ ﻟﻴﻬﻮ ﻋﺪﺩﺩﺩﺩﺩﺩﻳﻠﻪ " ﺍﻣﺸﻲ "
ﻣﻦ ﺟﻮﻩ ﻗﻠﺒﻲ ﻭﻣﻦ ﺿﻤﻴﺮﻱ "
ﺟﻮﻧﻲ " ﻧﺎﺳﻮ " ﻭﻗﺎﻟﻮ " ﻟﻴﺎ
ﻻ ﺑﺘﺤﺴﻲ " ﻭﻻ ﺑﺘﻐﻴﺮﻱ؟؟؟؟؟؟؟
ﻗﻠﺘﺎ ﻟﻴﻬﻢ ﺯﻭﻝ ﺑﻴﻔﻬﻢ
" ﻭﺍﺻﻠﻮ ﺣﺮ ﻳﺎﺥ ﻓﻲ ﺣﻴﺎﺗﻮ
ﻟﻴﻪ ﺃﻏﻴﺮ ﺷﺎﻥ ﺣﺐ ﻏﻴﺮﻱ
ﻭﻟﻴﻪ ﺍﺣﻄﻢ "ﺍﻣﻨﻴﺎﺗﻮ
ﺍﻟﻘﻨﺎﻋﻪ " ﺍﻟﻌﻨﺪﻱ " ﻛﺎﺍﺍﺍﺍﻓﻴﻪ "
ﻓﻲ ﺷﻨﻮ ﺍﺫﻋﻞ ﻭﻟﻴﻴﻴﻴﻴﻴﻪ ﺫﺍﺗﻮ "؟؟؟؟؟؟؟
ﻻ ﺣﻴﺎﺗﻲ ﻋﻠﻴﻬﻮ "ﻭﻗﻔﺖ "
ﻻ ﺍﻟﺮﺟﺎﻝ ﻣﻦ ﺑﻌﺪﻭ "ﻣﺎﺗﻮ
ﻭﻣﺮﺕ ﺍﻻﻳﺎﻡ ﻭﻋﺪﺕ "
ﺭﻭﺣﻲ ﻫﺎﺩﻳﻪ " ﻭﺍﺳﺘﻜﺎﻧﺖ "
ﻻ ﺳﻬﺮﺕ " ﻭﻻ ﺗﻌﺒﺖ
" ﻻ ﻋﻠﻲ ﺍﻟﻔﺮﻗﻪ " ﺑﺎﻧﺖ "
ﺭﺍﻳﻘﻪ " ﻭﺍﻟﻬﻢ ﻣﺎﻏﺸﺎﻧﻲ "
ﻭﻛﻞ ﻟﺤﻈﻪ ﻓﻲ ﺭﻳﺪﻧﺎ ﻫﺎﻧﺖ
ﻭﺑﻴﻦ ﺣﻘﻴﻘﻪ " ﻭﻣﺎ ﺣﻘﻴﻘﻪ "
ﻭﻻ ﺑﺤﻠﻢ ﻳﺎﺥ ﺍﻇﻨﻲ "
ﺟﺎﺗﻨﻲ ﻭﺣﺪﻩ ﺑﺮﺍﺍﺍﺍﺍﻫﺎ " ﺗﺤﻜﻲ "
ﻭﻗﺎﻟﺖ ﺍﺻﻼ ﺷﺎﻟﺒﻪ "ﻣﻨﻲ!!!!!!
ﺿﺤﻜﺘﺎ " ﺿﺤﻜﻪ " ﺷﺪﻳﺪﻩ ﺟﺪﺍ
ﻭﻓﺠﺄﻩ " ﻗﻤﺘﺎ ﺑﻘﻴﺖ ﺍﻏﻨﻲ "
ﻗﻠﺘﺎ ﻟﻴﻬﺎ ؟؟؟؟
ﻋﺎﺭﻓﻪ ﻳﺎﺧﻲ ﻭﺍﻟﻠﻪ ﻋﺎﺍﺍﺍﺍﺍﺍﺍﺭﻓﻪ "
ﻣﻦ ﻣﺎ ﺟﻴﺘﻲ " ﻭﺷﻠﺘﻲ " ﺭﻗﻤﻮ
ﺻﺪﻗﻴﻨﻲ ﺍﻟﻘﻮﻝ ﻭﺻﻠﻨﻲ!!!"
ﻭﻋﺎﺩﻱ ﺟﺪﺍ ﻟﻴﻪ ﻣﺎﻳﻬﻮﺍﺍﺍﺍﺍﺍﻙ "
ﻟﻴﻪ ﻣﺎﻳﻬﻮﻭﻭﻭﻭﻭﺍﻙ
ﺑﺸﺒﻬﻚ، ﻭﺍﻟﺮﺏ ﻳﻬﻨﻲ !!!!
ﻟﻮ ﻣﺎﺍﻟﺴﻌﺎﺩﻩ ﻧﺼﻴﺐ ﻭﻗﺴﻤﻪ
ﻛﺎﻥ ﻧﻔﻊ ﺍﻟﻤﺤﺒﻴﻦ ﺍﻟﺘﻤﻨﻲ
ﻭﻣﺎﺑﻘﻴﻒ " ﺍﻧﺎ ﻓﻲ ﺳﻌﺎﺩﺗﻚ "
ﻳﻮﻡ ﺧﻄﻮﺑﺘﻚ " ﺍﻭﻋﻰ " ﺗﻨﺴﻲ
ﻛﻠﻤﻲ " ﺍﻟﺒﻨﻮﺕ " ﻳﺠﻨﻲ!!"
ﻭﺍﻧﺘﻈﺮﺗﺎ ﻭﻣﺮﺕ ﺍﻻﻳﺎﻡ ﻭﻋﺪﺕ
ﻗﻠﺘﺎ ﻳﻤﻜﻦ ﻫﻦ ﻧﺴﻨﻲ "
ﻣﻌﻘﻮﻟﻪ " ﻳﺎﺥ ﻫﻦ ﻧﺴﻨﻲ "
ﻫﻤﺸﻨﻲ " ﻣﺎﺑﺠﻨﻲ " ﻭﻳﻌﺰﻣﻨﻲ؟؟؟؟؟؟
ﻭﻛﻨﺘﺎ ﺑﻤﺸﻲ " ﺑﻤﺸﻲ ﻣﺸﻴﻪ
" ﻻ ﻣﻜﺎﻭﻭﻭﻭﻩ " ﻭﻻﻫﺎ ﻏﻴﺮﻩ "
ﺑﺲ ﺃﺷﺎﺭﻙ ﻏﻴﺮﻱ ﻓﺮﺣﻮ "
ﻣﺎ ﺍﻟﺪﻧﻴﺎ ﻟﺴﻪ "ﻛﻤﺎﻥ ﺑﺨﻴﺮﻫﺎ
ﻭﺍﻧﺎ ﻛﺎﻥ ﻋﻠﻲ ﺑﺠﻴﺐ ﺷﺎﻛﻴﺮﺍ
ﻋﺸﺎﻥ ﺗﻐﻨﻲ ﻭﺗﺒﻘﻰ ﻓﺮﺣﻪ
ﻛﻤﺎﻥ ﻛﺒﻴﻴﻴﺒﻴﺮﻩ ﻣﺎ ﺩﻱ ﺍﻻﻣﻴﺮﻩ "
ﺷﻔﺘﻮ "ﻛﻴﻒ ﺍﻧﺎ ﻳﺎﺥ ﺧﻄﻴﻴﻴﻴﺮﻩ "
" ﺑﺲ ﻭﺣﺎﺗﻜﻢ " ﺍﻟﻠﻪ ﻏﺎﻟﺐ
ﺍﻟﻠﻪ ﻏﺎﺍﺍﺍﺍﺍﺍﺍﺍﺍﺍﺍﻟﺐ
ﺍﻟﺒﺸﻴﻞ " ﺣﻘﺎ " ﻣﺎﺣﻘﻮ "
ﺑﻜﺮﺍ ﺑﺒﻘﻰ " ﺭﺟﺎﻫﻮ " ﺧﺎﻳﺐ
ﻧﺎﺱ ﺑﺘﻘﻠﻊ ﻭﻧﺎﺱ ﺑﺘﺸﻠﺐ
ﻭﺩﻧﻴﺎ ﻓﻴﻬﺎ ﺟﻨﺲ ﻣﺼﺎﻳﺐ
ﻭﺍﻧﺎ ﻏﺎﻳﺘﻮ ﺷﻔﺖ " ﺟﻨﺲ ﻋﺠﺎﺋﺐ "
ﻭﺍﻟﻌﺠﻴﺒﺒﺒﺒﺒﻪ " ﻫﻮ ﺟﺎﻧﻲ ﺭﺍﺟﻊ
ﻳﺎﻫﻮ ﺫﺍﺗﻮ !!!!!! "
ﺟﺎﻧﻲ، ﺭﺍﺟﻊ " ﻳﻮﻡ ﺑﺮﺍﻫﻮ "
ﻗﺎﻝ ﻟﻲ ﺍﻧﺘﻲ ﺣﺒﻴﺒﺘﻲ " ﺍﺻﻼ "
ﻭﺍﻧﻮ ﺭﻳﺪﻱ ﺳﻜﻦ ﺩﻣﺎﻫﻮ
ﻗﻠﺘﺎ ﻟﻴﻬﻮ " ﻭﺣﺎﺗﻚ " ﺍﺳﻔﻪ "
ﻗﻠﺒﻲ ﺭﻳﺪﻙ ﺟﺪ ﻧﺴﺎﻫﻮ "
ﻻ ﺷﻠﺒﺘﺎ " ﻭﻻ ﻧﻲ " ﺑﺸﻠﺐ "
ﻗﻠﺒﻲ ﺑﻌﺸﻖ ﺑﺮﺿﺎﻫﻮ "
ﺍﺗﻮﻛﻞ " ﺍﻣﺸﻲ ﻃﺮﻳﻘﻚ
ﺍﺧﻀﺮ " ﺑﺘﻠﻘﻰ، ﻏﻴﺮﻱ
ﺗﻌﻴﺶ ﻣﻌﺎﻫﻮ "
ﻋﻨﺪﻱ ﻗﺎﻧﻮﻥ "ﺍﺳﻤﻮ ﻋﺰﻩ "
ﻣﺎﺑﻨﺰﻝ " ﻣﺴﺘﻮﺍﻫﻮ "
ﻏﺎﻟﻲ ﻗﻠﺒﻲ ﻋﻠﻲ ﻭﺣﺎﺗﻚ "
ﻣﺎﺑﺨﻮﻥ " ﺯﻭﻻ ﻫﻮﺍﻫﻮ "
ﻭﻟﻤﻦ ﻳﻘﺴﻰ ﻣﺤﺎﻝ ﻫﻮ
ﻳﺮﺟﻊ "ﺗﺎﻧﻲ ﻟﺰﻭﻻ " ﺍﺑﺎﻫﻮ "

إلي ربات البيوت والخدور ( فقط) أهدي هذه الطبخه الدّسمه .
قبل أيام ذهبت إلي سوق بحري الكبير للتسوق وشراء بعض مستلزمات البيت والمطبخ .بعد أن تجولت بالسوق عطفت علي زنك الخضار ووقفت بجانب تجار البصل سألت عن سعر الربع فردّ علي أحدهم الجديد بتاع الموسم دا الربع ب75 جنيهاً أما القديم بتاع الموسم السابق الربع ب85 جنيهاً. فسألتهم بفضول شديد عن فرق السعر بين القديم والجديد من أين أتي ؟ وكنت بالطبع أتوقع رداً اقتصادياً مقنعاً فردّوا علي أتي منكن شخصياً ياستات البيوت. فعقدت حاجبي الدهشه وارتفع امبير فضولي لاعلي درجه وأعدت الإستفسار ؟ فأخبروني بأن ربات البيوت يكثرن من طلب البصل القديم فلما استفسروهن عن السبب ردّن عليهم ستات البيوت الشاطرات بكل براءه بأن السبب يكمن في أنّ البصل القديم يستهلك زيت أقلّ في النّار من البصل الجديد ويوفّر الزيت( بمعني أنه بطول الزمن يتبخر ماؤه ويجفّ بعض الشئ) .فما كان من تاجر البصل اخو الأخوات الانتهازي الواعي الا أن وضع فرق السعر بتاع الزيت برفع سعر البصل القديم.. الزول اقتصادي كبير ودي فرصته طبعاً . وهكذا يا إخواتي يادقوسات دفعتن تمن صراحتكن وتلقائيتكن ودفعتن تمن الزيت الموفّر في البصل القديم . وطلعتن مغفلات نافعات .نتمني ليكن حلة طبيخ مسبّكه ونايره .
كلمه. اخيره خليكن صميمات و خفة الخشم مااااااحبابا ، الجماعه ديل خطيرين وبتاعين فرص وبيستغلوا أي ثغره ضدنا ولصالحهم . مع تحياتي .
سعاد السناري

لو انتي خايفه علي اضيع انا كل حياتي معاك ضياع لو قالو بي شمسك اعيش اوعك ترسلي شعاع ماعندي كلمه اقولا ليك لاتاني بفرد ليك شراع مافي ايدي الا اودعك وماعندي قدر علي الوداع

سواقة

زمان قلت لي امي ماشة الفزع زي البنات امي حمتني قالت بخاف عليك تقرصي ولا تمشي على البحر وتغرقي المهم بعد بكيت شديد خلتني مشيت
اها انا ألقط في الحطب وقف جنبي داك يا الجنا الاخضر الطويل وسلم علي قال انتي بت منو عاد طوالي قلت ليه انا بت عمر ضحك وفات على زراعتو بعد جيت ارفع الفزعة غلبتني جا رفعة لي في الحمار حقو والبنات قعدت اتغامزن قالن كل يوم بنفزع فد يوم ما شال لينا الحطب اشمعنا صفاء
المهم لما وصل جنب بيتنا نزل لي الحطب وفات
بالليل الباب دقا اخوي الصغير فتح الباب
قال يمه جونا ضيفان امي قالت حباب الضيفان. الراجل دخل علي الديوان والمراه قعدت مع امي قالت ليها الولد .شاف البنت في. الفزع وعجبتو وحمانا القعدة قال الا امشو يختبوها ليه في الليل دا
اها طوالي ابوي قال ليهم ادونا اسبوع نشاور الاهل بعد اسبوع جو قالوا ليهم اديناكم
اها من اليوم داك بقيت بفزع مرتين في اليوم عشان اجهز حطب العواسة للعرس قبال. هو ما يبيع الخضار وجيب حاجات العرس
واسي انا اقول كل. يوم بركة المشيت
الفزع

صفاء البطحاني

🔴

سيدي الرئيس

نصيحه مني ليك أنا الباحث والمفكر الإسلامي ابازر الانقريابي

يجدك بخيــر

شفت أي زول موظف عندك في البلد دي وبدعم ترشيحك لإنتخابات 2020 ده أول زول تعمل حسابك منو
وشيلوا هسي قبل بكرة من منصبوا طوالي
لأنوا عندو مصالح خايف عليها
وعاملك ستر وغطا لأعمالوا والله بكون عايز إغطس حجرك وما عايز ليك خير أبدا لا ليك ولا للبلد دي

والله أنا لو في محلك دي بتخارج بكرامتي عزيز مكرم
مش قلت عندك مزرعة وفيها أشجار فواكة وفيلا وبقر ??
والله النوريك تمشي تقطع ليك عراريق هبابة كده ظريفة وسفنجات
وتقعد مرطب في مزرعتك دي مرتاااااح لا عوض الجاز لا بكري حسن صالح
وتعمل ليك غزالات كده وقفص جداد وتجيب شفع وداد دي واحفادها وأهلك يونسوك
وتصحي من الصباح تشوف البقرة الولدت ياتا والرضعت ياتا
والجدادة الرمت ياتا
وتجيب ليك بتاع سلات آي بتاع سلات من الصباح تشرب جبنتك وتضبح ليك حميل (خروف صغير يعني) تحت ضل شجرة منقة ظلييييلة وزولك يشوي ويخت ليكم
تمشي تصلي الضهر وفرت نومة لي مواعيد الحليب تجي
تشيل (محويبك) وتنتظر الراعي يحلب ليك بقراتك
وتدخل جردل لبنك لي حاجة فاطمة دي تظبط ليك شاي لبن ظريف وكان عندك فاتحة تركب لاندكروزك وتمشي لا حراسة لا ويويويوي

مالك ومال الدولار زاد ولا نقص ولا رفعوا الدعم
شفت كيف
أها بكرة تضرب لي كم نفر من الناس الظرااف الوناسين ديلك يجوا يفطرو معاك ويونسوك ويحكوا ليك وتغمت ليهم حاجة ظريفة كده ويطلعوا مبسوطين وإنت مبسوط
تعديلك يوم يومين تسوق نسوانك ديل تمشوا عمرة شهر ما ترجع تعديها عبادة سااااي واستغفار لي ذنوب السنين دي

والله اسمع كلامي ده غايتو انا فترت من الكتابة وبطارتي هسي 2% لكن الكلام كتير الننشر ده قبل يقفل وبجيك يوم تاني بتموا ليك

للرومانسية وجوه كثيرة

عندما كنت طفلة بالمرحلة الإبتدائية كان والدى رحمة الله عليه يعمل بالسكة الحديد وكان يحضر بدراجته للمنزل لتناول طعام الافطار .وكنت اعود من مدرستى القريبة أيضاً لنفس السبب ..
وعند عودتى كنت اقف على الباب مع ابى والح عليه كى يعطينى ريالاً لاشترى حلوى واطيل وقفتى الى جواره وامى رحمة الله عليها تودعه على الباب وهى تقف خلفه فترة طويلة وفجاة ينتبهان لوجودى فيقول تحركى (جرس الحصة ضرب)
فكنت اجرى وانا الوح لهما بيدى ثم انتظر حتى يتحرك هو وتدخل امى رحمة الله عليها .
_________
عندما يتأخر ليلاً بعد عمل إضافى ..
كنا ننام جميعاً وتبقى هى على السرير الاكثر قربا للباب . شبه نائمة .. منتظرة عودته .. فيعود ويتناول عشاءه وينام
________
كانت تتحرك كثيراً عندما يتاخر بالخارج وتذهب الى الباب ثم تعود وعندما يفتح احدنا الباب تخرج من المطبخ وبيدها ملعقة الطعام .. إعتقادا منهاان القادم هو ابى ..
فتتذمر من إزعاجنا بل كنا عندما نرى كريمة مختار فى دراما مصرية تزرع الصالة جيئة وذهابا قلقا على زوجها ، كنا نبتسم خلسة .. نشبهها باأمى وليس العكس .
________
عندما يمرض أبى

أو يمر بضائقة مالية ..
كانت تحزن وتمتد عدوى حزنها وقلقها إلينا
فيخيم علينا الصمت ونهجر

اللعب والمذاكرة .. هى لاتقول ولكن نحسسه ونستشعره ..
________

كان عندما يحضر اخر النهار وبعد تناولنا معا وجبة الغداء .. يقوم بتقسيم ما احضره معه من حلوى او فاكهة او مكسرات على الجميع بالتساوى ..
فاذا اختل العدد
بعد ان ناخذ انصبتنا
يصر كل منهما أن يمنح الاخر النصيب الأكبر

ظلت هذه العادة تلازمهما حتى
قبيل رحيلهما
( رحمة الله عليهما)

إذ رايتهما (يتعازمان ) على حبات حلوى

________
لم يتفوه احدهما بكلمة حب أمامى يوماً واحداً
ولكنى كنت احس ان هناك مشاعر جميلة خفية تربطهما ...

الرومانسية ليست فى اللهجات
ولا الكلمات العاطفية ولا الالوان الصارخة ولا التعرى ..

عفاف محى الدين طاهر #

السيدة زوجتي المستقبلية
...تحية طيبة ... وبعد!
أفيدك علمًا بأن المهر سيكون 10 جنيهات فقط لا غير.
وان سد مالك سيكون 1000جنيه فقط لا غير.
وان شيلتك لن تذيد عن شئ واحد من كل صنف.
وأنك لن تلبسين زفاف ابيض وتجلسين في كوشة فقط ثوب جرتق سوداني و..
لقراءة المذيد...

#إحدى جاراتنا : بري بري بري يايمة ود حجة التومة شناتو أب سنون يقطع الخميرة من البيت ، الله يختو أب راسين هسي دة راجل بدو مرة ، النبي ياحجة علوية قنعانة من بتك تديها ناس فريق ورا أليتو يايمة نسب الياباني والتاباني وكن علي خالهم طه الدلاهة ماحصل لاقاني نضيف الراجل طوالي شايل العجاجة في كرعي الله يقطع وسخو الرمدان ، وبري ماشفتي أختهم القاعدة في البيت ديك والله تنجض ليك بتك حية ولا أمهم أم شلوخآ زي مطارق راكوبتنا إتي قايلاها هينة ولا لينة ، بري النصيحة ديل ماناس .
ويمضي العريس وتمضي جارتنا وتمضي أعوام فأهلي وجيراننا أصحاب ألسنة سنان ، يأتي عريس أخر ، #ياخ دة وضعو زي الزفت دة زول وظيفة ساي ، ينتظر تلاتين يوم عشان يدو ألفين جنيه ، طيب عندو حق إيجار البيت ، أفرضي سكنك مع أهلو ، أها المصاريف من وين ؟ والله أسمعي دايرة نصيحتي الزول دة مابتاكلي معاهو عيش ، ثم تانيآ عارفة كلام الحب والرسايل والتلفونات دة بنتهي من أول شهر لامن تقول لي ماشة أتحنن وعايزة لي توب سهرة أمشي بي الصالة والله يسمعك محاضرة تكرهي اليوم العرفتي فيهو.
يذهب هذا ومعه أخرون مابين طويل يسف السعوط ولايفهم في الإيتكيت ، وسمين همه إلتهام أكبر قدر من الطعام ثم يتجشئ بلا مبالاة أمام جمع راقي ، أو قصير مفلطح الأنف أجعد الشعر ضيق الجبهة أقرب لأهل جزيرة منغوليا ، أو ذاك المتشدد الذي أمرني بلبس النقاب لأنه يغار ، أو ذاك السياسي الذي يسافر كثيرآ وعندما يعود يبخل بالإتصال لأنه مشغول بالإعداد لمؤتمر حيوي ، أو ذاك الفيلسوف الذي يحفظ اكبر عدد من النظريات والأفكار الوهمية وبعض أشعار في أغلب إعتقادي لحثالة من الشعراء أو مغترب يكثر التذمر والضجر من أوضاع البلد الذي يعمل به.
تمضي أعوام وبعض شيبات قررن الإستقرار في مقدمة شعري وتجاعيد رفيعة تبدو حين أبتسم ، وبعض رهق أصاب بشرتي الخمرية ، وصداع يبدو أنه من كثرة التفكير في نصيبي الراحل .
أبي سئم من تقديم النصح ، أمي نادمة لأنها كانت تسمع أحاديث الأخريات من أهلي لتو إكتشفت أنهن كن يكدن لها كيدآ ، أخي يقيم في منزله مع أبنائه وكأنه بلا سيئات ، أختي هاجرت بصحبة زوجها إلى ذاك البلد الرغد ، إتصلت بي ذات مرة وقالت في غنج :حأرسل ليك زيارة تجي تنفسيني عارفة أمي مابتقدر ، حينها رددت في نفسي تنفسي بي ود أمبعلو إن شاء الله.
#الأن حصلت على درجة الدكتوراة في الأدب المقارن وحصلت على العنوسة بإمتياز

#mona alamer

بيتنا من قش من مطارق
ما عمارة بخمسة طابق
و حوشنا بالعيدان متكل
و بابو فاتح لأي طارق
..
قطية من جالوص و رملة
و فوقا قش مختوت موهط
و الرفوف من كل جانب
مايلة في الضل الموسط
فيها شباك زنكي عالي
و بابا من الخيش مربط
باردة للنوم و إنت هاني
و النسيم بجي ليها سارق
..
و الرواكيب فاردة ساحة
في المقيل بيت إستراحة
و العناقريب فيها قاعدة
للبكوس في الدنيا راحة
و بين رقاقير كل قشة
الهبوب جاي بي فواحة
يهدي للناس ضل معطر
بي شذى المطر المفارق
..
و الكرانك ماخدة موضع
و هي معلم في الصريف
و غالبا ما تبقى مطبخ
و مأوى لو حل الخريف
و مرة مرة تكون معسكر
لينا أو لي أي ضيف
و بيتنا كلو جميل و زاهي
أحلى من كل الحدايق
..
بيتنا محاط بأشجارو
نيم و نبق و لالوبة
قرض عالي و تبلدية
و شجرة حنة يادوبا
بتكبر بي رحيق الورد
و زهرة جميلة محبوبة
و طلحة تشيل عشوش الطير
و فيها ننوم منام رايق

جات جاريه عليهو 💛
وهو طالع دغش الواطه ضلمه حصلتو عند الباب و معاها كباية الشاي ☕
قالت ليهو: اعفي لي يا (صباح خيري) شالتني نومه مع البرد ده . .
قال ليها : هو الخير لو فاتك وين يلقالو مكان بعديك !! والنوم محظوظ الغشى عينيك
شال الكبايه وشال اشواقها 💑 وابت تقفل الباب قبل يتلاشى طيفو 💜💜💜💜..

البايرين اها قلتوا لي العشا بي شنو..😂😂😂

#امجد

#الخاله

كلمه ( كانت ) سابقا من أرق وأحن الكلمات فهي تطلق على شقيقه الوالده وأخوتها من بنات العمات والخالات ...الى اخره ، معروف عندنا مقوله الخال شقيق الوالد بعطفه وحنانه .
طيب الحصل شنو واتبدلت الكلمه لمصطلح ( قذر وبذئ) ؟؟؟؟ وأصبحت الكلمه دي مترادفه لشبهه!!!
وليه تدنست الكلمه دي وفقدت معناها الحنين السابق حيث كانت تطلق للاحترام لكبيرات السن تقديرا" لهن !!!!
قريت مره في احد المنشورات واحده بتحكي موقف صدمت لاول مره تعرف انو كلمه خاله عندها معنى حقير يعف اللسان عن ذكره مرادف ( لبائعات الهوى ) والعياذ بالله عندما ناول الكمسارى احدى ( الخالات 😰) كبيره سن و ومقام ناولها باقى فلوسها وأردفها بقوله اتفضلي يا خاله!! فما كان منها الا الاحتجاج و( الهرجان) بأعلى صوتها رافضه تماما الكلمه دي حتى لو احتراما" ليها !!!!!
#الشاهد انو للاسف مجتمعنا اتغير وأتحرفت فيهو كلمات جميله لمعاني تانيه قبيحه ومامعروف الخلل وين والاسباب شنو؟؟؟؟

عناد المراة
اعلمي أنك بعنادك قد تهدمين بيتك ، فالزوج قد ينفذ صبره ويركب رأسه وتجنين من وراء عنادك ما تكرهين، ثم إن عناد زوجك وعدم طاعته لا يقره شرع ولا دين ولا عُرف، فقد جعل الله سبحانه وتعالى للرجل القوامة على المرأة، وفرض عليها طاعته ، قال صلى الله عليه وسلم : (إذا صلت المرأة خمسها وصامت شهرها وحصنت فرجها وأطاعت بعلها – زوجها – دخلت من أي أبواب الجنة شاءت) .
ولست أدري ماذا يضير المرأة إن هي أطاعت زوجها ونفذت رغبته ؟! أتظن أن في ذلك انتقاصاً من قدرها ؟! كلا والله.. فما كانت الطاعة يوماً انتقاصاً من قدر الإنسان، فقد شاءت إرادة الله سبحانه وتعالى أن تسير الحياة وفق قوانين ونواميس ونظم ، فلابد من رئيس ومرؤوس وتابع ومتبوع، فالزوج رئيس الأسرة ولا يعني هذا تسلطه أو تجبره أو ظلمه للمرأة، ولكن يعني أنه موجه لدفة الأسرة، ومتحمل للتبعات والمسؤوليات، واعلمي أن طاعتك لزوجك تنعكس آثارها عليك بحب زوجك وإجلالك وعلو قدرك عنده ، ثم رضا الله عز وجل عنك وهو خير ما يكسب المرء في الدنيا
ادمن
ام احمد