أختك ♥
هي الاولى ب لقب "الحبيبه"
اولى ب انك تعرف تفاصيل حياتها اكتر من اي بت تانية ، اولى ب الونسة الطويلة ..
ب الضحكة العريضة ، بالسيلفي
كمان اولى ب "قفة الفرح" 🌚🙊
طلعها معاك ، اعزمها في اي حتة .. المانع شنو ؟
صاحب اختك عشان م تمشي تفتش الحاجات دي من برا .. هي حتلقاها وانت ببقى ليك حار 🙂👌🏼
#سارة

منقوووول ..

انا دايما بحكي الموقف ده لاني بحبه جدا😍
(مرة في رمضان خلصت من الشغل متأخرة و كان الاذان قرب المهم اتوكلت و مشيت العربي و لمن وصلت لقيت ماف مواصلات عشان الافطار فبقيت واقفة قلت بعد الاذان يأذن اشتري لي موية و انتظر الحافلات تشتغل يلا في وقفتي دي جاني كمساري الحافلة الكنت واقفة جنبها و قال لي اقعدي جوه الحافلة ما تقيفي بره يلا فتح لي باب الحافلة و قعدت و ما عدت دقيقتين الا و الاقيهو جايب لي فطور و ما ساندوتش ولا حاجة خفيفة لا كان جايب لي صينية صغيرة كده فيها عصيدة و ملاح و بلح و بليلة و جكين عصير قال لي افطري و مشى يلا عارفين الاحلى من كده شنو؟ انو هو ماشغال في الخط حق الحي الانا ماشة ليو و بعد الحافلات بدات تشتغل ركبني حافلتنا و رجع)
ما بعرف اسمه لكن بدعي ليو دايما و بحبه جدا ❤

تحية للكماسرى و قفل ورا 😍✌

الفتش عليك في الزحمة ما زي اللقاك في طريقوا

مبروك يا وطن ❤✌️

مهتم بالكتابة؟
بتكتب حرفاً؟ او كلمة ؟ او جملة؟
بتكتب قصيدة او خاطرة او مقالة او قصة؟ اي كان ماتكتبه ..نحن نهتم به
طيب رايك شنو ؟ تخلينا نقرأ ما تكتبه؟
لو موافق انضم لينا في قروب
#يلا_نكتب_سودان




https://tttttt.me/joinchat/AAAAAELJ26CBGQ6thOLQ5w

البلد حاله وصل الحد ....

#القصه دي حقيقيه

انابقول لي صاحبي ما تجي راجع البلد الحاله صعبه شديد وهو مصر يجي السودان .. واثناء مابعمل في إجرات رجعتو .. غير فكرة الرجوع نهائي تاني والسبب... تحت👇👇👇👇👇👇👇👇👇👇👇👇

قبل اسبوع اتصلت بالحاجة والسلام وووو ووجدت معها خالي الذي أخذ التلفون وبدأ طوالي : اسمع يا ولد ، خليني من مشتاقين وماعارف شنو ، أوعك تفكر تجئ ولا حتى إجازة ، ليه يا خال ؟؟ ليه !!! اسمع وبراك ح تفهم : الأسبوع الفات حسيت بصداع وتعب شديد ، مشيت الدكتور وقبال ما أتم كلامي كتب لي تحليل دم وبول وفسحة وصورة أشعة ، أها اديتهم الدم والبول وعملت صورة الأشعة لكن الفسحة ما كان في طريقة ليها ، ادوني فتيل وقالو لي تجيبها بكرة معاك وما تتأخر عشان العينة ما تبوظ ، شفت كيف تاني يوم ظبطت ليهم فسحة صاح ولفيت الفتيل بكيس وتاني كيس ولفيتها بجريدة وختيتها في جيب الجلابية وكابست اول حافلة وصلت المعمل ، ادخل يدي في جيب الجلابية مرقت بي تحت !!!! أعاين ألقى الجيب مشروط بي موس ونشلوا الفسحة !!!!!!!!!
أها دي بلد دي الزول ينشلو منو فسحتو !!
أوعى واحد يسألني الفسحة دي شنو ؟؟؟

#موضوع_للنقاش
ليي نحن كسودانيين موضوع الشعر د مرتبط عندنا بالشماسة و البنقو و المخدرات ! يخوانا علاقة البنقو بالشعر شنو ! 😂😂😂 تعالو أجيب لكم ناس حالقينها صلعة عديل و معلمين بنقو و برضو بتلقو ناس داقين راستا من الله خلقهم م حلقو و الواحد سيجارة حمرا م بشررب ..
و برضو ماف اي علاقة بين الشعر و انو الزول م ود ناس .. يعني انا حتى اهلي ف البيت داقين جرس ف الحاجة دي و مشتبكين معاي طوالي و بقولو لي د م شعر اولاد ناس 😂 بس انا بعتبرهم ناس متأثرين بنظرة المجتمع الغلط م أكتر ..
و برضو بستفزك لمن يجي واحد يعمل فيها ناصح اجتماعي و داير ينصحك .. ي الحبيب كدي صلاتك ع النبي وحدة وحدة ! شعري د مضايقك انت ف شنو ؟ شايلو معاي ف رأسك و متقل عليك و لا حاججة ؟ م معقول اي واحد عاوز يطلع من الصورة النمطية للمجتمع الناس تعاين ليو بالطريقة دي ! نحن كسودانيين عاوزين الناس دي كلها تكون نسخة من بعض .. يعني أعمامك الكبار دييل لو في طريقة كانو دايرين الناس دي كلها تكون حالقة 1 و جلالييب بس ..
الفهم العاوز اوصلو انو اي حاجة بعملها الواحد لنفسو و م بتضر الناس و المجتمع ف حاجة بتدخل ضمن الحرية "الشخصية" و ركزو ف "الشخصية" دي ..
و نجي للموضوع من ناحية دينية ..
دينيا تربية الشعر م فيها حاجة بل بالعكس حلاقة الشعر مكروهة قبل م تغالطني ف الحاجة دي عمك قوقل قاعد خش و اتأكد و زي م عارفين كلنا الرسول صلى الله عليه و سلم شعرو كان مترجلا ..
اخيرا بتمنى الناس تغير وجهة نظرها و م تلخبط بين الحرية الشخصية و الحاجات البتمس المجتمع ..
#ورونا_رأيكم ..
#دام_شعري_سالما_حرا_في_حربه_ضد_المجتمع 😌✌
#تعدديل :
عشان م اتعب و انا بشرح لأي زول براو
-الرسول (ص) شعرو كان عربي ناعم و كان بترجل و نحن شعرنا أفريقي زي م ظاهر م بنسدل .. فاا هل ح اخلي تربية الشعر عشان ربنا جاب شعر الرسول ناعم و جابني أفريقي بشعر خشن ؟ ذنبي شنو اني م جيت عربي عشان م أربي شعري ؟
-و الرسول (ص) كان بدهن شعرو عشان م يجي واحد يقول لي بتمسحو بحاجات ..
- و البقولو لي شين و م حلو ديل رأيهم ع العين و الرأس و لولا اختلاف الاراء لبارت السلع 💓 ..

الزول بي كم ؟
حمّاد قام بدري بيسأل أمو
قُبّال الشاي والناس نايمين
قال ليها آآ يُمّه الناس بي كم ؟
قالتلو الناس ؟ الناس غالييييين ..
قال ليها الزول لو دار يتباع
في السوق أو كان تموين
بيكون بي كم ؟
قالتلو آآآود قول بسم الله
إنتَ صِبِح محموم الليلي ؟
ده كلام الجن والجان والجنبو
قوم صلّي صلاتك واسأل ربّك
إن شاء الله يعين
قال ليها آآيُمّة أُمبارح كان
في البيت الفاتح في الدكان
إنسان معروض والناس قاعدين
قالتلو إنسان زيّي وزيّك
والناس شايفين ؟
قال ليها آآيُمّة بنيّة حلاتا
وكمان من ناسنا الغلبانين
جات شاقي الشارع ..العصر أُمبارح
والريحة تقول زرعو الياسمين
لابسالا قميص زيّ برنامج السهرة
فوق للركبة وبلا إيدين ...
وبتنادي الناس ..
ياناس ياناس يامحتاجين
قالتلو تقول ياناس ياناس
والناس سامعين ؟
قاليها آآ يُمّة بلا أصوات
وبيناتم كان سمساري العين
قالتلو آآاود طب وين أخوانا
ووينو بلدنا .. ووينو الدين ؟
قاليها أخوانا بكونو سكاري
وطوالي آآ يُمّة بكونو نايمين
والدين آآ يُمّة هناك في الجامع ...
برّه الجامع مابسووا الدين
حمّاد كان عمرو يكون كم طاشر ..
والوالدة تكون فوق للخمسين
شوف فرق العمر الكان بيناتم ...
وبيناتم كان كم زول عايشين ..
كم زول مبيوع كم زول إتباع
وكم سمساري ودلّالين ..
وقُبّال ماتقول الوالدة كلام ..
قاليها آآ يُمّة شايك فار
قالتلو آآآود الشاي ملحوق
قدامو زمن أنا كاتلي النار ..
قول لي كيفن مابسوو الدين !!
قال ليها آآآآ يُمّة
البِت لو دار تتّباع
بس تقلع توبا وتشُق الشارع ..
تقابل واحد حافظ السوق وعارف الحاصل ..
وبي نظرة صغيرة وغمزة عين ..
تصبح حق الولد البت
وتصبح هي المجنونة وهو العاقل ..
عرفتي آآيُمّة الزول بي كم ؟
الزول بي شرفو ..
بالشرف الغااااااالي المامبيوع ..
عشان آآيُمّة ..
بي إيد القُدرة الزول مصنوع
قالتلو آآولدي سرحت معاكا
والبهم إنطلق وهسع برضع في النعجات
قاليها آآيُمّة الشاي بي كم ؟
قالتلو الشاي بي كم تمرات
قاليها السكر وين ؟
قالتلو خلاس كمّلت حديثك
وجيت تتحدث في الممنوع ؟
أحشي خشيمك وأشرب شايك
بي تمرات وقوم إندلّي
وأزرع شرفك وشرف أخوانك
وخدّر فوق الطين قمحات
أزرع شرفك وشرف أخوانك
وخدّر فوق الطين قمحات !!

مشاركه من احد الاعضاء

مغترب بقووول ﻗﺒﻞ ﺍﺳﺒﻮﻉ ﻛﻨﺖ ﺯﺍﻓﻲ ﻭﺩ ﻋﻤﺘﻲ
ﺍﻟﻌﺮﻳﺲ ﺑﺎﻟﻌﺮﺑﻴﻪ ﻭﻣﺸﻴﻨﺎ ﻧﺠﻴﺐ ﺍﻟﻌﺮﻭﺱ ﻣﻦ ﺍﻟﻜﻮﻓﻴﺮ.
ﻭﺻﻠﻨﺎ ﺍﻟﻜﻮﻓﻴﺮ ﻭﺩﺧﻞ ﻳﺠﻴﺐ ﻋﺮﻭﺳﻮ ﻭﺗﻔﺎﺟﺎ ﺍﻧﻮ ﺣﺴﺎﺏ ﺍﻟﻜﻮﻓﻴﺮ
ﻃﻠﻊ9ﻣﻠﻴﻮﻥ ﻭﻧﺺ ﻻ ﻧﻮ ﺍﻟﻌﺮﻭﺱ ﻛﺎﻥ ﻣﻌﻬﺎ ﺍﺗﻨﻴﻦ
ﻣﻦ ﺻﺎﺣﺒﺘﻬﺎ ﻭﺗﻼﺗﺔ ﻣﻦ ﺑﻨﺎﺕ ﺧﺎﻟﺘﻬﺎ.
😬
ﻛﻠﻬﻢ ﺩﻳﻞ ﺍﺗﺠﻬﺰﻭ ﻣﻊ ﺍﻟﻌﺮﻭﺱ ﻣﻊ ﺍﻟﻌﻠﻢ
ﺍﻧﻮ ﺍﻟﻌﺮﻳﺲ ﻛﺎﻥ ﻣﺘﻔﻖ ﻣﻊ ﺍﻟﻌﺮﻭﺱ
ﺗﺴﻮﻕ ﺑﻨﺖ ﻭﺍﺣﺪﻩ ﺑﺲ ﻣﻌﻬﺎ ﻭﺍﻧﻮ ﺍﻛﺘﺮ
ﻣﻦ3ﻣﻠﻴﻮﻥ ﻣﺎﺑﻘﺪﺭ ﻳﺪﻓﻊ.ﺍﻟﻤﻬﻢ ﺣﺼﻞ
ﺑﻴﻨﻬﻢ ﻧﻘﺎﺵ ﻓﻲ ﺍﻟﻜﻮﻓﻴﺮ ﻭﺍﻟﻌﺮﻳﺲ ﻗﺎﻝ
ﺍﻧﻮ ﻣﺎ ﻣﻠﺰﻡ ﻳﺪﻓﻊ ﺣﺴﺎﺏ ﺍﻟﺒﻨﺎﺕ ﺩﻳﻞ
ﻛﻠﻬﻢ ﻗﺎﻝ ﺯﻧﺒﻲ ﺷﻨﻮ ﺍﺩﻓﻊ ﻣﺒﻠﻎ ﻗﺪﺭ ﺩﺍ ﺍﻧﺎ
ﻣﻠﺰﻡ ﺑﻲ ﻋﺮﻭﺳﻲ ﻭﺍﻟﻨﺖ ﺍﻟﻤﻌﻬﺎ ﺑـﺲ.
😰
ﺍﺿﺎﻓﻪ ﺍﻟﻲ ﺍﻧﻮ ﻣﺎﺷﻴﻞ ﻣﻌﺎﻫﻮ ﺍﻟﻤﺒﻠﻎ ﺩﺍ
ﻛﻠﻮ ﺣﺎﻟﻴﺎ.ﺍﻟﻤﻬﻢ ﺟﺎﻧﻲ ﻓﻲ ﺍﻟﻌﺮﺑﻴﻪ
ﻭﺣﻜﻲ ﻟﻲ ﺍﻟﺤﺎﺻﻞ ﻭﻛﺎﻥ ﻣﻨﻔﻌﻞ ﺷﺪﻳﺪ
ﻭﻛﺎﻥ ﻋﺎﻳﺰ ﻳﻄﻠﻖ ﺍﻟﻌﺮﻭﺱ ﺳﻘﺘﻮ ﺑﻌﻴﺪ
ﻭﺍﺗﻜﻠﻤﺖ ﻣﻌﺎﻫﻮ ﻭﻫﺪﻳﺘﻮ ﻭﺭﻛﺒﻨﺎ ﺍﻟﻌﺮﺑﻴﻪ
ﻭﻣﺸﻴﻨﺎ ﻧﻔﺘﺶ ﺻﺮﺍﻑ ﺍﻟﻲ ﻋﺸﺎﻥ
ﺍﺳﺤﺐ ﻣﻦ ﻗﺮﻭﺵ ﻓﻀﻠﻨﺎ ﻧﺺ ﺳﺎﻋﻪ
ﻧﻠﻒ ﺑﺎﻟﻌﺮﺑﻴﻪ ﻟﺤﺪﻱ ﻣﺎﻟﻘﻴﺖ ﺻﺮﺍﻑ ﺍﻟﻲ
ﻭﻧﺰﻟﺖ ﺳﺤﺒﺖ ﻣﻨﻮ2ﻣﻠﻴﻮﻥ ﺑﺲ ﻻﻧﻮ
ﺍﻧﺘﻬﻲ ﺍﻟﺤﺪ ﺍﻻﻗﺼﻲ ﻟﻠﺴﺤﺐ ﻓﻲ
ﺍﻟﺼﺮﺍﻑ.ﺍﻟﻤﻬﻢ ﺭﺟﻌﻨﺎ ﺍﻟﻜﻮﻓﻴﺮ ﻋﺸﺎﻥ
ﻧﺠﻴﺐ ﺍﻟﻌﺮﻭﺱ ﻭﺻﺎﺣﺒﺘﻬﺎ ﻭﺩﻓﻌﻨﺎ
ﺍﻟﻘﺮﻭﺵ ﻭﺍﺿﻄﺮﻳﺖ ﺍﺧﺖ ﺑﻄﺎﻗﺘﻲ
ﺍﻟﺸﺨﺼﻴﻪ ﻛﻀﻤﺎﻥ ﻟﺤﺪﻱ ﻣﺎ ﺍﺟﻴﺐ ﺑﺎﻗﻲ
ﺍﻟﻤﺒﻠﻎ ﺑﻜﺮﻩ
💥
ﺍﻟﺴﻮﺍﻝ ﺍﻟﺒﻄﺮﺡ ﻧﻔﺴﻮ-:??🗣
💢
ﻟﻴﻪ ﺍﻟﺒﻨﺎﺕ ﺑﻌﻤﻠﻦ ﻛﺪﻩ?
ﻳﻌﻨﻲ ﺍﻟﻮﺍﺣﺪﻩ ﻋﺎﻳﺰﻩ ﺗﻮﺭﻱ ﺻﺎﺣﺒﺘﻬﺎ ﺍﻧﻮ ﻋﺮﻳﺴﻬﺎ ﻣﻘﺘﺪﺭ
ﻭﻣﺮﻃﺐ? ﺍﻓﺮﺿﻲ ﺍﻧﻮ ﺭﺍﺟﻠﻚ ﺩﺍ #ﻃﻠﻘﻚ ﺻﺤﺒﺎﺗﻚ #ﺑﻨﻔﻌﻮﻙ ﻓﻲ ﺷﻨﻮ ﺗﺎﻧﻲ? 💢 ﻟﻴﻪ ﺍﻟﺒﻨﺖ ﻓﻴﻜﻢ ﻣﺎﺑﺘﻘﺪﺭ ﻭﺿﻊ ﺭﺍﺟﻠﻬﺎ ﻭﻻ
ﺍﻣﻜﺎﻧﻴﺎﺗﻮ. 💢 ﻣﻊ ﺍﻧﻮ ﺷﺎﻳﻞ ﻛﻞ ﺗﻜﺎﻟﻴﻒ ﺍﻟﻌﺮﺱ ﻣﻦ ﻣﻬﺮ.ﻭﺷﻨﻄﻪ ﻭﺷﻴﻠﻪ ﻭﻛﻞ ﺷﻲ ﻟﺤﺪﻱ ﻣﺎ #ﻳﺠﻲ ﻳﺴﺘﻠﻤﻚ ﻣﻦ ﺍﻟﻜﻮﻓﻴﺮ?
💥
ﺩﺍ ﻏﻴﺮ ﺍﻟﺼﺮﻑ ﺍﻟﺮﺍﺟﻴﻬﻮ ﺑﻌﺪ ﺍﻟﻌﺮﺱ.
ﻟﻴﻪ ﺍﻟﺒﻨﺎﺕ ﺑﺤﺒﻦ ﺍﻟﺼﺮﻑ ﻓﻲ #ﺍﻟﻔﺎﺿﻲ
ﻫﺴﻲ #ﺍﻟﻘﺮﻭﺵ ﺍﻻﻧﺼﺮﻓﺖ ﺩﻱ ﻣﺶ
ﻛﺎﻥ ﺍﻭﻟﻲ ﺑﻴﻬﺎ ﺍﻧﺘﻲ ﻭﺭﺍﺟﻠﻚ ﻭﺗﺘﺼﺮﻓﻮ
ﺑﻴﻬﺎ ﻓﻲ #ﺣﻴﺎﺗﻜﻢ ﺍﻟﺰﻭﺟﻴﻪ ﻭﻓﻲ
ﻣﺴﺘﻘﺒﻠﻜﻢ ﻣﻊ ﺑﻌﺾ ﺍﻭ ﺗﻌﻤﻠﻮ ﺑﻴﻬﺎ
ﻣﺸﺮﻭﻉ ﻳﻌﻴﻨﻜﻢ ﻓﻲ ﺣﻴﺎﺗﻜﻢ?
💥
🚶ﻛﺴﺮﻩ🚶
ﺷﺒﺎﺏ ﺍﺫﺍ ﻋﺎﻭﺯ ﺗﻮﺩﻳﻬﺎ ﺍﻟﺴﻤﻜﺮﻩ ﻗﺼﺪﻯ ﺍﻟﻜﻮﻓﻴﺮ ﺍﺩﻓﻊ ﻣﻘﺪﻡ ﻳﻌﻨﻰ ﺃﺳﺄﻝ
ﺍﻟﺴﻤﻜﺮﺟﻴﻪ ﺳﻤﻜﺮﻩ.. .ﺑﻮﻫﻴﻪ. .ﺭﻣﻮﺵ...ﺭﺗﻮﺵ ﺍﻟﻤﻬﻢ.
💥
'بالجد ﺍﻟﻤﻮﺿﻮﻉ ﺍﻛﻞ ﻣﻌﺎﻱ وحنيت على حالة صديقي'
💥
ﻓﺤﺒﻴﺖ ﺍﺣﺬﺭ ﻛﻞ ﺍﻟﻤﻘﺒﻠﻴﻦ ﻋﻠﻲ ﺍﻟﺰﻭﺍﺝ ﻳﺎﺭﻳﺖ ﺍﻟﺰﻭﺟﻪ ﺗﻜﻮﻥ ﻭﺍﻋﻴﻪ ﻭﻓﺎﻫﻤﻪ ﻭ ﻣﺎ ﺗﻌﺼﺮ ﻋﻠﻲ ﺍﻟﺰﻭﺝ ﻷﻧﻮ ﺑﻲ ﺍﻟﺠﺪ ﻓﻲ ﻣﻮﺍﻗﻒ ﺻﻌﺒﻪ ﻭﻓﻲ ﻧﺎﺱ ﺑﻠﻤﻮ ﺣﻖ
ﺍﻟﻌﺮﺱ ﺩﺍ ﺑﻲ ﺍﻟﺴﻨﻴﻦ ﺗﺠﻲ ﺗﺮﻭﺣﻲ ﺍﻟﻘﺮﻳﺸﺎﺕ ﻓﻲ ﻣﻜﻴﺎﺝ ﺣﺎ ﻳﺘﻐﺴﻞ ﺑﻌﺪ
ﺳﺎﻋﻪ، ﻳﺎ ﺟﻤﺎﻋﻪ ﻭﺍﻟﻠﻪ ﺳﻤﺤﻪ ﺍﻟﻌﻔﻪ ﻭﺍﻟﺴﺘﺮﻩ ﺑﻲ ﺍﻟﺒﺴﻴﻂ ﻭﻣﺎﻑ ﺩﺍﻋﻲ ﻟﻲ ﺍﻟﺘﻜﺒﺮ ﻭﺍﻟﺘﻔﺎﺧﺮ ﻭﺍﻟﺠﺪﻳﻊ ﻭﺍﻻﺣﺮﺍﺝ ﺍﻟﻨﺎﺱ ﻇﺮﻭﻑ ﺑﺮﺿﻮ!!
أرجو من البنات الرد بصراحه ومن الشباب التعليق في الموضوع لأنهم الضلع المهم في هذا الموضوع وخصوصا المغتربين منهم

اسعار المواد التموينية ومواد البناء اليوم الاحد 15 اكتوبر 2017م في الخرطوم

#اللحوم_والبيض
❉ كيلو اللحمة عجالي 70 جنيه
❉ كيلو الضأن 130 جنيه

"حسب الجودة والنوع"
❉ كيلو الدجاج 45 _ 55 جنيه
❉ طبق بيض 40 جنيه

❉ "الغاز 150 جنيه" حسب الشركة"

مواد تموينية متنوعة

#السكر
جوال سكر كبير 540 جنيه
سكر 10 كيلو 115 جنيه
سكر 5 كيلو 58 جنيه

#الزيوت
رطل زيت سمسم 25 جنيه
رطل زيت فول 18 جنيه
زيت فول 9 رطل 150 جنيه
زيت طعام 1 لتر 35 جنيه
زيت تحمير او صباح 9 رطل 128 جنيه

❉ كيلو عدس 25 جنيه
❉ كيلو رز 20 جنيه
❉ كيلو دقيق سيقا 9 جنيه
❉ رطل شاي الغزالتين 52 جنيه
❉ رطل بن غير مسحون 36 جنيه
❉ كيس مكرونه او شعيرية 6 جنيه الكبير 7.5 جنيه
❉ صلصة البستان 16 جنيه
❉ كيلو طحنية 36 جنيه
❉ علبة مربي متوسطة 15 جنيه
❉ كيلو دقيق زادنا او كسرة 11 جنيه
❉ كيلو الجبنة متوسط سعر 70 جنيه

#الصابون
❉ دستة صابون لافلي 80 جنيه
❉ كرتون صابون غسيل 150جرام 85 جنيه
❉ عبوة صابون بشرى كبير 35 جنيه
❉ صابون بدرة 3 كيلو 45 جنيه

#الفواكه
❉ الموز الكيلو 10 جنيه
❉ دستة برتقال سوداني 15 جنيه
❉ التفاح الدستة 75 جنيه
❉ العنب الكيـلو 100 جنيه
❉ الزبيب الكيلو 100 جنيه

#البلح
❉ البلح البلدي الملوة 38 جنيه
❉ البلح القنديلة الملوة 75 جنيه
❉ البلح العجوة الكيلو 63 جنيه

#الخضار
❉ ربع بصل 35 جنيه
❉ كوم بطاطس كبير 25 جنيه
❉ لفة ملوخية او رجلة 5 جنيه
❉ كيس خضار مشكل لاسرة متوسطة 20 جنبه
❉ طماطم كيلو 30 جنيه

_ _ _ _ _ _ _ _ _ _ _ _ _

▪طن الاسمنت بمدينة الخرطوم 1760
▪حديد الاسعد الطن. 15200
▪حديد ابانوب الطن. 15000
▪حديد اوميقا. 14500
▪الكمر 4 متر ونص 630 ج
▪حديد كانات 8 مل شرشر الحبة 80
▪حديد كانات 5.5 مل سادة الحبة 20
▪سلك الرباط اللفة. 500
▪دور الخرسانة 18م 3200
▪دور الرملة 18م. 2800
▪دور الحجر 6متر. 1400
▪دور رملة المباني والبياض 18م. 1400
▪سيراميك راس الخيمة (م2) 115
▪سراميك سالومي ارضيات (م2) 140
▪سراميك سالومي حوائط (م2) 150
▪سراميك مصري ارضيات 170
▪سراميك مصري حوائط 170
▪درج السلم جرانيت 270
▪بورسلين صيني (م2) 250-158
▪جردل الطلية 120
▪جردل البوماستك 170 الى 220
▪جبص الديكور الطن 1550
▪الكتان او الليف الكيلو 70
▪بلك اسمنتي 20* 40 بلكة 6700
▪بلك اسمنتي 15*40 بلكة 6000
▪دور الطوب الاحمر 4000 طوبة 2600 جنيه

عضلات القراية :
دي بالمناسبة عكس القراية أم دق.
فضلا ركز معاي كويس, الكلام الحا أكتبو في البوست ده ممكن يغير حياتك.
غالبا كلنا بنكون عارفين كويس نحنا مفروض نعمل شنو عشان نكون ناجحين (بمقاييسنا), بنبدا بقوة في لحظة حماس لكن ما بنقدر نواصل.
حأحكي ليكم عن حكايه كلنا حصلت لينا, أنا و أنت و إنتي, اهلنا بيسموها فورة اللبن.
عادل امتحن شهاده و ما جاب درجه كويسه, شاف نتايج و فرحت اصحابو النجحو, شاف خيبة الأمل في ملامح اهلو واصحابو و زعل و انب ضميرو وجاتو نفسيات و بعد كم يوم قرر جادي انو حايمتحن السنه الجايه و حيجيب درجه تحقق أحلامو و يبهر بيها كل الناس -دي إسمها لحظة حماس-.
السنه الجديده بدت و عادل طلع الكتب و نظمها و قرر جادي انو كل يوم حيقعد يقرا 3 ساعات. و ضرب الموضوع ولقى انو حيكمل المقرر في تلاته شهور و تاني يبدا من جديد.
كده عادل بيطبق في خطوات فورة اللبن زي ما هي. عادل مركز مع الفايده و ناسي العاده.
عادل حيبدا أول يومين و بعدين حا يقيف, كلنا عارفين النهايات الحتميه لي الخطط من النوع ده. و يا ريت لو الموضوع بينتهي لحدي هنا, بعد داك بيبدا تأنيب ضمير و نقصان ثقه و كوم مشاكل.
المشكله وين؟؟ المشكله انو عادل عندو مشكلتين و هو بحاول يحل في مشكله واحده, بحاول يحل في المشكله التانيه اللي هي مابتتحل إلى بعد ما يحل المشكله الأولى.
مشكلة عادل الأولى انو ما عندو عادة القرايه, زيها زي أي حاجه في الدنيا, القرايه محتاجه عضلات, و عادل ماعندو.
المشكله التانيه انو عادل محتاج يقرا المواد عشان يجيب فيهم درجه كويسه.
كل الكان بفكر فيه عادل انو يقرا المواد و يذاكر عشان يجيب درجه كويسه. و ناسي انو عشان يصل للحاجه دي لازم في الأول يحل مشكلة العضلات المافي دي.
طيب يا عادل أنا حا أديك خطه هنا, ما حتألمك و حتزبطك, ما حا اطلب منك أي حاجه ما بتقدر عليها , أنسى موضوع التلاته ساعات و أنسى الساعتين و أنسى الساعه, أعمل الحاجه الأنا بكتبها ليك هنا و إذا أمورك ما زبطت تعال بعد شهرين ووريني في البوست ده.
طيب عشان ما عندك عضلات, خلينا نبدا بـي موضوع العضلات ده (عضلات القراية), و ضمنيا حا نستفيد حاجات تانيه.
أول حاجه, وطبعا دائما و ابدا إذا ما عندك رغبه أنا ما حا اقدر أساعدك, و مافي زول تاني حا يقدر يساعدك.
ثانيا, إذا كان عندك رغبه في إنك تنجح و تغير حياتك وريني ممكن تقعد تقرا مرتاح كم دقيقه في اليوم (كم دقيقه ما كم ساعه)؟ تقرا تقرا , مافي تلفون مافي فيسبوك مافي وتسب, أنت والكتاب والقلم, تقرا عشان نفسك , ما عشان أبوك , ما عشان الواجب, ما عشان الناس, حأفترض إنك حاليا و بنصحك إنك ماتزيد من 20 دقيقه في البدايه, إذا اقل من كده مافي مشكله, أنت لازم تكون متأكد إنك بتقدر تقعد الزمن ده كل يوم مرتاح من غير مجهود كبير.
في المرحله دي أنا بحذرك ثم بحذرك من إنك تزيد "دقايق" القرايه, ده أكبر غلطه ممكن تعملها, دي غلطه ممكن تضرب ليك الخطه دي كلها في قلبها.
خليني أحكي ليك هنا قصة الراجل الكان بيقوم الليل (ما عندي ليها أي مرجع, وممكن تكون خيال علمي, سمعتها زمان لكن ما عارف من وين, لكن منطقيه), الراجل ده كان كل يوم , كل يوم بيصحى بالليل بيصلي ركعتين قيام ليل, و بنوم, الشيطان قدر ما حاول يوقفو ما قدر,قام الشيطان غير الخطه, عمل معاه الخطه الدايما بتضرب بـي كل خططنا عرض الحائط, بقى بوسوس ليه انو يزيد عدد الركعات. ياخي انت ما كدا كدا صحيت (وسوس الشيطان) و اتوضيت و واقف في مصلايتك, ما ح تخسر كتير, يعني تصلي ركعتين بس؟؟!!! الراجل زادهم بقو اربعه, تاني الشيطان وسوس ليه , تاني زادهم بقو سته ركعات, تاني وسوس ليه إنو يزيدهم فزادهم بقو 8 ركعات. بعد كده الموضوع بقى بسيط, بعد ده بقى ساهل شديد إنو الشيطان يقنع الراجل ده إنو ما يقوم للصلاة, لأنو الراجل ده عضلاتو كانت بتاعت ركعتين , ال 8 ركعات محتاجه تحفيز كتير(أكتر من العندو) عشان يقوم من السرير, الراجل كان مركز مع الفايده و ناسي العاده.
فا دي اهم نصيحه في البوست ده , ما تزيد ساعات القرايه في المرحله دي, تزيدهم بتين ؟؟ أنت حا تعرف بعد فتره حيجي وقت حتحس فيه إنك اتعودت و انو الموضوع ده بقى ساهل جدا و ما مضايقك خالص و حتحس إنك ممكن تزيد زمن القرايه "شويه" (خت لي خطين تحت شويه دي) و "بحب". عموما ما قبل 20 يوم كده.
خليني أشاركك البحث الإتعمل في جامعة University College London (راجع التعليق الأول) و إتنشر في European Journal of Social Psychology, البحث ده شارك فيه 96 نفر , كل واحد فيهم اختارسلوك جديد ما كان عندو, و بدا يطبق فيه في حياتو بصوره يوميه. نتيجة البحث كانت انو السلوك الجديد بياخد ما بين 18 يوم لي 254 يوم عشان يبقى عاده, مع انو البحث اتعمل في 12 اسبوع لكن الباحثين قدرو يقدرو(بتشديد الدال) ال 254 يوم دي بإستخدام المعلومات الجمعوها خلال فترة البحث, و على العموم ما مهم بالزبط كم يوم المهم إنو نعرف انو موضوع بناء عاده جديده ده موضوع ممكن ياخد

زمن , لكن لما يحصل حياتنا بتتغير.
في الفتره الأولى دي أنسى إنوكمية الفايده الحا تستفيدها من القرايه دي حتكون بسيطه و ركز مع إنو تبني عاده جديده, عاده حتخليك في المستقبل القريب تقرا و أنت مرتاح, تستفيد و أنت ريلاكس.
طيب أنا كان قلت ليك إنو في فوائد تانيه لي موضوع القرايه البسيطه الفي البدايه دي, فوائد غير انو بتساعدنا نبني عاده, و بعدين نستخدم العاده عشان نقرا من غير تعب و من غير ضغوطات.
واحده من الفوايد دي هي نظرتنا لي نفسنا, ما حا تتخيل انوأنت نظرتك لي نفسك حتتغير قدر شنو, و دي حاجه مهمه جدا جدا, إنك أنت تكون مبسوط من نفسك لانك بتنفذ في الخطه الانت كتبتها لي نفسك. عموما كل ما نوفي بـوعد وعدناه لي نفسنا, ثقتنا في نفسنا بتزيد و بنحب نفسنا أكتر. و بما إنو الوعد هنا بسيط فتنفيذو بيكون بسيط لكن نظرتنا لي نفسنا حتتغير بقوه في كل مره نوفي بالوعد ده و نقعد ال 20 دقيقه أو أقل دي .
تاني واحده من الفوائد المهمه, هو احساس الإنجاز, ده بقى داير ليه بوست براه, لكن خليني اوعدك انو اجمل إحساس ممكن يبسطك في حياتك هو احساس الإنجاز ده, علميا الإنجاز هو واحد من أقوى عوامل التحفيز, يعني كل ما تنجز حتنجز زياده :) , ممكن تراجع (Herzberg s motivation-hygiene theory).
طبعا أنا هنا أخدت القرايه بس كمثال, لكن القاعده بتنطبق علي كل الحاجات العاوزين نتعود عليها, ابدأ حته حته, و لما تتعود تاني زيد حته.
عاوز تجري , ابدا بـخمسه دقايق كل يوم وواصل عليها لحدي ما تحس بيها بقت عاده. عاوز تكتب, ابدا بـي سطرين كل يوم لحدي ما تتعود, عاوز تعمل بش أب ابدا بـي اتنين كل يوم , عاوز تقرا قرآن ابدا بـي ايه كل يوم.
في الاخر عاوز أقول ليك, مع انو في الاخر الهدف بتاعنا إنو نتعود و بعدين نزيد الكميات البسيطه دي لكن إنت حتستغرب من كمية الإنجاز الممكن تعملو حتى بالكميات البسيطه المستمره دي .
الليله حانترجم مثل اليوم لانو مهم و عميق, ركز كويس, جيم ريون (رياضي أولمبي) قال ليك:
التحفيز هو الحاجه البتخلينا نبدا سلوك جديد لكن العاده هي الحاجه البتخلينا نواصل في السلوك ده.
الحماس بيخلينا نبدا لكن إذا عاوزين نواصل محتاجين "عاده".
محمد نورين ,
تكساس, الولايات المتحده,
16-6-2017
“Motivation is what gets you started. Habit is what keeps you going.”
Jim Ryun

لما تكتر العسل للقرقوش بيفتكر نفسه بسبوسه
#منقول

بسم الله الرحمن الرحيم
يوسف البروف
دموع اطفال
.............................................
هبوية بتى ذات المستوى التالت اساس اتصلت على امبارح، قالت لى، يا بابا انت جاى متين؟، قلت ليها، الاسبوع الجاى ان شاء الله، قالت لى، يا بابا انا عايزاك تزيد لى مصاريف المدرسة، قلت ليها، ليه يا هبوية؟ قالت لى، بس دايراك تزيد لى مصاريف المدرسة وبس، قلت ليها، انتى ورينى اول حاجة، ليه دايرة يزيدو ليكى مصاريف المدرسة حتى بعداك نشوف هل المسالة دى ممكنة ولا لا، قالت لى، خلاص لو ما بتقدر تزيدها انا بمشى بدون مصاريف، ما عايزة مصاريف، لحدى هنا الكلام بالنسبة لى عادى وكنت متاكد انو حاقنعها فى النهاية ذى كل مرة بحجة الفلس وعدم المقدرة والالويات وكدا، بس سبحان الله المرة دى الموضوع بالنسبة لهبوية كان مختلف فهما واحساسا والما، هبوية انفجرت فى بكاء شديد لدرجة انو ما قدرت تواصل المكالمة، احترت، لاول مرة هبوية تقول دايرة حاجة وتبكى، كانت دايما بتطلب حاجات خيالية مختلفة شكلا وفهما وثمنا ومعنى، مرة عربات ومرة طيارات ومرة عمارات ومرة رحلات الى جزر الهاوى والمالديف لكن كلها بتنتهى عند بابا بان شاء الله والله كريم، بس الموضوع شكلو المرة دى مختلف، قفلت الخط، ضربت تانى، المرة دى ردت امها، قلت لاحسان، هبوية بتبكى مالها؟، قالت لى، اجى ما عارفاها، كدا النشوفها، قالت لى هاك ليها اسالها، قلت لهبوية، مالك يا هبوية بتبكى، قالت لى، صاحبتى فى المدرسة ما قاعدين يدوها مصاريف، قلت ليها، ليه ما قاعدين يدوها مصاريف؟، قالت لى، ما عارفة، قالت لى لمن نمشى نشترى هى ما بتمشى معانا، بتقعد فى الفصل، انا يا بابا بكون دايرة اشترى ليها معاى بس مصاريفى ما بتجيب لينا نحن الاتنين عشان كدا قلت ليك زيد لى المصاريف، لاول مرة لقيت نفسى مهزوم امام هبوية، قلت ليها حاضر من بكرا اضاعف ليك المصاريف عشان تشترى لصاحبتك معاك، قالت لى، خلاص كلم ماما، قلت ليها جدا، قلت لاحسان من بكرا تضاعفى لهبوية دى مصاريفها، تقطعى من حق اللحمة، من حق البامية من حق الحنة، تخلوا الاكل، المهم هبوية تشيل مصاريف دبل عشان صاحبتها ما تضوق طعم الانكسار والانهزام والالم.
فعلا انتى ما عارفة ليه صاحبتك ناس بيتهم ما بدوها مصاريف بس انا عارف والرئيس عارف ونائب الرئيس عارف وحمدى عارف وناس الحوار الوطنى عارفين وناس المعارضة برضو عارفين والزول الداير يودى النائب الاول برضو عارف.
ما عارف ليه فى اللحظة ديك اتذكرت اليابان، قالوا فى اليابان من سنة اولى لحدى سنة سادسة مافى رسوب، بعدين قالوا عندهم مادة الاخلاق دى مادة ثابتة تدرس فى كل المستويات، فى كل المدارس الاساتذة والطلاب بياكلوا محل واحدة واكل واحد، الاساتذة بياكلوا قبال الطلاب بنصف ساعة، انتو عارفين ليه؟، قالوا عشان لا قدر الله الاكل كان فيهو اى حاجة تظهر فى الاساتذة ويسلم الطلاب باعتبارهم نصف الحاضر وكل المستقبل، بالمناسبة فى اليابان ما عندهم مادة دين، ما بصلوا، ما بصوموا، ما بكبروا، ما بسبحوا، ما عندهم دقون وما عندهم تمكنا.
هبوية، انتى بتبكى عشان صاحبتك ما قاعدين يدوها مصاريف فى يدها، هبوية يا بتى صاحبتك دى عايشة فى نعيم، اهلها اجتهدوا قروها فى مدرسة خاصة فى الخرطوم، عندها ترحيل وعندها اسرة، بشيلوها من البيت وبرجعوها الى البيت، عندها مدرسة عمارة وعندها فصل فيهو مكيف ومروحة وسبورة ودرج وكرسى واستاذ وحمام.
هبوية يا بتى كان شفتى المدارس فى ريف الشمالية وريف الشرق وريف الغرب وريف الجنوب تانى ما حتقولى دايرة مصاريف اصلا، هناك يا هبوية لا فى مدرسة، لا في فصل، لا فى درج، لا فى سبورة، لا فى استاذ .
هناك فى ولاة ووزراء ومعتمدين ومؤتمر وطنى، راكبين عربات وفاكين بيارق، تمن العربية الواحدة بفطر طلاب محلية لمدة سنة كاملة، تمن العربية الواحدة بيبنى مدرسة كاملة الفصول والكنب والكراسى والاخلاق، تمن العربية الواحدة بساوى رواتب الاساتذة جميعا لمدة شهر.
هناك يا هبوية فى ناس قالوا مسلمين، بصلوا وبصوموا وبزكوا وبحجوا وبعرسوا اربعة نساوين قابلات للطلاق والزيادة، فى واحدين حجوا عشرين مرة، واحدين حجوا حج سياحى، ركبوا طيران سياحى، نزلوا فى فنادق سياحية، اكلوا اكل سياحى، طافوا طوفان سياحى، صلوا صلاة سياحية بس ما متاكد قابلوا الله مقابلة سياحية ولا لا، انتى عارفة تمن الحجة السياحية الواحدة يمكن يفطر طلاب مدرسة فى الريف لمدة سنة كاملة، انتى عارفة يا هبوية نثريات وزير واحد خارج البلاد يمكن تفطر مرضى مستشفى كامل بمرافقينهم لمدة سنة، انتى عارفة يا هبوية الاموال التى سرقت وجنبت ونهبت وحللت وغسلت وقامت عمارات وسارت عربات وراحت فى البارات كان ممكن تقلب البلد دى جنة وكان صاحبتك دى ما احتاجت لمصاريف وانتى ذاتك ما كان احتجتى لمصاريف وكان ابوكى ما احتاج للسفر الدائم بين ولايات السودان المختلفة اهمالا وفقرا نهبا مواردا.
يا هبوية ناس الله وناس الدين مستعدين يدفعوا المليارات عشان يشقوا حزب او عشان يشتروا بلطج

ى مركب مكنة معارض لكن ما عندهم استعداد، لا دينا ولا اخلاقا انو يدفعوا حق حقنة فاضية لمريض بملاريا او لمريض مصاب باسهال مائ.
يا هبوية تجار الدين ومبتكرى الحج السياحى والدين والصلاة السياحية والجنة السياحية عندهم استعداد كامل النفاق والكذب انو يخلقوا وزارة لولد زعيم عالى الاسرة والمكانة لكن ما عندهم استعداد يوفروا ساندوتش حق طعمية لطالب فى مدرسة فاقد الاب والام والاسرة.
دا اسمو الدين السياحى يا هبوية.
منو القال الله ما موجود الا فى مكة وجامع السيدة سنهورى ومجمع النور والشيخ الزين؟، منو القال الله ما موجود الا فى السبح والدقون والشعارات والجلالات وصيام الاتنين والخميس وخطبة الجمعة؟
الله موجود فى كل مكان، الله موجود فى معسكرات النازحين وصفوف المهاجرين وسفن المبعدين وبيوت المغتربين، الله موجود فى الزنزانات والسجون، الله ما محتاج يركبوا ليهو طيارات وباخرات وقطارات، الله موجود فى المدارس وفى الشوارع وفى المكاتب وفى المصانع وفى المزارع وفى المراح، الله موجود فى المطاعم والكافتيريات والداخليات وشركة زين واسهم شهامة، الله موجود فى البيوت وفى القلوب وفى الاخلاق وفى التعامل، الله موجود فى العمارات وفى النوايا والخبايا.