ارث سوداني

532 views21:35

(الغناء في زمن الكوليرا) !! 😕
حكى لي صديق من مغتربين واحدة من دول اوربا قال لي ماكان في إحساس أكثر إيلام من إحساس الغربة الكتلت فينا حاجات كتيرة وقال لي :
(ياخ تصدق وصلنا مرحلة كنا بنلعب كوتشينة يقوم الزول يجيهو تلفون من السودان ، البركة فيكم عمك فلان إتوفى ، خالتك فلانه اتوفت ، ود عمتك فلان إتوفى قال وحلف حلف مغلظ الناس يختو الكوتشينة من يدينن والفاتحة ، البركة فيكم ياخ ، في اللحظة دي قال لي طبعا الوشوش بترسم شكل حزن ويقوم الزول يمش على البرميل يبصق سفتو ويرجع تاني يشيل ورق الكوتشينة وترجع تاني ملامح الحماس للعب ديك هاك بت الديناري دي ، ارمي التريس الشيريا دا ياخ ، خلفت الجرة ) ويروح الميت زي صوت صدى بعيد في نفق عربية اسعاف ماشة بي سرعة 120ك 😕😕 ، يعني ألم الغربة بقى ليهم اشد الما من وقع سماع خبر زول قريب توفي.
من كم يوم بتجيني رسايل في الخاص ،،
ياميرغني مامون سوارالدهب دا غناي شديد
ولدكم فلته ود السواراب
سلام ياحبيب ،ببقى ليكم الفنان مامون سوارالدهب دا ؟
والفضائيات كلها مدورة غنا شديد في شهر بفتكر إنو من اهم الشهور للمسلمين
شهر نزل فيهو القرآن ، أعظم معركة مع المشركين (بدر) ، شهر رحمة وتوبة ومغفرة ،، تفتح أي إذاعة ولا فضائية تلقى الربة مدورة ، مزازيك تقيلة وللأسف حاجات زاتا مكررة ومبتذلة ،، مافي اي برامج دينية تجديدية تمرق من عباءة المواعظ المكررة لي رحابت (ويتفكرون) 😕مافي برامج ثقافية توري الشباب ديل اكبر نقلة في تاريخ الإنسانية عملا سيدنا محمد وارتباطا بالشهر الكريم دا ، مافي حتى مسلسلات دينية ممكن تشرح ولو بي سيناريو مبسط (كيف إنو شباب دون سن العشرين حملو السيوف وغيرو مجرى التاريخ ) ياخ لو اتعمل برنامج هل تعلم وادا الناس كل يوم معلومة حايكون (هايل شديد) ✌✌
الكلام دا سمح خلاص 👈👈لاتبحثواعن ليلة القدر بين أعمدة المساجد فحسب !!!
إبحثوا عنها في إطعام مسكين وكسوة عاري وتأمين خائف ورفع مظلمة وإعالة يتيم واعانة مريض ومساعدة فقير وفك رقبة واكرام زوجة وبر والدين والاحسان الي ذوي القربي وتوقير الكبير ورحمة الصغير وامر بمعروف وإنهاء عن المنكر.. وغيرها من الأعمال الصالحة أها إنك( تمنع موت زول دي مافي اعظم منها )(كافح الكوليرا)
إبحثوا عنها في ضمائركم قبل مساجدكم👉👉
ليه الفضائيات دي بتتعمد تخصص في رمضان بالذات برامج غنائية بحته وباقي السنة مابيكون في برنامج غنائي شهر كامل ال(Gps) دا شنو يعني مقصودة شديد ، مانظرية مؤامرة ولا يحزنون لكن ببساطة ياجماعة الجهل بيخلي الناس ماتلتفت للأولويات ، في اوربا دي الخواجات في نهاية الاسبوع بيرفهوا لكن خلال ايام الاسبوع عمل في عمل لو سلمت على زول مابرد عليك شان كدا انتقلوا من دولة راقصة لي دولة علم ، ياخ الكوليرا دي لو كانت أصابت (فردين) منهم بس كانوا أعلنوا الطواري ، مؤسف جدا يحدثني قريب زول اتوفى بالكوليرا
قال 👈(بيغسلوا في الجثمان )👉 وصوت برنامج غنائي كان طاغي على صوت الزول البيقرى في القرآن للميت 😑!!!!
ياجماعة نحن سودانيين أهل حارة وحنكة وناس إتعلمنا بدري شديد قبل كتير من الشعوب ماممكن نجهل إنو الكوليرا دي ممكن تبيد من السودانيين في شهور مالم تبيدو الحروب في سنوات 😕😕 ، عاوزين نوعي الناس (بشكر كل الأطباء والطبيبات والشباب الشغالين توعية عن الكوليرا الفتاكة الشغالة زي سمك القرش تبلع في الضحايا كل يوم وكتيرين ماجايبين خبر)
بالنسبة للناس السألوني من صوت مامون (مامون صوتوا قوي جدااا لكن اقوى منو واشد تأثير صوت نحيب وبكاء اهل الناس البيموتوا كل يوم من الكوليرا) 😕
شكرااا شباب نفير كوستي ولجنة اطباء السودان المركزية جريدة الهدف حزب البعث العربي الاشتراكي ، كل زول قدر يكافح الوباء بالبيقدر عليهو ولو سطر في صفحتوا (إنتو بتشكلو اجمل صفحات الإنسانية)😊حاجة بسيطة ممكن تعملا تكون سبب في نجاة زول من الموت 👌
جغمة أخيرة : (بدون وصاية)
اغاني وأغاني دي ملحوقة كدي اقرعوا الكوليرا لانها لو استمرت كدا السنة الجاية ماحايكون في برامج ولا مشاهدين 💔💔ماتبقوا زي عزابة الكوتشينة ديك، وباء بيستدعي اعلان طواري الغناء والرقيص في شنو ؟؟!!!! نحن شعب بلا حكومة خلونا نحكم روحنا ونوعي الناس😕😕😕
#الكوليرا_في_السودان...

ميرغني سوار الدهب

518 views09:23