#بعرف بت قالت إنها كانت متخاصمة مع صحبتها قراااابة الأربعة سنوات ... وخلاص بعد ما جا اليوم القررت فيهو إنها تمشي عشان تصالحا .. طلعت من البيت ومشت ليها في بيتم .. بس إتفاجئت بإنو أسرة صحبتها إرتحلو من البيت دة ليهم قرابة ال3 سنوات ...👌
وبعد محاولات تفتيش عديدة قدرت تتحصل علي العنوان الجديد وكمان رقم التلفون بتاع صحبتها ...📱
بس العنوان الجديد في مدينة تانية خالص ومحتاج سفر .. في البداية كانت عايزة تكلما في التلفون وتوريها بي مجيها بس قررت إنها تعمل ليها مفاجأة وكدة .. وفعلا البنت رجعت البيت مباشرة ولملمت شوية هديمات في شنطة صغيرة وكلمت أخوها عشان يسافر معاها .. وأخوها وافق بكدة وسافرو تاني يوم طوااالي .. 🚀
وطول السكة كانت مبتسمة وبتحاول ترتب في كلام وصيغة إعتذار جميلة ودخول جميل عشان المفاجأة تكتمل وما تدي صحبتا أي مجال لرفض الإعتذار #ولاااا_بكلمة واحدة ..✋
المهم وصلو مدينة صحبتها هيا وأخوها وأجروا ليهم تاكسي ومشو طوالي علي العنوان المذكور ف الوصف ... بس بمجرد وصولهم لبيت صحبتها لقوا في صيوان بتاع عزاء .. وبعديها بدقايق إكتشفت إن دة العزاء هوا العزاء بتاع صحبتها الماتت منتحرة بسبب إكتئاب حاد وهيا من الصدمة لا قدرت تعزي ولا قدرت تعتذر لي صحبتها ولو #بكلمة_وااااحدة ..✋
ورجعت البيت وهي قلبها مكسور والدنيا مسخانة ليها وما بتردد ف طريق الرجعة غير " #ي_ريتني_جيت_بدري_شوية 😭
_ #بعرف ولد مقطوع من شجرة ويتيم لا أم ولا أب ولا عائلة .. بس مجتهد ومنجز في حياتو وناجح جدا .. بيحب ليهو بنت 6 سنين .. ❤
بس كان دايما بيخاف إنو يمشي ويتكلم معاها ويتردد إنو يصارحها بي حقيقة مشاعروا تجاهها وكان دايما ملازمو إحساس فوبيا الرفض .. بس تفكيرو كان بيرفض الحاجات دي تمااااما ..❌
ويوم ما #قلبو قدر يسيطر عليهو وعلي تفكيرو قرر إنو يمشي يصارحها ويقول كل الجواهو وزي م تجي تجي ... قال لالا أنا أعملا ليها مفاجأة وأمشي عدييييل أتقدم ليها رسمي وبرضو زي م تجي تجي ...😂😂😂
المهم صاحبنا مشي السوق وإشتري أحلي لبسة وآآآآخر قشرة وأحلي عطور وشوية هدايا وطوااااااالي علي البيت ... 🚀
وأول م وصل شارع البيت لقي صيوان بتاع حفلة شغالة وناس مهججة ..
" الجاني في بالي والجا في بالكم هسي دة هوا ولا خطر علي بالو للحظة 😂😂😂" ..
المهم إفتكر إنها حفلة جيران والسلام .. وعشان هوا بيعرف معظم ناس الحلة وعلي حس القشرة القاشرا دي وكدة قرر إنو يمشي يبارك للعريس والعروس ..😂😂
وخشة جوة الصيوان وبقي يدااافر عشان يصل للكوشة ويبارك ويبشر للبعرفو والما بعرفو هههههههه ... وبعد تعب شديد قدر إنو يخترق الحشود المهججة دي ووصل .. ويا ريييييتو ما وصل .. ✋
لقي البت الجاي يتقدم ليها زااااااتا هيا العروس .. وأكيد م محتاجين مني أوصف ليكم حجم الدهشة والصدمة الحصلت ليهو ف اللحظة دي ..👋
رجع البيت وهوا قلبو مكسور والدنيا كلها مسخت ليهو وما ردد إلا نفس الجملة القالتا صاحبتنا فوق " #ي_ريتني_جيت_بدري_شوية..😭
- #بعرف واحد إتشاكل مع أمو ومشي خلي ليها البيت قريب ال4 شهور لا يعرف عنها حاجة ولا هيا تعرف عنو حاجة .. بس هيا كانت دايما بتحاول تصل ليهو وهوا كان علي قدر م يقدر بيحاول إنو يختفي وما يخلي وراهو أثر ..👣👣
المهم الدنيا إتعكست عليهو وورتو الويل وما ضاق غير العذاب في الكم شهر الغابهم عن أمو ديل ... المعفن يا دااااااب عرف يعني شنو أم ويعني شنو أمان ويعني شنو حنان ويعني شنو بني آدم ممكن يضحي بي سعادتو ويحزن عشان يخليك إنتة تكون سعيد ويطلع الحزن من جواك .😣😔
و في اليوم الإتصالح فيهو مع نفسو وقرر إنو يرجع لي أمو ويعيد الطعم الحلو لي حياتو من جديد .. للأسف كان فات الأوان .. 😔
أول م رجع علي البيت " ما لقي صيوان زي ما إنتو متخيلين ههههههههه بطلو #نكدية ياخ 😂😂😂😂 "
ما لقي صيوان لأنو أمو #صصصصلا كانت #ميتة بقهرتها عليهو بعد 45 يوم بس من غيابو .. 😭
طار طيران زي المجنون علي قبرها ورقد من فوق ليهو كإنو بيحضنها ويبكي بدل الدموع دم ويقول ليها " يمة 😭 أرجعي ليا دقيقة بس أصالحك 😭 وتعفي لي .. يمة😭 .. يمة 😭.. يمة ..😭 نفسي أشوفك يمة مشتاق ليكي يمة 😭😭 دقيقة واااااحدة بس والله 😭😭😭 يمة بس عليكي الله أرجعي دقيقة بس يا يمة 😭 يمة😂 يمة😭 يمة "
ورجع للمكان الكان مختفي فيهو وفي الطريق ما كان بيردد غير " #ي_ريتني_ما_بعدتة_منك_يوم_يا_يمة_أعفي_لي😭😭😭😭 " .
#أظن_الفكرة_وصلت...✋
اننا بنضيع سنين وناس بنحبهم عشان بنخاف من رد الفعل او كبريئنا بيمنعنا او عشان مية سبب ما ليهم أي لزوم ... ❌
انطقوا واتحركو واتكلموا وقولو الجواكم قبل ما الوقت يجري ويفوت الأوان … عاتبوا انسوا سامحو وإتصافوا ..👋
والله الزعل بروح بي كلمة واحدة بس تكون حلوة ومن صميم قلبك .. وبي لمسة يد حنينة أو حضن دافئ ...💞
قصة منو الغطان دي ما تخلوها تبقي عائق للمبادرة بالخير والإعتذار .. لأنو ممكن عادي جدا يكون الإنتة مستنهيو هوا كمان مستنيك .. والعك

س .. وفي الحالتين إنتو عايزين الرجوع والتصافي بس م عندكم الإتنين شجاعة الإعتذار ..💪
كلمة يا ريتنى دى مؤذية جدا .. وشعور انك اتاخرتة بثواني وانو الوكت فات دا مدمر وقاتل شديد ...😔
الناس تتصالح وتتصافي وتعبر عن الجواها لو كان حب أو إعتذار أو غيرو .. علي الأقل عشان تنومو وضميركم مرتاح إنو مافي زول زعلان منكم وإنكم إنتو فعلا عملتو العليكم وبالزيادة ...👋
وزي م أنا قلتة قبل كدة ... " إني بحب وبحترم جدا الناس #البتتناسي الغلطة عشان خاطر #البيناتهم .. مش البينسو #البيناتهم عشان خاطر #الغلطة

حكاية بالعامية السودانية.

#قروي_بهرته_أضواء_المدينة

تأليف : احمد صلاح سوان
الحلقة التالتة
#الكفتريا
في الصباح كل واحد فات محل شغلو وخلو يحى براهو في بيت العزابة قالو ليهو الليلة زبط لينا حلة كاااربة واخد راحتك وبعد بكرة نشوفو ليك طريقة شغل. .... كوكو الاغبش قال ليحى عليك الله اظبط لينا حلة زي ايام زمان لامن نكون في الزراعة ، يدك طااااعمة خلاص يا اخوي في الاكل يحى قال خلاص كويس أبشروا..... تجو تلقوني عملت ليكم ملاح بامية سمحة جبتها معاي من البلد من زراعة هارون ،ّ
مع المغربية جو راجعين ولقو يحي ظبط حلة البامية ، بعد صلاة العشا ختو الاكل واي واحد بشكر في يحى ويقول يا سلاااام ياخ امانة ما ملاح وعصيدة العيش مااااكنة تسند البطن ، والله خالد أب جاكومة قال والله دي دايرة ليها شاي صاموتي كافر مشى شدة براد الشاي وجا يحصل قيم الضمنة ، وأثناء الونسة حسن ود ريسة قال ليحي يازول باكر تمشي تنزل شغل في كافتريا الجامعة االشغال فيها انا ، كلمت ليك سيدا ، بس ما تشرط عينا ، يحى قال ابشر يا زول حررررم بشرفك انت بس سلمني الشغل و خلي لي باقي الكلام....
والصباح بدري طلع يحي مع ود ريسة واستلم شغلو بالكفتريا اللي هو جرسون بترابيز الكفتريا ، ده انسب شغل ليهو بالكفتريا كقروي، مستحيل يقدر يمسك شغل الطباخ ، مهما كانت ايدو طاعمة في الطبيخ ، لانو اكل البندر ما زي القرية ولا هو حلة جنقو .
بنهاية اليوم جا ود ريسة طلع مع يحي رجعو بيت العزابة عشان يحى جديد بالمدينة وخايف عليهو يروح ، رجعو البيت زي اي يوم ما بختلف الروتين كتير ، اتعشو وعملوا واجباتهم وقعدو يلعبو ضمنة ، يحي ختة سفة تمباك ورقد يستعد للنوم ، بس قبل ينوم بدا يسرح في جو الشغل والطلاب الطالبات الجميلات المنعمات المسرفات في ادوات التجميل ، طبعا يحى ما بعرف في ادوات تجميل النسوان غير الودك والدلكة وزيت الكركار .
#يتبع

عضلات القراية :
دي بالمناسبة عكس القراية أم دق.
فضلا ركز معاي كويس, الكلام الحا أكتبو في البوست ده ممكن يغير حياتك.
غالبا كلنا بنكون عارفين كويس نحنا مفروض نعمل شنو عشان نكون ناجحين (بمقاييسنا), بنبدا بقوة في لحظة حماس لكن ما بنقدر نواصل.
حأحكي ليكم عن حكايه كلنا حصلت لينا, أنا و أنت و إنتي, اهلنا بيسموها فورة اللبن.
عادل امتحن شهاده و ما جاب درجه كويسه, شاف نتايج و فرحت اصحابو النجحو, شاف خيبة الأمل في ملامح اهلو واصحابو و زعل و انب ضميرو وجاتو نفسيات و بعد كم يوم قرر جادي انو حايمتحن السنه الجايه و حيجيب درجه تحقق أحلامو و يبهر بيها كل الناس -دي إسمها لحظة حماس-.
السنه الجديده بدت و عادل طلع الكتب و نظمها و قرر جادي انو كل يوم حيقعد يقرا 3 ساعات. و ضرب الموضوع ولقى انو حيكمل المقرر في تلاته شهور و تاني يبدا من جديد.
كده عادل بيطبق في خطوات فورة اللبن زي ما هي. عادل مركز مع الفايده و ناسي العاده.
عادل حيبدا أول يومين و بعدين حا يقيف, كلنا عارفين النهايات الحتميه لي الخطط من النوع ده. و يا ريت لو الموضوع بينتهي لحدي هنا, بعد داك بيبدا تأنيب ضمير و نقصان ثقه و كوم مشاكل.
المشكله وين؟؟ المشكله انو عادل عندو مشكلتين و هو بحاول يحل في مشكله واحده, بحاول يحل في المشكله التانيه اللي هي مابتتحل إلى بعد ما يحل المشكله الأولى.
مشكلة عادل الأولى انو ما عندو عادة القرايه, زيها زي أي حاجه في الدنيا, القرايه محتاجه عضلات, و عادل ماعندو.
المشكله التانيه انو عادل محتاج يقرا المواد عشان يجيب فيهم درجه كويسه.
كل الكان بفكر فيه عادل انو يقرا المواد و يذاكر عشان يجيب درجه كويسه. و ناسي انو عشان يصل للحاجه دي لازم في الأول يحل مشكلة العضلات المافي دي.
طيب يا عادل أنا حا أديك خطه هنا, ما حتألمك و حتزبطك, ما حا اطلب منك أي حاجه ما بتقدر عليها , أنسى موضوع التلاته ساعات و أنسى الساعتين و أنسى الساعه, أعمل الحاجه الأنا بكتبها ليك هنا و إذا أمورك ما زبطت تعال بعد شهرين ووريني في البوست ده.
طيب عشان ما عندك عضلات, خلينا نبدا بـي موضوع العضلات ده (عضلات القراية), و ضمنيا حا نستفيد حاجات تانيه.
أول حاجه, وطبعا دائما و ابدا إذا ما عندك رغبه أنا ما حا اقدر أساعدك, و مافي زول تاني حا يقدر يساعدك.
ثانيا, إذا كان عندك رغبه في إنك تنجح و تغير حياتك وريني ممكن تقعد تقرا مرتاح كم دقيقه في اليوم (كم دقيقه ما كم ساعه)؟ تقرا تقرا , مافي تلفون مافي فيسبوك مافي وتسب, أنت والكتاب والقلم, تقرا عشان نفسك , ما عشان أبوك , ما عشان الواجب, ما عشان الناس, حأفترض إنك حاليا و بنصحك إنك ماتزيد من 20 دقيقه في البدايه, إذا اقل من كده مافي مشكله, أنت لازم تكون متأكد إنك بتقدر تقعد الزمن ده كل يوم مرتاح من غير مجهود كبير.
في المرحله دي أنا بحذرك ثم بحذرك من إنك تزيد "دقايق" القرايه, ده أكبر غلطه ممكن تعملها, دي غلطه ممكن تضرب ليك الخطه دي كلها في قلبها.
خليني أحكي ليك هنا قصة الراجل الكان بيقوم الليل (ما عندي ليها أي مرجع, وممكن تكون خيال علمي, سمعتها زمان لكن ما عارف من وين, لكن منطقيه), الراجل ده كان كل يوم , كل يوم بيصحى بالليل بيصلي ركعتين قيام ليل, و بنوم, الشيطان قدر ما حاول يوقفو ما قدر,قام الشيطان غير الخطه, عمل معاه الخطه الدايما بتضرب بـي كل خططنا عرض الحائط, بقى بوسوس ليه انو يزيد عدد الركعات. ياخي انت ما كدا كدا صحيت (وسوس الشيطان) و اتوضيت و واقف في مصلايتك, ما ح تخسر كتير, يعني تصلي ركعتين بس؟؟!!! الراجل زادهم بقو اربعه, تاني الشيطان وسوس ليه , تاني زادهم بقو سته ركعات, تاني وسوس ليه إنو يزيدهم فزادهم بقو 8 ركعات. بعد كده الموضوع بقى بسيط, بعد ده بقى ساهل شديد إنو الشيطان يقنع الراجل ده إنو ما يقوم للصلاة, لأنو الراجل ده عضلاتو كانت بتاعت ركعتين , ال 8 ركعات محتاجه تحفيز كتير(أكتر من العندو) عشان يقوم من السرير, الراجل كان مركز مع الفايده و ناسي العاده.
فا دي اهم نصيحه في البوست ده , ما تزيد ساعات القرايه في المرحله دي, تزيدهم بتين ؟؟ أنت حا تعرف بعد فتره حيجي وقت حتحس فيه إنك اتعودت و انو الموضوع ده بقى ساهل جدا و ما مضايقك خالص و حتحس إنك ممكن تزيد زمن القرايه "شويه" (خت لي خطين تحت شويه دي) و "بحب". عموما ما قبل 20 يوم كده.
خليني أشاركك البحث الإتعمل في جامعة University College London (راجع التعليق الأول) و إتنشر في European Journal of Social Psychology, البحث ده شارك فيه 96 نفر , كل واحد فيهم اختارسلوك جديد ما كان عندو, و بدا يطبق فيه في حياتو بصوره يوميه. نتيجة البحث كانت انو السلوك الجديد بياخد ما بين 18 يوم لي 254 يوم عشان يبقى عاده, مع انو البحث اتعمل في 12 اسبوع لكن الباحثين قدرو يقدرو(بتشديد الدال) ال 254 يوم دي بإستخدام المعلومات الجمعوها خلال فترة البحث, و على العموم ما مهم بالزبط كم يوم المهم إنو نعرف انو موضوع بناء عاده جديده ده موضوع ممكن ياخد

زمن , لكن لما يحصل حياتنا بتتغير.
في الفتره الأولى دي أنسى إنوكمية الفايده الحا تستفيدها من القرايه دي حتكون بسيطه و ركز مع إنو تبني عاده جديده, عاده حتخليك في المستقبل القريب تقرا و أنت مرتاح, تستفيد و أنت ريلاكس.
طيب أنا كان قلت ليك إنو في فوائد تانيه لي موضوع القرايه البسيطه الفي البدايه دي, فوائد غير انو بتساعدنا نبني عاده, و بعدين نستخدم العاده عشان نقرا من غير تعب و من غير ضغوطات.
واحده من الفوايد دي هي نظرتنا لي نفسنا, ما حا تتخيل انوأنت نظرتك لي نفسك حتتغير قدر شنو, و دي حاجه مهمه جدا جدا, إنك أنت تكون مبسوط من نفسك لانك بتنفذ في الخطه الانت كتبتها لي نفسك. عموما كل ما نوفي بـوعد وعدناه لي نفسنا, ثقتنا في نفسنا بتزيد و بنحب نفسنا أكتر. و بما إنو الوعد هنا بسيط فتنفيذو بيكون بسيط لكن نظرتنا لي نفسنا حتتغير بقوه في كل مره نوفي بالوعد ده و نقعد ال 20 دقيقه أو أقل دي .
تاني واحده من الفوائد المهمه, هو احساس الإنجاز, ده بقى داير ليه بوست براه, لكن خليني اوعدك انو اجمل إحساس ممكن يبسطك في حياتك هو احساس الإنجاز ده, علميا الإنجاز هو واحد من أقوى عوامل التحفيز, يعني كل ما تنجز حتنجز زياده :) , ممكن تراجع (Herzberg's motivation-hygiene theory).
طبعا أنا هنا أخدت القرايه بس كمثال, لكن القاعده بتنطبق علي كل الحاجات العاوزين نتعود عليها, ابدأ حته حته, و لما تتعود تاني زيد حته.
عاوز تجري , ابدا بـخمسه دقايق كل يوم وواصل عليها لحدي ما تحس بيها بقت عاده. عاوز تكتب, ابدا بـي سطرين كل يوم لحدي ما تتعود, عاوز تعمل بش أب ابدا بـي اتنين كل يوم , عاوز تقرا قرآن ابدا بـي ايه كل يوم.
في الاخر عاوز أقول ليك, مع انو في الاخر الهدف بتاعنا إنو نتعود و بعدين نزيد الكميات البسيطه دي لكن إنت حتستغرب من كمية الإنجاز الممكن تعملو حتى بالكميات البسيطه المستمره دي .
الليله حانترجم مثل اليوم لانو مهم و عميق, ركز كويس, جيم ريون (رياضي أولمبي) قال ليك:
التحفيز هو الحاجه البتخلينا نبدا سلوك جديد لكن العاده هي الحاجه البتخلينا نواصل في السلوك ده.
الحماس بيخلينا نبدا لكن إذا عاوزين نواصل محتاجين "عاده".
محمد نورين ,
تكساس, الولايات المتحده,
16-6-2017
“Motivation is what gets you started. Habit is what keeps you going.”
Jim Ryun

3mr ..

منقووووول

في الآونة الأخيرة كثر زواج الشباب السودانيين من اجنبيات بصورة ملحوظة وتنوعت الزوجات وكانت الغالبية اثيوبيات
لكن تقدمت المغربيات بقوة واصبح الزواج منهن يقارب زواج السودانيات في الكم والكيف ، بل احيانا يفوقه
الاسبوع الفائت حضرت زواج واحد سوداني من مغربية والامر عادي ولكني اكتشفت انها زوجته المغربية الثانية والاثنان في عصمته
واخبرني متزوج منهن ان قريبه متزوج ثلاثة من المغرب ومقيم معهن في المملكة السعودية
الآن في الامارات يمكنني ان اعد لك من واحد وحتي العشرين لمتزوجين مغربيات دون توقف
انتشرت الظاهرة وباتت تهدد الشابات السودانيات ... واذا افترضنا حسب قول السفير السوداني بالمغرب ان حوالي مئتين سنويا
من السودانيين يأتون لتكملة اجراءات زواجهم من مغربيات، تفقد في المقابل مئتين فتاة سودانية فرصة الزواج من شاب سوداني
اذا ما السبب في هذا الاستنزاف الذكوري ؟
- الزواج من مغربية غير مكلف وبسيط في منصرفاته خاصة الذهب الذي تسيل له لعاب السودانيات
- الملاحة والجمال النسبي للمغربيات
- مقدرة المغربيات العييش والتعايش مع مختلف الظروف
هذه بعض مبررات المتزوجين منهن

بتاع الركشة بحكي قال
كان في شارع الستين
أشر ليهو واحد مبركن ببرادو جنب واحدة ست شاي

وقف ليهو وصاحب العربية طلب منو مساعدة إنو العربية أبت تدور وبتاع الركشة نزل وحاول يدورها وحلفت ما تدور
المهم الراجل سيد العربية بدأ يقلق ويعاين للساعة وقال لبتاع الركشة خلي العربية أرح وديني جامعة مأمون حميدة أجيب بتي حتي نجئ نشوف العربية
قفلوا العربية ومشوا علي الجامعة ولمن وصلو بتاع العربية إكتشف إنو نسي تلفونه في العربية فقال لبتاع الركشة تلفونك أضرب لبتي وشال التلفون إتصل وقال ليها إنتي وين أنا في ركشة قدام الباب اها بقي بتكلم لحدي ما دخل جوه الجامعة

الزمن طول والراجل ما رجع ولمن مرت ساعة بتاع الركشة حس بالكمين فقرر يرجع محل العربية البايظة عشان تلفونه قيم جدا
فلما وصل لقي البرادو مافي فسأل ست الشاي منها

قالت ليهو إصلا معاهو صحبو كان قاعد بشرب معاي شاي ولمن إنتوا مشيتو بالركشة مشوار هو طوالي قام دور العربية ومشي !!!!

فهمتوا وصلنا وين؟؟!

حكاية بالعامية السودانية...
#قروي_بهرته_أضواء_المدينة

الحلقة الرابعة
#فضفضة

يحى قضىى الأسبوع الأول بالشغل وكان كل يوم بنبهر بمظاهر المدينة الظاهرة في طريقة لبس طلاب الجامعة واسلوبهم في التعامل .
في الشهر التاني اتقرب يحى لزميلو بشتغل معاهو في الكفتريا مهدي ود الحاجة. شاب ظريف وملحلح طول بالشغل في كفتريا الجامعة ، ، يحي جا الصباح وبنضف الكفتريا مع ود الحاجة وبرتبو اساس الكفتريا عشان يبدو يوم جديد ، وأثناء شغلهم بتونسو ، ود الحاجة قال ليحي شايفك من ما جيت تبحلق ساااااي في البنيات الداخلات ومارقات ، خبارك يا زول ما عندكم نسوان في حلتكم ،
يحى قال ليهو عاد زي ما قال لي هارون الما في بيت ابوك بخلعك .
ود الحاجة سأل هاروون ده منو يا يحى ....؟
يحى اخد تنهيدة واتذكر البلد وقرن حواجبو بحنين وقال هارون ده زولا كلس خلاص وكااارب ، صحبي شديد وأخو إخوان في الحلة هناك ، ما بتعرفو انت لأنك ما من حلتنا ، هارون ده انا بعت ليهو توري عشان اركب اجي البندر .
ود الحاجة قال الترابة في خشمك ، في زول عااااقل كده ببيع بهيامو ويجي البلد الخربانة دي غايتو اتلومت يا اخوي يا يحى ، انا لو كان عندي ديك ساي املكو حقي انا ما كان جيت البندر ،إلا ابوي راجل فقيييير وورثنا الفقر مات وخلا لينا عنقريب رجلو مكسورة وامو العجوزة اللي هي حبوبتي ومرتو الكرهتني العيشة ، قمت شردت وجيت البندر ، اخخخخ يا يحى قلبت علي المواجع.
يحى قال لود الحاجة يازول ما ترمي بلاك علي اسي انا قلت ليك اتذكر ولا احكي لي ما برااااك البديت.
ضحكو الاتنين سوا ، ضحكوا والايد في الجرح ضحكوا والوش منطرح ......... #يتبع

حكاية بالعامية السودانية
#قروي_بهرته_أضواء_المدينة

تاليف: احمد صلاح سوان

+ الحلقة الخامسة. +

#التلاتة_بنات
بدا الدوام عادي زي اي يوم طلبات سندوشات وعصائر وطلاب موزعين على ترابيز الكفتريا ، يحي وو د الحاجة بلمو الاكياس وينضفو بواقي الاكل .
جو تلات بنات داخلات الكفتريا ، فجاة الناس صنو ، وهدوء مفاجئ عمى المكان ، يحى انتبه للحاجة دي ، وطوالي سال ود الحاجة منو ديل البنيات السمحات الدخلن ديل ، أول مرة اشوفهن ، قال ليهو التلاتة بنات ديل صحبات وما بتفارقن بقولو عليهن البلابل ، يحى نططت عيونو وقال عليك الله ياهن البلابل البغنن عشة صغيرة كفاية علينا وبغنن نحنا فرشنا السكة ورود...؟
قاليهو هوي هوي يا الغبيان ديل ما هن بس سموهن عليهن ساي عشان بمشن سوا وما بتفارقن كتير ، المهم الطرف ديك القصيرونة دي منال ساكنة بالداخيلة واهلا في الاقاليم بيقولو ليها خمس سنين بتقرا في تانية جامعة بليييدة ولطخة ساي ، والتانية دي نعمات الفكي مافي زول عارف عنها شي غير انها تاجرة قدر ظروفك لاي حاجة تخطر ببالك زولة شيطانة خلاص بس طيييبة ، واما البنية النجفة الاخيرة دي اسما غادة محمد ابوها محمد الكردي طبيب عايش في النمسا مع امها بدرية جرجس امها اصولا قبطية وهي ناشطة في حقوق الإنسان شغالة بمنظمة في النمسا ، غادة محمد بت زوات مدللة كل طلباتا مجابة، لو طلبت لبن العصفور بجبوهو ليها ، بتقرا في السنة التانية بالجامعة .
يحى اندهش للباك راون الاداهو ليهو ود الحاجة ، قال ليهو انت ما دام عارفن كدا كويييس ياخ ما تلم ليك في واحدة وتعرسا ، ود الحاجة ضحك وقال يا اخوي ديل ما توبنا ولا بعاينن لينا وزي ما قالو جربان بياكل بعينو ،البنات اكلن سندوتشاتهن سريع سريع وفاتن على المحاضرة ، ود الحاجة قال ليحى ارح ارح نلم باقي حاجاتن الاكلوها دي ... ، مشو مسحو التربيزة ود الحاجة شال النفايات وداها وخلا يحى بمسح التربيزة ولما يحى بمسح شاف حاجة بتلمع تحت التربيزة ، دنقر رفعا لقاهو حلق دهب رفعو وقال هلا هلا يا الدهب المجمر الفي الضلمة بريقو شالو ختاهو بحيبو ......
يحى بقا اليوم كلو شغال وسرحان في البنيات التلاتة واجسامن المليانة ، وجضومن المنتفخات وفيهن البدرة وخافي العيوب تقول زلابية بسكر مسحون ، اليوم انتهى يحى رجع بيت العزابة وكغير العادة بقا سااااكت وسرحان
كوكو الاغبش جاهو وسالو مالك يا يحى الليلة ما عوايدك سااااكت التقول ضاربك شيطان ، يحي قال ليهو ...
ﺍﻟﺘﻼﺗﻪ ﺑﻨﺎﺕ ﻻﺑﺎﺳﺎﺕ ﺗﻴﺎﺏ ﻭﻣﻘﻨﻌﺎﺕ
ﻭﺍﺍﺍﺍ ﻋﺰﺍﺑﻲ ﺍﻟﻠﻴﻠﻪ
ﺷﻐﻠﻦ ﻗﻠﺒﻲ ﻟﻤﻦ ﺑﺎﺹ ﺍﻟﺮﻭﺻﻴﺮﺹ ﻓﺎﺕ
ﺍﻻﻭﻟﻰ ﻃﺎﻟﻌﻪ ﺯﻱ ﺍﻟﻨﻬﺎﺭ
ﻭﺍﻟﺘﺎﻧﻴﻪ ﺑﻲ ﻟﻮﻥ ﺍﻟﺼﻔﺎﺭ
ﻭﺍﻟﺘﺎﻟﺘﻪ ﺑﻲ ﻟﻮﻥ ﺍﻟﺨﺪﺍﺭ
ﺣﻠﻮﺍﺕ ﺭﻣﻮﺷﻦ ﻳﺠﺮﺣﻦ
ﻭﻓﻲ ﻗﻠﺒﻲ ﺍﻣﺴﻦ ﻭﺍﺻﺒﺤﻦ
ﻭﺍﺍﺍ ﻋﺰﺍﺑﻲ ﺍﻧﺎ ﺍﻟﻠﻴﻠﻪ .
كوكو الاغبش ضحك بأعلى صوت لامن بقية العزابة البلعبو الضمنة لاحظو قالو ليهو ضحكنا معاك يا الاغبش ، قال ليهم صاحبكم شاف بنيات البندر المملسات ومنعمات ومخو اتلحس بقا بهضرب بيهن ، الجماعة ضحكو ضحكة جماعية لامن يحى انزعج منها وقال لي كوكو اصلك زول فضيحة من ما قمتة الله ياخدك ياخ ، يحى دردم سفة تمباك ختاها رقد نام .
#يتبع

حكاية بالعامية السودانية

#قروي_بهرته_اضواء_المدينة

✏تاليف: احمد صلاح سوان

. الحلقة السادسة
"بياض نية"

الصباح قام بدري شديد لقا خالد ابجاكومة قاعد في مصلايتو بعد صلى الصبح ماسك سبحتو بيقول في اوراد الطريق ... لا اله إلا الله والله اكبر وسبحان الله ، يحى صبح عليهو وقال ليهو الله يقبل ، شيخ خالد قال امين يارب ، قال ليحي الليلة مالك طالع دغش كدة ...؟ قال والله ياشيخ خالد ضحك الجماعة فيني امس ده ما دايرو يحصل مع الصباح ويعكر مزاجي مابنتظر حسن ود ريسة امشي معاهو سوا ، بقيت عارف درب المشية والرجعة ، واصلا بايت زعلان وما داير ود ريسة يتكلم معاي بالموضوع ويكمل سخرية امس فيني شيخ خالد قال ليحي تعال تعال اقعد في المصلاية جنبي اسمع كلامي وبعداك امشي ...يحي جا قعد ، شيخ خالد لمة سبحتو بعد ما مسح وشو وقال دعاهو ، قال شوف يا يحى يا اخوي اسمع نصيحتي دي ، البندر بلد لامة خلق الله القلوبهم وسخانة ونضيفة اعمل حسابك ، ما تغرك الدنيا بنعيما ما دايرك تبقا الفقران الخلعتو النعمة .... يحي سمع كلام شيخ خالد ومرق فات،
وصل كفتريا الجامعة وبدا دوام شغلو عادي ، لغايت ما جا زمن الفطور بقا مخلي بالو على الباب كل ما يجن بنات داخلات بعاين ليهن وتاني بواصل شغلو ، فجاة أثناء مراقبتو للباب جات غادة داخلة متالقة زي الصباح الشمس طالة ومشرقة زي وردة طلت بي عبيرا ورونقا ، يحي تقول صبت فيهو مطرة قلبو وقف وخشمو نشف وريق يا الله بلاهو ... ، غادة قعدت براها بنفس التربيزة الكانت فيها امس ، قعدت وسارحة بتداعب خصلة من شعرا المتدلية على وشها ، واخينا يحى متابع حركاتا وسكناتا ، قعدت وجسما مالي الحتة ويحي بقول في نفسو يا أرض احفظي ما عليك ، مشا عليها وقال ليها يا الاخت سلام عليك ، غادة رفعت عيونا شافتو لابس مريلة خضراء ملكعة ، ردت عليهو باسخفاف أهلا خير .. ؟ قال ليها معليش على الازعاج بس امس لقيت الحلق ده واقع تحت التربيزة دي لامن كنت بنضف بعد مشيتي مع صحباتك ، شوفيهو لو ده حقك او حق واحدة من البنات الكانن معاك ...؟ شالت الحلق وقالت ليهو شكرا ...!يحى العفو لا شكر على واجب فات واصل شغلو عادي وبقا ملاحظ ليها قاعدة بمكانا لا طلبت شي ولا جاها زول ....! بس مستمرة في مداعبة خصلة شعرا وسارحة ، بعد شوية جا شاب وجيه وانيق قعد جمبها بدون ما يسلم غادة ملامحا اتغيرت للأسوأ وظهر عليها الانزعاج ، وقبل مايسلم عليها الشاب بقت تتكلم بانفعال ... انا من الصباح منتظراك ياخ ليه اتاخرت علي ، الشاب سااااكت وهادئ كانو ما بتتكلم معاهو ، قال ليها اها شربتي حاجة ولا اكلتي ، قالت ليهو ما عايزة اتسمم ، اطفح انت براك ...قام من حتتو مشا جاب اتنين عصير برتقال اداها واحد قال اشربي العصير وروقي ، غادة شالت بقتين من العصير وقالت ليهو يلا اشرب عصيرك ده يا هشام وخلينا نمشي ... هنا يحى من متابعتو للحوار عرف اسم الشاب اسمو هشام بس ما عرف المشكلة شنو بينهم ، لسان حالو بيقول عليك الله دي بنية بزعلوها ، غادة وهشام طلعو من الكفتريا بس غادة من انشغالا نست الحلق تاني بالتربيزة...!
يحى جا رفع الحلق تاني و واصل يومو عادي وبعد الدوام رجع بيت العزابة ، رويتين بيت العزابة ما بختلف كتير كل الايام والصباحات والليالي شبه بعض ، ضمنة كوتشينة وفتة فول ، بس يحى بقا عندو عالمو المنبهر بيهو بقا بسرح كل مساء بعد يتعشا ويخت سفة التمباك لامن ينوم... !
⏪⏪ #يتبع

حكاية بالعامية السودانية

#قروي_بهرته_ضواء_المدينة

✏تاليف: احمد صلاح سوان

. الحلقة السابعة⏬
تاني يوم فات شغلو وبدا الدوام وكعادة يوم امس بقا مراقب الباب منتظر ست البنات تجي داخلة عشان يديها الحلق للمرة التانية ، بس اليوم توقعو خاب ، جات داخلة نعمات الفكي ومعاها امال ، يحى بدون ما يشعر جا عليهن وسالهن غادة وين الليلة ، البنات اي واحدة بقت تعاين للتانية باندهاش ، نعمات قالت ليهو يا زول قول بسم الله كدي وسلم قال ليهن السلام عليكم معليش بس قبل كم يوم جيتو هنا وفي حلق وقع منكن اديتو لغادة امس بس جاها وليد كدي طلعو وتاني نستو ، امال همست لنعمات بكون ده هشام الكريه ، خلاص خلاص يا اخينا جيبو نحنا بنديهو ليها ، اداهن الحلق وبقا راجع يواصل شغلو ، وهو ماشي نادتو نعمات سالتو انت اسمك منو .... ! قال ليها انا يحى قالت ليهو شكرا ليك يا يحى .
فات منهن وبقن يتسالن ، نعمات قالت الزول ده عرف اسما من وين ومالو مهتم كده ، امال قالت هو الزمن ده في زول بلقا ليهو حلق دهب ويرجعو يا اختي ديل ناس البلد غبيانين ساي ، نعمات بحركة غياظة قالت لامال طيب يعني انتي غبيانة مش برضو الجابك البندر زي ما بقول في البلد، جابتك القراية .... امال اتغاظت وقالت خلاص خلاص شوفي موضوع تاني عبيطة دي ، وهن قاعدات بتناقرن ويتناقرن جات داخلة غادة قعدت بدون ما تسلم نعمات قالت نحنا بايتين معاك شنو سلام الله كتير علينا ، غادة قالت يا نعمات عليك الله انا ما ناقصاك الفيني مكفيني ، امال حبت تلطف الجو قالت كدي سيبك من جو التعاسة العايشاهو ده ، وورينا حكاية حبيبك الجديد ده شنو ، غادة اندهشت وبتمتمة قالت حبيبي حبيبي منو الجديد، نعمات قالت ما قاصدين هشام الكريه بس قاصدين الجاب الحلق .
غادة.. حلق شنو وانتو بتتكلمن عن شنو بطلو لولوة ،امال طلعت الحلق من شنطة نعمات وادتو ليها ، وحكت ليها قصة يحي من ما جو قعدو لغايت ما جاهم وفات ، غادة قالت هو بالله البلد دي لسة فيها ناس رجال وامنين كده ، بعد ما فقدت الامل فيهم .
في قعدتهم ديك جا يحى ماري ماش ينضف تربيزة قاموا منها ناس ، طوالي نادت غادة يحى .. يا يحي يحي ، اخينا سمع اسمو وكانو نادهو بلبل، بالله الصوت زي رنة وتر الربابة ، أول مرة يحى اسمو يحلا ليهو . جاها وكلو حنية ، قلبو الخفيف برف وبغني اقابلك وكلي حنية واخاف من نظرتك ليا ..... يحى قرب ليها وقال نعم يا ست البنات ، قالت ليهو أنعم الله عليك ياخ . حابة اتشكرك على امانتك، امس مع الاستعجال واللخمة نسيت الحلق تاني بس ادني ليهو صحباتي ديل .... قال ليها العفو ياخ لا شكر على واجب ، وطوالي رجع واصل شغلو وهو مبسوط بكلام غادة ليهو ومسك الفوطة وبدندن بيقول .....
لابسة الطرحة وعاملة عطور
وشوفتك تجرح صيام الزول ،
المشاط في جبينك قايل قول
انتي فايتة المعاك في العرض والطول
زي فوتة المنقة للعجور .
دوام الشغل انتهى ، ود الحاجة قال ليهو الليلة تمشي تبيت معاي يا يحى قال ليهو جدا ماعندك مشكلة بس خلي اكلم حسن ود ريسة الشغال معانا هنا عشان اولاد الحلة العزابة الساكن معاهم مايقلقو ، مشا كلم حسن وطلع مع ود الحاجة.
#يتبع⏪⏪

حكاية بالعامية السودانية

#قروي_بهرته_اضواء_المدينة

تاليف✏: احمد صلاح سوان
الحلقة التامنة
¤ ضيافة ود الحاجة. ¤
ود الحاجة ساق يحى بيتو الساكن فيهو مع ود عمو الموظف ، وصلو بعد صلاة العشا هلكانين من ارهاق شغل النهار ومعافرة المواصلات ، ود الحاجة ساكن مع ود عمو بس بيتهم منفصل وود عمو موظف ومتزوج ...
ود الحاجة قال ليحي امشي اخد ليك حمام تمام واطلع لي ادخل وبعديها نمشو العشا ، بعد استحموا واخدو عشرة ونسة طلعو الاتنين على سوق الحلة ، ود الحاجة قال ليحى انت ضيفي الليلة وبعزك ، وفعلا عزاهو بعشوة ظريفة بمقياس البسطاء ، كوارع ضان وكمونية ، شربو موية باااردة بعديها يحى اترع وقال الحمدلله ، طلع كيس التمباك وكان فيهو اخر سفة ، نفض الكيس دردم سفة وختاها وجدع الكيس الفاضي ، ود الحاجة قال ليهو انت يازول لو ما خليت تمباكك ده حرم بنات البندر المفلهمات ديل ما بعاينن ليك ساي ، يحي قال ليهو يازول قول الله يهدينا بس ، ود الحاجة قال ليهو آمين ، شكلو تمباكك انتهى ورح في محل تمباك ظريف اخر السوق قالو لو ما فاطر ماتخاطر ، يحى قال يازول انا شبعاااان وبطني مستفة للحلق ، ضحكو ومشو اخر السوق ولما الليل قسم رجعو البيت ، اي واحد علق جلابيتو في مسمار ورقدو بسرايرهم الفي الحوش ، ود الحاجة قال ليحي خلينا نتونس اصلا بكرة الجمعة وماحنمشي الشغل ، قال ليهو ورانا شنو اي خلينا نتونس ساي ، اها يا يحي انت جيت البندر زي ما قلت لي اليوم داك وبعت تورك لهارون صاحبك ، بس ما قلت لي جيت البلد الكعبة دي لشنو ، يحي جدع السفة ومضمض خشمو وقال والله يا اخوي انا مرقت من البلد وجيت البندر قلت اتنور شوية بدل قاعد في حتة واحدة قلت اجرب الحياة برة الحلة امكن اتعلم لي حاجة تنفعني وكنت قاصد اقرا الا لقت قطر العلم فاتني والشغلانة بقت قاسية خلاص ، ود الحاجة قال ليهو انت قريت لغايت وين ، يحى قال نحنا ناس لوح ودواية ساي ، ياها قراية المسيد والخلاوي دي وزاتا ما كملتها ، من جزو عم رجعت الحلة وباريت الزراعة والبهايم والسرحة ، لو كان واصلت كان بقيت زي شيخ خالد اب جاوكومة ده ، ود الحاجة قال ليهو خالد اب جاكومة ده منو كمان ، يحى قال ده زول بركة ياخ زول الله ساي هو من اولاد حلتنا المعانا في بيت العزابة ، وكتو كلو بكون في مصلايتو وماسك سبحتو بقول اوراد الطريق ، ود الحاجة اتثائب وقال انا نعست والله بعد ده الننوم والصباح رباح ، يحى قال ليهو تصبح بخير ، طلع كيسو دردم سفة ورقد نام .
اصبحو الجمعة جا ود عم ود الحاجة الموظف بدق الباب صحا ود الحاجة والشمس كان ضارباهو مشا على الباب وبقش عيونو من النوم سلم على ود عمو وصبح ليهو لقاهو شايل صبارة الشاي ومعاها صحن زلابية ، شالهم ودخل لقا يحى صحا ودخل الحمام يتسوك ، شربو الشاي بعديها جا الموظف ود عم ود الحاجة شايل صينية الفطور المصلحة ختاها وسلم على يحي ، يوم الجمعة في بيت ود الحاجة انتهى مابين ضيافة فطور وشاي صباح وونسة مع ود عم ود الحاجة وتبادل اطراف الكلام عن مقارنة المدينة الكبيرة والحلة ، وصلاة الجمعة والسوق بالمساء..... يحى قضى يومين مع صاحبو والسبت نزلو الشغل بكفتريا الجامعة بروح طيبة ونفسيات متجددة .
⏪ #يتبع

👣حكاية بالعامية السودانية👣

#قروي_بهرته_أضواء_المدينة
✏تاليف: احمد صلاح سوان

الحلقة التاسعة
رجعة بيت العزابة
بدا الدوام بحماس بداية اسبوع نشاط وحيوية ونفسيات متجدده ، يحى كغير العادة بدون توهان وبدون مايسرح ويبحلق في الطلاب والطالبات المملسات ومنعمات الداخلين ومارقين زي نواب المجلس التشريعي ، قضى يحى يومو ، بنفس روتين العمل اليومي بس بحماس ونشاط ، ونهاية الدوام فات بيت العزابة ، قابلوهو العزابة وكانو غايب ليهو شهر ، بالليل يحى رقد في ناصية الحوش الخاتي فيها سريرو وبنصت لافكارو ويخت سفتو وينوم ، جاهو كوكو الاغبش وقال ليهو يحى ان شاء الله مانمت ، يحي قال لا لا صاحي بس مرخم خلاص ، كوكو قال يا يحي والله معليش انا اسف بالنسبة لليوم داك لما حكيت لي عن البنات الفي الجامعة وقمت ضحكت وباقي العزابة ضحكو، لامن اتعقدت انت، والله ما قصدي اجرحك ،بس جات عفوا ، اصلا نحنا في البندر بنفتش على الحاجة البتضحكنا ولو بالكذب فعليك الله ماتزعل مني ، يحى قال يازول امشي نوم وضميرك مرتاح انا الموضوع نسيتو والله بعد غيرت جو يومين بعيد من وشك الواحد ده ، وفتة الفول الفي طشت البلاستيك ، كوكو ضحك وقال اوع تقول البستحمن فيهو نسوان الحلة الوالدات ، يحى قال لا لا ما بقول ههههه يلا امشي امشي نوم يا كوكو والبينا عامرة .
اصبح وكالعادة كل واحد فات شغلو ، وكالعادة يرجعو نهاية اليوم عشا وكتشينة وضمنة ضحك وقرقرة .
يوم يحى بتونس مع ود الحاجة كالعادة وهم بمسحو ترابيز كفتريا الجامعة سالو ود الحاجة انت يا يحي اها الجامعة حتاجز الاسبوع الجاي لفترة شهر ونص حتسوي شنو في الفترة دي وحتشتغل ولا حتقعد ساي ?
يحى قال والله ما عارف بس بشوف لي اي شغلة أقضي بيها زمن لامن الجامعة تفتح ، قال ود الحاجة يازول كدي نشوفو لينا حاجة سوا ، قال خلاص سمح ،
أثناء ونستهم جات غادة داخالة سلمت عليهم ببشاشة ، سلاما نزل على يحي زي الموية الباردة في ريق صايم ، يحي جاب ليها موية وسالا كيف حالك قالت الحمدلله طيبة الا الامتحانات عزبتنا الايام دي غايتو الله يعديها وناجز قال ان شاء الله ، وبقا ماشي ، غادة نادتو جاها سالتو يا يحى انت في الاجازة حتشتغل وين قال ده نفس سؤال ود الحاجة لي اسي والله ما عارف بس بدبر لي حاجة ، غادة قالت خلاص لو ما عندك مانع انا ابوي مخلي لي مزرعة والراجل الشغال فيها قال داير يسافر اهلو تعال ابقا مسؤل منها فترة الاجازة لغايت ما اشوف لي زول امين ، قال ليها ابشري يازولة.
⏪⏪ #يتبع

حكاية بالعامية السودانية

قروي بهرته أضواء المدينة
✏تاليف: احمد صلاح سوان
"الحلقة العاشرة"
المزرعة السعيدة
ايام الامتحانات انتهت بالجامعة وفي اخر يوم جات غادة ساقت يحي بعربيتا وودتو المزرعة ، المزرعة قريبة من النيل في إحياء البندر الطرفية ، غادة عرفت يحي بعثمان الراجل المشرف على المزرعة ومسؤول منها ، عثمان قال ليحي خليك معاي يومين افهمك طريقة شغل المزرعة لغايت ما اسافر ، يحي قال خير يازول اصلا البهايم والزراعة دي حقتنا ، بس انتو ناس البندر عندكم شغلات تسووها ، تعرفوها براكم ، عثمان ضحك وقال يا اخوي العلم بجيه حتى البهايم اسي لو بهايم البلد بدل يسرحن في السهلة ساي وياكلن الاخضر واليابس ، بدل ده لو لموهن في مزرعة واكلوهن العلف المناسب واهتمو بيهن بنتجن حليب اكتر وبتكون فايدتن كبيرة ، مش زي انتاج البلد الحليب ما يملا جردل، هنا يا يحي البهيمة بتحلب ليها عشرين رطل ..... ! يحي نطط عيونو مندهش وقال ياخ معقول والله ماشاء الله .
يحي قعد اسبوع مع عثمان وفهم طريقة شغل المزرعة ، من علف بمواعيد وحليب بمواعيد وكميات معروفة حتى اتعلم الاسعافات الاولية البيطرية ، اصلو يحي زول مخو نضيف وبتعلم سريع .
يوم جمعة جات غادة الصبااااح ومعاها صحباتا وزملاء الدراسة جو عايزين يقيلو بالمزرعة ، يحي رحب بيهم ونضف ليهم المحل وضبح ليهم عتود صغير وكسرو , هم جو زي ستة منال ونعمات وهشام زيادة على غادة وبت وولد تاني و طباخ ، الناس اخدو راحتهم بالمزوعة وقيلو للعصرية ، اليوم قضوهو غنا ورقيص وهظار واستمتاع بجو المزرعة ، يحي بجي كل لحظة ويسال غادة اها دايرين حاجة ? غادة تقول ليهو لا لا تسلم يا يحي ، مع المغرب عملو قعدة ونادوا يحي يجي يقعد معاهم ، عملو دايرة وختو كرستالة عصير بلفوها كل مرة بتقيف في وش زول بيقول حاجة ، نكتة شعر، يغني ،المهم يقول ليهم حاجة .... لما جا دور يحي قال ليهم..
يا قاضي الغرام انا عندي ليك شكية
من قمرا دوام سارق منام عينية
هاك قلبي الدليل كسبني بيهو قضية.
#يتبع ⏪⏪

مشاركه من احد الاعضاء

عارفين ليه معظم العلاقات السودانيه "زواج، حب او خطوبه" فاشله و "خاليه من البركه" ؟؟ السبب التناقضات الفي كل العلاقات
#اوريكم_كيف

- البت عايزه عريس بصلي الصلوات ال 5 في المسجد وعلي خلق
وهي بتحب واحد معشمها بالزواج وهو بتكلم معاها 24 ساعه في اليوم من غير مايقوم يصلي 👉 تناقض
-الولد عايز حبيبتو تقطعها مع كل الاولاد حتي اولاد اهلها بس هو مابقدر يقطعها مع زميلاتو وصاحباتو من الجامعه والفيس 👉 تناقض
-البت ماعايزه عرس اقل من عرس صاحبتها الكلف 800 الف (مليون بالقديم) بس هي بتحب واحد مرتبو 800 ج يعني محتاج يلم مرتب 800 شهر من غير ماياكل ولايشرب يعني تقريبا 66 سنه من غير اكل ولاشراب 👉 تناقض
-البت تعمل علاقه 🔞 مع ولد قبل الزواج وتقول الخائن ماعرسني
والغريبه البنات يتعاطفوا معاها ده اسمو زنا والاتنين مفروض يتجلدوا 100 جلده بغض النظر هو حلف ليك انو حيعرسك ولا عمل شنو
وربنا قال "والزانية والزاني.... ) يعني ماقدم البت عبث لانو الموافقه عليها هي وجايز الاغراء منها كمان وفي السرقه قال"(السارق والسارقه) لانو كسب العيش علي الرجل 👉 ده ابو التناقض ذاتو

-البت عارفه الخلوه بالرجل حرام بس عايزه تقعد معاهو في العربيه باليل ولا في بيت فاضي ولا حته ميته عشان يحلو مشاكلهم وهي بتعرف اكتر من الشرع 👉 تناقض

-الولد يعمل السبعه وزمتها ومايخلي دابه في الارض الا ويقل ادبو معاها بس لمن يتزوج عايز مرا بطهارة مريم 👉 تناقض
لا يا شفت طيب البنات الانتا خربتهم ديل يمشو للناس المحترمين لا يا حلو انتا حيجوك بنات خربهم غيرك

وفي البقول ليك ما انا تبتا حتجيني واحده محترمه
لا ياظريف حتجيك واحده قليلة ادب ذيك وتايبه
-المتزوجه عايزه تعمل علاقه وتحب كمان من ورا زوجها بدعوي انو زوجها ما رومانسي وماشغال بيها لاكمان بتحب وبتغير كمان 👉 ده ام ابو اهل زفت ام التناقض ذاتو
الحياة مامشت مع زوجك اتطلقي اخير كلام الناس من غضب ربنا ومن الرجم

#عارفين
عمرنا ما حنكون في علاقات سليمه ومعافاة لو ما حلينا التناقضات دي 👆👆

#انتي من البدايه شوفي زولك الفيهو مواصفاتك وماتعتمدي علي كلام بقولوا راقبي افعالو كويس واي مخالفه تعمليها عشان خاطرو اتاكدي انو حيحسبها عليك وانتي الحتدفعي تمنها ....

#انتا ماتعمل فيها شفت ومقطعها مافي زول وصل اخرها صدقني ...

#الناس تخت عقلها في راسها وتبدا تعالج التناقضات وتتعامل معاها قبل ما ترسم صور لاولادها ♥♥

لوموهو اللاهي في الغرام بالله
قولو ليه الحب شي طبيعي إلهي

الغرام مابخير بين كبير وصغير
من زمان الحب امرو فينا يحير
ياجميل يانضير خلي هجرك غيّر
بكرة والله الحب بنلقي عمرو قصير

نادو لينا البنا يبني لينا الجنة
يبني طوبة حب ويرمي مونة محنة
بالكتاب والسنة يعقدو لينا اهلنا
انتصر ياحب نحنا نلنا املنا

سيرونا لنيلنا وسووا لينا عديلنا
فوق جناح الحب الملايكة تشيلنا
يوم تقلب خيلنا فوقا شبان جيلنا
والزغاريد حب خلي مافي مثيلنا

العاقبة لي حبانا وللبشاركو معانا
نحنا ناس الحب الله مابنسانا
نحنا صنا هوانا بشرف وامانة
ياجمال الحب وياجمال دنيانا

ابيات نالت اعجابي الشديد

بقلم/ وئام عبدالباقي

ما كل الترافقو اخوك
وما كل الاباك عدوك
ميزان الفرااسه عروك
وما كل الفرح مبروك

ما كل البرييدك صرح
ما كل البيبكي مجرح
جوف الافعى مابتقرح
والاشقاك لغيرك فرح

ما كل البينضم عارف
والراي السديد بخالف
الحظ السمح مابحالف
وماكل القلوب بتوالف

المغرور مشيو الرقصة
سيد الحاره مابتوصى
ما كل الحديث بتقصه
والغنا ما بدورلو منصه

العمران مصيرو خراب
ولبن الطيرة ما بنجاب
الجييعان بسترو الباب
والعرا ما عدم جلباااب

الصبي بفتخر بابواتو
والبكا ما بجيب الماتو
الغافل دواااهو صلاتو
والزول بنخدع من ذاتو

الجوع تقدرو المطمورة
ست الواجبه مامشكورة
النسب اقتناع ومشورة
والرقبه التطول مكسورة

المظلوم دعاهو بفيدو
والعطاي إلاهو بزيدو
الغناي حديثو بجيدو
والقلب ان اباك لا تريدو

العيش بدو لي خبازو
والطربان بهز عكازو
طلاب الصبر جت فازو
والخملان قليل انجازو


زراع الفضل حصدوهو
حلال الكرب قصدوهو
الخبر المشين رصدوهو
وما كل البئن فصدوهو

العاشق بياكل نارو
والخواف بصاقر دارو
العابد بضوي وقارو
والكضاب حليفتو شعارو

مسنود الضهر بتقوا
ممغوس البطن بتلوا
ماكل البينضم سوا
والبوطا الجمر بتشوا

اختار في النضم مدروسو
والكف البسندك بوسو
الشقا ان ختاك لا تكوسو
والعايف النفاق ما بعوسو


النفس البترضى نصيبه
مابتقيف قصاده عصيبه
نشان الفضيله بصيبه
والحاسد عيونه مصيبه

✍ما تنبهر بالاعراس ولا المشاعر البتشوفها في الحفلات والضحك والاحضان والنظرات والهمسات ، طبيعي .. طبيعي جدا يكون ده المشهد السائد ..

إنما الانبهار الحقيقي لمن تشوف راجل راجع من الشغل ميت من التعب بس شايل حاجات تفرح مرتو واولاده .

انبهر بوحدي حامل على آخرها وواقفه تطبخ أكله صعبه لزوجها علشان نفسو فيها .

انبهر بزوج مر على زواجه 15 سنه ولسه بيقول لمرتو يا حبيبتي .

وانبهر بزوجة بتعد زوجها من ضمن اولادها .

انبهار بزوج عدى الخمسين ولسه عنده من الحب ما يكفي لأنه ينزل يختار مع مرتو هدومها .

أو بزوجها عندها من الامراض ما يتكفل بالقضاء عليها بس فاكره مواعيد دوا زوجها بالثانيه .

انبهر بزوج بعد سنين بعاين لمرتو بفخر وكإنها أهم إنجازاته .

الانبهار بيبقى باتنين سرح الشيب ف راسهم وقاعدين يقاسموا مع بعض كوباية شاي وحكايه قديمه حفظوها صم بس لسه بلاقو فيها ضحكه .

انبهر بزوج لسه فاكر عيد ميلاد مرتو حتى بعد ما تمت الستين .

انبهر بزوجة ما بترضي تاكل حاجه بره البيت طالما زوجها ما معاها عشان هي عارفه أنه بيحبها .

انبهر بإتنين كل واحد فيهم رجلينو ما شايلاه بس لسه قادر يسند اللي معاه ويتسند بيهو .

انبهر بجد وجده قاعدين يحكوا لاحفادهم في سباق منو فيهم بيحب التاني اكتر .

انبهر بالاتنين البيتوهو من غير بعض وما بيعرفو يتصرفوا لو واحد فيهم في مكان براهو وكإنه ناقصه نفسه .

انبهر باتنين بيتعازموا علي الموت عشان كل واحد فيهم ما متخيل أنه يعيش من غير التاني .

انبهر بارملة او ارمل لسه بيزور مرتو الماتت من 10 سنين

العرس بيخلص في ساعتين ، بس الحب ما بيخلص حتى لو الدنيا لطشتك على وشك حتفضل تقاوم علشان لسه لك في الدنيا أمل بيمثله الحبيب وحتى لو مشي الحبيب لربه.

حكاية بالعامية السودانية
#قروي_بهرته_اضواء_المدينة

✏تاليف: احمد صلاح سوان
الحلقة 11
#قريفة
بعد المغرب غادة واصحابا لمو حاجاتهم وودعو يحي ركبو عربيتهم وفاتو وهم بيغنو في الطريق...

ﺭﻳﺤﺔ ﺍﻟﻄﻴﻦ ﻓﻲ ﺟﺮﻭﻓﻨﺎ
ﻭﺍﻟﺘﻤﻴﺮﺍﺕ ﺍﻟﺒﻬﺒﻦ ﺩﻳﻤﺔ ﺭﺍﻗﺼﺎﺕ ﻓﻲ ﺣﺮﻭﻓﻨﺎ
ﻭﺍﻟﺪﻋﺎﺵ ﻭﺍﻟﻐﻴﻢ ﺭﺯﺍﺯﺍً ﻓﻲ ﺍﻟﻌﺼﻴﺮ
ﺑﺎﻟﻔﺮﺡ ﺑﻠﻞ ﻛﺘﻮﻓﻨﺎ
ﺃﻧﺤﻨﺎ ﺭﺍﺟﻌﻴﻦ ﻓﻲ ﺍﻟﻤﻐﻴﺮﺏ
ﻟﻠﺪﻳﺎﺭ ﻣﺎ ﺣﺪ ﻳﺸﻮﻓﻨﺎ ﻻ ﻧﺸﻮﻓﻮ ﻻ ﻳﺸﻮﻓﻨﺎ
نحنا راجعين في المغيرب المغيرب في المغيرب.

يحى بهناك اتبسط ومبتسم للضرس الاخير ، نضف الحتة وختة للبهايم العلف ربط ناموسيتو و دردم سفة ورقد نام.
الصباح قام نشيط بنعنويات متجددة وشغال مبسوط ، نص النهار جاهو ود الحاجة اتسالمو وقعدو يتونسو في ضل شجرة البان بنص المزرعة وصوت البابور بشفط الموية من البير وتجري في الجداول والجروف تسقي العلف ، صوت البابور خفيف تقدقدقدقدقدقدقد واصوات طيور الدبرك البتمارس الحب على فروع شجر البان ، زيادة على صوت خرير الموية الجارية ، الأجواء دي اوحت ليحى انو يبوح لصحبو ود الحاجة بالمشاعر الماواضحةالبدت تتكون عندو تجاه غادة ، يحي بعد شفط اخر بقة شاي صاموطي عملو على نار الحطب وختة الكباية مسك كيس التمباك وبدا يدردم سفة قال انت عارف يا ود الحجة .... !
ختة السفة دقار وواصل، بعد ود الحجة اشر ليهو براسو انو منتبه ، انت عارف يا ود الحجة حكاية جربان ياكل بعينو دي بقت مياكلة معاي جنبة والله ، ود الحاجة قال كييف...?
يحي بصق وقال ياخ ما ممكن عمرنا كلو نقعد كدي دة ندفن راسنا في الرملة ونخاف من حاجة تربطنا بالناس العيشتهم سمحة ديل ، نحنا في النهاية بشر ، ود الحاجة قال يازول استغفر الله انت ماتحسد الناس في نعمة الله الاداها ليهم وحرمك منها ، دي حكم الكريم ياخ ...
يحى جدع السفة وصنقر على حيلو ورفع صوتو بنبرة حادة قال شوف الغبيان ده انت يازول ماك نصيح داير تطلعني حاقد وكافر ....? انت مافهمتني ... انا بقصد ليه الواحد فينا ما يفكر يرتبط ليهو بواحدة من البنيات السمحات ومنعمات ديل ليه نحنا معقدين الامور كدي ...?
ود الحاجة قال هااااا انت قصدك صراع الطبقات الاجتماعية ...
يحي نططت عيونو وقال انت يازول كلام الناس المتعلمين ده لميت فيهو وين .... ود الحاجة ابتسم وقال انت يازول ناسي انا شغال جرسون لي كم سنة بكفتريا الجامعة اكيد بكون لقطت لي كم كلمة وجملة من ونسة الشباب البتونسو بالكفتريا ، وزي ما بقول مثلنا كن ما متنا شقينا المقابر ، يحي ضحك وقال والله تاريك يا اب رويس ماك هين .... ضحكو الاتنين سوا ، ود الحاجة قال ليحي والله يا اخوي ونستك السمحة دي سرقتنا عصر ما صليتو لامن المغرب جا كدي خلينا نصلو المغرب ونطلع بعد ده ، يحي قال ليهو يلا يازول لكين يوم تجي تبيت معاي....
صلو العصر والمغرب سوا وبعديها يحي ملا جردل لبن اداهو لود الحاجة وقال ليهو ده وديهو لود عمك القاعد معاهو ولي اولادو وبالله سلم عليهو....
ود الحاجة شال الجردل ومشا قال ليحي الله يعينك على قعدة براك وماتفكر كتير يازول عشان ما تجن ، قالو عدم الموضوع بعلم المشاط في الصلعة هههههههه .
يحي قال ما تشيل همي الله معاي ... ود الحاجة ودعتك الله.

#يتبع⏪