إحداهن تزوجت في سن الـ ٢٢ ٬ خوفا من أن "يفوتها القطار”٬
وعاشت حياه تعيسة في قطار أخذها بعيدا عن أحلامها.
واخرى تزوجت في سن الـ ٣٥ ٬
واختارت الحياة التي طالما حلمت بها٬ فهي تؤمن بأن ذات القطار يعيد ذات الطريق آلاف المرات بركّاب مختلفين، فأبت إلا أن تجلس بجانب الحبيب الذي يستحقها.
.
.
أحدهم تزوج في عمر الـ ٢٠ لمجرد إنه يريد أن “يخاوي أولاده"٬
ولكن أولاده عاشوا في بيت كئيب لكثرة الخلافات بينه وبين من اختارها لتكون مجرد أم لأولاده.
وأخر تزوج بعمر الـ ٣٠ من رفيقة عمره٬
وأنجب طفلاً بعد سنة ورباه في بيئة صحية٬ فهو يعلم تماما بأنه لا يوجد أسوء من أن يعيش الأولاد في بيت كئيب فاقد للحب والحياة٬ مع أب وأم كارهين حياتهم مع بعضهم البعض.
.
.
أحدهم تزوج مباشرة بعد التخرج٬ فقط لأنه يخاف من"الوحدة”٬
وبعدها اكتشف أنه يعيش في وحدة أعظم مع أمرأة لا يعرفها.
وأخر تزوج في أواخر عقده الثالث بعد سنين وسنين عاشها في الوحدة٬
ولكنه بعد كل هذه السنين وجد ونيس عوضه سنين وحدته.
.
.
إحداهن تزوجت سريعا بأول من طرق بابها٬ بعد أن أقنعها الجميع بأنه "عريس لقطة ومايترفضتش”٬ لكنها ندمت بعد أن نضجت فكريا وعاطفيا٬ وعلمت بأنه ربما يكون شخص جيد٬ ولكنه لا يناسبها.
وأخرى تزوجت بعد أن وجدت الشخص "المناسب لها"٬ وعاشت سعيدة وراضية بعد أن كانت لديها الشجاعة الكافية لرفض الكثير والكثير من العلاقات الغير مناسبة في نظرها٬ في الوقت الذي كانت في نظر جميع من حولها "أملة" و “ماتتعوضش”.
.
.
لا يوجد “عمر" مثالي للزواج٬
بل هناك “وقت" مثالي للزواج٬
يأتي هذا الوقت عندما يأتي "الشخص المناسب” ٬
فليس المهم "متى" نتزوج ٬ بل “من” نتزوج.

خاص بالمغتربيين

عزيزي المغترب : وانت ترسل لأولادك مصاريف رمضان زيد عليها خمسين ريال صدقه وكلم زوجتك او ولدك يتصدقون بها على محتاج في القريه. فانها بركة بيتك وأولادك ومالك.
انت مهتم بشراء اجود انواع التمر والشعيرية والكاكاو والعصائر والفواكه لأولادك وفي قريتك من لم يجد قليل دقيق او قليل ارز او سكر .

تحروا هلال رمضان في بيوت المحتاجين قبل ان تتحروه في السماء.

‏قالت : أُحبُّ النَحوَ قُلتُ لها : أعربي
‏أضحى غرامي في الضميرِ الغائبِ

‏قالت : فأضحى فعل ماضٍ ناسخ
‏نَسَخَ الغَرامَ ، فقلتُ : لا لا تَهربي

‏ضُمي غَرامي فإنَّ مَوقِعَهُ كذا
‏لا تَكسِري بالجَرِّ قَلبَ المُتعَبِ

‏لا تجعليني مِثلَ حرفٍ لا محلَ
‏لَهُ من الاعرابِ .. هذا مطلبي👇

...
‏ضيفي غرامي لقلبك و أقبلي
‏وتَقربي من خافقي تقربي

‏إن المُضاف إذا أُضيف لِمن هوى
‏حُكم الإضافةِ واجبٌ لا تعجبي

‏أحببتكِ والفعل مَبنيٌّ هنا
‏إبنيه للمعلومِ قلبي وانسبي

‏لا تحسبيني بالمشاعرِ جاهلٌ
‏لا لست بالفظِّ الغليظِ المُذنِبِ

‏رحماك إني في الجفاء مُعذبٌ
‏فتَقربي مني ولا تَتَغَيبي

#عن جمال اللغة العربية

يوميات علوب ....156 ...يوم في ( الطرمبة )

الليلة ركبنا كلنا مع ( معاوية ) صاحبنا في العربية حقتو قال عازمنا كبة بنزين ...!! شوف ليك عزومة ....!! وبالفعل وصلنا العزيزة الما بتسأل عن ظروفنا ....(الطرمبة )...!!
والعربات تتحلق حولها كأم رؤوم تود أن تطفئ عطش فلذات أكبادها ...( اللي هم ديل نحنا )
شوف ( رؤوم ) دي كيف ...!! لأول مره تدخل ( العربية) الفصحي مربع نفطي )
المهم طبعا وقفنا في اخر الصف ...!! و بعد خمسة دقايق لقينا نفسنا قدام سبعة عربات جات بعدنا ....العربية القدامنا طوالي فيها اتنين الظاهر بحبو بعض .ماشغالين بالصف دا الشغلة ...نقة تقيلة وضحيك ....حتي لما تتحرك العربية القدامن بلحقوها بعد مساااافة كدا ....!! ولكزا بالبوري من الناس الورا ......
.....ديل النوع البحولو المصايب الي مطايب .....!! ولسان حالهم يقول للبنزين .....!!
( أنا والأشواق في بعدك بقينا أقرب من قرايب ...)
إنه الحب ....!! يصنع المعجزات والغرائب ...ويبعد الهبايب .....والبنزين اللسا غايب .....!!!
عكس الورانا طوالي ديل كلفتة شديدة واستعجال ....لاصقين في خطراتنا ...!! كرهونا الصف ذاتو ....السايقا دا ماشال رجلو من البنزين .....( يكون دا ( صلاح ) ...!!! ؟؟
وسايقا ( صلاح )
أها النوع دا جزء أصيل من الأزمة ...ساكت لو سمع بكره في ( كتاحة ) بمشي يشتري نص فرن ( عيش )
ديل ناس الدنيا .....!! بسكوها في كل الإتجاهات تعبانين ساكت .....!!
عمركم سمعتو زول قبض الدنيا ....!!
غايتو نحنا قدامك كدا ......الليلة إلا تطير ....
أها جنبنا طوالي الصف الموازي وناس السعر ( الموازي الجماعة ( التنك ) بتاعم يمين ديل....!!! اغلبم
( فور وييلز ) ....🚘
حاسين بي عظمة كدا ....مع الدفع الرباعي دا
وسبح معلقه في العربية ....!! وماشاءالله دي مكتوبة بالخط العريض ...!! والمديح مدور ....!! تحصين تقيل ...!! ياربي دا خوف من الدنيا ولا الاخره ...لانو الاتنين مع بعض ( صعبة شوية) ....وديل غالبا مرسلين مناديب يكبو البنزين ... الله يزيد ويبارك ...!!
واحده جنبنا كدا سايقا ليها ( برادو ) بيضا ...
.واقفة في الصف ...!! دي مفروض يقيفو ليها صف
هي ذاتا .....!! تشبه روحا ..وشخصية كدا...والنضارات ...( بنزين لاقي جاز )
والجاز نزل في الساحة
وطبعا في جماعة يعجبوك لو ماخجلانين عااادي ممكن يقولو ليها ارتاحي انت نحن بنقيف بدلك ...!! هسا لو قالو ليهم عندنا زول عيان ممكن نمر قدامكم بعملو رايحين ....
بس فجاة نسمع ليك مبروك ....مبروك ...والف مبروك
الظاهر في واحد واقف معانا جابو ليهو ولد ...أدوهو الخبر بالتلفون ....والجماعة يباركو ....وواحدين عبرو عن المشاركة والفرحة بالبوري ..(تيييت تيييت )
(عزيز أنت ياوطني برغم قساوة المحن ) ....
مبروك ( المولود ) ...!! عقبال ( الوقود) ....!!
دا مفروض يسموهو ( بنزيمه ) ...
يازووول الصف دا فيهو المحن ....واحدين واقفين لي ناس ....!! ( تمثيل دبلوماسي ) واخرون يتحلقو حول الطرمبات كلها من طرف ...ليعيدو انتاج الأزمة ويكونو مصدر تموين للبنزين الأبيض في السوق الأسود...!!
( وزي السكن ...)
وفق مبدأ إستثمار الأزمات ....!!
واخيراً وبعد هذا الزحف المقدس وصلنا الي مشارف (الكبا ) وفوهة ( الخرطوش )
(البسمع الفوهة (والخرطوش) يقول فتحنا( القسطنطينية )
وإحساس يغمرنا بالزهو والانتصار ...أريتو ما إنتصارنا
( أعظم إحساس كبيناهو في طرمبة ....!! )
لنغادر المكان غير مأسوف عليه ولسا الصف واقف طابور ....والطابور عايز بترول .....!! والبترول
عايز قروش ...!!والقروش.. وينا القروش ...!!؟؟
القروش عايزا الضمان ...!! والضمان عند ربنا ....!! وربنا جيب الأمان .....!! و أبعدنا من محن الزمان .....!!
الأزمة ...!! والصف الطويل ....!!
الزحمة ....(والكدسة ) السمان ) ....!!
يجب علي الحكومةً انا تحب الشعب زي العربية القدامنا وتستعجل خدمتو زي العربية الورانا
ماتخدم زول عشان مكانتو وشكلو زي ( ست البرادو )
وتشيل من ناس (التنك ) اليمين وتدي الشمال ...
وتجي تقيف معانا هنا في الصف .....!!
حسو بينا ياخ .....!!
إن شاءالله بوري ....
ويا اللوري عليك الرسول ( بوري ) ....!!!
تيييييت ......!!
( الدوائر مشغولة حاليا ) رمضان كريم

بتذكر واحد من الأولاد جاني في دكاني داير ليو لافتة قماش مكتوب فيها التقديم الالكتروني للجامعات وفعلا اتفقت معاو وقال لي انا خاشي السوق وبجي استلمها منك
بعد اقل من ساعة جاني وقال لي ياخال جيتك قبل مواعيدي لانو مشواري لقيتو خفيف . والمهم الود قعد يتونس معاي لحدي مالافتتو تجف ولقاها فرصة يحكي لي قصة غريبة حصلت معاهو
قال لي امبارح فتحت مكتبي الصباح بدري شديد وفجأة ظهر قدامي ضابط جيش برتبة عميد وقال لي يا ابني هنا مش الناس بقدمو للجامعات ورديت عليو فعلا ياسعادتك قال لي طب الخرطوم السنة دي نسبة القبول كم قلت ليو اتا زولك جايب نسبة كم قال ٩١ % قلت للاسف ياسعادتك النسبة الفي كتيب التقديم مابدخلو . عمك رقم الهدوء الباين علي وشو لكن حسيت بيو اضايق وجات مسحة حزن كدة علي جبينو لكن حاول يسند نفسو بي نفس عمييق ملا بيهو صدرو وقال لي شكرا يا ابني . انا في اللحظة دي حسيت بي عمك ممكون وابيت اخلي يمشي ساي ف قلت ليو وهو كان مديني ضهرو ( ممكن زولك يعيد سنة مافرقت وحايجيب طب الخرطوم) عمك اتلفت علي وقال عمرو عاد مرتين وحبيت احقق ليو مرادو واقدم ليو جامعة الخرطوم كلية الطب بس قدر ولطف والحمد الله . عمك قال الجملة دي وعيونو رقرقن بالدموع لما انا حسيت بي طعنة في قلبي وقلت ليو طيب ياسعادتك ماتخلي عمرو يعيد تاني مافرقت وعمك اداني ضهرو وكانو هارب من سؤالي . برضو ماخليتو وقلت ليو عندي ود خالتي عاد اربعة ..... وقبل ما اتم كلامي عمك اداني وشو وكان ملان دموع وعذاب وقال لي عمرو غرق قبل تلاتة وسبعين يوم يا ابني ودخل يدو في جيبو يفتش لي منديل ومالقاهو اضطر يملص طاقية الجيش ويمسح بيها دموعو وقال بعد ما ارتاح تلاتة دقايق معليش يا ابني بس جاتني فكرة شيطانية انو اقدم طب الخرطوم لي . قلتا احقق ليو جزو من حلمو . بس دي برضو غلبني احققا ليو . عمك بعد ما انتهى من كلامو طوالي مرق مني ومشى علي عربية عسكرية واقفة برة وجمبها سواق عسكري لابس رسمي حياهو تحية عسكرية و فتح ليو الباب الخلفي وانا بعاين ليو لحدي ماختا الطاقية العسكرية فوق راسو وظبطا تمام وقعد ذي الاسد وادة السواق اشارة بالتحرك
انا رجعت انضف في الكمبيوترات عامل فيها زول قوي ذي عمك الضابط لكن بعد ماشربتا الجبنة قعدتا افكر في عمرو وحلمو بدخول طب الخرطوم وغرقتو الحارة . عاينتا يمين شمال وبقيت اجعر براي ذي النسوان

سهل الطيب

الان ومن اول يوم في رمضان حلقات رواية #احببت_زوجتي علي قناة كاتبها نزار عثمان #زول_بشخبط لمتابعتها انضم من هنا👇
https://tttttt.me/joinchat/AAAAAEBNbkT4enKitikrmw

ﻣﺮﻩ ﻋﻨﺪﻱ ﺻﺤﺒﺘﻲ ﺑﺘﺤﻜﻲ ﻟﻲ ﻗﺎﻟﺖ ﻟﻲ ﺍﻧﺎ ﻭﻣﻌﺎﻱ ﺻﺤﺒﺘﻲ ﻣﺸﻴﻨﺎ ﻟﻲ
ﺯﻣﻴﻠﺘﻨﺎ ﻓﻲ ﺍﻟﻤﻨﺸﻴﻪ ﻧﺎﺍﺍﺍﺱ ﻣﺮﻃﺒﻴﻴﻴﻦ ﺭﺑﻨﺎ ﻳﺰﻳﺪ ﻭﻳﺒﺎﺭﻙ
ﺍﻫﺎ ﻭﺻﻠﻨﺎ ﺍﻟﺒﻴﺖ ﻭﻟﻘﻴﻨﺎﻫﺎ ﻣﺎﻓﻲ ﺍﻣﻬﺎ ﻗﺎﻟﺖ ﻟﻴﻨﺎ ﻣﺸﺖ ﺣﻲ ﺍﻟﺼﻔﺎ ﻻﺧﺘﻬﺎ
ﻭﺑﺘﺠﻲ ﻫﺴﻲ ﺍﺗﻔﻀﻠﻮ
ﺍﺟﺴﻠﻮ ﻗﺎﻟﺖ ﻟﻲ ﻗﻌﺪﻧﺎ ﻓﻲ ﻛﺮﺳﻲ ﻋﺠﻴﺐ ﺧﻼﺱ ﻏﻄﺲ ﺑﻲ ﺟﻮﻭﻭﻭﺍ ﻟﻤﻦ
ﺍﺗﻬﺠﻤﺖ ﻭﻗﻌﺪﻧﺎ ﻧﻌﺎﻳﻦ ﻓﻲ ﺍﻟﺒﻴﺖ ﻭﻣﻨﺪﻫﺸﻴﻦ ﻣﻦ ﺍﻻﺳﺎﺳﺎﺕ ﺍﻟﻔﺎﺧﺮﻩ ﺩﻱ
ﻭﺑﻴﺖ ﻛﺒﻴﻴﻴﺮ ﻣﺎ ﺷﺎﺀ ﺍﻟﻠﻪ ﺍﻟﻨﺎﺱ ﺩﻳﻞ ﻋﺎﻳﺸﻴﻦ ﻓﻲ ﺟﻨﻪ ﻏﺎﻳﺘﻮ ﺣﺴﻴﻨﺎ
ﺑﺮﻭﺣﻨﺎ ﻭﺳﺨﺎﻧﻴﻴﻦ ﻭﻣﻐﺒﺸﻴﻴﻦ ﻭﺷﻨﻴﻴﻴﻴﻦ ﻟﻤﻦ ﺩﺳﻴﻨﺎ ﻛﺮﻋﺎﺗﻨﺎ ﺍﻟﻤﻬﻢ ﺟﺎﺕ
ﺍﻣﻬﺎ ﺩﺍﺧﻠﻪ ﻭﺟﺎﺑﺖ ﻟﻴﻨﺎ ﺷﻴﺎﻟﺔ ﺍﻟﺤﻼﻭﺓ ﻳﺎﺍﺍﺧﻲ ﺍﻟﺸﻴﺎﻟﻪ ﺩﻱ ﻛﻠﻬﺎ ﺍﻧﻮﺍﺭ ﺗﻮﻟﻊ
ﺯﻱ ﺇﺷﺎﺭﺓ ﺍﻟﻤﺮﻭﺭ ﺷﺊ ﺃﺣﻤﺮ ﻭ ﺷﺊ ﺃﺧﻀﺮ ﻭ ﺷﺊ ﺍﺻﻔﺮ ﻭﻣﻌﺎﻫﺎ
ﻣﻮﺳﻴﻘﻲ ﻛﻤﺎﻥ ﻓﺘﺤﺖ ﺍﻟﺸﻴﺎﻟﻪ ﻓﻴﻬﺎ ﺍﻧﻮﺍﻉ ﻣﻦ ﺍﻟﺤﻠﻮﻳﺎﺕ ﻋﻤﺮﻱ ﻻ ﺿﻘﺘﻬﺎ
ﻭﻻ ﺷﻔﺘﻬﺎ ﺣﻼﻭﺓ ﻏﺮﻳﺒﻪ ﻛﺪﺍ ﺍﻭﻝ ﻣﺮﻩ ﺍﺷﻮﻓﻬﺎ .. ﻏﺎﻳﺘﻮ ﻧﺤﻨﺎ ﺑﻨﻌﺮﻑ ﺣﻼﻭﺓ
ﺑﻘﺮﺓ ﻭﻗﺰﻗﺰ ﻭﺣﻼﻭﺓ ﻧﻌﻨﺎﻉ ﻭﺍﻟﻔﻮﻝ ﻭﺍﻟﻨﺒﻖ ﺍﻫﺎ ﺍﻧﺎ ﺷﻠﺖ ﻭﺍﺣﺪﺓ ﻭﺳﺎﺭﻩ
ﺷﺎﻟﺖ ﻭﺍﺣﺪﻩ ﺍﻧﺎ ﻓﺘﺤﺘﻬﺎ ﻭﻟﻘﻴﺖ ﺷﻜﻼﺗﻪ ﻭﺍﻛﻠﺘﻬﺎ ﻓﻲ ﺍﻟﻨﺺ ﻛﺪﺍ ﻓﻲ ﺣﺎﺟﺎﺕ
ﺻﻐﺎﺭ ﻭﻣﻘﺮﻣﺸﻪ ﻭﻓﻴﻬﺎ ﻟﺴﻌﻪ ﺣﻠﻮﻩ ﻛﺪﺍ ﻋﺠﺒﺘﻨﻲ ﺟﻨﺲ ﻋﺠﺐ ﺍﻫﺎ ﺍﻡ
ﺯﻣﻴﻠﺘﻨﺎ ﺑﺘﺘﻮﻧﺲ ﻣﻌﺎﻧﺎ ﻭﻛﻞ ﻣﺮﻩ ﺑﺘﻘﻮﻝ ﻟﻴﻨﺎ ﺷﻴﻠﻦ ﻳﺎ ﺑﻨﺎﺗﻲ ﻭﺍﻧﺎ ﺍﻗﻮﻝ ﻟﻴﻬﺎ
ﺷﻠﻨﺎ ﻳﺎ ﺧﺎﻟﻪ ﻭﺍﻧﺎ ﻧﻔﺴﻲ ﺍﺷﻴﻞ ﺗﺎﻧﻲ ﺑﺲ ﺧﺠﻼﻧﻪ ﻭﺳﺎﺭﻩ ﺗﻘﺮﺹ ﻓﻴﻨﻲ
ﻳﻌﻨﻲ ﺷﻴﻠﻲ ﻋﺸﺎﻥ ﺍﻧﺎ ﺍﺷﻴﻞ ﻭﺍﻧﺎ ﻋﺎﻣﻠﻪ ﻓﻴﻬﺎ ﺗﻘﻴﻠﻪ ﺑﻌﺪ ﺷﻮﻳﻪ ﺍﺳﺘﺄﺫﻧﺖ
ﻣﻨﻨﺎ ﻭﻃﻠﻌﺖ ﻭﺍﻧﺎ ﻭﺻﺤﺒﺘﻲ ﻗﻠﻨﺎ ﺗﺎﻧﻲ ﻣﺎ ﺑﺘﺠﻲ ﺭﺍﺟﻌﺔ ﺍﻭﻝ ﻣﺎ ﻃﻠﻌﺖ ﻣﻦ
ﺍﻟﺒﺎﺏ ﻛﺪﺍ ﻃﻮﺍﻟﻲ ﻋﻤﻠﻨﺎ ﻫﺠﻮﻡ ﻋﻠﻲ ﺍﻟﺸﻴﺎﻟﺔ ﻧﺸﻴﻞ ﻭﻧﺨﻢ ﻗﺎﻟﺖ ﻟﻲ
ﺍﻧﺎ ﻣﻠﻴﺖ ﺧﺸﻤﻲ ﻭﺷﻨﻄﺘﻲ ﻭﺳﺎﺭﻩ ﻣﻠﺖ ﺷﻨﻄﺖ ﻭ ﺑﺪﻳﻨﺎ ﻧﺄﻛﻞ ﻓﻴﻬﺎ ﺳﺎﺭﻩ
ﺑﺪﺧﻞ ﺟﻮﺯ ﺟﻮﺯ ﻓﻲ ﺧﺸﻤﻬﺎ ﻫﻬﻪ ﺑﻌﺪ ﺷﻮﻳﻪ ﺍﻡ ﺯﻣﻴﻠﺘﻨﺎ ﺟﺎﺕ ﺩﺍﺧﻠﻪ
ﺍﺗﺎﺭﻱﻣﺎﺷﻪ ﺗﺠﻴﺐﻋﺼﻴﺮ ﻭﺟﺎﻳﻪ ... ﺟﺎﺕ ﺩﺍﺧﻠﻪ ﺷﺎﻳﻠﻪ ﺟﻚ ﻋﺼﻴﺮ ﻇﺮﻳﻒﻛﺪﺍ
ﻭﻛﺒﺎﻳﺘﻴﻦ ﻓﻲ ﺻﻴﻨﻴﺔ ﻣﻨﻈﺮﻧﺎ ﺑﻘﻲ ﺑﻴﻴﻴﺶ ﺑﺲ ﻗﺎﻋﺪﻳﻦ ﻧﻌﺎﻳﻦﻟﻴﻬﺎ ﺧﺸﻮﻣﻨﺎ
ﻣﻠﻴﺎﻧﺔ ..
ﺧﺘﺖ ﺍﻟﺠﻚ ﻗﺎﻟﺖ ﺍﺗﻔﻀﻠﻮ ﺍﻟﻌﺼﻴﺮ ... ﻗﺎﻟﺖ ﻟﻲ
ﺍﻧﺎ ﻫﺰﻳﺖ ﻟﻴﻬﺎ ﺭﺍﺳﻲ ﻣﺎﺑﻘﺪﺭ ﺍﺗﻜﻠﻢ ...
ﻭﺳﺎﺭﻩ ﻫﺰﺕ ﺭﺍﺳﻬﺎ ﺧﺸﻤﻬﺎ ﻣﻠﻴﺎﻥ ﺑﺘﺎﻛﻞ
ﺗﻼﺗﺔ ﺗﻼﺗﻪ ﻫﻬﻬﻬﻬﻬﻬﻪ
ﻋﺎﻳﻨﺖ ﻟﻠﺸﻴﺎﻟﻪ ﻟﻘﺘﻬﺎ ﻓﺎﺍﺍﺍﺍﺍﺍﺍﺿﻴﺔ ...
ﺷﺎﻟﺘﻬﺎ ﻭﻃﻠﻌﺖ .. ﻧﺤﻦ ﻗﻠﻨﺎ ﺗﺎﻧﻲ ﻣﺎﺑﺘﺠﻲ ...
ﻣﺴﻜﻨﺎ ﻟﻴﻚ ﺟﻚ ﺍﻟﻌﺼﻴﺮ ﺯﻱ ﺍﻟﺒﻨﺸﻮﻓﻮ ﻓﻲ ﺍﻟﺘﻠﻔﺰﻳﻮﻥ ﺩﺍﺍﻙ .. ﻭﻗﻌﻨﺎ ﻓﻴﻪ
ﺷﻔﻂ ﺍﻱ ﻭﺍﺣﺪﻩ ﺷﺮﺑﺖ ﺃﺭﺑﻌﺔ ﻛﺒﺎﺑﻲ ﻓﻲ ﺩﻗﺎﻳﻖ ﺧﺘﻴﻨﺎ ﺍﻟﺠﻚ ﻓﺎﺽ ﻭﺍﻟﻜﺒﺎﺑﻲ
ﺟﻤﺒﻮ ...
ﺑﻌﺪ ﺷﻮﻳﺔ ﺍﻡ ﺻﺎﺣﺒﺘﻨﺎ ﺟﺎﺕ ﺩﺍﺧﻠﻪ ... ﻓﺎﺗﺖ
ﺗﻤﻠﻰﺍﻟﺸﻴﺎﻟﻪ ﻭﻧﺤﻦ ﻣﺎﻋﺎﺭﻓﻴﻦ ..
ﺷﺎﻓﺖ ﺍﻟﺠﻚ ﻓﺎﺍﺍﺍﺍﺍﺍﺍﺽ ﻭﻻ ﻧﻘﻄﻪ
ﻣﺎﻓﻴﻬﻮ ..
ﺧﺘﺖ ﺍﻟﺸﻴﺎﻟﻪ ﺷﺎﻟﺖ ﺍﻟﺠﻚ ﻭﻃﻠﻌﺖ ﻫﻬﻬﻪ
ﺑﻌﺪ ﺷﻮﻳﺔ ﺯﻣﻴﻠﺘﻨﺎ ﻣﻼﺫ ﺟﺎﺕ ﺩﺍﺧﻠﻪ ... ﺍﺗﻮﻧﺴﻨﺎ ﻣﻌﺎﻫﺎ ﺷﻮﻳﻪ ﻭﻗﻠﻨﺎ
ﻣﺎﺭﻗﻴﻦ ﺣﻠﻔﺖ ﺍﻻ ﻧﺘﻐﺪﺍ ﻗﻠﻨﺎ
ﻟﻴﻬﺎ ﻣﻦ ﻗﺒﻴﻞ ﺭﺍﺟﻴﻨﻚ ﺑﻌﺪ ﻛﺪﺍ ﺍﺗﺎﺧﺮﻧﺎ ﻭﻣﺎ ﺑﻨﻠﻘﻲ ﻟﻴﻨﺎ ﻣﻮﺍﺻﻼﺕ ﻣﻊ ﺃﺯﻣﺔ
ﺍﻟﺒﻨﺰﻳﻦ ﺩﻱ ﻗﺎﻟﺖ ﻣﺎ ﻣﺸﻜﻠﻪ ﺑﻮﺻﻠﻜﻢ ﺍﻟﻤﻬﻢ ﻗﻌﺪﻧﺎ ﻭﺍﺗﻐﺪﻳﻨﺎ ﻭﺷﺮﺑﻨﺎ ﺍﻟﺸﺎﻱ
ﻭﺷﻨﻄﻨﺎ ﻣﻼﻧﻪ ﺣﻼﻭﻩ ﻭ ﻓﻲ ﺍﻟﻠﺤﻈﻪ ﺩﻳﻚ ﻛﺎﻥ ﻗﺎﻟﺖ ﻟﻴﻨﺎ ﺑﻴﺘﻮ ﻛﺎﻥ ﺑﻴﺘﻨﺎ
ﻫﻬﻬﻬﻬﻬﻪ ﺍﻟﻤﻬﻢ ﻃﻠﻌﻨﺎ ﺯﻣﻴﻠﺘﻨﺎ ﻃﻠﻌﺖ ﻣﻌﺎﻧﺎ ﻋﺸﺎﻥ ﺗﻘﺪﻣﻨﺎ ﻗﺎﻟﺖ ﻟﻴﻨﺎ
ﺍﺳﻤﻌﻮﻧﻲ ﺍﻣﻲ ﻗﺎﻟﺖ ﻟﻴﻜﻢ ﺗﺎﻧﻲ ﻣﺎ ﺩﺍﻳﺮﻩ ﺍﺷﻮﻑ ﺧﻠﻘﻜﻢ ﺩﻱ ﻫﻨﺎ ...
ﻫﻬﻬﻬﻬﻪ ﻗﺎﻟﺖ ﻟﻴﻬﺎ ﺍﻟﻠﻪ ﻳﻔﻀﺤﻚ ﻳﺎ ﺳﺎﺭﻩ ﻓﻀﺤﺘﻨﺎ ﻣﻊ ﻧﺎﺱ ﺍﻟﻤﻨﺸﻴﻪ
ﻭﺍﻷﺣﻴﺎﺀ ﺍﻟﻤﺠﺎﻭﺭﺓ
ﻛﺴﺮﻩ ...
صراحة شنات الطبع ما حلوه ويا بركة من زار خف
ﺭﻣﻀﺎﻥ ﻛﺮﻳﻢ ﻋﻠﻴﻜﻢ
ﻫﺒﻪ ﻋﺜﻤﺎﻥ

ﻓﺎﻃﻤﺔ ﻣﻦ ﻳﻮﻡ ﻃﻠﻌﺘﻬﺎ ﺍﻟﺪﺍﻳﺔ ﻣﻦ ﺑﻄﻦ ﺍﻣﻬﺎ ﻋﻠﻘﺖ ﻋﻠﻴﻬﺎ ﻗﺎﻟﺖ ﻟﻲ ﺃﻣﻬﺎ
ﻣﻦ ﺍﻟﻠﻪ ﺧﺘﺎﻧﻲ ﻓﻲ ﺷﻐﻠﻲ ﺩﺍ ﻣﺎ ﺷﻔﺖ ﻟﻲ ﺷﺎﻓﻌﻪ ﺑﻜﺎﻳﻪ ﺯﻱ ﺍﻟﺒﺖ ﺩﻱ !!
ﻣﻦ ﺯﻣﻨﻬﺎ ﺍﻟﺼﻐﻴﺮﺓ ﻣﻦ ﺷﺪﺓ ﻣﺎ ﺑﻜﺎﻳﺔ ﻟﻤﻦ ﺣﺒﻮﺑﺘﻬﺎ ﺑﺘﻘﻮﻝ ﻻﻣﻬﺎ ﻛﺪﻱ
ﻓﺘﺸﻴﻬﺎ ﻳﻤﻜﻦ ﺗﻜﻮﻥ ﻗﺮﺻﺘﻬﺎ ﻧﻤﻠﻪ ﺍﻡ ﻓﺎﻃﻤﺔ ﺗﻘﻮﻝ ﻟﻴﻬﺎ ﺑﺮﻱ ﻳﻤﺔ ﻧﻤﻠﺔ
ﻭﻭﺍﺣﺪﺓ ﻗﺮﺻﺘﻬﺎ ﻣﺎﻓﻲ ﻋﻼ ﺩﻱ ﺷﻨﺎﺕ ﻃﺒﻊ ﺳﺎﺍﺍﻱ ﻭﻗﺮﺭﺭﺯ ﻳﻀﺤﻜﻦ ﺍﻫﺎ
ﺗﻤﺮ ﺍﻻﻳﺎﻡ ﻭﻓﺎﻃﻤﺔ ﺷﻮﻳﻪ ﺷﻮﻳﻪ ﺗﻜﺒﺮ ﻭﺑﻘﺖ ﺗﻤﺸﻲ ﻭ ﻟﺴﺴﻪ ﺑﻜﺎﻳﺔ
ﻭﻃﺒﻌﻬﺎ ﺷﻴﻦ ﺗﻤﺖ ﺍﻟﺴﻨﺘﻴﻦ ﻭﺑﻘﺖ ﺷﻮﻳﺔ ﺗﻌﺮﻑ ﺍﻟﻠﻌﺐ ﻭﻛﺎﻥ ﺟﺎﺕ ﻣﺮﺍﺓ
ﺳﺎﻳﻘﺔ ﻣﻌﺎﻫﺎ ﺷﺎﻓﻊ ﺍﻟﻠﻪ ﻗﺎﻝ ﺑﻲ ﻗﻮﻟﻮ ﻓﺎﻃﻤﺔ ﺗﻠﺰ ﻭﺗﻌﻀﻲ ﻭﺗﺨﺮﺑﺶ
ﻭﻛﺎﻥ ﺍﻟﺸﺎﻓﻊ ﺷﺎﻳﻞ ﺣﻼﻭﺓ ﺗﻘﻠﻌﻬﺎ ﻣﻨﻪ ﻭﺗﺪﺑﻬﻮ ﺩﻗﺔ ﺯﻭﻭﻭﻭﻭﻝ ﺑﻘﻮﻝ ﻟﻲ
ﻓﺎﻃﻤﺔ ﺩﺍ ﻏﻠﻂ ﻭﻻ ﻋﻴﺐ ﻣﺎﻓﻲ ﻳﺴﻮﻭﻧﻮ ﺿﺤﻚ ﻭﻳﻘﻮﻟﻦ ﻣﺎ ﻃﻔﻠﺔ ﺑﺎﻛﺮ ﺗﻜﺒﺮ
ﺗﺨﻠﻴﻪ ﺗﻘﻮﻭﻭﻡ ﺍﻟﻤﺮﺍﺓ ﺗﺘﻐﺒﻦ ﻭﺗﺰﻋﻞ ﻭﺗﺴﻮﻕ ﺷﺎﻓﻌﻬﺎ ﻭﺗﻤﺮﻕ ﻭﻗﺪﺭﺓ ﺍﻟﻠﻪ
ﻓﺎﻃﻤﺔ ﺩﻱ ﻋﻨﺪﻫﺎ ﺻﺮﺧﺔ ﺍﻟﺴﺎﻋﺔ ﺍﻟﺘﻘﻮﻝ ﻟﻴﻚ ﺟﺎﺍﺍﺍﺍﺍﻙ ﻏﺎﻳﻄﺘﻮ ﺍﻧﺎ ﺑﻨﺨﻠﻊ
ﻭﻗﻠﺒﻲ ﺩﺍ ﺑﻔﺮﻧﻲ ﻭﺑﻘﻮﻝ ﺷﺤﺤﺤﺤﺤﺤﺢ ﻭﺑﻘﻮﻝ ﻓﻲ ﺯﻭﻝ ﻣﺎﺕ ﺍﻟﻠﻪ ﻳﺠﺎﺯﻱ
ﺍﻟﺸﺎﻓﻌﺔ ﺩﻱ ﻛﻞ ﻳﻮﻡ ﻣﺪﺧﻠﻪ ﻓﻴﻨﻲ ﺧﻠﻌﺔ ﻭﻛﺎﻥ ﻗﺎﻟﻮ ﻫﺒﺔ ﺟﺎﺗﻬﺎ ﺟﻠﻄﺔ
ﺍﻋﺮﻓﻮ ﺳﺒﺒﻲ ﻓﺎﻃﻤﺔ ﺍﻟﺒﻨﺖ ﺩﻱ ﻛﻼﻣﻬﺎ ﻛﻼﻡ ﻧﺎﺍﺍﺱ ﻛﺒﺎﺍﺍﺍﺍﺭ ﻭﺍﻟﻠﻪ ﺑﺘﻘﻮﻝ
ﻛﻼﻡ ﺑﺘﺨﻠﻴﻨﻲ ﻣﻨﻄﻄﻪ ﻋﻴﻮﻧﻲ ﺍﻟﻨﻬﺎﺭ ﻛﻠﻪ ﻭﻋﻨﺪﻫﺎ ﺟﻨﺲ ﺍﻟﻔﺎﻅ ﺍﻋﻮﺫ ﺑﺎﻟﻠﻪ
ﻣﻨﻬﺎ ﻳﻮﻡ ﻛﺪﺍ ﺟﺎﺗﻨﺎ ﺍﺧﺘﻲ ﺯﻳﺎﺭﻩ ﺑﺎﻟﻠﻪ ﻭﻟﺪ ﺍﺧﺘﻲ ﻛﺎﻥ ﺟﺎﻱ ﻭﺭﺍ ﺍﻣﻪ ﻭﻟﺴﻪ
ﻣﺎ ﺩﺧﻞ ﺍﻟﺒﻴﺖ ﻛﻮﻳﺲ ﺍﻣﻪ ﺍﻧﺸﻐﻠﺖ ﺑﺎﻟﺴﻼﻡ ﻣﻌﺎﻧﺎ ﻭﺍﻧﺎ ﺟﻴﺖ ﻣﺎﺭﺓ ﺍﻗﻮﻭﻭﻭﻡ
ﺍﺳﻤﻊ ﻟﻴﻚ ﺻﻮﺕ ﺑﻴﻴﻴﻴﻎ ﻳﻴﻎ ﺯﻱ ﺻﻮﺕ ﺍﻟﺰﻭﻝ ﺍﻟﻤﺨﻨﻮﻕ ﻣﺮﻗﺖ ﻟﻘﻴﺖ ﻟﻴﻚ
ﻓﺎﻃﻨﺔ ﻣﺎﺳﻜﺔ ﻋﺜﻤﻴﻨﻮ ﻭﻋﺎﺻﺮﺍﻫﻮ ﻋﻠﻲ ﺍﻟﺤﻴﻄﺔ ﺑﺪﻭﺭ ﺗﻘﻠﻊ ﻣﻨﻪ ﻟﻌﺒﺘﻮ
ﻃﻮﺍﻟﻲ ﻧﻬﺮﺗﻬﺎ ﻫﻮﻭﻭﻱ ﻳﺎ ﺍﻟﺠﻨﺠﻮﻳﺪ ﻓﻜﻲ ﺍﻟﻮﻟﺪ ﻭﺍﺩﻳﺘﺎ ﺭﺻﻌﺘﻴﻦ ﻓﻲ ﺍﻳﺪﻳﻨﺎ
ﻭﻓﻜﺘﻬﺎ ﺻﺮﺧﺔ ﺟﺎﺍﺍﺍﺍﺍﺍﺍﺍﻙ ﻳﻤﺔ ﻫﺒﺔ ﻗﺎﻟﺖ ﻟﻲ ﺟﻨﺠﻮﻳﺪ ﺍﻣﻬﺎ ﺟﺎﺗﻨﻲ ﻭﺯﻟﺘﻲ
ﺯﻟﺔ ﻫﻬﻬﻬﻬﻪ ﺍﻧﺎ ﺧﺸﻤﻲ ﻣﺎ ﻓﺘﺤﺘﻮ ﻣﻌﺎﻫﺎ ﻛﻤﻠﺖ ﻛﻼﻣﻬﺎ ﻭﻃﻠﻌﺖ ﻋﻨﺪﻧﺎ
ﺟﺎﺭﺗﻨﺎ ﻣﺴﻜﻴﻨﻪ ﻛﺪﺍ ﻭﺳﺎﺗﺮﻩ ﺣﺎﻟﻬﺎ ﻋﻨﺪﻫﺎ ﺷﻔﻊ ﺻﻐﺎﺍﺍﺍﺭ ﻣﺎ ﺑﻨﺸﻮﻓﻬﻢ ﺍﻻ
ﻋﻴﺪ ﻟﻲ ﻋﻴﺪ ﻭﻣﺎ ﺣﺼﻞ ﻣﺮﺓ ﺩﺧﻠﺖ ﺑﻴﺘﻬﻢ ﺷﻔﺖ ﻟﻲ ﺷﺎﻓﻊ ﺣﺎﻳﻢ ﻗﺪﺍﻣﻲ
ﺷﻔﻊ ﻣﺎﺷﺎﺀ ﺍﻟﻠﻪ ﻋﻠﻴﻬﻢ ﺍﻟﻤﻬﻢ ﻓﺎﻃﻤﺔ ﻗﺪﺭﺕ ﺗﺪﺧﻞ ﻓﻲ ﺍﻟﺠﻴﺮﺍﻥ ﺩﻳﻞ
ﻭﺗﻠﻌﺐ ﻣﻊ ﺷﻔﻌﻢ ﻭﻛﺎﻥ ﻋﻤﺮﻫﺎ ﺯﻱ ﺃﺭﺑﻌﺔ ﺳﻨﺔ ﺍﻭ ﺧﻤﺴﺔ ﻭﺑﺘﻤﺸﻲ ﺗﻠﻌﺐ
ﻣﻊ ﺍﻟﺒﻨﺎﺕ ﺩﻳﻞ ﻟﻲ ﺑﺎﻟﻠﻴﻞ ﻻ ﻫﻢ ﺑﻄﺮﺩﻭﻫﺎ ﺭﻏﻢ ﻗﻠﺔ ﺍﺩﺑﻬﺎ ﻭﺻﺮﻳﺨﻬﺎ
ﻭﺿﺮﺑﻬﺎ ﻟﻲ ﺍﻟﺸﻔﻊ ﻻ ﺍﻫﻠﻬﺎ ﺑﻨﺎﺩﻭﻫﺎ ﻭ ﻓﺎﻃﻤﺔ ﻣﺎ ﺑﺘﻌﺮﻑ ﺗﻠﻌﺐ ﻟﻌﺒﻬﺎ ﻛﻠﻪ
ﻣﺸﺎﻛﻞ ﻭﻛﻀﺐ ﻭﺃﻣﻬﺎ ﺩﺍﻳﻤﺎ ﺟﺎﺭﻳﻪ ﻓﻲ ﻭﺷﻬﺎ ﻓﻲ ﻳﻮﻡ ﻛﺪﺍ ﺭﺯﺍﻥ ﺩﻱ ﺍﻟﺒﻨﺖ
ﺍﻟﺒﺘﻤﺸﻲ ﺗﻠﻌﺐ ﻣﻌﺎﻫﺎ ﻓﺎﻃﻤﺔ ﺭﺯﺍﻥ ﻗﺎﻟﺖ ﻷﻣﻬﺎ ﻣﺎﻣﺎ ﻣﺎﻣﺎ : ﺧﻠﻴﻨﻲ ﺍﻣﺶ
ﺃﻟﻌﺐ ﻣﻊ ﻓﺎﻃﻤﺔ ﻓﻲ ﺑﻴﺘﻢ ﺍﻣﻬﺎ ﻗﺎﻟﺖ ﻟﻴﻬﺎ ﺧﻠﻴﻬﺎ ﻫﻲ ﺗﻠﻌﺐ ﻣﻌﺎﻙ ﻗﺪﺍﻡ
ﻋﻴﻨﻲ ﺑﻌﺪ ﺗﺤﺎﻧﻴﺲ ﺍﻣﻬﺎ ﻓﺎﻟﺖ ﻟﻴﻬﺎ ﺍﻣﺸﻲ ﻭﺗﻌﺎﻟﻲ ﺳﺮﻳﻴﻴﻊ ﻭﺭﺯﺍﻥ ﻣﺸﺖ
ﻣﻊ ﻓﺎﻃﻤﺔ ﻗﻮﻣﻲ ﻳﺎ ﻓﺎﻃﻤﺔ ﺍﺿﺮﺑﻲ ﺭﺯﺍﻥ ﺑﺎﻟﻄﻮﺑﻪ ﻓﻲ ﻭﺷﻬﺎ ﻋﺎﺩ ﺍﻟﺪﻡ ﺩﺍ
ﻧﺰﻝ ﻟﻴﻚ ﺯﻱ ﺍﻟﺴﻴﻞ ﻭﺟﺎﺕ ﺣﺒﻮﺑﺔ ﻓﺎﻃﻤﺔ ﺟﺎﺭﻳﻪ ﺳﺎﻣﻴﻪ ﺳﺎﻣﻴﻪ ﻓﺎﻃﻤﺔ
ﺿﺮﺑﺖ ﺭﺯﺍﻥ ﺑﺲ ﻣﺎ ﺗﺘﺨﻠﻌﻲ ﺿﺮﺑﻪ ﺻﻐﻴﺮﻩ ﻭﺍﻫﻮ ﺍﻟﺪﻡ ﻭﻗﻒ ﺳﺎﻣﻴﺔ ﻋﺸﺎﻥ
ﻣﺴﺘﻮﺭﺓ ﻣﺎ ﺍﺗﻜﻠﻤﺖ ﻭﻗﺎﻟﺖ ﻃﻔﻠﻪ ﻛﻢ ﻳﻮﻡ ﻭﻋﻠﻲ ﺣﺴﺐ ﺟﻬﻞ ﺍﻻﻃﻔﺎﻝ ﺗﺎﻧﻲ
ﺭﺟﻌﻮ ﻳﻠﻌﺒﻮ ﻣﻊ ﺑﻌﺾ ﺍﻟﻤﻬﻢ ﺣﺼﻠﺖ ﺷﻜﻠﺔ ﺑﻴﻦ ﺭﺯﺍﻥ ﻭﻓﺎﻃﻤﺔ ﺍﻟﺨﺎﻃﻴﻪ
ﻛﺎﻟﻌﺎﺩﺓ ﺭﺯﺍﻥ ﻗﺎﻟﺖ ﺍﻻ ﺍﺿﺮﺑﻬﺎ ﺯﻱ ﻣﺎ ﺿﺮﺑﺘﻲ ﻭﺍﻟﺸﻜﻠﺔ ﻗﺎﻣﺖ ﻭﺍﻧﺘﻲ ﻳﺎ
ﻓﺎﻃﻤﺔ ﺍﺟﺮﻱ ﻻﻣﻚ ﻭﺍﻧﺘﻲ ﻳﺎ ﺭﺑﺎﺏ ﺍﺻﻼ ﺗﻮﺑﻚ ﻓﻲ ﻃﺮﻑ ﺍﻟﺴﺮﻳﺮ ﺗﻌﺎﻟﻲ
ﺟﺎﺭﻳﻪ ﺷﺎﻛﻠﻲ ﺳﺎﻣﻴﺔ ﻛﻴﻴﻴﻒ ﺑﺘﻚ ﺗﻀﺮﺏ ﺑﺘﻲ ﻭ ﻗﺎﻟﺖ ﻟﻲ ﺳﺎﻣﻴﺔ ﻛﻴﻴﻴﻴﻒ
ﺗﻘﻮﻟﻲ ﻟﻲ ﺑﺘﻲ ﻣﺠﻨﻮﻧﻪ ﻃﺒﻌﺎ ﻛﻼﻡ ﻓﺎﻃﻤﺔ ﻻﻣﻬﺎ ﻛﻠﻪ ﻛﻀﺐ ﻭﺍﻟﺸﻜﻠﺔ ﻣﻦ
ﺍﻟﺼﻐﺎﺭ ﻭﺍﺗﺤﻮﻟﺖ ﻣﻊ ﺍﻟﻜﺒﺎﺭ ﺳﻤﻌﻨﺎ ﺍﻟﺠﻮﻃﺔ ﻭﻣﺮﻗﻨﺎ ﻟﻘﻴﺖ ﻟﻴﻚ ﺍﻟﺤﺮﻳﻢ ﺩﻳﻞ
ﺑﺠﻠﺒﺎﺑﺎﺕ ﺍﻟﺒﻴﺖ ﻭﺍﻟﺸﻌﺮﻣﻨﻜﻮﺵ ﺍﻟﺤﺎﺻﻞ ﺷﻨﻮ ﻳﺎ ﺍﺧﻮﺍﻧﺎ ﺍﻟﺪﻧﻴﺎ ﺭﺍﻳﺤﺔ ﻭﺩﻳﻞ
ﺷﻔﻊ ﺑﺰﻋﻠﻮ ﻭﺑﺮﺟﻌﻮ ﻓﻲ ﺳﺎﻋﺘﻬﻢ ﺍﻟﻤﻬﻢ ﻟﺰﻭﻧﻲ ﻟﻴﻚ ﻫﻨﺎﺍﺍﺍﺍﻙ ﻗﺮﺑﺖ ﺍﻗﻊ
ﻭﺍﻟﺸﻜﻠﺔ ﻭﺻﻠﺖ ﺍﻟﻤﺤﻜﻤﺔ
ﺍﻟﺸﺎﻫﺪ ﻣﻦ ﺍﻟﻤﻮﺿﻮﻉ ﺩﺍ ﻟﻲ ﻳﺎ ﺟﻤﺎﻋﺔ ﺍﻟﺸﻔﻊ ﺩﻳﻞ ﻣﺎ ﺑﻨﻮﺭﻳﻬﻢ ﺍﻟﺼﺎﺥ ﻣﻦ
ﺍﻟﻐﻠﻂ ﻭﻟﻲ ﻧﺤﻦ ﺩﺍﻳﻤﺎ ﺑﻨﺼﺪﻕ ﺍﻟﺸﻔﻊ ﻭﻣﺎ ﺑﻨﺼﺪﻕ ﺍﻟﻜﺒﺎﺭ ﻭﻟﻲ ﻛﻞ ﻏﻠﻂ
ﻳﻌﻤﻠﻮ ﺍﻟﺸﺎﻓﻊ ﻧﻘﻮﻝ ﺧﻠﻮﻫﻮ ﺩﺍ ﻃﻔﻞ ﺑﻜﺮﺓ ﺑﺒﻜﺒﺮ ﻭﺑﺨﻠﻴﻬﻮ ﺍﻧﺎ ﺑﻘﻮﻝ ﻟﻴﻬﻢ ﻣﺎ
ﺡ ﻳﺨﻠﻲ ﻃﺒﻌﻪ ﻭﺍﻟﻄﺒﻊ ﻏﻼﺏ ﻃﺎﻟﻤﺎ ﻣﺎ ﻫﻮ ﻋﺎﻳﺶ ﺩﻭﺭ ﺍﻛﺒﺮ ﻣﻦ ﺩﻭﺭﻭ
ﻭﻣﺘﺮﺑﻲ ﻋﻠﻲ ﺍﻷﻧﺎﻧﻴﺔ ﻭﻗﺎﺍﺍﻋﺪ ﺃﺭﺑﻌﺔ ﻭﻋﺸﺮﻳﻦ ﺳﺎﺍﺍﻋﺔ ﻭﺳﻂ ﺍﻟﻨﺎﺱ ﺍﻟﻜﺒﺎﺭ
ﻣﻦ ﻭﻳﻦ ﻳﺠﻴﺐ ﺍﻻﺩﺏ ﻭﻟﻲ ﻛﻠﻤﺔ ﻋﻴﺐ ﻭﻏﻠﻂ ﺑﻘﺖ ﻧﺎﺩﺭﺓ
ﻛﺴﺮﺓ
ﺣﺎﻟﻴﺎ ﻓﺎﻃﻤﺔ ﻋﻤﺮﻫﺎ ﻋﺸﺮﺓ ﺳﻨﻮﺍﺕ ﻭﺑﺘﻜﻔﺖ ﺍﻣﻬﺎ ﻭﻋﻠﻲ ﻃﻮﻝ ﺑﺘﻘﻮﻝ
ﻟﻴﻬﺎﺍﻟﻔﺎﻅ ﻣﺎ ﺣﻠﻮﺓ ﻭﺍﻟﻤﺤﻴﺮﻧﻲ ﺍﻻﻡ ﺑﻴﻀﺤﻚ ﻟﻴﻬﺎ
ﻛﺴﺮﺓ ﺗﺎﻧﻴﺔ
ﻫﺒﺔ ﻣﺠﻮﻭﻭﻭﻋﺔ ﻣﻦ ﻓﺎﻃﻤﺔ ﻭﺍﻡ ﻓﺎﻃﻤﺔ وكل شافع طبعو شين زي فاطمة
الشخصيات الفي القصة غير حقيقة بس بتحكي عن الواقع
ﻫﺒﺔ ﻋﺜﻤﺎﻥ

(ياخي نحن لاقين السكر وين لا قاعدين ناكل فواكه لا مستمتعين زي باقي العالم ومحتاجين طاقة) ويقوم يسوط ليك 4 معالق سكر في الشاي ومثلها في العصير ويقعد يقرطع ويقول أححح كمان !

هذا السلوك المنتشر لدينا هو من أكثر السلوكيات الصحية الخاطئة والحمقاء على الإطلاق.

أولاً / السكر الأبيض أنت لست في حاجة إليه إطلاقاً مدى الحياة .. سمعت ليك بمرض بيتسبب بسبب نقص تعاطي السكر؟
يعني حصل مشيت بكا واهل المرحوم قعدوا يجعروا يقولوا ليك المرحوم مات عشان كان ما بياكل سكر؟
ولا يا حليلو كان بيكب نص معلقة سكر في الشاي لمن مات؟

ثانياً / الإكثار من تناول السكريات بعد الإفطار في رمضان خطأ شنيع وإيذاء متعمد لصحتك وقتل مع سبق الإصرار والترصد.
يعني ما لأنك صايم تقوم تبلع في السكريات وتعمل حالة طوارئ في البنكرياس وتخلي المخ شغال ينبز فيها افرزي يا بنكرياس يا بت الكلب ويقوم يمحطها ليك سوطين عنج!
ليه بتعمل في بنكرياسك كدة؟
لغاية ما يجي اليوم الحمارك فيه يحرن .. قصدي بنكرياسك ويحلف حرررم تاني ما مطلع حتة "إنسولينياية" واحدة وأعلى مافي خيلك أركبو.

ثالثاً/ الشخص الذي يشرب مشروبات غازية في الفطور والسحور ربما من الانسب أن لا يدفن في مقابر المسلمين وأن لا يكفن ولا يصلى عليه .. بتعمل في نفسك كدة ليه ياخ؟ 7 معالق سكر ومواد ضارة وسامة.. مالك جنيت؟

رابعاً / الفيمتو فيه محتوى مفيد يقدر ب 3% والباقي سكريات واصباغ ومحليات ومواد ممنوعة في الغرب.. عايز تشربوا.. إنت حر مافي زول ماسكك إن شاء الله تملا بيه المزيرة.

خامساً / مرحلة ما قبل السكري دي بقت حاجة خلاص معروفة طبياً والدراسات بتقول إنو غالبية الناس الجاهم سكري كان عندهم مرحلة ما قبل السكري وهم ما عارفين وجزء منهم كان ممكن يتحاشى الإصابة بالسكري أو تأخير الإصابة به لو إحترم نفسه وخلى حكاية 3 معالق في الشاي واللبن اسكت كب دي.

سادساً/ وقد يقول قائل الشاي المسيخ ما بتشرب وهو يعني بالمسيخ 3 معالق سكر فأقل ، سيدي جرب أن تسكب معلقة سكر واحدة لخليجي في القهوة.. لن يشربها.. لأنه يستمتع بها بدون سكر ويتقزز منها بسكر.. إذا المسألة تعود.. وما دامت المسالة تعود لماذا نصر على التعود على الشيء الضار لماذا لا اتعود على الشيء الصحي؟

سابعاً /لو قللنا نسبة السكر فإننا سنوفر ملايين الدولارات سنوياً التي تذهب هدراً ويمكن تحويلها لمنصرفات أخرى مفيدة.

ثامناً / لم يقل احد أن الحرمان من السكر هو المقصود وإنما تناوله بدون إسراف وباعتدال والحذر منه هو والملح فالطعام قليل السكر وقليل الملح هو الطعام الصحي مع كثرة شرب الماء بصورة متقطعة منذ الإفطار و حتى السحور لتنعم بكليتين جيدتين.

تاسعا/ تعاطي الأنسولين تحت الجلد لا يفطر مثله مثل قطرات العين والأذن والحقن الوريدية والعضلية لا تفطر إلا إذا كانت بهدف التغذية.

عاشراً /السحور بالسكريات والمخللات والطعام كثير الملح والبهارات يسبب العطش وفقدان السوائل عن طريق كثرة التبول، إحرص على خلو سحورك منهم.

صوماً هنيئاً وإفطارا شهياً وعملاً متقبلاً إن شاء الله.

لؤي المستشار
طبيب أمراض وأورام الدم وزراعة الخلايا الجذعية


ملحوظة


للأسف الشديد ليس هناك أعراض لحالة ما قبل السكري pre-diabetic ولكنها تكتشف بالصدفة أثناء التحليل الروتيني عن طريق اختبار تحمل الجلوكوز GTT ، أو اختبار همقلوبين الدم السكري hemoglobin A1c.

غرائب الرجال
***********
كان الجميع يتهمها بأنها مغرورة فى أمر الزواج متطلعة فى إختيارتها
متعالية فى قناعاتها.
ولكنى كنت أشعر عكس ذلك..
وكان بداخلى هاتف يقول كل مايقال مجرد شائعات فهى على مشارف الأربعين ولايجرؤ أحد فى سؤالها لماذا لم تتزوجى حتى الآن ؟
فهذا السؤال عادة يطرق على الرجال لاعلى النساء.
كنت أراها متواضعة متوسطة الجمال ولكنها مرغوبة جدا حسب ماسمعت ولكن لم تسمح لى الظروف أن تتحدث امامى بأمر كهذا،كما أنها كانت مقلة جداً فى الحديث عن موضوع الزواج أو (الخطاب)عكس مايقال عنها .
إلى أن إلتقيتها فى مناسبة عائلية وشاءت الظروف أن نجلس معا يوماً كاملاً بحكم صلة القرابة بأهل المناسبةفقد كانوا أقارب من الدرجة الأولى لى ولها.
وفى مثل هذه الظروف تكثرالأحاديث وتتشعب القصص والمواقف العابرة التى تكون سبباً فى بعض المداخلات.
إلى أن سألتها إحدى السيدات عن الزواج بطريقة غير مباشرة
هل من جديد؟
فأجابت لا ياعمة .
فقالت السيدة :تنازلى قليلاً لتتزوجى فالعمر يمضى .
فقالت ضاحكة بحديث لايخلو من انفعال طفيف:
من قال لك أننى أتعالى فى إختياراتى أو قبولى للزواج؟
من هو آخر رجل رفضته ؟
حدثينى فربما لا أعلم.
شعرت السيدة بالحرج وقالت متمتمة بصوت منخفض لايخلو من خوف:
سمعنا أنك رفضتى بن أختى سعاد.
قالت لها وهل قالوا لك لماذا رفضته؟
صراحة لا.
فأستعدلت فى جلستها وهى تنظر إلى كمن يقول (الحكى للجميع).
قالت :تقدم لى (ش) وبعد أن سألت عنه وعلمت أنه شخص متدين وعلى خلق وتوفيت زوجته تاركة له طفلين فقلت فى نفسى هذه فرصةكى أنال أجر هذين اليتيمين وربما من على القدر بذرية بسبب هذا الفضل والأجر.
وسكتت واحترمت صمتها رغم تشوقى لمعرفة ماحدث.
قالت كنت عائدة لتوى من الخارج وعلى ان أعود فى فترة اقصاها ثلاثة أشهر حتى لا أفقد وظيفتى ولابد أن يكون القرار سريعا وحاسمأ.
قابلته وتحدثنا طويلا وقبلت .
ففاجأنى بأنه لايرغب للسفر للخارج.
فكرت قليلا (والحديث لبطلة قصتى)..وقلت الزواج والانجاب أهم من العمل فى الوقت الراهن..
فقلت لها لاشعوريا:
عين العقل.
فاردفت:
ولكن كان لابد أن أتاكد من الواقع الجديد البديل ؛هل يستحق هذه المغامرة؟
فسالته:
ماهى ضماناتك كى اترك عملى بالخارج؟
هل ستوفر لى كفاءة الستر الإجتماعى ؟ وهل ستسمح لى بالعمل إذا إضطررت لذلك مع ظروف البلاد الراهنة.
تمنيت أن يقول لا لن تحتاجى ولن تندمى فلى بيت وأعمل فى وظيفة مرموقة وسأنفق عليكى وعلى اطفالى.
وإذا دعتك الظروف يوماً للعمل فلن أمانع.

لم أشعر بنفسى وأنا أسألها بدهشة :
وماذا قال ؟
إبتسمت الفتاة بمرارة وقالت :
قال :لاتتركى عملك بالخارج ولن أحرمك منه ويمكنك العودة بعد زواجنا إلى بلدك وتأتي إلينا فى الإجازات.
فأطفالى يجب أن يكونوا بالقرب من جدتهم وأنا لا أستطيع فراقهم.
قلت له وقد قلت لاترغب فى الذهاب للخارج؟
قال نعم.
وتقول الفتاة قلت له:
وهل هذا زواج؟
وماذا سيضيف لى هذا الزواج.؟
هل انت فى حاجة إلى زوجة وأم بديلة أم زوجة موسمية و ممولة ؟
وهل سيسمح لى عمرى وأنا على مشارف الأربعين
بالمغامرة بزيجة كهذه..نتبادل فيها الأدوار.
ولم يرد .فرفضت .
وأكملت اجازتى وعدت.
صعقت السيدة وصارت تهذى بكلمات الدهشة يطول وصفها وغادرتنا.
وساد صمت بينى وبينها وبعد أن ذهبت السيدة أخذت نفسا عميقا وقالت الاترغبى فى معرفة الذى سبقه..
فقلت بفضول ..
أحكى :

قالت كان زميل عمل سابق ،قابلته صدفة وأناأزور زميلاتى فى إجازتى الماضية وكان من المقربين ولايعيبه سوى أنه متزوج وله خمسة أطفال ومستقر جدا ويعيش حياة هانئة مستقرة وفى (إعتقادى) زواجى منه سيقلب موازين السعادة فى بيته رأسا على عقب ..فأعتذرت له.
فى المرة المذكورة أخبرنى أنه إنفصل عن زوجته ووصلا طريق مسدود و يقيم مع بعض أقاربه الشباب وهى تقيم مع أهلها .
صار يلاحقنى بالهاتف وأقنعنى بأنه لا أمل فى العودة فهذه هى الطلقة الثالثة..
وسألت وتأكدت من مصداقيته.
شعرت ببصيص أمل وقلت فى نفسى ولم لا؟
على الأقل ربما وافق بالذهاب معى إلى غربتى .
فقلت له فى أول إتصال بيننا وإذا وافقت فماهى خطتك المستقبلية؟
قال أن هذا الحديث لايصلح عبر الهاتف لابد أن نلتقى ونضع النقاط على الحروف؛
فقلت لامانع لدى.
وبالفعل إلتقينا(والحديث لبطلة قصتى) فى حديقة عامة حددها هو ،وبعد الترحاب والسلام
تحدث مباشرة ويبدو أنه كان فى عجلة من أمره .وقال انه يرغب فى الزواج منى ولكنه لايملك نفقات زواج يليق بك.
فقلت له لاعليك سنتزوج فى حدود إمكانياتك وحدود الشرع
يمكنك إحضار مبلغ رمزى مناسب يكفى لشراء لوازم العروس باقل عدد ممكن ومهر لعقد القران.
لم يكن لدى مانع أن يحضر لى مايحفظ كرامتى وماء وجهى ولو (ثلاثة قطع من الملابس من كل نوع)
ومهر رمزى جدا لعقد القران.
ففرح وافترقنا على أن يطلبنى من أبى فى المساء.
تقول..
نسبة لمارأيته من هؤلاء الرجال لم أتسرع وأخبر أبى وكأنى أتوقع عدوله عن الفكرة أو الخروج برأى جديد 😊 وقد كان.
قلت لها بدهشة وماذا حدث

؟
قالت اتصل على مساءاً
وسألنى كم تبقى لى من إجازتى وعودتى؟
قلت شهر تقريباً.
قال جميل ..يمكننا الزواج بعد اسبوعين .. وتعودين بعد أسبوعين وبعد ان تستقرى فى عملك تبعثى لى..وسأبحث عن عمل.
ساد الصمت قليلاً وقال الو ؟
فقلت نعم لاعليك موافقة ..
ثم أكملت حديثها وكأنها تبرر سبب قبولها قائلة :
لم يكن أمامى خيار آخر فهو إنسان طيب ووو قاطعتها قائلة ..
لاعليك الحياة مشاركة طالما تثقين فى دينه و أخلاقه ونخوته ورجولته
وتعلمين ظروفه !
قالت نعم.
قلت وماذا حدث؟
قالت بعد يومين إتصل على قائلا أنه لم يوفق فى تدبير مبلغ (المتكفى )
فهل لك ان تمنحينى المبلغ على اعيده لك بعد ان تبعثى لى والتحق بعمل هناك.؟
قلت له صدقنى لدى من الملابس مايكفى ثلاث (عرائس)..
ولكن عليك أن تحفظ لى كرامتى بالمعقول ..
وللاسف ليس لدى مال لأمنحك إياه قرضا لتقدمه لى مهراولا أعلم إن كان شرعا يجوز ذلك أم لا )

وأردفت هو يعمل فى مهنة مرموقة وراتب لابأس به صحيح هو مثقل بالالتزامات ولكن عليه أن يجتهد ..
كان من الممكن أن يطلب قرضا من الشركة التى يعمل بها وقد سبق أن قال لى أنه لو قدم إستقالته ستكون له مكأفأة كبيرة وسيتركها لزوجته وأطفاله ولم أمانع .
كان من الممكن أن يأخذ قرضا من جهة عمله أو أى شخص إلا أنا !

قلت لها وهل كان ذلك صحيحا اى ليس لديك ماتقرضينه اياه؟
باغتتنى بسؤال هل ستفعلينها؟
قلت لا!
قالت وأنا أيضاً صعبت على نفسى ولم تهن على ) فرفضته.

قالت هل تريدين أن تعلمى ماقبله؟
فقلت لها أحكى :
قالت (فتاة قصتى ):
كان شقيق سيدة بلدياتى زميلة عمل سابقة تكبرنى بسنوات ولكن يجمعنا إنسجام فكرى وود صادق
وهى متزوجة بضابط بإحدى القوات النظامية ،قابلتها بجامعة ما وأنا اتابع إجراءات القبول لبنت أختى العام الماضى.
واستعدنا الذكريات وعلمت أننى لم اتزوج بعد ..وتبادلنا أرقام الهواتف وافترقنا.
لديها أربع شقيقات ولهن أخ واحد لم التق به طيلة سنوات رفقتى لها. وكانت تنفق على دراسةبقية الشقيقات هى وأمها التى لاتعمل عملا نظاميا ولكن تفعل كل مايدر عليها دخلا بإختصار كانت عائلة مكافحة تعجبنى جدا ولكن لا أعلم شيئا عن ذلك الشقيق الواحد.بل أسمع عنه فقط.
إتصلت على مساءا لتخبرنى بأنهن قد قمن هى وامها وشقيقاتها بترشيحى لشقيقهن (وقد تكرم حضرته) بالموافقة بالزواج منى .
قائلة سنقوم بتزويجكما فى أقرب فرصة.
فسألتها كم عمره؟
قالت ثلاثة وأربعون عاما.
قلت ويعلم اننى على مشارف الأربعين ؟
قالت نعم ولامانع لديه.
وماذا يعمل؟
قالت انت تعلمين أنه ليس هنالك وظائف للخريجين ولم يجد عملا فى مجال تخصصه ،قلت لها عشرون عاماً وهو لم يجد عملا يساعد به امه المكافحة و شقيقاته الكادحات؟
صمتت قليلاً وقالت رفض أن يمتهن أى مهنة هامشية لاتليق به.
قلت لها الهامشية أشرف ألف مرة من أن يحمل لقب (عاطل .)
حاولت تهدأتها مبررة له
ربما لم يجد عملا مناسبا.
قالت صدقينى لو عمل سائقا باليومية بدلاً من التسكع بسيارة زوج شقيقته كان أكرم له ولوافقت به .
لم أجد ما أقوله.
قلت لها وماذا فعلتى قالت قلت لصديقتى :
من لايتنازل من أجل أمه المكافحة وشقيقاته الفتيات عشرين عاماًويقبل أن يصرفن عليه؛هل سيتنازل ويعمل لأجل زوجة ؟
ورفضته
.
قالت هل لاننى تقدمت بالعمر على أن اتنازل واتزوج مثله وأنفق عليه؟
قلت لها :
لا!
ثم أردفت ومن يضمن لى أنه سيعمل يوماً لأجلى.
صدقينى كلما تنازلت تمادوا فى إهانتى.
قلت لها حاشاك لم يخلق بعد من يهينك..
فضحكت قأئلة هم يضحك وهم يبكى .
ثم قالت بالله عليكى مارأيك فى هذه الحالات الثلاث (فقط ) والتى يلوموننى عليها ويتهمونى لأجلها بالغرور ؟
فقلت لها صراحة ؟
ثلاثة فى صفر.
ضحكت رغم الأسى الواضح فى عينيها .
قطعه فجأة طلق نارى فى تلك المناسبة التى جمعتنى بها ؛معلنا عقد القران .

عفاف محى الدين طاهر#
____________________
قصة واقعية تم نشرها بعد الإستئذان من صاحبتها ووافقت قائلة أنشريها ربما يعذر المجتمع أمثالى .
(يبكون ولايعرفون الميت )

منقول رسالة من بنت سودانية>============== الي شباب اليوم /
والله ياجماعة كلامي دة ماانتقاد للاولاد ولا تقليل من قيمتهم بس بجد انا بتكلم من واقع اناشايفاهو قدامي انا( ك) بنت حاسة انه بقى في ازمة رجولة في السودان وانا بقول العبارة دي بكل اسف والله
حيجي واحد طبغا يقول لي هو السودان فيهو انوثة في الاول عشان يكون في رجولة لا انا مابتكلم من ناحية شكل ولا سماحة وشنا انا بتكلم من ناحية اخلااااق ومواقف كل واحد بس يعاين حولو ويشوف الشباب الحايمين في الشوارع ديل عاملين كيف الشاب بقى كل اهتماماتو يلبس كيف ويطقم كيف وتلفونو نوعو شنو والسماعة في الاضان والجزمة مع الشنطة والحزام مع القميص وغنيتي وغنيتك وفناني وفنانك
عقولهم بقى مافيها شي غير كدة وانا مابعمم طبعا لسة اولاد البلد في والناس العقولها مليانة في بس الغالب الاعم بقى من النوعية دي .. ليه ياجماعة الحاصل شنو ؟ والله انا لمن اكون في الشارع واعاين حولي بقول ياربي السودان دة بعد كم سنة حيكون حالو كيف ؟ معقول دة جيل المستقبل.. معقول دة بعد كم سنة حيكون رب اسرة وعندو جيل تحت يدو بربي فيهو ؟؟؟ طيب حيربي على ياتو قيم وعلى ياتو اخلاق وعلى ياتو مبادئ
جد الموضوع يستحق وقفة ومراجعة نفس الجيل اتغير شدييييد سواء كان بنات او اولاد بس مصيبتنا في الاولاد اكبر ياجماعة لانه انت الحتربي وتزرع القيم في اولادك ومفروض تكون قدوة حسنة ليهم طيب اذا هم كدة الاجيال البعدهم حتكون كيف ياربي ؟؟؟
انا( ك) بنت سودانية والله بتمنى الشاب السوداني يرجع زي ما كان يرجع الشاب الحمش اخو البنات وسند الرجال وزول الحارة عشان تملو عيون البنات ويحسو بي هيبتكم ورجولتكم لكن هسي الاولاد والبنات في الشارع بقو واااااحد مافي بنت بتعمل لي ولد حساااب عاادي تضحك قدامو بي طول حسها عادي تتمكيج قدامو عادي تهظر معهو وتضربو على كتفو كانو صحبتها لي دة كلووووو
لانكم شلتو الحواجز وهونتو نفسكم وضيعنو مكانتكم
والله والله يااخواني الرجولة ماسماحة وسبسبة. وتطقيم هدوم. وحفظ. اغاني اجنبية
الرجالة هيبة واحترام ومكانة والنماذج دي بقت قليييلة في المجتمع خصوصا في الخرطوم
بتمنى ماتاخدو كلامي انتقاد ومهاجمة بس عايزة وجهة نظري تصل كل الشباب ويراجعو نفسهم يمكن لو رجعنا زي زمان ترجع بلدنا ويرجع كل شي حلو معاها
كل احترامي===========
ونفس الرسالة لبنات اليوم
منقول%%

بسم الله الرحيم الرحيم

#إستشارة_من_عضوة

🚫أي تعليق غير لأئق يعرضك للحظر

أقسم بالله اقول الحق
عندي مشكلة يا ريت تلقو لي حل لانو متعباني شديد انا حبيت لي شخص م حصل شفتو بس عن طريق ناس بيتهم هو مغترب المهم اتواصلت معاه وكان زول نعمة الاخلاق والاحترام واتبادلنا الصور فيما بيننا وامورنا كانت حلوووه شديد وارتحت ليهو شديد لانو صارحني بكل شى عنو وانا بدرس الجامعة وعملنا الخطوبة وم قصر معاي في شئ طلبت من تلفون ولابتوب جابهن لي كان بصرف على وانا عارفة م من حقه يصرف على فترة الخطوبة بس صحباتي غشني قالو لي اطلبي منه لو بحبك بلبي كل طلباتك المهم سمعت كلامهن وكنت اي شى بطلبو منه بجيبو لي وم مقصر في شئ سبب الاختلاف انو صحباتي قالو لي لازم تعملي لينا رحله بمناسبة الخطوبة وقالو لي لازم يقوم بيها هو اتصلت عليه وقال لي خلاص بعد كم يوم كدا بستلم الراتب وبحول ليك انا قمت قلت ليهو لو م عاوز تحول لي كلمني قال ياااخ الفلوس بتاعت الرحلة دي لو عملنا بيها أي حاجة ممكن نستفيد منها قلت ليهو ي زول من هنا اجعل البينا انتهاء وحظرتو من الواتساب وانا م قصدي اسيبو بس حبيت أشوف نهايتو شنو اداني كم يوم اتصل على اها عملتي شنو قلت ليهو انا مصره في قراري م عاوزاك شكل هظار وكدا طوالي خلاني وكلم اخوي قال ليهو م في نصيب والله يا جماعة انا بحبو مهما حاولت نرجع ليهو رفض قالى مستحيل نكون لبعض اجعليني زي اخوك عندك اي مشكلة بقيف معاكي لكن غير كدا لا يا ناس انا م عاوزة يكون لي أخ عاوزة يكون لي حبيب وزوج انا عارفة نفسي غلطانة بس مهما اعتزرت ليه رفض نهائي اسي كرهت نفسي ومعنوياتي منهارة م قادرة اعمل أي حاجة يا ريد تساعدوني بحل أقدر أرجع ليهو

🤔

الحد الأدنى بمصروفات بيت مكون من ٦ أفراد ٤ أبناء ووالدين..

العيش ٣٠ عيشة في اليوم ..
٣٠ × ٣٠ = ٩٠٠ ج
وده في حاله انو عشاء مافي
اللحم فقط ٤ كيلو في الشهر
٤ × ١٠٠ = ٤٠٠ ج
أسطوانة غاز واحدة في الشهر
١ × ١٥٠ = ١٥٠ ج
كهرباء على قدر النور بس + موية
٣٥ + ١٢٥ = 160 ج
خضروات النقول بس ٢٠ في اليوم.
٢٠ × ٣٠ = ٦٠٠ ج
لوازم طبيخ قول ١٥ في اليوم.
١٥ × ٣٠ = ٤٥٠ ج
لوازم نظافة شخصية. ١٠ × ٢٠ = ٢٠٠ ج
سكر شاي قول ١٠ ج في اليوم.
١٠ × ٣٠ = ٣٠٠ ج
لبن ٢٠ ج في اليوم. ٢٠ × ٣٠ = ٦٠٠ ج
مواصلات البيت كله نقول 30ج اليوم.
30× ٣٠ = 900ج
*الإجمالي. = 4760 ج*

ممنوع على هذه الأسرة العلاج والتعليم واللبس والأكل خارج البيت وتفادي المشاركات الإجتماعية والاستغناء عن مستلزمات الأعياد وتكاليف الاتصالات.
وممنوع عليها المرض....
وممنوع عليها تحلية...
وممنوع عليها صلة رحم وممنوع عليها تعديل أو تصليح اي شي في البيت لا سباكة لا حيطة وقعت..
لا لا لا فما بالك من يسكن بالايجار لان حساب قيمه الايجار تختلف حسب المنطقه لذا نترك تقديرها لكم ..الخ
سؤالين مهمين
كم هو متوسط دخل الفرد في السودان ؟
وكم هو الحد الادني للاجور في السودان؟

... منقول بحرقة و ألم ...

* قوووون *
حكاية قصيرة
لبنى الجعفري

الشاب الظريف عمرو إبني الكبير الحبيب..لما كان ولد صغير كان بحب تربية الحيوانات الأليفة في البيت ؛ زي الأرانب والقطط ،وطبعا دي هواية لطيفة شديد بتعلم الإنسان الرحمة بالحيوان خاصة لو بدأت معه من هو طفل.. وأنا أستغرب عندما أرى طفلا صغيرا يضرب قطة لحد الأذى الجسيم ، وأقول هذا الطفل بالتأكيد أهله لم يعلموه الرحمة ولو بتربية حيوان أليف واحد في البيت ، و هؤلاء الأطفال متى عرفت قلوبهم الصغيرة درب الشر ؛ أو يمكن تحكمت بهم الغريزة لهذه الدرجة..سبحان الله.
عمرو كانت عندو "كديسة" صغيرة يعني قطة .. سماها "رزة " و كان بحبها شديد وبدلعها وبتنوم معاه.
أما أنا أم عمرو دي مابستحمل ولااا هبشة من الكديسة ، بس أعطف عليها وأديها تاكل وتشرب .. ولو جات رقدت جنبي في السرير برفعها بقدمي برااحة وفننن برميها بعييد .. يعني مابستحمل حتى أشيلا بيدي ؛ وطبعا أكيد القطة عندما تقع على الأرض تنزل بمهارة على رجليها "قوائمها" الأربعة ؛ سبحان الله !
وفي مرة أنا وأسرتي الصغيرة كنا عند ناس أمي و معانا كديستنا رزة .
ومرة كانت معي أمي في الغرفة وكانت مستيقظة تقرأ كتابا.. وأما أنا فقد تمددت لأرتاح قليلا ثم نمت.. بعدين صحيت بحركة الكديسة رزة تلامس أقدامي ؛ وبرااحة كعادتي رفعتها بقدمي عايزة أعمل ضربة جزاء ناااعمة وحريفة ومخادعة .. وقلت كدي شلت الكديسة رزة بقدمي الشمال الشواتة دي ، دايرة أجيب قون الإنتصار كالعادة.. وقون الموسم .. رفعتها بقدمي سمممح كدي .. وفننننن فنيتها في الهوا بفن و بحرفنة غريبة .. قووون..
أنقرو هنا شنو الحصل ؟!! رزة خبطت الدولاب؟..لأ ..
طيب يمكن وقعت فوق أمي؟.. لا لا حاشا ..
الحصل ياسادة ياكرام شي عجييييب مابتقدروا أصلو تتخيلوا .. ماعارفة أحكي ليكم كيف ؟!!
كدي بس أصبروا لي حبة ، بحكي ليكم..
بس سمعت ليكم أمي بتكورك فيني وتقول بأعلى صوت..

" يامجنوناااااا " !!
وشفت أمي بقت حارس مرمي ماحصل ، حرييف حرفنة .. طايرة تتصدى لكرة خطيرة ، وأمسكت بها في الهواء بمهارة عجيبة ؛ وارتمت على الأرض وهي تحتضن إبني الصغير الرضيع " محسن " ذو الشهرين فقط !
أنا فوجئت.. وإتذكرت سريع إني كنت منومة محسن ولدي الرضيع جنب كرعيني .. ولما فرفر صحيت من نومتي الغرييقة ديك وافتكرته الكديسة إياها .. آي والله ! .. وسعيت لممارسة هوايتي الرياضية بقذف الكرة أقصد الكديسة رزة ..
وطبعا بقية المشهد كان الخلعة الشديدة والبكاء مني أنا ومن محسن المسكين .. والشكلة من أمي يديها العافية أنقذت ولدي من موتة ولا مصيبة تانية ..
الله ستر .. الحمدلله .. أحمدك يا ربي ..
إنتو ياقراء بتضحكوا علي.. صح ؟ ههههه.
هووي يا أمهات .. أوعوا تعملوا زيي وحافظوا على أولادكم سمح .. ماتخلوا الكدايس معاكم جوة الغرف ، وماتخلوها تنوم مع العيال .. هي ذااتا مرات بتجيب المرض .. أو بتخلي الواحدة تبقى شوااتة وهداافة زيي وتجيب أقوان بس في شبكة الفريق حقها زااتو !

معقول... يكون دة كلام اهلنا السودانيين الزمان؟
(( معقول؟! ،، ده كلام السودانيين قبال قروون؟!
____________________
(( الجودلية بت حاج مكي؛/:
الجودلية فترت من السهراجة والهمساسة و الساسوية ما خيرت والشول قالت رماد البرود ماهو عديل والشلتوت ده مكودب جيبوا لي كركجية من الحجرة وليفة من تحت الكروقة وامرقوا لي الدمسيس والحزا من السحارة وجيبوا القراع الليل اول عامن اول المختوت في دكاك المرقون وعقبانتية عجنتن في الكورية وضارتن بالتقروقة وكشرتن في البيت الغربي وباكر مع الاذان تورت الجودلية وجابت العتنيبة المعلقة في الخس و نواصل الجودلية بت حاج مكي من الدغش وقصاد النفاج وبي عند الكريقة وفوق العرمض والقشقش وتحت الخشة اتلمن الخودة بت سليمان والحرم بت مكة والبقيع بت الشيخ وختمة بت الطيب وزهرة بت علي والعلم بت ود بشير ومدينة بت طه والسرة بت مالك والعاجبة بت الصافي وقعدن يبكن سمعن الجودلية تورص حاسبات حاج مكي مات ، وبلا كتير جاهن مارق بالسلمية المجكنة في التبيقة والخيدرانة التحت البشنتيقة وعرف الهيلمانة دي من الشول فشان اوقدت اللدايات بي باقي الوغش والعرمض وختت فيهن الكورية وبعد طمحت كبتا فوق محل الساسوية والجودلية فرد جقليب ووريص والشول فرد تنعير الا نتقن منها الكورية ورمنها بي عند التمساحية والطرفة البي عند الكدنبس . وبعد اتفك حاج مكي من الوندابة دي جاب اللبدة والسرج والبردعة والقشاط واللجام وشدد علي البوغة السداها البارح وجاب اللربل فتح اللبقة علي البرسيم وفتح البربخ على الحمص ومشى جاب القران ربطوا على الدومة ودخل فيهوا الدومة والباقيات والبرانى وجدع القفاف للجنون خلاهم ينورقوا ، ومشى على بستلة الشول المعلقة فى السيالة لقى الهنشل طالع السمبوسة عزل منها شوية ودفق العقاب لى اب صليعة والكرج وتماها شوية كمروق من تمرة حبوبة ومويه من حوض الرأس وادلى بى عند العميوق على البيت لقى الشول نزلت حلة الفساخ والجودلية ملت البراد من القلة التحت الجر وكبت فوقو من الحمريب الفى الدكاك . قام صلى وكوع فى ا لتقروقة وقال للشول باكر نضبح عبور امحمد كرامة للجودلية الليلة الكرامة ، والبحر أصبح شارد ، والعبران وكرانات ، وعناق الشول شايلا العرق اضان غاتسة واضان فى السهلة زى حميرة هناى داك ، إلا حاج مكى ملا الحبس من الحق ، وعلق العبور فى المشرقية التحت النبيقة ، وبلا كتير وقعت الكبتة وقامت التلقيحة

التعليم زمان.

بالطبع هذه الايام المدارس مغلقة.ومن زمن بعيد، كانت المدارس في معظم بقاع السودان ، تفتح عند شهر سبعة..يوليو..
الاستعدادات الحكومية للعام الدراسي كانت تبدأ في مثل هذه الايام من كل عام.و وقتها، كان غرب السودان لا تربطه بالعاصمة، الشوارع المعبدة. لذا اعتمد الناس علي الطرق البرية الوعرة والسكك الحديد لنقل الاحتياجات المدنية والعسكرية.

اتذكر كيف ان الوديان تصبح عائقا للواري، خاصة في فصل الخريف. ذات مرة هطلت امطار غزيرة في مطلع شهر يوليو.وفاضت علي إثرها الوديان.ومن ضمن هذه الوديان، فاض وادي خورطقت.هذا الوادي عندما يفيض، يصير مخيفا.لا يستطع كائن من كان عبوره . دع عنك الغرباء من السائقين الذين لا معرفة لهم باعماق وحفر هذا الوادي. ونحن وقوف علي ضفافه نتفرج عليه، فاذا بواحد من سائقي اللواري السفرية، خاطر بخوضه وعبوره.
كانت العربة من نوع بدفورد "سفنجة" تحمل كتبا وكراريسا ومحابرا في طريقها لمخازن الحكومة بالابيض.
حاول من حاول ثنيه ولكنه كان واثقا من مهاراته وكفاءة سيارته.لم يسمع النصح بل ادار محور سيارته وأدخل اللوري في ذلك الوادي المجنون.كانت للماكينة صوتا جميلا وهي تهم بالعبور.هذا النوع من السيارات لديه صوت مروحة تبريد يسمع صوتها من علي بعد كيلومترات.كانت تئن انينا، وكأنها كانت تشكو اليه صعوبة الحال.لكنه لم يك رحيما بها.ادخلها مكرهة..
تمايلت وتمايل معها الناظرون..كتمت المياه انفاسها فلم نعد نسمع لها صوتا..تحملت المشاق و أسرت العناء و التعب.ولكن قد غلب عليها الصبر !

تمايلت كثيرا ، تمايل الطفل الذي يعاقب علي يد جلاد غير شفوق..ظنته يوقفها، ولكنه اصر عليها ان تتقدم.وقتها آثرت هي ان تستريح، فاتكأت علي خدها الايمن متعبة..تطايرت صناديق الكتب والكراريس منها..تكسرت زجاجات الحبر السائل وامتزجت بالمياه فاعطتها جمالا علي جمالها.

اما السيارة الانجليزية، فنامت نوما غريرا..طافت فوقها رغوة المياه فجعلتها كالفاتنة التي صبت علي جسدها كميات من الشامبو علي حوض استحمام !

كنا نضحك بطفولية وكانت المياه تارة تنجلي عن "عينها" الشمال وتارة تختفي عنا..ظلت كأنها تغازلنا ونحن نضحك.

اما السائق، فاخذته المياه بعيدا عن محبوبته هذه، فاخذ في الصياح: يا ابو مروة..يا ابو مروة !

جري عليه الناس فانتشلوه..اقعدوه علي الارض وهو يرتجف !

ما كنا نعرف لهذا الارتجاف سوي امرين..ان يكون خائفا او عله قد اصيب بالبرد !
فظل هكذا يقلب كفيه حسرة لما الم به وظللنا نحن نتجاري لنسحب كتابا او كراسة او زجاجة حبر لم تنكسر !

هذه القصة من عدم الصبر ، ذكرتني حال رجلين اتيا من سفر بعيد ،قاصدين زوجاتهما واطفالهما من بعد غياب طال!

كانا ان وجدا واديا عميقا حال دون مسيرهما.انتظراه لفترة ولكنه أبي ان يهدأ.تحاورا فيما بينهما. قال قائل منهما: "يا زول، والله انا دا ما قادر اصبر اكتر من كده! انا بحاول اقطع لانو والله مشتااااق لاولادي !"

رد عليه صاحبه: "يا زول شيل الصبر، الوادي دا باكلك !"

رفض الاخر العرض..تناول مخلايته..استأبط فأسه ثم دخل الوادي!

المشهد:

من اول دخوله، اخذه الوادي بعيدا عن مساره، بل اخذ يقلبه ليري منه الرأس تارة والمركوب تارة والمخلاية تارة اخري !

نظر اليه صاحبه معلقا: هههههه ،والله يا دوبك بعدت من عيالك !

ودالحاجة