ورجعت انظف ، دا ارفع ايدي ، ارجع بهار للكاونتر ، ما احس والا انفجر شي بالمطبخ بس صوت قوي من قوتو نرعبت وع السريع لفيت نفسي وكعدت

احس حراره بجسمي ، بس من الخوف ورهبة الصوت لسه ما مستوعبه شنو صار ، كلهم اجو

على الصوت

الحجي وصراع ونائل و الحجيه وام سعد ، كلها تصيح ها بس صراع ع السريع دنك وجر وكضبني :- شبيج ، احجي شنو هذا الدم شصار

..ادحك ثوبي مدمر دم ، واني بحاله اتلفت وما اعرف شنو صايرلي ، وكتها يلا استوعب الوجع البجسمي

هو كام يتلمس بجسمي ويتحسس يريد يعرف شنو الدم ، واني كمت ابجي من الالم ، حط ايدو على مكان بساع شاغت روحي وصرخت

و الحجي يكلو هاي الجامه مال الطباخ مفجوره :- يولي ساده الجام و الطباخ مشتغل

صراع :- الكزاز نابت بجسمها ، بس خليني اطلعو ، انكيني مجال ابويه انتي

-لا لا يوجعني ، لا تكضبني ، لا اطخها ، رجلي موتتني

صراع :- بس خليني اكشف جرحج يا بويه ، بعدي ايدج ما ايذيج

-لا لا وخر جاي اموت من الالم لا اطخها وخررر
احجي واصيح من الالم وابجي ، مد اديه وشالني ، بس احس لجمني ، اخذني الغرفة الحجيه وهم هوسه

صاح ما اريد احد يفوت ، فاتت بس الحجيه وراه وهي تسال وتحجي ، شك دشداشتي ، وجسمي ما ينشاف من الدم

دحك الاماكن اللي صايبتني الكزاز ، ظهري وزندي و فخذي ، صاح :- يمه شاش وكطن وديتول وملقط ع السرييييع

هي انخبصت وهو يصيح :- ع السرررريع

..ه اديه كلها دم واني ابجي ، مد ايدو لوجهي ويكولي :- لا تبجين روحي انتي ، هسه هسه بس اطلعلج الكزاز تحملي

-اللالم ذبحني جاي اموت ، تحركني

- هسه بس اتحملي ، وين صرتي يمممممممممممممه

.. اجت وجايتلو الطلبو ، كام يعقم المكان و يكولها :- يمه اشريلي باللايت
وهي كاضبه اللايت ومكربتو يم راسو وهو يشتغل ويكول :- بس لا تتحركين اتحملي

طلع من رجلي ، وخلا عليها كطن وكال كضبيها ، ورجع طلع من ايدي ، وبعدها البظهري ورجع من جديد عقم الجروح وشاش و تيب طبي و عقمليها

وبوصله قطنيه نظف جسمي من الدم و وجابتلو الحجيه كلابيه نظيفه ، لبسنياها ، بمجرد ما لبستها رجعت راسي للتخت

:- لا كومي خل اخذج للمستشفى ، الجرح البرجلج غميج لازمو خياط

-ما اريد متتت
وبقيت اون من الالم ، حاول يكومني ، ما كمت ، جابلي ابرة التهابات عدنا ضربني ، وانطاني مسكن الم و فاليوم ، وغطاني

.. نمت حتى بعد ما حسيت عليهم من تسحرو ، ثاني يوم الظهر اسنع هيام فوك راسي تكول :- ما اجو والتمو لا ما انضربت عين هلمكروده ووكعت شوف شصاير بيها خطيه

.. ما رديت ، شوي واجه صراع من الدوام ابدلتو العسكريه ، سلم وفات تلمس حرارتي :- زينه حرارتها بس جرح رجلها لازم يتخيط ، ما كعدت ما اكلت

الحجيه :- لا والله بس نايمه ، شوي تكعد تون وترجع تنام

-ام علي قنعيها تكعد حتى ابدل وارتاح شويه واخذها للمستشفى يشوفون جرحها

.. كعدتني هيام ، ما قبلت اروح ، اخاف يخيطون رجلي ، خليها هيج اتحمل

فات الحجي يسأل شلون صرت وكام يلوم :- ليش ما تنتبهين يول عقلج هذا الله حطو زينه ، غير تفكرين بي ، شكلتي الروحج من سديتي الطباخ و النار مشتغله

الحجيه :- هذا قدرها ياحجي وهلبنيه كالولي عليها نجمها خفيف بساع تأذيها العين

هيام :- ما بالحيف خليصه وخاوتتها فايات طالعات وصاحن مكعدها بقصر واختي شبعها ضيم ، وحلسدات البنيه على هلبيت وهي من فاتت بي لليوم ما كن ارتاحت ولا شافت الراحه من عيونهم

ام سعد :- كلمن يشوف عدوو كبال عينو ، قابل بنات اختي يحسدن يلما تستحين

هيام:- اكبر عيون نكسه هن بنات اختج كل البلا من جوا راسهن

الحجيه :- يبووووه راح نتكاون صايمين وما بينا حيل فكونا من المشاكل

هيام :- دكعدي ليليان كعدي ، خل ياخذج للدكتور يشوف جرحج ..

- ما بيه ام علي تاذيني ما اريد اروح

-يولي غير يطيبوها الج ، هيج ما اطيب

-ما قبلن بقيت بمكاني ، هو صعد سبح وصلى العصر ونزل مبدل ، شافني بعدني نايمه تخبل :- هاي بعدها على نومتها تحجوووون صدك

هيام :- شسوي اجر بيها ما تقبل تكوم

صراع:- كووومي لشوووف كومي ، حتى بهذا عنادج وراسج اليابس ما اطهي ، محد متأذي غيرج غير اخذج يعالجوووج لو اضلين هينا متكومه وما بيج تكومين وعينوني وكوموني

كووومي دشوف

-ما تريد اخاف

-يولي منين تخافين ، جاهله انتي ، باجر عكبه حبلتي شلون تخلفين ، مضعضعه روحج كومي

.. كومني غصب و جابولي الملابس لبسوني وطلعت وياه ، اخذني للمستشفى وطلب مضمده تجي تعالج مو مضمد

نزعتني الجبه وكعدتني ع السديه ، كشفت جروحي ، وكالت بس البرجلها متاذيه ويحتاجلها خياط الباقيات زينات

ضمدتلياهن واجت الرجلي واني كاضبه ايدو بأثنين اديه يمكن عاصرتهن حيل من كد الخوف عاد كال الها :- بعد اخوج رحمه الوالديج هاي تره تخاف خليلها بنج ما تتحمل

.. والله هاي شو صدك كامت راحت تجيب بنج ، الظاهر جان ابالها تخيطني بلا بنج ، هو كاضب ايدي و واكف يدحك ما يحجي ابد حتى بالسياره ما كن نطق كلمه

جت بنجتلي واني موسعه عيوني وادحك بيها شتسوي برجلي ، سحب وجهي من حنجي ورفعو :- لا ادحكين بيها وهي تخيط

بقيى كاضب وجهي ، واحس بألم حقير ، خلصنا وطلعنا ، رجعني للبيت ع الساكت ، فك العقده مال الزعل بس ما رجع مثل قبل حجيو سطحي على كد الكلام اليكو

لو وما يطول

فتنا للبيت مسطوره ما بيا ادحك ، ع التخم نمت ، وكلها تسأل : ها شصار وياها

وهو يكول :- خيطواها رجلها ، وانطوها مسكنات وعلاجات ، بعدو مفعول الفاليوم بيها مسطوره عوفوها

.. من صدك مسطور راسي اريد اكوم ما بيه ، فتت بغرفة الحجيه تمددت و نمت ، بس ع الفطور ، جبرني هو اكعد اكل شوربه

وكال :- اكمل فطوري الكاج الماعون مكملتو

وتركني و راح ، كعدت كوه اتجرع الشوربه ، كلش كلش كدرت اكل نص ، بعد ما اكدر ، عفت ورجعت راسي للمخده ، كملو ، ورجعلي ، ما حجه شيء غطاني ونصى المبرده ، لان البروده كلش تصل بجروحي ، وطلع

بقت بس الحجيه يم راسي ترتل قران وكل شويه تفززني :- ها شلون صرتي ليليان

مشت ايام ، وهو كلامو سطحي وياي ، ما ادري احبو على كثرة اهتمامو لو اكرهو على البرود الشايلو

هو جان حاجز للحجي و الحجيه عمره برمضان ، ام سعد تكاونت ويا الحجي حتى ما يروح شلون هي ما تروح ، بس هو ما قبل الا يروح ويا الحجيه

ف ضاجت وطلعت لبيت سعد زعلانه ، ما اهتم يكول :- اي عود من ارجع من العمره اجيبلها وياي شي واروح اصلها خليها يم ابنها ، المهم اروح اكسبيلي همره بهالايام المباركه

فراحو بالعشره الثانيه من رمضان ، صراع كام ينزل ينام بغرفة الحجيه على تختها ، واني بالكاع ، فتحت خياط رجلي بس ما يعجبني اصعد فوك انام ، وهو هم نزل ما حبيت افاركو

بس ابد ما طخ ولا اجا يمي ، لو نام بفراشي ، يلبرود الشايلو ، شكد جنت ماخذه عليه نظره انو ميتحمل وضعيف كدام رغباتو

بس حتى رغباتو ما همتو اليكول ولا يحس ، ينام ويغط بنومو ولا كأن فراشي بالكاع ويشتاق ويجي حتى لو بس ياخذني على ايدو ،

ابد ما تنازل ، بقى مصمم ، وكلامو على كد السؤال ..

بالنهار بالدوام ، يرجع ينام للعصر طلع ساعه ورجع للفطور ، خلص الفطور طلع هو ونائل ما يرجع غير ب١٠ يدحك بموبايلو شويه ، يكلب قنوات اخبار شكو ماكو لل١٢ نام ، ب٢ يكعد للسحور ومن بعدها يكعد يرتل قران ويرجع ينام وراها يكلع للدوام وهذا ترتيب يومو

يصدف لو صار بيناتنا كلام ، على اكل ، لو انطيني هذا من يمج ، صيحيلي فلان ، حتى ملابسو واكلو ما يسخرني

بعدها طلع واجب اسبوع ما رجع بقى بس نائل ومرتو ويايه بالبيت ، ايام و رجع الحجي و الحجيه من العمره ، هو ما جان موجود

نائل راح استقبلهم وجابهم ، بس رجعو وعساهم لا رجعو ، جان ابالهم مخطط ، والحجي يكلها عود من يجي ابو حرب نفاتحو بالموضوع ونگلو

من اجا هو ، اني جنت مشتاقتلو ، بس هو جان تعبان ، تلكيتو من الباب اضحك ، هو ما ضحك بس كال :- ها الله يساعدج

-هلاو شلونك

-زين
وفات للبيت وكعد ويا الحجي و الحجيه ويسألهم ع العمره و شصار وشسويتو ، وهم طلعوله الهدايه وجايبيلو سجاده و دشداشه وعطر ، واليه جايبين ثوب قماشو هندي ، مدري شيحسون

هسه لو سوده جان كلت شافونه سود عبالهم اهنود ، بس اني مو سوده ويجيبولي زي هندي وين البسو

العصر واجت حلا جايبها رجلها وباركت للحجي و الحجيه ع العمره و سعد ، نزل صراع جان تتلكاه وتكلو

:-بابا ابشرك بابا انت اول واحد يعرف اني حامل راح يصير عندك حفيد

هو وسع عيونو و وحظنها وفرحان ويبوس بيها ويصلي ع النبي ويكولها :- ولكم بنيتي كبرت وراح تصير ام

وكلها فرحت وهي تكلو :- بابا اذا ولد اسمي حرب على اسم اخويه المرحوم واصير اني ام حرب

وهو فرحان بيها ويبوس براسها :- والله يحفظج والله يحميج ويارب يسلها عليج

لرحت بفرحتهم بس اذاني الحجي من دار وجهو عليه ويكلي :- هاي النسوان تحبل وتخلف بساع مو انتي الصارلو وياج جم سنه ما عرفتي تحويلو طفل واحد

صراع ع السريع كالو :- شنو هلحجي يابه هي شلها علاقه هاي قسمة ربك

... عفتهم ورحت للمطبخ ابجي :- ليش اريد افهم حظي ليش هيج ، الرب ليش ما عيرحمني ، اخذ مني اهلي ويتمني وحتى مو راضي ينطيني طفل اسند نفسي بي

ليش الرب ما كاتبلي افرح وانسعد ، ليش بس الالم والاه نصيبي من هاي الدنيا ، تعبت ربي والله تعبت

.. بالمطبخ واسمع صراع يكلو :- حجي شستفاديت منزحجبت هيج تره هذا قدر ما بيدها

الحجي :- ما بيدها ، بس بيدك تخلف من غيرها وانه بصراحه قررت ازوجك

-ول يابه مراهق انه وتريد تزوجني ، شبيك حجي تراه الشيب ترس راسي ، ما محتاج تدهل بحياتي انه اعرف بيها

الحجيه :- لا يمه مو ندخل بحياتك بس نحن نريدلك طفل يسند كبرتك

-يممممه شهل حجي هاذ ، انه افتهم الاريدو و الما اريدو ، واليرحم والديكم فكوتي ولا تدخلون بحياتي

الحجي :- يابه نحن مو شغلة ندخل بحياتك لو نريد نبعدك عن مرتك بس بنت عمك اخلاص كبرت وصار عمرها ٣٧ سنه و الناس اكلت وجهه على ابو عانس

صراع :- اييييي و انه كافل ارامل وعوانس وتريدني المها ؟

-يابه هاي بنت عمك

-ابد انسى هسالفه لا تححي ، اخلاص ههههيييي ، دسكت حجي ضحكتني

-يول الغريبه ما تلمك ، نريد ابنك منا وبينا يرفع اسمنا ، شنو تجيبو من هلمسيحيه ، بنت عمك اولى بيك وهي ما بقى العمر كدامها خل تخلفلك طفل يسندها ويسندك ، وبقي مرتك عل

ى ذمتك قابل نحن شرايدين منها

- شنو هلحجي ، جديد لو شنو ، شو دسدو السالفه ودسوف واحد.يفتحها بعد

الحجيه :- يمه ما بيها شي لو تزوجت قابل شسويت الله محلل اربعه ومو رجال الما يثني

-يممممه هلحجي مو يمي ومو انه الينكالو مو رجال الما يثني ، انه مربع مو مثني وخلصت من النسوان وطلعت بوحده ، فكوني من المشاكل انه راضي بقسمتي لحد يدخل افتهمتو

-لا يمه انه ما اقبل ولا ارضى عليك الا تتزوج ، بنت عمك كبرت وانه وابو فكرنا بيها هناك ونريدها الك ، حتى لو ما تحبها ، المهم تخلف منها

مرتك هلكدها طفل ما تكدر تحوي ظهرها خفيف شما حبلت سكطت ، خليها الك زينه ، وتزوج الثانيه التخلفلك طفل يسندك ويسند كبرتك بعد يومين تكبر منو الك

والله ثم والله ما يرتاح كلبي الا ازوجك

ليليان :-اسمع ومن صدك احترك بكلامهم ، ولا كاني موجوده ولا كانو عندي احساس واتاذى يحجون وبصوت عالي

متحملت فتت عليهم وصرخت بنصهم :- الله لا ينطيكم الله لا يوفكممممممم عمركم ما تعرفون الحق ، صراع ما عندو سند صراع ما عندو ولد صراع صراع صراع

ما تفكرون بغير صراع ، وتعرفووون الحق بس لما يصير يم صراااع ، اني شذنبي ، اني المكسوره ، اني اللي ما عندي اهل ، اني اللي ما الي احد غيرو

وتريدون تاخذو مني وتزوجو محد كال هاي شنو شلون نحجي كدمها ، كافي تحجون الحق بس اللي بجانبكم حق غيركم ما تحجو

صراع عندو اهل وعندو فلوس وعندو بنت وعندو كلشيييييي اني اللي ما عندي شي حراااااام عليكم تكسروووووني حرااااااااام

، اصرخ بكل صوتي وابجي وصراع يزكح ويجر بيا بس من خركة كلبي ولا اهتميتلو لحد ما وصلني للدرج وصاح

وصاح بكل صوتو :- صعدددددددددي

- مااااا اكول غير بس الله لا يوفقكممممم

-ليليااااان

-لا مو ليليااااان كافي ما اريد اسكت كاااااااافي ، جبتهم ابيتي وانچبيت وسكتت وتريدني اسكت لما يردون يزووووووجووووك

-ولج صووووووتج حقيرااااا طلعي فووووك

- لا ما اصوتي وما اسكت فهمت كافي اسكت اسكتي ليليان اسكتي ليليان دفنتوني بالحيااااااة واني عايشه ما اسكت كااااافي

الله ياخذكم ويريح كلبي الله يخلصني منكمممممم ..
ما حسيت الا على جف صراع على خدي وهو يصيح ويكولي :- صعدي حيوانه

وهم هوووووسه ويتراددون وياي ، هينا سحبت نفسي وصعدت لغرفتي وكعدت ابجي من كل گلبي

واسمعو هو يعد ويصف عليهم وخبص الدنيا ، وصعد فات للغرفه اني مدنكه راسي بين رجليه ولشهك وابجي من كل گلبي

جا لمني بحظنو وحط راسي بصدرو :- ول ثوله انتي تالي وياج
اخذ نفس وهو يهدئ نفسو من العصبيه ، ودكات كلبو حيل سريعه

رفعت راسي وعيوني تكت دموع :- انت راضي بحجيهم

-ول حجيهم مطر صيف انه شعلي بيهم ، انتي ليش غبيه ، تتجاوزين عليهم جدامي وتخليني اضربج ليش مو كتلج صعدي قابل امشي بكيفهم واتزوج

-بس امك تكول ما ارتاح لا ما زوجتك

-اي وتكول انه شلي بيها ، انه لا رايد طفل ولا رايد زوجه ، ان ردت طفل ، اكبر طفل ما يلحك خبالج انتي احلى اطفالي ، وان ردت زوجه والله ثم والله ما تحلى بعيني غيرج

-يعني ما تهتملهم

ضربني على راسي خفيف :- ول هذا العقل شوكت يشتغل ، انه شجنت احجي ، من سمعتي حجيهم ما سمعتي جوابي الهم ؟

-لا تعوفني احبك والله

-اعوف اهلي كلهم وما اعوفج ، يول والله ما الي غيرج لا تكليلي عندي شي ، بدونك ما اسوى شي ، بالقرأن من رحتي انه والميت سوى والله

يكفيني انفاسج بالبيت حتى لو ما حجيت وياج

-عجل ليش عايفني

-انه ما عايفج عيوني تراقبج بس اريدج تعقلين علعلتي گلبي

-حظنتو حيل وكمت ابجي وهو يمسح على راسي ويهدي بيا ، رفع راسي وباس كصتي

- ول رحميني كافي تره صايم حرام عليج وانه مصموط جد جدي

-ابتسمت ، بعدت راسي ومسحت دموعي واندي ادحكلو ، مد اديه و مسح خدودي وكال :- من فدوه اروح لهضحكه الحلوه

تمدد وخليت راسي على صدرو وبقى يمسح على راسي وهو بكولي :- من كل عقلج انتي ابدل الماسه بنعال حمام ول شجاني تخبلت ، نامي بويه وارتاحي والله ما اعشك غيرج ........يتبع

☆☆☆☆☆☆☆

#زينب_ماجد

#مراهقة_و_الاربعيني

،،،،،،،،، بقلم زينب ماجد ،،،،،،،،،

الحلقة_حلقه للتوضيح

راح تسألوني هذا بارت ؟

لا حبايبي هذا مو بارت ، فقط توضيح نقط في الروايه

.. طال الحديث في الصفحات الألكترونيه عن العنف في رواية المراهقه ..

البعض وصف القصه بأن هي تحريض لعقول الفتيات
و البعض قال معاديه لحقوق المرأه
والبعض قال عنصريه
ووصفوني باني ما زوخي وغير من الصفات المسيئه واعتبروني على انو اني اريد تسميم عقول الفتيات العراقيات

واخيرا قاموا بحمله ضد الصفحه الرسميه الخاصه بقصصي ( قصص فتيات عراقيات ) لأغلاقها

جانباً كل هذه الشوشره ما تهمني ، ولا تزعزع في نفسي ولا ذره ، تأكدوا واثق الخطوة يمشي ملكاً ، واني واثقه من اللي دا اقدمه

لكن خليني اوضحلكم ، لحتى تفهمون ، لان البعض ما تكفيه الاشاره ، يحتاجله كعده وكلاص چ اي وسالوفه يلا اطخ عنده !

عنف ، عنف ، عنف ... اي و بعدين ؟
هذا كل اللي فهمتوا ؟

برواية المراهقة ، دخلت بعمق الحياة الزوجيه ، بأدق تفاصيلها ، والشرح عن موضوع الحياة الزوجيه سلاح ذو حدين ياما تكون منصف ، ياما ترجع لكف وتظلم الأخر

قررت اكون منصف ، وهذا الافضل ، فشسويت ؟
ركزت على اخطاء الأثنين ، ما جملت خطأه ولا خطأها

لما يغلط تكرهو ، ولما تغلط تكرهوها ، وهذا دليل على اني مو مع احد وانما وصلتلكم اخطائهم بصوره صحيحه

ليش ؟!
لاني دا اذكر نقاط القوه و الضعف في الحياة الزوجيه ، بأيجابياتها و سلبياتها ، لحتى نساعد ولو بشكل بسيط بتقوية العلاقات الزوجيه

شلون ؟

خل ابديلكم من البدايه ، ووصفت البطل صراع ، على ان هو رجل عنفواني ما يتفاهم ايده و الضرب ،

وهذا خطأ ، شنو اضرار هذا الخطأ و العنف ؟

اولاً .. بينت عنف ابوه مع امه انتج عنه رجل عنفواني ما يعرف غير الضرب و الترهيب ردة فعل للخطأ ، وهسه سبب تربيته من الصغر ما تربى بعائله وديه وسليمه

من ثم بينت ان عنفه مع زوجته الاولى كان سبب بتعاستهم ، انتج عنه بنت عدائيه تكره و تخطط باذية الناس ، لانها ما تربت على محبه و ود وسلام ، تربيتها خلتها بهشكل

ومن ثم بينت عنفه مع زوجته الصغيره جعل منها انسانه شرسه ما عندها شي تخشاه حتى تخاف

شيسوي اكثر شي يضربي ، يلا هو ضاربني ضاربني ، فتتجاوز وما تحترم

وهذا تبيان ان العنف ما يصلح عائله ابداً ، وانما يهدم عوائل واجيال ، لان جيل عن جيل راح يتورث هذا العنف ويصير عدائي بسبب طفولته ..

هذا يعني للرجل ان عنفك مع عائلتك يهدمها ما يسعدها ..

ارجع للمرأه وهي بطلة القصه ، سواء هو تعنف او لا هذا ما يعنيلج ان تتجاوزين ، ولا مسموحلج ابداً

ليش ؟
لأن احنه بمجتمع شرقي ، للرجل احترامه مهما كان ، ولو تجاوزتي لتتوقعين انو تعدي عليج سلامات ، انتي تتأذي

انتبهي احنه مو بأميركا وتكوليله فاك يو ، ويردها الج فاك يو شيت ، لا لا لا حبيبتي لا ، احنه بالعراق اصحي من تكوليله انت حيوان لو زباله لا تتوقعين ينكسر كلبه لا راسج اليتكسر و الكل راح تكوله اي تستاهل

حتى صديقتج اللي تكولج كسر بيده لو كنتي زوجة اخوها راح تكولج من ايدج شكو تتجاوزين ، تستاهلين

هذا مجتمعنا للان الرجل فوق المرأه ، وحقوق المرأه ما هي الا بدع الكترونيه ، لا تمنين نفسج بيها لو ما كان الج سند حقيقي من الاهل

لليوم ما عدنا قوانين تحكم بلدنا ، وتردين تكون حقوق الج ، احفظي حقوقج بأحترامج ، ونصيحتي الج من خلال الروايه ( لسانج حصانج ان صنتي صانج وان هنتي هانج )

حتسألون ، زينب انتي ليش مع البطل ضد البطله

.. اني شخصت اخطاء الأثنين ، واكون ضد اخطاء المره اكثر من الرجل ، لان ما اريد ابرر للفتيات العراقيات اخطائهم واكولهم لو تجاوزتو عادي وغصبا عليه يتقبل

اني دا اعظم الامر بأعينهم لحتى ينتبهون ميتجاوزون .. لان هن ضعيفات يا اما ما الهن اهل يا اما كاعده لاجل اطفالها ،

ف اني ما اريد اهجم العائله العراقيه واصير مع المرأه ع الخطأ ضد الرجل اللي هو المدلل مال المجتمع

اني دا اكولها صبري ابيتج امي ، ودا انطيها المقومات و النصائح في القصه شلون تتعامل مع رجل عصبي ويضرب وما الها ناصر

بإحترامج ، بذكاء تصرفاتج

اسكتي وقت اعصابه ، لكن لو هدئ ، لا غبيه لو سكتي ، زعلي وطالبي بحقج وعرفيه حدوده وعلمي يحترمج

المرأه اساس العائله لو وكفت وياها ع الخطأ ، هنا اني دا اهدم العائله كلها ، لأن مثل متعرفون في اللي يتأثرزن بشكل مو طبيعي ،

فشلون لو اني صاحبة الروايه ساندة الخطأ ؟؟

طيب زينب وحقوق المراه ؟

.. اعتقد في رواية خطوات نحو الجحيم طالبة بحقوق المرأه بشده ، ليش ؟ لأن البطله كانت قويه

فناشدة ان من حق المرأه تكون اعلاميه
من حقها تصير فنانه
من حقها تطلع تمشي تسوي اللي يحلالها ما تنقص عن الرجل شيء ، الحجاب راجعلها ، مو مقياس على اخلاقها

ان كانت هي قويه ، اني ادعمها وانصرها ، وان كانت ضعيفه ، اصبرها ، حتى لا نكون هدامين

و القوه تجي من الاهل ، لجين كانت قوتها من اهلها ، تكدر تطلع وتمشي و تواجه

الحياة من حقها تتحرر ، على اي اساس يجيها رجل يكولها مكانج البيت

لا حبيبي روح دور التناسبك اني امرأه قويه طموحي اكبر

اما البنت اللي ابيت اهلها محبوسه مثل ليليان حتى كتبها حركوها وبطلوها ، تجي عند الرجل تريد حقوق وتريد تتحرر والا تتمرد

لا حبيبي مدي رجلج على كد غطاج ، انتي هيج ابقي هيج ، هذا واقعج لا ترفعين ركبتج وتباوعين فوك ، ما الج ناصر ، اهلج نفسهم هيج واقعهم فأرضي بواقعج خلاااص

ولو ردتي تحلين امورج وتحاولين ، فبعقل ، مو بتهجم و الصياح ،

قضيتي الحياة الزوجيه ، لازم اشخص اخطاء الاثنين لحتى نقوم هذة العلاقه ونحل مشكلتها ، ما طارحه قصه و السلام ، عندي موضوع دا اناقشه

سؤال .. زينب اطرقي لامور خاصه بين الرجل و المرأه و تعرفين اكو مراهقين

.. خل نتفق ، ان المراهق اللي ماسك جهاز بيه نت معرض لمتابعة اي شي لو راد ، اني بروايتي حرصت ان اكون بعيده عن الاثاره

مشاهد الحب بين الرجل و المرأه اقطعها وابلش بمشهد ثاني فوراً حتى لا اخلي عقل القارئ يروح لمحل هو مو غايتي

في السابق كنت انهي ألمشهد ب وووووو ، لا حتى هذه انتهيت منها لان شفت هذه الوووو تاخذ عقل القارى لمحل يستثار منه ، فبطلت

سبق وگلتلكم اني دخلت بعمق الحياة الزوجيه ، خلينا نبين للمراهقات ان هذه هي الحياة الزوجيه ، حب و مشاكل ومغازل ، وتعب وارهاق

لا نبين ان الزواج هو حياة ورديه ولا واقع تعيس ، فيه من هذا وهذا ، وعلى المراه حقوق اكثر من الرجل ، وحتى دخلت بالحقوق الخاصه وبينت فيها للمراهقات

ان هذا حق ، ما ممكن تستصغري لو تعتبري على مزاجج ، بالزواج لا واجبج ، ولو تعذرتي مره ، راح يعذر مره وراح يضوج مره ، واخيرها راح تصير مشكله ، لان هذا حق ، اعرفي كل الواجبات العليج واديها

هذا مقصدي من ان دخلت بعمق الحياة الزوجيه ما اطرقت لهذه الامور بصوره غير اباحيه ، ما لوثت عقل القارئ

اكو قصص ممكن تشرح ، مددها وكذا فعل وياها وكذا سوالها ، وشرح تفصيل لهذه الامور ، اني ما احب اطرقلها ابد ولا هي غايتي ، اني اطرق لمشكله حتى احلها

.. لو كاتبه بمكان هذا بارت
لاااااا ، دا اتعرض للتهجم ، و كثير ما فاهمين اني شنو توجيهاتي بالروايه ، فصار لازم ابينها بشكل دقييييق

خلصت السالفه و كلاص الجاي وشكرا جزيلا 😑

#زينب_ماجد

#مراهقة_و_الاربعيني

،،،،،،،،، بقلم زينب ماجد ،،،،،،،،،

الحلقة_80

كعد يحجي ويايه شويه ، ويهدي بيا ، اخرها تركني على ايدو و سكت ، رفعت راسي ، دحكتو غفى ، فتح عينو بتثاقل ، بستو بخدو

ابتسم واندار صفح ، حظني وكال :- بس اغفالي شويه تعبان وعطشان

بقيت بين اديه وافكر ، شكد حقراء يفكرون بخلوص ما الها احد ويريدولها سند واني محد فكر بيه ، بس لأن غريبه

واني افكر ، اخذتلي غفوه ، اندكت الباب ، صحينا اثنينا

حلا:- باباااا بعد نص ساعه للفطور ، انزل جوا تكول جده

-جيت بابا نازل ، يلا عمري عوفي الزعل عنج ونزلي ومالج غرض بيهم ، ولا تردين احد ، خليني انه اردهم لو استوجب رد

-تمام

هو راح توضى واخذ مصحف ونزل كعد ع التخم يتلو القرأن ، واني رحت للمطبخ ، وكفت ع الصب والسفره ، اذن الكل كاعد ع السفره

صراع كاللهم اكلو ، بس اصلي المغرب لان بس اكل اثكل واتأخر حرام ، فكعدو ، واني كعدت اكل ، الجو شوي متوتر من اللي صار

اكو فد مغمامز ونظرات مو مرغوبه بس حاولت اتجاهلها ، خلص صلاة واني دا اكل الشوربه جا هو فات من ورايه و فرك اكتافي و كوم ابن نور وكعد يمي ، درتلو واني مبتسمه

الحجي ضاج و ذب كلمة :- فوك ما يضبها تدعي على اهلو يفركلها ويضحكلها ..
وهز ايدو ، صراع تجاهل كلامو وكأن ما حجاه ولا سمعو

.. خلصنا الفطور ورحت ع المطبخ جا هو وكف بحجة يشرب ماي ، همس :- تركي الشغل من ايدج وطلعيلي فوك ، تره كوه مصبر روحي عليج

..ابتسمت وهزيتلو راسي بمعنى اي ، تركت الشغل غسلت اديه ، هو واكف بالهول يحجي ويا نائل ، صعدت ع السريع رتبت نفسي

فات للغرفه واني دا امشط شعري ، اخ مني المشط وكال :- اني امشطلك حبيبي وين الكا مثل هشعر الحلو الچنو خيوط ذهب

ضحكت وهو يمشط مبتسم ، بعد شعري صفح وكام يبوس بكتفي :- ليون كافي مشاكل يول والله احبج خلينا نعيش

اندرتلو :- اني هم احبك و الله و ما احب المشاكل بس......

:- خلينا متفاهمين ، صارحيني تحجيلي بالهدوء ، انه ما اضرج ، انه رايد انسعد وياج ساعديني

-شلون اصارحك وانت متصارجني ، يعني شكد كتلك انت متزوج كتلي لا وجذبت عليه

- ما سألتيني متزوج ، تكوليلي عندك شي وياها وكتلج لا لان فعلا ما عندي واثبتتلج بمجرد ما عرفتي تركتها ، اني ما رايد تخسرج لأجل احد

انا رايدج افتهمي ، من ضميت عليج لان اعرف هلشيء يسببلنا مشاكل ما الها داعي ، واعرف عقلج مراح يفهم لو شكد مكتلج متهمني ، راح تبقين تغارين

اكو اشياء لو ما نعرفها او نشوفها لمصلحتنا ، الله ليش حط حاجب بينا احنه و الجن وميخلينا نشوف او منطق الحيوان منعرف لغته ، لمصلحتنا لحتى نعيش مرتاحين لا يرعبنا ولا يشغل بالنا بسوالف تقلقنا

حدري نكعد خل اسولفلج سالفه

بيوم من الايام اجا واحد صاحب حلال للنبي سليمان (ع ) كالو يا نبي اني اريدك تعلمني منطق الحيوان، ما قبل النبي بس هذا الرجل اصر الا يتعلم الى ان علمو منطق الحيوان

راح الرجل وهو فرحان ان تعلم لغة الحيوان ، فبليل وهو نايم سمع مواء قططه اثنين ديشكون البعض فهو عرف منطق الحيوان فهم على مواهم وهي تكول جوعانه وماكو اكل ناكله شنسوي القطه الثانيه تكولها لا تخافين الديك بهذا البيت مريض وباجر راح يموت و ناكلو

من سمع وعرف وهو يعرف ان ديكو خمل اليوم صبح من الصبح راح باع الديك قبل لا يموت ، ثاني يوم هم سمعهم يشكون من الجوع وهم كالتلها الخروف بهذا البيت تمرض باجر راح يموت وناكلو وهذا هم نفس الحاله اخذ الخروف وبيعو قبل لا يموت ويخسر

فهم بليل وهو نايم شكن الجوع وكالتلها لا تخافين صاحب هذا البيت راح يوكع باجر ويموت وناكلو ..

هينا الرجل فزع ، كال شلون ياكلوني شنو اموت ركض للنبي سليمان كالو يا نبي الله الحكني كيت وكيت القصه واني ما اريد اموت

كالو شفت مو كتلك ما تتحمل اكو اشياء ما لازم تعلم بيها لمصلحتك ، الله راد يدفع عنك بلاء يريد يصيبك فمرض الديك حتى يكون فدا الك وانت بعتو مرض الخروف وانت بعتو وما بقى امامك الا ان تقبل باللي راح ينزل عليك وتستقبلو لانك اصريت ان تعرف اشياء مو لازم تعرفها

انه حجيتلج القصه بلهجتنه حتى اسهلج فهمها ، العبره منها ابويه انتي انه ما ضميت عنج حتى اضرج ، اني اعرف لو دريتي عقلج راح يكوم ياخذ وينطي والغيره تلعب باحوالج و وين راح وشسوه وانه اعرف ما عندي شي فضميت عليج وما تعبت عقلج بهسالفه ومن عرفتي بيها خلصتج منها ونهيت الموضوع

اريد ننسعد اريد نرتاح بحياتنا الباقيه كافي لا تخلين غيرنا يأثر علينا ، خلي حبنا اكبر من ان يجي واحد بجلمه جلمتين يفرقنا ويكلب حالنا

تمام ؟

-هزريت راسي ، بقى يداعبني و يغازلني وطايرين ابعضنا بعالم خاص متناسين منو موجود جوا ..

راح للحمام وسمعتو يصيح :- ليليااااان خاولي

كمت من فراشي عدلت نفسي واخذت المنشفه مالتي لان مالتو بغرفة بنتو لان عشتو جان زعلان بيها

دكيت الباب فتحو مديتلو ايدي ، سحبني اني و الخاولي صحت :- لا لا صراع بربك كولهم جوا كاعدين

-ملج علاقه بيهم اشعل شيب اهل

و اليوصلنا

-صراااع ، خل اروح

-اششش

اندكت الباب ، فز اشرلي بلا صوت :- منوووو ؟

حلا :- بابا وين ليليان جده تريدها

-وانه سارح بيها يا يابه دشوفيها وينها

همستو :- مو على اساس اشعل شيب اهلو اليصل ، وينك

-هو انتي شعلتي شيب ابوها وشيب الخلف ابوها شو حدري

-هههههههههه

همس - ششش صوتج يولو

.. طلع قبلي واني بقيت اكمل ، خلصت لبس البرنص مالتي شظيتو وطلعت ، صادفتني حلا وهي تثعد ع الدرج

شافتني بالبرنص شو هاي خزرتني وحجت :- طايحة حظ
وردت نزلت ، رددت ويا روحي :- كلمن يشوف الناس بعين طبعو

فتت هو عيبدل :- بدلي وشوفي امي شنو تريد منج

-ولا اريد اشوف مو تريد تزوجك على شنو رايحتلها ما اريد

-ليليان شحجينا يول كافي .

-ما بكيفي ما اطيق ما اريد

-عجل بدلي خل نطلع شويه نفر اوكلج موطه ونرجع

-ماشي ..
نزل قبلي اني بدلت ع السريع ومكيجت وترتبت ونزلت ، لكيتو كاعد بغرفة الحجيه ، هي ضايجه بساع حجت

الحجيه :- وين جنتي وانه ساعه اصيح ، عايفه مواعين الفطور و البيت مكلوب على هلبنيه وصاعده

صراع :- انه طلبت منها تصعد يمه ، و ساعة الانه بالبيت ما الها شغل غيري

- هاااه ، عي كعدتها ظهاري ومن ترجع انت تكابلك ، شنو ذيج خدامه عدها

- مو ام يوسف تجي كل اسبوع تشتغل بيت كامل بعد شطالبيني بطلابه

-وشنو ام يوسف جايبها الليليان ، شغلها ثواب ومساعده مو حتى ليليان تصفط تكعد

- مساعده من جيبي ما من جيب احد مقابل تشيل الشغل عن الليليان وهذا نحنا وهذا وضعنا اليتحملنا اهلا وسهلا ، الما يتحملنا براحتو ينام الجنب اليريحو محد مجبور بينا

-شنو تطرد اخوك ، شو صالحتها يوم ، ركبت المشاكل براسك

-انه ارد اخلص من المشاكل وتكليلي راكبها يمه يرحم والديج انتي اطلعي منها ، شغل البيت وهلسوالف اطلعي وطلعيني منها ، انه وكت اليعجبني اطلب مرتي مو حسب مزاج احد هينا مفهوووم

وهسه اذا ضايجه كومي وياي خل اونسكم و عوفي المشاكل رحمه لاهلج

ما ردت ضاجت ، هو حجاها وكام طلع ، دا اطلع وراه صاحت حلا :- بابا هل اطلع وياكم ضايجه

-تعالي

.. مشيت اني وهو كعدنا بالصدر و طلعنا السياره ، نزل يسد الباب اجت حلا :- نزلي اني اصعد يم بابا

-رجلي توجعني ولي

مدت ايدها كضبتني بعصبيه دا تحجي ، ركب صراع وكاللها :- يلا يابه فضيها

وصعدت ورا وتنافخ ، بقى يفتر و مرتاح ويضحك وينا ويحشش ، اني اول بدايه ضجت من الحجيه ومن موقف حلا من شفتو فرحان فرحت وياه و طنشت البقيه

رجعنا هو جايب علبة ايس كريم لامو ، من نزلنا خلاها بيدي وكال :- انطيها لامي

عرفت شنو قصدو ، ما راددت اخذتها ومشيت الغرفتها ، دنكت بست راسها وكلتلها :- لا تزعلين حجيه اني هسه انظف ، هو الطلب مني اصعد والله لان صارلو قرابة الشهر ما نتحاجه

هزت راسها وحجت :- انه شطالبه منج يا امي غير تعاونين هلبنيه ذيج هم حرام عدها فريخات ورجال ما تلحك ، ايدج وياها

-تمام ، هسه انظف تأمرين

اندرت لكيت صراع واكف وراي ، دحكتو ، ابتسم بنضرة كلها رضى باللي سويتو وكأنو ديكول عفيه

صعدنا بدلنا ، اندرت شو هذا كن حاسب روحو عريس و لابس دشداشه من شفتها ضحدت مدري شلونها عليه

شافني اضحك :- شببج يولو ، شنو اليضحك

-والله ما حلوه عليك

-ليش ول يابه جديده

-شايف خالد الصاوي بفيلم يعقوبيان كلش تشبهو ( هذا كان دورو بالفيلم مثلي جنسي وصراع طلع يعرف الفيلم )

وسع عيونو :- ول يل ما تستحين انه تشبهيني بهذا الشاقط شوو حدري

ضحكت وشردت من الغرف ، شو طلع وراس ويكولي :- وين تروحين اليوم اكضبج اكضبج

... نزلت ع الدرج اركض وهو يصيح :- صعدي لج

انضرب بنائل :- ها يولي شبيج على كيفج

صراع :- ماكو شي ، صعدي اليوم اشوي على اذانج بصل ول يابه

نائل:- لا خطبه عوفها صعدي يلا
عبالو صدك بيناتنا مشكله لأن صراع شكلو جدي وكوه ضام ضحكتو ، صعدت فشله من نائل واني اريد اسكت كوه مصبره روحي وهو يتخبل لان اضحك عليه

تقربت يمو حظني بيدو ومشى للغرفه :- منو خالد الصاوي يول ، انه مو ؟

-لا لا اسحب كلامي

- تسحبين كلامج مو

فتح الباب وانطاني جلاق فوتني جوا ، متت ضحك ، اريد احجي بس رافعه اديه وما تطلع الكلمه من للضحك

-حدري لهين يولو ، انه تشبهيني بهذا ولج علالج ما شايفو الفيلم وتنصبين عليه

-ما علقصد بس شبهة الدشداشه شبيك ههههههههه

شمرني ع التخت واني اضحك ، وهو مدنك ومثبت اديه وصافن بيه شلون اضحك ، من نظرتو اختفت ضحكتي :- شبيك

اخذ ايدي وخلها على كلبو ، يدك سريع بشكل ما طبيعي :- دشوفين شيصير بگلبي من تصيرين كدامي واشوفج فرحانه ، كلبي يموم يفرفح فرح وما يعرف شلون يحبج يحظنج يحير شيسويلج من كد ما يحبج

-ابتسمت وخجلت من دكات كلبو وكلامو ، ما عرفت اجاوب ، دنك باس خدي وتمدد يمي وهو يحشر راسو بيا ويتنهد ويكول :- لا تبعديني عنج يول والله اموت بكل لحظه انتي ما بيها خليج يمي وانه اعيش بسلام

-اساسا ما الي غيرك

-ششششش لتكملين ما اريد تكولين هلحجي ، حبيتي وعيشي وياي على

حب الله مو لحاجه ، انه ما اريدج تضعفين ما اريد تكولين ما الي احد

حسبيني بحياتج لا تكولين ما الي غيرك كولي ما احتاج غيرك و اعرفي هلبيت بيتج سواء تكاونه لو تصالحنا مستحيل اطردج منو ، بيتج بس كافي اطردين نفسج منو وتغربين حالج بي

احبج يول والله اعشگچ
يحجيها وهو انهوس يشتم ودايخ بيا واني اهمسلو :- احبك اني احبك والله
وبقينا مع بعض لحد السحور ، نزل الدشداشه النائل كالو تريدها ، اشتريتها وما عجبتني

عاد نائل ما كال لا اخذها وراح كدرها ، ويشوفنياها واني اضحك واكلو اي حلوه ، وصراع كوه حابس ضحكتو

تقرب يمي :- اكبر وحده طايحة حظ انتي ول من وراج انطيتها

-والله الدشداشه شكلها مو راهم هي كوه ما حلوه اطلع الوجه مصلبخ

خلصنا فطور واني بقيت انظف بالبيت هم صلو وطشو للغرف ، واني نهيت كل الشغل وصعدت لكيتو غاط بنومو

بستو بخدو وسحبت ايديه ونمت ..
گربو جنه
وغضبو نار
وبعدو جمر
وساعات حبو احلى لحظات عمري

لثاني يوم الظهر صراع ما موجود ، بس نائل عصبي اسمعو بالغرفه يتكاونون هو و نور ، طلعت اجت للمطبخ تحظر وياي

رجع هو فات زكح بيها وبقى يغلط ، اندرت عليه شفتو لابس الدشداشه بس ضحكت ودرت وجهي وكلت لبس دشداشة صراع وانعدى ول دادا لو ينزعها

بس هو جان وراي سمع كلامي بيني وبين نفسي و حجه بنبرة غضب :- شنو بعد اخوج

اندرتلو :- لا ولا شي

-تعيريني بالدشداشه النطاها الي صراع

-لا والله لا ما هيج ، بس كلت انعديت عصبيه منو لان لبست دشداشتو

بقى خازر بوجهي و دار مشى ما قابل ، حجيت وي نفسي :- امداني هسه شبيه حجيت كدامو احجي بكلبي الا لساني يثرثر واترزل

سمعت صوت سيارة صراع ، دحكتو من الشباب قفل ونزل :- ها الله يساعدج

-هلا بيك عمري

سمع صوت بيت نائل يتكاونون :- هاي شديصير شنو هلصوت

-نائل ومرتو

- هي صارت العيطه يوم عدنا ويوم عدهم ، ما بيه ادخل حيلهم بينهم راسي دايخ وحلكي ناشف عطش من الحر اصعد انام ، الا الحجي وين ييارتو ما هي

-ما اعرف طلع من الصبح ، اكيد يشوف ست لمعه

شال موبايلو :- دشوف شعندو رايح لست لمعه على كولتج ، الو ها حجي وين انت

-انه عد بيت سعد

-ها خير ان شاءالله

-والله يابه الظاهر مالي مكان ابيتك ، خليني هينا

-براحتك يابه هن البيتين بيتي واثنينا ولدك وين ما ترتاح تمون وتكعد ونحطك فوك روسنا ، توني جلي من دوامي يلا مع السلامه

غلقو وهو يمتمت :- بيه حيل زعل يوميه واحد زعلان وتعال يا صراع راضي ، ناس تحرك امي ومرتك ومرتك وناس تطلع من الصبح وشوفنا تره احنه ما راضين

عسى الزعلو لا رضو ، عفتلكم بيت جيتو بالمشاكل وراي وتردون اصالح واراضي دروحوو

ضم الجهاز بجيبو :- اني صاعد فوك لا تكعديني

... عاف وصعد للغرفه ، حجيت ويا نفسي :- عود يزعل ابو كرش ويريد نراضي ، محد كايلك الطش بنت اخوك وكلو اتزوجها وتدخل بينا
هزيت ايدي وبقيت اشتغل.

مشت ايام رمضان و الحجي بعد ٣ ايام شاف صراع ما راح راضاه وجابو ، جاب ام سعد وجا من حالو

خلص رمضان و صراع اخذ اجازه على عطلة العيد ووياها كم يوم كال :- نطلع كم يوم نريح انه وياج لتركيا نشتم هوا و نتونس ونبتعد شويه من جو العائله بالبيت

من سمعت الحجيه ما رضت ، تگلو :- انت ناوي تجيب العين الكم ، اكعد واسكت هيج و عيون العالم ما راحمتكم هنوب تاخذها تركيا

صراع :- وانه شلي بعيون العالم يمه ، عجل هي الناس من نتكاون وشهور عيطتنا كابه محد حسدنا على ضيمنا من نتصالح ونفرح فتحت عيونها ،

الله رازقني بخير وما رازقني بجاهل ، اكابل فلوسي وانام ، غير اطلع اشوف الله شخالق ، ومريتي هم طاكه روحها ساعة وكتها محبوسه بالبيت حتى ما عدها احد تروحلو وتتتونس اخذها وياي

قابل مسوي جريمه خلي يولون

-شنو خل يولون عيون الوادم تكتل يمه ، روح وكول انه رايح لبغداد ، لا تكول اخذتها التركيا

-اشفتيني دكيت قطعه ابابي انه رايح لتركيا ، هو جيت ابلغج

-لا قصدي لابوك لو لاي احد

- ان شاءالله حجيه ، على راحتج

... ثاني يوم العيد لمينا غراضنا اني وياه وطلعنا اسبوع لتركيا ، ماكو شي مشتريتو ، كل البنفسي العاب حدايق ، البسفور ، الأماكن اللي بالمسلسلات التركيه مشاني الها في سبيل نتونس ، ومن صدك ونسه مو شلون ما كان وما تركني ابد راسي وراسو لان ما عندو اصدقاء بتركيا ف نطلع العصريات و نرجع بليل نخلصها سهر مع بعض

و الحلو سمحلي انزع الجبه واطلع ابنطرون وقميص حلوات على جسمي ما ضيكات ، بس احلى عندي من الجبه

رحت صالون غيرلي شعري وتسريح وسوالي تاتو ، بس تاتو تحشا ويا الشعر كأنو طبيعي من صدك وجهي صار ابيض وطلع شكلو كلش حلو كأنو طلعلي وجه ثاني

حتى صراع ما فاركني كد ما كابلني ويكولي :- يولي والله حلوه ، شو طلعتي تخبلين ، هاي وين اضمج من عيون الوادم ما اتحمل احد يدحك بهالوجه غيري

من صدك رجعنا مرتاحين ، بالنا صافي ، واهم شي موبايلاتنا غلقناها ما التهينا بشي غير بعضنا ، ما راد نعيد سالفة الاردن من تركنا نفسنا والتهينا بمشاكل المو

بايل

بس رجعنا كلهم يدرون نحنا بتركيا صراع كايل لنائل قبل لا يحجي ويا الحجيه من محظر الجواز ، فنائل كايل للحجي و الحجي كايل لام سعد وعاد الحيزبون ما تقصر

رجعنا الحجي يكلو :- شنو راح نحسدك لو كلت رايح لتركيا ، ليش تضم

صراع :- والله حجي هاي سوالف امي تخاف علينا ، الا انه واثق لن يصيبنا الا ما كتب الله لنا ، العين ما تهمني

... انغثينا شوي ، بس الونسه اللي تونسناها تسوى ما يحتاج نغث نفسنا عليهم ..

واني من كد ما فرحانه بنفسي وشكلي متغير وشعري مسرح شامرتو على جتفي و العب بي اجيبو منا وارد ، صارلي واهس اهتم واترتب ٢٤ ساعه ونفسيتي تغيرت من طلعنا

وحتى هو لان يجي يلكاني صايرتلو عروس وما اصدك اسمع صوت سيارتو اركضلو مشتاقه ، ارتاحت نفسيتو وصار بنفسو ما يحب يعصب وحتى لو صارت شغله تضوج لو جفصت ، يحاول يتلافاها حتى لا تصيرلنا مشكله ونضوج

صح اسمع كلام جارح من الحجيه ، على ابو شوكت تخلفين همي نفسج نريد جاهل يسند صراع

بس صراع يكولي ملج علاقه بهلكلام انه راضي ، الحمل مو زين عليج ، لو خسرتج يفيدني طفل ؟ شو عايشين ومرتاحين وعين الله علينه هو لو رايد ينطينا طفل محد يكدر يمنع بس هذة ارادة الله ولا اعتراض على امر الله

فعشنا فترة اكثر من شهر مرتاحين بشكل ما طبيعي عايشين حياتنا وكأنو عرسان

الى ان جا اليوم .........

كنا نايمين الصبح بين ادبن بعض ومتحاظنين ، اندكت الباب الفجر ، فز صراع وصاح :- منووو

نور:- اكعد ابو حرب مرت سعد ماتت

كف الغطا ع السريع وجر ملابسو بدل وطلع :- يا هي الماتت

:- ضحى مرت سعد خطيه ميته وخابر ع الحجي ناقلها للمستشفى

-لا اله الا الله انا لله وانا اليه راجعون
اندار ع السريع للكنتور جك دشداشه سودا وجر فلوس و اسلاح ونزل مستعجل

اني اخذت روب لبست فوك ملابسي و طلعت من الغرفه ، توني كاعده وعلى خبر موت ، بقت دموعي تجري ، مو سهل تعرف شخص وتسمع بموتو ، طاري الموت صعب

فتت تحممت وحظرت نفسي خان نروح للعزا واسمع الهوسه جوا ، نزلت شو الناس اجت علينا واهل ضحى فاتو يصرخون

وباب الكراج انفتح والاستقبال ابوابها انفتحت ، دحكت وحجيت ويا روحي :- شنو هو العزا هينا لو ابيتو هناك

نور تصيح ليليان نحظر و هيام فاتت ، واني صراحه ضجت ، على اي اساس ابيتنا ، ليش مو ابيتو ؟ يندمر البيت وينداس ليش ، مو عفنالو بيت شكبرا

رحت لغرفة الحجيه ، اخذت موبايلها وخابرت صراع جاوب وهو مستعجل :- ها يمه كولي

-صراع الفاتحه ابيتنا لو ابيتهم ؟

-ابيتنا

-ليش ابيتنا غير ابيتو شنو صراع

-مستعجل ليليان روحي

-هو شنو مستعجل صراع لتخبلني هيج البيت يندمر و ونحنا يطيح حظنا بالشغل ، ليش مو ابيتو

- روحي يابه عندي شغل هسه من ارجع بليل نتفاهم

-هو شنتفاهم هو انت بقيت تفااااا............قفل الخط بوجهي ، من صدك نرفزني

يعزب بروسنا ويوكف براس الفاتحه متشخص ونحنا يطيح حظنا ، عجل ذاك البيت شنو ؟ ديجي اليوم الا العب بحاولو لعب

وكفت بالمطبخ وريوكات مشترينا كووومه وكعدنا نحظر ريوك و جاي صبينا للي يريد ، عيام واكفه ويانا وحلا اجت الصبح واخلاص و اعلها وعمام ونص عشيرتهم وكرابة اهل المره

الدنيا انكلبت ، نزتني هيام :- ثوله لا تصيرين غرفتج صعدي وشيلي مفتاحها يلا

-شكو

-دكولج صعدي

صعدت فوك ، لكيت نسوان صاعده فوك ، ناس بغرفة حلا وناس بالهول يحجن و ناس بالحمام

فتت لغرفتي ، لملمتها و دا اطفي النقطه ، شكلت دشداشتي بالتحفيه مال الضوا ، دنكت افك ثوبي ، سمعت النسوان برا بحجن قريب من باب الغرفه

-دحكي يخايبه دحكي ، شجالو حظنا ما كعد بهيج قصر عشتو نايم على ذيلها ومكعدها ابيت وهي ما ينعرف اصلها منين ولا شنو ساسها مسلمه مسيحيه محد يعرف

صدك لو كالو حظ العواهر جواهر

-ياااا استغفر الله شبيج ، شلون تكولين عنها عاهره ما يصير

-يا شوف هاي شتحجي ، عجل هي شلون جابوها غير سوت مكسوره ويا عابد وكتلو وجبرو صراع يتزوجها

-ياااا غير صراع براها و الحجيه طلعت نيشانها بيدها ، ماخذها بنيه وعابد هو التهمه

- وانتي صدكتي يمصكوعه جايه على صراع هذا اكبر لوتي وابو درب ياخذك للشط ويرجعك عطشان ، شافها حمره خظره و اشتهاها وما يكدر من خوفه لا كح... تلكينو جرح زرو وحط دم بوصله وكال مرتي شريفه

الا هي مبينه ما تشوفيها الوجه مسموم وكلو شر ،

-والله يا عمي ما نعرف الله اعرف بالانفوس

-انه ما كاتلتني غير اخلاص عو كل هلأملاك والفلوس وهو ابن عمها وهي راضيه تبقى عانس

-غير متزوج وما يريد عجل هي شتسوي

-فدوه متزوج شنو غير افوت عليه واتصلخ كبالو واصرخ والم العالم و اخلي ياخذني غصب عنو وعن الخلفو

-يا عزا بعينج يومين ويطلقها شنو

-خايبه هو الرجال مثل الطفل ينغر بمصاصه ، اتزوجني وبعدين الله يدبرها عود انه تبت واذبلي كم دمعه وفضت واخلي خيرو بجيبي ولا باقي لهاي المالها اصل دخل اشوفها الا احجي وياها

... ما تحملت حجيهن القذر ابد ، طلعت وحجيت :- من صدك ما تستحون من كاعدات ابيتي ود

ايسات بساطي وتكولين عني بلا اصل ، اصلي يشرفج ويشرف الاكبر منج افتهمتي

-يا يا خيه انه ما عليج والله ، يا فدوه لا وياج ولا يمج جاي نحجي على صاحبتنه

-مو غشيمه زوجي ابو حرب وحجيج وياه عشوف يقبل بكلامج هذا

.. قفلت الغرفه وهي تتعذر ، عفتها ونزلت ، بس اغلي اغلي :- يجي لو ما يجي ابو راس المربع الا اكلب الدنيا اليوم ، عايفلهم بيت وجايبهم وراي واكعد انغث يوميها

هلموته يوميه موته يوميه فاتحه يوميه عزيمه وتعاي يا ليليان اسمعي وانغثي وانجبي لو حجيتي انتي وكحه و صلفه وما متربتيه

رحت اخذت الجهاز ، خابرت ، مره مرتين ، رد

-ها يولو شكووو بالمكبره انه ادفني روحي واخلص

-ادفنها ولا تجي ، طلعت روحي

-اي وطلعتهم ، روحي ولا تخابرين الزلم وياي ما اكدر احجي

-اي اي انته تعال اليوم وادلل ..
قفلو بوجهي ، اصبرلي اااخ لو اكضبك

بقيت اشتغل اليوم كلو من صدك طاح حظنا من الشغل ، انهد حيلي من الفجر لحد ما خفو بليل واحنه وعلى وكفه وحده

فات هوا بليل للمطبخ و النسوان واكفه ، دحكلي خازرتو بغضب من حركة كلبي ، شافني هيج اجتو الابتسامه وخفاها وكضب نفسو ، انوب استفزني اكثر

دخل كعد بالهول ويا عماتو وسعد كاعد ويحجون ع الدفنه ، صاح :- ام حرب يابه بس الحمام
وكام من مكانو ، اني درت للمغسله اغسل جوا ، جا هو ووكف يمي

-يول خبله شبيج

-لا تحجي وياي ولا تصل يمي كارهتك

-تره تعبان والله

-محد جابرك

-غير فاتحتنا مخبله انتي

.. دنحجي وانطش فوكانا تراب من فوك ونحن واكفين ، ع السريع زكح :- يااااااهو هذا ، منو فوك

وصعد وصعدت وراه محد موجود صاح:- من طش تراب

.. محد رد ،،، طلعت اخلاص من الحمام مغسله

-اخلاص انتي الطشيتي هلتراب

-يا تراب ؟

اندار عليه :- حافظي على بيتج و الفوك ما اريد وينداس افتهمتي

اخذت نفس وفتت للغرفه ، تمددت لو احس الالم الدنيا كلها بيا متت من الوجه ما اكدر حتى انام ظهري ذبحني

سبح هو واجا ، فات بدل وعطر واجا يمي :- اخ يابه والله تعبت
وتقرب يريد ياخذني بحظنو

-وخر صراع لا الدنيا اكلبها والله

-ول شجاج

-شجاني ما عرفت تبقي الفاتحه بذاك البيت كاعد تعزب براسي

-ول هم زين بيد الله الهوى ومو بيدج ، شنو قصتج غير اخوي

-اسكت مني اسكت لان اذا احجي انفجر

-من شنو متأذيه

-يهمك انت ، ابالك ؟ لو من صدك يهمك جان من البدايه فكرت

-هسه عوفينا من هسالفه وحدري يمي وكوليلي شنو اليوجعج تره تعبان

-تعبااااان حظرتك اي حقك ،ما واكف ع السنك و الجاي من الصبح لسه ظهري راح يطك ربحي بيمن هااا بأهلك لو بأهلك لو بأخوك كولي

-صوتج منا العالم يول بالصاله كاعدين سترينا الله يستر عليج ، حدري دا افركلج ظهري

-هاااا افركلج ، سبحت وارتاحيت وبحجة افركلج تاخذلك غير درب هو هذا انت ما تهمك غير رغباتك و نفسك

-اووووووو تراها مو عيشه ، سكتي ما تقبلين افركلج ما تقبلين ولج شسوي ابخت محمد حرت وياج انتي شنو طينتج من صدك هليتيني اترحم لوجدان

جانت عزايمي كل اسبوع وسابيها سبي وشحدها تفك حلكها اشوفها الباب وادربها لهلها و هسه انتي اكولج حدري افركلج وتتكبرين عليه بنت الاوادم درووووحي

عافني وطلع ضايج ، التفلت بفراشي ابجي ، فوك تعبي واطلع اني مو خوش ومرتو ذيج احسن مني

نص ساعه ورجع للغرفه ، طفى الضوا وجر الغطا ونام ، حس بيه ابجي اندار اخذني على ايدو

-ول ابخت الله شبيج تعبانه من الفاتحه ، اشعل شيب اهلهم بس لا تهمين انه باجر اخابر ام يوسف تجي تخدم عنج واخلي هيام تكولهم وانومج بالغرفه بعد ؟

-اني ما كايلتلك شي ، بس كل تعبي هذا واطلع اني المو زينه ووجدان احسن مني

-هو هسه هذا الغثج ؟ عمي يا حجايه ردي المكانج ، اسف وما تنعاد وهذا راسج ابوسو هااا اها ، بعد ؟ بس كافي يولو والله تعبان

-على اساس اني مرتاحه فوك تعب الفاتحه وحجيهن والسم مالهن ما يخلص

-حچييش ؟

-سولفتلو كلامو ، بقى صافن اخذ نفس وكال :- انه باجر اعرف شسوي لا تهتمين بس ارتاحي

بقى يفرك بظهري واني نايمه لحد ما غفيت وما دريت عنو بعد ، كعدت الصبح ساعه ٨ هو ماكو ، رحت غسلت ورتبت نفسي وقفلت وخليت مفتاحي بسنسال و حطيتو برگبتي

بقيت اشتغل للظهر فضينا هوسة الغدا وواكفين ، فات صراع :- ليليان حدري
ومشى

مشيت يمو :- مفتاح الغرفه وين ؟

-ليش

-اريد اسحب فلوس

-مفتاح الخزنه عندك

-يول مفتاح الغرفه شغلي دماغج وياي شويه مستعجل

-هااا هذا ، طلعتو من صدري اخذتو من الكلاده وانطيتو

..وبقيت اشتغل ، شويه وكلت خل اطلع وراه

صراع :- فاتح الخزنه وجاي احسب فلوس ، سمعت الباب انفتحت حجيت :- ليليان شو حدري حسبيلي هلفلوس شكد ، دخت

ما ردت اندرت عليها :- شبيي....
انصدمت :- ها اخلاص شرايده

-رايده احجي وياك واريد تسمعني

-انتي بطرانه شنو مستعجل بنت عمي خليها غير وكت ومن تفوتين دكي الباب

شلت الفلوس خليت بجيبي و الباقي وديتها للخزنه قفلتها ، اندرت وهاي بعدها ، رفعت حاجبي استغراب

شكو ؟

-الى متى تضل حاكرني

انه روحي بيك وانت مو همك ، ابن عمي والله احبك وميته بيك

-استحي على روحج نحنا بنص عزا و هلكلام مو وكتو ، وعيب انه وياج بالغرفه وحدنا ما ترهم بعدي خل اطلع

مشيت اريد اطلع الباب وهي وكفت كبالي ، ذبت شالها من راسها وكامت تلطم :- تريدني احرررك روحي شناقصني ليش ما ترضى بيا والله احب......

-يول استحي وطلعي برا الناس جوا ما اريد صوتي يطلع ونفتضح ، امشي ولي ما تستحين

-لا ما اولي ابن عمي جاي اكلك روحي بيك حس بيا

تقربت يمي تحظني ، نفرتها عني :- ول ساقطه دنعل ابوج قليلة حيا
وخرتها جاي افتح الباب صارت ليليان بوجهي واخلاص تبجي بقوه وراي

ليليان:- انصدمت هو طالع عصبي وهي نازعه حجابها وتبجي ، تخبلت صشصار بيناتهم

راد يطلع ، كضبتو :- تحجيلي هينا شصار لا هسه الم الدنيا عليكم...........يتبع

☆☆☆☆☆☆

#زينب_ماجد

#مراهقة_و_الاربعيني

،،،،،،،،، بقلم زينب ماجد ،،،،،،،،،

الحلقة_81

دا احجي خزرني صراع و دخلني وفتح الباب اخلاص ع السريع لبست الحجاب :- امشي بنت عمي

-لا شنو تمشي....
قاطعني وهو يخزرني ويكولي :- ولا نص كلمه

اخلاص :- استر عليه ابن عمي دخيلك ولا تفضحني

-روحي مستوره و لا تهتمين ولي

ع السريع طلعت اخلاص واني خالني وره الباب وخالسني وما مخليني احجي ،
:- انت تعال تعال شنو اطلعها شنو مستوره

سد الباب :- كلمه عن اللي صار ما اريد اسمعو ، افتهمتي

-هو شنو اللي صار

-فتت للغرفه ولكيتها بلا حجاب وتعذرت اريد اطلع وانتي صرتي بوجهي

-هههه شلون بطه تلعب شناو ، انت شنو عتضحك عليا الغرفه مقفوله واني انطيتك مفتاحها

-هذا اللي صار و ماكو غيره ويا ويلج لو سمعت حاجيه وياها لو صاير بيناتكم شي

-لا والله ما حزرت اليوم اكلب الدنيا عليها

- ولج حيوااانه استهدي ، عزا منا وفاتحه و الفضيحه تصير براسي وابيتي ، استريها ومن نخلص العزا عودينه نحجي

غرفتج قفليها وانتبهي اكثر للفوك ، وحتى الحمام لا تخلين احد يصعدلو

... شفتو عصبي من صدك لما يحجي ، خفت اراددو واروح بيها كدام الناس يتكاون وياي ويصيح ، سكتت وكلت بعدين احجي خل تخلص الفاتحه

انطاني المفتاح قفلت ونزلت ، لكيت اخلاص كاعده ويا حلا وعمتها ام وسام ، دحكت بيه ، لعبت روحي من وجهه بودي اروح اتفل بنص خلقتها لهل عايقه البلا مستحه تتلزك بالزلم

فتت للمطبخ هيام تنظف بالخضروات باعثيها دنحظرهم ، كعدت يمها ، انتبهت اني متوتره

-شكو يولي

-سولفتلها ، بقت صافنه وتكولي :- ولج هاي وشلت مستحاها ما بقت ذره ، هيج العانس يصير بحالها لو ما لكت رجال ، عمى بعينهن يمه شلون يذلن ارواحهن بس يحصللهن رجال ادري قحط وووع امداها

يولي حذري منها لا تبليج وتبلي هلمكرود خل تولي

-صراع يكولي سكتي

-يريد يطمطمها عجل شيكول هلمتعوب گلب

بقينا نشتغل ، واكفه ع السنك واجت حلا تكولي :- وين مفتاح غرفة بابا

- شتردين بي ، غرفتي قفلتها

-مصدكه نفسج عندج غرفه ، بيت اهلج كلو ما يطلع بكد غرفة بابا هاي اذا بقالج بيت او اهل بالموصل دجيبي حبابه

-استحي على نفسج وولي ما انطي افتهمتي ، البيت شكبرو وروحي كعدي صراع ميقبل احد يفوت غرفتنا

.. شافت المفتاح بصدري ، جرتو خيل وهي تكول :- دجيبي اجت العصر و بنتلها قصر

اخذتو وصعدت هي واخلاص واكفتلها ع الدرج، اني طلعت الهيام ، كلتلها على حلا ، ع السريع تركت من ايدها وطلعت ، طلعت وراها

فتنا للغرفه ، حلا متمدده ع التخت و اخلاص فاتحه كنتورنا وتكلب بملابس صراع مال الطلعه

ع السريع سدتو من شافتنا وحلا تعدلت صرخت هيام :- الا صدك الأستحو ماتو ، نزلي دشوف تصعدين وتكعدين هينا ذيج غرفه مخليها الج الخلفج كعدي بيها

اندارت على اخلاص :- وانتي يلجبيره بدال متوكفين ويانا ملتهيه بسوالف طايح حظها ما تستحين تفوتين غرفة مرا ورجال

-على كيفج عيني شسوينا كلها بس كلنا نريد نكعدلنا ساعة زمان بلا صوت ، و هها وبعد تره من الصبح متشكلات وياج لا عبالج بس انتي التشتغلين

.. جريت باب الكنتور و سديتو ، وهن طلعن برا ، هيام نزلت واني دا اقفل اباب الغرفه جان توكف يمي اخلاص
:-كلشي راح يتغير وكولي اخلاص كالت لا تستعجلين على رزقج انتي بس صبري علي لا ما هججتج من هالبيت فلا اني بنت ابوي

-عانس ما ارد عليج
عفتها واخذت المفتاح ونزلت ، يربي شلون بالله اني اخلص من وحده تطلعلي الثانيه ، هلرجال هذا منين اضمه من عيون هلما يستحن يا الاجت و ذبت روحها عليه وتتمناه

اني اتحمل منو بيهن ، اخلاص لو ام مصطفى لو اسمهان لو منو ، انوب كلهن مو بعمري ، كل اعمارهن بالتلاثين ، اني اطلع وياهن هلكدي وكلشي ما اجيب من عقولهن والسانهن ، احس وحدتهن فاهمه شتكول ما مثلي اهبش و اجفص وانداس

بقيت اشتغل جوا ، الطبخ بالحديقه ، جا سليمان للمطبخ حجه ويا هيام :- خويا اللحم لسه ما استوى وما بقى غير اقل من ساعه لصلاة المغرب شنسوي

-والله يا ابن عمي ما اعرف هم شفتو وصفنت ، اشلون ما ادري

فات صراع للحديقه رفع صوتو اسليمان وصاح :- ابو حرررررب حدر يخوي

صراع :- شنو قضية اللحم

-يولو ما جاي يستوي

-و الحل

-جاي اسألك

- يصير الأكل ونصبو هيج شنسوي ما بيدنا

-غير ياكلون وجهونا على ابو طبخهم ما مستوي

-عجل يابه شنسوي ، هاك ٣ ملايين وروح دبرلي العشا ، يا مطعم هسه يحظرلك لحم مستوي باقل من نص ساعه يكفي فاتحه

نصبو هيج و عود باجر الثالث ونعوض ونكسرها ،
... ديحجي مرت المريه البارحه الحجت عليه وتكول بلا اصل ، ع السريع صراع رفع ايدو فوك و صاح :- ها خويه ام جمال شلونج

"- يا هلا ابو حرب هلا بيك يا بعد عمري شلونك خويه شلونك زين

-على الله نسأل على اخباركم ابو جمال شلونه احاولكم اموركم

-والله خويه نسأل عليك