#مراهقة_و_الاربعيني

،،،،،،،،، بقلم زينب ماجد ،،،،،،،،،

الحلقة_77

صراع :- ها الله يساعدكم

ردو :- يساعد بختك

الحجيه :- تونه جنه نحجي بيك ..

صراع :- خير

-سألتني اختك على موضوع طلاكك

-هممم ، ام علي كومي صبيلي غدا تعبان اريد اصعد انام

-ان شاء الله ، رحت سويتلو الأكل ، خليتو ع الطبله ، جاء هو كعد وبدأ ياكل

-انت صدك ناوي اطلك

-اي

- اذا متندمه خويه ردها الطلاك مو شويه والبنيه ما الها احد غيرك

- لا انتهت شلتها من حساباتي المرا التجرئت تطلع وتشرد مني ما تصيرلي مرا ، هي شردت بعد شنتظر تقتنع وترجع ؟ ، خلها تروح الله وياها

-شوف انه مثلك حيل منقهرها منها من ما حسبت احساب الي ولبيتي وطلعت وحيل ضايجه ، بس واحد يحجي حق باجر مكاني شبر واربع اصابع ، لو اعرفها ما تحبك جان كلت ختولي

لو اعرف هي وكحه وطلعتها عناد وياك جان كلت حقك ويطبها طوب و طلگها ، بس اعرفها ثوله وغبيه و جاهل اقل واحد يلعب بعثلها ويغير تفكيرها

واخوها جاها بوكت هي كلش اتضررت و الصار وياها مو شويه حتى لو من ايدها هي ما ذبت الصوج بيك هي كالت اني تعبت

-ام علي قفلي ع الموضوع تعبان والله

-انه ادري بيك تعبان واحس بيك تعبك منها ، والله لو اعرف ما تهتملها وما تحبها ما حجيت بس خويه تأنى بسالفة الطلاك

بنيه وجاهل خل تعيد حساباتها وتكعد ويا نفسها ، حرام لو ما رادها احد وين تروح حتى لو تجيبها وتخليها هينا ولا تريدها بس اتركها احسبها حالها حال حلا وخليها تعيش بغرفة حلا

- ام علي هذا الحجي حجيته الها كلت الها يبنت الناس ما الج احد كولي يا الله ، تكلي شايفني ما الي غيرك ، كتلها اريدج واحبج وتصيح اني ما اريدك بعد ، اعتذرت وتالي تشرد ، خل تاكل السوته بيدها

انه روحي طكت على تالي عمر اكعد اعقل وحده ما عدها عقل وياريت من اعقل تفتهم الحجي يفوت متا يطلع من هينا ، شنتظر اجيبها مره لخ وهم تشرد ؟

خاف هلمره الله ستر و محد عرف لا المره الجايه تصخم راسي من صدك ، ما دام اختارت طريقها الله وياها

-يعني شنو هسه راح اطلك

-الاحد اروح للمحكمه اطلكها وفضت

-زين تتزوج لو شنو

-لا اريد اتزوج ولا اريدلي مره وانعل ابو النسوان لو گلبتهن لو جبتلي وحده لبيتي شوراهن غير دوخة الراس ، خليني اريح راسي

-والله امي ما تعوفك ههههه ترجع تزن وتحن براسك ، تريدادورلك مره

- هو ما كاسر ظهري غير امي ما الها احد ، لو حطت براسها مره خل تجيبها للبيت وتخدمها ، بالنسبه اليه انه جزت روحي من النسوان ما اريد

-الله يكتبلك البيه الخير

-مشكوره بعد اخوج

......
ليليان :- ٣ ايام عند بيت خالي مخلصتها بس نوم وما اعرف مصيري لوين ، صراع يريد يطلك و يحيى ما اعرف عنو شي ، وخالو ما قابل بطلعتي من بيت صراع ويكولي صوجج ومن ايدج

رجال يحبج ومحترمج وماكو شي خالو بنفسج تاركتو وشارده والج عين تحجين خبري وبلكي تتراضون وتصطلحون

بس اني ما تواصلت وياه ، ما اعرف احس تعبانه من كل شي لا زوج ارتاح وياه و لا خال يريد ويجبر خاطر ولا اخ اليسند

الموصل تقريبا اتحررت و بيت ابويه كاعدين بيه بيت خالي الثاني بالموصل لان يحيى تاركو و شارد ..

عفكر اروح اكعد عندم بس خالي ذاك حقنا وما ينحمل ، ولو طلعتو من البيت خوالي راح يشدون وياي ، وحايره اشنو اسوي ؟

حنا تزوج وطلع بيت وحدو منفصل عن بيت اهلو ، ما عندنا سالفة شخص يتزوج يكعد ويا اهلو ، اليتزوج يحمل حالو ويدبر نفسو

كل اقاربي هيج ما يحبون يعيشون عائله ويا عائله يكولون تصير العيشه خنكه وكلها مشاكل ، ف بيت خالي وحدهم عايشين بس فوزيه متضايفه مني ما تريدني اعيش براس خالي وتاركه صراع وفلوسو

.. كلت خل اكوم اعاونها واشتغل عنها بلكت تفك شويه فكمت سويت اكل ونظفت و وكفت بالمطبخ ، ما حجت هي كيفت

.. اغسل و افكر ، صح تقريبا كلشي انتهى بيني وبين صراع ، بس اوكات الليل كوه اتجرعها احس الدقيقه تمر بالموت

تعبت منو اي بس احبو ، احس فقدت ابويه واهلي وبيتي وكلشي بيه ، العيشه وياه صعبه بس بدونو اصعب

وبين مر عيشتو ومر فراكو اني محتاره يا مر اتحمل ؟

اشتاق لعطرو ، احن لحظنو ، احن للساعه اللي اخلي بيها راسي على صدرو وانسى العالم وارتاح واغفى وما اهتم ولا ادير بال بشيء بعد

عدتشتغل جا حنا ، طلعت سلمت عليه وكعدت وياه ، بس نفسو هو ذاك اليحبني وما تغيرت نظراتو من يدحك بيا

ونفس احساسي لما اتضايق وما اتقبل اي نظره اليه من غير صراع ، احس هو الوحيد اليحقلو يدحك بيا وارتاح بنظراتو

حنا :- شنو يعني راح تطلكين

-ما ادري لسه ما قررنا شي

-ها اي خلصي منه يمعوده شعاجبج بي

- ما رديت عليه وحجيت ويا خالو :- اكلك خالو اكدر اشتري موبايل اريد اححي ويا يحيى اشوفو وين صار

حنا :- عندي موبايل بالبيت زايد تريدي

-ما تحتاجو ؟

-لا ما يعز عليج

-شكرا دزلياه

-تمام

.. و من صدك راح ثاني يوم جابلي جهاز بس بلا سيمكارت ، نصبت الفيسبوك بيه و حملت الماسنجر وراسلت يحيى ماكو جواب

بقيت امشي بالفي

س ، دحكت صراع مغير الصوره الشخصيه مالتو ، مخلي صوره الو هو بالدشداشه و والغتره ملفوفه على راسو ومنتجي ع الجكساره مالتو
وكاتب (مثل طبع النخل طبعي انطي وما ادنك الراس )

.. شكد شايفو حالو ، كمت اقرب بالصوره وادحك بيها بتركيز واطمش بملامحو ، اشكد مشتاقتلو

دخلت ع التعليقات ، منو ابن العم وناس كاتبتلو علم وناس كاتبه الهيبه ابو حرب منور اغاتي ،

عاد اني هم علقت و كتبتلو ( منور صروع ) ..
هو بي طبع يتخبل اعلقو علی صفحتو كدام جماعتو ينجن من صدك يتعصب

فمجرد كتبت التعليق الظاهر جان متواجد ع السريع اجتي رساله ع الخاص مكتوب بيها

( اشعل شيب اهلج لابو شيب صروع وياج ابن الخلفج انه وتكليلي صروع جدام الوادم من اشوفج معلقه بعد والله لكص ايديج يا طايحة الحظ )

ردت اكتب اسفه ، طب انطاني حظر قبل لا اكمل كتابه ، هو صوجي اني علقتلك منور لو كاتبتلك مظلم

عفتو ورحت اكلب بالفيس ، بس الصراحه مدري شصار بيه من علقتلو وجا نزل بيا ، رحت لعلي انطيتو لايك

شاف وما جاوب

كتبتلو :- زعلان حظرتك ؟

-ليش مو من حقي بعد عملتج هاي ؟

-ليش واني شسويتلك

-طلعتي من بيتنا وما درتي وراج و نحن مامنين عليج ما فكرتي شنو موقفنا من خالو ؟ تره امي ترزلت بسببج

-اني ما قصدي اضركم او اسيئلكم اني بس ردت اروح ويا اخويا

-اي عجل روحي ولا اديرين وجهج

-راح هو وما دحك وراه

-شي يخصج

-شبيك علي .

- ما بيه شي سلامتج

-دكلج والله ما جان قصدي

-انتي سوي المصيبه وصيحي ما قصدي

-علي انت ما تفهمني اني اتأذيت

-وهسه ان شاءالله ارتحتي

-لا ممرتاحه

-من ايدج

-صراع شنو وضعو

-راح يطلكج الاحد وجديتي جاي ادورلو عروس

-شنو ادورلو عروس ؟ من صدك

-اي والله عجل تردينو يضل وراج هم رجال يريد اكل شرب احد يهتم بي حتى بنتو تزوجت

-اني اموت ما اتحمل اذبحو

-سالفه تفيدج

-لا ما اكدر تحجي صدك

-اي والله قابل اجذب عليج

-شسوي علي اموت اني لو من صدك خطب انجن

-تريدي ؟

-انطيتو لايك ما حجيت

-اذا تريدي ردي

-ما راح يقبل

-اي ما راح يقبل بس مراح يطردج

-واذا تزوج كبالي

-بعد انتي وشطارتج انه شعلي ، العلي كتلج الوضع وبقت يمج

-بقيت صافنه بالموبايل وبكلماتو ، احس الحراره صعدت لراسي ، فار دمي ، صح تعبت منو بس فكرة انو يتزوج غيري معناها اموت ما تحمل ،

كمت من مكاني ، شلون ارجعلو واني اللي تركتو ، ما راح يتقبلني اعرفو ، بس هو يحبني ما معقوله يتزوج غيري

بس راح يطلك ياربي اني شسويت ، اخذت الموبايل رحت لحسابو بعدو حاظرني ، درجت رقمو اتصلت طلعلي ماكو سيمكارت ااااخ يا الله

اروح احمل واتساب ، من مل عقلي حملتو وكلت انصبو واحجي وياه ، وطلعلي يريد رقم موبايل ، انثولت يا الله انثولت هسه اني شسوي

اروح اجيب موبايل خالو ، تمشيت للصاله اسمعو كاعد يطمش ع التلفزيون ، كربت ، خالو انطيني جهازك شويه

.. اطانياه بلا ما يحجي ، مشيت للغرفه درجت رقم صراع دست اتصال ، رن ، رن ، رن ، رد :- الو

-الو صراع
سمع صوتي تنهد و وبعد الجهاز ، عرفتو راح يغلقو :- اكف اكف احجي وياك

-شرايده يولو

-ايمت راح اطلك ؟

-الاحد

اخذت نفس مشيت ايدي على اركبتي احس العبره خنكتني :- صحيح تريد تتزوج

-شي ما يخصج

-ليش ما يخصني ، تتحمل اني اتزوج ؟

-قفل الخط بوجهي

رديت اتصلت ، انطاني رفض
اااخ ياربي اني شنو سويت بنفسي ، يطلكني ويتزوج ويصير عندو جهال من غيري ، لا لا اطك واموت

دنكت وجهي بين اديه ، ما اعرف اشنو اسوي تعبت منو حيل بس گلبي مو راضي ينسى ويتخطاه ، لسه احن واشتاقلو

كمت وديت الجهاز الخالو و رجعت وبقيت الليل ملو حسبه تاخذني و اللخ تردني ، لا اخ يهتملي ولا زوج يريدني ولا خال يتحملني ، احس خسرت كلشي

تعبت حيل تعبت ، تمنيت عندي ام واكعد احجي واشكي احس السوالف بداخلي تخنكني ، اريد احد.يدليني يرشدني ، احس ضايعه ومضيعه نفسي وما اعرف اشلون اتصرف ..

طلعت الشمس واني افكر وافكاري ذابحتني ، ما اكدر ارجعلو ، ولا اكدر اتركو وانساه واعيش بلياه ، الحل ربي شنو اسوي

.. نمت واني دمعتي بعيني
كعدت العصر ، رحت غسلت وجهي وحظرت العشا ونظفت شكو شي باقي و كعدت وياهم

دريد :- ما خابرتي رجلج

-خابرتو

-اي وشكالج

-عكب باجر يطلك

-هااه شنو القصه ليش ما تفاهمتو

-قفل الجهاز ما يريد يسمعني

-لكن شلون ؟

-ما اعرف خالو

-شوفي خالو ابوج غير دينه و اتزوج على امج وما طلكت و لا تركت زوجها ، كل زواج بيه اتعاب بس نتحمل وانتي ما الج غير بيتج و ورجلج

عايفتلج قصر يا خالو وجايه تكعدين عندي ، شنو اني دايملج

فوزيه :- لج تمام هو جبير بس مليح لو مات تعرفين اشكد تربحين من وراه ، تريشين حسبياه شو انتي لا ولد لا تلد المثلج تجلب بيه بأضافيرها واسنانها

-تعبت عندو ما اكدر تفتهمون ، ناس قاسيين ما يتفاهمون عيشتهم صياح وخو ورعب وهوستهم ما تكعد ولا تقل

سااعه ووكت عزايمهم كابه واليدوس فراشج يغلط عليج ما اكدر اتراهم ويا

هم تعبت ، ما تعرفون من مات شنو صار بيا

وهو ما انكر طيب وخوش رجال ويحبني واني هم احبو بس والله وكت اعصابو ما ينطاق يدمر هلكني

- لكن اشون بنتي

-خالو اني جاي احترك

-اخذج باجر الهم واكعدي عدهم تمام راح يعصب وما يقبل بس تحملي هذا زوجج و كل زوجه تتحمل زوجها

-واذا ما قبل ؟

-يقبل خالو يقبل انتي اكعدو عندو يومين وتتصالحون

... حسيتو ديقنعني بس يريد يخلص مني ، تنهدت وسكتت ، واذا اتزوج ؟ شنو اكعد اطمش عليه وهو يتزوج ، يكف گلبي و اموت

ثاني يوم من الصبح اخذني خالو وطلعنا للرمادي.

....

الحجيه :- خابرت على اسمهان

هيام :- يماااااا والله الج خلك دعوفيها يا يمه والله صراع ما يقبل بيها

-يمه ياهو الو هينا ، بنتو واتزوجت وانتي بيتج يادوب كل ٣ ايام تمرينا ، شنو نترجى مرت نائل تخدمو

-وغصب عندهم يخدمو شنو بس يجيب ويعبي بحلوكهم

-لا يمه لا الزلمه بلا حرمه يضيع ، اجيبلو التلمو انتي ما ادحكين الهم واصل الهامتو ، ما ادري شلون اخلي ينسى ويضحك تعب حيل وماهو طايق شخص

-وتريدي يطيق اسمهان ، يمه ما يتقبلها ما تعرفين صراع ولا تكولين اتقربلها ، هو بنفسو كالي قبل لا يتزوج ليليان ام علي تكش روحي من اجي يمها احس روحي قذر و خاين خويي

حتى جان متزوج وحده بالسر وانتي ما تدرين دسكتي يايمه

فاتت نور :- حجيه خال ليليان تجه وجابب ليليان وياه

هيام :- دحكت بوجه امي

الحجيه :- كومي هيام شوفيها بعد سوليتها انه ما اكدر ادحك بوجها

.. ليليان :- دخلت للبيت واستقبلنا الحجي ورحب بخالو ودخل من باب الاستقبال ، ادحك سيارة صراع ما موجوده يعني هو ماكو

فتت للمطبخ نور صارت كبالي تقربت سلمت وتباوسنه ، ورحت لغرفة الحجيه :- شلونج حجيه
دا اريد ابوسها ، بعدت وجها مني

الحجيه:- اطلعي مني لا انتي بنتي ولا عرفتج بيوم

بقيت صافنه بوجه ، اندرت سلمت على هيام باوستها ما حجت ولا حتى كالت هلا ، حيل مثگلين عليه

دا انطق اريد اكولهم :- ما قصدي اش....... خزرتني هيام وتاشر نور واكفه وبساع غيرت ملامح وجها وحجت

:- اصعدي لغرفتج روحي

-عفتهم وطلعت ، صاح عليه الحجي رحت الهم خابو ما راضي يبقى يكلهم :- لازم ارجع لاربيل قبل لا يفوت الوقت

ما قبل الحجي راد يكعدو رفض وكالو :- دايمه والله شنو دنجربكم بس هاي ليليان وهي مثل بنتكم والصغير يغلط و الجبير يسامح

الحجي :- لا بنتنا ان شاءالله شعدنا وياها

.. طلع خالو وطلعت وراه وهو يوصيني اهتم بزوجي و ما اضيعو وراح .. فتت للصاله ام سعد تهز بايدها ما راضيه بجيتي

صعدت فوك لغرفتي ، دخلت غرفتي ، المرايه مال الكنتور مكسر وهو تركي متشوه الغرفه ، ادحك كانما مهجوره صح ململمه بس متربه وما كان داخللها احد وحتى شباك محد فاتح والبردات نازله ظلمه

فتحت الشبابيك وكفيت البردات نزلتهم و غيرتهم وشلت الزوليه و الفراش كلو طلعتو ونظفتها ع التمام ومسحتها بعطر وديتول

كملت رحت سبحت ورجعت للغرفه دا امشط ، انفتحت الباب ، اندرت صراع دحك بعقدة حواجب للغرفه ، شافني كبالو تفاجئ ، فزيت من الفراش بسرعه وكفت وتراجعت

-انتي شجاااابج هينا ، منو سمحلج ترجعييييين

-صراع بس

-اشششششش اشش ولا كلمه ، منين ما اجيتي تردين ع السريع

-صراع

-طلعي براااااا ابيتي متكعدين طلعي برا

-كضب ايدي وجرني طلعني برا وهو يصيح

-مو انتي التفرضين عليه جيتج وتمشيني بكيفججججج كعده الج هينااااااا ماكو

-بس احجي وياك

طلع نائل :- كول يا الله صراع شنو السالفه بعد اخوك

صعدت هيام و الحجي وراها ع الدرج وراحولو وهو يزكح :- حجي تخبر الجابها يردها ما الها كعده ابيتي طلعوووووووها

-خويه يصير خير بس اهدئ

حجي:- شجالك يابه شصاير بينكم تراها جاهل وغلطت بحجايتها وهو اخوها وانت رضيت ترجعها وتتوسل بيها شجالك هسه شصاير بيناتكم

-اكلك خاااابر اللي جابها ياخذها لا تحطوهاااا كبالي ما اريدها

... ادحكلو وابجي و الحجيه من جوه تصيح :- فرفح روحو راح ينجلط وليدي ولك يمه على كيفك بعمرك محد يستاهل

صراع:- اخذيها ام علي من وجهييييي وخبرو خالها يرجع ياخذها وانه باجر احط ورقت الطلاك بيدهم ويرحون لاربيل بيها طلعوهااا مني

هيام:- اعذرني خويه انه بيتي بتعذرها بعد ما اكدر اتحمل مسؤليتها تريد رجعها انت لو خبرو خالها يرد

رفع الجهاز يخبر خللو واني الدموع ما وكفت من عيني ، كلها ما تريدني يذله الحسيت بيها و ونور واكفه وتسالني :- شكو شصاير ليليااان

انتبهت محد يعرف بسالفة طلعتي لان الكل يسأل
.. ما رد عليه خالو كام يشعل وينعل ويصيح ما اريدها

صحت بكل صوتي و الدموع بعيني :- اذبحني عجل خلصنييييي لا خالو يردني ولا انت ولا اي بشر حط طلقه براسي وخليني امووووت والحك اهلي ريحوووووني

تعبت ولكم تعببببببت موووووووتوني خلصووووني

عفتهم ومشيت للحمام طبكت قاعدة التواليت وكعدت ابجي من كل كلبي بجية يتيم من صدك ما الو احد

وهو ما بطل صياح واعصابو نار وطلع من البيت وهو يغلي ، حسيت الكل طش ، طلعت من الحمام

رحت للغرفه الثانيه كعدت ابجي ..

لليل سمعت باب غرفتنا انطبكت ، گمت من مكاني ورحت للغرفه ، هو مجتف اديه وره و يروح و يرجع

اندار دحكني فتت ، اخذ نفس بكل تكبر ووكف تجتف كبالي

- رجعتي بس لانو ما عندج احد ترحيلو مو ؟ كلتي يحبني ويسامح وعبالج استقبلج

- مو هيج بس....

-لا هييييج الچلب اوفى منج ، ول بس حسيتي عندج امل ١ بالميه تخلصين مني هجيتي من الصبح وطلعتي و محينتي كل زيناتي وياج

ما كلتي هذا شنو راح يصير بي وراي ؟ ما همتج سمعتي لو كالو مرتو تركتو وشردت شنو موقفو ، ما فكرتي انجلط واموت

بكل انانيه فكرتي بروحج وطلعتي وخليتي براسج انه الحيوان الهجي العربي الظالم ولازم تخلصين ، وهسه راجعتلي و ما الي احد وتردين استقبلج

- اني غلطت

-اشششش اششش ولا اسمع كلمه اعذتر ما اريد مو انه التتركني مرا ، لج الف وحده بمكانج تتمنى حاسبتني كاتل روحي عليج

قدرت ودزيتلج اهلي وردت ارجعج وما قبلتي ورديت اعتذرت وما قبلتي وبعتيني لجل اخوج العار وهسه راجتلي تكوليلي غلطت

لا ولا تصيرين

-ما تريدني رجعني مو لازم ابقى

-هه وهو منو الجايبج ، انتي الجبتي نفسج ورجعتي ، لا تحلمين اريدج ، غيرج رجعتلي برجليها ماتت وهي تتمنى النظره مني ، واحسبي احسابج انتي على طريقه

.. حجاها واندار يمشي كضبت ايدو :- لا ما على طريقها
.. بعدني ما حاجيه اندار ع السريع كضبني من ركبتي وبخزرة عصبيه حجه :- ايدج من تنمد واطخني تنكص

كضبت اديه :- اني ما ذاله روحي الك ، ما تريدني طلكني ولا تتردد

.. بعد اديه من ركبتي :- خابرتج وكتلج راح اطلك وانتي الرديتي روحج للمهانه ما انه الجبتج

ان ما لفاج احد لا تخافين انه رجال اخاف الله ما راح اطردج الج غرفه من بيتي و حدج لخدمة امي اما انه ف اشوف اللي اتناسبني ان شاءالله

-انت متعمد تحرك بدمي

.. مشى للكنتور ويضحك بتكبر :- من تكونين انتي حتى يكون همي احرك دمج ، مصدكه نفسج ؟
طلعي و سدي الباب وراج

- ليش تتعامل ويايه هيج صراع غلطت اي بس والله اني احبك

-كلمة حب شيليها من قاموسج انتي ما تحبين غير نفسج ، لو تحبيني ما تتركيني مثل المجنون ادور عليج بالشوارع ، هسه جايه تكوليلي ، روحي نامي بويه

يحجي وهو ما مهتملي وداير وجهو للكنتور يطلعلو ملابس تقربت منو :- اذبحني وخلصني جد و الله تعبت

-اطلعي مني اريد انام

-اطلع وين قصدك ، للشارع لو وين
ما انتبهلي ولا دارلي وجهو :- ولا توقعتك هيج گلبك حجر

ابتسم :- لسه ما شفتي شي غير انه منطيج وجه خل اطلعلج وجهي الثاني واتكبر وعود صدكيهم من يكولون ظالم وما ينجرع

وهسه يلا بره ، صار وكت نومي

-اخذت نفس وطلعت منو ، يا وحدتي ويا غربتي بهليوم شكد حسيت من صدك ما الي احد وخسرتو بعد ما جان يتوسل حتى يسمع مني الكلمه .

رحت للغرفه الثانيه حظنت نفسي وكعدت ابجي ..

غفيت وحسيت واحد يندهني بقوه ، دحكت هو فوك راسي :- كعدي لشوف يلا

-شنو

- وين رحتي من طلعتي وشعدهم الشرطه وياج

-يا شرطه

-احجي ولا تنكرين

-النوم بعيني و الساعه فوك الخمسه و هو كاعد يتحقق وياي من كل عقلو لو شنو وين اتذكر من النعاس

:-احجي

- شحجي

-الشرطه شعدهم وياج لا تستفزين

-نعسانه ما عدتذكر

رفع اصبعتو بوجهي وخزر :- شوفي خليتج تعيشبن هينا وسمحتلج بكيفي ومن تحجين بكيفي لا عبالج ناسيلج من ضليتي بالشوارع ٣ ايام

ساعه ساعه تحجيلي شنو صار وياج كومي يلا غسلي وجهج وكعدي كبالي

شفتو عصبي كمت من فراشي غسلت وجهي وكعدت

-احجيلي الشرطه شعدهم وياج وكفولج تكسي وليش مناك صعدتي تكشي منا بشنو رحتي

-اخذت تكسي منا ووكف بانزين بنص الطريق وكمت ابجي و اجو الشرطه ساعدوني و اهذولي تكسي لاخ

-شحجو وياج الشرطه

-ما حجو شي

-دحكي هين تحجين لا بالقران اشوهج ، احجي يلا

... ادحك بي يسأل و اديه مجتفهم وراه ويروح ويرجع بالغرفه ويستمع ويرفع ايدو ويهدد ، حسيت نفسي ارهابيه وكاعد يطبقو شغلو بيا ويحقق ويايا ..

:- ما حجيت و الله شافوني ابجي بس كلتلهم ارةح البغداد وبقيت ابجي ما ارد وكفولي تكسي ووصوه يوصلني للكراج

وصلت الكراج وصعدت سيارات بغداد بس ضعيت الجنطه وضعت وياها لان ما حافظه رقم يحيى

-الجنطه مو بالكراج يا كديشه الجنطه من ثولج عايفتها بالسياره

-شمدريك

-مو خصج تسالين انتي تجاوبين وبس ، احجي يحيى وين جان مواعدج

-كالي من تفوتين بغداد وتريدين توصلين خابريني واني اححي ويا السايق يدلج

-اخ يلعار ويكلج احجي ويا السايق ما يدليج انتي

-مو اني ما اندل

-اذا ما تندلين شمصخم وجهج وطالعه حيوااانه

-سكتت

-اي وبعدها

-هو نزلت ما ادري وين وبقيت ابجي وما نايمه وما ماكله تخربطت بالشارع

هو سمع هيج لو انجن انطاني جف ع السريع وكضبني من ركبتي وخازرني :- وتتخربطييييين بالشوارع ولج كم واحد كضبج شسوو بيج احجيييييي

-ما اعرف والله كعدت نفسي بالمستشفى

-بالمستشفى شكالولج

-واحد ناقلني

شالني من ركبتي ورجعني للحايط:- واحد بنت السكط واحد يشيل من

الشواااارع ولج ما اريدج كوووه جزت روحي منج ، ولج شسوي بيج ادفنج احركج شسوي المن رديتيلي احجي

يحجي و خانكني ويا الحايط وكلساع يضربني بيه بقيت كاضبه بايدو حيل وابجي ، شمرني ع التخت وطلع

كمت ابجي حيل ، ابد ما اكدر اتحمل هذا الوضع ، كمت طلعت ورحت الو ، فتحت الباب وفتت

-اني هذا الوضع ما اتحملو ، تحس بيا وسخه احركني ولا تبقيني

-اطلعي مني

-لا ما اطلع والشك براسك اعرف راح تعدمني حياتي ، قسم بيسوع ما احد كضبني ولا احد كدر يلمس شعرايه مني ، اني ما اتحمل احد يدحك بيا غيرك ولو لمسني احد احرك روحي قبل لا انت تحركها

-اطلعي مني كتلج روووحي

-اني نازله ، بس ثق راح اتخلص منك ومن كل حياتي ..
اندرت اطلع هو سبقني دفعني من الباب وطلع وقفلو عليه ..

كعدت ع التخت ابجي :- لا يموتني ولا يخليني اموت شسوي طلعت روحي وما عاد اتحمل

للصبح فتحتلي هيام الباب اني كاعده منايمه

-حدري احجيلي شصار

-ما طايقني ولا طايق يشوفني ، لا راضي يموتني ولا يخليني اموت

-تموتين شنو بنتي هسوالف هاي بطليها ولج خبلتي للرجال عقلي

-اني اللي راح اتخبل مو هو تعبت

-بس اريد افهم شنو الحكمه من زواجكم ما اعرف كلشي بيكم ما راهم لا عمر ولا دين ولا عقل ولا تفاهم

لما تزعلين يتوسل وما ترضين ومن يزعل تتوسلين وما يرضى على شنو الله جمعكم وشنو حكمتو ما اعرف

لا كعدتكم سوا راهمه ولا طلاككم راهم ، حظج مدري حظو لهل مكرود ، كافي يا امي كافي ، اني ما شايله بخاطري عليج ولسه ما رضيت بس كافي

دحكي نومتو بالصاله جفي على وجهو من القهر ليش ..
حجت وطلعت وهي تتنهد وتستغفر ، طلعت وراها

دحكتو نايم بالصاله ع التخم ، عفتو ورحت للحمام ، شويه واسمعو يحجي ويا هيام يكولها :-كليلها تستقر بالغرفه ونزله وحده باليوم تنزل ما اريدها تبقى تفرفر كبالي بالبيت ما اطيق ادحك بيها لا تخلوني اجرم بيها

طلعت ، اندار وما دحك بيه ونزل وهو يكول لهيام :- ام علي ملابس جيبلي جوا اريد البس واطلع ،دك موبايلو

عفتو و فتت للغرفه ، لفيت راسي ونمت
كعدت العصر ، نزلت هو ماكو ، رحت للمطبخ ، ام سعد واكفه هي ونور ويدحكن بالمجمده ويفكرن للعشا

شفتهم جايبين مسواك ع الطلبه كأنو اكو عزيمه وام سعد تضحك وتكول النور :- خلص وكتها واجه الوكت التتغير بي ويجيب مره جديده بابو زايد يكسر خشمها

اخذت اكل وصعدت واني افكر بكلمتها :- مره جديده ، يتزوج ؟ غير انجن شحدو جيله واخليها بكصتو

بقيت افكر بيتي وبين نفسي معقوله يتزوج عليه ؟ لا ما اتوقع ، بس شنو قصدها هاي الحيزبون

بقيت بالغرفه ، ما انزل ابد ولا اطلع ، لثاني يوم جنت نايمه ، صحيت ع الساعه ب١١ و ثلث ، كمت من فراشي طلعت ، سمعت هوسه جوو

كلت خطار ما بيه اشوفهم شلي علاقه ، ردت ادخل للغرفه ، وسمعت صوت اسمهان تضحك جوا ، وسعت عيوني

اسمهاااان !!!!!!!

ع السريع اجه على بالي كلام لميعه ، اندرت بهمه ، ومشيت نزلت.....يتبع

☆☆☆☆☆☆☆

#زينب_ماجد

#مراهقة_و_الاربعيني

،،،،،،،،، بقلم زينب ماجد ،،،،،،،،،

الحلقة_تكمله 77

مشيت و نزلت ، واني ع الدرج لمحتها ، دحكت بيها لابسه ثوب فستان وعليه جاكيت كابوي والحجاب و الجنطه بيدها ومكياج وتاتو ،

بقيت مركزه بيها ، تراجعت ما نزلت ، اني حالي الضيم حالي و القهر ماكل مني ويمكن راح يصير شهر و المكياج ما حاطتو على وجهي وهي شلونها مرتاحه

رجعت للغرفه لبست احلى ثوب بخانتي ومكيجت ولفيت الحجاب لفه عدله ونزلت مرتبه ومعطره .

فتت لغرفة الحجيه هيام صافنه بوجهي و الحجيه ادحك ، دنكت على ام صفاء سلمت رادت تكوم ما خليتها ، وكفت اسمهان سلمت عليها من وره خشمي بس هي اكلتني بالسلام

رحت كعدت يم هيام هي ادحك بيه :- اشبيج ؟

-شكد غبيه

-ليش

- ضيعتي كلشي من اديج

-شعدهم جايين

-عزيمه

-هاي ما احبها ما ارتاحلها

-هزت راسها واندارت عني .. بقيت أدحك بيها ، وكلامها شلون تجر بيه و تنعم بصوتها ، انتبهت لنفسي اني ما اعرف اتنغوص هيج وادلع بالحجي مثل البنات لما يصيرون حلوات

كلشي ما اعرف ، احس روحي مسجونه بالحياة و هو سجاني ، حارمني الباب اشوفه ويكلي مكعدج بقصر

جيب عصفور وحطو بقفص ذهب وكلو عيش دشوف يعيش ، هه على اساس شلون جنت اطلع لما جنت عد اهلي ، من يوم يومي مظلومه ما مثل باقي البنات

.. كمت من كبال خلقتها ، رحت للبيت اتاكد صراع وينو ، دحكت الكراج سيارة صارع ما موجوده ، يعني مو هينا

بس ردت اتاكد اكثر خاف مطلعها وكاعد بالاستقبال :- نور وين صراع ؟

-بالدوام غير

-هااا اي صح اليوم دوام ، شعدهم ذوله جايين

-هيج تسياره

-اني هذه اسمهان ما ارتاحلها

-عجل حطي عينج عليها ولا تفارك عيونج

-ليش

-عينج احسن ما تاخذ راحتها ، زلمتج خوش زلمه وكل وحده تتمناه ، صيري سباعيه وبطلي سوالفج تره انتي تخسرين

تتذكرين من كتلج لا اهل يوكفولنه ولا بشر غيرهم هم ، بزينهم وبشينهم نتحمل ما عدنا حل ثاني

-بقيت واكفه بالمطبخ ، شويه وفاتت اسمهان :- هلا يبنات كولولي بشنو اساعدكم

-والله حبيبتي تسويلنا فضل لو تفاركين و اطلعين من المطبخ

-ليليان ليش هيج ويايه تره اني ما عندي شي وياج

- روحي حبيبتي روحي
فاتت ام سعد بعنادي وكفت باوستها وتكلها :- هلا بيج يلحبيبه
واللوكيه تردها :- هلا بيج يخاله فدوه العمرج هههههه

ام سعد :- ها شنو ليليان اليوم بينتي

-ابين وكت اليعجبني و اختفي وكت اليعجبني بيني واني حره

-يا بيتج هذا اللي اول البارحه يطردج منو وانتي تبوسين بيدو حتى يخليج عايشه عندو وما الج احد تروحيلو

- ما طردني منو ، اني اللي قررت اتركو واني اللي قررت ارجع و اني اللي قررت ابقى افتهمتي ، والبيت بيتي وانتي كاعده عندي خليها ابالج

-كاعده عدج والله جت العصر و تريد القصر ، سالفه تفيدج
دارت وجها على اسمهان وكملت :- لو تشوفينو شلون يصيح ما اريدها مدري تراسل منو على هذا موبايلها وكشفها وجزت روحو منها

اسمهان :- يااا خطيه

.. تركتهن ومشيت ، يمكن لو باقيه اكثر ما اتحمل اكضب الجدوره واهد بيهن ، رحت كعدت بغرفة الحجيه ، اتذكرت اسمهان واكفه بالمطبخ

تحلم اخليها ، رجعت هي تسوي زلاطه ، سحبت الزلاطه من عدها وكتلها :- لا اتعبين نفسج حبيبتي روحي كعدي ما الج علاقه

بقت ترادد طلعت من المطبخ ووكفت اسوي بنفسي ، شويه و دحكت باب الكراج انسحبت ، دحكت صراع وهو يسحب الباب

بقيت فاتحه الشباك وادحك بيه وهو يفوت السياره ، دحكني بس ثولها ولا كن عبرني ، صف ونزل من السياره وراح للاستقبال فات

شويه ودخل للهول الحجيه و ام صفاء وكلهن منتقلات بيه ، رفع ايدو وسلم عليهن ورحب بيهن وهو واكف ، وراح صعد

شويه ورد نازل وهو لابس دشداشه لونها بني ، وفات للاستقبال ، صبينا الغدا هم بالاستقبال و نحن بالهول والحجيه واكعه مدح بصخمان

كملنا و رحنا للمطبخ انظف واسمع حجي الحجيه ويا ام صفاء وتكلها انه اريد اسمهان هينا يمي بالبيت تعيني تونسني

واسمهان تضحك و تكولها فدوه العمرج خاله تامريني بس..... فتت :- من رخصتج حجيه اسمهان ما اقبل تكعد هينا

-امشي فوتي ليليان

-لا ما افوت ، البيت بيت ابو حرب واني مرتو يعني بيتي وهاي المره اني ما اريدها اشوفها بالبيت ، ما اعتقد نحن مقصرين وياج وهيام يمج

-ما بكيفج امشي انه هي مرتو حالها حالج واريدها تعيش هينا منا و غاد

-شنو شنو ، منو مرتو ، مرت منو ؟

هيام:- ليليان خل نطلع فوك

-لا اطلع فوك شنو ، هسه نحجولي مرت منو هي ، احجوووووو منو

اسمهان :- اشبيج ليليان اني مرتو قبل لا تصيرين بسنه ونص بس عمري ما تعديت كلمة ابو حرب واحترمت قراره

-ولج انلي مرتو ، وطحت عليها - انعل ابوج لابو الجابج الجابج ، ساقطه ، ام الزلم ، مات رجلج وكتي ادورين ورااااه وجايه على رجلي

ووكعت عبيها يريدون يجروها مني فقدت ولا حسيت ، طلع صراع و الحجي وراه سحبني كنها حيل وجرني ليفوك

واني اجر بايدو من :- وخرررر مني الله لينطيك تجذب ومتزوج ومااااااا تكلي ، عوووووفني ، ما ابقى اليوم ما ابقى

شمرني ع التخت وخزر :- لو سمعت صوتج ابتلي بيج

- ستسوي تموتني ، اني اربد اموووووت موتني ، نجذب عليه وتكولي ما عندي شي وتطلع زوجتك ، الله لا يوفقك ، حسبي عليك يا ظالم ما اريدك

تركني وطلع خر الباب اني حريتو بس ما كدرتلو سحبو وقفلو من برا ، كمت ادك ع الباب بكل قوتي ، صرااااااااع ، حقييييييير ، افتحلي البااااااب

كمت اضرب على وجهي واجر بالحجاب واكفش بنفسي ، انجنيت ، متزوج عليه وما يكولي هلحقير السافل ، ما ابقى والله ما ابقى

كمت الم بغراضي بجنطه بحركة دم ، انفتحت الباب عفت الجنطه ، فاتت هيام

-كعدي خل نتفاهم

-ما اريد اتفاهم وخري عني

-ليلياااان

-عفتها ونزلت ، البيت مابي احد كن راحو ، فتت للحجيه :- ابنج وينو

-امشي منا يا وكحه

- طلعت للبيت افوت بالغرف وادور بالاماكن على صراع ما هو ، سيارتو موجوده عجل هو وينو

صعدت فوك ، لكبتو بغرفة حلا بنتو عيبدل ويريد يكعد ، انت من كل عقلك تعوفني اليوم ما ابقالك ، كوم وديني كوم

-اطلغي برا

-ما تطلع ما اطلع حركت دمي حرام عليك ، تجذب عليه ليش ، مو كتلي والله ما عندك شي وياها ، حتى الله تحلف بيه جذب

هيام:- ولج حدري هين انه اححيلج والله ما عندو شي وياها ما يريدها يعوبه وهاي طلعها من البيت وما قبلها بس سكتي

-لا ما اسكت ولا اريد اسكت كعده هينا ما اكعد ، كوم يلا كوم وديني كووم

-دايخ ام علي ما اريد هوسه ، ياريت اطلعون

-انت شنو عود تريد ترتاح والله ما اخليك

-ولج امشي وياي افهمج

-ما افهم ولا اريد افهم خل يطلكني ، ما ابقى

-ولج وين تروحين ، ولج غبيه بس امشي افهمج

-ما تنام نا تنام اتي محترك دمي وانت تنام اطلع واهج وما ابقى

-روحي درب السد لا يرد ، عود سدي الباب وراج من تهجين ، يلا طلعي اريد انام

.. عفتو ورحت لميت غراضي وهيام تجر واني فرفحت روحي ، دخلت عليه نبدله واريد اروح وكتلو اذا نا تاخذتي هسه اروح وحدي

.. متمدد وايد على كصتو مغمض وايد لوحلي بيها بمعنى مع للسلامه ، انوب اشر عود طلعي برا

نزلت ومفرفحه وهيام تصيح :-والله وكحه يولي

طلع الحجي :- جبتي واجت المصايب وياج من لا حلة بركه ، متزوجها كبلج والج عين تحجين ، هي المفروض تزعل بس بت الاصول معروفه

- عفتهم وطلعت للكراج ، اريد اطلع استصعبها شلون اطلع وكفت بس الجي ، الحقير يعرف ما اكدر اطلع لهذا ما اهتم

كعدتني هيام وكالت :- ولج والله ما يحبها و القران شايفه هسه من رفعت غينها وياج وتكلج اني مرتو كبلج شسوا بيهم

بس ما بححي لان متضايك وياج ، يول والله خحلهم ما خلاهم يكعدون دقيقه وطلعو مدنكين روسهم

- هي مرتو اني شينفعني هلكلام

- ولج عقد شيخ وبس ، هسه انتي حسبيها ما تزوجج وراها ليش عقدلج محكمه وما عاقدلها لليوم ، لا يريد منها خلفه ولا يريدها تورثه بشي

ما ضم عليج والله بس لان يعرف انتي تنقهرين لو دريتي ويخرب حياتكم مع بعض بسبب زواج بس بالأسم

بس هي مخليه عينها عليه و ادك ناعم للحجيه ، من يوم الطلع لبغداد يدور عليج ولليوم استغلتها فرصه هلجلبه ويوميه تخابر الحجيه وتتلوكلها بلكت تمون على صراع ويجيبها بعد ما قرر يطلكج

-ام علي لسه هي على ذمتو شتححين انتي ، زين اسألج بالله ما متقرب منها

-ولج هو ما جان رايدها والله من مات رجلها ابوها تكاون ويا ابو صفاء ومنع اسمهان وجهالها عنهم . صراع المرحوم موصي على جهالو وابوها واحد حقير اضطر يروح يخطبها ويرجعها لبيت الصفاء ويكعدها بعقد

بس بعمرو لا فكر بيها ولا رادها بس هي تريدو
كل هلجحي مو مهم ، المهم منو يحب والمن يختار ، ليش تخسري وتخلي يختار

-اني لا اريد اخسر ولا اريد ارتاح اخوج مستفز يشوفني احترك وما يهتم يكولي درب السد لا رد

-لان مقهور منج والله انتي لو شايفتو شلون رزلها لان حجت وياج

نور :- امداج يخايبه ولج شوكت يصير براسج حظ طالعه وتاركتلها البيت حتى تجي مثل الورد تكعد

-هل تجي ما اريد ، اني ما اكدر لشاركو بوحظه اموت تعرفون شنو يعني اموت ، ما تفهمون ، هو خاني ،

عفتهم ودخلت ابجي ، صعدت فوك فتت للغرفه اللي هو بيها ، متمدد على بطنو مغمض بس ما نايم اعرفو

تقربت :- يلا كوم اخذني يلا ، لا تكعد تلعب بعصابي هيج كوووم ، وانده بجسمو حيل .. ندستو بخصرو حيل وكتله :- يلاااا

.. كعد على حيلو :- دحكي راح ارد انام بالقران العظبم لو طخبتي جسمي وكعدتيتي ما تلومين الا نفسج

.. خفت من كام بوجهي ، صفصفت ، شفتو رجع نام ، رجعت كعدت :- يلا كوم ، انت شنو عود جاي نحرك بدمي حرام عليك والله شرايد مني ما سويتلك شي

.. ولا تكول عفتك وطلعت ، اني ما طلعت بس لان تاذيت بعمري لا بعتك ولا بيوم فكرت بغيرك ، شذنبي هيج تطلع متزوج

اني غلطت بس ما خنت ، حرام عليك تسويه بيه هيج كوم يلا كوم ، من كل عقلي اكوم ابجي لو احد دحك بيه واحس نفسي بس من حقك وانت متزوج غيري وبايعني

كوم طلكني يلا هاي لو ما زعلان جان كعدت تتوسل بس لان ما راضي حظرتك تاركني احترك وانت نايم وما مهتم بيا

كوووم يلا مو احجي

وياك ، يلا كوووم ،

احجي احجي احجي ، الحايط لو رد صراع رد ، وحتى بعد محد ادخل ولا جا ، بقيت ازن وارن واححي واصقل والجي براسو وهو يفرك بكصتو داخ ، تاليتها حتى اني دخت ونمت بالكاع وراسي ع الجنطه مالتي

..ما حسيت غير الغرفه ظلممممممه واني نايمه ، حسيت اكو غطا فوكاي وخرتو وكمت طلعت ، لكيتو بالصاله ماد رجلو للطبله و يدخن نركيله ويدحك باللعبه

.. رحت كعدت يمو بالصاله :- يلا كوم ..
ما عبرني ولا اجعلني حجيت يدخن ومسوي الحو ملو دخان من النركيله

.. النعاس بعدو بعيني حطيت راسي ع التخم ، هم رجعت نمت

كعدت وره شويه ، دحكت موخر النركيله على صفحه وهم متمدد ع التخم و نايم ، عفتو ونزلت للمطبخ ، ما اشتهيت

طلعت من الكاونتر بسكت وصعدت فوك ، اكلت وبقيت اطمش ع التلفزيون ، اذن وهو راح توضى وفات للغرفه يصلي

-عود شنو هاي هي ارضه بيها ، لو على جثتي ما اقبل

-فتت عليه وهو يسبح :- دحك شوف اني ما اريد ضل هينا ، عوفني يلا لو تعوفها اختار يا اني يا هاي صخمانه ، اثنينه ما اقبل والله ..

ولا عبالك الحجيه تحبها ، طلاك اطلكها لو اطلكني يلا ، من احجي وياك رد عليه يلا ذبجتني

لم سجاتو وكام طلع ، ردت اطلع ، اجر بالباب ، قفلو المستفز ، بقيت اروح وارحع والف فكره تجيبني وتوديني

لل١٠ واني كاعده ، حسيت اكو صوت جوا ، رخت للباب اريد افتح بيه ، انفتح الظاهر فاتح القفل على كيف بلا ما تحس

نزلت و ادحكها اسمهان هم جايه وتبجي وتتوسل بالحجي و الحجيه وام صفاء واكفه ، واسمهان تتوسل

فدوه حجي الله يستر على عيالك والله و النبي محمد بعد ما اصل ولا اجي يم عائلتو بس احجي وياه لا يطلك منو الجهال حتى ابويه ضابته جلطه فدوه

والححي يستفسر ويدك على صراع بالدوام وام صفاء تكلو خابرنا البارحه بليل وكال حدي بهلزواجه ولهين واكف ما اكدر استمر بعد على حساب بيتي وعائلتي

الحجيه :- ياااا يا بيت ويا عائله

،،، يتصلون بيه ، وهو ما يرد

... انصدمت مطلكها !!!!!
مطلكها البارحه واني كعدت ابجي الليل واحجي وازن وارن وما برد كلبي وكال اطلكها

شنو من بشر هذا.....يتبع

☆☆☆☆☆☆

وهاي الناقه وكولو زينب ما تعوض 😬

#زينب_ماجد

#مراهقة_و_الاربعيني

،،،،،،،،، بقلم زينب ماجد ،،،،،،،،،

الحلقة_78

واكفه واسمهان تبجي و الحجي يخابر على صراع و الحجيه كاضبه بأسمهان ، الصراحه ما اعرف مدى شعوري بالساعده بهذا الوقت

مو لان طلقها او اريد اذيتها لا ، بس حسيتو من صدك يحبني وطلكها بمجرد ما عرفت بالموضوع ، وهذا تاكيد انو هي ما بحساباتو وفعلا ما تهمو ..

كلهم يدحكون عليه بحقد بأن اني السبب ، واسمعها وهي تكول :- كولشي ما اريد حجيه و الله بس خل يبقى خيمه فوك راسي ..

جاوبتها :- انتي مرة صديقو وهو ما ينساكم بس زواج مالو داعي شنو فايدتو متزوجح وهو ما يحبج ، اذا فلوس ما يكطع وياج

الحجي:- انتي ما الج علاقه ولفي فووووك

-لا والله ليش ما الي علاقه هذا رجلي ومحد تقبل تنطي رجلها لو تشاركو ، المفروض واحد يحس من حالو

زكحو بيا اصعد فوك ، فاتت هيام ع السريع كالت :- ليليان صعدي فوك شنو معناها وكفتج هينا ، اللي ردتي سوا الج ولو عندج حجايه تحجيه لزوجج مو هينا طلعي يلا

.. عفتهم وطلعت وبقيت من فوك كاضبه المحجر و واكفه ، دخلوها للأستقبال ، صعدت هيام

:- انهجم بيتج يم الدروب ولج وتشردين منو ، دمعتين شمرتيلج كبالو ، راح طلك وما تحمل ، وانتي حقيره وياه يولي

-تره شردت من ظلمو

-ظلمو بسبب غبائج لو مصارحتو كان ظلمج ؟ يعشكج يولي

-اكولج ام صفاء شنو من بشر هي مو زوجة ابنها

-ولج ناس فقره ويخافون لا طلك بعد يشيل ايدو من مصرفهم

- اووي شنو من بشر بايعين كرامتهم لخاطر الفلوس

-العازه مو شويه ليليان ، ما ضايكه العوز شيسوي

-صراع ليش ميرد عليهم

-خابرتو ورد عليه كال شنو صاير الحجي و الحجيه خبصوني بالمخابرات وانه بالدوام كتلو هسه استفسر ، خبرت على نور كالتلي رديت اتصلت بيه ، كال انه من اجي انهي الموضوع خل يكعدون

-خاف يتراجع

-لو ما حاسم امرو ومفكرلها من كل زاويه ما جان انطى هلقرار حتى يتراجع بيه ، فوتي للغرفه ومعليج بالسالفه و ابد لا تحجين من تحجين تأثرين عليه ويحسبوه ماشي بكيفج خلي هو يرد عنج

-تمام
كعدت بالغرفه ، للظهر مليت وجعت كلت انزل اخلي لفه ع الاقل ، نزلت واني ع الدرج ، سمعت صوت بابا الكراج انسحب ، معناها اجا صراع

رحت للمطبخ ، شفتو يصف السياره ، طفاها ، ع السريع طلعت كلاصو وصبيت ماي بارد ، هو فات اني درت اقبق البطل وارجعو ..

بلا ما يسلم وبلا اي صوت ، اخذ الماي شرب ، ملابسو عسكريه سود جذبتني علامة المكافحه على زندو نسر وطاير فوك خارطة العراق

حط الكلاص فاتت هيام :- ها الله يساعدك

-هلا خويه ، وينهم جوا

.. الحجي جا للمطبخ :- ليش يابه اطلك عيب من الوادم

- ابدل وانزل نتفاهم حجي
عافهم وطلع من المطبخ صعد ، اندار عليه الحجي :- كلو منج يالصفيرا ارتحتي ان شاءالله

-درت وجهي ما حجيت ، عافني وطلع ، شويه ونزل صراع كن سابح شفتو فات للأستقبال ، اني وكفت اطمش اباب الأستقبال

ام صفاء كاعده واسمهان و واهلو ، كعد هو وكاللهم :- ها الله بالخير
ماكانو صاير شي عندو ع البرود ، حتى هم بقو واحد يدحك بوجهه اللاخ وردو عليه ، رجع حجه

صراع :- شنو الموضوع

اسمهان :- شوف ابو حرب اني بعمري ما فكرت اوصل لعائلتك ولا اضايق زوجتك او...

قاطها :- ام سيف من رخصتج ، بس انه ما طلكت بس لانو مرتي طلبت مني مو هامني هذا الموضوع ، بس انه ما عدت اشوف اهميه لهذا الزواج

لما قررت اعقد زواج جانت الأمور متوتره بين ابوج و الحجي ابو صفاء ، هسه الامور طيبه وانتي مره بعدج ، يمكن تريدين تشوفين حياتج انه ما اكدر ابقى ظالمج بعقد ولا اكدر استمر بالزواج

الحياة جدامج و الامور تحسنت ما عاد تنفع هلزواجه ، وانه هم الي بيتي وعائلتي ما بحاجة هوسه ودوخة راس

- اني اعرف سبب مضايقتك هي معرفة زوجتك بس والله اني ما جان ابالي احجي ولا بعمري ردتها تعرف لو اسوي مشاكل

من جبتها لما تهجرتو وكلت ما اريدها تعرف وتحس ، واحترمت قرارك و ما حسستها والله ، اني جنت اخدم بيدي وما احجي ، الحجيه هي الكالت الها

بس اني بحاجتك والله لا تردني

-انه ما اتركم ويبقى مصرفكم واصل الله شاهد بس هلزواجه انه ما اكدر اكملها واتمنى ما تحرجيني

، كامت تبجي واجت يمو باست راسو ، فدوه والله ما اطلب اكثر والنبي شتريد اني حاظره بس اتراجع هن قرارك

، كام من مكانو ، دا يريد يرد حجيت اني :- ديكولج ما اريد شنو هي گوه

ع السريع اندار عليه وزكح :- انتي ما اسمع حسج صعدي فووووك يلااااا

.. طلع كعدت على نص الدرج واتسمعلهم ، هي كامت تبجي ، وام صفاء ابد ما نطقت ، والحجيه تحجي وياه ، بقى يتعذر اخرها تحجج بالموبايل وهو يرن ، اخذو وطلع

هن ما بقن وهي تبجي طلعو والحجي اخذلهم تكسي وراحن ، و الحجيه بقت تعد وتصف وشلون يطلك بس حتى ست ليليان ترضى ، يتركها هي وايتامها ويكسر بيها ويخليها مطلكه لخاطر ليلياااان زعلت

رجع هو فات وهي كضبتو :- ما ارضى عنك هيج تكسر بيه جدامهم وتخليني انه سبب بطلاكها ، انه امك وهيج تسوي بيا صراااع

صراع :- جان فكرتي بهلشيء من البداي

ه حجيه مو بفكرج تمشبن الماي من جواي ،، عازمتهم بلا ما ادري وبلعت ، ومقرره تجيبها ، وفوكاها تروحين تكولين الليليان وتشعلين الجو فوك راسي

الف مره كايل ومن زمان حاجيها ، اسمهااااان ما تعنيني وما يربطني بيها شي ..

قاطعتو الحجيه وهي تكلو :- اهااااا انت ما كاتلتك غير ليليان عرفت ، مو على اساس اطلك وما اريد وين حجيك ذاك

صراع :- اطلك اليعجبني وابقي اليعجبني حياتي الشخصيه محد الو دخل بيها

-لا والله ييمه الظاهر صدك لا كالو هلمصلاويه لاحسه عقلك ، نسيت شسوت بيك وانت بعدك راكض وراها

... هو سمع هيج انجن كام يزكح و يعد ويصف ويصيح وضرب الباب وراه وطلع ، وهيام تلوم بالحجيه

-من كل عقلج يمه تسمين بدنو بهلكلام

-ولج ذبحني حطني بسواد الوجه جدام المره ، انه الكلت الها تجي

-وانه كلتلج يمه صراع ما راح يقبل ، كافي لا انتي و الدنيا عليه ، خايفه على اسمهان من الطلاك وتكوليلو طلك ليليان وهاي يتيمه شبيج يمه شجالج انتي التخافين الله

-انه ما رايدتو يطلك ليليان ولا قبلتلو يرجعها ، بيوم الاجت كتلو يمه يتيمه بقيها ولا اطلك خطيه بس مال تمشي ويخلي يظلم هلمكروده ما اقبل انه

نسيتي سوات ليليان شسوت بينا ، على ابو يتيمه وجاهله وما يكسرلها خاطر وشاخت فوك روسنا ، ما يصير هيج يايمه لازم ينحطاللها حد

-يمه فدوه العينج مالج علاقه بي ، يحبها ويريد ينسعد وياها شنو مستكثره عليه حبو

-ولج انه لو مرتاح والله ما احجي ، يولي راح تجلطو من مشاكلها الزلمه ما ضل حيل بي

-القاضي راضي يا يمه فكج منو ومن حياتو لحد يدخل شما يصير بيناتهم مره ورجال يتكافشون ويتصالحون اللي يدخل ما يطلع الا بسواد الوجه عوفيهم لا تزيدين انتي هم فوكاهن

... من طلع صراع والحجبه هي و هبام فاتو للغرفه ، اني فتت لغرفتي ، بس حيل ضجت من كلام الحجيه لما عيرتو بيا

كلت اليوم لازم ارتب نفسي واصالحو اخفف عنو ، اخذت ملابس ورحت تحممت ورتبت نفسي ومكياج وعدلت الغرفه

لليل وهو ماكو ، نزلت هم ماكو و السياره مموجوده، بقيت انتظر ، ليما سمعت صوت سيارتو ، ما اعرف اميزها من سيارة نائل و الحجي ما اعرف ليش

لو انسحب الباب وسمعت صوت سيارتو فاتت ما اعرف شلون اعرفها هاي سيارتو ، عدلت نفسي وانتظرتو يطلع ، ماكو ما جا ولا فات

الطابق الفوك بس النه قله ما واحد يصعد كل الغرف النه حتى نور طلبت غرفه الجهالها كاللها الله كريم بس ما نفذ وبقى الطابق خاص بينا ،، نكعد بيه براحتنا نتعلل بس حلا جانت ويانا هسه راحت

ف من سمعت صوت غرفة انطبك بابها ، عرفتو هو ، كمت من غرفتي رحت الغرفة حلا ، لكيتو عيبدل

- صراع

-طلعي برا

-اريد احجي وياك

- وانه ما اريد

-شوف اعرف غلطت

-اششششش ما اريد تبرير ولا اريد حجي روحي ،

-لا ما اروح ولازم نتفاهم

-نتفاهم على شنو ها ؟ هسه تذكرتي تتفاهمين بعد ما خليتيني علج بحلك العالم ، يعايروني بيج ، هذا الردتي مو ؟

-لا والله مو هيج اني ما جان قصدي بس لان اتاذيت

-واذا اتأذيييييييتي شعندج رديتي ، انه رجال همجي ما افتهم حيوااااان فكيني يرحم اهلج فكيني

-صراع بس اهدئ شبيك

.. استغفر ربو و كعد ع التخت وكال :- من يوم اللي فتحت عيني ع الدنيا وانه كل ليله ابوي يضرب امي ، رسخت ابالي فكرة لازم اصير قوي واخوف الكل حتى تخاف وما تتعدى علي لو على اللي يخصوني

ومن شب على شيء شاب عليه ، الف مره كتلج سانديني وخل نصلح بعض ، ما اريد اطكج وما اريد استخدم اسلوب الطك وارجعلو

انصلحي يبنت الناس
اعقلي ينت الناس
اتأدبي يبنت الناس

شسويتي ؟؟ كل مره تتجاوزين و تتصالفين بدل ما تنصلحين ، ساعات وانه اكعد اعقل واشرحلج وانتي ما تفهمين

تاليتج تحطين راسي بالكاع وتشردين ومن ما تلكين غيري يحويج ترجعين ؟ بعديش ؟!!!!

رجعتي ما عندي اشكال ، بس هذا ما يعني انه رايدج لو الانكسر بينا يتصلح ، هيهات

مو شرط اليتأذى اذيتو تكون من جف لو من جتله ، اذية النفس جثير تأذي اكثر من اذية الجسد

لو ضربتج كف قوي بشقى مراح تهمج الاذيه وراح تبقين تضحكين بس لو ضربتج اقل من هذا الجف واني عصبي ، هينا راح تتاذين وتبجين

ف الاذيه اذية النفس مو الجسد ، الروح تتاذى اكثر من الجسم ، وانتي كل مره تأذيني بنفسيتي

كل مره تخليني بحرب نفسيه ويا نفسي واتأذى من وراج ، تتجاوزين واضربج وابقى اتأذى واكول يتيمه وتعديت عليها

٣ ايام وانه بالشوارع افتر وما ادري عنج وينج ، لحظات انتبه لنفسي دموعي بعيني واخجل حتى من روحي ع الموقف الحطيتيني بيه

كلشي رخصتو لأجلج ، وانتي ما رخصتي غيري

طلعتي لما صارلج امل تخلصين مني ورجعتي بعد ما ضاع الامل مو حبا بيه ، انه مو واحد بلا كرامه حتى اقبل بيج

الا كرامتي ، اسحك كلبي وما اهين نفسي لانسان ما رايدني ، البيناتنا انتهى ليليان ، لا اريدج ولا توصلين يمي

مصرفج يصل ، وكل حقوق الي يمج ما اريدها ، شتردين بس تعيشين ؟ ، هاهيه اذن عيشي

.. اندار جر الغطا ونام ، شفت ان الكلام انتهى اعرف هذه حالتو ما يتناقش بيها

اتركو وحدو يقنع ،

طلعت وتركتو ، تعبت كد ما الوم نفسي على تصرفاتي ، عجزت شلون اصلح نفسي وشلون اتصرف ، الحق الي واضيعو كلو بسبب تصرفاتي

جان الحق الي ويتوسل حتى ارجعلو لصت السالفه وخليتها الحق عليه و اني اللي ما زينه

لثاني يوم ، جنت كاعده بالهول ع الموبايل ، هو ما يعرف عندي موبايل ، لان ما كلش استخدمو ، فما شايفو

جا من الدوام وراد يفوت للغرفه دحك الموبايل بيدي ، فات وما حجه ، بدل وكمل ونزل ، شويه وصعدتلي نور

:- ليليان صراع يريد الموبايل

-هو دزج عليه ؟

-اي ردت احظرلو الغدا كال متغدي بس صعدي كولي اليليان اريد الموبايل

-هاا ، هاج

اخذ الجهاز مني وما قبل امسك موبايل بعد لو احط بيدي ، نزلت كاعد بالاستقبال ويا نائل

الحجيه ما تحجي ويايه ، و صراع ما يحجي ويا الحجيه ، ونور من توتر البيت ماسكه اطفالها بالغرفه

احترت وين اروح ، ضوجه كلش و التلفزيون ما بي شي و الموبايل اخذو و النوم شبعت منو

رحت كعدت ع المرجوحه بالحديقه ، اتمرجح وافكر شويه وفات علي و وراه هيام وبناتها

شافتني جت لعندي وعلي فات جوه ، تقربت مني وحجت :- هاا شو هينا يولي

-عجل وين اروح

كعدت ع المرجوحه :- شصاير

-يكول ما اريدج بعد

-حقو

-اني ما جان قصدي ائذي وما ادري هلشي راح يسببلو احرج كل الجان ابالي اخلص واعيش ويا اخويه بتركيا

-والصار ؟

-ام علي شلون وتالي ملما اجي اصلح سالفه الوصها اكثر مما احلها

-ما حار من استخار ، استشيري ، لو ماخذه رايي جان صار بيج هيج ؟ جان حبرتو ياخذج لبيت خالج بلا ما تكبر

مدام ما تعرفين تتصرفين استشيري الانسان اللي تعرفي ما يحبلج اذيه ، حتى هو لو استشاريتي والله ما يحجي وينصحج لنفسج حتى مو بأنانيه

- زين هسه شتصرف وياه

-تركي على راحتو بس لا تهملي ابقي من بعيد اهتمي بيه ، حتى لا يحس الموضوع مو هامج ومن صدك ما تحبي

وهسه يلا فوتي خل نتعلل شويه النكد ما منو فايده اضحكي للدنيا تضحكلج يولي ، عوفي الملاطم

-شضحك يمعوده ، هو المنحوس منحوس لو خلو فوك راسو فانوس ، اضحك هو مره ضحكت للدنيا وتفلت بوجهي وتريديني اضحك

-هههههههههههههه خرب بيومج على سوالفج دكومي كومي والله انتي تصنيف

فتنا جوا ، هو كاعد بالهول ، سوينا جاي و قدمتلو هيام ، ما بيه اي ضحكه لو ردة فعل ، كل حركاتو ع الهادئ

رجعت من جده و جديد اراقب ملامحو واتوسل النظره منو ، وهو يا جبل ميهزك ريح ولا كأنو ادحك بيه على نفس البرود

رادت هيام تلطف الجو وتكلو :- اي يمه علاوي اكو جماعه جانو يتحلفون وهاي حدنا وبعد ما نريد وهيج منهم وما يهمونا

شو هم رجعو ورجع الكلب يحن ، بدمعتين الطلك الاول و التالي وشحد تصل يم حبيب الكلب

علي :- يمه ما تدرين الله طيح حظنا من خلانا قوامين عليجن الا انتن النسوان ما تنكدرن ، نزلتن ادم من الجنه ، وتريدين كلوبنه ما تنزل بدمعه منجن

هيام - استغفر ربك طاح حظك هههههههههههه

.. ابتسمت واني ادحك بيه ، ولا كأنو يسمع ولا يمو الكلام ، حاط اللابتوب كدامو ويشتغل عليه

ورت ايامنا مع بعض بكل برود ، كلت اهتم بيه عن بعد وما اتقرب منو وما اجبرو ع المصالحه حتى بلكت ايام وتخف بيناتنا ونرجع مثل گبل

صرت احظرلو الحمام و الملابس كبل لا يرجع ، احظر كلاص ماي بارد ، الغدا ، ورجعت اهتم بأدق تفاصيلو

عل و عسى يتصلح البيناتنا ، ما انصلح ، بعدو باعدني عنو وما يقبل ينصلح ، استفزني بموقف ، حطيتلو الجاي كدامو ، ما دحك بوجعي ، وبرد الجاي وما شربو لحد ما كال لنور :- جدديلي الجاي برد

-من صدك ضجت وقررت بعد ما اخدمو واستخدم اسلوبو ، اسلوب التجاهل ، اعرفو ما يتحمل اتجاهلو كلت الا اضوكو من نفس الماعون

ومر اسبوعين واني ما خادمتو ولا بكلاص ماي ، كانو غربه ، وما انهز ولا تحرك ولا اهتم

مصرفي واصل ،يخلي عن الحجي ، واطلع لو ضجت ويا هيام للسوك تكلو وما يكول لا ، وتضايقت حيل من وضعنا

حسسني فعلا انو اني لان اني ما رجع الو رجعت لان مالي مكان ، حرمني منو وانطاني المكان وما قصر بواجباتي

... عجزت بيا طريقه اجيلو ، صعب حيل صعب ، وجتى لو بعثت هيام تحجي وياه يكون جوابو :- بعد اخوج سدي الموضوع

.. كعدنا بيوم الصبح على خبر وفاة زوجة عمهم جان عدها سرطان وبالمستشفى ماتت ، فكل احنا لبسنا قفلنا البيت و رحنا للعزا

هوسه وناس كومه ، واحس غريبه بين الناس ما اعرفلي احد بيهم ، واخلاص ما بطلت حجي عليه ، و الكل عرف صراع ما يريدني من خلال حلا كايله لاخلاص واخلاص ما قصرت ..

حيل تضايقت وبودي بس اطلع من هالعزا الكلو بس بس كال وكلت ، وكفت بالمطبخ لان هيام واكفه ما تكدر اخلاص تفك حلكها بس ادحك بنظرة المو عاجبها

جان عصر و عيحظرون عشا للعزا ، فات سليمان و صراع يحجون ويا نسوان عمومتهم على عدد الاكل و التحظيرات ..

صراع صاح على جاي صبتو هيام واخلاص كالتلها :- انطيني اني انطي

هيام:- لا مرتو هي توديلو ، هاج ليليان
وخزرتني ، اخذتو منها ورحت للكراج برا واكف ويا مرت عمو يحجي ، وما اع

رف بيا سالفه تحجيلو بهدوء

قدمتو الو ، وما كلت اخذ بس ماده ايدي ، ما كلف نفس ولا كاني مديتلو الجاي ، بوجه بارد يدحك بعمتو وعود منتبه بسالفتها

.. هي تضايقت من وجودي على سالفتها كالتلو :- اخذ جايك
سوا روحو فز وانتبه اني دا اقدملو جاي ، اخذو وكال :- لا تطلعين للكراج استقري جوا

... احس طلعت روحي منو .. لو بودي اكسر الاستكان وما انطي ، فتت جوا ،

اخلاص :- عليش جابره روحج عليه ، مايريدج كوا

-اللي ما يرديني هذا طلك ثنين نسوان بس حتى ما ازعل واتركو وانتي قيسي يريدني لو لا ؟

بس شنو احساس اللي ما عدهم كرامه ويتلزكون بواحد متزوج حتى يخلصون من العنوسه

..حجيتها وفتت ، هي بقت تغلط عليه ورايا ، ومصدكه نفسج وانتي اطولين توصليني ، عاد هيام ردتها

كملنا عشى وكعدنا ننتظر صراع يخلص حتى يردنا للبيت ، كاعده اباب غرفة الاستقبال ووحده تحجي ويه الحجيه جوا

تكولها :- دخيل بختج يا ام صراع زلمه طول بعرض وكل هلهيبه هاي زوجتو ؟ حتى سلامها بارد كوه ينسمع

ازوجو واجيبلو المعدله التلمو اللتخلفلو شو صارلها ويا سنين وحيد ما جابتلو

الحجيه:- انه شعلي بي غير يحبها

-شيحب دخيل جدج ، وين جانت وجدان طول جسم ملكه تاكلك بالسلام اكل ، والله يا ام صراع ظالمتو لهل رجال بهلبنيه

شنو بعد يومين يخلف منها ابنو شيطلع ؟ شتعلمو مسيحي لو اسلامي ، الام هم الها دور ما يصير عيج انتي تاركتو

و الحجيه تردهن انو هو راضي بيها ومكتفي وما يقبل بكل مره وهي هم خوش بنيه وحبابه مشاكلهم بينهم

... احس اريد اطك لما اسمع هيج حجي ، من اروح هناك يم خوالي يكولون ما مناسبج ، شكلج اجنبي وشكره و اهو عربي وجبير شلون راضيه بي

واجي هينا يطلعوني اني الصفر وما اناسبو ، بس حيل اذتني هلكلمه من يكولون ما تناسبو :- ليش ما يكولون هو ما يناسبني وجبير عليه

يعيبوني و العيب بيهم ، دزيت طفل من العزا ، كتلو :- تروح تكل لعمو صراع تكول ليليان تجي تاخذنا من العزا ترا يصير عزا ثاني لو ما اجيت

راح الطفل ، وبقيت كاعده انتظرو نص ساعه يلا جا شرف حظرتو

صاح من الباب ما دخل :- ام عليييييي يلا خويه كولي للجماعه تهيرو تعبنه

... اني لابسه ومحظره ع السريع طلعت من شافني اشرلي امشي ، مشيت وهو ورايا وصلت للسياره صعدت وبقى واكف ومتخصر ومنطيني ظهرو منتظرهم

صعدت الحجيه بالصدر وهيام وبناتها يمنا ، طلعنا خليت راسي ع الجام وادحك بنعاس بعيونو بالمرايا

ولا دحك بيا بوكت جان لو صعدنا واني ورا ما يفسر دربو على كد ما كل شوي يسرق نظراتو عليا ، شكد تحس قل حبي بكلبو من كد ما يهتملي

فات من الطريق الثاني جان براس الفرع حواجز كونكريتيه ما يكدر يوصل هيام للباب فكال :- حجيه نزلي وصلي ام علي و البنات للباب الساعه ١٠ مو زين تنزل وحدها

.. عاد نزلت الحجيه ، مدري شخمش كلبي من ضلينا بالسياره وحدنا لا اني ولا هو يحجي ، بقيت ادحك بعيونو ، ما دحك

دمعت عيني على كد ما ضجت ، من صدك تضايقت ، درت وجهي واني اداري دمعتي بعيني لا تنزل ، سمعتو ياخذ نفس ويتنهد بطريقة واحد تعبان

اندرت دحكت بيه ، لكيت عيونو عليه ، ع السريع دار وجهو عني

-صراع الى متى

رجع عينو وكأنو ما فهم شي :- عفوا ؟

- الى متى راح يبقى هذا حالنا تره متت

.. فتحت الباب الحجيه وصعدت و انقطعت السالفه ، حرك السياره ومشى ، اول ما دخلها ، نزلت منها وركضت لغرفتي

بقيت ابجي بفراشي ، شويه وسمعتو فات لغرفة حلا ، بقيت ابجي اكثر ، ما ادري بعد شلون اتصرف متت

لليل مشيت لغرفتو واني ابجي ، فتحتها ، مطفي الضوا ونايم ، تركتو و رجعت ، بقيت للفجر ابجي

الصبح و نور فاتت تكعدني واني ما شابعه نوم ميته نعاس وهي تكولي بلا صراع جوا يريد يروح للعزا كومي تهيري

:- كوليلو ما تروح

-ولج يريد يقفل الباب دكووومي

-كوليلو ما ترووووح ما بيه ما اريد ..
واندرت للجهه الثانيه تغطيت

... شويه واسمع الحجيه تصيح من فوك :- لييليااااان

.. كفيت الغطا ومشيت للمحجر :- يمه روحو ما اروح

-ولج رجلج واكف نريد نصعد دلبسي يا امي

-ما اريد يوووم ما اريد اروح

صراع :- يمه ما اريد لغوه اريد اقفل الباب اتهيرو وصعدو ع السريع

-ما اروح يوم روحو وقفلو الباب

الحجيه:- ولج بس نزلي هو الحجي مشامر شنو ما تروحين

- ثوبي قصير ما اكدر انزل وما ابدل ، وكرايبكم ما احبهم على شنو رايحه ع المغثه ، ما يحجي وياااها ما يحبها وليش ما يتزوج ، ما وراهم بس المغثه على شنو رايحه اغث روحي ؟

روووحو كلت ما اريد اروح

صراع:- تركي يمه طلعي خل اوديكم

.. عفتهم ورجعت للغرفه ، تلفتت منا منا ما رجعت نومتي ، فتحت تلفزيون اطمش ، قنوات تافهه ما بيها برنامج بي حظ ..

نزلت جوا ، جوعانه بس ما اشتهي اكل ، طلعت مواد كيكه وكعدت اتسلى ويا نفسي ، كملتها وكاعد احظر ككو اخلي عليه واخلطو ،

سمعت باب الكراج انسحب ، دحكت الساعه ٢ الظهر ، بقيت اشتغل بالكيكه ، اندكت الباب ، اتذكرت اني قافله البيبان لان ما لابسه وافتر بكيفي

دحكت من

الشباك ، صراع ، شافني ، مشيت فتحتلو قفل الباب ، فات حط مسلف ابيض بعلاكه ع الكاونتر وراح للهول

جريت المسلفت دحكتو تمنت وحشو وفوكو تبسي ولحم ، اكل فواتح احبو ياااي ، كملت الكيكه و ضميتها بالثلاجه

خليت المسلفن بصينيه ورحت بالهول هو متمدد شداشتو ع القنفه و يدحك ع الاخبار ، اني كعدت اكل

شفت موبايلو ع الميز وهو داير وجهو ، سحبتو بساع انتبه بس ما اهتم دار وجهو وبقى يطمش ع الاخبار

اتذكر اخر مره بيناتنا كتلو ما اقبل تحط رمز لموبايلك ، وهو يكولي من الجهال الكاهم مخابرين ، فحط رمز غير البصمه و خلا مواليدي حتى احفظو

فجربت مواليدي ع الرمز اذا بعدو نفسو ، بساع فتح الجهاز يعني ممغير الرمز ، طلعت فيلم عربي وكعدت ادحك بي و اكل

شلت الموبايل ويايه للمطبخ واني انظف ادحك كملت رجعت واني بعدني اطمش بالموبايل ، جريت من التخم مخده وخليتو وتمددت ، ما نايمه الليل دخت ونمت

ما كعدت الا على صوت الحجي وهو يحجي ويا صراع لان رجع من الفاتحه

دحكت بطانيه فوكاي و الجهاز يمو ع الميز ، انتبهت على نفسي ثوبي كصير و الحجي واكف وصراع ما يقبل امشي هيج كدامو ، والحجي لطش يحجي

عاد كمت اني و البطانيه وكفشتي كابه صفره ومعكشه تكول الشمس المشعه ، كمت اني والبطانيه ع السريع دا اريد اروح لغرفة الحجيه ، دست على طرف البطانيه وانجرت وانجبحت اني وياها

دحكت عليهم يدحكون بيا كتلهم :- هاااااا
صراع هز ايدو ودار وجهو ابتسم والحجي يكولي :- شجالج يابه فزيتي انتي و البطانيه و اتكومتي

ما جاوبتو ، جريت البطانيه ورحت لغرفة الحجيه ، حسيت بي ابتسم بلكت شويه فك ، لا وحتى مغطيني يعني هو بعدو يحبني

لبست من الحجيه وصعدت بدلت فوك ، صراع راح و هم قفلت الباب ، رجعو بليل تعبانين كلهم فاتو لغرفهم

حتى هو تعبان سبح وفات لغرفة بنتو نام ، بقيت كاعده لان شبعت نوم بالنهار فكره تجيبني و اللخ تاخذني وادحك بالتلفزيون ، طفت الكهرباء

لايت ماكو وموبايل ما عندي ، خفت من الظلمه اتخايل جني يطلع وجهو بوجهي فجأه ، رحت تلمست وطلعت ،

الصاله هم ظلمه ، بس اكو خيط ضوا من برا ، وكفت انتظر ترجع الكهرباء ، شكلو ابو السحب غلس مدري ماخذتو نومه وما عينطي السحب ..

انوب ظالمه وواكفه ، خفت ، كلت خل امشي لغرفة صراع ، ازعجو ويكعد ولا ابقى وحدي واخاف

مشيت اتلمس الها ، فتت الغرفه بارده بعد برودة المكيف بيها ، مثل العميه اتلمس بالهوى وصلت التخت

دنكت ايدي تلمسو ، هذا وجهو ، بساع حس ، فز وكضب ايدي :- منوو

-طفت الكهرباء اخاف
كعدت ع التخت حسيتو ادنى مثل اللي ديسويلي مجال ، دحست نفسي بسريرو ونمت ، اتصنم كام لا ياخذ ولا ينطي حتى كن كطع الهوى

عدل ايدو ، نمت عليها وخليت ايدي على صدرو ، تخربطت انفاسو ، اجت الكهرباء ، الغرفة ظلمه بس اكو ضوا احمر بالسيتلايت كن مخليه نسبة ضوا بالغرفه اضافه الى ضوا الكراج من البردات

دحكتو مغمض عيونو ، بس اعرفو ما نايم وتاهت علومو ، بست زندو واني نايمه على ايدو وتحركت

وهمستلو :- مشتاقتلك شبيك
دحك بيه ، وبوسني ، شكد حسيت هو مشتاقلي يمكن اكثر مني على كد لهفتو ، ونمت للصبح على ايدو مرتااااااحه

لثاني يوم ، همه راحو للعزا الثالث ، بس هو جان عندو دوام ، كعدت هو رايح وماكو احد ، جان مزاجي عالي

سبحت ومكيجت وسرحت شعري وسويت غدا وانتظرتو يجي ، لما اجا وفتحتلو الباب ، فات وما يدحك بيا

استغربت منو ، شنو بعدو زعلان ؟ عجل الللي صار بيناتنا البارحه شنو ؟ ديضحك عليه لو شلون

رحت وراه :- صراع
ما رد

رحت كضبت ايدي :- اكف لحظه ، شنو بعدك زعلان

-ومنو كالج اني زعلان

-عجل شبيك

-شنو بيا

-مو البارحه تصالحنه ، ليش بعدك ما ادحك بيه

-ومنو كالج انه زعلان انه مبتعد منج لأنج ما رايدتني

-شنو ما رايدتك

-رجعتي بس لانو ما الج احد ولا اذكرج ؟

-شنو هلكلام عجل واللي صار البارحه شنو

-انتي اجيتي طلبتي حقج الشرعي وعيب عليه اردج واساسا حرام ، هذا ما يعني انو نرد مثل كبل

انه مو لعبه عندج ، تشردين وكت اللي تقررين ، وترجعين من تحتاجين واطلبين وكت اللي تكونين انتي بحاجة قربي ، مو حبا بيا

-شنو هلكلام اني اجيتك شنو ، انت دا تهيني ؟

- انتي الاجيتي وطلبتي وانه اكرمتج ،
رفع حواجبو ومشى

... خلاني بموقف محرج ويا نفسي ، هذا شنو من بشر ......يتبع

☆☆☆☆☆☆

#زينب_ماجد

#مراهقة_و_الاربعيني

،،،،،،،،، بقلم زينب ماجد ،،،،،،،،،

الحلقة_79

شكد خلامي بموقف محرج مع نفسي ، شنو من بشر هذا ، من صدك مستفز ، صعدتلو بهمه وفتحت الباب بعصبيه وهو عيبدل وصحت

:- انت انسان مستفز و اصلا ما تستاهل حبي ولا ظن البارحه اني الاجيتك لو اريد اصالحك لا لان انت من صدك ما تستاهل ياااا مستفز

.. هو ولا رد مدنك يبدل ويندار يجر ملابس بلا ما يلتفت ، واستفزني اكثر صحت :- عااااا
وطلعت و ضربت الباب ورايه حيل

رحت للغرفه افتر افتر واغلي واحاجي روحي :- من كل عقلي فرحانه ودا اتحظرلو ، مستفز مغرور ، بس بسيطه عود هم ادحك بيك بعد لو اهتم ، لو تموت
اني الك ..

حتى ما ابجي ، اي ما ابجي ، لان ما يستاهل دمعه من عيوني .

..بقيت گاعده بغرفتي واحس بروحي تفشلت وموقف زباله ، سمعت صوت السياره مالتو اشتغلت جوا ، دحكت من الشبابك ، المسكف مينشاف منو يمكن طلع

نزلت للبيت والموقف ياكل ويشرب ويايه ، لليل يلا اجو رجعو نائل جايبهم كلهم بالسياره وحلا جايه وياهم ، حتى ما سلمت عليه ، ادحك من طرف عينها

.. كعدت وياهم شويه ورديت صعدت ما نزلت غير ثاني يوم الساعه ١١ ، ما اشتهيت فطلعت للكراج اغسلو ، هو جان جاي من وكت اليوم ..

انفتح باب الكراج واني اغسل ، عاندت ولا اكوم و الا ابقى اغسل وما امشي ، دشوف شيسوي مو ميحجي ويايه

بقى يدحك يريدني افوت ، سويت نفسي ما مهتمه صاح :- يولو فوتي جوا

-ما رديت ولا اجعلني اسمع

رد الباب واجه بهمه لعندي كضبني من زندي :- مو احجي وياج

-ما ادري بالي مو يمك شتريد ؟

-دكلج فوتي جوا اريد ادخل السياره

-ما عتشوف دا اغسل شكو مدخلها !!

-ليليااااان

-بقيت ارش واغسل ما ارد

-وكحه وما تصيرلج جاره
حجاها وهو يندار يمشي للسياره يقفلها برا ويسد الباب

.. بقيت اشتغل ، كملتها وفتت للبيت ، لكيتو كاعد ع التخم وحلا يمو ويبوس بيها ويكولها :- طولج بالبيت نعمه هسه حلا البيت ول يابه

اني كعدت مقابيلهم ع التخم ، ويسولف وياها ويسالها :- شلونهم وياج كون متاذيه

وهي تردو :- لا بالعكس ماكو شي بس خالتي كلش بخيله ما تخليني اطبخ بكيفي وبعد العشا ممنوع نسوي اكل لو ناكل واني و وسام نسهر ، ولو جاب حلويات تحاسبو تكلو لا تخلص فلوسك على السوالف الما بيها خير

صراع :- ههههههه ول يابه خالاتج من يوم يومهن كاتلهن البخل و الخبث ، عدهن ساس طايح حظو

وويدحك على ام سعد وهي دايره وجهه تحجي ويا الحجي ، والحجيه تخزرو

-لا تهتمين باباتي انه اشتريللج ثلاجه لغرفتج وكل اسبوع اتسوكلج اللي بنفسج وامر انطيجياه من الباب لا تخلين عينج عليها ولا تسوين وياها مشاكل ، خليج برجلج وبس

وهي تبوس بيه ، وحبيبي والله يحفظك اليه ..
عاد كاللها :- هسه كومي جيبيلي ماي بارد وسويلي لكمه حيل جوعان

.. كمت من مكاني تجيب الريموت وهي اجت انطتو الماي، وهو كضبو وداير وجهو يحجي ويا الحجيه ، ونرفزني لان يدحك بالكل واني لا

رفع الكلاص يشرب واني قريبه منو دا اخذ بالريموت اندرت ع السريع وطخيت عكسو وهو رافع يشرب انكلب الماي فوگو

اندرتلو :- العفو ما ادري
وهو خازرني ، و الحجيه انتو الخاوللي يمها جان كال الها :- ماكو داعي
وبعدو خازرني

عفت كلشي ورحت للمطبخ خفت من خزرتو ، جا ورايه ، وكضب ايدي حيل :- من تعيدين هلحرمه السخيفه مره لخ وتكلبين الماي علي تعرفين شسوي بيج

-كتلك ما قصدي
احجي ورافع ايدي خليفه منو

-عيديها و شوفي الا اعلكج بالمروحه

-هو انت شعندك وياي غير تضرب وتعلك بالمروحه و ويا غيري تحظن وتبوس وحبيبتي وباباتي

-لانج وحده ما تحترمين نفسج ، من تحترمين نفسج وتعدلين تصرفاتج الطايح حظها ، عود تعالي احجي

... فاتت نور ، تركني وطلع

نور :- ها ولج شمفينه

-شفينت يمعوده ، هو ساعه ووكت معصب ، وماكو غيري يفرغ اعصابي بيها

.. بقيت اشتغل بالمطبخ وهم يحجون على مسواك رمضان بعد يومين ، خلينا الغدا ، وكعدت ، ما اريد ادحكلو ، وما اريد اهتم بس ما بكيفي ..

عيني من وحدها تراقب حركاتو ، يسولف ويضحك وياهم ، انقهرت حيل ، تركت الاكل و كمت

الحجيه :- وين كايمه ما اكلتي ليليان

-ما اريد يوم شبعانه
صعدت ع الدرج

-يولي حتى ما تريكتي اشبعتي ، ولج حدري وين رحتي ، هالبنيه تخبلني ريوك ما تريكت و ما تاكل وبعد اشويه اتسرسح و تكع ويا شايل شيل وتعال الحك

حلا :- خليها جده شكو شاغله روحج بيها

.. دخلت بالغرفه ، من صدك تضايقت ، الف مره كتلو اني غلطانه ، ليش ما عيسامحني ، ليش من يغلط يريد بساع اسامح ومن اغلط ما يسامح

تعبت منو ، وتعبت من عيشتو ، انوب اجت بنتو على كلشي تغث وتحجي ، وتتعمد تبسمرني عود هو ما يحجي وياي.

صراع :- ها خويه شلونج

:- هلا ابو حرب فوت فوت ، شلونك

فات :- الحمدلله تسوكتلج مسواك رمضان وجيت انطيجياه گبل لا اروح للبيت

:- ابعد عمري يا خويه رحتلك فدوه ليش تكلف نفسم انه مقرره انزل للسوك باجر واتسوك

-لا تسوكت البيت والج فد مره ، الا شلونكم علي شلونه بدراستو

- وال

له على الله ساعه ووكت نصيح حتى يلزم الكتاب وان شاءالله ينجح ، الا ما كتلي شوضعك انت وليليان

-على حطت ايدج

-شنو القضيه شو صعبتها هلمره

-ام علي انه ما مصعبها ، بس طيشها لازم ينحطلو حد ، جانت تغلط غلطات بسيطه تصير مشكله ونعدي ، بس تمادت ، من طلعت من البيت وما حسبت حساب لحد هذا يدل على انو وكاحتها وصلت مرحله بعد ما تنلزم

-هي صح غلطت بس عرفت غلطها وندمانه وتحبك

-لا لا صلحت ولا ندمت ، حالتها هاي مال وحده ضاجت و ما ديصرفلها الوضع وتريد تغيرو ، لا نصلحت ولا ندمانه ، وكلما تحجي تكلي من ظلمك

وهذا يعني ان هي لسه ما صلحت نفسها ، لو مفكره ويا روحها جان حاسبت نفسها وكالت ليش ظلمني ليش ضربني واشتغلت على نفسها

هي لليوم عايشه المظلوميه و ما تحاسب روحها وتكول محد ظلمني اني اللي ظلمت روحي

-زين الى متى ، شماتكم هواي والمشاكل مو حلوه

-ماكو مشاكل وربج راحة بال ، كاعده كبالي ولا تنك ولا تصرع راسي ، مو هي هاي الرادتها ، وشردت حتى تخلص مني ، وانه تاركها على راحتها ، خلي اضبها يحتاجلها جرة اذن

شوفة عينج الحجيت وياها ما نفع ، الزگحت ، ما ردت ، الضربت ، ما اجت ، خليني اربيها واتجاهل كم شهر ، حتى من صدك تحاسب تتربى

- الله يهدي وضعكم و يبعد العيون عنكم والله محد فكركم غير هلعيون النكسه ، هيج ظلم وجدان وهيج دلل ليليان ، مدري شبيها هلناس هاي حاشره اروحها بكلشي

-شنسوي ، الا ما تروحين وياي

-لا والله علي عندو دراسه والبنات كاعدات ، وهذا المسواك اريد اصفي

-ها ، اي ، يلا اني اروح

-اكو شي ابو حرب كول رايد مني شيء..

-لا مدامج مشغوله ، اخذي راحتج

-لا كول شعندي ، قابل علاوي صغير ، احجي

-لا مو جبت اكل جاهز وهاي ما متغديه ولا متريكه حابسه روحها ومتضايكه

- مني هي ؟

- ااا شسمه ، ليليان

-هههههههه مو صارلك ساعه اريد اربيها واعلمها واضبها ، وين حجيك يبو كلب سمجه ، كلبك عليها ما أكلت

- هههههه ام علي انه ما اكرهه ، انه متجاهلها اريد تتعلم حتى تنصلح وياي ، بس ما اكدر اشوفها تتأذى ، وما اريد احقق غايتها واروحلها واسامحها خليها بعزلتها تفكر

لهيج اريدج تروحين وياي هم شويه تعقلين بيها و انطيها الاكل ، ولا تكليلها انه جبتو ، حتى لا تحسبها انه متهاون وياها

-من عيوني هسه البس عباتي واجي وياك ، عود ساره تنظم المسواك ..

ليليان :- بقيت بالغرفه ما نزلت ، طلعت فيلم واندمجت وياه ، وثولتها ما نزلتلهم ، لهناك اندكت الباب وفاتت هيام

كمت من فراشي رحبت بيها وفرحت لان بس وياها اتونس وما اتضايق ، احسها من صدك مثل امي او اختي ، بوستها وكعدت

شفت جايبه اكل :- شنو هذا

- علاوي جابلنا و جوه محد اشتهى كلهم ماكلين كالتلي الحجيه اخذي للمخبله الفوك ما كلت ، كعدي خل ناكل اني وياج

.. كعدت اني وياها ، فرشنا العلاكه وكعدنا ناكل ونسولف

-اي شبيج عازله روحج

-شسوي نازله ، بنتو تغث وهو ما يدحك بيا ، من انزل ما احصل غير الاستفزاز و المغثه

-ما تصالحتو

-ما يرضى ، بعدو معند

-يريدج تعرفين غلطج

-الف مره كتلو اعرف اني غلطانه

-انتي عرفتي انتي غلطانه ، بس لسه ما انصلحتي ، كعدي ويا روحج وحاسبيها وبينلو انو انتي ندمانه وانصلحتي بتصرفاتج

-شلون يعني

-يعني بطلي طيش كدامو ، التصرفات الصيبيانيه وما الها داعي بطليها ، كلمتج بهدوء ، تصرفاتج موزونه ، قابل هو شرايد منج ، طالبج بطالبه ، كل الرايدو تنصلحين وتبطلين اتجفصين

-انصلحت وبطلت بس هو ما يفيد وياه

-متاكده ؟؟؟

-دنكت

-حاسبي نفسج امي لا تبقين تكولين هذا ظلمنيي ، شوفي شنو سويتي وانظلمتي بسببو وكعدي فكري ويا نفسج و علميها ان ما يتكرر الصار ، تره تسعدين نفسج مو غيرج

دشوفين هو ما ناقصو شي ، مرتاح ياكل ويشرب ويطلع ، لو انصلحتي فتفيدين نفسج وتفيدين من تنصلحين وياه وتبعدون المشاكل عن حياتكم

-هزيت راسي و اني مدنگه ، خلصنا اكل كالتلي :- لا تبقين بالغرفه نزلي

.. لملمت ونزلت هو موجود وبعدو رافع خشمو ما يتنازل ، وشسويلو عساس كاتله روحي عليه

... اول يوم رمضان جان هو عازم عمامو على عشى على روح ابنو ، والكل موجود ، وخليصان اكيد قائد الميدان هاي ما تفوتلها فايته

ما حسست الناس هو مزاعلتي ، لابسه ومترتبه ، وما احتكيت بيه ولا وصلت يمو حتى لا يتجاهلني كدامهم

وهو هم ما تجاهل ، من يحجي يكول روح لام حرب بالمطبخ گولها ، لو خل ام حرب تنطيك ، يعني على اسئله لو صار سؤال حول هيج موضوع ، بس ما صدف وصار حجي بيناتنا

بيومها طلعو وبقيت بالمطبخ انظف ، نور راحت تنيم جهالها ، ونائل حركني جاي جاي ، يدور وجهو وصاح جاي

مدمن جاي بشكل ما طبيعي ، ف على الاستعجال انطيتو الجاي وسديت جام الطباخ ووديتلو الجاي للكراج