.. بقو يحاولون .. احس روحي بحالة خدر وما اكدر احجي كل جسمي يون من الوجع ..

بقو يتراددون ورفضت كلامه الا اني انطق . طلعت اندارلي نائل:- هيج احسن بعد اخوج تورطين نفسج و تورطين و مشكله شكبرها .. يولي الغباء الو احدود وانتي اتعديتي للحدود

اكو وحده تكول الرجلها اححي ويا واحد .. خايفه على اخوج امنا بالله بس كولي هذا اخوي وبرري النفسج ولا تكولين عن مكانه ..

راح نخلي السيف على ركبتج الا نعرف هو وين ؟ لو نخبر عليج ونمول جنتنه تستر لواحد داعشي .. جان مشكله بسيطه وتنحل بيناتكم .. احسن هيج

الحجيه:- غبيه من يوم يومها ضرت نفسها وضرت رجلها .. ولج ذاك هو اعصابو طلعت والخشم يخر دم وحايربن بضغطو وعلى يا ساعه ينجلط

ما يعرف يكول حيل بيها على غبائج لو ينقهر على اذيتج .. شبيج يمتى تفتهمين يمتى يصير عندج عقل ولج مو ذبحتي والله مرمرتي لهل رجال

....بقت دموعي تجري بسكوت وهم يحجون .. لليل رجعت الدكتوره .. جاوبتها ان وكعت .. حاولت وياي . كلتلها وكعت ..

.. كتبتلي علاج ومرهمات .. وكعدوني يردون نرجع .. كضبت ايد الحجيه وكلت الها :- خابري خالو يجي ياخذني ما دام طلقني

-الطلاق باطل يمه حجاها بساعة عصبيه

-هلكلام ينفعو .. ما اريد ارجع وياكم .. خابري خالو ..

-ينفعو شنو الصار من ايدج امشي

-ما قبلت امشي :- لهين واكف ويا ابنج ما اكدر اكمل خلوني اعيش ذبحتوني رجعه ما اريد ارجع ..

خابر نائل على صراع كالو :- اخذها لبيت هيام خليها تهدى هناك وبعدها الله كريم .

... اخذوني لبيت هيام وشرطت يخابرون خالو .. كالو ادللي بس امشي ..

.. دخلت بيت هيام جانت محظرتلي سرير بالغرفه الصغيره .. اخذتني مشتني .. وكعدوني .. بقو ساعه يحجون وياي على ابو صوجج وكافي وعديها وهو متأذي وضغطو صاعد لا تجلطي لا تأذي

ما رديت ... اخر شي تركوني وطفو الضوا .. بقيت ويا روحي شكد بجيت .. ساعه الوم بنفسي وساعه احقد عليه كد ما ضربني واذاني ..

لحد ما نمت الفجر .. كعدت الظهر .. سمعت صوتو .. بالهول جايب الادويه و العلاج اللي كاتبيها اليه ..

كالتلو هيام :- فوت هي جوا

- لا مستعجل اريد اروح .. خليها هينا ترتاح كم يوم ..
حجاها وودعهم وطلع ..

.. فاتت هيام خلتلي علاكة العلاج :- ها صحي النوم كعدتي

-هزيت راسي اي

-ليليان اعرف هسه الجو متوتر و وضعج تعبان بس فكري ولج ومحمد.ما تلكين غيرو سند يسندج ويدافعلج .. عوفي سالفة خالج يولي والله يحجبج ما تعرفين اشصاير بي وشكد متأذي

-لا ائذي ولا عاد ياذيني كل شخص بطريق

-يولي يا طريق هذا وين ترحين

-الما عندو اب عندو رب .. اني بكل مكان متعذبه خليني اتعذب بلياه ايام والكى نفسي ولا اتعذب وياه طول عمري

-ولج يكولون نارك ولا جنة هلي مفكرة الحياة سهله ؟ اني وحدج ما تعرفين تتصرفين وابن ادم عظمو ثكيل محد.يحملو .. اعقلي وفكري ..

... تركتني وراحت ... سندت نفسي وكمت تمشيت للحمام .. دحكت وجهي من جد بجيت .. صايره اخوف اثار الضرب البوجهي مو انصاف ازرك على سواد على احمر واحتقان دم ..

.. شلت الثوب ادحك رجليه جسمي يخوف .. رجعت اطمش ع الحمام .. اتذكر من جنت اضحك وياه هينا وازيد الشامبو وبوساتنا وحبنا .. وارجع ادحك جروحي

ما اعرف احن الو لو احقد عليه لو احقد على روحي وعقلي اللي وصلوني لهل مواصيل ..

.. مرت ٥ ايام .. واني مصره الا يخبرون خالو ما ارجع . وصراع رافض يكولهم خلوها ترتاح وتفكر عدل لحد يخبر ويطلع المشكله .. سةء فهم يمضي وقت وتتصلح الامور لا تكبروها وتخبرون ..

فمنع نخبر خالو ولا يقبل .. ما اعرف ضجت اكثر لان من جد مو حابه ارجع للبيت .. صار عندي اشباع من المشاكل اللي ابيتو وما عاد اطيق اتحمل اكثر ..

خلص خل ننتهي محد يموت بلا احد ..

.. موبايلي لسه عندو .. ووجهو ما شايفتو من يوم الحادث .. ساره مرات تنطيني موبايلها اكعد عليه واكثر الاحيان اطمش ع التلفزيون ..

ب ١ بليل .. كلهم نامو .. بس علي بالهول يسهر ع النت .. اندكت الباب اني كاعده بغرفتي .. سمعت صوت صراع منصي صوتو من يحجي ويا علي بس بحتو عاليه سمعتو

وهو يكلو :- نايمه لو كاعده هي ؟

-ما اعرف خالو يمكن نايمه .. وحدها بالغرفه فوت

-فات للغرفه .. مطفى الضوه بس التلفزيون . سويت نفسي نايمه .. تقرب مسح على راسي بعد شعري من وجهي باس خدي .. وبقى مدنك يدحك ..

اخذلو صفنة دقيقه وهو يدحك بملامحي .. اخذ نفس وتنهد .. وتركني وطلع راح ..

ما اعرف شنو يحس من هيج يسوي يجي يخربلطلي كل تفكيراتي ويلخبط اموري و يروح . يخليني للحظه احن الو .. بس رافضه قطعا ارجعلو

شلت الغطا .. وكعدت .. ما اعرف اتركو وامشي وادبر نفسي بحياة ثانيه لو اتحمل واعيش لخاطرو

صار عندي تناقض بأمرين .. ما اكدر اعيش واكمل وياه بعد حتى لو يوم .. بس بالمقابل ما اتخيل حياتي من دونو ولا دقيقه ..

احبو واحن واشتاق ...

بس شي بداخلي تعب وما يكدر يكمل .. روحي تعبت من الهم جسمي باد من كد التعنيف ..

... اوووف جا بس خر

بطلي مشاعري وراح ..

ثاني يوم الظهر .. جا الحجي و الحجيه كعدو يحجون ويا هيام وهي تكلهم والله عجزت واني انصح ابالها تخلص وتروح لخالها .

صاحولي .. رحت كعدت يمهم ونفس الكلام الذنب ذنبج وكلو منج والرجال تعب وحيلو نهد كافي اعقلي يلا كومي ارجعي ويانا وانه و الحجيه جاييج ولازم تحترمين جيتنا ..

كلت لهم :- جيتكم على عيني وعلى راسي بس افهمو اني مليت لا هو راهم وياي ولا اني راهمتلو .. كل عيشتنا مشاكل اتي تعبت وهو تعب كافي ..

الحجيه:- لا ماكو مشاكل ان شاءالله هو زلمتج و المره زينه تعرف تكسب رجلها بالكلمه الطيب بفراش دافي بأكله زينه . هو شرايد منج قابل

النك و المشاكل ما منها غير دوخة الراس وانه اشوفو شكد ما ادورين مشاكل هو يتلافاها وكل همو تعيشون مرتاحين ..

.. ما رديت .. كامو وراحو وكالو خلوها على راحتها

مرت ٣ ايام و اجا هو .. من الدوام ونزل علينا .. صبتلو غدا هيام .. اكل وكعد وياهم شوي شاقاهم .. وبعدها كال الها :- خويه بس شويه اريد احجي وياها

-اي فوت . نحن نفوت بالغرفه واخذو راحتكم

.. فات اني كاعده اطمش ع للتلفزيون

-ها الله يساعدج

-ما دحكت

-كعد ع التخت .. نكدر نحجي ؟ و اللازم نحجي

-ما عندي حجي العندي كلتو .. خبرو خالو وخلوني اروح

-على اي اساس ؟

-شنو اساس .. اني تعبت

- لا لا لا لتكولين تعبت .. اذا تعبتي فما تعبتي الا من تصرفاتج وافعالج واذا تبقين هشكل راح تبقين تعبانه طول عمرج لان ما تعرفين تتصرفين

-اي ما اعرف اتصرف اتركني

- وليش اترك .. انه رايدج ومشتريج . ولا بضنج بس انتي تعبانه .. تره انه تعبان اكثر منج والمتعبني انتي

-ليش اتعبك وليش اتعبني خلينا كل واحد يروح في سبيل حالو

-ماكو حياة تخلى من المشاكل .. خو نعالجها ونعيش .. انه احبج وانتي تحبيني ليش نبهذل ارواحنا بلايا بعض ؟

تركتج ايام تفكرين عسى ولعل تصلحين نفسج ..

-اني تعبت وبعد ما الي طاقع اتحملك .. جبتها وياك ضرب بتكفخ كافي ارحمني وطلكني وخليني اروح ..

-لا لا لا شو اگفي انه وانه اكفخ بلا سبب موو ؟ ما انكر اول ما جيتي انه ظلمتج وكتلج تندمت ويبنت الناس اريد افتح صفحه جديده وماتت امج وكلت ما ضل الها احد غيري

ولج تتجاوزين وادوس على كرامتي واعديها واطمطمها في سبيل لا احد يسمع .. واكول اتحمل واكبر عقل والكل تصيح كبر راسها . تجفصين واسامح وكل همي تعيشين وما اشوفج مهمومه

شسويتي انتي ؟ انطيني شي انتي دللتيني بي واعتنيتي بيا ؟ حقوقي جداوه اخذها منج اكل شتحطين اقبل واكل وحتى لو بي عيب لو نقص ما احبطج واكلج مو طيب .. شغل مخليلج مره تشتغل عنج كل اسبوع في سبيل لتعبين

ما طلبتي حاجه وما جبت ما اشتهي وكتلج لا .. واكول يتيمه وبركبتي وما اضلمها وواكفلج سيف بوجه اهلي وكل معارفي

شسويتي انتي هااا ؟

الله يكول ( كل نفس بما كسبت رهينه ) وانتي رهينة اخطائج و غباوتج مو اخطائي .. الف مره كتلج يبنت اناس انصلحي وامشي وياي عدل وانعل عشيرتي لو تعديت عليج .. صح لو انه غلطان ؟

لاتعيشين دور المظلومه وتمسكنين نفسج .. تراج انتي الظالمه نفسج مو انه الظالمج ..

-لا ابد انت ما ظالمني وين .. انت حتى موبايل صارلي اسبوعين ماخذه مني ومخلي عندك وانت تعرف اني ما راسلت غريب راسلت اخويه

ومهما كان هو اخويه البينك وبينه شي خاص بيكم

-جان من البدايه كلتي هلحجي وتفاهمنه .. مو اسألج وتكليلي صديقتي وافتح والكاه ولد وارد اسألج و تكليلي واحد و ارد اسالج وتسكتين ..

روحي جيبي اثقف واحد بالعراق وحطي بمكاني ويشوف مرتو فاتحه كامرا ويا ولد و تكولو واحد وما تنطق بعد .. وشوفي شنو تصرفو

-مبايلي ليش حارمني منو

-هسه همج موبايل يولو شكد جاهله انتي واج بابا راح تجلطيني انتي ..

-سكتت

-همج موبايل وترجعين .. سحب الجهاز من جيبو الورا .. هاج هذا جهازج بعد عندج حجه ؟ كافي يولو والله جاي احترك بلياج كافي

-انت كافي عوفني لان ما اطيق ارجع اتركني اعتقني

-وين ترحين

-انت مستحقرتي لان عبالك محد الي

-لج حقيره لا تصيرين يا يوم انه استحقرتج لو حسستج انتي ما الج احد مو دوم اكلج انه كل اهلج ولا تهتمين . وين تريدين تروحين

-اني اريد اطلق واعيش حياتي اشوف العالم شبي مليت من مشاكلك ومن اهلك ومن عيشتك ..

- طلعلج يحيى وقوى عودج واستقويتي ؟ تشترين الباعج وتبيعين المشتريج

-لا اريد ابيع ولا اريد اشتري

-خالج ما يستقبلج كل عقلج مصدكه يحيى . يولو غبيه لا تصيرين لا تاب ولا الد .. الموصل تحررت وما بقى ايام ويعلن العراق بيان الانتصار مجرد دا نمشط المنطقه ..

فلا تعتقدين تايب كل القصه هذا شارد هو وشلة سرسرية دواعش لان لعبة داعش خلصت واجه وقت الهروب .. طلب منج فلوس ؟

-لا .. وشي يخصني اذا رحت وياه او صدكتو

-لا ما يخصج وطلاك ما اطلك و عيشه ويا يحيى متعيشين هذا بس يطكه العوز باجر يبيعج مره لخ و يستفاد بيج .. غبيه لتصيرين واعقلي كافي علعلتيني ومرمرتي كلبي وياج

-تريد ارجعلك

يعني مو

-عندج حجي احجي انه اسمعج

-تشتريلي بيت وحد وارجع للدراسه

-سمعي يولو انه جاي هينه ورايد خاطرج وضايج لان مأذيج بس لا تعتقدين تستغلين .. طلباتج ما الها خص بالمشكله الصارت

بيت اشتريت وما تركوني شسوي ؟
ودراسه كتلج سابقا انسيها .. ما بحاجتها انتي
فلا تبقين تتحججين

- هذا اللي عندي

-براحتج تريدين تبقين هينا يومين شهرين ما عندي مانع ..

-اريد تخابر خالو

... سحب ايدي .. ضمها بأديه .. عقلي وفكري عدل حياتج مو لعبه ..

.. كام وطلع .. بقيت افكر بكل كلامو .. ادري اني ظالمتو وباي بس كافي الى متى ؟ لازم اعيش

بقيه ما اكدر ابقى بعد هينا .. دحكت .. الموبايل تركو .. اخذتو .. لكيتو حاذف الماسنجر و الفيسبوك ... ونت ماكو .. وهيام ما مشتركه نت بسبب دراسة جهالها ..

بس علي من جيرانهم ساحب ..

رقم يحيى عندي .. بعثتلو رساله .. يحيى اني ليليان ..
انتظرتو .. ماكو ما رد جواب .. اتصلت مجاوب

عفتو و رحت .. هيام ما حجت بعد وياي تركو القرار اليه .. لليل جاوب يحيى

-هلو يحيى

-هلو ليليان شصار عرف رجلج

-اي

-وشسو ..

-بعد ما اطيق اعيش عندو هالهمجي دماني من فوك ليجوا حتى بعثوني للمستشفى وحتى طلقني بس عسه يريد يرجعني

-تحجين صدك ؟

-اي و الرب .. يحيى تعال اخذني تعبت بعد ما اكدر اعيش عندو

-تريدين سفري لتركيا بعد ٤ ايام اطلعين وياي

-اخاف

-منين منو .. مو طلكج بعد شكو .. اطلعي وياي نعيش هناك شو بس اني وانتي واحد يسند اللاخ

-بس شلون صعب

-كلشي صعب بالبدايه بس بعدين نعيش تركيا و شقه وراتب وحتى تكملين دراستج شعندج باقيه وياه غلطه وصرتي اله خلص عوفي وتعاي

-وشلون تجيني

-روحي لبيت خالج بابريل واني اجي مناك اخذج وياي

-ما يقبل يوديني

-شعليج بي خابري خالج واحجي وياه وخل ياخذج

-ما اعرف

-شنو ما تعرفين ليليان لا تمطمطيها اني ٤ ايام وطالع

-يحيى ما اتخيل حياتي بدونو صح اذاني كثيغ بس

-بس شنو ما كافي شايب واخذج تتعودين وتعيشين وادرسين وحياة غير شكل بتركيا

-ما ادري ..
بقينا نحجي شويه .. وقفلتو .. بقيت بدوامة تفكير تركيا اوربا لبس ودرلسه وعيشه غير شكل واحلام وامنيات وحياة جديده ما بيها الحجي ولا ام سعد ولا اي مشكله

بس شلون .. اذا اروح يعني هاهيه بعد بعمري ما اشوف صراع .. صفنت ويا نفسي .. يعني ما اسمع مغازلو الي ولا اشم عطرو ولا كلشي منو ..

ما اكدر هيج اموت صعب حيل ما اتحمل .. اني احبو
.. بس ما اكظر ارجعلو وحبو اذاني هوايه .. لازم الكه نفسي وباجر اتعود هو ماكو واعيش ..

يا ترى اكدر اعيش بدنيا ما بيها صراع ؟
.. قرار حيل صعب .. بس مقبلها حياة بتركيا يعني اوربا وعالم غير عالم ..

بقيت افكر وافكر وافكر .. بس تفكيري جرف ان شلون راح اعيش بتركيا وشلون البس واطلع بحريا وماكو احد يحاسب وشلون ادرس واشتغل

وهيج اسوي وهيج البس وهيج اعيش .. وطرت طرت بأحلام وتفكيراااات بعيده ..

رديت خابرت يحيى .. كعدتو من النوم ساعه ٤ .. :- ها ليليان شنو القصه

-اكولك سؤال يعني شكد ونستقر هناك

-فد شهرين ليش ؟

-يعني شهرين وعيش طبيعي

-اذا عدنا فلوس نعيش سلاطين مو طبيعي .. عندج فلوس انتي ؟

-اني اااا ما اعرف

-جيبي شكو فلوس ذهب اذا عندج تعيشين ملكه

-بس الفلوس و الذهب من صراع

-غير انطاهم الج .. يعني صارو الج خيولي شنو حلا من تخدمي وحرام تاخذين فلوس اللي انطاها الج وتعيشين مليج جيبي كلشي وخليها علي . انتي شكد عندج فلوس تقريبا

-كل العندي ٩٤٥ الف .. وذهب يطلع ب ٣٠ مثقال

-ممتاز لكن جيبي كلشي ومعليج اعيشج ملكه والله

-بس اخاف

-لتخافين بس نطلع بعد محد يكدر يحجي ويانا

-هاا

-والله

-زين شلون اروح لبيت خالو ميقبل يوديني

-خابري خالج شبيييج

-عندك رقمو ؟

-اي عندي تريدي ؟

-اي ابعثلياه

... قفلتو منو ...وبقيت افكر وافكر وافكر واحلام تجيبني ولخ تردني لحد ما نمت ..

... كعدت الظهر كلت لهيام اريد ملابس الي محتاجتهن من بيتنا ..

كالت العصر امر لهناك واجيبلج .
رحت لجنات كلتلها اكولج شي وتسويلياه وانطيج هديه سوار ؟

-شنو

-بس وعديني متكولين لأي احد

-لا والله ما اكول

-علبه حمره بالكنتور مالتي بيها الذهب .. واكو جوا ملابسي اللي بالخانه البنص فلوس جوه التراك الوردي .. هم جيبيهم ..

-شتسوين بيهم

-اريد البس الذهب والفلوس اربد اروح للسوك

-ماشي

-يس مو تخلين احد يشوفج

-اوكي

-هههه امشي يلا ام الاوكي

... طلعت هيام العصر .. اني صعدت فوك بالسطح وخابرت خالو ع الرقم اللي بعثو يحيى .. رد

:- الو

:- الو ها خالو اني ليليان

-هلا خالو شلونج اشلون صحتج

-خالو ما زينه تكدر تجي تاخذني

-خير شصاير

-كلشي صاير وطلقني

-له صدك تحجين

-اي والرب خالو بس يريد يرجعني واني بعد ما احنل تكدر تجيني

-خالو اني مو هنا

-عجل وين

-اني بدهوك عندي شغل والله خالو من ارجع اجيج

-شوكت ترجع

-نهاية الاسبوع

-ما تكدر خلال هليومي

ن

-لا والله خالو ما ابد ما اكدر صبري بس هذا الاسبوع واني احي اشوفج واحجي ويا رجلج وان نا صار تفاهم اخذج

-اخذت نفس .. تمام .. يلا خالو اروح

-هلا بيج

.... بقيت صافنه .. نهاية الاسبوع يعني يحيى رايح وطالع التركيا شلون بهل حاله ..

... احس فقدت الامل .. وكل خططي فشلت ..
لازم اتحمل صراع واتحمل عيشتو .. لان لا اكدر اوصل بيت خالو ولا خالو يكدر يجيني ولا هم ياخذوني ..

خابرت يحيى .. كتلو ع الحجي

-تكدرين تجين للكراج

-يا كراج

-مال بغداك اني اخذج من هناك

- لا يمه راس الشارع ما اعرف اوصلو

-شبيج تكسي من الشارع للكراج ومن الكراج لبغداد واني استلمج .. مناك ..

-لا يحيى عفيه انسى .. تكدر انت تجي تعال

-ما اكدر للانبار صعب اجي .. بس تعاي بغداد اني استلمج .. بس كولي لابو التكسي وديني للكراج السطلعني البغداد ما اتيهين والله وهو يوصلج صعدي السيارات الي طالعه البغداد نزلي و خابريني هناك اني ادلي السايق واخذج من بغداد ..

-لا لا انسى ما اروح ما اروح

-هو انتي عندج فلوس وذهب لو لا

-بعثت بنت حماتي تجيبهم بس يحيى اني ما اكدر اطلع روح

-ولج صعدي السياره واني ادليج ع الموبايل .. لا تخافين عجل شلون راح تعتمدين على نفسج هناك اذا تخافين من هسه ما مدبرتها

ما ادري ما ادري بس اخاف والله

-انتي جبانه خليج وخلي صراع يدمغ على راسج العليه سويته وكتلج تعاي وياي لا تكولين قصرت ..

... بقيت افكر .. اطلع بس صعب ما اكدر .. اني اخاف ولا بعمري طلعت وحدي .. رحت اشتريت زيت خرطت العافيه هنوب اطلع لبغداد وحدي ما اكدر

ضليت كل شوي اتصل بيحيى واكلو شلون حتى هو ضاج مني ..

اجت جنات وجابتلي الغراض بجنطة المدرسه مالتها مخليتها بجتفها ما نازعتها .. ضميتهم جو الفراش وبقيت افكر .. لا ما اكدر

كلت لازم اتجرئ وانقذ نفسي الى متى اني ابقى تحت رحمتهم .. لازم اتجرى واطلع لتركيا هناك عيشه وحياة غير حياة ..

اي لازم اتجرئ .. بقيت اقوي نفسي واتصل بيحيى يكولي معليج واني ادليج واصعدي

طر الفجر والضو بدا يطلع .. والكل نايم وبس هذا اليوم كدامي كلت هاهيه اطلع و الباقي على الله

اخذت موبايلي وفلوسي وذهبي و كلت يا الله ......يتبع

☆☆☆☆☆☆

#زينب_ماجد

#مراهقة_و_الأربعيني

،،،،،،،، بقلم زينب ماجد ،،،،،،،،،

الحلقة_ تكملة 75

... دك الجهاز .. شلتو :- الوو هلا ام علي كولي

-هلا ابو حرب انت وين

-انه بالدوام ليش

-لا بس ردت استفسر .. تصالحتو انت وليليان

-لا والله بعدها راكبه راسها

-يعني ما تصالحتو

-لا

- وقبلت تروح وياك

-تروح وياي !!! وين تروح وياي ؟

- يعني انت ما اخذتها بليل اني عبالي تصالحتو و جيت عليها بليل ورحتو

-لا لحظه ام علي .. شنو الموضوع انه ما ماخذها ليليان وين

-والله خويه كعدت ما لكيتها حسبالي اخذتها عجل وينها

-تسأليني وينها البنيه عدكم هياااام وينها شنو ماكو .

- هسه اخابر امي خاف جايتكم ..

... قفلت الخط منها .. وكمت على حيلي .. لا اله الا الله .. شنو ماكو .. وين دتروح .. امشي واتصل عليها ماكو رد .. اخابر وماكو تنرفزت اكثر

كمت ادور برقم الحجيه تيهت كلشي كبالي .
انضربت بعسكري وكع الجهاز .. لااااا يااااا الله شبيك متشووووف .. دحك عدددل

-المعذره ..

-دنكت اخذت الجهاز واشغل بي .. بس احس دمي فار .. وين راحت هاي .. وشنو يعني طالعه ...دشتغل لخاطر ربك اشتتتتتتغل

... اول ما اشتغل .. رفعت الخط وخابر الحجيه:- الو هااا يمه

-هلا يمه

-خابرتج ام علي ؟

-اي يمه خابرتني وليليان ما جايه لهين

-دحكي يمه .. حسج عينج تكولين لأحد ما اريد اي احد يعرف حتى لو جان الحجي .. لو عرفت احد عرف بالقران اهججكم ..

.. احجي وعصبي وامشي بهمه .. صعدت سيارتي .. حركت ومشيت بيها ١٨٠ .. افرك بوجهي .. وين تروح .. لا ما معقوله هاي ما تعرف تصل لراس الشارع .. ممعقول تطلع

.. جريت الموبايل و انه اخابر .. :- ها ام علي

-ابو حرب ماكو البنيه ماكو دورت بكل البيت ..

-شنو يعنييييييي ماااااااكو بنيه تطلع من البيت ما تدرررررين عنهااا .. وسن رااااحت ما حسيتي من انفتحت البيبان ما سمعتيييي

-لا والله ما سمعت بس اهدى خويه .

-قفلت الخط .. و كمت اضرب بالستيرن بحركة اعصاب دمي فار حرمتي وينها ..

.. شلت الموبايل وخابرت خالها :- الو ها ابو حنا

-هلا ابو حرب

-بس ردت اسالك ليليان عدكم جايتكم مخابرتكم

-لا والله اني بدهوك وهي خابرتني البارحه حتى اجي اخذها على اساس مطلكها وكلتلها نهاية الاسبوع

- يحيى وينو

-يحيى شارد ويا جماعتو ويردون يطلعون لتركيا

-جماعتو منو ومنين تعرف اخبارو

-اخوي بالموصل ويعرفو ..

-جماعتو ذول منوووو

-شاردين من داعش

-قصدك دواعش شاردين من الموصل مووو

-وهو كذلك

-يعني ليليان راحت لشلة دواعش

-ليش هي وين

-ليليااان طالعه من الصبح درررررريد ما احد يدري عنها ..

-ابو حرب مو معقول ليليان ما تعرف تطلع وحده ماكو هيج شي ..

-ليلياااااان ماكو ولو عرفت انتم تعرفون عنها شي اشيلكم والله .. شتسمعون عنها تكلولي والا ما تلومون الا حالكم بالله . قفلتو ..

ورجعت دكيت عليها .. يرن ويرن وماكو رد .. لج بنت الأواااااااااااااادم رديييييييي

.. وصلت بيت ام علي نزلت .. ضربت الباب حيل وفتت ويانها هيااام ليلياااان وينها .. ولج انهزمت ويا اخوها وما تدررررين عنهاااااا

-خويه ابخت محمد عليك خويه يس اهدئ

-ولج شهدىىىىىى مرتي بيد الدواعش وتكليلي اهدىىىىىىىىىى

اسمعي ما اريد تجيبين سيره لأي احد .. ولا اريد اي مخلوق يعرف هي راحت .. ول صخمت راسيييييي شحجي وشكووووول

هاي الواكفلها بحيل صدر واكاون لجلها تبيعني وتمشيييييييي وتحط راسي بالطييين .. ولج شكل لاهلي وعشيرتي حرمتي ما ادري عنهاااااااا

... طلعت واني اصرخ .. رحت للبيت .. فتت عصبي .. سألوني صرخت بوجهم مااااااا بيه شي لاحد يدخل ماااااااا بيه شييييي

صعدت للغرفه .. دحكت خانتها .. ذهبها ماكو .. ولا جنسيه ولا جواز ولا فلوس هاي منين اخذتهم .. شوكت فااااات واخذت كلشي شوكت

كمت اشيل واكسر بالغرفه واصيح بكل صوتي .. وين الكاه وين اروح ووين ادور .. اتصل وما ترد .. اشعل شيب الخلفوج اليوم وين ترحين مني اكضبج الا انهيج

.. صرت مثل بلاع الموس .. لا اكدر احجي و ابحث عنها ولا اكدر اسكت وادور وحدي وبن اروح ووين ادور

... طلعت من البيت ادك ادك ادك .. واني افتر بالشوارع وعقلي طاير ... لهناك واني اتصل عليها .. ردت

بس سمعت رد :- صحت الوووو

-الو نعم تفضل

استغربت:- منو انت ؟ وصاحبة الجهاز وين

-والله يابه هذه الجنطه نستها صاحبتها بالسياره و الموبايل بيها وجواز سفر باسم ليليان جرجيس وذهب وفلوس وجنسيه ..

-وهي وينها ؟

-ما اعرف انه وصلتها للكراج .

-انت وين انه جايك اكف عندك .. اخذت العنوان .. وكمت اضرب على ستيرن غبيه غبيه غبيييييييه

مضيعه الاول و التالي ومتهيه الكلبببببه اكضبج اااااااخ ...

رحت للرجال التقيتو :- بيش الساعه صعدت وياك

-هيج يمكن ساعه ٧ الصبح

-وبن وصلتها ؟

-كلتلك عمي للكراج ...

رجال انه طللع على باب الله وما ادور حرام هاي الفلوس تسلمهن الصاحبتها

- عمي ولو اتعبك البنيه يتيمه وما

الها احد وهسه مضيعه كلشي انت ما تعرف وين راحت ما حجتلك

-والله هي من صعدت مبينه ما تعرف شي لان تكلي اخذني للكراج اللي يطلع لبغداد ..

-بغداد !! شعدها ابغداد

-والله يابه هذا اللي عرفتو

... طلعنا للكراج .. وصلنا هناك .. سالنا على سيارات بغداد الساعه ٧ الصبح

كال طلعت سياره قبطت ب٩ .. لكراج العلاوي .. نخبرو ونسال ..

خابرو ع الولد الجان طالع لبغداد كال اي اكو هيج بنيه وجانت تبجي مضيعه جنطتها وغراضها ومتعرف شتسووي .. وصلت للكراج وكلتلها نزلي .. وراحت ..

... بقيت اسب وانعل هسه انه هاي بنت مصموط الصفحه وين الكاه .. هلنوب بغداد ..

.. اخذت سيارتي وطلعت لبغداد .. وين ادور ووين الكاها .. انضرب راسي احترت وين راحت هلبنيه لا فلوس ولا موبايل وبنص بغداد ..

.. كضبت موبايلها .. دحكت .. يحيى مخابر ٥ مرات عليها .. وتتصل بي من وراي .. اخ ول يابه شسوي ..

اتصلت .. رد :- الو ليليان وين صرتي تحجين صدك

: لك اليوم اكضبك*********** حقيييير اختك ويييين

.. قفلو بوجهي ع السريع .. رديت اتصلت .. قفل الجها .. لهل جريدي هذا ولج تصدكييييين بي ليليااااااان ولج تبيعيني لخاطر واااااااااحد جربووووع ..

جاي اصرخ واضرب بالموبايل ما احس الا سيارت ضربت بسياره لخ .. اخ ول يابه انه اليوم هذا انتقام عليه ..

نزلت من السياره

-ما تشووووووف شبيك

-احترررررم نفسك انه بسايدي وانت الطالع بالرون

- انت الما متتبه اني مووو يمك انت الجيت ضربتتي شو شوف شسويت بسياره انت خسارها

- عجل دحك سياراي شصار بيها .. تبعد عني لا ومحمد ابتلي بيك

-هلوووو استلم من جماعة عجل يابه داعشي حظرتك موووو

-انه من جماعة داعش يووووول .. عجل حدر شوف شسوي بيك ..
انكضيت بيه .. كل قهر بكلبي طلعتها بي .. اخرها دفرتو وطلعت بسيارتي وحركت ..

شفت سيارات نزلت وراي دحكت بي .. انه ما دريت طلعت كبل .. اديه مدمايه

... حرت شتصرف ووين اروح .. الجكاره ما فاركت ايدي وكل تنهيده اشمرها من صدري شايله ضيم الدنيا ..

لليل وانه افتر وما عرف وين انطي وجهي بلغت وقدمت بلاغ للشرطه بمواصفاتها وانطيت رقمي ..

للساعه ١٠ .. وانه دايخ وين الكاها .. راسي سطرني من الوجع خشمي كل ساعه يطك دم وانزل اغسل و مفتر راسي وين اريد الكاها ..

ساعه اغلط و اخرك اعصابي وساعه ارفع وجهي واكلو اللهي امانتك لا تخلي مكروه يصيبها وابعد عنها ولد الحرام

.. اخذت سياراي ورخت لبيت ابو صفاء .. دكيت الباب . فتحلي ابو صفاء ..

-هلا يابه ابو حرب هلا زارتنا البركه شنو ابغداد هلا بيك

-هلا ابو صفاء

-ها يابه مو على بعضك

-ما بيه بس وصيهم يحظرولي حمام رحمه لاهلك ميت ..

... حجيت ومشيت للأستقبال كعدت .. اخذت جكاره ودخنت . فاتت اسمهان :- هلا ابو حرب .. شلونك يابه مشتاقين

-حظريلي الحمام ع السريع

-خير اكو شي

-شلت راسي خزرتها .. تحركت مشت بلا ما تحجي .. فات ابو صفاء

-خير يابه كول شصاير

-والله ما اعرف شكول وشحجي ما ادري حاير بزماني

- كول يابه احجي بلكن نكدر نساعدك

- تكاونه انه و حرمتي وصار سوء فهم ومخابر اخوها هلكلب الداعشي و طالعه رايحتلو ونضيعه غراضها واخوها ما داري عنها و هي وين ما ادري

- حرمتك المصلاويه بس مبينه خوش بنيه

-انه الذابحني وين الكاها ..

اسمهان :- ابو حرب حظرتلك الحمام ..

- كوم يابه كوم اسبح وارتاح وباجر اني وياك نطلع لواحد اعرفو يساعدنا ..

... كمت للحمام وكفتني اسمهان :- شصاير ابو حرب

... دحكت بيها من كضبت ايدي ودحكت لايدها .. استحت وجرت ايدها .. تركتها ورحت للحمام

.. اسمهان هي زوجتي شرعيا فقط .. ما بيناتنا اي شي . تزوجتها مبل ليليان بسنه ونص .. بس لخاطر وصية المرحوم على جهالو .

ولان اهلها ما قبلو يتقبلون الجهال و ابو صفاء رجال جبير وعلى كد حالو .. كعدتهم ابيت وكعدتها هي بعقد ..

وهذا الشي يعرفون بي اهلي وبعض اقاربي بس محد حاسبو زواج . لان انه ما متقبلها ما اكدر اشوف بيها صديقي المات .. ما تقبلتها روحي

ولهذا قبل ليليان جنت متزوج ام مصطفى بالرغم اسمهان جانت موجوده .. صارت مقاربه بيناتنا بس هي طالبت وما كدرت اهينها وابعدها و ارفضها ..

بس دوم من اجي احاول ما اخلبها قريبه مني و انهرها رغم اعرف ان الي محبه بكلبها بس تبقى بنظري هي زوجة صديقي المرحوم صفاء .. ما اكدر اعتبرها زوجه شرعيه

من صارت ليليان ابد ما جبت سيرتها واهلي اصلا ما معتبريها زوجه الي مجرد زواج حتى مو محكمه بس شيخ .. لخاطر الجهال

اعرف ليليان حساسه وانه على طول اجي لبغداد بسبب شغلي ولو عرفت راح تحرك روحها وتحركني وتنكلب حياتنا مشاكل فوك ما هي مكلوبه ..

ف كلتلها ما عندي شي وياها لان فعلا انه ما عندي شي وياها ولا اكن الها بگلبي شي ..

...

بقيت يومين وانه محتركه روحي وادور وما خليت مكان ابغداد ما دورنه حتى منظمات و مؤسسات وماكو ..

اريد افتهم هي وين .. وشصاير بيها .. ما رايد كلشي بس اطمن هي بخي ر ومحد جايسها .. تخبلت ما ضل عقل براسي .. تعبت والقهر اخذ مني جثييير

لحد ما ساعه ٣ بليل .. دك جهازي .. رقم غريب
رديت ع السريع :- الوووو ......يتبع

☆☆☆☆☆☆

#زينب_ماجد

#مراهقة_و_الأربعيني

،،،،،،،، بقلم زينب ماجد ،،،،،،،،،

الحلقة_76

... طلعت و الخوف مالي گلبي اتلفت منا ومنا .. اول مره اطلع وحدي احس كل شيء بيه يرجف ..

خوف
قلق
ارتباك
رهبه
مجموعة مشاعر ضربت عندي سببتلي رعب واني امشي بسرعه واخاف ادور ورايه واشوف احد

او المح الشخص اللي اموت لو صار كدامي حاليا .. يمكن اتمنى حفرة تصير اطم نفسي ولا يشوفني بهذا الموقف ..

ع الشارع وكفت .. بخوف اتلفت والم بنفسي وادحك سياره .. الجو صبح ، الشمس لسه ما علت

وگفت سياره .. دنكت :- تروح للكراج اللي يوديني لبغداد

-صعدي

.. صعدت وره و الخوف ماليني .. كمت التفلت وراي .. هم زين محد حس بيهم .. :- يا رب يا امي العذراء سانديني وساعديني اترجاكي لا تتركيني وحدي .. اني حيل خايفه ..

بأسم الأب و الأبن و روح القدس الاله الواحد امين ..
ضميت اديه لصدري .. بقيت اردد تراتيل مع نفسي

السايق وهو يدحك من المرايا :- مسيحيه ؟

فزيت على كلمتو خفت لميت نفسي وكضبت الجنطه حيل :- لااا

.. من شفت نظراتو ما ارتحت ..بقيت بقلق منو .. انوب كام يدحك بالمرايا بتركيز ويسوي حركات بعيونو ..

خفت حيل واطمش ع الشارع ما هلكد بيه ناس .. و الطريق طال و هو ما مرتاحتلو .. اريد اكلو نازل واخاف من ردة فعلو ..

فكرت افتح الباب و ازت حالي .. بس خفت اتأذى ويوكف السياره ويكضبني وما انجح ..

احترت يربي شطلعني اني من كل عقلي .. يمه الف ضيم من صراع ولا خوفي هذا وانه ادحك واحد يتحرش بيه واخاف منو ..

صراع رجلي واعرفو ما يأذيني وجنت اموت من الخوف مو عاد غريب .. من الخوف دموعي كامت تجري بلا احساسى

:- ليش تبجين وتعذبين هلعيون الجنهن شمسين بنص وجهج ..

ارتعب گلبي من هيج كال واني ما اتحمل اسمع مغازله اخاف واترفز وافور من لما جنت شابه .. بس من صراع تقبلتها واحبها من الباقين تلعب نفسي . دحكت مجموعة شرطه وسيطره

كلت اجه الفرج صحت :- ناااااازل

تفاجئ :- بس بعدنا ما وصلنا

:- گلتلك نازل .. وفتحت الباب بساع وگف ..

نزلت ع السريع .. الشرطه يدحكون .. ضربت الباب حيل .. الطريق مفتوح .. استغربو نزولي هينا .. السايق طلع بدربو

تقدم اثنين من الشرطه :- تفضلي اختي وين رايده

-بس اريد اروح للكراج اللي يوديني لبغداد

- من بغداد انتي

-لا

-عجل ؟

-بس اريد اروح لبغداد

- من وين انتي ؟

دحكوني ابجي وارجف وخايفه صابهم القلق :- بس كوليلينا اختي انتي من وين

-اني من الموصل واخويه ابغداد

-نازحه لو شنو

-بس وصلوني للكراج شلون اكدر اروح

-يولو خل نوكفلها تكسي و تروح

.. بقو اثنينهم واكفين اشرو لابو التكسي يكف رجال جبير مشيب .. حجو وياه .. وصاحو :- حدري اصعدي

.. صعدت ويا الرجال ومشى .. گمت ابجي من صدك :- ياربي ساعدني و الله اخاف .. يارب بس اوصل سلامات .. يارب اكتبي اللي بيه الخير ..

شفت الجال جبير ما دحك بيه ماشي بطريقو نوعاً ما ارتحت .. خليت الجنطه جنب .. واخذت نفس لازم اقوي نفسي وما اخاف اي لازم اصيري اي اصير قويه

..اتذكرت لازم انطي للرجال كروب اخذت من الجنطه 25الف و مديت ايدي رجعلي ١٥ او وياها مدري شكم الف ما حسبتهم .. خليتهم بيدي

.. بقينا نمشي ونمشي ونمشي ، لحد ما شفت قربنا للكراج ادحك هوايه رياجيل وقله نسوان وكل مره ويا رجال ماكو وحده وحدها ما شفت .. ارتبكت ..

:- يلا عمو نزلي هذا الكراج

-ها اي .. فتحت الباب ع السريع ونزلت .. طلع الرجال راح .. و بساع من صفيت ع الكراج كامو يسألوني

؛- وين طالعه ، وين تروحين ، يا محافظه

-بغداد

-صعدي هنا يلا صعدي .. اخذوني ورحت للسياره لكيت بيها عائله وره .. كعدت بالكرسي الكبالهم يصير بوسط السياره .

شباب صعدو كدامنا وبالصدر واني كل خوفي منو يكعد يمي بس لا ولد .. عاد اجا رجال وزوجتو يطلع عمرهم ب ٤٠ وفوك كاللها :- كعدي يم البنيه
وهو كعد جنب ..

هفففف ارتحت ، طلعت السياره بعد ما طولت فوك الساعه يلا قبطت ، حطيت راسي ع الجام مال الشباك وبقيت ادحك ع الشارع ..

لهناك گالو لمو الكروه اخوان .. دحكت بيدي ١٥ و ٤ الاف .. اندرت اشوف الجنطه .. شو مو بيدي :- عجل وينها

كمت اتلفت ادور باكتاري ، ماكو ، دحكت جوه هم ماكو وينها .. توترت .. ياربي كل فلوسي وذهبي بيها وينهمممم .. كمت ابجي وادور واتحرك بمكاني بخبال

وكف الولد اليجمع الكروه :- اختي الكروه بلا زحمه

-بس اوكف جنطتي ماكو عفيه وينها .. وبقيت ابجي

وهو واكف يريد الكروه ، واني ادور صارت حركه وضجه بالسياره و السايق يكول :- هو من صعدت اني ما شفت بيدها جنطه جانت خاليه

-لا لا اني جانت ويايه جنطه والله جانت بيدي كل غراضي بيها

-اختي بس الكروه رجائا

.. شلت عشره من الفلوس انطيتو ما ادري رجعلي منها لا فقدت و بقيت ابجي ومتوتره ومرتبكه

اني شسويت بروحي ضيعت الموبايل و الذهب و الفلوس هسه اني شلون راح اخابر يحيى وشلون اروح شلون ارجع يربي ..

ادحك بيدي ٥ وكم الف .. شسوي يا الله شسوي .. كمت ابجي واشه

ك .. الرجال ندس مرتو وانطاها بطل ماي . كاللها انطيهاة

..انطتني شربت حجه :- كولي يا الله اختي شكد تحتاجين الركبه سداده الناس لبعضها لا تبجين ..

-زدت بجي بالزايد من حجيت

حجت ويايه البنيه :- اهلج وين

- احس بهالسؤال سجين يذبح شنو اكول ما عندي اهلي ما عندي عمام بس اخ وشارد من داعش واريد اروحلو

يا رب ساعدني يارب ، يسوع اترجاك لا تتركيني ، القديسه

بقو يحاولون ويايه يساعدوني بس شيساعدوني اني ما حافظه رقم يحيى ولا رقم خالو حتى يساعدوني وياخذوني لأربيل ، اساسا ما اندل بيت خالي ، كل مره هم ياخذوني وهم يردوني

ما احفظ ارقام ابد بس رقم صراع لان زوجي وعلى طول اخابرو من اي موبايل ادرج رقمو واتصل لما يعاقبني ويرفع الجهاز عني

..بس لو اموت صراع ما اگدر اتصل بي ، معناها ناويه على ذبحي ، اشرد منو وارجع اتصل اكلو شردت منك وضعت تعال رجعني ، مجنون ما يتفاهم

خاصه هسه وهو كشف فقداني يمكن اكيد دمو فاير اذا يكضبني ينهي بيا التوبه .. لا لا مستحيل اخابرو اموت بالشارع وما اتصل بي .. اخاف

بدت الناس تنزل بالطريق .. بقيت اخر وحده .. من شفت ماكو احد خفت كتلو :- نزلني هينا

.. ما كال لا وكف السياره ونزلت :- زين هسه اني وين وشسمها هاي المنطقه ، وين راح اروح وشراح اسوي

ادحك بيدي يمكن ٧ الاف بس .. بقيت امشي فوك الساعه و ابجي وحايره بزماني وين اروح ناس تمشي وناس تروح واني تايهه

مريت من جانب محلات بقيت ادحك بالغراض واشوف وشغلات حلوه .. كمت امشي واطمش وحايره من لا اهتمام ادحك بالاسواق

وكل شوي تجي فكره براسي وترتسم كلمه ( وين راح اروح ) اني شعملت بحالي ، جنت كاعده ومرتاحه اني وين ذبيت نفسي

صعدت على جسر وامشي ع النهر .. و اطمش عليه واكول :- وينك صراع شوف شنو صار بيه ليش يصير ويايه هيج ليش .. ابجي ..

للحظه تناقضت بمشاعري وصرت اتمنى سياره من هاي السيارات اللي تمر التفت عليها والكى بيها صراع حتى احس بالامان وارتاح من الضياع اللي اني بي ، بس بنفس الوكت يمكن لو شفتو اموت من الخوف و اكع بمكاني

... صراعاً ما بيني وبينكَ
... اتمرد لأبرهن لك أنني أنسان
... فتطغوا لتثبت لي انك انت السلطان

اول من يضلمني و اقوى من يدافع عني ..
تجرحُني و بنفس اليد تلك تداويني ..
يرعبني غضبك و ليس لي اماناً الا بيديك ..
أكرهك وأنا أكثر أنسانًُ يحبك ..
ابتعد عنكَ لأتقرب منك ..
اهرب منكَ فلا اجد ملجئ الّا اِليك ..
اين انا ؟!

.. الجو ظهر و الساعه اعتقد ٣ اكثر اقل ما اعرف بس الشمس احتدت حرارتها بشكل و الرطوبه الناتجه من تبخر ماي نهر زادت وصارت تخنك

احس الشمس صكعتني .. و الدوخه كضبتني .. ماماكله من البارحه الظهر بس اشرب ماي .. واليوم حتى ماي ما شربت ..

دحكت اني نص الجسر لا اكدر ارجع للمحلات واشتري ماي ولا اكدر اكمل احس دخت و الشمس حرارتها براسي دوختني

في ماكو واتفيى جوا .. شصعدني ع الجسر .. كمت امشي واشحط برجليه .. نوم ما نايمه و التعب اخذ من حيلي

اخاف اوكف سياره ما ائمن على نفسي و بعد ما عندي طاقه اكمل .. امشي وافكر اوكف احد واخابر صراع واكول لا .. خل امشي اذا يكضبني ما يرحمي

بس وين امشي .. احس العالم صار غابه واني ضايعه بوسطها لا اندل منين اطلع ولا اندل وين اروح

.. بقيت اردد واتوسل بالقديسين و القديسه مريم ما نزلت من على الساني .. امنا العذراء لا تنسيني ، سانديني ، ساعديني

مشيت بخطوات متعبه .. وصلت لحد ان ما اكدر اخطي ولا خطوه .. الشمي بعد ما بيه اقاومها و العطش ذبحني والجوع باد جسمي ..

اتخربطتت و وگعت وما حسيت بعدها بشيء ابداً.

.. فتحت عيني بتعب .. وارمش بشكل ثقيل .. واحاول ادحك عدل لحتى اشوف المكان ..

مستشفى و ردهه و بيها ناس يحجون .. ما اعرف شنو يحجون بس وشوشه ، رغم هذا هدوء وسكينه بالمكان ما طبيعي

حاولت اشيل راسي حيل ثكيل ، رغم هذا عنت نفسي وسندتها و گعدت ، وين جنت ؟ ، و منو جابني لهين ؟!

دحكت المغذي بأيدي و الساعه بالردهه ٦ و ثلث المغرب ، شلون جيت لهين ؟ طيب كل هذا الوقت اني ما حسيت معقول ؟!!!

فاتت ممرضه دا تمشي لشخص ثاني شافتني كاعده :- ها كعدتي

-بقيت ادحك بيها ما رديت ، شوي و أجت قاستلي ضغطي وكالتلي :- من وين انتي ؟ شجابوج لهنا مغميه عليج

-وين اني

- مدينة الطب

-وشجابني

-ما اعرف ناقليج عائله هو و زوجته بس جانو مستعجلين وراحو ما كلتي من وين

-سكتت ، شالت المغذي من ايدي خلصان وكالت ما بيج شي ضغطج طبيعي ..

راحت وعافتني ، كمت تمشيت بالمستشفى امشي منا واجي منا ، انتبهت الشغله الفلوس الجانت بيدي هم ضايعين ، اخ ياربي وين اروح هسه و وين انطي وجهي

.. ادخل ب الردهات و اطمش عليها .. شفت بنيه تريد تگوم و تبجي تگربت منها وساعدتها ، مشيتها للحمام

كالتلي :- فدوه انتضريني عفيه يبنيه بس اخلص ورجعيني للردهه ما اكدر امشي وحدي

هزيت راسي بمعنى منتظرتج ، كمملت رجعت مشيتها امها اجت تكولها :- ها ماما گمتي

.. ابتسمت ، بالعافيه

عليهم ، نزلو دموعي ع السريع :- ليش ما عندي اب ولا ام ، ما عندي انسان استند عليه من صدك لما اتعب

بس صراع والحياة وياه متعبه ، ما اگدر اكمل وياه و الأصعب ما اگدر اكمل بدونو هم ..

عندي اخ خاف يجي للانبار ياخذني بس ما خاف عليه اجي وحدي لبغداد وهو يعرف كل الزين اني ما اعرف اطلع وحدي

كل عمري ما طالعه وحدي حتى من جنت بالمدرسه الا ويا صديقتي وبيوم التغيب اغيب ولا اروح وحدي ، ومن اطلع ويا صراع يبقى كاضب ايدي لو يوجهني
من هينا امشي تعالي هينا فوتي منا .. ما اعرف وحدي

خاصه اذا كمت يكول غراضج .. هسه بلياه ضيعت كل شيء

كعدت ع الكراسي انتبهتلي المره الساعدت بنتها :- ليش ماما دتبجين

-لا مبيه شيء

-شو گومي يمنا شو

-لا خاله شكرا

-بلا شكرا بلا شي والله رحت جبت عشا وجيت تعالي اكلي ويانه شويه وما اقبل اني عازمتج يلا بلا تردد

.. كومتني وكعدتني وياهن صبتلي بكلاص بلاستك سفري بيبسي وخلت دجاج ومقبلات وكعدنا ناكل و بنتها متمدده وتحجي ويانه ..

بقت تحجيلي على حالة بنتها ، وبعدها سألتني عني ، حجيتلها قصتي ، حيل تعاطفت ويايه حتى گامت تبچي وتكول

:- الك الله يل ما عندك اهل ، زين خاله ليش ما تخابرين زوجج مدام تكولين يحبج اكيد هسه هو باله يمج وحيل قلقان

-اخاف

-اني اكول لو تخابري حتى لو يرزلج يوم يومين ولا هاي ضلتج ما الج غيره سند

-خاله اني شارده منو وارجعلو متعرفي شكد عصبي نار من يغضب يگوم ما يتفاهم ..

-يبوووه يلعصبي يشلع الگلب ما تعرفين تحبينه لو تكرهينه من يتخبل عدنا رجلي هم نفس العندج وكت هدوئه ماكو منه ولما يغصب يخبطنا اولنا على تالينه

هوايه اكو هيج رياجيل بس والله خاله احسنلج من هيج والله ..

بقيت ساكته وهي گامت تسولفلي عنهم وبقيت نايمه يمهن ، من اجت الدكتوره الصبح طلعت و رجعت وياهن كعدت حيل ارتحتلهن ..

ما لحت عليه بعد بالمخابره على رجلي ، واني كلما اكول اخابر ما اعرف گلبي يبقى يرجف من وحدو من الخوف ..

لثاني يوم طلعن العصر للبيت رادتني اروح وياها للبيت بس تعذرت منها ، لازم اخابر صراع بس ما عندي جرئه كلما اريد انوي اخاف وساعه تاخذ ساعه ويروح الوكت واني بنص التفكير

لحد ما ب٣ بليل كاعده بالصاله مال المصعد محد بيها ، فات ولد عرفتو منتسب للمستشفى من الباج اللي مسوي قلاده بصدرو

-اختي شتسوين هنا

-لا و لا شي

-صارلج يومين تمشين بالمستشفى وما وياج احد ولا مقيمه بالمستشفى ، شنو قصتج

-هيج

-جنسيتج

-ما عندي

-لعد وين اهلج شنو وجودج هنا ، انتي محافظات ؟

- من الموصل

-نازحه

- هزيت راسي لا ، بس.....

-تكدرين تمشين وياي للأداره هناك نحجي

-بقيت صافنه بوجهو

-لا تخافين تعااي

-مشيت وياه وبقو يسألوني الى ان گلتلهم جنت مواعده اخويه هنا وضيعت وما اعرف رقمو ولا بيتو ولا المنطقه واني شارده من بيت زوجي

.. سالوني ما حافظه ولا رقم ؟

-بس رقم زوجي

-اي انطينا خل نخابره

- بس

-لا تخافين ما نخلي يتقربلج ونأمنج منه لحد ما يدلينا بيت خالج او اي احد من اقاربج او ارقامهم

- انطيتو الرقم مال صراع

اتصل :- الووو

صراع :- الو منو انت

- اخي اني منتسب اشتغل بمستشفى مدينة الطب زو٠تك المدعوه ليليان جرجيس عدنا

-مستشفى ؟! هي موجوده يمك ؟ بيها شي ؟ شنو صاير بيها ؟ انطينياها

-الأخت مضيعه و ما حافظه غير رقمك

-دقايق و انه يمكم

... قفل الجهاز

-ليش تخافين منه هو خايف عليج

-ما تعرف هذا خوفو شكد بي غضب

-الظاهر هو ابغداد كال دقايق واني يمكم

-من گال هيج انخمش گلبي احس توترت والخوف بين بيه ، گام كل جسمي يرجف دموعي جرو وحدهم ، شراح يسوي بيا

گمت منهم بلا وعي اتمشى بالممر اروح واجي واطكطك بأيديه ، من جد الخوف ذبحني وارجف رجف ما طبيعي

حدود ساعه الا ربع .. واني امشي بالممر واطكطك بخوف ، فجأه شفتو كدامي

كمت اتراجع وسعت عيوني وگمت اتراجع خوف وهو تقدم بعصبيه :- صراع الله عليك ، عليك تراب حرب

كضب ايدي :- اشششش امشي

تقرب المنتسب وكضب ايدو ، خزرو صراع :- ايدك

-جنسيتك

-ايدك نزلها اكلك

ابتعد المنتسب وصراع كاضب معصم ايدي طلع المحفظه ، شال ايدو مني وطلعلو جنسيتي وجنسيتو

:- المره زوجتي

- اخي لازم تمشي ويانا للاداره

-مالك علاقه ، امشي

-اخي ما يصير

طلع الباج :- اشتغل بمكافحة الأرهاب ، ومو انت اللي توكفني ، تبتعد لا و اللي خلق محمد ابتلي بيك ،

- جاي تهدد

-دفعه وجر ايدي

-اخي البنت....

-البنت حرمتي ومو انت التجيب سيرتها على السانك وتحميها مني ، كتلك اااااااابعد

جر ايدي بعصبيه ومشى رادو يوكفوه بالباب تكاون وياهم وحجي و وصياح واخرها اخذني و طلع

مشينا الشارع وهو يمشي بعصبيه وجار ايدي وراه احس راح اكع من كد السرعه و دموعي ما وكفت

:- صراع بس اسمعني الله يخليك والله بعد ما اعيدها صراع

- ششششششش صوتج دنيا ليل و الناس مهوده ، نصل وحسابج هناك

.. يمشي يمشي يمشي واني هلكت كد.ما بجيت وصلنا للكراج صعدني

بسيارتو وطلعنا ليل وظلمه واحسو يمي يفور ويغلي من العصبيه

:- لج انه تنهزمين مني ليليااااان ، بعيني لج والله لو تصيرلي هوى اخنك روحي وما اشمج ، تبيعيني واتنزلين راسي وتمشين ..

ما فكرتي شيكلون عني ، ولج ما خفتي على سمعتي ، ما خفتي علي انجلط واموووووت بسببج
زلج لو مربيلي چلب هم جان وفالي وجازه تعبي وياه

بس انتي واخوج العار انكس من الچلاب .. ولج انه تبيعيي وتشردين لأخوج للي باعج واشتريتج منو
بي خير يدك صدرو ويكلج انه الج لو جان رحلج ظالمج ما يكعد بكلج جيبي ذهب وفلوس وشردي وياي

١٠ ملايين سلمتو من اخذتج ول غبيه لو من صدك تاااااب ما جان تكفلج و وكالج انه اسندج واعوض الاخذتو بسببج مصدكتو وهو يكلج جيبي فلوس

ما اجاج لاانبار وخذاج ،خلا اختو بنص الرياجيل تمشي ما هموووو لانو عااار ، ولج انه تبيعيني لجل هااااذ ..

انه بحالج ول يابه من عين باجر اجيب اثنين ابدالج لا عبالج گلبي تورط بيج من تصل الكرامتي وشرفي اكص گلبي و ازتو وراج

- اني اتأذيت منك هوايه والله

-ما تأذيتي منييييي انتي اتأذيتي من غببببائج من ثووووولج لا تشمرين الصوج بيه وانتي الغلطانه مو انه

ياهو اليقبلها يدحك مرتو فاتحه كامرا وتكلو صديقتي ويطلع ولد وتخاف وتسكت من اسألها ، انه خوش زلمه وما حطيتلج چیله براااااسج الا جيبي اكبر زلمه حطي بمكاني وشوووووفي شيسوي حيووووانه وتكليلي منك وتبرين نفسج

.. يحجي ويصيح و اني ابجي ولازكه روحي ع الباب منو ، من كد القهر الحراره احسها كامت تغلي بمعدي اختنكت وهو يصيح ومحتركه اعصابو

حسيت راح اتقيئ كد ما صعد حرارة معدتي .. كمت اضرب كدامي واضرب على زندو وهو يصيح ، اشرتلو اريد انزل راح اتقيء ..

ع السريع وكف .. نزلت بساع اول ما فتحت الباب تقيئت طلعت روحي احس كوه كمت اخذ النفس و هو يفتر حواليه يفرك بوجهو ويستغفر ويضرب بالسياره بعصبيه ويرجع يدحك عليه ...

مشى للسياره جاب بطل ماي وانطانياه بلا ما يحجي .. عركت وكوه اجر النفس اخذتو واني اغسل رفعت عيني ادحكلو يتلفت بالشارع ويفرك راسو

-صراع ما قصدي بس والله تعبت

-صعدي

-كتلك وديتي لخوالي وما سمعت عجزت واني اكلك ما اريد ابقى

-صوجي حقج صوجي انه اكبر حيوان من عقلي حبيت ومنو وحده غبيه مثلج ، لو افتهم ما اكف بطريقج لحظه واخليج ترحين وشيصير بيج يصير انه شكو

بس هين منا و جاي ان شاءالله .. صعدي

- اخذتي الطريق كلو متوتر وعصبي و ساعه يغلط وساعه يشكي و ساعه يسكت ،، طلعت الشمس ونحن ما واصلين .. الطريق كلو خلصتو ابجي

عرفت هو ماخذني على اربيل ما مرجعني لبيتو .. ادحك بوجهو ، احس كلشي بيناتنا انتهى وهاي النهايه ..

تعبب من الكلام و صار الهدوء سيد الموقف بيناتنا ..
اني ردتو يطلكني بس ليش ما احس بفرح او حتى راحه ، احس راح اخسر كلشي

وصلني لبيت خالي دخلني جوا جانو هسه كاعديني كالو :- هذه بنتكم اسلمها الكم بيدي و ان شاءالله يومين وتصل ورقة طلاكها وخل تخلص من الهمجي الحيوان اللي ما يرحمها وخلي الرحمه تتلكاها من اللي باعتني الو

.. طلع جواز سفري و الجنسيه انطاهم الخالي

-ابو حرب اكعد نتفاهم

-بنت اختك ما خلت شي نتفاهم بيه ، المره الطلعت من بيتي بكل صلافه ما تصيرلي مرا .. الله يسعدها من وراي ما اريدها .

عفتهم وطلعت واحس النار تاكل بيه ، احساسي احساس الصابو كنكري بعضو بجسمو ومجبور يكطعو من جسمو والا يموت وانه هيج لازم اكطعها مني وان لزم الامر اكطع كلبي وراها واخلص

.. جنت احس بروحي ما مرتاح كبلها واحس ناقصني شي ، حبيتها وكلت يا الله هسه ارتحت بس المشلوع كلبو عمرو ما يرتاح

الله بلاني بعشك وحده بكد بزري ارجف عليها وما تريدني ، اشتاگلها وما تحن ، اموت كبالها وما تحس

حتى بعشگي متعلعل يا ربي ليش ، اشكرك واحمدك ربي بس تعبت امتحاناتك صعبه وكل امتحان تحطني بي يكسر ظهري .. ارحمني ما عدت احمل هم حيلي باد والعمر اخذ مني هواي ..

... محد من اهلي يدري بسالفتها غير امي وهيام ووصيتهن ما يجيبن سيره لاحد حتى ابو صفاء كتلو

فتت للبيت لغرفة الحجيه شمرت السويج ع الميز و خليت راسي على رجل الحجيه امي

يسألون :- وين جنت ؟ شصاير وياك ؟ شنو الموضوع

-تعبان تركوني خلوني انام
طلعو وانه على رجل الحجيه :- يمه فركيلي راسي حيل تعبان

-شصاير لكيتها

-هزيت راسي بمعنى اي

-وينها

-وديتها لخالها

-هاي هي خلها تولي ما دامها هي الشردت الله وياها من عين باجر اخطبلك الاحلى منها

- تعبان يمه حيل تعبان

-راح اطلكها

-عجل شترجى منها بعد . ما اريدها لو مو تصير مره لو حوريه انتهت جزت روحي منها

-الله يحبك ييمه شمدريك يمكن الله بعدها منك وما يريد يشلع كلبك اكثر ، شو خلفتلك طفل ولا دفتلك فراش و ساعة وكتها زعلانه ومعلعله گلبك على اتفه سالفه

-وگلبي يمه

-اعرفك گوي وما تكسرك مره

-تهت وانه افسرها ، غبيه لو ما تحبني

- تحبك وتغار عليك بس صغيره وما تعرف تدابيرها ، خل تاخذ البكدها

- شلت راسي من رجل امي ، انه

اروح بغرفتي

.. كمت رحت صعدت ، تاخذ غيري ؟ يمكن وكتها انجلط واموت ، اااااخ ربي ارحمني وخلصنب من قيودها دخيلك

فتت الغرفه ، احسها ابيض واسود ما بيها روح ، جانت ماليتها بضحكها و سوالفها ولغوتها وحتى النك و النكد مالها ..

بدلت وما حملت ابقى بالغرفه اخذت المخده ونمت بالصاله ..

ليليان :- كعدت ابجي من طلع ، دحكت الجواز و الجنسيه مالتي من وين حصلهم مو ضيعتهن بالجنطه ؟ منين جابهم ؟

طلع خالي وصلو ورجع :- من كل عقلج خالو

-خالو تعبت والله تعبتي

-هسس ولا كلمه تشردين من بيت زوووجج اويامن ويا يحيى ؟ من عقلج صدكتي يحيى

-كلي راح نطلع بتركيا نعيش

-وينه ؟ تركج وسافر مو ؟ ما اهتم انتي بخير لا يقفل خطو ويطلع وتأمنين روحج وياه

حجت فوزيه مرة خالي :- ولج رجلج نايم على دثرة فلوس وتركتي من شنو طينتج انتي ، تمام شايب عايب ، بس ولج باجر يموت وخيره يصبح الج شو هو لا ولد ولا تلد بس انتي وتركتي وجيتيني لاحكتني على دريد تعيشين براسه

-خاله ما شغلة فلوس اني تعبت افهموني تعبت هناك

دريد :- من ايدج انتي الما عرفتي تحتوي ، الرجال نايم على شليلج وتكولين تعبت منه وجايه عليه

-خالو اذامي حيل ضربني لحد ما وكعت بالمستشفى شنتظر اموووت حرام عليكم

-حرام عليج من ما تفكرين وتكوليله احجي ويا واحد وتسترين لاخوج الصايع ، وينه خل يجي الضمضمتيله

.. كمت منهم ورحت لغرفتي ابجي ، كلها تفكر فلوس محد.تكول هاي شكد تعبت وتأذت ..

هيام:- هلا يمه شلونج

-هلا ييمه

-شنو الاخبار شصار ما صار

-شصاير محروك گلبي على وليدي مالو خلك و القهر هاد حيلو

-وينو هو هسه ؟

-نايم عمت عيني من جابها و لليوم صارلو ٣ ايام ينام بالصاله الفوك حتى ما يفوت لغرفتو

- شوكت يطلكها

-الاحد يروح للمحكمة يطلكها ويفتك ما ارتاحو يمه وما تراهمو ، كافي خل كل واحد يعيش لحاله ، اريد اخطبلو مره شتكولين منو اخطبلو ؟

-عوفيها هسه يمه خل يطلك ويرتاح وااله كريم

-لا اجيبلو مره من عين باجر اداري وتلفو بحظنها وينسى خوما يضل هيج متيه روحو

-ومنو ؟

-مفكره اجيب اسمهان

-ما يقبل بيها

-بكيفو هي مرتو وانه اعرف هي تحبو ، اجيبها لهين وانطيها غرفه فوك

-ما يقبل يمه هو كل هسنين ما رادها هسه يرضى بيها

-بس العرفتو من اسمهان متكربلها مره مدري اثنين

-والله تلكيها هي الوازت روحها عليه شتعرفين من اسمهان فد وحده متنكدر وفلفله عليه وما تعون بس يدحك بيها

-عجل هاهيه ما دامها تحبو اجيبها اداري باكلتو بنومتو بعيشتو شنو ضال هيج متعلعل

-يمه شيلي ايدج منها واتركي هو يقرر

-انه ما اجبرو بس اجيبها واكعدها هين واكلو اريدها اداريني ما يحجي لا تخافين وشويه شويه ينجبر بيها

وخلي يخلص من هلطايشه ابتلى وحباها.......يتبع

☆☆☆☆☆☆☆

#زينب_ماجد