#محرم_١٤٤١

حُب وتحيه واشواگ
وادموع مالت عشّاگ
نهديهه لاُم الـعبـّـاس
----------------------------------
ام البنين ام الوفه      ام الگمر وانجومه
واحدهم الينعَد بالف   الزينات دوم اعلومه
انحيّيهه المرَبْيَه زلم   يِحنون ظَهر الحومه
الخدمة حسين ابصدِگ   هسّه اصبحت مخدومه
إلنه الشرف والإكرام
لو بينه تِقبل خِدّام
خادِمهه مرفوع الراس
----------------------------------
اْمن اختارهه حيدر تره   مو صدفه صارت هايّه
رايدله من عدهه بطَل   تِتباهه بيده الرايّه
وخلُّفت "عباس"  وعلي   ما خاب شوره ورايّه
ركّضله مدري اشچم الف   بس مَر بالمسنايّه
طَيبه وتِدُر غيره وطِيب
وين الوفي النشمي اتجِيب
الكِلهم حَمِيه ونوماس
----------------------------------
من رَد ابن حذلم بشر    موقفهه ابد مو خافي
من ظَل يعِد بالاربعه     وگالتله لَـ اتعد كافي
خبّرني بحسين اشحصَل   مات الحچي بِشفافي
وبشّرني ابراعي اللِوَه   كون اويَه اخوته اموافي
فدوه لك يابو السجاد
الوالده و الاولاد
لاجلك رخيصه الانفاس
----------------------------------
تستاهل ادموع العشگ     ومو بس دمع تستاهِل
ارواحنه ودمنه فده    نرخصهه لاُم الكافِل
امعلمتنه بالحُب تضحيه   مو فقط قَول وقائِل
والما يرد معشوگه اله    كل عمره يگضِي ذابِل
اي ينسه طعم الافراح
مَيهيد يوم ويرتاح
وايعيش مجروح احساس
----------------------------------
حانت منيتهه وبُقَت   لاخر نفس تتعذّر
يحسين خاف امن الوِلِد   ويّاك واحد گصّر
منهو اكثر اجروح انترس   بجروحه اريدن افخَر
عباس ؟ لو عبد الله ؟ لو    عثمان ؟ لو لا جعفر ؟
ياهو اللي منطيك اچفوف
وبعمد راسه مخسوف
ابگد جرحه حبك ينقاس
----------------------------------
نذكرهه لازم كل وكت   مو فقط وكت الحاجه
الِيحبهه مو بس بالمرض  منهه يريد اعلاجه
المفروض درْس ام الگمر   يثبت ضِمِن منهاجه
اتنجّيه لو بحر الفِتن   يتلاطُمن امواجه
واتعلْمه أم الاقمار
درس الوفه والإيثار
ويتميّز ابّين الناس
----------------------------------

ياسر حسن
جمادي الثاني ١٤٤٠

https://tttttt.me/ssgadAl