ياهو امن الجروح بي لسّه مذبوح
وتْذّكره وتنوح يالمهدي جاوب


ارد اساِلك ياجرح يالمهدي بعده ماطفه
من شفت حز الشّمر نحر الحسين امن الكفه
من هجمت اعليه الالوف اوللْسّلب متلّهفه
مابقه لا خاتمه لعِمِامته اولا ملحفه

من ياجرح هاج
من كطع الاوداج
من انسلب لاج
كلبك يغايب… .. يالمهدي جاوب

الكبش لمّن يذبحوا ماي يسگوا للعطش
ذبَحته يالمهدي جدّك حتّه مو مثل الكبش
مات ضامي عالارض بالخيل اوصال انفرش
بالغرب لا له عشيره ولا چفن وبلا نعش

هلَ دمع الاحساس
فوكه الشمر داس
عاري بلا راس
ضل عالترايب…… يالمهدي جاوب


ادري يوميّه يمهدي اتخلي ايدك عالصدر
بالخيول حسين تذكر صدره داسوا وانكسر
اعوجيّه امجربه جابوهه حفرت بي حفر
بالحوافر لزّكت يالمهدي من صدره وذر

دم أدري الادموع
طحنوهه الضلوع
بالعشره مفجوع
من هالمصايب.…… يالمهدي جاوب


ارد اسألك ياجرح كلبك بعد بي يلّچم
من ضرب جبده المثلّث اه من ذاك السهم
لو ضَرَب گصته بحجر منهه انترس كل وجه دم
خنصره من انكطع لو من حَرَگ ذيچ الخيم
كلبك يمولاي.
عالضل بلافياي
لوعل بلا راي
من ياهو ذايب…… . يالمهدي جاوب


حَيَله منهد بالالم راگع رجع لمخيّمه
حسين گلهه راح زينب منّه حماي الحمه
عالنهر ضل هامته براس العمود امهشّمه
والسهم بالعين نابت يجري من عدهه الدمه

يالمهدي عبّاس
من بعده حراس
الزينب ارجاس
شافت عجايب…… . يالمهدي جاوب



راح أجرحك سيدي بهاي المصيبه المعذره
بلاعشيره عمّتك مابين الوف امحيّره
والشّمر يحرگ كلبهه من يشتّم حيدره
ويلي لو عباس ينضر من خذوهه اميسّره

خدرك سبي سار
بيد الشمر صار
كلبك لهب نار
من هالنوايب…….. يالمهدي جاوب

اعتذر يالمهدي بس رايد اخبرك هالجرح
متن زينب من كثر سوط الشمر ازرك صبح
والجروح ابكثر مابحسين يامهدي انذبح
المتن والنّسمه جانت من تمر جنهه رمح

هاكد يضربون
بالدم المتون
تنزف والعيون
تبچي وتراقب……. يالمهدي جاوب
#خادم الحسين سيد سجاد العميدي

◾️◾️◾️◾️◾️◾️◾️◾️◾️◾️◾️◾️
🔴#قناة_قصائد_الشعراء👇
https://tttttt.me/ssgadAl
🔵#قناة_رثاء_شاعرات👇
@alshuhadaaltafu70

⬛ #مجموعة_في_رحاب_الحسين👇
https://tttttt.me/joinchat/AAAAAEE5ALXrP5lARHOzmg
🔮#قناة_القصائد_مع_اللحن👇
@Alphadli

تاج العبايه
للحشمه ايه
ضِل السبايا.…… .. هاي العقيله

هيبة نبيهه وابكد عليِهه. زينب جبيره
والدّنيه بيهه. امعصّبيهه. فخر العشيره
طينتهه كافل منّ ابو فاضل. عرجت اميره
بالغيره منبع. للحشمه مرجع شوصفهه حيره

كعبه صبرهه
يشهد يسرهه
الهاشم فخرهه. …… . هاي العقيله

مرفرعه دامت. مضمومه جانت بكلب الكفلهه
يخسه اليجرهه محّد كسرهه صلبه اصلهه
العاداهه واهن طبع الهه ساكن إجبال اهلهه
متروسه طيبه منصوبه هيبه هوّ الله خلهه

يعجز رسمهه
عباسي اسمهه
عالي علمهه……. هاي العقيله

يرجف خصمهه يرعب اسمهه وبّاحرف اربع
زاي الزجيه هنّه سويّه. شمس الله تسطع
ياء ابعليهه وجه الله بيهه للحشمه مرجع
نون ابحسنهه باء ابكفلهه لعِداهه روّع
روح العقيله
احسين بدليله
هيبه واصيله……… هاي العقيله

العالي عرشه ماسدّه رمشه هوّ الحماهه
زينب وحكهه. الله طبكهه ارض بسماهه
بالغاضريّه لو هالسبيّه. طاحت عباهه
رغم الهضيمه زينب عضيمه رفرف لواهه
لا مو وحدهه
الله سندهه
ذَلَّ اليضدهه……… هاي العقيله

عرش ال اميّه روح الزجيّه راحت تهدّم
صارت شريعه شام الوديعه سيف وتكلّم
ياهو التنضره زينب تخزره راح الجهنّم
جتهم زلازل جنهه بوفاضل حيدر تقدّم

موت ويطوفه
كلمن تشوفه
ويكتله خوفه…….. هاي العقيله


براية كمرهه. خيمة خدرهه. راحت كفيله
بالغيره كوثر بالهمّه حيدر. زينب اصيله
اكبال الوفيه كل ال اميه وكفت ذليله
للدنيه عجبه. بالحشمه كعبه تاج العقيله

برحلة غربهه
ذلّت صعبهه
ديره كلبهه……… . هاي العقيله

#خادم الحسين سيد سجاد العميدي

◾️◾️◾️◾️◾️◾️◾️◾️◾️◾️◾️◾️
🔴#قناة_قصائد_الشعراء👇
https://tttttt.me/ssgadAl
🔵#قناة_رثاء_شاعرات👇
@alshuhadaaltafu70

⬛ #مجموعة_في_رحاب_الحسين👇
https://tttttt.me/joinchat/AAAAAEE5ALXrP5lARHOzmg
🔮#قناة_القصائد_مع_اللحن👇
@Alphadli