الى عبدالله الرضيع ع


شحالها التفگد ولد لو لفت يم المهد
ومن تلولي شلون يا عظم الرزيه
**
آهّ يا ﮔلب الرباب ومحنت امصابه
علـى مهد الطفـل دمعتها سجابــه
تكلــه شحال ﮔلـــب اليفكـد احبابه
سهم نحرك ييمه يوجـع اصوابــه
خالي مهدك من اصد يبني ينصاب الچبد
تدري التفارﮒ طفل تنصب عزيه
ومن تلـولي شلون ياعظم الرزيه

*
علــى جمــر انتظارك عيشت روحــي
وتهدم يبني صبري وطاحت اسفوحي
ﮔرب يـــوم الــولاده وبطلت نــوحــي
وﮔلت انــت التضمد بيدك اجـــروحي
ما حسبت من الزغر تشعل ابڰلبي الجمر
وجمر المضيعه طفل تلهب ســريه
ومن تلولي شلون ياعظم الــرزيه

*
انتظرتك عيد يمّه اتمــر على ايامي
وﮔلــت بس الولـــد يمحيلي الامــي
حلمْ مـــرّ وحسافه راحـــت احلامي
وعلي دهــري بنبال الفاكده يرامي
ما خَطه نبله الدهر صابني ابنص النحر
واليصوبها الـــدهر يعنــي المنيه
ومن تلولي شلون ياعظم الرزيه
*

أصــدّ لمهـدك انـــه يبنـي يالغـــالي
يذبحني من اشوفه موحش وخالـي
ييمه انسه واضم ايدي اعلى دلالي
أحـــس انتـــه بديّــــه وتــراوالــي
احساسي يا يمه وهم صـــوبه ذاك السهم
وردت طيفك لـــو يمر مره عليه
ومن تلولي شلون ياعظم الرزيه

*

اﮔماطـك يمه ذكرى بـــروحي أضمنه
اطلعـــه وشمّـــت امفـارﮒ اشمـــنــه
نـــاري التستعــر مــا تطفه بالـــّونه
يعبـــدالله دليلـــي ابيــش اصبـرنــــه
يمه اصبره بيا دمع وصبري مر ما ينجرع
من امَـدْچفــي للمهد ترجـع خليه
ومن تلولي شلون ياعظم الرزيه

*

زغير اعلى الڴبر طولك يبعد امـك
وتمنيتـه يضمنـي ﮔبـــل لا ضمـــك
يالمغسـل ييمه مـــن نـــزف دمــك
مخنوڴـه ودليلــي يهيد لــو شمــك
انته للـــريه الهـــوه ﮔلبي منك مـــا روه
يمه بس عطرك يـــرد الروح اليه
ومن تلولي شلون ياعظم الرزيه
*
الشاعر
موسى البديري

https://tttttt.me/ssgadAl

(لوعة الوالدة)

قصيدة گعديه في حق عبدالله الرضيع لسان حال الرباب أم عبدالله

أهـــزن بالمــهــــد يمـــــه أروح بلهفــــــــه وأشتمـــه
المهد خالـــــــي يعبد الله يبعـــد أمـــــــك يعبد الهل
أروح بلهفــــــــه وأشتمـــه

* * *

يمه ياسباح گلبـي ويا ثمــر عمــري التنيتـــــه
يمه تسع أشهور أنطـرك والعمــر لجلك فديتــه
ثمر غصنك بيدي يمــــه گلـــت يوليدي جنيتــه

ذاخــرتك لتالــي العمـــر عبــدالله يمـه وأنتظــر
يا تالـي كـل ذاك الصبــر والصبــر مر وهويتـه
الـــدهر باگ الفرح مني بعـد مـا ينگطــع وني
شجـرى بحالي يعبـد الله يبعـد أمـــــك يعبد الله

* * *

يمــه يا شمام عطـــرك وگلبي كـــل ساعــه يشمه
يمـه كــــل ساعـــه أگــلك وهســـه أناديمـن ييمــه
يبني چنت لصدري أضمك هسه بس ذكراك أضمه

بچفـــوفي چانــت نومتك وبعيوني أنظر ضحكتك
وكل ساعه اشمن ريحتك گلبي يبني ينســه همـه
چنت يوليـــــــدي اشمنك وبين أرمـوشي اضمنك
انشده بالـــــــي يعبد الله يبعد أمـــــك يعبــد الله

* * *





يمــه عبـــدالله التلولي ياهــو اليوصف حزنهـــه
اشلون لو ضلت تلولي وخالـــي يوليدي حضنهه
اگعــــد لأمــك يغالـــي يمـــه لجـــلك در لبنهـــــه

يايمه اگعـد يالولــــد بجفاك دلالي انمــرد
يا يمه اظل المن بعد والده وتترجـه ابنهه
تترجـــــه الولد يكبـر گلبهه ابشوفته ينسر
ردت والــي يعبد الله يبعــــد أمـك يعبد الله

* * *

تغفـــه يوليــــدي ودليلي يحــوم يلتـــذ بالسهــر
خـــايفه احلامك تگعدك وخـــايفه اشبـــاح القدر
ومن تصد عيني اعلى طولك گلبي يشعر بالخطر

دلالــــي يوليدي أنخمش ما يدري من سهم العطش
يگطع مّن اگليبي الهرش العطش وي نبلة أصوابك
سهمين الــــــدهر صابك العطش وي نبلت أمصابك
الولد غالـــــــي يعبد الله يبعـــــد أمـــــــك يعبد الله

* * *

يمة ليلي شلون بعدك من يمــــر يوليـــدي بيه
ريت لا أعيشن يغالي اشلــون اگضيهه المسيه
كون سهم الصاب نحرك گبلك يوسدنـي المنيـه

ما حسبت وأنت طفــــل عبد الله يابني تنچتل
ويبوگك من أيدي النبل رتك لعمـــري تچيـه
ما يبطل دمــــــع عيني يبني وزهرة سنيني
رحت تالي يا عبد الله يبعد أمك يا عبد الله

موسى البديري****

https://tttttt.me/ssgadAl

الى ازغر ورده من ورود الطف عبدالله الرضيع

ازغــر مـــن الـــورد رايـــح ومــا تــــرد
بيك ما مـــر النده مرت أسهام العده
رايـــح ومــا تــــرد
*
مــا دارت أفصـول الدهـــر يل مــا كمل سادس شهــر
عمــرك يغالــــي
مـــرالك الصيــف أبضـمّه نــــار أبدليـــك يضرمــــه
ذبّــل دَلاَلــــي
مَـرْ الخــريف أعلى المهد من غصنه أحس گلبي انفگد
عذبلي حالـــــي
مــرالك الطــف مـن وكت دمـــع الجفــن خــــلاه يكت
طول الليالــــي
يبني مـــا حسّبــتْ لحظه عنّـــي غِبــــت
مو سهل هذا السده بيك مــــا مــــر النده
رايـــح ومــا تــــرد

*


غصنك زغير ومــا فتــح يــا وسفه بالنبله أنذبــح
وتبدّه لــونـه
احمــر مثل لــون الفجـر وتشابهـه نفـس العــمـر
لكن جفونه
يالوجنتك خيط الشمس چنت احلم أبحنّه وعرس
بـس فارگوّنه
طولك مثل نسمة هوه يالشوفتك چنها الضوه
أمـــك حنونه
يبني حضني بـُــرد شعندي غيرك بعـــد
لنظـــرتك متعـــوده بيك مـــا مــــر النده

نَورس عيوني أتشاهدك بالمهــد انظــرلـك مَلك
منْ أيــدي طايــر
بعيوني أشوفـــك تبتعد يلچمني گلبي من اصد
حلوه المناحـــر
نحرك ييمه شگد ترف لا نبله يحمـل لا نـزف
ظل گلبي حاير
بين العطش بين المهد يــوليد دلالــي أنمـــرد
چن جمره صاير
يبني بعدك طفل شعندك وي النبل
ترتوي مِــنْ العده بيك مـــا مــــر النده

مــو هسه وكتــك تبتعد عمرك مثل عمــر الــورد
وبلهفـه أتانـــي
تكبر وگــول ابنــي كبــر يوافيني عن ذاك السهــر
وصبري وحناني
أنظـر ورد خــدّك ذبـــل بنيرانــه دلالـــي اشتعــل
يبني وچوانـــي
عبدالله يبنـي امـــروتك صعبه من افارگ صورتك
أسهر وأعــــاني
يبني شحمّل بعـــد أسهـر بـــلا ولــد
يطول ليــل الفاكده بيك ما مـــر النده

منين أجيب آنه الصبر اسم الله مـــو مالت گبر
طولك أشــــوفه
روحي بيـــك امعلگه يــا نفــس مـــا افـــارگه
صعبه من اعوفه
دلالي منك مـــا روه يجرحني لــو مر الهوه
وشلون اروفه
بالدمعه مهدك أنظره يوليــدي أظــل متحيره
بل الدمعه اطوفه
يبني تالي العمر يضمني كون الگبر
ومنحرك ما أشاهده بيك ما مر النده
ــــــــــــــــــــ موسى البديري ــــــــــــــــــــ

https://tttttt.me/ssgadAl

لمولاي عبد الله الرضيع


ياولداه عبدالله
راسك محمولاً بالحبلِ وعلى دمُك اللُه يصلي
ياولـــداه


ياسيد المـاء لمــا تسقيك انهار الدما دون الفـراتِ
كنت بحجري تلعبُ كنـت تناغي زينبُ كنت حيـاتي

ياتاًئها في كربـــــلاء

ابكيت لاهوت السماء

قل لي لما هذا الجفاء

تريدُ مـاءً ام هــــــواء

مــع ابـوك فقتلــــوك
وقِماطك احمرُ ياطفلي وعلى دمَُك اللُه يصلي
ياولـــــــده
ـــــــــــــــــــــــــــــــــــــــــــــــــــــــــ
رأسكَ بالحبلِ ولم يحمل في رمُحِ الألم مــع الرؤوسِ
الرمحُ منكَ خاشعُ وقلبُـك المــقطــــعُ ابكى النفوسِ

هذي دمـاك تنـــزفُ

أم ذي دموعي تُذرفُ
ُ
وكربـلاء والنجــــفُ
ُ
جاءت اليك تزحــفُ

والشفتيـن يابستين
وصغير تختـارُ القتــلِ وعلى دمُك اللُه يصلي
ياولـــــــده
ـــــــــــــــــــــــــــــــــــــــــــــــــــــــــ
جـــاءت اليك تلطمُ حناء عرِسُ القاسمُ والحورُ تدمع
والاكبرُ من ذي عدن جاء بكأس من لبن يدعوك ترضع

وعمُك العباسُ قـد

ناغاكَ والكونُ ارتعد

ينعاكَ مطبور العمد

مهرولًا نحو المهد

ياعمـاه اهٌ اه
حرملةٌ قـــد شتت شملي وعلى دمُك اللِه يصلي
ياولـــــــده
ـــــــــــــــــــــــــــــــــــــــــــــــــــــــــ
جاء الحسينُ واقترب عليه اثارُ التعـب ايا عــــزاءِ
قلتُ لهُ ياسيــــــدي هل انَ هذا ولدي تحت الرداءِ

فقـــال ياربــابــــه

خِذيه في خِضابــه

صارَ الدماء شـرابه

فأبكي على مصابه

لمــا رأوهُ لم يرحمـوه
والتفو جميعاً من حولي وعلى دمُك اللهُ يصلي
ياولـــــــده
ـــــــــــــــــــــــــــــــــــــــــــــــــــــــــ
أراك لاكنَ القدر خط مسافات السفر والموت فرّق
مابين أمٌ وولـــد وبين حظنٍ ومــهــد نحــرٌ تمــزق

أسيرةٌٌ فــــي غربتي

حزت يدي سلسلتي

ابكيتُ حتى ناقتــي

يارحلًا عــــن دنيتي

حضني يتيم قلبي حطيم
خائفةٌ حتى من ظلي وعلى دمُك اللهُ يصلي
ياولـــــــده
ـــــــــــــــــــــــــــــــــــــــــــــــــــــــــ
ياقصــةٌ لاتختــــم فالسهمُ قد صار قلم والحبرُ احمر
والنحرُ قرطاسٌ لها يكتب في اهوالِهـــا اللُه اكبـــــر

قم سيدي يابنَ الحسن

واثأر لمن ابكي الزمــن

طفــلًا صغيـــراً ضامئـا
ً
ابكى السمـــواتِ معــاً

فوقَ الرمال ذاكَ الهــلال
بين الحـرِ وبين الخيــلِ وعلى دمُك اللُه يصلي
ياولـــــــده



★يرجى مراعات الحركات لكي يتم القراءه بشكل الصحيح


#العبدالحسيني_محمدالجماسي

https://tttttt.me/ssgadAl

.....
عبدالله الرضيع
.....

ابني يالولد ابني
شمسك تختفي بحضني
عبدالله نكطع ضني
ابني ابني
....

عبدالله يبني يالطفل ياحلم روحي الغالي
مهدك بهز بيه الهو ما ادري مهدك خالي
ابالي كلشي بكربله موتك ولا مر بالي
ناغالك الموت ورحت ماجلبت بذيالي

....
نوحي للابد نوحي
لجلك يابعد روحي
مايخلص الك وني
ابني ابني
......

شذنبك ييمه وتنذبح والنبله تنزع روحك
انت الورد من تنجرح ينزل نده من جروحك
ياقوس هذا الصوبك بجفوف ابوك يلوحك
مثل الحمامه رامحت ماسمع واحد نوحك

....

دمعي عالوجن دمعي
بعدك يختلف وضعي
بعدك ماضحك سني

ابني ابني
.....

بجفوف ابوك من رجعت رد حاملك يتعثر
كل ضني جابك مرتوي وتضحكلي جنت اتصور
فرحانه اجيبك الخيم مونبله فوك المنحر
يازغر اولاد السبط عمرك بعمر الكوثر

....
ردلي يالولد ردلي
بعيونك علي صدلي
ظهري من الهظم محني

ابني ابني

......

ابالي تخلص كربله ونرجع سوه من الرحله
تكبر مثل كل الولد وبعيني اكثر تحله
ياغله من كل. العمر ياهو المنك اغله
لولتلك النبله ونمت نبرتها خشنه النبله

ابجي والتفت ابجي
وي الموت اريد احجي
هاليوم الدمع فني

ابني ابني

.....

يامهجتي وماي النظر لمهدك الولي شبيه
عبدالله وحجيلك نعي وادري انت مالك جيه
زينب بجتلك يالطفل يقهر بجي العلويه
امك انه وباجر اضن امشي مشي المسبيه

خيمه تحترك خيمه
يراويني السبي ضيمه
اتركك مدري تتركني

ابني ابني

.....
الشاعر علي السعيدي

https://tttttt.me/ssgadAl

..

عبدالله الرضيع عليه السلام
....
عبدالله لدكعونه توهن طبكها جفونه
اسم الله عليه اوليدي ضامي وتغير لونه
....
هايعبدالله الطفل شو ماغفيت
هواي بعيونك حجي
كمت احس عطاب ماي ستورحيت
وشفت بشفافك بجي
ماي رايد ضامي حكك مارويت
لوبصبرك مكتفي


لحسين درت عيونك عيونك تحاجي عيونه
....
انته والنبله صرختو ماكو ماي
ثنينكم مامرتوين
ولان هيه بعمرك وماعدها راي
بيك ضلت تستعين
انت ماتمشي صحت الها تعاي
شربي من دم والتين

كلبك برد يالغالي وامك بجت محزونه

....
سال دمك صاعد بهيئه ملاك
رفرف بجنه عليك
ولسمه السبعه عرج موكب دماك
وانت تتراجف اديك
بجف لحسين ثكلت ارحم اباك
ورتجل للخيمه بيك

لزينب حمل جثمانك. وحتاج ابوك العونه

.....
كماطك الابيض ارجع احمر نشوف
موفرح يبني ذبحوك
يمك ادنت رقيه وكضها وخوف
بنحرك النبله تحوك
جان ذنبك بالعطش غرفة جفوف
مرتوي الدم رجعوك

جلب الغيم بروحك وانت اعرفة مضمونه

.....
الشاعر علي السعيدي

https://tttttt.me/ssgadAl

عن لسان ام الرضيع

عبد الله ماي عيوني من شوفتك حرموني
علصار مابطل النوح يوليدي شفتك مذبوح
من ضحكتك حرموني

******************

من يمي يبني للسهم بيدي رحت وديتك
ماشوفّتهم حالتك لوادري ماراويتك
وماطلعيتك يلولد وبمهدك امخليتك
من الماي تشرب كيفت ياماي انا البديتك

فكري انشده يلغالي بس الله يدري ابحالي
وياروح مثلي ياروح يوليدي شفتك مذبوح
من ضحكتك حرموني


*****************


ياريت صارت خيمتي مثل السمه عن الارض
وبيك ابعدت ريت ورحت واليعترض خل يعترض
ولارحت عني يلولد شريان كلبي والنبض
ياكربله يومج صعب حتى الطفل ماينحفظ
فراكك هظم راواني امتيهه الفكر خلاني
راح الفكر مني يروح يوليدي شفتك مذبوح
من ضحكتك حرموني

************

من الدنيا هاذي حصتي بس البواجي والدمع
شلون من ايدي رحت بلي جره شلون اقتنع
للماي ودوه الطفل لاماي لاسالم رجع
الحالي ماحن العدو وحته الجبل حن ونصدع
طال السهر بجفوني هلنوح غير لوني
شلون يمه ما انوح يوليدي شفتك مذبوح
من ضحكتك حرموني


*****************

يحسين كلبك علطفل هم مثلي نيرا ن وجمر
يكولون كلب الوالده من الابو اكثر كسر
جنك يبوالاكبر زدت حسره على حسراتي وقهر
قربان قدمت الطفل يستاهل الباري الشكر
عبد الله ذايب كلبي اذكر دلالي وتعبي
وعليك دمع المسفوح يوليدي شفتك مذبوح
من ضحكتك حرموني


****************


ينصاب نحره بالسهم متواعد ابجف حرمله
مثل الحسين وجمعته متواعدين ابكربله
غاب على غفله ياوسف ياكمر بعده باوله
جم شهر عمره بالسنه سابع شهر ماكمله
باجر تسير ضعوني الدرب السبي ايودوني
علكاع تبقه مطروح يوليدي شفتك مذبوح
من ضحكتك حرموني


الشاعر حسن لعيبي الحريشاوي

https://tttttt.me/ssgadAl

عن عبد الله الرضيع



طفل عمره اجم شهر حسين من قدم كمر
طلب من يسكي الطفل حضروا سهم ونبل
ابسهم صابوه بنحر
حسين من قدم كمر

**********

راد للعالم يبين شنهو معدن هلالوف
مهجته قدمها الهم شاله مابين الجفوف
شنهو ذنب الطفل كلهم بالعطش يجني الحتوف
تحركت بعض المشاعر والمواقف كلها خوف
ذاكه اشذنبه يكول وهذا اليدور حلول
حرمله بغيض استعر
حسين من قدم كمر
ع
*************

راد ابو اليمه يبين وين حدهم بالظلم
اليامدى انسانيه عدهم وعلى يامله الخصم
كال من قدم رضيعه من العطش يشكي الالم
ترجموا بالطف نفسهم ترجموا كلشي ابسهم
عن نفسهم عبروا ولالحضة اتاخروا
قدموا سهم الكدر
حسين من قدم كمر

******************

بالرضيع حسين بين صوره مخفية شكل
همه نفس البلسقيفة وجانوا بيوم الجمل
يعني عدهم قابليه ابسهم يرمون الطفل
وكشف للعالم حقيقة وي الزمن صورة تضل
هذا خط اهل الضلال يوم يتغير محال
قدموا للشر صور
حسين من قدم كمر

*************

راد للعالم يوضح هذا درب اهل الشرف
تضحيات بلاحدود شماجره دم ونزف
بيت بيه انرفع اسمه الباري وبيه انعرف
بيت عن الناس كلها ناسه واهله تختلف
الهلسبب باقي الحقد الباقي ضدهم للابد
تحينوا فرصة غدر
حسين من قدم كمر


*******************

حرمله اتقدم ابسهمه بغضب ينظر للرضيع
حسم هذا الامر كله وبرز من دون الجميع
صوبه ابنحره وعافه اتلوع ابسهمه صريع
حسين ضل بالم ينظر موقف الشر الفظيع
صدر مضمون الطبع ينتهي الهذا الوضع
توقع بهذا الامر
حسين من قدم كمر


الشاعر حسن لعيبي الحريشاوي

https://tttttt.me/ssgadAl

◼️ برنامج محرم 1441هـ / 2019م ◼️
#محرم_1441هـ #2019م
🔺 نعي اليوم التاسع 🔺
❇️ عبد الله الرضيع ❇️

نعي للرضيع
ــــــــــــــــــ

يدر مني حليبي من يمر ذكرك

عن امك دﮔلي شنهي اليصبرك

ردنه يطول اكثر يالولد عمرك

لنك بالسهم مذبوح من نحرك

ــــــــــــــــــ

تفاركهه الغريبه ليش يوليدي

ردتك شمعه يبني لو يمر عيدي

مو بيدي تركتك والله موبيدي

ياعيني على ابني من الدمع زيدي

................
وسفه الماي يبني ليش ماضـﮔته

بعد عبدالله عمري ريت ماعشته

جابه حسين ينحب كون ماشفته

شنهي الصار لبني حسين ناشدته

ـــــــــــــــــ

صاحت بالسهم وي ابني صوبوني

عدله خلاف عينه لاتخلوني

عبدالله اريدك هدلت متوني

امك انه امك ياضوه عيوني

ــــــــــــــــــــــ
سيد علي المدني

https://tttttt.me/ssgadAl

نعي للرضيع
………………… ..…
احلفك بالله ياليل المصيبه
عطشان الولد واسمع نحيبه
كل ساعه التمر ويدر حليبه
مذبوح بسهم گلي شيجيبه

**
اقسملك قسم عبد الله اشوفه
چنّه يصيحلي وتنده چفوفه
لا اگدر اشيله ولا اعوفه
اناغيله گمت وبهيده اطوفه

**
يحاچيني المهد واسمع ونينه
يگول ابنچ تعالي تگمّطينه
يعاتب بالنظر وتنوح عينه
يمّه ابنچ ذبيح وما تجينه

**
اگله يا مـهد هـم فاگـد انتـه
عبد الله الولـد دومك حضـنته
الليل ويه الرضيع اشگد سهرته
شبگني ويبچي وآني هم شبگته

**
الليل مظلم والمسافه شگد بعيده
شلون اوصل استحي اطلع وحيده
الزم اطراف المهد چن الزم ايده
هناك طايح يامهد طفل التريده

**
فلت من چفي المهد صحت ارجع ارجع
گال ما اصبر بعد خل نمشي اسرع
وصل گبلي على الطّفل والونّه اسمع
يالربـاب ابنـچ ذبـيح شلـون يرضـع



سيد علي المدني

https://tttttt.me/ssgadAl

( نعي عن عبد الله الرضيع )
-----------------------


يوجه العافيه ويلروح چنك
انا الربيت اريد رباي منك

يعمر الضحكه تدري شگد گصيره
يحيره البيه ما تشبهه حيره
زغير وهالطفوف شگد چبيره
هذا ابني يدنيا شعندي غيره

ست شهور عمره ابتعد يا موت
الهوى يمر اعلى ابني يشمه ويفوف
العطش ذبل وليدي وگاطع الصوت

عبد الله ييمه انخطف لونك
حاچيني يعمري افتح عيونك

بس انت وابوك ودمعتي هناه
ماتو كل هلك گوم امشي وياه
الحسين بلا معين ألتمو اعداه

عوف العطش شوف حسين يمه
وحده ابينهم يا كبر همه
روح ومن يشمك هم تشمه
بس انتم ضوى والناس ظلمه

وداع يصير وادري بهذا الوداع
اخذكم مني ليش ؟ شلون ؟ شبساع
النور اعلى الارض يندفن بالگاع

آه يحسين هذا وليدك وشوف
الوجه يشبه محمد ليش مخطوف
البرائه البلطفل مو مالت سيوف
نزرع بالورد وتگطعه الچفوف

اخذه وادري ما يرجع عليه
يريت البيك يمه يصير بيه
اجتنه منين اجتنه الغاضريه


هيهاات يرجع عليه الراح هيهات
ها مات يحسين گلي الولد ها مات


ردلي السهم نابت بنحره
الله واكبر دمه حدره
يحسين انته بحالي ادره
هذا الطفوف وهاذ شره

اطيني ابني وخلي احاچيه
وامسح دموعه بحظني اخليه

هلبت يفتح عيونه ليه
ويشوف حالي وهاي هيه
ميت ييمه شلون بيه
باچر ترى امك سبيه

لخادم الحسين :: رعد الفريجي
1440للهجره :: 2018 ميلادي

https://tttttt.me/ssgadAl

نعي عبدالله الرضيع
عاالناكه من بعيد الوليك
مجبوره راح امشي واخليك
ليه التفت امك وحاجيك
يابعد عيني اشبيك مابيك
اتمنيت ليك انزل واغطيك
وكابلك مكبل وناغيك
***
والشوفتك عطشانه عيناي
حادي الظعن مايمشي بهداي
هل الشيبت من ضيم دنياي
ضل المهد ماخذته وياي

الكلب زيدت همه ماهونته
ون ونه ثكيله ماهونته
اصد مهدك واشوفك ماهونته
اهز والمهد فارغ يرد ليه

سعدالعبودي

--

https://tttttt.me/ssgadAl

نعي لعبد الله الرضيع (عليه السلام)

بعمر ست شهور كل اوليد يبني
يبدي يطلع صوته ومناغاته لمه
وانه كل يوم احمد الله من اشوفن بيك ضحكه
ضحكتك وياهه شهكه
ومن تشاهد والدك مجبل علينه ترفع انته اثنين اديك
جنك تكله اخذني ... بويه ضمني .... لصدرك الكله حنان
ومن يشيلك ... مره من خدك يبوسك . مره من نحرك يشمك
ينسه كل تعبه اذا شافك ييمه
لان من اولاده بس انته رضيع
ومدري جم مره غفيت انته اعله صدره
ومن تنام بهيده يمشي ...بمهدك يخليك غافي
منه اسمع صوت دافي .. نام والنومه عوافي
يوصي سكنه ويرقيه ... يمه ظلن خاف يكعد
ولو كعد بويه يكلهن
وحده خلهه تناغي وتهز بالمهد . اووحده خلهه تصيح امه تكلهه عبد الله كعد
هيج يايمه الك جان اهتمام
وتالي دنيانه خذتنه وياك لرض الغاضريه
وشح علينه الماي يمه بثلث تيام الضمه
وحتى صدري اعليك شح من اللبن
وانته تتفرفح كمت مابين اديه
صحت يامولاتي زينب .. زينب ... زينب ...الطفل خاف يموت وين حسين ابونه
ردت بس جف ماي ويبلل لسانه
وين ابو فاضل مشه بجود العطاشه
بلجن يرد مايكصر والله حاشا
اجه ابوك وشافك مسبل اديك
فوك ضيمه وفكد خوانه بجه هوايه عليك
ومن خذاك ... مدري شنهي بكلبي يحجي .. يكلي راح يكلي راح
ومن مشيتو . عله باب الخيمه ظلت عيني
وكلت هسه يشرب الماي ويجيني
ولن اجانه حسين لاجن محني ظهره . وانظر هدومك ابين جفوفه حمره
ماكلت ميت كلت مجروح ابني ... اسم الله يمه..اسم الله يمه. ..احجي يمه .. ليش ساكت
وطابك جفونك المتروسه دمع .وخدك المصبوغ من طشار دمك
بالمهد خليتك ولا جاوبتني .بحضني خليتك اريدك تحجي يبني
تالي منك ايست ... بهمي وبدمعه صحت ..مات عبد الله يسكنه ... مات عبد الله رقيه


.........

نسألكم الدعاء
حسين صادق العقابي

https://tttttt.me/ssgadAl

عن لسان ام الرضيع

شلون يلمذبوح يمه والنفس منه انكطع
نزل دمعي فوك خدك خاف يجويك الدمع
ياحصاد الماجنيته وياعمر مثل الشمع
شفافك الحلوه حسافه كطرة المي تنمنع
شلون ياطبع المحنه بنحرك السهم انطبع
بعيني ردتك يمه تكبر تلعب وعدك ربع
ياذنب سويته يمه وجاروا عليك الفزع
جابك ابدمك امغسل بيك ابو اليمه رجع
حسين رد مكسور ظهره وبيك كلبي منفجع
راي ماظل يعبد الله وبالكلب ميّة صدع

الشاعر حسن لعيبي الحريشاوي

https://tttttt.me/ssgadAl

ابو ذيات على لسان الرباب ام الرضيع

عطيتي والدهر وياي منهه
لخلي بكيفه گلبي ينوح منهه
شفت صورة اليشيب الراس منهه
رضيع وسالت ادمومه علية


رضيع ولاله واحد يرعبنه
انذبح والخوف هسه يرعبنه
الشمر عكب الكفلنه يرعبنه
وترك نيشان بسكينه ورقية


يزنيب صار طف الكم وطفلاي
وراح الصبر من عندي وطفلاي
صحت عبد الله يمه ارضع وطفلاي
ناري البلكب ضلت سريه

✍الشاعر رعد الجريخي✍

https://tttttt.me/ssgadAl

ابوذيات عبد الله الرضيع(ع)

شلون الوالده الفكدت....ولدهه
عليه اشجره من امره...ولدهه
سهم البين رجعهــــه....ولدهه
بسهم فركاه فتت جبد بيه
تصيح بصوت ياعالم....ونبني
الدهر لابيـــت خلالي ...ونبني
يريد اميه من عنـــدي...ونبني
شرب ماي النحر بسهم المنيه
خادم اهل البيت
ابو علي السعيدي

وحك عباس والرايه..وجوده
وبالطف ليش مايبقى..وجوده
لاأن بيه الكرم خصله..وجوده
وفه العباس ميزان البريه

بعد ايام خل نسمع..طبلها
الحرب ونشوف ابو فاضل..طبلها
العليل وعلته براسه..طلبها
بسيف الحيد ابن حامي الحميه

بحب حسين من عشنه..وعينه
وحك جف البطل احلف ..وعينه
لون يطلع ولي امري..وعينه
واصير وياه جندي عل ال اميه

بعد ميفد شكوانه..ولا ماي
شفت جفينه بتروه..ولا ماي
زادت خويه احزاني..ولاماي
عفى عالماي خويه عود اليه


بدموع العين حتى الراس...حنيت
ومثل حن الفصيل اعليك...حنيت
راسي والظهــــر ياخوي...حنيت
من شفت الشمر يتشفه بيه

دمعتي بحزن من نزلت.. وسالت
جثير التنشد وكالت ..وسالت
ردت بس كون الهيه..وسالت
حرت شختار سلوه انه لرقيه


ايام المالون صبري ..لوني
بجفاك اصبح صدى بروحي..لوني
عليك اتحمل الاصعب..لوني
ولا اشوف الدعي وابن الدعيه

كظيت العمر عالخوان..بسهام
يوم الشفت شمر الخنه..بسهام
عليه وسدد المحتوم..بسهام
بجبد حسين من ذيج المسيه

الالم ياخوي يعصرني..وسكنه
وعليكم تنشد رقيه..وسكنه
تمنيت اللحد ينطر ..وسكنه
ولا اشوفنه دموع تهل رقيه

بقضيت حسين للمذهب..خلصنه
رغم جور الظلم بينه..خلصنه
متى ياصاحب الغيبه..خلصنه
من ظلم الكفر والجور اليه

كلب زينب على العباس..ينطر
وبقى طول العمر بي اه..ينطر
متى ياليل ياتي الامر..ينطر
ونشوف الصاحب بذيج المسيه

وحك اللي كفل زينب..ويده
يفوز اللي ذكر زينب..ويده
لون مره ارفعت زينب..ويده
جان ايصير رج الكون اليه

خادم اهل البيت
ابو علي السعيدي

https://tttttt.me/ssgadAl

ابوذيات الرضيع ع
.........
نشف ريج السهم منك ونبله
وبلائك هـشم ضلوعي ونبله
عجـب مذبوح يوليدي ونبله
شربت ادموم وترفرف بديه
..........
عمت عين العطش ابني سرابي
صرت اشرب ورضعـنه سرابي
الـسهم لمن شبك نحـره سرابي
شربت الماي يمه من الزجيه
........
حياتي من بعـد فكدك مردها
سهم روحـك يعبد الله مردها
وجثتـك للخيم عـودك مردها
أموت وياك لو ترجع عليه
........
الدهر الأحزان بيها مايبنها
وحيـدة تريد تروي مايبنها
تعـاني شكـثر تانت مايبنها
اه يوليدي كون تعود إليه
........
اليجـيلك خايب انته ما ترده
عجب صوتي يخويه ما ترده
وأصيح الشمر كرب ماترده
وكـبالك تـشـوفه يعـيل بيه
.........
عـلى الـتـربان يـالـنايم مهنه
انه وياي الحزن صاير مهنه
وأدور عـن بناتـك شو مهنه
فـرن بالبـراري شلـون بيه
..........
عباتي الريح بألطف ما يهزها
وعودي الجربه بيده ما يهزها
كفيلي الراية وكفت ما يهزها
لان طاحن جفوفه عله ألوطيه
........
سهام حسين شي صدره وشكفاه
صعب سوط الشمر صده وشكفاه
صحـت وينه كمر هـاشم وشكفاه
ويحـط رأسه حـدر جـدمج رقيه
…..
يتامه من العطش ذبل وردهم
ومن ماي العذب محد وردهم
أريد أوصل لبو فاضل وردهم
اجيب وياي من عنده الوصيه
............
الشمر نـار بخـيم زينب وياها
ولا واحـد مـن اخـوتهـا وياها
تصـيح هنا يبو الحـمله وياها
جواب عله المتن سوط الرزيه
.......
عـكس يفتر وكتها مو عدلها
شتضن ميت ابوها مو عدلها
تشوف اليوم راسه موعدلها
اجه وكت الوعد ماتت رقيه
......
ضلوع حسين خويه من جبرها
وكسر ذيج الخواطر من جبرها
ألمشت للشام زينب من جبرها
بقت بس بالحرم يهل ألحميه
.......
الشمر نار بكلب زينب وجاها
ولا عـباس ضـل يمهـا وجاها
تنـادي وين ابو الغيره وجاها
جواب عله النهر طايح رميه
.........
الشاعر
أياد الفرح التميمي

https://tttttt.me/ssgadAl

🏴مجموعة في رحاب الحسين🏴
⭕️برنامج محرم1441هـ/2019م⭕️
#قناة_الشعراء

◼️◾️▪️ اليوم التاسع ▪️◾️◼️
🔺 عبدالله الرضيع 🔺

💠 رابط القصائد الرضيع ⬇️ 💠
https://tttttt.me/ssgadAl/5514
••••••••••••••••••••••••••••••••••••••

💠 رابط النعي والأبوذيات الرضيع ⬇️ 💠
https://tttttt.me/ssgadAl/5546
••••••••••••••••••••••••••••••••••••••

◼️ برنامج محرم 1441هـ / 2019م ◼️
#محرم_1441هـ #2019م
🔺 قصائد ليلة العاشر 🔺