ليلة العاشر.. عبد الله الرضيع ع

يمه وينچ .. بطلت ماريد ماي
الهيمه ظلمه .. واني اخفن شوتعاي
تفزز الخيل .. يرهب الليل.. يرهب الليل .. شو تعاي..
………………………………
ماچنت اعرف ييمه .. وياچ شنهي الدنيه ظلمه
وهسه من حظنچ تركته .. چني بين الخيل اعمه

يمه شحچيلچ شسولف يالرباب
يموت حيلچ لو حچت اني المصاب
عگب حظنچ يمه حاظني التراب
واني حيل ازغير مو مالت عذاب

خيل اجتني .. وفززت گلبي الزغير
واني خايف .. عليچ بعيوني ادير
ودمعتي اتسيل .. يرهب الليل.. يرهب الليل .. شو تعاي..
………………………………
يمه الحترگة خيامه .. صعبه بالهيمه منامه
يمه يرهب ليله الطف .. واني اخافن من ظلامه

گومي رديني ييمه للخيام
الليل يرهب واني اخاف من الظلام
بغير حظنچ الي ما يحله المنام
بحظنچ الدافي احس اني بسلام

اه ييمه .. ريت لحضينچ اعود
الگاع تچوي .. والي ماضلت خدود
انچوت حيل .. يرهب الليل.. يرهب الليل .. شو تعاي..
………………………………
يمه وينچ وين رحتي .. حيل توجعني رگبتي
من حديد السهم مالي .. وتچوي من الحر نبلتي

بعيني اشوفن كربله مشتعله نار
وصار يايمه السهم ابنحري حار
يمه خبريني بخيمنه شنهي صار
ليش ترگض بالفله هاي الزغار

شصار يمه .. ليش محترگه الخيام
چا رقيه .. وين هالليله تنام
شافت الويل .. يرهب الليل.. يرهب الليل .. شو تعاي..
………………………………
يمه لحگي الخيل هجمت .. اخ.. يمه بصدري سحگت
زغار يمه ضلوعي كلش .. والحوافر بيه لعبت

يمه شمسوي واجت تسحگني خيل
زغير صدري يمه والحافر ثگيل
الحوافر لحم من جسمي تشيل
يمه لحگيلي بعد مابيه حيل

عليه لحگي .. ميت اني وماكو روح
شبيها هايه .. اترد علي گام وتروح
الحافر اثگيل .. يرهب الليل.. يرهب الليل .. شو تعاي..
………………………………
من ابوي حسين ليه .. درب سوت العوجيه
ودمنه يايمه ولحمنه .. شوفي اختلطن سويه

شوفي يمه اني وين وهوه وين
وگربتنه خيولهم ولد اللعين
سوه صار اضلوعي وضلوع الحسين
بصدر ابوي اسمع اكو يطلع ونين

حسين يمه .. اسمعه يگلي تعال
خوفي لتطب .. بويه بجروحك رمال
وما الك حيل .. يرهب الليل.. يرهب الليل .. شو تعاي..
………………………………
گمت ابوي حسين اسمعه .. يمه واسمع كسر ضلعه
هذا ابوي ايمدلي چفه .. وعني الحافر يدفعه

عليه يزحف يمه وتمنعه الجراح
صدره يمه اسهام متروس ورماح
وشفته فز ونهض لكن يمه طاح
للمخيم من شمر بالنار راح

حسين شفته .. گام يرفس بالتراب
يصيح زينب .. ديري بالچ عالحجاب
العدو يعيل .. يرهب الليل.. يرهب الليل .. شو تعاي..


الشاعر عقيل الحسناوي..

https://tttttt.me/ssgadAl

وكأني بالامام الحسين (ع) لما أخذ الرضيع ليطلب له الماء .. ورموه بسهم وهو بين يدي ابيه ..
تألم الامام لمقتل عبدالله الرضيع ..
كيف يرجعه الى أمه التي تنتظره بالخيمه ..
لايستطيع ان يسلمه الى امه وهو مذبوح من الوريد الى الوريد ..
نادى على اخته زينب وقال لها :


يالعقيله أخذي مني أوليدي
يالعقيله لايطيــح أمن ايدي
زينب شفتــه يـــرف من الالم
زينب هد حيلي ياخويه السهم
أخذي مني أوليدي

* * * * * *

يابعد أخوج أخذي الطفل ما أكدر أنطيـه لأم
آنــه أدري بيها تنتظر حتى الصدرها أتظم
ماتدري نبلة حرملـه من الحيــاة اتحرمـــه

بكفه ألم نحر الرضيع الدامي
خويــه وبكفــــه جميع آلآمي
طيــر مذبــوح ويرف جدامي
الله لاينطــي اللعين الرامي

كلي لأمه ترى وليـــدج ماروه
كلي لأمه أنحرم من شم الهوه

زينب ما أكــــدر أدخل للخيـــم
زينب هد حيلي ياخويه السهم
أخذي مني أوليدي

* * * * * *

عبدالله أخذيــه لأمــــه بس ركبتــــه غطيها
أمن تشوفها ماتحتمــل يختي وأخاف أعليها
تموت أمه ياخويه لأن كلش حنينـــه أدريها

خــاف تتلكـــاج لتخبريــــــها
أول أحجي أوياها أو صبريها
أنوب أبنها المنذبـــــح سلميها
ويمها أكعدي خويــه لتعوفيها

خويه حكها من كلبها ينجـــرح
خويه حكها وينه أو وين الذبح

زينب أخذي الرضيع الماسلـم
زينب هد حيلي ياخويه السهم
أخذي مني أوليدي

* * * * * *

مرعد دليلي هالسهــم بصوابـه صوب روحي
بيــه آنه جروح شكثر زاد أعلى كل أجروحي
ماروح لأمه أبهالوضع وأنتي أبدالـي روحــــي

خويه ألزمي ركبتـه وضمديها
وبلكت أنتي أمن الدمه تنشفيها
وحاولــي يابت علــــي تشديها
وحدر راســــه يمنتــــج خليها

خويه بالج راسه لا لا ينكطع
خويه بالج أمه لمن تنفجـع

زينب بعـده النحــر يتجاره دم
زينب هد حيلي ياخويه السهم
أخذي مني أوليدي

* * * * * *

أشكد مصايب شاهدت بس هالمصيبه أوحيده
سهم الغدر بس صوبه أمن كماطه طلّع أيده
بيده شبكنــي ويرتجي بلكت شبكتي أتفيده

آه من شفت السهـم ذبحـاها
ترفه كلش ركبته وكطعاها
يرفس برجليـه من صاباها
خويــه حتـى مهجتـي فتاها

شنهي ذنبي جنه يسألني الطفل
شنهي ذنبي بياذنب آنـــه أنقتل

زينب بصوابه أحس كلبي أنجسم
زينب هد حيلي ياخويـــــه السهم
أخذي مني أوليدي

* * * * * *

ماجنت أظنه يصوبـه بكلبي السهم حسبالي
وشصار بيه أتصوري من شفته مات أكبالي
أبني وبديـــه وينذبح خويه شيصير بحالي

فتح عينه وصد يخويه بعيني
وآنـه أفهمـه بدون ميحاجيني
جنــه كلـي حزنـك الياذينـــي
الحضن أمي فدوه ألك وديني

من نظرني شال أيـــده أومالي
من نظرني أنكسر كلبه الحالي

زينب بس عاين الحالي أفتهم
زينب هد حيلي ياخويه السهم
أخذي مني أوليدي

* * * * * *
سلام المشعل

https://tttttt.me/ssgadAl

الليلة العاشره

( القصيدة بحق الطفل الرضيع ع )


نحرك الدامي وكلبك الضامي
هيج اللامي يبني ا يبني


**************

دللول الولد يبني دللول
ذباحك هضم امك يمدللول
هسه انته الذبيح الساكن الجول
وذباحك ييمه يصول ويجول

عاريه جثتك عل رمل عفتك

ذابله شفتك يبني أ يبني

**************

ياهو بالمهد عكبك اهزبي
وياطفل الاشيله العندي اناغي
احسه يروح همي من احاجي
ينام بحضني بعدك منهو اخلي

طفت بعيوني شعمة اضنوني

بيك لوعوني يبني أ يبني


**************

يمه بأيد ترفه من يغسلوك
خافن من يغسلولك يلجموك
تبجي تريد امك ما يسمعوك
وحيد الكبر اظلم ليش دفنوك

كون دفنوني وياك خلوني

وما يردوني يبني أ يبني


**************

عليك العين جانت والله تربي
واشوفك تكبر اضويلي دربي
من تضحك ييمه يروح تعبي
وشكر بيك يبني الغالي ربي

امنياتي وياك ضاعت بلياك

البقى ذكراك يبني ا يبني


**************

اثاري بالهوى من حرك الباب
حسبالي اجيت بجيت الاحباب
علي ثاري الهوى والباب جذاب
وانه مصدگه زماني يرجع الغاب

وحدي خلاني دهري اذاني
صاح وجداني يبني ا يبني


**************

ياعمر الورد ياريحه الياس
اصبح من غيابك ابيض الراس
وين حسين يمه وين عباس
ظل البيت خالي بلايه حراس

منهو حامينه لو دنوا لينه

انه وسكينه يبني ا يبني


نسألكم الدعاء
علي حسين المياحي

https://tttttt.me/ssgadAl

انه ام الرضيع الماشرب ماي
بيام السبي بس مهدك وياي
اهزه وهوه خالي ،، ماينساك بالي
____
يوليدي المهد يوميه احاجي
اهز بليل مهدك وانته مابي
اتخيل اوليدي وانه الولي
واضل اضحك جذب وبدمعي اناغي

دللو الولد يبني دللو
عدوك نام يبني وانته بالجول


عكس تمشي اليالي ماينساك بالي
____
يوليدي المهد شيبني بجفاك
اذاني المهد والسهم اذاك
لون بالطف نسيته يمكن انساك
اشو مهدك اوياي وروحي وياك

حرت بين المخيم والسبي هواي
اشو ماجيت انته ومهدك اوياي

حال الظيم حالي ماينساك بالي
___
نار المهد بيه وتمشي وياي
عكس نار الخيم ماتنطفي بماي
لون ادري تسوي هيج دنياي
چاا يم العليله اضل يعيناي

جاا يم العيله هناك اخليك
ماادري السهم يبني يتانيك

ماجان اعلى بالي ماينساك بالي
_

من شالك حسين وصاح عطشان
الماعدهم رحم سووك نيشان
شمالك حرملة ما جنك انسان
عبدالله شني وصرتولة عدوان


صارت بيدكم ياحيف دنياي
وشحتو علينة بشربت الماي

عمت عين الليالي. . ما ينساك بالي



الشاعر كريم البطي

https://tttttt.me/ssgadAl

قصيده مقدمة مجلس في رثاء عبدالله الرضيع عليه السلام


يعبدالله دللّول
يعبدالله دللّول
*

دللّول الولد سيف ويحز نحري
رضيع ومنذبح شايلتك بحجري
بعد لا گولها ولا ضل عسن عمري
ولا شوف السهم ودمومك التجري
يعبدالله دللّول
يعبدالله دللّول
*

يبسن من ضماك اشفافك الحلوه
وگمت منّ العطش يوليدي تتلوّه
خذاك حسين يبني وگلبه يتچوّه
خذاك لناس لا رحمه ولمّروّه
يعبدالله دللّول
يعبدالله دللّول
*

بين چفوف ابوك حسين من شافوك
بسهم من حرمله يبني بحقد ذبحوك
رضيع بلا ذنب يوليدي ما رحموك
لان جدك علي تنزف دمه خلّوك
يعبدالله دللّول
يعبدالله دللّول
*

عساها انشلّت يمينه السفك دمك
رضيع وخضّب بدم رگبتك جسمك
امك آنه فجعوني يبعد امّك
مذهوله بمصابك ابچي وشتمّك
يعبدالله دللّول
يعبدالله دللّول
*

عجيبه شلون روحي ضلّت بجسمي
يعبدالله واشوفك منذبح يمّي
عسه السهم السفك دمك سفك دمي
متت يوليدي مات وياك كل حلمي
يعبدالله دللّول
يعبدالله دللّول
*

عفت امّك يعبدالله ومتت عنها
ضلّت للمناحه ورافگت ونها
چنت انت الحياة وهالرحت منها
تتمنّه الممات وخاب كل ظنها
يعبدالله دللّول
يعبدالله دللّول

سيد زيد الفحام
____________________________________

https://tttttt.me/ssgadAl

قصيده رئيسية في رثاء عبدالله الرضيع عليه السلام


بالمهد بعدك زغير يُمّه لو تروه شيصير.
منهو ينطيني تفسير. منهو ينطيني تفسير
*

يُمّه ياعبدالله مذهوله بمصابك
للخيم مذبوح بيده حسين جابك
مدري اطلع السهم مدري امسح خضابك
ما شربت الماي صار الدم شرابك
بياذنب حالتك هاي ماردت شي ردت ماي
تنذبح ذبحت الطير. منهو ينطيني تفسير
*

خالي مهدك يُمّه ياعبدالله خالي
يا دللّول البعد تنفع يغالي
ريت ميته ولاشفت حالك وحالي
تجرح بگلبي وتأذّيني الليالي
يُمّه بحضيني مذبوح. شلتك وذابت الروح
ميّت بلايه تقصير. منهو ينطيني تفسير
*

خل نگول الماي ممنوع عله الارجال
ليش منعوه عنك وعن باقي الاطفال
ليش يِرِموك بسهم مسموم چتّال
الله يلعن آل اميّه شلون انذال
حرمله شعنده ويّاك. بالسهم ويلي اذّاك
ما بقه براسي تفكير. منهو ينطيني تفسير
*

بين اديّه شلتك ومذبوح نحرك
وانت ستّشهور ياعبدالله عمرك
حرمله بسهمه خسف يوليدي بدرك
من العطش يبسن ييُمّه شفاف ثغرك
اخذتك منّي دنياي. ما رضت تكبر وياي
زغيّر وجرحك اچبير منهو ينطيني تفسير
*

سبب ذبحك آني يوليدي عرفته
ردت تنصر والدك يبني ونصرته
يطلب الناصر يعبدالله سمعته
انت لبّيت النداء وما تركته
يُمّه ياقُرّة العين. بالمهد تنصر حسين
بعينك لعودك تشير. منهو ينطيني تفسير
*

لا تظن تحله الحياة بلايه شمسك
يُمّه عبدالله اختنگ لوما ألمسك
شلون اعيش بدون ماشوفك وحسّك
ما عرفت شلون من دهري احرسك
عمري من بعدك جروح. يالعفت امّك تنوح
بسهمك وذبحك تحير. منهو ينطيني تفسير

سيد زيد الفحام
____________________________________

https://tttttt.me/ssgadAl

نزلة لعبدالله الرضيع عليه السلام

ضم الطفل ضمّه. لا تنفجع امّه
*

عبدالله مذبوح النحر ألمن بعد جبته
يبن امي فت گلبي الطفل بعيوني من شفته
بالخيمه ملهوفه وتون تنتظره والدتّه
كل لحظه تسأل عالطفل يبن امي رايدتّه
ريّض يبواليمّه لا تنفجع امّه
*

يبن امي من نحر الطفل طلع السهم طلعه
امّه الرباب بياوضع بفراگه منفجعه
لو شافت بنحره السهم ما تگدر تودعه
يمكن تموت من الالم لو عاينت وضعه
امسح اثر دمّه. لا تنفجع امّه
*

گاللها يختي الطاهره اخذي الطفل مني
هَد حيلي يختي بذبحته من رفرف بحضني
لمن گطع نحره السهم بچفوفه عانقني
عبدالله بچفوفي انذبح وبسرعه ودّعني
من حالته وسهمه. لا تنفجع امّه
*

سمعت رباب ام الطفل وتعنّت تشوفه
تصرخ يعبدالله وتحن مهضومه ملهوفه
شافت ابنها منذبح ومخضّبه چفوفه
ويلاه يبني صرخت ودمعتها مذروفه
لا ينطق بكلمه لا تنفجع امّه
*

شبگت ابنها والسهم متعلّگ بنحره
عبدالله يبني نادته ومختنّگه بالعبره
ميّت طفلها ما شرب من النهر گطره
ظلّت تون عله الطفل وتنادي ياحسره
من منحره تشمّه. لا تنفجع امّه
*

خلّت طفلها بالمهد والدم ترس مهده
مذبوح ابنها والجرح ما تگدر اتشدّه
يوليدي ياذيك السهم مذهوله وتنشده
شبگت طفلها وحضنته وتشمّه من خدّه
والدم صبغ جسمه. لا تنفجع امّه

سيد زيد الفحام
_________________________

https://tttttt.me/ssgadAl

بداية مجلس بحق سيدي الشهيد عبد الله الرضيع .ع

حرام حرام ..من يعطش يموت الورد
رضيع رضيع ..يشبگ سهم ما مستعد
~~~~~~~~~~~~~~~~~~
طير جنة و لاتنشدون شحلاته
گماطة ماخذ لون من گلبه وصفاته
تصور انت بگلب الحسين شغلاته
محضره باچر لو كبر يكفل خواته

يغير يغير ..مثل الگمر عمه ويهد
رضيع رضيع ..يشبگ سهم ما مستعد
~~~~~~~~~~~~~~~~~~
زهرة النرجس خجوله اگبال عطره
الفراشه تعشگه عدهه امن الله فطره
مو شهور و ينحسب..چم ورده عمره
بعمره هم سامع طفل قرٱن يقره

جميل جميل ..ومن الحمامه ينحسد
رضيع رضيع ..يشبگ سهم ما مستعد
~~~~~~~~~~~~~~~~~~
قحط شربة ماي سبع بحور يسوه
شكو ماي بهألارض لشفافه فدوه
ليش عبد الله بلا ماي ايتلوه
الماي ياخذ كون من حسين عطوه

عجيب عجيب ..هالموقف يطر الچبد
رضيع رضيع ..يشبگ سهم ما مستعد
~~~~~~~~~~~~~~~~~~
ابلايه احساس السهم قرٱن يذبح
كون لعابه بحضن عبد الله يصبح
لو فرح گلب الرباب هواي يفرح
تبچي ماي امن الفرح وبشفته ينضح

تشوف تشوف ..ينزل على گليبه البرد
رضيع رضيع ..يشبگ سهم ما مستعد
~~~~~~~~~~~~~~~~~~
ياحقوق انسان مذبوحه الطفوله
بيا شرع يادين هالموقف حصوله
سجلوا يمكم هالطفل سجل بطوله
وين موسوعة (غينيس) شنهو التگوله

يفيض يفيض ..من هالطفل نبع المجد
رضيع رضيع ..يشبگ سهم ما مستعد
~~~~~~~~~~~~~~~~~~
ان چان بالعالم احرار وعدهه رحمه
تعلن بحقه حداد وتكتب اسمه
طفل قدم من اجل الاصلاح دمه
هالطفل للعالم امن الباري نعمه

يصير يصير.. تمثال اله في كل بلد
رضيع رضيع ..يشبگ سهم ما مستعد
~~~~~~~~~~~~~~~~~~
خادمكم الشاعر وسام الغراوي

https://tttttt.me/ssgadAl

السلام على عبد الله الرضيع ( ع)
أشرت بيدي اعله راســك * شفت رمحــك مو قيــاسك
وينك اوين الرمح * وسفه حلمك ينذبح
************************************
روحي تميل وي الرمح يولـيدي لو مــــال
لكن اذا رمحك وكــــف تلكـــاني تمثـــــــال
ياريته راسي اعله الرمح مو راسك انشال
عبد الله اذا نحري انكطع ما عدي اشكــال
---------------------------------
اليوجعك شنهو شيألــمك * كلي وارحـــم كلب امك
هايبو الوجه السمح * وسفه حلمك ينذبح
*********************************
واني امشي يمه اتعثرت ومتيهه الراي
كلما يمس امــــــــك الـــم تتألـــم ويـــاي
يوليدي راسك بالشمس سويت اله فياي
عطشان اسيــرلك نهــر واتبده الك ماي
---------------------------------
بيدي اريدن يمه اشربـك * تــدري بيــــه شكد احبك
فكدك بكلبي جرح * وسفه حلمك ينذبح


كاروكك من انظـــر الــه يــا كرة العيـــن
بي ضحكه ميته من الحزن اه يبن الحسين
بكماطك اسال يالـــــولد عبد الله جا ويــن؟
جنت ابمصيبه وهالصرت يوليدي بثنيـــن
---------------------------------
فراكك ومــوتك سويــــه * ثنينهم صعبن عليـــه
غيابك لجرحي ملح * وسفه حلمك ينذبح
**************************************
اتصدق الــــروحــك عــلك يا يمــه ودمـــوع
يلــــي مــكانك بالــكلب لــــو جوه الضلــــوع
عشرتهن اشعل مــــن تـــرد لعيونك شمـــوع
كل ساعه يوليدي انوجع شنهي انته موجوع
-----------------------------------
انجـوي بنارك وذكــــرك * وركعتـــين اهديله نحــــرك
بصوتي اصيحك وانجرح * وسفه حلمك ينذبح





يل منك أيــغار الــــورد بنواعه واليـاس
رفعولي راسك عالــــرمح يارفعة الراس
بالضحكه اشوفنك تــرف واتنكط احساس
لكن اذا مره ازعلـــت حسبالــي عبـــاس
----------------------------------------
بالزعل تشبه الكافــل * راح اسميــــك ابوفــاضل
يبني مثلك ما يصح * وسفه حلمك ينذبح
********************************
لخادم الامام الحسين (ع)
حازم البزوني

https://tttttt.me/ssgadAl

الليلة العاشرة
ليلة الوداع وليلة عبد الله الرضيع ع



آهات .. هالليله ومواجعها چبيره
دمعات .. تكتب قصة الليله الأخيره
حيره وگلبي ذايب ...
بوداع الحبايب ..
………………………………………………………………………
آنه زينب بت علي وأمي الزچيه
بالدمع أكتبهه قصتي بهالمسيه
ليلة العاشر وداع المنّي بيه
المشتكى للباري من الغاضريه

أحزان .. عندي چم عزيز وراح أودعه
نيران .. سالت عالوجن دمعه اعله دمعه
منتظره المصايب ...
بوداع الحبايب ..
………………………………………………………………………
حسين اجاني الخيمتي وگلي يزينب
باچر انهار المصيبه اعليچ يصعب
دمي صار الآل أميه اليوم مطلب
گلبي ويا اليبقه بيكم لو تغرّب

أنصار .. باچر عالثره مصروعه كلهه
يندار .. دهري بكربله وكلمن وصلهه
أعرفهه النوايب ...
بوداع الحبايب ..
………………………………………………………………………
ينفجع گلبي وأشوفن وحشه ليلي
شلون والعباس أودعنه كفيلي
تعمه عيناي بغيابه ويهد حيلي
دمعي ما ينشف دمه يصبح مسيلي

عباس .. كفّالي ويهد حيلي برحيله
نوماس .. غيره ومرجله وروحه أصيله
باچر عني غايب ...
بوداع الحبايب ..
………………………………………………………………………
الليله اشوف الاكبر وعبد الله أشوفه
باجر ولله العلم ضيهم أعوفه
آه يا طف كربله شصارت ظروفه
جرحي يكبر بالگلب وشلون أروفه

يا ليل .. باچر چم ضوه يطفه بنهارك
والحيل .. يتهدم ولا أعرف قرارك
بس للحسره جايب ...
بوداع الحبايب ..
………………………………………………………………………
ويلي عالقاسم يهل دمع النواظر
شمعته تطفه وگلب رمله يكابر
الليله ملتم الشمل شيلمّه باچر
آه واويلاه من فجعة العاشر

ملچوم.. جرحي بحسبة الطف الطويله
مهموم.. گلبي وحسرتي كلش ثگيله
من دهر العجايب ...
بوداع الحبايب ..
………………………………………………………………………
گتله خويه حسين شيلمه شملكم
گلي باچر نار مستعره بخيمكم
أني اروح وتنصرع روحي گبلكم
وتبقه عين الله التباري وي ضعنكم

ويلاه .. گتله لا تخليني وحيده
والآه ... رسمت دمعته وحط إيدي بيده
اتذكرت الأطايب ...
بوداع الحبايب ..
………………………………………………………………………
اتذكرت أمي وأبويه بجفن دامع
تذكرتهم والگلب ينبض مواجع
يا صبح باچر عسن ما شوفه طالع
خلي أشبع شوف من أهلي وأباوع

واسهام .. يرميني الزمن نيشانه گلبي
للشام .. من بعد المصارع يصفه دربي
شيفيد امن اعاتب ...
بوداع الحبايب ..
………………………………………………………………………

خادم الحسين عليه السلام
عمار هليل الواسطي
محرم الحرام /

https://tttttt.me/ssgadAl

ليلة الوداع
1 قصيده بحق عبد الله الرضيع عليه السلام


قطره من دمك روت ارض وسمه
يمه ياعبد الله يالميت ضمه
 ..................

غمضت عينك يسباح الكلب
واني عميه عيوني ماشوف الدرب
دمعتي يايمه عالوجنه تصب
على مناغاتك ترانه امعلمه
..............

وردة اسنيني ويأ جمل كل ورد
بعدك ازغيّر ييمه اعله البعد
لاتضن كلبي برحيلك ينسعد
اهمومي فوك الراس كلهه مخيّمه
..............

اتزيد الهموم من اصدن للمهد
ومااشوفن طولك وحيلي ركد
انه ام وفاكده ضحكت ولد
ابيش اخّمد نار روحي المضرمه
................

طير جنه وانحرم من شوفتك
ياهو بعد امك ينشف دمعتك
ماتروح ابالي ضلت صورتك
شنسه منك وانه بسمك هايمه
...............

يمه يالب الكلب شنهي الحصل
الماي لشفاف البرائه ماوصل
من الضمه حيلك ودلالك ذبل
شلون بعدك انه اضل متنّعّمه
..............

در حليب امك تعال بهل حضن
انته مو مالت كبر لاتندفن
حاره الرمله واخاف اعله الوجن
جسمك احرورت الكاع اتهّدّمه
...............

ما اضلن يمه بغيابك تره
مايفيد الصبر روحي امرمره
يمه ياعبد الله ابقه محّيره
شذنبك وتتروه من نحرك دمه

محمد هادي العقابي

https://tttttt.me/ssgadAl

الك يمه***أعثر ابروحي واجيتك........................
الك يمه***بالمهد شو ما لگيتك..........................
جيتك ابدمعة نهر^^^^^^^
بعينه كاتبهه القدر^^^^^^
عبدالله يبني..عبدالله يبني
//////////////////////////////
من رحت للماي رواك السهم...
وامك أنه من رحت اغرف ألم...
من شليل الماي والمدمع رسم...
نارگلب أمك مثل نار الخيم...
وحترگ گلب السهر^^^^^^^^
بعينه كاتبهه القدر^^^^^^^^
عبدالله يبني..عبدالله يبني
/////////////////////////////
وعله الماي اسمك كتبته والجرف..
يعثر ابكل روجه صار اويعترف...
ليش عبدالله ابسهم هم ينعرف...
شنو ذنبه موشهم چان العرف ...
جده چيه فارس مظر^^^^^^^
بعينه كاتبهه القدر^^^^^^^^
عبدالله يبني..عبدالله يبني
//////////////////////////////
لمنياتك عالنهر اسمع انين...
وانه عشت الفاجعه ابصبر اليقين...
الماي ماردته ألك ادري انه زين...
ابرايك اياذن عطش گلب الحسين...
ورخصت لجله النحر^^^^^^^
بعينه كاتبهه القدر^^^^^^^
عبدالله يبني..عبدالله يبني
//////////////////////////////
من مشيت اوعفتك انه ابﻻخيال...
عفته يمك چفنه ذاري الرمال...
ظهر صوتي منكسر واصرخ تعال ...
دخنت عين الصبح من حملي مال...
ومطرة اعيوني صور^^^^^^^
بعينه كاتبهه القدر^^^^^^^
عبدالله يبني..عبدالله يبني
//////////////////////////////
يمه درب الشام عيشني ابعذاب...
شما اطيح ايگلي اسملله التراب...
چنه صوتك يمه ومشيبه المصاب...
ونگعت اجروحي ألم من الجواب...
ايحرسك الله امنالخطر^^^^^
بعينه كاتبهه القدر^^^^^^^
عبدالله يبني..عبدالله يبني
//////////////////////////////
خادم اهل البيت*ع*
ابوحسين السرگودي...
//////////////////////////////
#لك_الفداء_سيدي_اباعبدالله
#خدر_الفواطم_لنشر_القصائد_الحسينيه
https://tttttt.me/ssgadAl
________
لمن يجد صعوبة بالحن اطلبه من
@moatmed1

عبدالله بعيون الشرف راسم اراده::
ملفوف بگماطه أشعرف من الشهاده::
تفهم شنو ايمانك##
روح أقره قراءنك##
ملفوف بگماطه أشعرف من الشهاده::
////////////////////////////////////
مريم ابيوم المخاض اشعدهه همه...
ابدمعة العاش ابغربته امسة تكلمه...
هيه رحمة الله بس تحتاجه رحمه...
چف جذع من هزته وظل يحچي نعمه...
رطبآ جنيآ اتساقط عليهه^^^
رغم ماچان العسرتارس اديهه^^^
لتگلي برهانك##
روح اقراءنك##
ملفوف بگماطه اشعرف من الشهاده
////////////////////////////////////
أبيوم عاشر صفنت الدنيه العنيده...
حسين وحده والسيوف اتصيح اريده...
ابروح عبدالله المراجل مو جديده...
حسب ڪاروڪه جذع ويهزه بايده...
هزة الڪاروك عد عبدالله غليه^^^
گام يتصاقط رطب لونه المنايه^^^
وكحل فعل شانك##
روح اقره قراءنك##
ملفوف بگماطه اشعرف من الشهاده
////////////////////////////////////
چان باله أبسورة الفرقان سارح...
والنذير الروحه مادور مصالح...
أتبارك ابكلمة تبارك والتسامح...
ودع الخيمه ابكثر ماگلهه رايح...
والرباب ابروحهه اتلم ابوداعه^^^
وهوه متيقن صﻻة الحب جماعه^^^
حط علي ابأذانك##
روح اقره قراءنك##
ملفوف بگماطه اشعرف من الشهاده
////////////////////////////////////
أيردد ابقد افلحه وترعد نبرته...
المؤمنون ابصدره تكتب هم شرحته...
الموقف المابيه ظمير ايموت سكته...
خطوه ماعنده وترك خطوه الفزعته...
بلغ الدنيه وكتب هاي المواقف^^^
الگصه من تعرك ترى اتعيش المضايف^^^
وتفهم شنو اخوانك##
روح أقره قراءنك##
ملفوف بگماطه اشعرف من الشهاده
///////////////////////////////////
وعاش عبدالله طفل وگماطه رايه...
راسه فوگ الرمح ويباري السبايه...
سورة اﻻنسان وظحهه ابروايه...
الدين غيرة الله وتحزمه الهدايه...
اليلتفتله ابروحه يلگه احچايه خظره^^^
بقى عبدالله عدل ويعيش نصره^^^
عيش انت بنسانك##
روح اقره قراءنك##
ملفوف بگماطه اشعرف من الشهاده
////////////////////////////////////
خادم أهل البيت..ع..
أبوحسين السرگودي...
////////////////////////////////////

https://tttttt.me/ssgadAl

للطفل الرضيع..ع...

ماتت إبحلكي الدللول
يالي راسك فوكي مشيول
عايف أمك يا جرح
ونايم إبحضن الرمح
يمدلول
-------------------------؛
يمصلوب.. علرماح
تعال أشتم هوه
أحس. بيك..وأناديك
تجي ونكعد سوه
لتندار..الرمح حار
يمن نحره انجوه
ردت ماي. يعيناي
وطفه بعيني الضوه

شلك برمح المنيه
هذا حضني وهاي اديه
عجبه يا وجه الصبح
نايم ابحضن الرمح
يمدلول
--------------------------؛
عله النوك..وأصد فوك
وأحس طاحت سمه
قريناك .. إولكيناك
تفكر بالضمه
أتانيك .. وأناغيك
واكولن فاطمه
شنو إشصار.. يستار
رضيعي إشألمه

ليش ما تغمض عيونك
وأصفر ومنخطف لونك
وينك أوين الذبح
نايم إبحضن الرمح
يمدلول
-------------------------؛
الولد نام .. يظلام
وأخافن لا يفز
يملاح .. إلرماح
إبرماحك لا تهز
بلاصوت.. إبمشي الموت
يرمحه إلمرتكز
العطش صار..مثل نار
وعلي مي ما أعز

كافي يا نوك إشتونين
غافي فوكج وردة حسين
بطلي دمعج لا يسح
نايم إبحضن الرمح
يمدلول
--------------------------؛
يشيال .. إلهلال
حزينه قصتي
إلولد ذاك..وأنه ارجاك
تنزله الناكتي
والحسين.. يفك عين
إذا شم ريحتي
وبالاحساس..اهز راس
عزيزي وسلوتي

حتى لو ميت أرضعه
ذيجه فوك خدوده دمعه
ودمعه بيمن ينمسح
نايم إبحضن الرمح
يمدلول
-----------------------؛
تنزله .. ثواني
وإذا تكدر بعد
إعله إيدي.. تره النار
ولا خلت مهد
جنت دوم .. أباري
وأغطي لو برد
الدمع سال..الكلب كال
هله براس الولد

ياترف قاسي ذبحهم
وما يكفيلك رمحهم
وآنه أخافن تنجرح
نايم ابحضن الرمح
يمدلول
-----------------------؛
سلامات .. حرامات
يمعشوك الكلب
عله إرماح..أماشيك
يعبد الله صعب
تمنيت .. وترجيت
أموتن بالدرب
ولاشوف..عالخدود
دمع عينك يصب

إبلا سكف راح أكضي عمري
وعاشريتك وانته تدري
عشرة الزاد وملح
نايم إبحضن الرمح
يمدلول
-----------------------؛

قرأها الملا عمار الكناني
ش/علي الابراهيمي

https://tttttt.me/ssgadAl

عبد الله الرضيع ١٤٣٨
الحسين ع عندما حمل عبد الله ارد الخروج من الخيمه هنا الرباب نادت
.
.
.


يحسين بچفوفـك حـلو عبدالله چَـنّه ورده
من تاخْذه الباب الخيم خاف السهم يِگَعده
آه . رُگْـبته تَرفه الطفل
آه . والسهم مـا ينحمل
عبدالله چَـنّه ورده

----------------------------------

اوليدي عطشان .. چان يبچي وتـوّه غـمّض عينه شفته
اوليدي عطشان .. امن العِطش يحسين ذِبلت حتّه شفته

گلبي مـن يـبچي يگَــطْعْ انـياطه
شــــادّه روحــي عـَـلَـگ بگمـاطـه
النـظــر عـن لا يـنجـرح هالحاطه
ازغـيْر نحـره وما تـفيده اخياطه

اسم الله عليه منّ السهم ما يرهم اعله گدّه
لو صاب نحـره يـنـذبح وشلـون نحره اشدّه
آه . خايفه الجـسمه يـشِل
آه . والسـهـم مـا يـنـحـمل
عبدالله چَـنّه ورده

----------------------------------

اوليدي محلاه .. چَـنّه ورده امفتْحه وارتاح امن اشمّه
اوليدي محلاه .. اتـردلي روحي لـو على صدري اضمّه

روحي احسها ابهالطفل مشدوده
خـايْفـه امــن السهم يكـسر عوده
ثـغـري مـا لـحّـگ يـقَــبْــل اوروده
هِــنّه سـت بوسات فوگ اخـدوده

يـبـني دللـول الولــد والمهـد بـاچـر خــالي
من عنده خل اشبع نظر مادام هسّه اگبالي
آه . حقّه لو دمعي يهل
آه . والسهـم ما ينحمل
عبدالله چَـنّه ورده

----------------------------------

گلبي محتار .. جيـش امـيّه عالخيم لو قـرّر ايـصول
گلبي محتار .. خاف منّي ايطيح وايسِحْگنّه الخيول

الخيل من تهجم بيــوم العاشر
ويـن اضـم عــبدالله گـلّي باچر
لــو وگـع من عنـدي الله الـساتر
ازغـير صدره وما يرِحْمه الحافر

صدر الطفل ما يحتمل حافـر فـرس يِدوسه
اتحيّرِت ما بـيـن النحر والصدر ويـن ابوسه
آه . ينسحگ لا مو سهل
آه . والسـهم ما يـنحمل
عبدالله چَـنّه ورده

----------------------------------

خوفي ينصاب .. ابنحـره بس لا حـرمله ايصوّب حبـيبي
خوفي ينصاب .. صدري خاف ايلچمه من يرضع حليبي

مــن تـجـيـبه ورُكْبـته مـذبـوحـه
صدري خاف ايلچـمه منّ ايلوحه
خـوفـي مـنّ الألـم تـطـلـع روحـه
بلـكي من يرضع تِـهِـيد اجروحـه

يـحـسـيـن سَـنـتـيـن الطـفـل لــمَّـن تـفُـطْمـه امّـه
وعمْر ابني ست اشهر تره اشلون السهم يِفُطْمه
آه . صعبه ظامي يرتحل
آه . والسهـم ما يـنحـمل
عبدالله چَـنّه ورده

----------------------------------

ويـن اودّيـه .. ماكـو عـندي غـيـر بـس صدري افِـتْحه
ويـن اودّيـه .. ويـن اضمّه امن السهـم عـن لا يـذِبْـحه
راح اضمّه آنـه وسْـط اعيوني
حتى لــو صابه السهم يعموني
اخلافه شلّي بدنيتي ايخلوني
اوياه بنفس النبله خَيذبحوني

الوجـهه اذا ما شـاهدت للضوه شلون اندلّه
ابعبـدالله اشتـمّ الهوه وانتـهي ابلا عبدالله
آه . كُـون بـعـيـوني يـظــل
آه . والسـهــم ما يـنـحـمل
عبدالله چَـنّه ورده
----------------------------------
تمّت والحمد لله في ٣١ / ٧/ ٢٠١٦
حيدر تركي الكربلائي

https://tttttt.me/ssgadAl

ليلة عبد الله الرضيع
.
.
.

مـاشفـت مثلك طفــل .. يمـــه
هيـچ نـايـم عـالــرمـل .. يمـــه
اخــدودك ازغـــار والرمــل حـــــار
اوف اوف عبـــد الله يبنـــي

----------------------------------

يـالممـدد يــالمدمــــه نحـرك گمـت اشتمـــه
مــو دمعــات فوگـك طاحــن اعيونــي
يالحـالتك مــو سهلــه اطـول منـــك النبلـــه
انـــام ابصفــك وعنــك يـوخرونـــــي

اتلمستـك لأن مـاظـل .. يبنــي شــوف بالنــاظـــر
اشبـي صدرك يبعــد امك .. بس لا ساحگـه حافـر

گلبــي احســه محتــرگ .. يمـــه
وينـك او ويــن السحـگ .. يمـــه
بصـدرك اشصــار والرمــل حـــــار
اوف اوف عبـــد الله يبنـــي

----------------------------------

گلبـي يـالولـد عطــب المثلك صعبــه يتسلب
انتــه اشعنــدك وحتــه يسلبونـــــك
سلبــو بسمتــك منــي عگبـك تـايهـــا چنـــي
شمســوي يعبـــد الله ويـذبحـونـــــك

الگاع تلچمك ادريهـا .. السهـم چـي نـابت ابنحـرك
ارد افــرش الك روحي .. عــن لاتــنــلچــم حـدرك

صـــدگ ماتـسمعنــي اون .. يمـــه
شلـون غافـي ابلا حضــن .. يمـــه
گلبـــي محتـــار والرمــل حـــــار
اوف اوف عبـــد الله يبنـــي

----------------------------------

ياهــو الفاتـح اگمـاطك والدم كـل كتـر حـاطك
شفتـك مـن اجيـت لعطـــرك اشتمــــه
ياعبـــد الله البعثـمـــرك مــو عطر الدمه عطرك
اشســوت بيـك نبلــة حرملــه يمـــــه

المكــان البــي ابوسنـــك .. يبنـــي النبلــه تندلــــــه
ليـــش تريــد تحرمنـــي .. مــن عنــدك يعبــــد الله

يـبنــي اگعــد يــاتـرف .. يمـــه
بيتي احسه ابلا سگف .. يمـــه
گلبــي بـي نــــار والرمــل حـــــار
اوف اوف عبـــد الله يبنـــي

----------------------------------

يـالغالــي يـالمـــدلل كلمــا الزمـك اتبـلل
مـدري مـن دموعــي مـدري مـن دمـك
گبل اشويــه تدريني انـاغيـك وتنـاغينـي
اگـــعــد هـــاي امــك گـاعــــده يمــك

مـاي عيــونـي بديتــه .. بلكـت بـالدمـــع تـــروه
بس حرك رمش عينك .. عايش خل احس فدوه

امن البچـي ريجـي يبس .. يمــه
بــيــك مـابـاقــي نفـــس .. يمــه؟
يمتـــه تنــــدار والرمــل حـــــار
اوف اوف عبـــد الله يبنـــي

----------------------------------

ارحـم يبنــي دلالــي بسـك نـوم يالغـالــي
اگعــد يمـه هـاي النــوگ جـابوهـــا
بليـاك امشـي ما اگـدر يبني وهالصدر لو در
نـاري عليـك ديــره مـايطفـوهــــــا

عليك الصــار مـو هيـن .. يشهـد يـالولـد ربـــي
الخيمه ونارهـا الشبت .. ربــع من نـار البگلبـي

انــي كلســاع اشتعــل .. يمــه
وبالاخــص مـن انسـأل .. يمــه
وتــدري بـالنــار والرمــل حـــــار
اوف اوف عبـــد الله يبنـــي
----------------------------------
خــادم الحسيــن ع
حيــدر تركــي الكربلائـــي

https://tttttt.me/ssgadAl

لمولاي عبد الله الرضيع
،،،،،،،،،،،،،
نام نام حضن أمك يريدك حرام
نام نام فرشولك اجناح الحمام
ليلية انطر للصبح
أمك كبر بيها الجرح
وي كل نفس أتذكرك
يالتبلع ابريجك رمح
،،،،،،،،،،،،
يالماتممت سنتين گلي اشلون افطمنك
اسويلك شليلي افراش بس بالحسبة اگمطنك
العطش ما حملته الكبار چا گلي شخذ منك
يذابل مولحيت اشبيك يمه شلون اشمنك
راح راح حلم أمك اتضيعة الرماح
راح راح بكل هزة الوليلك نياح
يالنايم بجرحي تفز
هدّلت متنيني وهز
ما تقبل تنام شعجب
خليني الوليلك جرح
يالتبلع ابريجك رمح
..............
اغار من الهوى يمر بيك شو تالي السهم باسك
حرگو مهدك و زعلان چا يمته الحرگ جاسك
يالطولك سهم شتريد اگمط الرمح لو راسك
يا لتارس شليلي ورود تعال وكاسر انعاسك
صار صار وكت المسى ورأسك نهار
صار صار حضن الرمح مو للزغار
فوگ الرمح خافن غفه
بضلوعي كاروك صفة
غطيتك برمش الجفن
بس ما اشوفك منطرح
يالتبلع بريجك رمح
............
گطن واترف بعد مرتين ما يحمل سهم نحره
قروك بحضن ابوك حسين محسن فاطمة الزهرة
بعد للحرگ يوم احساب ولكسر الضلع فترة
يا عباس الزغيرون يا لكاسر ظهر ظهره
ماي ماي هاك أروي من هاي وهاي
ماي ماي بجف عمك اريدك جاي
يا شبه سبع الكنطرة
كاسرله ظهره وخاطرة
عظمين من ظهرة انكسر
كل عظم يستاهل ذبح
يالتبلع بريجك رمح
............
نذر يا يمه لو رديت اروح وامشي مشاية
لكل عاجر نذرت گماط وشد بكل مهد راية
النهر لو يستحي چا گام حدر جدمك ذبح ماية
من جوه عبات حسين شافك حرملة امراية
نور نور لون احمر ضُهر عاشور
نور نور فرشولك ضلع مكسور
ابعز الضهر شافك ضوه
كون الله لا ينطي الهوى
حرك عبايت والدك
وتباين النحرك صبح
يالتبلع بريجك رمح
........
عبد الله الرمح مترين انزل يمه احسلك
اشوفلك رمح مكسور گد شبرين ادورلك
أغوه يبني صار الليل يم راس الولي خلك
وي كل هزة بالكاروك الف موته اموتلك
هاك هاك اسم ألله الولد يبني شجاك
هاك هاك. يخنگ دليلي شم هواك
يابعد حيل أمك متت
من شفت راسك ملتفت
ما سمعك اوليدي شكلت
ذبلان وجهك يا سمح
يالتبلع ابريجك رمح
..........
كريم الدراجي

https://tttttt.me/ssgadAl

قصيدة بحق عبدالله الرضيع (ع)



يعبد الله ييمه وسلوة امالي
اهزن بالمهد بس المهد خالي
عفتني وگلبي مجروح
صدگ يايمه مذبوح
اهزن بالمهد بس المهد خالي


1

يبعد الروح يمه وسلوة العين
خذاك البين مني اشبيدي عالبين
ادور وين يالغالي رحت وين
من حضني ييمه الحضن الحسين

اعاين عالمهد واتصورك شمعه
ماترحمني يمه ارحم الدمعه
عفتها الامك تنوح
صدگ يايمه مذبوح
اهزن بالمهد بس المهد خالي


2

حبيبي انته ييمه وحلم دنياي
اخاف اتفز اهز المهد بهداي
تمنيتك ييمه تبقه وياي
ولاتنذبح وانته بعازة الماي

ماينفع بعد شيفيد كل صبري
يريت الله يبدل عمرك بعمري
عفتني بلحظه وتروح
صدگ يايمه مذبوح
اهزن بالمهد بس المهد خالي

3

اهز بالمهد واصرخ ياحبيبي
وينك يالولد مو در حليبي
ردت يالابن لايام شيبي
جاوب امك وارحم نحيبي

جاوبني ييمه وارحم بحالي
مو بس غالي انته لا وابن غالي
ابوس المهد مسموح
صدگ يايمه مذبوح
اهزن بالمهد بس المهد خالي

4

احچي وي المهد مذهوله چني
محد مارحمني ورحم وني
قريب انته ييمه وچنت مني
بس غضمت عيني ابعدت عني

اعاين عالمهد واتخيل ارسومـك
ومن كثر اشتياقي اشم بهدومك
انادي بدمع مسفوح
صدگ يايمه مذبوح
اهزن بالمهد بس المهد خالي

5

اعاين عالمهد وبروحي جمره
ابني ينذبح وازغير عمره
انادي واصرخ اني بألم عبره
لتدفنون ابني بروحي گبره

عبدالله اغسله بدمعت عيوني
واذا ابچي وانوحن لا تلوموني
تضل عالغبره مطروح
صدگ يايمه مذبوح
اهزن بالمهد بس المهد خالي


الشاعر السيد رياض الرسل الجابري

https://tttttt.me/ssgadAl

قصيدة بحق عبدالله الرضيع ع



أبني وسلوتي عبد الله لب أحشاي
من نحره سگـوه بالطف بدال المـاي

عليك اشكثـر انحب والدمع مسفــوح
ولا يبطل ييمه اعـلـيـك هــذا النــوح
شنو السويته يمه وبالنحـر مذبـــوح
طفل بعـدك يعـبد الله ونظـر عـيـنــاي

طفـل بعـدك يعـبـد الله واجـاك البـيــن
خذاك بساع مني ومن ابـــوك حسين
شسوي بعيني من بعدك يضي العين
اذا متـشــوف وجهـك ياحـلـم دنـيـاي

صدگ يايمه متـشـوفـك بعــد عـيـني
وحـال الـمـوت مابـيـنــك ومابـيـنــي
شلي بعمري وحياتي وشلي بسنيني
مدامك مابقيت وعـشـت انته ويـــاي

يظل گلبي الـيـون اعـليك شيصـبـره
يازهــرة شـبـابي وراحـت الـزهــره
راح ابقـه انــوح واسچـب العــبــره
لأن مـشبعـت بعـدك من لـذيذ اربـاي

اظـل انحـب عـلـيـك ولاتـظـن انساك
يسباح الگلب وبـروحي كون افــداك
ييمه من رحـت تــاخـذني كون ويـاك
عـفـتـني للهـضم والحـيـرتي وبلواي

عـفـتـني والـدمع دمعه بـأثـر دمـعــه
الولي بالمهــد خـالـي وعـليك انـعـــه
بعـد بيش انه اصبر روحي والوسعه
علي ضاگت يعـبد الله الأرض وسماي


الشاعر السيد رياض الرسل الجابري

https://tttttt.me/ssgadAl

قصيده بحق عبدالله الرضيع ع
كتبتها قبل قليل في لبنان



سهم المنيه بضربتك صابك وين
عبدالله يبني وحضنت صدر حسين

1

لمن اجتك نبلته المسمومه
انت وابوك اثنينكم بالحومه
ماحسبو امك تضل مالومه
ازغير ييمه وصوبك سهم البين

2

نحرك زغير وماحملته السهمك
دمك صعد للباري ينحب دمك
ماحسبو بيا حال بعدك امك
ما ادري ياييمه اجه الطف امنين

3

وياي لو باقي ييمه وياي
چان اعصرتلك عيني وانطيك الماي
معقوله ماشوفك يروحي ودنياي
لو اسكت اني گلي شيسكت العين

4

ابچي العمر كله عليك وانحب
والموقف الاثر عليه واصعب
من شفت حاضنتك وتنحب زينب
همزين ماماتت ييمه همزين

5

راح ابقه يوليدي انوح وانعه
وشتنفع الدمعه عليك الدمعه
عبدالله شمعه وانطفت هالشمعه
چن الدهر يطلبني يايمه بدين

6

آخر وداع وياك من ودعتك
مذبوح يم زينب ييمه عفتك
لو ادري بعيوني ابد ماشفتك
لليسر يمه امودعيك وماشين




الشاعر السيد رياض الرسل الجابري

https://tttttt.me/ssgadAl