#رجائی

#شهادت_موسی_بن_‌جعفر_ع

گورسنور آثارِ محنت عالمِ امکانیده
جان ویروب موسی ابن جعفرگوشهء زندانیده

نچه ایل حسرتله غربتده قالوب آغلار گوزی
درد و محنتدن دونوبدور تیره شامه گوندوزی
عبدِ صالح شهرتی ، باب الحوائجدور اوزی
دردینی ایتسون بیان ، عاجز قالان درمانیده

گر باخا چشمِ بصیرت ، اولمیه مانع حجاب
واردی اوضاعِ کواکبده گورر بیر انقلاب
بو غریبون حالی زهرانی ایدوبدور دلکباب
جدّینی آغلار قویوبدور روضهء رضوانیده

عترتین ترک ایلدی غربت اولوبدور مسکنی
اول غریبه سِجنده یر ویردی هارونِ دنی
ظلمتِ مسطوره دن عرشه چیخاردی شیونی
عرض ایدردی بارالها صادقم پیمانیده
.
بیر چخور یرده ایدردی صدقیله راز و نیاز
متصل شغلی اولوردی گه دعا گاهی نماز
اولنمازین قیمتین بلمز ندور اهل مجاز
کشف ایدر اهلِ حقیقت معنی قرآنیده

بی سبب بولمه عدو زحمت اونا هر آن ویروب
آنلا گور علت ندور زنداندا یالقیز جان ویروب
آند اولا اوز جانینه دینه اوزین قربان ویروب
معرفت اهلی تانولار دینیده قربانیده

بیر وجودیکه مقدس دینینه ناموس اولا
قبرینه شاه وگدالر یوز قویا پابوس اولا
گور نجه انصافدور زنجیریله محبوس اولا
حدّدن چیخمیشدی هارونِ دنی طغیانیده

منده یوخدور شرح حالین یازماقا تاب و توان
نه طریقیله قالوبدور حبسیده چوخدور یازان
جان ویرن وقتینده سسلردی اوغول بس هارداسان؟
گوزلریم آغلار قالوب یول گوزلورم هر آنیده

چرخِ اطلس سیردن قالماز اونون یوخ چاره سی
وار یری تغییر تاپسون ثابت و سیاره سی
گور بو یاره چوخ چتیندور یا قلج اوخ یاره سی؟
بو ستم گورسنمیبدور آلِ بوسفیانیده

امرینه هارون ایدوبدور بیر شقینی انتخاب
شمردن بی رحم و بی انصافیدی خانه خراب
حجة الله نه روادور جدّوه ایتسون عتاب
بلمورم بو نه شقاوتدور او سست ایمانیده
.
یارسول الله اوزون دور قبریدن امداده گل
سِند الیندن اوغلوی قورتارماقا بغداده گل
عرض ایدیم مطلب ندور سن ناله وفریاده گل
اعتذاریم وار ولی عرض ایتدوقوم عنوانیده

وار یری زهرا بهشتِ عدنیده ماتم قورا
حشر اولونجا شیعه نین قلبین بو محنت یاندورا
نه روا سند ابن شاهک اوغلووا سیلی وورا؟
بیکس و مظلوم امامی انجیده زندانیده

عرصه نی از بسکه تنگ ایتدی اونا اهل جفا
ضعفیدن ایتدی تصرّف جسمینه بادِ صبا
برگِ گل تک میل ایدردی گه صاقا گاهی صولا
وار بو تاثیری نسیمون بوطهء ریحانیده

باش قویاردی سجدیه اول بیکس و بی اقربا
روز و شب اوز حالینه آغلاردی ایلردی نوا
یوز دوتاردی درگهِ معبوده سویلردی خدا
صبر قیلام هر بلایه قدرتِ امکانیده

من دیمم زندان ، بو یر جای عبادتدور منه
سن بولورسن عمده مقصودیم اطاعتدور سنه
زهرِ کین تأثیر ایدوب باعث اولوبدور شیونه
قالمیوبدور اختیاریم سینهء سوزانیده

نچه ایلدور قالمیشام حسرت من اوز اولادیمه
گوز یاشیم قانه دونر هر دم دوشنده یادیمه
راضیم تیز جان ویرم ملحق اولام اجدادیمه
یانمیشام نارِ فراق و آتشِ هجرانیده

ای اولان حُکمنده عرش و فرش و کلِ ماسوا
من غریب و بیکسی زندانیدن قورتار خدا
بیرجه گورسم باشیم اوسته اگلشوب اوغلوم رضا
نوشِ جاندور بذل ایدم جان محضرِ جانانیده

مستجاب ایتدی دعاسین ، سویدی الله ناله سین
قورتولوب زنداندا عمری اولغریب و بیکسین
جان ویرنده باشی اوسته گوردی اوز دادرسین
آختارور ایستکلیسین هر جان ویرن دورانیده

یادیمه دوشدی بو محنتدن غریبِ کربلا
جان ویرن دمده اودا قانلی گوزون آچدی خدا
سینه سی اوسته گوروب شمرِ شریری برملا
قالمامیشدی حالِ دعوا اول شه عطشانیده

ضعف ایدوب حاله گلنده آشنا بیر سس آلوب
گوزلرین آچدی گوره کیم نعشینه سایه سالوب
گوردی قاتل پنجسینده زینبی یالقیز قالوب
تازه قان آثاری واردور خنجرِ برّانیده

سسلدی یالوراما قاتل بی مروّتدور باجی
سن بلورسن مقصدیم فیضِ شهاتدور باجی
دین یولوندا هر مصیبت جانه منّتدور باجی
سنده صبر ایت سربلند اول محضرِ جانانیده

باشیمی زهرا آنام معناده آغوشه آلوب
سن قایت گیت خیمگاهه عترتیم یالقیز قالوب
وار نه علت گور سکینم شورشِ محشر سالوب
صبره قیل دعوت اوزون صغرانیده کبرانیده

ای (رجائی) چخما مطلبدن کناره بیر دایان
چکمه ال باب الحوائج دامنیندن هیچ زمان
آغلا صدقیله اونا قیل دردیوی بیربیر بیان
آغلاسان یانماز وجودون آتشِ نیرانیده.

التماس دعا