#مرحوم_استاد_حسینی_سعدی_زمان
#امام_جواد_ع_شهادت

از اشعارِ چاپ نشدهء مرحوم استاد سعدی زمان


گلدی بهار اولدی گینه موسمِ سُرور
گوستردی گُلده قدرتینی قادرِ غفور

یوزدن نقابِ غنچه نی گُل ایلدی کنار
گلزاره گلدی ناله کنان بلبلِ صبور

گلبرگ شاخه سین اوزونه ایلیوب مکان
مستِ مِی محبّت اولوب باشلیوبدی شور

عرض ایتدی ناله سینده که ای بی وفا نگار
گور نه ایدوبدی منه رموزِ وفا ظهور

هجرونده بسکه ناله ایدوب توکموشم سرشک
وصلون دوباره گورماقا ، قالموب گوزومده نور

علّت ندور شکفته لنورسن بهاریده؟
گیچمور او قدر رنگِ رخ و صورتون سولور

اشخاصِ روزگار کیمی اولموسان دو رنگ
یارِ دو رنگ دوتماز ، اولان عاشقِ غیور

بلبل دیینده بو سوزی ، دل آچدی برگِ گل
ویردی جواب نازیله ، ای طالبِ حضور

منله دگل اگر منیله اولسا اختیار
قالّام شکفته ، سولمارام اولومونجا ، نفخ صور

علّت بودور بهاریده اولّام شکفته رنگ
گوگدن گلور مَلک گتورور مژدهء سُرور

ایلر خطاب گللّره بر پا ایدون فرح
تختِ خلافته اوتورور شافعِ نشور

گللّر تمام اولولّا او ساعت شکفته ، چون
بیر نچّه آی بو حالیله تا دور ایدر مرور

فصلِ خزان اولاندا گلور آیری بیر مَلک
بیر سوز دییور تمام گلستانی سولدورور

سویلر بولون سولوب چمنِ مرتضی علی
اولادینه تاپوبدولار ال فرقهء کفور

بولجاق بو حالی گل سارالوب گلستان سولور
بیر عمر عندلیب اولی سرگشته و حصور

یا صاحب الزّمان سنه معلومدور بو سوز
هر دوره حقّه ، ناحق اولانلار اولوب جسور

اجدادیوین تمامیسی مظلوم اولوبلا لیک
جدّون تقی غمی دلِ دنیانی یاندورور

سِنّا" جوانیدی اوزی ، اما جوادیدی
شغلی سخا و جودیدی ، هر شام و هر سحور

سِنّی یتوب ایگرمی بشه نه ملالیله
گوگلونده درد و غم ، گونی گوندن تاپوب وفور

گه قطعه قطعه دوغرادیلار جسمِ پاکینی
گه زهرلی طعامی یماقه ایدوبله زور

مجبور ایدوبله بلکه ایچه زهرلی شراب
نی تک نوایه گلدی بو غمده قصور و حور

یانسون دلیم دیسم نجه مسموم ایدوبدولر
قلبِ بشردن ایله جفا ایلمز خطور

قلبِ رسولِ اکرمه اود ووردی امّ فضل
بیر ظلم ایدوب امامه که حرمتدن اولدی دور

دسمال قصّه سین دییه بولمم صراحتا"
قورخوم بودور امامیدن اذن اولماسین صدور

القصّه زهر امامِ جواده ایدوب اثر
ذرّاتِ کایناته او حالی سالوبدی شور

غربت ولایت ایچره ویروب حسرتیله جان
احضار ایدوب حضوره اونی خالقِ شکور

بامه چیخاتدیلار او مطهّر جنازه نی
غمخانه اولدی بو غمه هم خلد و هم قصور

اوچ گون قالوبدی گون قباقیندا جنازه سی
بیر کَسده اولمیوب او یره قدرتِ عبور

ساطع اولوردی عطر ایگی اول جسمِ پاکیدن
اول نازنین وجوده دگن وقتیده دَبُور

قالدی تمام اوچ گیجه گوندوز او حالیله
فرمان ویروبدی معتصمِ کافر و شرور

جسمین ووروب سالوبلا یره پشتِ بامیدن
شرم ایتمیوب گینه دولانور گردشِ دُهور

جدّی حسینه شرکت ایدوبدی بو امریده
اوچ گون نه اولدی غسل و کفن نه قازیلدی گور

اوچ گون اگر چه قالدی بونون یرده پیکری
اما واریدی جامه سی ، جسمی دگلدی عور

عالَم گرک حسین آقا ، قان آغلاسون سنه
شرحِ مصیبتون سنون آفاقه اود وورور

بو سهلدی اولونمادی غسل و کفن سنه
سویدی یارالی پیکریوی لشگرِ شرور

چکمیشدی جسمِ اطهریوه پرده ، لخته قان
عضوِ مقطّعاته دگلدی کفن ضرور

آت دیرناقی هارا؟ او مبارک جسد هارا؟
یرده یارلی جسمیوی پامال ایدوب ستور

باشون وورولدی نیزیه ، گورسندی نورِ حق
لفظِ اناالحقیله جدا اولدی نخلِ طور

ارنی دیوب او نوری گورنده کلیمِ حق
لَن کلمه سیله اولدی مخاطب ، دوتوبدی شور

اُنظُر اِلی الجَبَل دیمدون ، ایلدون خطاب
گَل گور منی ، اولاندا یریم کوفه ده تنور

پای ملخ تک الده سلیمان حضورینه
بو نظمینی(‌حسینی) گتوردی بسانِ مور

بولمم نه واردی اسمِ شریفِ حسینیده
هر آن آدی گلنده سرشگیله گوز دولور.


التماس دعای فرج