#خشالنامه

خشال روزی که بهار با ولات
بوسه دیه چمن وِ گِر ساق ِ پات

نرگس و هِیرو اُ شقایق و ِدُوو
لالـه اُ بابونه بوعـن لُـو د لُـو

لـو د خَنـه بیایه بادِ سردی
لف بزنه گیس چِویر وِ بَردی

دیوو دیوو تی نـَری وِ سرِ گَـر
کنگر و غارچ وا خنه بیایین و دَر

کوگِ کوهی بیایه و ِ ناز و زُر
سَـر دِ هوا بکه اُ بال یاشه دُور

وا شاقِ شاقِ دنـگِ کـوگِ دَری
دو پا سه پا بـوازه کُل کمـری

تولـه ا ُ ترپوکـه بیاییـن دِ باش
ملیچه سر چوکی روعه د نهاش

مرغ و قَلمــو هر دوتاشو و ناز
بوعَن کلیشیر سیمو بزه وِ ساز

کلیشیر بونگ بیاره سنئی سما
تی نره بَتُورکـی بیفتـه د نها

کوکِ دری بوعه د مین صف سوا
گال بزنه ، تیهـو نه بکه شَـوا

کمونچه شه کوک بکنه دنگِ باد
یهو بلرنه وِ سه پا ریتمِ شاد

اورِ سیاهـی بیسه د راسمو
گرمهِ دهول بَپیـچی دِ آسمـو

کُل کمری شونه شکیشه وا گل
اُور بزنه دِ دلِ جوو وِ دهول

آسمو غر بیه دهول دور سرش
بازنهِ ای میها بیسه دِ وِرش

کل کمری بُوعنه د کمــر شال
سیلی د صَف بکه اُ بکشه گال

دو دسماله سیخکـی وا د هوا
شونه شکی جنگ وا دهول پا وِ پا

تیا کئو ، لویاش سُور اُ زلفِ هیل
د آسمو جـُور بیره سوزِ سیل

کَمونه وا دیه وِ گوردهِ طِنــونم
وِ دیوِ خونِ سَرف گل کهِ وِ نوم

گل و گیـاه یه سره بینه دِ چَپ
سیت بیارم ، پیچسه دیِ لپِ لَپ

خشالِ روزی همه وا جونِ دل
لوء دِ خَنه و شادی بزنن کل

خور کنید بیان همه قومِ دوس
دو گورچنه دیئن و پا نو عروس

قاصدی بوعه که بیایین وِ دُوو
عروسیِ خَنه ا ُ لوعه ایمشـو

خِشال روزی بوُعه غم بمیره
غمن بئینـم که وِ غـم اسیره

#آرش_آقایی
#کشکان
https://tttttt.me/asharzakhmi
☝️☝️☝️☝️☝️