Yolg'izlik


U stol ustida yotgan qog'oz markaziga
qalam bilan nuqta qo'yarkan, dedi:
- Bechora, qanchalar yolg'iz u
qog'ozning qor bosgan dalalarida!..
So'ngra shosha pisha o'chirgich bilan
o'chirarkan nuqtani, o'ziga o'zi:
-Endi qorbo'ronda ko'rinmay ketdi -
dedi, qayg'u bilan chuqur xo'rsinib.
So'ng deraza ortida bo'ralab yog'ayotgan
Tung laylakqorga termuldi uzoq.

✍️ Xoldor Vulqon

@sheriyatuz

Gul hayosi

Tentirab, bekorchi, bezori shamol,
Xazonga to'ldirdi gulzor qo'ynini.
Ko'rib rahmim keldi nafis, bemajol,
Kuzgi atirgulning nozik bo'ynini.

Gul boshini egib, tikoni botgan,
Chetanli chavraga turar suyanib.
Kiyimlarin yechib, gulxanga otgan,
Telba daraxtlardan uyalib.

✍️ X. Vulqon

@sheriyatuz

СЕН ЖАҲОНГА ТЎЛУҚСЕН,
ЖАҲОН СЕНДАН БЕХАБАР

Сенсан оройиши жон, бу жон Сендан бехабар,
Сен жаҳонга тўлуғсен, жаҳон Сендан бехабар.

Андиша дарёсинда сирим сафийнасини
Юз тарафга суздирдим, сайрон Сендан бехабар

Гар десалар куфр ўлар: ашё Сендан холидир,
Манзил Сендан мустағрақ, макон Сендан бехабар.

Замин, осмон, ғарбу шарқ партавингда гардондир,
Замонига Сен гардон, замон Сендан бехабар.

Истар Сени денгизлар, тўлқинланиб шавқингдан,
Сен улар ичра маълум, уммон Сендан бехабар.

Замин тилар осмонда, осмон тилар заминда,
Бир-бирига гумонда, гумон Сендан бехабар.

Махтумқули, кўр энди, ашёлар не ишдадир,
Йўқ эмиш бу ашёда, ҳамон Сендан бехабар.

Махтум кули😊

@sheriyatuz

ЁМҒИР ҲАҚИДА БАЛЛАДА

Булутлар кифтида этдим саёҳат,
Осмондан ергача йўлни тарадим.
Учиб деразангга етдим ниҳоят,
Мен – ёмғир! Қарагин, жоним, қарагин!

Деразангни чертдим – берилиб чалди
Кузнинг баётини ҳўл бармоқларим.
Кузак – ҳам яратиб баҳайбат чолғу,
Гулханида ёнди, воҳ, оёқларим.

Деразангни чертдим. Ғуссаларинг мўл –
Сени асрагайлар дунёдан узиб.
Ташқарига қара, ёноқлари ҳўл –
Ойнага юз босмиш соғингчнинг юзи.

Тўрт девор ичинда мендан мосуво,
Яшайсан бир сирни юракка ютиб:
Мендан яшириндинг шифт тагига, о –
Деразага ҳайрон пардалар тутиб.

Ташқарига қара! Тенгман тупроққа –
Ҳижрон билан оғир баҳсларга тушдим.
Самони унутдим – келдим сўроқлаб –
Қандай осмонлардан пастларга тушдим!

Мени эшитмаслик мумкинмас... Охир
Эшигинг очилди – кўрдим кўзингни.
Аммо сен жунжикиб, энтикиб оғир
Соябон тагига олдинг ўзингни.

Сен мени севмайсан... Ёмғирман ночор –
Соябон сатҳида бекор уриндим.
Гоҳо этагингга етдим беозор,
Гоҳо этигингга бебахт суриндим.

Сенинг либосларинг қандай чиройли,
Уфурар бўйнингда қандай атирлар:
Борасан – гўёки бир гўзал ойни
Авайлаб чулғамиш ҳарир абрлар.

Ёзлик сургунимда – дилларим пора –
Соғиндим мен сени – юрагим тақир.
Сўра, майда қолган майсадан сўра –
Мен ҳам ёмон ёмғир эмасдим, ахир.

Энди куз севгимни солди қўшиққа,
Ҳажрингда вужудим тобора равшан...
Манзилга етасан. Ногоҳ эшикда
Мени соябондан силкиб ташлайсан.

Сени остонада қучади биров.
Гул каби ҳидлайди сени – тўймайди.
Ёғаман, ёғаман – равишим йиғлов –
Бундан кетай десам соғинч қўймайди.

Кўчада изғирин бўлди аламинг!
Олам – ғаминг тўла бир байтулхазан.
Деразани тутди туманли таним,
Деразани чертдим:
– Сени севаман!

Оқ учқун танимни ўтди оралаб,
Музлаган лабимга бири қўнди жим:
Тақдир шу кечда етди оралаб –
Фожеа етишди чоғи, севгилим!

Умрим тугаяпти – йўқдир дарагинг,
Сенсиз вужудимда қанча тоқат бор?
...Тонгда деразани очдинг. Қарадинг –
Ташқарида қордир, ташқарида қор.

✍️ Усмон Азим

@sheriyatuz

Беклар


Мард билан номарднинг иши тенг келмас,
Номардлар савашда зиёндир, беклар.
Номард бўз йигитнинг қадрини билмас,
Номарднинг ҳар иши вайрондир, беклар.

Комил – бўз йигитлар ҳаққини емас,
Дунё молин берсанг, номардлар тўймас,
Номард масалаҳатга – кенгашга уймас,
Номарднинг ҳар иши аёндир, беклар.

Бир отада олти ота суйи бор,
Бир нодоннинг юз хиёллик ўйи бор,
Бўз йигитлар қайга борса, уйи бор,
Номарднинг ўз уйи зиндондир, беклар.

Давлат бошга келса, дўст-ёрин кўрмас,
Қазо келса, бағрин ердан кўтармас,
Ҳақдан дея ҳаргиз иймон келтирмас,
Махтумқули, шундай замондир, беклар!...


Махтум кули😊

@sheriyatuz

ОНАМГА

 

Оҳ, менинг ортимдан оввора онам,

Бир парча юраги минг пора онам.

Ҳар балони кўриб ёруғ дунёда,

 Тошканни кўрмаган бечора онам,

Боланг бўлиб бир бор бошлаб келдимми,

Энди мен ҳам сенга ўғил бўлдимми!..

 

Гарчи бисотингда «байрам» сўзи йўқ,

Биламан, кутасан сандал тўла чўғ,

Менда юрак деганларин ўзи йўқ:

Мен совға бермаган қиз йўқ бу оқшом,

Сенга на гул бердим, на ширин калом,

Энди мен ҳам сенга ўғилми, онам?..

 

Дейсан: олисларда омон юрсанг бас,

Ёдингга тушсам гоҳ йўқлаб турсанг бас,

Болам, сенга ҳамма қилади ҳавас...

Ахир, менинг дардим Шеър эмас фақат,

Мен машҳур шоирмас — машҳур бешафқат,

Энди мен ҳам сенга ўғилманми, айт?..

 

Шаънингга шеър битдим. У сени топсин,

Пойингга тиз чўкиб, қўлингни ўпсин.

Ундан ҳам улуғим борлигин кўрсин,

Мен учун ҳам азиз ҳолингни сўрсин,

Сенсиз ғариб кўнглим кўнгилми, онам,

Энди мен ҳам сенга ўғилми, онам!..



Мухаммад юсуф😊

@sheriyatuz

MUNOJOT

Yaproqlardan jon olgan kuzda edi xayolim,
Olamni “Yaral”tirgan soʻzda edi xayolim.
Hali boʻz boʻla turib, yuzda edi xayolim,
Koʻnglimni jismimdan tez qaritmagin, Xudoyim.

Men bilgan bu dunyolar oppoq edi, nur edi,
Koʻnglimdan joy olgan Ishq pok edi-yu, hur edi.
Dildagi har bir kalom bamisoli dur edi,
Bundan ortiq dunyoni tanitmagin, Xudoyim.

Samimiyat axtargan soxtalarga duch ekan,
Bilsang, doʻstim, bu dunyo shundaylarga oʻch ekan.
Kengliklarni istasang, qanot chiqar, uch ekan,
Osmonimni koʻnglimdan tor etmagin, Xudoyim.

Baxt qidirib chiqibman taqdirimning sayliga,
Goho yengilganim rost zamonaning zayliga.
Agarki shu azoblar baxt deyilsa, mayliga,
Dardlarimni umrbod aritmagin, Xudoyim.

Yaproqlardan jon olgan kuzda edi xayolim…

✍ Islomjon Qo'chqorov

@sheriyatuz

ʼʼ Qadr ʼʼ

Qadrlashni oʻrganing qadrdonlarni,
Oʻrgansin koʻz-u qosh, ogʻiz-u burun.
Vaqt oʻtmasdan boshlangiz savob ishlarni,
"Ikkinchi" eshikni qoqmasdan burun.

Koʻngilning oldida bir momiqdir-tosh,
Momiqli koʻngillarga tosh otmangiz siz.
Ul momiq oldida Arslon egib bosh,
Choʻkkalaydi hatto, tiz choʻkadi, tiz.

Muhabbat "momiq" ni yumshatguvchi taft,
Bu taftdin kerakdir har bir maxluqqa.
Ul otash boʻlsa, gardunda hatto
"bir kamlik" almashar saodatlikka!

Gar boʻlmas koʻngilda sevgi uchquni,
Tarbiya atalmish neʼmatdin boʻlsin.
Yoʻqsa gar, ilmning kuchli toshqini
Qalbning qirgʻogʻini qaqrogʻin yuvsin.

Qadr muhabbatning armugʻonidir,
Navoiyning hech tolmas argʻumogʻidir.
Inson qadri har nedan balanddir ey doʻst!
Ulugʻ Oybeklarning "Qutlugʻ qoni" dir.

Qadrlashni oʻrganing qadri borlarni,
Oʻrganar koʻz-u qosh, ogʻiz-u burun.
Gar boʻlsa, qadrning inqilob, aksin
Ulguring boʻgʻzingiz toʻldirib qonin,
"Ikkinchi" eshikda qusmasdan burun...

✍ Primqulov Avazbek

@sheriyatuz

ТОЙЧОК


Тойчоқ бўлиб қолсам эдим, тойчоқ бўлиб

Қорасоч бир қиз қулунга ўртоқ бўлиб.

Қувалашиб юрмасмидим дала-даштда,

Бу дунёда нима кўрдим сени севиб.

 

У ҳам мени севар эди менга ўхшаб,

Кутар эди гўшангада ўтлар тўшаб.

От бўлса ҳам тушунарди мени ўша,

Бу дунёда нима кўрдим сени севиб.

 

Майли эди арғамчида бойлансак ҳам,

Тупроқларга ағанашиб қийналсак ҳам.

Биз бир умр бир қозиқда айлансак ҳам,

Бу дунёда нима кўрдим сени севиб.

 

Отдай ҳамдам бўлар эди жонимга у,

Қиздай малҳам бўлар эди жонимга у.

Бир кишнасам келар эди ёнимга у,

Бу дунёда нима кўрдим сени севиб.

 

Хаёлимнинг даштларида уюр-уюр,

Қулунчалар чопиб юрар, мени суюр...

Яна қандай азобинг бор, жоним, буюр,

Бу дунёда нима кўрдим сени севиб.

 

Тойчоқ бўлиб қолсам эди, тойчоқ бўлиб,

Қорасоч бир қиз қулунга ўртоқ бўлиб,

Қувалашиб юрмасмидим дала-даштда,

Бу дунёда нима кўрдим сени севиб.

 

Мухаммад юсуф😊

@sheriyatuz

Xonadon obro‘yi, taxti-erkakdir,
Bolalar quvonchi, baxti-erkakdir.
Ayollar qudrati mulki-erkakdir,
Vatanim g‘ururi ko‘rki-erkakdir.

Erkak bor, bog‘larda gullar ochilar,
Ular bor, qalblarga quvonch sochilar.
Oila butundir ular boridan,
Hayotin qizg‘anmas do‘sti, yoridan.

Dasturxon qutligi - ular mehnati,
Ustimiz butligi - ular himmati.
Farzandlar chirog‘i - ular borligi,
Muhabbatning bizga mudom yorligi.

Erkaklar mardligi berur iftixor,
Ularda mehr bor va muhabbat bor.
Farzandin ertasin o‘ylovchi ular,
Oila obro‘yin qo‘llovchi ular.

Shunday yigitlarni sevar xaloyiq,
Shundayin erkaklar mehrga loyiq.
Ular elimizning sodiq posboni,
Ular bor, tinch erur yurtning osmoni.

Bayram muborakbod, aziz erkaklar,
Tilaymiz sizlarga ezgu tilaklar.
Omon bo‘ling bola, onalar uchun,
Sezing doim ayol mehrining kuchin.

@tabriklaruz
@sheriyatuz
#QK26

​Boʻlmas

Har ahmoqqa aytma dardu soʻzingni,
Hasrat oʻti jisming yoqqancha boʻlmas.
Gʻussa bilan dona-dona koʻzingdan
Achchiq yoshlaringni toʻkkancha boʻlmas.

Qanoatda, izzatda tut oʻzingni,
Tama qilib, sargʻaytirma yuzingni,
Har nomardga hayf aylama soʻzingni,
Soʻzingning binosin yiqqancha boʻlmas.

Magʻrur boʻlib kezma umring guliga,
Duch boʻlarsan bir kun xazon yeliga,
Yuz yil yashab tushsang ajal qoʻliga,
Oʻngingdan chapingga boqqancha boʻlmas.

Koʻngli qora bilan boʻlmanglar ulfat,
Yuqar undan turli-tuman kasofat,
Koʻmirga har necha aylasang izzat,
Manglayga qorasi yuqqancha boʻlmas.

Maxtumquli hargiz topmadi omon,
Yomon tilning zahri tigʻlardan yomon,
Yomon til yonida zahri koʻp ilon
Chaqsa-da, bir chivin chaqqancha boʻlmas.


Maxtumquli

@sheriyatuz

#jahonmusiqasi @sheriyatuz

KECHA KELGUMDIR DEBON…

Kecha kelgumdir debon ul sarvi gulro' kelmadi,
Ko'zlarimga kecha tong otquncha uyqu kelmadi.

Lahza-lahza chiqtimu chektim yo'lida intizor,
Keldi jon og'zimg'avu ul sho'xi badxo' kelmadi.

Orazidek oydin erkanda gar etti ehtiyot,
Ro'zgorimdek ham o'lg'onda qorong'u kelmadi.

Ul parivash hajridinkim yig'ladim devonavor,
Kimsa bormukim anga ko'rganda kulgu kelmadi.

Ko'zlarindin necha suv kelgay deb o'lturmang meni,
Kim bori qon erdi kelgan bu kecha suv kelmadi.

Tolibi sodiq topilmas, yo'qsakim qo'ydi qadam,
Yo'lg'akim avval qadam ma'shuqa o'tro' kelmadi.

Ey Navoiy, boda birla xurram et ko'nglung uyin,
Ne uchunkim boda kelgan uyga qayg'u kelmadi.

Alisher Navoiy
@sheriyatuz

KO'Z BIRLA QOSHING YAXSHI

Ko'z birla qoshing yaxshi, qabog'ing yaxshi,
Yuz birla so'zing yaxshi, dudog'ing yaxshi.
Eng birla menging yaxshi, saqoqing yaxshi,
Bir-bir ne deyin boshtin-ayog'ing yaxshi.

Alisher Navoiy
@sheriyatuz

UMRI AZIZ

Jondin seni ko’p sevarmen, ey umri aziz,
Sondin seni ko’p sevarmen, ey umri aziz.
Har neniki sevmak ondin ortuq bo’lmas,
Ondin seni ko’p sevarmen, ey umri aziz.

Alisher Navoiy
@sheriyatuz

GAR OSHIQ ESANG

Gar oshiq esang mehru vafo qilma havas,
Dard istayu daf'ig'a davo qilma havas.
Hijronu visol mutlaqo qilma havas,
Dildoringdan g'ayri rizo qilma havas.

Alisher Navoiy
@sheriyatuz