جمعة الحلفي

نايم...
نايم بريسم على بريسم غُفو
طولك او ورد الچراچف
نايم مرشرش عطر.....
عش الحمام زغير ومنده..
من طراوه
ومن حلاوة مستحه
وجيسة دفو

نايم..
والله يدري بهلسبايه
تفاحه من تفاحه تخجل
واكبر التفاح يتماوج غنج
يزيح لحاف عن لحاف
والدنيا شته
نايم وكلشي ايتثاوب..
روحي والشباچ والبيبان
وورود المخده

وشمعدان الشمع
وثياب الزغيره
حيره نومك..
حيره تصحى
وحيره تغفى..
وحيره ترضى
وحيره تزعل
وحيره يتخالط دمعنا
وحيره يصفئ
نايم
وآنه وي شمعاتك اسهر
مدري ياهو البينه يبچي
مدري ياهو البينه يحچي
ومدري ياهو البينه ما ظل بيه دمع..
نايم وطولك صحو..
وشهل گباحه من الشمع؟

نايم وروحي شديدة حزن
والأيام ما هي أيام
لا تكبر عليّ آنه ماني بگد غلاتك
سايم الله عليك تعذر
سايم الله اعله الرفيف
البين رمشك والخصر..
ليل وشموع وسكر كاسات
ما يخلص هواك
وعشرتك ليلة خضر
نايم وطولك صحو..
رگصة عبيد مشابگك
ومباوسك گهوة بدو

كل يوم تاخذني دناوة روحي يمك
غلطة مني وغلطة منك
واليصير يصير
لا تبخل عليّ
وك روحي شديدة حزن
والأيام ماهي ايام
لا تتعب تدور على غيري..
آنه غيري
وك آنه من أول عمر لآخر عمر

#قصيدة_وشاب

احمد قحطان ( كربلاء)

رسايلنه خفيفه وتنقره بساع
الزغيره البيهن بطول الجريده

رغم ماقاري منهن بس كلمتين
وشگگهن گبال الي يريده

وسهر للشعر يالمالك حساس
لحد ما كمت انام عله القصيده

انه العاش بوهام المواعيد
الما تتحقق و كلش بعيده

محد مستفيد بگطعك وياي
دائرة البريد المستفيده

مراسيلي قليله الواصله عليك
وقليلات البقن گد النضيده

تعمد جانت وعن سبق الاصار
كتلت الحابك مثل الطريده

موسم ينمنع بي خطف الاروح
ربك حاط قانون لعبيده

رغم كل هذا وانته ولايهم بيه
هسه عله الاقل شوف الأريده

تروح بمشتهاتك ترجع بساع
من تتوازه من تحمه الحديده

غشيم بحته هاي الگالك اعذار
وقنع روحي بسوالف جديده

وبعدني مجلب بكل ذيج الاوهام
تجلوبة المطگوگ ! ابعضيده

يطير بكل غصن بانيلك عشوش
حته الساعي محتار ابريده

حزن الكبير .. عماد المطاريحي


هاي السنة الما بيها غيــــــــرة
باگت احلام اشــ جم ظفيرة؟
المفروض ما نحتفل بيهــــــــا
ولا نحلف بريحة ثديهـــــــــــا
باعت ولدنه اعله الحفـيــــــرة

وحدك گمر والوادم اهــــــواي
عفت السمه وصليت ع الماي
يوليدي ما حطيتنـــــي بـ راي
كونك تريد لغير ديـــــــــــرة

وكلها بغيابك صارت ذنـــوب
صورتك والشباج والبـــــوب
يهدني ذني يگضني الغروب
والليل والنجمة الصغيـــــرة

امي الوحيدة الدفنت الليل
يرحمها لو يعزف مواويــــل
لو حدّر الشمام والهيـــــــــل
هب النســـيم وجاب سيرة

من ينعى ابوك يسكّت الناي
بطور الحزن محبوبتك هاي
يمشي الفرات ودجلة حفاي
بجنازة المتروس غـــــــــيرة

حيدر حسن


چبيـر انت
لحد ما كل خيالي يضيع بوصافك
چبير لحد غفه بظلك شجم صبير
لمن شاف صفصافك
ينجم بيا كتر ضايع ...اشوفك وين؟
يا غيمة التصحي اضنونك بشوفي
ويـاليـل اليجيبك حلم لطيوفي

اخافن گمت من خوفـي...
وحتى الگطرة من اتطيح بستمرار
بوجه كل صخره تتثقبْ
وهذاك انــت...!
ولا همك حچي اعيوني
يصفنة عاگر شتنحب
ينجم الليل بس الليل ...يبقى وياك يتعذب
يا ليل اليلم حزني ؟!
اجيك اضحك سمه بعينك ..واردن منك اهلال

بظهر محني
انه ما حاچي عشگك حتى وي روحي
بس الشوگ صيحني
بس الشوك صيحني...

أسماعيل محمد أسماعيل



من زغري انا و روحي وهواها ليلو بـ بحر
بس عالبحر غاگ
و مو عيب اضم روحي وغلاها
والغالي شوف العين ينباگ
عيب اعله من بيها يتباها
ويتعله خده بـ جف الطراگ
اوه امده الدنيا امداها
امشيّله العِگل ومنشفه الرياگ
و اوه امده العاش برجاها
وعمره اعله لف السوط ينساگ
يعيون ما باعت ضواها
وخد الحملها وي الضوه الواگ
تنامين والدنيا بغواها
لـ بيع الضماير فاكه اسواگ
لا يا عمت عين الهواها
باع وشره و سمسر واجه وضاگ
يعيون تدرين اعله كل لوم
ﭼـالي الصخر ڰلبي شگواته
انا العليه ما مايله تحوم
ولا يوم بيه رخص غلاته
ولا ذبته اعله العايزه اهموم
ولا خوف نشفله لهاته
وانا التطير تطيح وتگوم
لو شال عينه الها برهاته
ضني بهلي جنحي اليرف دوم
ريش لخوافي وسبگاته
لا يا هلي .. دموع التماسيح
شفت الدمع والگول ينگال
ما جنت اضن يرجه الديم سيح
ولا تحدي ناگه براس جمّال
و وسط الحبايب صورتي شبيح
وعگط الحجي اعله السان محجال
لا يا هلي .. ان جان الوكت ريح
كل نبضه مني اتناحره اجبال
اتطيح السمه اعله الگاع ماطيح
ويدوس جدمي ارگاب الانذال
غمه الوكت لو جار ماصيح
وغمه اليميل لوين ما مال
شيال هَم الناس هَب ريح
وثگل الحمل ينرادله ارجال
وباجر گمرنا الـ ليلها يزيح
اليرجه الگمر يرجاه وهو اهلال

#قصيدة_وشاب

علي عادل المالكي ( البصرة)


يامحبوب تحمل دوم مذموم؟
تعادل شوگ روحي بليلة طلوگ
لو كلك تروح ولو تضل دوم
شبه گلبي الفتيل بكثر محروگ
سمت بيدك محبتي وشلت لليوم

مامريت چذبه.. وانه اجي بشوگ
بدت غربان تصفر فوگي وتحوم
حر بسوگ طاح وغشمه بالسوگ
ناطرتك سنيني و نوم محروم
غربيلي اعلمودك دوم مشروگ
زلفك للشعر حبيته ملموم
مهو صوت المگص يرجف الطوگ
شاركت البواچي بفاجده التوم
وتعلگت ب أسه وللساعه معلوگ

اشبگني اعله مهلك ليش جيثوم
وليش أعله البعد خيطت الفتوگ
تلاگيني أعلى حدك وانه زردوم
وألاگيك ومحب وخاطري تلوگ
شما ترفع خشم تتكسر خشوم
ناگوط البدو من الحدر ليفوگ

جواد زغير


أعله گد حزنك ..
أخذني ادموع وابچيني

أعله گد ليلك ..
أخذني أشموع ..
أذا ما أموع طفيني

أعله گد دربك ..
أخذني أجدام ..
يـ أسمر هجرك أ.من يطول ياذيني

يـ خمره أندارت بروحي ..
وخدر يمشي بـ شراييني

شملذه السكر بعيونك ...
يـ كيفي و واهسي و تيني

أنه مخمور بيك هواي ...
كلشي أو.لا تصحيني

يـ أبو كلشي حچي بروحي ..
و يـ أبو كلشي بچي بعيني

أحب عيني التحب عينك ..
واحب عينك يـ مي عيني

هيچ أ.من الله احب لونك ..
أنه أ.من اعشگ شمدريني ..؟

يـ رب كل سالفه بگلبي ..
الشعر نوبات ما يلگاك ..
واتوهدن ..
أتيه أسمي

اذم روحي ..
وأفل جرحي ..
وأسولف عـ المرايه الحايره برسمي

ألم الـ بيه ..
و الـ بـ الناس ..
أعت صوتي وأغني أسمك

أشب وحدي أعله كل حيلي ..
واكسر أمرايتي الـ ما حايره برسمك

أنه ريتي أعله نار تبات ..
اذا بالناس ما اشمك

أنه شريان ما يرتاح ..
اذا ما دار بيه دمك

أنه أمغيم ونين و راحتي بوجهك
دخيلك لا تضم وجهك

ايهاب عيال


يبنيتي الضوه مو ثوب ..
يا "حيّ الجميع" التفتح عيونچ !
يطگ اخياط گبر امچ اذا انكث شليل الباب
و ما ينعصر گلبچ .. جثة بالسرداب

هاي الدنيا يبنيتي ..
بالصدفة تصعده الريح ،
و مو بالصدفة يكبر راسه حد ما يوگع الحالوب
و رحت گوة .. چِفَن مدعو لحَفِل جيوب
افاا بويه تدورين الدگم والحايط اتلِمِس ..
افاا التوّه رمل يلبس هدوم الجام

سليمة شعفتي للجمرة ؟
وانتِ اغنية بالگهوة اشتعل دمچ لما لبدوا وره الصايات
كلما جمرة تستشهد يصيح التيل : حامي اعراضنا الدخان
اشما يحچي عثگ ما عنده خط أحمر تصيح "استغفر الله" سدرة الجيران

هاي الذلة يبنيتي ،
تمرجحني شضاية و خوف و انا بكثر ما انطگ ..
چنت مثل العناكب حتى دمي ازرگ
و متت اشبيح كلها تعاين من بعيد لصوابي
انه ما غثني تغريد الغراب الما عرف ربعه ..
انه الغثتني شوّه سمعة البلبل
و ما مسنودة ، دم الخبزة ما يبطل وضوء الثورة المجسبة

يبنيتي الضوه مو ثوب ..
حَدِر المَدّة چم چرباية ترگص والعشه خبّاز من يوگع اعگال الليل
يبت الـ "هاك" مو من هسه تلزم بابچ الـ "ماكو"
مو من هسه رب "هيروديا" يغني وره الذبّاح
الناي الصار زين وشگ رسايل أثگل من الطين ..
تظل سولة الهور يذكره : چنت وي الگصب مرتاح
يحبل چف "رجاء" عيون بنتچ باچر شتاكل ؟
و ابوها منين ؟ سجل المدرسة يريد الاسم كامل
حَدِر المَدّة چم چرباية ..
حَدِر المدّة خلي تموت
من تتوتر متونچ تگرّض اظفر التابوت
والصفصاف يگطع نسله لو ما ينطي من روحه
سليمة و ينهدر دم اسمي ، من يوگع اعگال الليل

يا بردي اليطيّب جرحي يبنيتي و متت مبيوع ؟
يا بردي اليطيّب جرحي و الما عنده سِبحة .. يجوع
يا خيط اليكف حزنچ ؟
سليمة شعفتي للجمرة ؟ سليمة انتِ ، إشسلم منچ ؟!
و گلبچ جثة بالسرداب ..
يومية يفز گلبچ من السرداب ،
يخرّب قسمة البردة الهوه الما يجي من الباب
يا عظمة چتف ركضي اذا ما ينكسر گلبچ يظل يوهوس الگصاب
ركضي و عبري "الإلياذة" ،
حزني من الرماح و فوگ ..
گذلتچ ناهبة ، و مكسور وجه الطوگ
ركضي و من أفز رِدّي ..
المهم تبقى مسافة ابين الگلوب الوجع يعدي
المهم ، يا ريح جاملتي جذر بالطين ؟
افگسي عيون كل تقويم ..
السنة يومين نبچي واليظل "تشرين"

بهاء سوادي


دَيرة گومـي
وين اگـوم؟
گومي نتلّمس عذابات الوكت للعاشگين.. ،
نشتـعل؟
يشتعل دمّچ ودمّـي ..
ويشتعل
رب للغَـرام ..
ويشتعل رب للحَنيـن ..

ويتشعل ربّ أعلى شاطي الروح يضـحك ،
بَس حزين ..
دَيره گومي ..وين اگـوم؟
نمشي انه وياچ بالدنيا نَهـر مايـدري وين،
ننسحـن؟
ينسحن گلبـچ وگلـبي ..
وينسحن
رب للعَذاب..
وينسحن رب للونـينْ،

وينسحن رب للخَـجل فوگ الخِدُود
بگطرة من بَحر الجَبـين ..
ونمشي والخطـوة سكوتْ
نمشي انه وياچ نـندلّ ابّعضنا وتايهـين،

لطيف العامري


آخر محطه

چانت الدنيا ظلام
ومن زمان بروحي ماطلعت شمس
والحزن تفصال فصل روحه لِيّه
وجلد لابسنّي لبس
وآنه والوهواس والظن ليل ياكل ليل حَد گطع النفس
وباچر التانيته ضحكة
الگيته يعزف بالدمع من حزن أمس
يوسف وياسين قران بحياتي
وما سمعت بروحي هلهولة عرس

تاهن اسنيني اعله مودك
وجيت أدور عالسنين
الگيتهـن خرزات سِبحه اطشرن والدنيا طين
ومن لگيتك شفت روحي
وشفت كل سنين عمري الضاعن اينگطن حنين

وشفت گلبي الماتن اجناحينه
شافك صار اله جناح وصفگ مابين أديك
واشتهيتك واحة اطيرن بيك وادلل عليك
جيتك امفرفح عطش كل ظني اشربك
وأغسل اذنوبي اعله جرفك
يا سراب شما أگرب عني تبعد
وشمتبعــد مدري شنهو بروحي يدفعني عليك
يا بختها الروح بيك
ويا صبرها اشتبعد دروبك عليها تعتنيك
گطعتها بسيف هجرك وبالمنازع تشتهيك

ويا تعبهـا
مستراح أنت بمكانك وانه إلّك روحي حمامة منين ماهدهه تجيّـك
أنتَ وحدك من لگيتك
شگگت شباچ حزني
وشرعتلك باب روحي
وردتك الروحي تشوف
وشلت اديه اينگطن بدم عمري ذاك

وانتظرتك حنه تنزل عالچفوف
أنطيتك شفايف جرح وكحات رادن بوسة منك
بلكي بملاگه الشفايف جرحك بجرحي يطوف
وانه من ميلادي اعرفك
اني من ميلادي اجيتك
أظلم وكلّي كسوف
گوم يا أخر محــطة
وطيحلي بروحي شمس
گوم يا باچر ضحك من خاطر اضحك

غطيّ بصوت الضحك كل حزن أمس
گوم فرحة
وشگگ بروحي چوادر فاتحة كل عمري ذاك
وخلي كل سنين عمري الجايه يصيرن عرس

"مابين الصحو والنوم"

مصطفى الخزاعي



طيفك بالصحو ما مات أجه بشارة شمس للعين
ترس وجهي ضحك ودموع
ومشه بروحي فرح عمرين
يالوجهك ينسّيني خساراتي
لذيذ الشوف يا ماي الصبح للعين !
مِد ضلك جناح اسود على الديرة يليل يدلي المتيهين
ليل شما بعد فجره حلمنه يطول
حلمنه يطول ماميتين
صبرنه يطول ماميتين
انه وياك بس بالصفنه متلاگين
وبالطيف اليلم الناس جوه العين متلاگين
وتگلي تغني وانه اصرخ!
اصرخ بس يضيع الصوت من كثرة المتعوبين
وتگلي تغني وانه ابچي ؟
الخوف من الايام الجايه يخنگني وانه ابچي

الحرب لأجل العروش الخاويه تضحكني وانه ابچي!
وأنه اكبر من قصيده بداخلي من ابچي

اطشن كل ضوه عيوني بضلام الديره من ابچي
ومابين الصحو والنوم
مدينه من الصور والذكرى والاحلام
مدينه وكل حزنها اندار بعيوني

أنه شايل وجع كل العراقيين بضلوعي ويلوموني

أنه شايل دمع كل العراقيات بعيوني ويلوموني

اكلهم ماالك جيه وارد بين الظنون اعثر
يگلولي شعجب غايب
واگلهم كل عزيز بغيبته يكبر
يگلولي اتعرف لونه ؟
واگلهم شايفه بالطيف مثل الگاع هم اسمر .

سمير صبيح


لوّن لوحتك وردي الحياة الوان
خلص عمرك لوحتك ملت الداكن

و لا ترسم جبل ..ارسم نهر بي روح
وارسم ريح بلكي تحرك الساكن

بلكي امن النهر يطفح ركاد الغيض
ويطك زود ويهدم سدة اللاكن

وعلك عالوجه ضحكة وامل بالروح
بجدار العين كافي شجم حزن راكن

و فك باب القفص خلي الاحلام تطير
و انت امن الطفولة شجم حلم ساجن

وخرها الستارة الشمس خلي تفوت
و لتخلي الجروح تبين الباطن

كلها تموت صفرة الموت هم بي لون
عاجبني الكطن للموت ميهادن

ولتضم فرحتك طلعها مامرخوص
ولو هذا الزمان الفرحتك فاطن

وسرك لا تودعه البير مايخفيه
الدلو لو مر عليه يطلع شدافن

اشتري وبيع بحياتك اخسر ولتخاف
المهم سوي التريده جازف وراهن

كلها تموت صفرة الموت هم بي لون
عاجبني الكطن للموت ميهادن

نوفل الصافي



الجرح... رايدله شاعر
يأشر اعله اهلال عيده
ومن يـﭼـل القلم بيده
ايقط اصبعه وما يتاني الباجر يكمل القصيدة

شــــاعر .. شعب ..
ومن يصـــــــير الشعب شاعر
انا اكرملي السكوت
ومن يصير الشعب شارع
كلمن يدوسه ويفوت
انا اشرفلي امــــوت
و أنفجر بـ أول قصيدة
و أبلع السان السكوت ..

گال أحلم .. أحلم ..
گتله أحلم بالقصيدة التنقره و ما تنقره
بالشعر مثل الخبز للناس والعالم سَرَه
وانا اصيحن عالبطاقة .. بالنظام .. بالسَره
و أحلم بواحد يمد أيده ويصيح
أنطيني بس مطلع قصيدة حارة ..أرجع وره

الناس بيه تصيح ناااام ..نام
التفت ما الگه ناس ..
انا كاتلني النعاس ..ارد اناام
اشلون انام؟؟ المخدة تريد راس
وانا امشي بلايه راس ..

گال أحلم ..
رَطّب جفنك العطشان وأحلم
گتله أحلم كون ما أحلم بعد
لأن ترطيب الجفن ضد "ميليشات " البلد
گال اذا تحتاجني .. مشكول ذمة اتمر عليه
وهذا " كارت "
الأسم .. فاضل ابوصيبع
العنوان ..النجف
المهنة .. دفان ..
معروف في كل مكان ..
كتله شكراً..
مثلي ما يحتاج مثلك
لأن ميت من زمان
لأن ميت من زمان ..

عقيل العرد

#السماوة

احب البادية وسرها
وصكرها وذيبها اليرهب

وساوة ومايها المالح
على الطيبين سَير طيب
وعلى العفنين ما يعتب

كاروك القلم من هزته الوركاء

كبر بيها بحضنها وعلمك تكتب

وكل ايشان بيها يعلم العدلين
ماي الوجه ما يتبدى حدر الكاع
من نموت
جان اليندفن بالحِب

من جانت رسالات ونبوة وازمة استيعاب
الخضر يشرح لموسى وموسى متعجب

أزمة ذوق عام
الكَشر عنده لسان
ولسان الكَشر مايستحي من اللب

ما غابت
ولا دنكَ رفضها بيوم
من فجر الحضارة لآخر المغرب

لا من الجنوب ولا فراتيين
وعلى طاري النسب ..ما ننتسب ننِسب

من يبرد الصوت
ويعطش التاريخ
الرميثة بغيم دمها تشيم المعزب

وكونج سالمة ياحلوة الكيعان
لاقزام الثقافة حساب ما نحسب

أخذنا المستحى
من المالهم رداد

يسبونج ونسكت مانعرف انسب

ام الطين بس جابت فخر للطين
وهذا الطين هو العلمك تكتب

سيد سعيد الشريفي

گذلة شمس

اطوي اشراع السفينه و لا تغادر
وين تدري اشجايب اباحضانه باچر

بلحظه يمکن
ينطق السان العدل
وتبتهج عين المدينه
 وتضحک اشفاف الکحل


والجروف ابماينه اتخضر نوارس
والهلال ايصير مشحوف اعله شطنه
ويصفه شطنه
مرايه لخدود الشمس

والشمس تعکس ضواها اعله النخيل
ويضحک الفلاح ذاک الچان
بس حصته التعب
والنخيل ايبدل النور ابگصايب من ذهب


ونحصد ابچفنه السنابل
 حتي ينغث الجراد
والسموم ايهاجر امنديار اهلنه
ويرجع ل حينه البراد

او ننده احلام الطفوله انگلهه گعدي
الدنيه گامت توها تحله
الشمس حلت شعرها وطاحت ابکل بيت گذله


الگاع لبست ثوب اخضر
توها گامت تنمحي اذنوب الشجر
الغيم کاتبله قصيده وگام يحچيها مطر...

كاظم الركابي

و يشبهني حلم عينج
اطوفن شعرج المبيوگ
واتلگه الحزن گمره
واشتل كل سماري ارموش
واصابيعي نذر عشاگ
يتبدن
خـصل سمره
باجر كل ضوه الدنيا

يلاگينه
باچر والامل شمسين
يلگه وجوهنه
ويرسم معانينه
الوجع نيشان
بعيوني
الحلم نيشان
بعيونج
الحزن ديره غريبه
وناس

ماضاگت بواچينه

#قصيدة_وشاب

مهند محمد .... ( النجف )

مناير سود گلبك ما تدلي التاه
أضلم واليحبك مثلي ما تلگاه
مو اسود وجه عشرتك سوده هواي
مثل گلبك ضبط ما تفگد التهواه
فصيلة دمك أعرفها وأعرف البيك
وشنو بگلبك حجي وشبيك حسرة وآه
رغم هذا وتجي تسألني انت منين
هاي التچوي گلبي على الحب شوازاه
غلطة وعشت حبك بالندامة أستاذ
رغم كلشي وعلي ما گلت الله وياه
لحد اليوم أعيشك تجربة سكران
ادمن عالشرب وشلون چاا ينساه
دربك ياخذك بس ما يرد الراح
وأني شلون عندي بهالطريق سلاح
من باب الجفى للحظرة تگضي دموع
وأگول أنساك بس من بالي ما تنزاح
جااا هيج بسهولة تبيع واحد طاح

وخليني اوضحلك شكو بغيابك اني العشته
ماكو كلام بغرفتي غير الصور بيها انتَ
وعن حلفة الله شكم هدم من جنطتك طلعته
وضليت اشم بيه للفجر وأبچي واعاتب سكته
وبعت الاكو والما أكو بس حبك الما بعته
بايع أسراري على الخلگ وانه وحق هذا الدمع
ما أذكر السولفته
كلشي بگفاك تعلمت اكتب وادخن للصبح
بس وجهك انت وغيبته يومين متحملته
قررت وحدك من رحت وأتحمل القررته

انطيت كلشي وما تجي من عندي مدري ششايف
وكلشي يخلص بالزمن .. فرگتك ؟؟ تگضي سوالف
ما أريد ترجعلي بعد هاي الحقيقة وأسف
ما أريد ترجعلي بعد يا ولفي كلش أسف

كون گبرك يالحسن بالناصرية *

الناصرية العظيمة و الكبير محسن الدخيلي ...




افا .. يحيف الله ..
لا مزار ولا صحن وبلا بِنية
كون گبرك يالحسن بالناصرية
والله تبجي الناصرية ..تبجي الناصرية
عيونها التنزف مرارة
اترابها الينزف حضارة
انت شايف كربلا بيوم الزيارة؟
انت ابن حيدر علي ..!!!! حيدر علي!!!
ومالك مزار؟؟؟
وعدنه سيد جابر بگبة ومنارة!!
كون گبرك يالحسن بالناصرية
خاف گالولك خبيثة!
والله بيضه اگلوب اهلنه
اسأل الحبوبي عنّه ..
شيعة كلنه ..
واكبر جامع بـ ذي قار
گبة جامع الســنة ..
لأن بيضه گلوب اهلنه
خاف گالولك خبيثة ..
نعم ..عسرة الناصرية وما تمض بيها السنون
اولاية صعبة الناصرية اتغذت بحلگ السجون
اولاية توجع..!
خشم سمرة الناصرية ..!!
خشم سمرة الناصرية وشتموها
الشتموها افضالة الما يستحون ..
الناصرية ولايتك كتبت شعارك
انت ..انت ..لا ولاية ولا خلافه ولا امارة...
غيرك وغير الحسين ..
ولا حمل من غير حملك حملته
ﭼـم يزيد الصار وگفت سبته
وﭼـم عظم ريس ..صعب بس بلعته
وﭼـم عزيز الراح مارد ..بالحلم سب الحكومة ..
وراح من تقرير مرته الكتبته ..
كون گبرك يالحسن بالناصرية...
ولو ما يرجع بعد ذاك الزمن
بس هيه منوه ..
هيج ويسويها الله وبخت ابوك
وصايم برمضان وافطر بالصحن
ومن ارد لـ اهلي اگلهم
والله بابا اليوم شو مالي خلگ
وبراسي حسبة ورحت ازور
والا اگل لـ اهلي جنت يم الحسن
لا مزار ولا گبر و لا بِنية ...
يمن فدوة يروحلك ذاك الوطن ..

علي عماد


واعدها ابسنابل تطي خدها الگاع
وتضحك ماتخوشن خاطره اليحرث
تره الضحكه حرز بسوالف العشاگ
والموش ابوكتها اشما تزود اتغث

اتحسه اشگد ترف لو غازلك نسمات
بس تلگاه عجاج الهوه امن ايخبث

عيش اعله گد حلمك واقتنع مرتاح
ولاتنغر الدنيه اتواعد وتنكث
تره الكثرن احلامه ايعيش مثل النار
اشما يكثر حطبها احلامها تورث
نيشِن صاحبك مو كل نهر للماي
الصافي مرايتك والخابط ايلوّث

عمرك بيت روحك صفنة صفنة ابنيه
موش اتحط رخيص اتخيّر وأثث
تره اليهتدي ابنجمه ايضيع من كل غيم
الطيف الما يحن بالعين مايمكث

الحط روحه ابدلو صح وصل بس مشروب
والظل عايش البالبير متشبث
واصعد.. وآنه اگلك لا تظل بالبير
بس بغير كهفك دوم لا تلبث
ودَوّرلك عذر للماتريده يروح
تره كلشي البوكتك عالفراگ ايحث

هيه العين حتى ابلايه حاجب عين
المكملك وعافك چم افه ايورّث

حط روحك ابسرك موت وانته اتعيش
جروحك مو نعمتك بالك اتحدِّث
وذَكِّر تره الروح ابلايه شوگ اتموت
المهره الما تعت اعنانها اتخَنِّث

دين الحب عمر.. من تختصر معناه:
(الفرصه البالعمر مرتين ماتحْدِث)

كاظم اسماعيل الكاطع


متت بس شعرك اموزر
على طيور المدينه التم
مثل لمت الضوه برازونه الهندس شمر روحه
صاح اشمال هاي الناس ظلمه تعيش
بح صوته اثاري الصوت للغرگان
محد يسمع بنوحه
رسم بالظلمة فكرة وعايشة بلوحه
رسم گلبه شاف الناس ما مهتمه بجروحه
ضل يرسم ...
ورسمه اصبح رسالة وينقري اطروحه

على الميتين ...!
شر دمعة على احبال الرموش
وشربت اخدوده دمع شوفه
انت اول كلام انگال بس مافهمته احروفه
وبدت بالظلمة لمعة خوف
وبليل ودرب تايه ...
كلمن ميت بخوفه
وعلى خوف الجثث هم خاف!
درب دم وبقايا ارماد من اعظام محترگه

خنسه الدرب من يمشيه ينگل چدمه بالبسكوت
خايف لايفضحه الشيب بزلوفه
وبدت تدنه هاي اللمعة لعيونه
جرح گلبه ونزف روحه
بده يشخبط بدمه ويمسح اللوحة
حتى يضيع بين الناس
حتى ايضيع بين اجساد مطروحه

لحدما صدت بعينه
وقراها وشافها النجمة الرسمها بكل تعب روحه
وتحسف لأن شخبط على اللوحة !
ونسى اجروحه...!
لحد ما مات بين اجساد مطروحه
لحد ما مات بين اجساد مطروحه...