يجي يوم وبالحلال بزفه افضحك
يجي يوم اهمس بذانك
همسة العرسان ذيج
المدري شيكولون بيها....!؟
المهم تضحك ...





#مرتضى_مطشر

|| واثق التميمي ||

بما ان الشكوى لغيرك مذله ....

أي يربي
الدنيه والوادم گضتني
العوز كبرني اعله ايده
امنعثر اتچه اعله ضلي
وچلمه اسم الله الچفتني
زلمه مگطوف اعله صفحه
وحته ال شلونك جزتني ....

من اضحك بعيدك واكيف .. بين ناسي
ابقى اساوم .. ابقى اصيح
ضحكتي احليوه ابلاش وماكو شراي لضحكتي
وبالچذب محد ضحكلي
اتغورج اعيوني الدموع الناس تلتم كلهه تدفع
كلهه شرايه لدمعتي ...

اي يربي
تدري ؟؟ ابو اجيوب الثگيله بعين ناسي يصير حضره
لابخت عنده ويشور مدري ليش الناس طوافه اعله خصره
وياهو يتنوع لطولي
وآنه جيبي بگول اهلنه
(( يغني بيه داخل حسن ))......

وآنه حاير ....
جيبي چن سكران كلش مستخف
من تمر زفه لهواك يگوم يرگص
وأنعم الله امثگله باكيت (الجگاير )....

اي يربي وهنه هنه .....
شگد غشيم بلايه راي وچنت اظن الغربه من نترك وطنه
وانه وين ورايي وين لاياربي الغربه ثاريهه من اهلنه
الغربه .. من ينسون بابك ربعك البيهم محنه
الغربه .. من تشوف اسمك فاهي بحلوگ التحبهم
الغربه .. لو فت بدربهم
الغربه .. من ولفك يسميك الفقير

اي يربي العازه كلفه
العًوز چفه بچفي كايد
وشرد اسوي... اي يربي
العندي ضل بس الظمير
وخاف ابسط بالقصايد ....

ها يربي ...
الدنيه والوادم غميجه وياهو يحچي ..
العيشه گوه
وتدري ابو الروح العزيزه بگلبه يبچي ...

ربي مدري ...
الدنيه غربه التالي شنهي
خاف باچر هم اموت ومحد يمر اعله گبري ...

ربي بس انت الصديج اليگضي عازه
الدنيه گطفتني اعله صفحه وهل اجيتك
.

مهند الطائي

ضوه السرداب
ـــــــ

ليل اسود
وگلب الديره گلب اسود
والرحمه خذاها الروج..

مدري الوين...
مدري انبلعت بيا حوت

وابنادم نبي چذاب.

عايش دنيته بوجهين
..
وأهو مايدري يمته يموت
هسه يموت.. غبشه يموت..
عكبه يموت..

محد يدري يمته يموت

محد فزع صار ارغيف...
للجوعان من طگت حناجر صوت

كلها تصيح جوعانين
كلها تصيح عريانين
شمتانين

يمته تعيش بيكم نخوة العباس.. يمته

تمثلون حسين

يمته يصير عدكم للفقير احساب..
ما بين اليجوع وشبع فكة باب

ديره مخفته وبيها الفقر مذموم
بيها الصدگ يتلولح جسد معدوم

ديره مسلطنه بموت الضمير تعيش
ديره تريد فكة باب

هندس عايشه

وتمدح ضوه السرداب
..
..
....

عقيل العرد


شوكت اشوف الناس تندلك صدك ؟
بينك وبين ابو فاضل بت علي وجربه عشك

شوكت اسمعلي قصيده بلاسياط ؟
ومو امتون ام الخدر بيه زراك
رايد اسمع بيهن حجايات بت حيدر زرك

خنصرك لو ينسكي بجربه ضوه يطك بي هرش
وترجع انته ،، الكلش انته،، تكودنه بجفك لباجر

جيتك حيل بمحلها ايامها الحيره اعله حيره
وصادفت صفنه مناير

الكاع جول ودبه شريانك خظار
وركضت الحنطه اعله مد شوفك ضفاير

وانته هيست النهر هندس علينه...
ونكطت من عين دمك تسع ضويات وكناطر

السالفه انته مكيفلها
سهامهم طردتها اهلها وهيسن گلبك جبير ...

السالفه انته مكيفلها
وياك حتى العطش كضاها اعله خير ...

السمه بور وغصن ذرعانك نفض سبعين طير

شضوكتهم ياحجايه وكلها طشت روسها كبالك انذوره ...

وزينب شهوست يمه ..؟
وكطع العباس جفينه برهاوه وگالهم وثقولي صوره ...

طوقك ليل ال اميه ..
ودفت ربعك بالطفوف هلال من ذاك الملح

وعفيه راسك مامعبر الدنيا كلها

بذاك وضعه ..
وكف يتفكر بهيده شلون يكشخله برمح

وعفيه خدك باس الحجاره بكل برود
هاكثر خدك مؤدب ...وهاكثر جفهم وكح ...

وعفيه زينب واكفه وتهمس وراك ..
فوت بيهم هول وتالي تلا كلبك ذبح

مطلع النبله بنحر طفلك جبير وراد من عندك قصيده
وكمت طشيت النجوم الظامهن عبدالله للسجه بوريده

انته وابنك عيريتو الغيمه من ظمت بجيها
وكبل لاتمطر عليكم كتله خل نمطر عليها

وها حلات الله بضميرك ..
ساوموك بكلشي بس مالك شغل

الدنيا باعتلك شرفها وبعت ع الدنيا ثكل

انته واهلك شايفين وعايفين
الله بيده مسگملكم شاره ودلال وعگل

يلمسوي الطف مضيف !!
وسفرتك مديتها بطول الزمن ....

هـــا!! وابلاش
عزبت حد ماسمعنه المانسمعه ! يصيحلك يحسين اواااش

شمس راسك غربه تتمشرك عليها ...
ودفه جم جيفارا بيها
واحنه مانندل حجيها

وتايهين ،،، وحكنه لو تيهنه راسك
في رمح راسك ثخين

انته فوك الحجي كله واحنه مو يم الحجي

فاهمينك بس مناحه ودك زناجيل وبجي ...

الزمن طايح من زمان وفوك ظلعك منتجي ...

ومايعرفونك لحدما يعرفونك



#

حسين الحبتري


طاحلك كلش هواه
ومن طحت مامدلك ايده... 
لوم روحك
دوه العار 
وجوه ووﻻيه جديده. ..

ﻻصحتني
وﻻخذت من خاطري
وﻻفطن زلفك كالبه بجفه التراجي.... 
وﻻخذيت حجايتي الدفنوه غريب
يموت وبنفسه البواجي...

وعلمودك كابرت روحي بعطشها
وباوعت للماي بعيون الشلب

وكون تدري
المايجيبه الشوك خطواته جذب...

عيش مهظوم على ظلك
من تلوحه الظلمه ويعوزك الحيل
وتيه بس صيح اعله كلبك
من عمرهه الصوغه لو تيه الريل

وﻻتكلي العافيه
مراد الكصب لهل الصريفه
وﻻتكلي الجادر
من يطيح يتعب مو بكيفه

ولوم روحك
ضحكة متاني عزيز
وليل كاع تكاتلت بيهه عشيره
الماي من يعبر السده يطيح كذله
ويلتم بوجه النهر شمرة ظفيره

عوفني الفشله عبايتها الصبر
وضوك ليل التشتهي عيونك
تشوفه ومايمر. .
سنين وانه السهر حصتي
وشرد اكولن
والكحل فصليه ينزف للرموش الماتريده...
وﻻتضيع وكتك وتشعل بخور
اليدعي للميت يفيده. ..

مره الم روحي اعلة كد مرايتي
والكاني اريدك. ..
ومره يصحه مكاسر الكوس الغوتني
بيش افيدك. ..

وبيش افيدك
وانه حفنه تراب منسيه بكفه الشباج وابجيلي على ريح. .
وانه فحطة طير مذموم بسماي
ونيتي بانيها على اطيح. .

يشكك هدومه الورد من يطك عوده. .
وتوصل لسابع حلم كل نثيه اخوه
العافيه مصرفنه زنوده. 

عوفني 
الحيطان عثره بسجة اليمشون صوت
عوفني الماي التلوحه جفوف اديك
تلبس لمكفاه بتوت. ..

بيه مية باب مفتوح اعلة كلبك ماخذتتي؟؟؟
من يدك هاون بعد بالديره خير


ولوم روحك...

علي عجيل


انا المجتوف ما يفتك
انا الينشاف جنه بخير
انا الجذاب من يضحك

انا الضايع كحل بليل
انا المبيوك انه المامش
انا البس اسمه بشر عايش

انا الخلكه ظرف مشكوك
انا الثكلت عليٰه روحه
انا الكل تايه وكل عابره تلوحه

انا المتروس صدره عتاب
انا العينه عله دكت باب
انا المادري شكبره
انا الباكه بياظ الشيب من عمره

انا الضاعن احلامه طيور
انا الماله عمر يسوه
انا الفدوه
انا الحته احله ايامه كظن كوه

انا الينشد
انا اليفكد
انا المتركد تركد

انا الينلجم من الريح
انا الوي الغروب يطيح

انا البس بلحزن ينكال
انا البلغربه يتغنه
انا المايوم جفه تواعد بحنه

انا المدري عدل ميت
انا الماينشد عنه ....

حسن وصفي


(غنوة وطن)

غربه الوطن والريح مو ريح
ودار التعب مثل المراجيح..
وغنينه غنوه اعله السمه..
كل نجمه مشتهيه السهر بعيونه اطيح.
شيصير لو لمنه الوطن مثل التصاوير...
شيصير لو حط الوطن واحلامنه اطير

فقره ورسمنه ايامنه بسد الزناگيل
وامتونه اعله المامش تشيل
وشمس التعب جنهه التراتيل !

وكون الوطن بجيوبنه يصير
وبكيفنه نحط المگادير....
نرسم فراشه اعله السراديب.
واعله المناير تل عگاريب..

يا شوگ خذنه بكيفك وجيب
وغنينه حد اخر مكاتيب.
وسافر لحد ما رجلك اتعيب !

حزن وقهر جبنه العمر فرة فناجين.
ليل وضهر نداور ابحل الدكاكين.
بذاك الشته وبرد الدرابين
تارس ضهرنه الماي والطين !!

غربه وعرفنه الطيش بلشيب
نستاحش انطب للملاعيب.
ونستنه جانت جرح ويطيب..

شوگ و دمع فر بلعمر مثل النواعير
ااخ الدهر غنه الفجر وارموشنه ادير ..

شيصير لو بيامنه ضحكت ونس
شيصير لو كبل الفجر يطلع عرس

يا وطن يا روج البساتين
بيك العنب غطه السنادين
خيرك يجي ويروح للدين ..

اشموع الفجر غنينه الك كل الدواوين
بورقه وقلم خطينه الك كل العناوين

وسولفنه همك للگمر باگة حزن
كلناله هنيالك اتبات بكل وطن..

ااااخ الوطن صبح تواسيل
صوت الحزن غطه المراسيل..

شيصير لو لمنه الوطن مثل التصاوير...

حسين الطاهر


هذا انه....

كون الله يحاسبني كبل ما اموت
شني تعبان بالدنيا او وراي حساب بالتابوت

كافي من الحزن والموت
كافي الدم كلب لونه
حتى الذابينه اهله تره من يطيح يردونه

عمر يانوح يكضيني
ولك وانه اليصيح احاا يبجيني
عليمن خلصن اسنيني
وحك شوغة العوز انه اطلب اسنيني

يرب كافي
التعب شيريد شمسوياتله اجتافي
وحك جوية الكاع لكل جدم حافي

انه التعبان
انه الخسران
انه اليختل بروحه كبال كل ديان
(الينام من التعب وي صوت الآذان )
(ويفز من الصبح بالباب ديان )

انه الما وافي للصحبان
مو خاين ولكن ماشفت صحبان
بعد وين اوصل ليا موت
ليا سجة عذاب يضيع بيها الصوت
انه الهدو عليه الريح
وكل اسنيني صم تراب
انه الطايح بكل باب
انه المامصوب دوم بس عايش وجع لصواب
انه التعبان من روحه
انه العافوه هله وما عافته جروحه

هضيمه اتحاسب بموتي
وكبله محاسب الف حساب
هضيمه انجاس من كلشي وانه الما اجيس بس روحي

ظرف مسدود
كظيت العمر مكيود
العمر حيطان مهجوره
ثكل بيها الجفه وطاحت
بعد بيه صلاة للخوف
وتعب جيلين ومناهت
يرب وانت التشوف الحال
ملتني سراديب الضلام انطرح بيه هلال
مشه بيه نزيز الخوف
وصل حدر الضلوع ومات
وطلع دخان من روحي
اثاري الخوف بايك واهس جروحي

علي نغيمش ...



لشوكت تبقى الكلبچة ابتوت اخوي
لشوكت
انه اموت ويبتلي بفاتحتي ابوي

لشوكت تخرط بخدينهه امي
لشوكت هاااااااكبره همي
لشوكت فدوات دمي

لشوكت نبقى عبيد
انه اريداً ثوره
تحچي صاحبنه الشهيد
انگله دمك ذاك مارايح هدر
انگله مرتاح الستر
يم السدر

انگله مرتاح الخضار
ومايمر بينه الصفار
انه اريد اتغزل بخير الوطن مو بنفجار
انه اريد اكتبلي عن منجز
بكل عز وافتخار

ماريد اكتب الأخ وي القصيدة
والله احب العيد من تضحك عبيدة

حيل احب الأخ بس للخوه كون
ماحب احب الحزن من تبچي العيون

انه اريداً حزني بس اعلى الحسين
كون بس اعلى الحسين
مااريداً حزن يومية ونين
كون بس اعلى الجفونه بقدرة الله
كون ياربي اصلي القربتك مو للمصله

انه اريد الحب شعار
وكل محب يختار ربه
مااريد الناس تتحكم بگلبه
اتمنى اشوف الردته لو يوم وموت

اتمنى اصيراً صوت للماعندة صوت

باسم الخاقاني


وره البرگع مدينة خوف !!
والكحلة درب حرّاس
غنّوا عالرمش بهداي
أشتهي السكته التسولفها
العذاري الساكنة عيونك
بلم متونس إعله الماي

عذابك..ليل
ما يرضه بحزن بارد
ولايرضه بدمع مبيوع
عذابك .. والدمع من يلتفت ممنوع !!
تضم اسرارك بيا ليل ؟
ما تدري الگمر .. راس الضوه المگطوع !!
إشمالك
ياعشگ تنباگ
إشمالك يافرح تنباگ

بينه أسرار مضمومات
همزين ولبسنه إعله الگلوب ضلوع
ضمّ گلبك
ترى عيونك نبضها مبين من الخوف

شحلاتك من تذب الخوف !!
شحلاتك
من اشوفك بالعشگ مديوف
تچملني عشگ وانخاك
دخيلك رايد جناحين
احس گلبي بصليبك ياعشگ مچتوف

وين تريد؟
وأنت أول نبع بالروح بللني
شحلات أسمي
لمن ثغرك يسولفني
ألج يم رجفة اشفافك
واتهجه خمر ذايب ،
خمر من كل الضمه يلمني

إبتسم ،گلبي أمانك
من تسر الروح
إبتسم ياروحي العذيبي
الخلگ دخان
وچملني بحريرك
مشتهي اتبده عالطول ولايتك آذان
حدر فيّ شجرتك لو نمنه !!
لأحضنك حضنة الرمان
خوفك ما يلوگ النه
حدر خوفك أريد اشتل صلاة أمّي
وامسح ليلك بقرآن
شحلاتك
من تذب الخوف

شحلاتك
من تنسيني ، وتسامرني
بس دمع العشگ لايگ عالعيونك
وره البرگع مدينة شوگ !!
وره شوگ المدينة إنت
والدنيا نهر نسيان

ماعدهه رجل بس هي مدري شلون
ترفس بالضلوع حجاية البطران


حسين السيد نور ... وقصيدته


رجفت شففتڬ واتبده منهه الصوت
ومو وجهڬ کلامڬ گام ینطی الوان

من رجفڬ عرفت الغیری راح اتروح!
من یرجف بعد مایرجع الفنجان

هوه اشگد وابفرگتڬ مدری وین ایضیع!
احس من گد خنگتی ایبذر الغرگان!

حارگ صورتی؟امدنیهه یم النار!؟
امس باوسنی جاری ابوجهی شم دخان!

رسایل عشرتڬ تارسهه کلهه احساس!
من ینشگ حرف ینکتل بیه انسان!

بس الگعد وحدة ایعرف طول الیل!
السولف للصبح ماینحسب سهران!

اذا مششط چنت من شعری یوگع رای!
هسه الدرب واحد وآنه بی حیران!

وچنت هیبه امن اسولف تسکت الخیرین!
بعدک سولفت ماسکتت الخرسان!

نکتب علشجر والذکریات اهوای!
دفتر ذکریاتی ابعشرتک بستان!

آنه ابکل مکان امخلی بیک آثار!
حته النفس مالڬ عدی بی نیشان!

ابرگبتڬ من بست خلیت اثر بلصوت!
و امن الشبگ ضلڬ بی اثر ضرعان!

من گدما ذکرتڬ هزلت طرواڬ!
اسمک لوتنکته ایطیح منه السان!

وجهی امن الصفار الظهر ماینشاف !
چانت لو امقطه اتشوفنی العمیان!

وتجاعید الوجه ینقرف منهن مای!
کون ابعصر نوح اینشفن الطوفان!

وماعدهه رجل بس هیه مدری اشلون!
ترفس بلضلوع احچایت البطران!

ومن کثر الدمع یزلگ ابعینی الطیف!
لعیونی ابوجودڬ حافی یدخل چان!

چنت افرڬ اعیونی اتبلل ایدی احلام!
بحیث امن ایدی ابین لوچنت حلمان!

انه ابنص الصخر بلشعره حافر بیر!
هسه امن ارمش افحط کثر ماتعبان!

وگدما انتچی اعله الگاع حته الدود !
سکن بخطوط ادیه و هاجر الگیعان!

ابدمعی اتغسلت واتچفنت بلشیب!
انه اجنازه ابغیابڬ عوزی بس دفان...

عقيل العرد ... والنعي

ياصاحبي فكدك شكبره

مكسور بيه البيه جبره
شك صورته الموت وتبره
برموش عيني ارد الضم ابره
وبشوفي اخيط ضوه الكمره

رايح يضي عيني او وسنهه
باشط يالمكطع لسنهه
يالما فلت بيدك رسنهه
خليتلي الدنيا بحزنهه
ونة الروح بهيده اونهه
وسدره وطفل كاسر غصنهه

آآ يا كسر مامنه جبره

ياثوب اهلنه ياحجي الجود
من كون عينك فصهه ممرود
انه بدليلي اوجار نمرود
عكبك صفه ملبوسنا جرود
للحزن موش اهدومنا اشهود
عكبك لبسنا ايامنا السود

وارياكنا وكهوتنه مره

بشاطي النجف شكيت زيجي
جا ليش ماسيس غريجي
يومين مابين صديجي
انخامن من ايضكني ضيجي
العميان كادتني لطريجي
من القهر صك دمك بريجي

ودم بالنفس للريه اجره

حزني المبين بيش استره
مفضوح جن دم اعله غتره
يابحر حزنك بيش اعبره
طورك عله الميتين يقره
مايك يتعبني من اشمره
ولا واحد يحطني اعله كتره
يابحر من تشوفه خبره
بين النجف والروح كبره

فراكك بدم وماي رشنا
موتك غزه الديره ونهشنا
كلبي انفرك بحجاره خشنه
صاحو عراضه وماغبشنه
وثنينا شالو نعشنه
بصبخة الموت العمر طشنه
ناكع هدم خدنا بعطشنا

اعصر وارد بالماي اشره

الراحل الكبير رياض ابو شبع ...ولوحتهُ (دعه الحفار)



يغيرك غير ..!
طبع منك يعلمني ..
وطبع منك يدوهني واگلك فوت ..
واشگ بجروحي الك سـﭼـة واگلك فوت ..
تعلمنة الصدك منك ..
واگلك يالمشيت بروحي وي الريح ..
اسـﭻ وجـروحي تاكلني ..
واحلم بالعطش يحرگني نص الليل ..
وانه شما عرگ جرحي يلمة الحيل ..
و يغيرك غيـــــر...!
ويغيرك غير بعيوني ..
اشوف الناس سكتة ..و ودعوا تابوت
واشوف اولاية الطاعون ..تاكل بالجراد
وريح صفرة اتمر على البيبان ..والذبان ..؟
والذبان بعيونة الأميـرة ينام ..
وحفار الگبر عالمسرح يصلي صلاة الموت ..
يصرخ لو يموت الملك ..
والگة اشما ادگ فاسي وزير يموت ..
ولو باجر يكبرون الزغار ابساع ..
حتى ايمر عليهم ربي رب الموت ..
والفاس الجديدة من التعب تكبر ..
وادگ بسمار كل ما طگ جرح بيها
واخليها بوجه اصفــر..
تطش الموت عالوادم ..
والولايات تحلم ..لو يمر حطاب
بيدة جروح خيطها العرگ والطين ..
والولايات تحلم..لو تمر بيها الشمس خطار
واحنة ازغار ..نحلم بالخبز خطار
و انه الخلّوا على اجفوفي حفنه اوجوه ..
واحد ابيض ايلالي مثل شط العرب بالليل ..
و واحد اسود ايلم ليلو للتيجان ..
و واحد اسمر ..ومدري شگول ..!!!
امه الشمس وجروحه بيها اسرار ..
و واحد ..و واحد...
وانه الما يلهيني الجرح عن العطش والجوع ..
امشي سنيـــــن...
ابحر و الـ اشراع الروح..
ياخذها المطر والريح ...
والدنيه كباحه وليل
وينگط مرار ويغسل اذنوبي ..
وانه اشما جاسني الظيم وتعداني ومشه بيه
انه بـ ﭼـف ابيض امسير على الدنيه
وعيوني اعله مد الشوف ..
ياخذها العشگ والشوف ..
لو شوگي جبير وشمعة الديرة ..
فراتيين ..فراتين سوينه الشمس سـﭼـة
مشينة ابلا نجم والليل دلانه ..
سنابلنه ومناجلنه ومساحينه ..
تقره اوجوه الولايـــات ..
توّج بين الـسـﭼﭻ ضويات ..
والراعي التعلم بس يغني للمطر ..للگاع
كبر رايه وعشگ نايه ..
وحلم مره اعله بيبان الجبيرة امعلگة جروحة ..
وعيونة تسولف للگمر للطين ..للطيبين ..
تقره اوجوه ..تقره اوجوه ..تقره اوجوه ...

||كريم سالم||

هذول احنه
كطن
ونتم حجيكم نار يحركنه

شمس
والليل يكتلنه

جنط
غربة وتفرهدنه

سكاره
وبدرب تهنه
غرب
والنشد يوجعنه

بلاعرفه
وتعاندنه

جهال
وكلشي يعجبنه

غنه السبعين
ياهل يفتهمنه
وياهو يسمعنه
على الفطره

وتعذبنه
هذول احنه
شني تسمينه
سمينه ...
.
.
.

حمزة الحسناوي.....


دورت اصورك بعيوني
مامش صورة لگيت
الطم حد ماذب امتوني؟
لو ترجع للبيت..

ليش تكبر جروحي
جا غير انت بروحي

بمجان التكعد سيرنه
شفناه خالي وما سلمنه
گبرك لو مثلك يسمعنه ..
جا حن ورداك ..

ما كملت ضحكة صحبانك..وينك
عيني تدور بين اخوانك عينك ..
لو ماخذنه اوياك ..

يل بس انت تشابه لوني
يل الغالي اشتاگيت
دورت اصورك بعيوني
ومامش صورة لكيت

ملتمة الناس وفاگدتك ..
كون بعرسك مو فاتحتك
حلفت الگاع الشايلتك
وي روحك بهداي ..

مو جنت انت الضحكة بدربي احجيلي
شو صار اسمك يشلع گلبي وحيلي
دارت هسه اوياك ..

شالوا تابوتك شالوني ..
بمجانك يا ريت
دورت اصورك بعيوني
ومامش صوره لكيت ..

يا صاحب گلبي ويوليدي ..
خشنة الگاع و مو مثل ايدي
عاشور تگرب وي عيدي
من گالوا دفنوه ..

نصبوا جادر حزنك هسه ..الغالي
ولا گتلهم جادر عرسك باقي ..
صحبانك زفوك ..

انزل گبرك ما خلوني
يل توك شبيت
دورت اصورك بعيوني ..
مامش صورة لكيت

حيدر الكناني



تحملني الشمس منّه

واهي من اتغيب چف حنّه

ياما شكثر بالشده طفتلي اوجوه وانه ياما تعبتلها

يوج ليلي الگمر شمعه وتريده الناس بس الها

ناس اتريدنه بسد غيمهم نجمه

وناس اتحب تضحك اجروحنه ابلچمه

او وادم چان كل همها تزف روجه الچوالينه

وتحملنه ذنب هدمه

خل كلها تلم روجاتنه امن تفوت

المشحوف اذا نده ضحكته اتموت

لحصد ليلي من كل نجمه الكم بي

وابد ماهابه لو چلچل

الگمر من ينولد منجل

بده موسم سجي بعيني وتعب فلاح

غشيم اتكشمرت وي باب بايك ضحكته المفتاح

بوكت جانت رفاكه اهواي

منهدها اتأكدت شوف السراب اشكال مو بس ماي

رفاكه الباگت الضحكه ندهت دمعتي ابهيده

رغم مافرعت حزني انوّج للفرح صيده

وادم تنذر الشوفتنه جان انذور

او وادم بالله حلّفت زور مدري شبينها وبينه

روحوا ابريحكم نسمه تره طيحة سعفنه اعكال

باجر ماكو عتبه اتبات ولا نجمه تلوذ ابسد

اكشخ بالسمه الزركه واطرگ كل عبا هرّبد

واردن ضحكة الخلخال واخل روح الشريعه اترد
..

(ابوسن شامة الرگبة واموت هناك ..)

الكبير الشاعر رياض النعماني ..


انه شفت الكحل نهرين فوگ الخد ..
مَن بـﭼـاك؟ ..
زعلت البنفسج و الزعل راضاك ..
ياهو اوياك ..؟
منو غثك من بـﭼـاك ..؟
اموت انه من اشوفن فيّ ورد وازاك
ليش امغير ويايه ..!!!
هلك ...لو ناس ...لو واحد عليّ وصاك ..
عمي عليك انه اموصي الصميده ..
بس تعال اهناك ..!!
بس خليني اشوفك غربتي بلياك ..
يالمايل على روحك غنج ..
ونعسان من كثر الحلى ..
يا عطر من قداحه ترفه امبلله ..
والله انه خايف من عيــونك ..
على عيونك يعيني امدللــه ..
اشـ هالبعد مو جبنه ساده
وگعدوا الـصبه ..وعجدنه راية العباس ..؟
وانطشت هلاهل للرضا ..!
وكلمن رجع فرحان يا روحي الهله ..
جا ليش هيج اتمر عليه بغيض ..؟؟
وما تقبل اجي اتلگاك ..!
انه على ظلك يتعب اعله الگاع ..
خليني اشيله بروحي وامشي اوياك ..
و اعله البعد ..وبهيده ..ومتدري انته ..
ابوسن شامة الرگبة واموت هناك ..

((زعلان بس يا زعل))

كاظم اسماعيل الگاطع ..

ﺯَﻋﻼ‌ﻥْ ﺑَﺲْ ﻳﺎ ﺯَﻋَﻞ
ْﻟﻤٌﻦ ﺗِﺮِﺩ ﻟﻠﺼِﺪِگ
ًﻗﺒﻞ ﺍﻟﻤﻨﺎﺩﻱ ﺃﺟﻲ
ﻭﺷﻠﻮﻥ ﺟﻴٌﻪﺃﺟﻲ
ﺃﺭﻛﺾ ﺭﻛﺾ ﻣﺤﺘﺮگ
ًﻳﺎﻟﻠﺬﺗﻚ ﺇﺑﻤﻬﺠﺘﻲ
ﻭﻳﻦ ﺃﻟگًـﻪ ﻣﺜﻠﻚ ﻫﻮﻯ
ﻟﻮﻻ‌ﻙ ﻭﺍﻟﻠﻪ ﺃﺧﺘﻨگ
ﻫﻴٌﻪ ﺷﺮﺍﻛﺔ ﻧِﻔَﺲ
ﻟﻮ ﺳﻜـت گـًﻠﺒﻚ ﺳﻜﺖ
ﻛًﻠﺒﻲﻭﻳـِﺪِگَ ﻟــﻮ ﻳـِﺪِگ
َﻟﻮﻣﺎ ﻭﻛﺘﻨﻪ ﺻﻌُﺐ
ﻣﺎﺟﺎﻥ ﺃﺑﺪ ﻧﻔﺘﺮگ
ًﻛِﻠﻤَﻦْ ﻣِﺸﻪ ﺇلـﺣﺎﻟﺘﻪ
ﻭﺍﺣﺪ ﺳِﻜﻦْ ﺑﺎﻟﻐَﺮٌﺏ
ﻭﺍﺣﺪ ﺳِﻜﻦْ ﺑﺎﻟﺸﺮِﻙً
ﻛﻞ ﻫﺎﻟﻤَﺴﺎﻓَﻪ .. ﺍﻟﺒﻌﺪ !!
ﻭِﺳﻮﺍﻟﻔَﻚْ ﺗﻨﺴﻤِﻊ
ﺟٌﻦ ﺇﺣﻨﻪ حـﻠگ ﺇبـﺣﻠﻚ
ًﻭﺍﻟﻠﻪ ﻋﺸﻜًـﻨﺎ ﻋﺸﻚ
ًﻳﺎﻣﻦ ﺇﻣﻜًﺪٌﺭ ﻋَﻠﻲْ
ﻏﻴﺮﻙ ﻓﺼﺎﻟﻪ ﺻﻌﺐ
ﺟﻢ ﺩﻭﺏ ﺃﺧﻴٌﻂ ﻭ ﺃﺷﻚً
ﺣﻨﻴﺖ ﺃﻧﻪ ﺇلﺷﻮﻓﺘﻚ
ﻭﺍﺻﺒﺮﺕ ﺑﺲ ﻣﺎ ﺻﺒﺮ
ﻗﻠﺒﻲ ﻭﺻﺮﺥ !! ﺭﺍﺡﺃﻃﻚً
ﺟﺎﺑﺎﻧﻲ ﺇﻟﻚ ﻭﺇﺫﻋﻨﺖ
ﺟﻴﺘﻚ ﺑﻠﻴﻠﺔ ﺷﺘـه
ﻇﻠﻤﻪ ﻭﻣﻄﺮﻫﺎ ﺭَﺷﻚً
ﻭﺷﺒﻌﺪﻩ ﺻﺎﺭ ﺍﻟﺪﺭﺏ
ﺧﻮﻑ ﻭﺭﻋﻴـــﺪ ﻭﺛﻠــج
ﻭﺟﻔﻮﻑ ﺇﺩﻳـــٌﻪ ﺯﺭگ
ًﺇﺑﺎﺑﻚ ﻃﺤﺖ ﻫﺎ ﻛﻤﺖ
ﺿَﻤٌﻴﺖ ﺇﺩَﻳٌـــﻪ ﺇﻭْ ﺭِﺩِﺕْ
ﻋﺎﻟﺒﺎﺏ ﺑﺎﻟﺮﻭﺡ ﺃﺩگ
ًﺑﺲ ﻛﺎﻟﻮ ﺇﻟﻤَﻦ ﺗﺪﻙً
ﻛﻠﻤﻦ ﻣﺸﻪ ﺇﻟﺤﺎﻟﺘﻪ
ﻭﺍﺣﺪ ﺳﻜﻦ ﺑﺎﻟﻐﺮﺏ
ﻭﺍﺣﺪ ﺳﻜﻦ ﺑﺎﻟﺸـــــﺮگ..

نصوص... كرار ماهر


• تعلمّوا الأنسانيه من هنا / " لا يوجد لدينا فرع آخر "
( عباره وجدوها فوق باب أحد الملاهي )

• كفى أتعبني جسدكم
( قميص يصرخ بوجوه أخوان يرتدونهُ لدوام مدرستهم )

• أخلعوا الحمّالات كي لا تتضايق نهودهن
أجعلوا الرصيف سريراً لِولادتهن !

( مراهق يصرخ داخِلَ صالة العمليات النسائيه )

• نجيتُ من عالمكم السيئ !
( عِباره وجدوها في باب صالة أحد المجانين داخِل المشفى )

• تعلّموا الأنسانيه من العاهرات .. من المحتسين للخمر .
( منصف / يصرخ بوجوه المعممين )

• يأتون لألتقاط الصور فقط : لا تقلقوا
( ساحة التحرير تتحدث مع السياسين )

• لقد عطلت : أذهبوا لم تحصلوا شيئاً من الأغنياء
( كامره تتحدث مع الفقراء )

ويحدثُ أصدمُ رأسي بِجدار غرفتي لأجدُ مبرراً للصِراخ النائم بداخلي .

قلبي متعب جداً .. كأغنيه جميله جانبُ مسجوناً منتهكْ .

أحياناً الأنسانيه تُزرع بأرضاً لا تليقُ بِها .

بائع الأقمشه ، هو أكثر شخص يُفكر بالكفن .

بائع الكتب ، أحياناً لا يجيد القرائه

بائع المصاحف ، أحياناً يكون ساذج

أكبر أنجاز حققتهُ في حياتي ، جعلت الأنعزال يتفوق عليّ
لكوني أنسان غرسوا أسنان الألمِ داخل قلبهُ .

الغربه ، معاق أستيقظ ورأى أشخاص يغتصبون زوجتهُ .

السر ، يموت عندما ينولد في جوفَ مسمعي .

الدخان ، يموت عند ولادتهُ

البخور ، كالدخانِ تماماً .

النعاس ، يأتي مُبكراً عندما تتكلم مع حبيبتك .

الماء ، يضحك عندما يسقط . ماذا قالت له الارض ؟

يُتهم الأعمي بالنظرِ ألى الفتاة العاهره / هذا في بلدي فقط

وعندما أكملتُ هذا النص أغتصبت شفتاي الكثير من السكائر
من منكم مسؤلاً عن هذا ؟

#المجدُ_لللسكائر

((تهت والعافيه عيونك ))

فراس غالب


ريحة ليل تندهني وأسولف بيڪ
وأتوسَد حلـم ملگـاڪ
وأغفه بحسبة متانيڪ

وأفز محتام لشلونڪ
تهت والعافيه عيونڪ..

أفز محتام وألگه رويحتي تناغيڪ.،

أفز محتام والگه ألشوگ ريحة لـيل
تتـوضه بنبـع طاريڪ

اطفي السالفه التخطيك
وبحظرة السكته احجيك

ابوح لصورتك بالشوف
جم سر بالسمار البيك

واتبعثر وجف الشوك ينثر عمره ويلمك
أشوف أصباي حسرة ليش مو يمڪ

تهزني ألروح حسرة ليش... ماشمـڪ

يفيّ عمـري ...
ومـلاذي وشـوغتي وستـري
خذتنـي ألناس واهس وأنتـه ماتدري.❜

خذتني الناس سلوة وانثلم عمري
خذوني هواي
منك سالفة وعبرة وبواچي فياي

وانته موالف ويه الليل البصدري

لاتذبح احلامي نذور لضنونك
وماضلت تمض بكلبي ال "شلونك "

واندليت ....يالكتلك

تهت والعافيه عيونك