#قصيدة_وشاب
كرار كامل. (بغداد)

_جَرّب مَره
تزَّعل روحك!
تحرگ دَمك..!
_تحس روحك "عالة" بـهالدنيا
ومَحّد يَمك..!
_تصرَخ ٫تتأَفأف٫تتحَسر
تجمد ياماي٫وتتكسر

تلزم عودَك عود تغَني
وما تحضى بـ موال يلمَّك..!
_وَحدَك تبقى
جَراره مغطايه بذكرى
يم رَف أظلم
عند أنسان چفوفه أنشلَّت
بيش يلزمَك؟؟
_وَحدَك تبقى
تلوع٫تنادي

تلدغَك وحشه
تموت بسمَّك..!
_راح تشوف الگاع تنكرك
والوطن ألمحبوب يذمَّك..!
_دْور ألدنيا
أفترها
أعبرها
مَحّد يَـبنادم ياويك
بگد حضن أمك..!

#قصيدة_وشاب

عبد الرحمن التميمي (البصرة)

أمس غنه الحزن بيَّ
واشتهيتك ..
بين كل هذا الضباب
وصوت واهس ،
يفتر بالمدينه الوان ..
أمس كل الحنين يناغي بالروح

امس كل الحزن دخان ..
ياحبيبي ..
انا بجرحي إلك انباع !
تبوس ايدك حبيبي ،
تريد إنسان هاي الگاع!
تريد إنتَ ..
أو بعيد إنتَ!
أو بعيد آنه!
ولك خذني ..

اشتهيتك ياحبيبي ..
انتَ بيدك ،
تگدر اترجعني لايامي المضت وحشه ..
وتكتبني قصيده انتَ بعد تگدر
يفز بيها الضمير اشكال .!
او يضيع ويه الحزن ضيها
او تصرخ للوطن والگاع ،
وتشرب كل عطشها الگاع
او ينبض بالقصيده احروف ،

تتسودن على النجمات!
وتكتب لليعشگون احلام ..
ياحبيبي ..
الليله اشتهيتك ..
وبكل اغانيي تنيتك!
وين الگاك؟!
دوريتك
بطراف المدينه الخذاها الخوف ..
وبكل شوارعها السان ..

ابكل حايط ودكان ..
كل خطوه إلك بيها ألف نيشان ..
بعدك كل مُدنّا ارماد!
اشطبت كل الحزن والناس ..
وبس انتَ الحزن والناس!
بس إنتَ حبيبي الناس.

جواد زغير
.
.

شتخضّر ؟
مواعيدك جزاها الماي .. شتخضّر ؟

عود وما رهم للگاع
ربيع وما لفاك أمتاع ...شتخضّر ؟

وشمناطر ؟
هوه وما لايگ لريتك
ضوه يمر بيك بس ما يضحك لنيتك

نشد ما عرف طبع البوب
شمس تنطعن بالضلمه أويه كلّ غروب
ثلج والناس مثل الگيض تخدر لون بيها تذوب
عمر مشتول بالضلمه سهر وذنوب

شمناطر ؟
مري وما تشتهي رسومك
شحيحه الگاع بس ما تحن لغيومك

دمع تنشف بلايه خدود
تحن والماكو بيك تزود

شمناطر ؟
ولا شبّاچ يقره السومرت بيدك
چمّ إهلال صحته وما سمع عيدك

وچم شمعه بچيت وهندسك وهواس
ليمته تضيگ بيك الگاع من يكبر فراغ الناس
يل مالك عرف بالليل لون الگمر ما ينجاس

ولك يا آخ
لا ترجه هوه من الناس
هذا الليل مو شبّاچ
ولك يا حنّة الماشين
شيلم الضفاير بيك
يملهوف شكثر تنسام
چا هلبت زلف يشريك

.

الاستاذ غانم الفياض

الرسالة الثالثة

يم يا حلم تنتجي
يل جرحك امرايه
ومن يا مواسم تجي
ونجومك هوايه
ماجان عشكك درب

جان العشك غايه
شما طال عمر الزمن
وشما ثكل بالمحن
وجهك يشع مايه
من دم قضيتك شرب
كل الشرف وارتوه
يتنفسك كل جرح وبريته تعبر هوه
فزيت .. باول فجر
علمت حتى الشجر

ماتنتهي وي العطش
من كل غصن يحترك
لآخر نزف بالعرك
تنبت مسافة ضوه
وتشب الك رايه
يم يا عطش تنطفي
وانته ابوكفتك جسر
ما بين شمس وشمس
جف النهر وانتهى

ودمك بعد مايبس
لاءك بعدهي ترن
بأذن المشاعل جرس
تنشاف كلك نهر
من تنقره جفوف امس
وتخضر ابكل صدر
ثاير .. الك رايه
صلي لصلاتك جسر
تعبر عليه من دم

فكت گلبهه السمه ،، وجنحان الك من دم
تبني المجد من مجد ،، والدم تغسله بدم
وتصابح اول صبح ،، بيه الحلم يحلم
مابين جرح وجرح مامش مسافة خوف
وبين الحلم والحلم مامش درب مچتوف
تبقى اعله خد الضوه صوت وعلامة شوف
وتبقى بوريد الزمن ،، فـّي للفرح مديوف

ايهاب عيال ..
.

يطيح الليل فوگ عيوني و اشكيلك
گـوم امشـينه تـچيلي و اتچيلك
تعبت عليك خل نمشي .. النار أدنت لرمشي
كلشي عيوني يردنه .. بس ما حصلت كلشي

تكابر و التدوسه الناس شيكابر
ندم و الخيل تصفگ حافر بحافر
الم عافيتـي لو لمك .. وجهك ماهو شيرسمك
الحافر واصل لطيفك .. رمشت عينك اتلچمك

أهـز بجـثتـك و انـتَ و لا چنـك
نـص منك جزيته و هذا نص منك
العمر لو مه العشگ فاهي .. واشوف اعمامتك ماهي
ماني مصدگه احچي وياك .. تگلهم هلمره ياهي ؟

اسولف وانتَ ساكت و انا محترگه
صدرك نعمة كون ايبوسه اليسحگه
يگلبي اتوهوس اشمالك .. فال الله و لا فالك
اليموت عليه شو ميت .. التموت عليه كتالك

شكثر ابچي دمع يا ضحكتي و عظمي
مثل الهيـل شو طحـنوك يبن امي !
شبيدي و رايح من ايدي .. دمي نشف بوريدي
يروحي عاشگچ عافچ .. صح حبيتي بس هيدي

بچيت و ضحكو عليه و گلت مو عيب
العاشگ صار عاشگ چي يسولف شيب

حرگو‌ گلبي و اخيامـي .. يغص السوط بيتامي
النفس ما يصعد بصدري .. التل شيصعده يجدامي

كلمات : ايهاب عيال
اداء : مسلم الوائلي

@sha3er_100

عقيل العرد..

ارد اسولفهن بشباجك وأطيب

وزعوك اعله المكاتب
يا سليب

دك نفاق
ورفع حكم الري شعارك

فاتحين الماي بأسمك
وعن حلك عبد الله مكطوع الحليب

نحجي بيك نموت
نسكت هم نموت

ومثل وكتك صار اليكلهم حرام
يصير مثلك ( خارجي )
وضد النظام

اليحبك هم يضل مثلك غريب

#قصيدة_وشاب

حمزة ال جبور

كل طواريك ترد بيه بنواعي وتنفتح بيبان ضيمي
والنواعي هواي ماهودن حزني
مرني تلگه بنادم تحرگه الاغاني
بنادم يحبك بفطره
مرني تلگه الفرح جافيها روحي وكلشي رايح من اديه
وانت تندل جرحي وينه
شعطل ملاگاك بيه ؟

مرني تابوت ارد انام بحزتك
مرني وافرشلك احظاني لحظرتك
واشعل شموع الفرح وي الاغاني ويگضي ضيمي بشبگتك

تلگه حيطان الولاية الباهته تزهيها جيتك
استاحشينه الملگه خايب
وانته مامش
لسه يطفح بيك حزني وانت يمي..
طيوف ماتركد بحلمي !
والدروب الضيعتها استاحشتني
مدري تكره خطوة مني وماتدلني

انه خايف ..
ساعة ملاگانه يكبر بيه حزني وماتلمني
بيهه اگلك
هدني خل افرح واجيلك
ومن تهدني

اركض اعله ترابك اخذ منه دمعي
واچهب عليك و اضمن حزني عنك
واضم خوفي انوب اشگگ كل قصايد خاف اهظمك
واضم كل تابوت ودروب النجف خافن تلمك

و اوكف گبالك منارة مهدمة
ياحبيبي الشوگ طشرني والمك
وليش ماتطوي الدروب الجمعتنه وبيها اشمك
وليش ناذر عمرك لكلمن استنكف يلمك ؟

وانت نذري ..
يا دواي بيا كتر تلظم جروح وناسي جرحي ؟
بيا درب كاعد تناطر ؟
ياهو اجاك وبده شوگه بمي ورد من عازتك ؟
بلكي طابوگ المگابر ينكسر گلبه عليه ويحتظني

جنت اكلك ..
لاتروح الدنيا تستفحل الفارگ من تضمك
وجنت اكلك
عيشتني ايامي فرحه وكلي واهس من احنلك
وهسه كل سنيني غربة وماگلتلك

وجنت اگلك
عودت عيني عله شوفك لا تهاجر
المن تعوف العيون التغبش تدور عليك
حته ضحكاتي گبل تلالي بيك
عودتنه نحب نجيك
وتالي بفراگك ذبلنه وبيه متنه
ولمك تراب النجف وفارگتنه
عودتنه !!
وفرهدت كلشي ولا چن عودتنه

#قصيدة_وشاب

مصطفى يحيى (بغداد)


بعدني زغير بس الضحكه الي تلوگ

شاب وحملي تعجز منه حمله لنوگ

موش اجروح خله بكلبي ولفي وراح

اذا ذب لعليه تشوف بس فتوگ

وشنهي الفوگ

خلف الله لملابس ساتره علا لحال

بجفهم بقن بيه الريه ولمنتوگ

اليه تلوگ

يلراهم علي تفصال عرض وطول

ما ترهم عليك احجايت ابن السوگ

اهيمن شوگ

الك بيه ملامح تارسه الحيطان

يلذكراك نسمه بريت المخنوگ

يلمبيوگ

زارعلك ورد منه ستحه الفلاح
وصدكني برحيلك بقن بس عروگ

هواي عثوگ

ينخله وشاتلج لمن يجيني لصيف
وتمدد بسدج وعليه يصير ضلج طوگ

جا شيضوگ
اهو لغركان من يشر بجفه

يريد يفزع الضل فوگ

مامطكوگ

بس شايل وجع ما شايله لمذبوح
من تباوع عليه تشوف بيه طلوگ

علي مهدي
.
.

اچویني بشمس عتبتك
فيّهم حرگ دمي
واعذرني من ما اجي متخايلك يمي

چنت ارد من گبتك
متخوصر ومو تعب ، ماچنت افسرهة

توني عرفت السبب
الناگة التجي محملة الخير بخواصرهة

ملهوف اجي لحضرتك
خبصة سوار بركض
وعيوني جاي تموت
واحسد الجاهل علي بشباچك ايدة تفوت

مستحي منك علي هاكثر حاملني
وانة حبيب العمر يومين و يملني !

ها يا امير الوفة .. يابو رسايل صدگ
وبكل عتب قابل
مرسال الي بحضرتك
جان اعلة راسة يجي شايلهن الزاجل

كاظم اسماعيل الگاطع



كلهن سولفتهن ..لو بعد منهن؟؟
شد عيوني بعصابه واخذني امغمض اندلهن
واندل وين مضمومات واعرف ليش دافنهن

مثل شايب خلص عمره
وبقى بعود الصبه يدندن
انه كلما الوذ بهالتقيه واضحك ويالناس
دمعاتي علي تفتن ..

شفت قصر الأماره ..ويم عبيد اللّه ..
تلاگـــه المستحيل اهناك والممكن
الجسد عالگاع ..والراس بطشت ..والجامع يأذن

وصدى ذيج الشتايم من حرب صفين
من فوگ المنابر واذني تسمعهــــن
ومن طعنة علي الفجر بالمحـــراب ..
اجن من السمه معزيـــــــات ..
والنجمات دمن باللطم خدهن..

ودخان المخيم بعد جواه نار
من طبع الجروح التعتك تحزن
لما نسأل التاريـخ ياهو التستحي منهن

يدفن راسه بجفوفه ..
ويگول اهواي بـﭼـني وسجلهن ضاع
ومضيع دفاترهن ..
عدا ذيج الاجساد الطاهره..
الظلت ثلث تيام ..
ومن ذاك النزف صار التراب بكربلا لين

عدا اجفوف الگمر عباس
ما ذب رايته واثنين اديه ذبهن
عدا سوط الشمر حرك نثايا حسين ..
مدري اشجاوبنه وبالعجل سدهن ..
عدا عيون الفواطم من مشن للشام
عين اعله التراب وعين تربي الجسد والدهن
عدا السجاد فوگ النوگ

و اديه من السلاسل ظل ينز دمهن
ومعرسين والزفهم طلع جناز
ومعرسات والحنه بعدهه بطرف اصابعهن
وگبور النجف والغرّبو بالليل والگصن گصايبهن
ونعوش الأطفال التنحمل مو فوگ سيارات
جن رب السمه ببساط شايلهن
عدا اطلوگ الحوامل بالشته..بالواحد وتسعين
گبل ايامهن والقصف جيبهن ..

كلما نسأل التاريخ ..ياهو التستحي منهن؟
يگول اهواي بـﭼني وبـﭼـه وياي الأنس والجن
هدوم حسين لسه مبللات بدم
وعلى احبال الشمس
بيده النبي شرهـــــــن ..

مهند حمود ..

(جزء من ممازجة شعرية )


صح روحه خضرة العلگ بس الشباچ
صاحب فضل چي بو الفضل بالحضرة

عباس تلميذه الغصن .. والزيتون..
جيران كلبه وبت إديه السفرة

معزب وابو المساكم الطف بالخيل ..
واخوانه ايده اليمنة وإيده اليسرى

بشباجه يومية السنة تذب وجوه
واحنة اذا كلش كلش ..نذب حسرة

عباس صح بي سيف بس مو بس سيف ..
جد الملح وابن ابنه جد العِشرة

بالمجلس العباس بي عَبرة يجوز
بالكَنطرة العباس ما بي عَبرة

عباس سبع الكنطرة بس بالسوح
وبالمستحة العباس سبع الكَطرة

مشاركة من الشاعر
عقيل الكاظمي



آنه سكنه
------
.. وانتظرتك
والرمل يترجّه مزنه ..
اتطفّي چويات الشمس
وانتظرتك ..

وانه ادري الماي صار بعيد ..
ابعد حتى من سابع حلم
وانتظرتك ..
والعطش وياي چان ..
يناطر اباب الخيم
والشمس عل دنيا ذبت حيلها ..
لحد ما هوت
وانكسر ظهر النهار ..
وما اجيت
واختلف وجه الحياة ..
وسافرت آمالي كلها ..
وما اجيت
وزارت النيران خدري ..
وما اجيت
عزِبَت ماعونها ..
امن خيامي وثياب الزغار
نهبت حروف السكينة ..

وعافت احلام اليتامى بلا خضار
وانگضن ساعات ..
مو چنهن بنات لهل زمان
وذيب مَد راسه علينه ..

يراقب ونجماته تلمع
هذا اول ليل اسود مر عليه
وچنت ادري ..
الگمر من يموت ضيه ..
عمري يغتاله الحداد ..

وينجرح ليل القناديل الابية
وچنت ادري ..
الجود ينصاب ويه عينك
الراية متفارگ يمينك
الماي بعدك دمع حنظل
وچنت ادري ..
الليل يغفه
الصبح يطفه
وانه ابقه ..

باحتضاري ..
وبانتظارك ..
آنه سكنه

( خيال الطف )

كريم البغدادي




شمس ضلمه

ونهاية صوت

ونداء من السماء

ياهو العزيز يموت

واختار الحسين الورد والريحان

گلهم روحوا للجنة

والقاسم اذا موجود

هسه نكمل الحنه

ومشوا نجمة بگفة النجمة

كل خطوة بأثرهم خضرت نعمه

وشفت ريشة وگلت عباس راسك حار

نزل ريشتك لا توصللهه النار

وشفت هلال نص الليل بس يفتر

رحت وتقربت منه وطلع يشبه علي الاكبر

سألته شبيك گال حسين

گتله الماي گال حسين

گتله الجنة گال حسين

كل احنه فده لحسين

احنه هوااي عد الله

ياهوا الگالكم سبعين

ورجعت امشي وشفت شمعه وعليها گماط

يعبدالله الخلق روحك عليها شحاط

شو تلمع

انت اول طفل لحسين يتبرع

نزلتلك سمه وشالتك من الگاع

طف متروس كله سباع

واجت زينب وصاحت خويه ابو السجاد

هاي الدنيا موش النه

بعد فترة ويصير فراگ خويه حسين حاللنه

#قصيدة_وشاب
مهدي عيسى .. (البصرة)

مره كتلي...؟
بشنو تفكر وكتلك بكلشي افكر
جاوبتني...!
شنو الكلشي وماعرفته
وضحتلك...؟
اختصار الكلشي انته..؟
كلشي بيك...؟ وكلشي منك..؟

ضحكي منك..! حزني منك..!
وكل حرف لو ما عيونك
ماكتبته..؟
.وحتئ كاس الموت
من قدمته بيدك..؟
خفت عن لا تزعل وتنغث
شربته.....؟
وكلت عن لا باجر يتعبك ضميرك...؟
كمت بستك..؟

وكتلك انته شكد تحبني
جبت موتي بنفس وكته
وجنت اكل لناس عنك
كل حزن روحي...؟
تفكه حجايه منك...؟
ولسه مافكيت حزني
وكمت احس...؟
متونس ع دموعي جنك
ليش...؟

مو باعن شكو ضحكه ع خدي
وباعن سنين البقن....؟
بيه اشترنك
واخخخخخخ...؟
من الناس تسئلني..!
وتكول منين حزنك
واسكت....!
وتنزل دموعي..!
وبيه فوك الكاع ارسمك

وجنت اكلهم..؟
هذا المتاني يجيني
هذا اليرد الضوه لضلمه سنيني
هذا اليشيل الدمع.....؟
وبمكانه يحط فرح بجفون
عيني.....؟
هذا اذا سئلوني عنه بكلبي اكولن
ومن يسئلوني علي ما ادري ويني

#قصيدة_وشاب

حيدر بشير الغالبي / سوق الشيوخ

(مناحر بيض )

بين الليل والنجمه الطيور اطيوف
وبين ال اأخ والدخان عين اتيه
عين انشدهة بلا شوف
وبين النحر والبوسه رمح سابگته شفة اسيوف
وطرب كلش طرب والطرب يومي اسيوف
عليمن والحدرهن شاف عرج الگاع !!!واضلوعه خيم
خيم تستچن بيها الخيل
بيها من التراب ارفوف
بيها من العطش روجين غنتها السفينه شراع
ووكاحة عطش للريح من جانت اشفافه ازلوف
وثوب اسيوف
طرب كلش طرب والطرب ثوب اسيوف
واغاني وكهكة ميتين
واشموس الصحاري اتفيض فوك الدم
واشموس الصحاري وكل رمل بيه دم
يمر لچمة اعله جرح حسين
وازنود المناحر بيض

فرهدوك
وفرهدوا حتى النفس وارماحهم جابوا هواهم
و فرهدوا كل المحابس مالكوا خنصر بديك

بواجي من الشمس للغيم
ودم مهره يصيح "الويل"
وكواريك وصواني اشموع
وحناجر تايه بلاصوت
وچلمات النعاوي تلوع
علام مايصح للغيم چفن يذوب
بواجي اغيوم
بواچي من الشمس للفيّ
لعيون اليمر بيها النعاس ومايمرها النوم
لعيون الثچالى الحنّ الكاروك
والحنه وميض ارماد
لعيون السنابل والايتام البيض
بواچي اغيوم
حنن كل جرح بيه دم .

عباس العبادي ..


ثكل جدم الشفايف والموادع حَل
وسگف غيم النواظر والجفن شمَّل

وضخن رشگ الدمع واسترجع المچتوف
واستهضم الراس البلضوه مجلل

العزيز الينهضم يطبع بكلبه الغيض
مثل طبع الجفوف بخد المدلل

همس بس الرساله اتريد جف مامون
ونبض عرج الرياح المن تهب تندل

والتفت مثل مايلتف اللبلاب
وافترت مثل مايفتر المغزل

كالتله الزلم خيم عليها الخوف
مكرت والضمير البايد اتخزل

زلم ناخر عظمها السيف والدينار
زلم يم حنيت الريحان تتجفل

ماهزت الغيره بروسهم فنجان
وﻻخاوت كصصهم عرگة معدل

وﻻچف الصدك دكة لسنهم باب
وﻻطير الهله علة اشفافهم چلچل

وﻻشمس الخجل شرت اعليهم لون
وﻻبمتونهم ثوب الوفه اتسمل

وﻻكشطة جلدهم صيحة الناموس
وﻻ للنار بيهم فزعة امبلل

من تكبر الدنيه بعين زلمه ايضيع
البحر من يكبر بعينه الحجر ينشل

الذل والخجل مالم شملهن راس
اليخجل مايذل واليذل مايخجل

وانت تشوفهم دنگو للشيطان
زلم يم رنة الدينار تتهدل

ذب حمولك الوياك هبّة ريح
تره الشالت عرش بلقيس تتحمل

وچملني على متوني الحمول خفاف
وثگّل بالحچي ال من اهب يترتل

حاچاهه همس من توصلين حسين
گليله الحجي الگدامك تبدل

گليله الرسايل عد اهلها سيوف
بيك وبالنحور البيض تتغزل

فرق بين الهلا التنگال والتنشاف
اخرس بس ضوه من ايفرفح المشعل

بارد بس عمر حاضن جذرهه الطين
مصاب السنبلة من ال هلا البالمنجل

ولو جدام عينه مفرع المكتوب
بس البي نبض بالنهر يتعدل

حمزة الحسناوي ...

مايسوه النفس دونك

سولفلي اعله گد ريجك يصيت الماي
طشني اعله الخيم شيله
واصيح منين ماتعطش اكلك جاي
خادم ياعشگ ليله
وديني الرمح ماصاعده العباس
صاعد ظهر الكحيلة
ناس الماتحبك صفگلهه ابليس
گاملهه اعله كل حيله

وانه وياك لعيونك
مايسوه النفس دونك

جربني بوكت مابي الك وفاي
تلگاني انفضح عابس
انه اول امير اتسمى چي مشاي
واسود عالخيم لابس
يالعطشان كلش وانت كلش ماي
عمرك ماصرت يابس
من اموتن كون اول من اشوفك جاي
خاطر لو متت واهس

واگلك ياهلا .. شلونك
مايسوه النفس دونك

يالتسوي درب للسيف اذا مر بيك
كرمكم بس اله ولهله
يالتسكت الطفل : ( بوية اعلكيفك موت..
فِشل لاتگعد النبلة )
اصليلك فرض والگه الگلب معذور
اشوفن وجهك القبلة
بالك چان يمي بوكت ماكو فياي
اذا ماموتلك فشلة

وحگ الزهرة مجنونك
مايسوة النفس دونك

احس براحتي ابينك وبينك دوم
واحس مدلل وهيبه
المامنطيني دمعه ابالي يگعد ليش
حرام ابالنا نجيبه
الماكو براسه زينب من اسولف بيك
يضحك حتى عالشيبه
هو المايحسك لونبي يمر بيه
مايصلح فشل عيبه

شبيد المايعرفونك
مايسوه العمر دونك

كلمات : حمزة الحسناوي
صوت : سيد فاقد الموسوي

@sha3er_100

حسن الترابي


نكبر وانته بعدك شاب
تمرح بالرماح وتضحك لعاشور
ناشف وانته كلك ماي
تومي بجفك من ابعيد
للعشاك..
لليبجون..
للمجنون..
للماضاكو مرروة حبك التشبه حلاة الله
لاجن خنصرك مبتور
وسمارك للشمس خبزه وحرز خاف الظلام ع النهار يجور

يالون الرغيف الضاگ طعم امي
وشتلني بصلب ابوي بشوگ مامعذور
ياخطوه شمس تنده فجر زينب
فجر يشبه لعينك والضوه لخاتل وره الشيبه ويشبه للرضيع وصدرك المكسور

ياصوت الحزن بالروح ارسمك مو ذبيح وتنذبح كوه اعله چفي وعالرماح تلوح
ارسمك للفرح شفه بضحكه تفيض
بس صوتك يكسره النوح

ارسمك ..تنذبح بيدي
اشمك..تنكسر بالخيل
اضمك واخذك لبعيد عن الخيل مامذبوح..

تعبت الكلب يحسين
اغنيك وترد مذبوح..